Meid Pai Irail Ko Me Pepehd!

“Kumwail mwasahn, pwe I pahn kohdo duwehte lipirap emen. Meid pai me kin pepehd oh mwasamwasahn, oh kin apwalih eh likou kan.”​—KAUDIAHL 16:15.

1. Pwehki rahn en Siohwa kerendohr, dahme kitail kak kasik?

SIOHWA, sapwelime rahn lapalap kerendohr, oh met kin wehwehkiohng mahwen! Nan kasansalo, wahnpoaron Sohn kilangada mwomwen kairu, “me kohkohda sang nan ewen drakono” me kohwohng “nanmwarki koaros,” de kaun akan, en sampah. Pwehn wia dah? Pwehn, “kaminiminirailpene ong ni mahwen me pahn wiawi ni rahn lapalap en Koht, Wasa Lapalapie”! Sohn kapataiong: “Re kapokonepene nanmwarki kan wasa me adaneki ni mahsen en Ipru Armakedon.”​—Kaudiahl 16:13-16.

2. Ihs me Kok en Makok, oh dahme pahn wiawi ni ahnsou me e mahweniong sapwelimen Siohwa aramas kan?

² Ni ahnsou keren, Siohwa pahn kamwekidih koasoandi en politic en ahnsouwet en kauwehla Papilon Lapalap, minimin en kaudek likamw koaros nan sampah. (Kaudiahl 17:1-5, 15-17) Eri Kok en Makok, Sehdan me Tehpel me lekdekdiohng pohn sampah, pahn kahre nah pwihn kan oh mahweniohng sapwelimen Siohwa aramas popohl kan, me mwomwen sohte pereparail. (Esekiel 38:1-12) Ahpw Koht pahn mwekid pwehn doarehla sapwelime aramas kan. Met pahn tepiada “rahn lapalap oh kamasepwehk en Siohwa.”​—Soel 2:31; Esekiel 38:18-20.

3. Iaduwen komw pahn kawehehda wiewia ko me Esekiel 38:21-23 kohpada?

³ Ehi, Siohwa pahn ketin doarehla sapwelime aramas kan oh kihsang lipwen koasoandi koaros en Sehdan ni ahnsouwo me sampah pahn mihla ni irair me adaneki Armakedon. Wadek mahsen en kokohp en Esekiel 38:21-23, oh medewehla ahnsouwo. Siohwa kasalehda sapwelime manaman ni ah ketikihdo keteu laud, keteu ais takai, kisiniei, oh soumwahu. Masak mihla nan sampah pwon ni en pwihn kan en Kok pingada, oh peipene nanpwungarail. Irail imwintihti kan en Koht Lapalapie me pitla pahn kamakamla ni en Siohwa pahn doadoahngki ah manaman pwehn doarehla sapwelime ladu kan. Ni ahnsou me kokohp en “kahn kamakam kouwahlap” pahn pweida, sohte koasoandi en Sehdan ehu pahn luhwehdi. (Madiu 24:21) Ahpw, pil nan arail weirek en mehla, me suwed kan pahn wehwehki ihs me pwukoahki arail apwal. Pein atail Kohto me kana mahsanih: “Irail pahn esehla me ngehi iei Siohwa.” Wiewia kapwuriamwei pwukat pahn pweida nan atail ahnsou, erein ketier en Sises.

Kohdo Duwehte Lipirap men

4. Ni ahl dah me Sises pahn ketido pwehn kauwehla koasoandi suwed wet en mehkan?

⁴ Kaun lingan Sises Krais mahsanih: “I pahn kohdo duwehte lipirap emen.” Mwekid en lipirap men kin mwadang, ni ahnsou ehu me soh kasikpe, ni en pali moaron en aramas kin memeir. Ni ahnsou me Sises kohdo duwehte lipirap emen pwehn kauwehla koasoandi suwed wet, e pahn doarehla irail ko me uhdahn wie pepehd. E padahkiong Sohn: “Meid pai me kin pepehd oh mwasamwasahn, oh apwalih eh likou kan pwe en dehr kin kilisou kohkohseli oh namenekla mwohn aramas akan!” (Kaudiahl 16:15) Ia kesemwpwalpen mahsan ko? Oh iaduwen atail kak pepehd ni pali ngehn?

5. Koasoandi dahieu ong doadoahk en tehnpaso kin mihe ni ahnsou me Sises mihmih pohn sampah?

⁵ Uhdahno, sounsilasil men sohte pahn kilisouda ma e meirla ni e wie doadoahk. Ahpw met wiawi ni tehnpaso nan Serusalem ni ahnsou me Sises mih pohn sampah oh pwihn en samworou kan oh Lipai kan kin papah ni tehnpaso nan Serusalem. Nan senturi 11 B.C.E. Nanmwarki Depit koasoanehdiong nein Israel samworou epwiki kan oh arail sounsawas mehn Lipai kid kan ong pwihn 24. (1 Kronikel 24:1-18) Ehu ehu pwihn me audaudki pohnangin tohndoadoahk koahiok kid kin welialih arail pwihn pwukoahki doadoahk en tehnpaso pak riau nan pahr ehu erein wihk ehu pwon ahnsou kis. Ahpw, ni Sarawien Impwal, pwihn 24 ko koaros kin wie doadoahk. Ni Sarawien Pahsohpa sawas pil anahn likin pwihn pwukat.

6. Dahme Sises ele kin kosokosoia ni ah mahsani, “Meid pai me kin pepehd oh mwasamwasahn, oh kin apwalih eh likou kan”?

⁶ Ni ahnsou me Sises mahsanih: “Meid pai me kin pepehd oh mwasamwasahn, oh kin apwalih eh likou kan,” ele e kin kosokosoia duwen koasoandi ehu me re kin idawen ahnsouwo me kin pidada sile tehnpaso. Nein mehn Suhs kosonned me adaneki Mishnah kosoia: “Samworou kan kin sile wasa siluh ni tehnpaso: ni Perehn Abtinas, ni Perehn Kisiniei, oh Perehn Taht; oh mehn lipai kan ni wasa rieisek ehu: limen ni kehl limau en Tehnpas en Nahna, pahmen ni keimw pahieu loale, limen ni kehl limau en Kehlen Tehnpaso, pahmen ni keimw paiou liki, oh emen ni Perehn Meirong, oh emen ni Perehn Kahdeng, oh emen mwurin wasao me adaneki Mwoalen Mahk [likin kehlen mwurin Pere Sarawie]. Ohpiser en Tehnpas en Nahna pahn kin kohseli ni awahn ah silasil koaros oh weuwa ndil lullul ehu mwowe, oh ma emen sounsilasil sohte kesihnenda oh indahiong, ‘Maing ohpiser en Tehnpasen Nahna, popohl en ieiang uhk!’ oh e sansalda me e wie memeir, ohpisero pahn poakihkih nah sokono, oh e ahneki pwung en isikla ah likou kan.”​—The Mishnah, Middoht (“Measurements”), 1, paragrahps 1-2, kawehwehda sang rehn Herbert Danby.

7. Dahme karehda samworou kan oh Lipai kan me kin wie silasil ni tehnpaso anahneki en pepehd?

⁷ Mehn Lipai tohto iangahki samworou kan me kin papah nan pwihn pwukat kin wie pepehd ni pwong kan pwehn sile oh pere aramas samin en dehr pedolong nan kelen tehnpaso. Pwehki “ohpiser en Tehnpasen Nahna,” de “kaun me kin apwalih silepen tehnpaso,” kin pidekih wasa 24 ko me silepe ko mwasamwasahn ie erein ahnsoun mwasamwasahn ni pwong, emen emen sounsilasil ko anahne pepehd wasa me e pahn silasil ie ma e sohte men diarekda e wie memeir.​—Wiewia 4:1.

8. Dahkot ahn Kristian kan likou kan ni karasaras?

⁸ Kristian keidi kan iangahki iengerail ladu kan anahne pepehd ni pali ngehn oh apwapwalih arail likou kan ni karasaras. Mepwukat iei mehn kadehde en liki ong duwen arail pilipildahng papah ni sapwelimen Siohwa tehnpas sarawio. Pwehki met, kitail ahneki ngehn sarawi en Koht, de kehl manaman, en sewese kitail kapwaiada atail pwukoa kan oh kapai en wia sounkadehde kan en Wehio. Ni atail pahn meirla ni atail wasahn silasil nin duwen sounpapahn Koht e pahn kihong kitail nan en dierekda rehn Sises Krais, Kaun en tehnpas ngehnin lapalapo. Ma kitail wie memeir ni pali ngehn ahnsouwo, ni karasaras kitail pahn kakilsouda oh atail likou ni karasaras pahn isihsla. Eri iaduwen kitail kak wie pepehd ni pali ngehn?

Iaduwen Kitail Kak Wie Pepehd

9. Dahme karehda onopki Paipel ki sawas en pwuhk en Kristian kan me inenin kesempwal?

⁹ Pwatiet onop Pwuhk Sarawi ki sawas en pwuhk kan en Kristian pahn kamwekidih kitail en pepehd ni pali ngehn. Soangen onop pwukat pahn kaunopkitaildahng doadoahk en kalohk, oh pahn sewese kitail en powehdi kahpwal akan, oh pil pahn kasalehong kitail elen paiamwahu kohkohlahte. (Lepin Padahk 8:34, 35; Seims 1:5-8) Atail onop en oaretik oh wie kekeirada. (Ipru 5:14–6:3) Mwengehn karoson me kitail kin tungtungoale kaukaule kak sewese kitail en pepehd oh pehmetik. E kak pere kitail en dehr dangahnga me kin wia kilel en souitar en mwengehn karoson. Sohte karepen kitail en ahneki irair en souitar en mwengehn karoson oh men meir ni pali ngehn, pwehki Koht ki “ladu lelepek oh loaloakong” me keidi kan kin ketikidahier mwengehn ngehn tohto. (Madiu 24:45-47) Kaukaule tungtungoale mwengehn ngehn sang ni atail kin pein onop oh sang onop en peneinei iei ehu elen wie pepehd oh en “roson ni pwoson.”​—Taitus 1:13.

10. Iaduwen mihding en Kristian kan, oh kapokon kan kin sewese kitail en pepehd ni pali ngehn?

¹⁰ Mihding en Kristian kan oh kapokon kan pahn sewese kitail en wie pepehd ni pali ngehn. Mepwukat kin kihda mehn kangoang kan oh ahnsou mwahu kan en ‘kainengieng emen emen ong limpoak oh doadoahk mwahu kan.’ Kitail en keiou pokonpene kaukaule ni atail “kilang rahno ah kerekerendo.” Ahnsouwet rahno inenin kerendohr. E uhdahn pahn wia “rahn en Siohwa,” ni ahnsou me e pahn ketin kawauwiahla sapwelime kaundahn lahng oh sampah. Ma rahno kin uhdahn kesemwpwal ong kitail​—oh e uhdahn pahn​—kitail ‘sohte pahn tokedihsang pokonpene.’​—Ipru 10:24, 25; 2 Piter 3:10.

11. Dahme karehda kitail kak indahki me doadoahk en kalohk en Kristian me katapan ong en pepehd ni pali ngehn?

¹¹ Mongiong unsek iang pidada doadoahk en kalohk en Kristian me kesemwpwal ong atail en pepehd ni pali ngehn. Atail kaukaule oh ngoang iang kalohngki rongamwahuwo pahn sewese kitail kihong kitail ahnsou mwahu tohto en kosoiaiong aramas akan duwen Mahsan en Koht, oh sapwelime Wehi, oh kupwure kan. E kin kansenamwahu en kalohk sang ihmw lel ihmw, oh pwurela rehn irail kan me kitail tuhwong nan kalohk, oh wia onop en Paipel kan nan soangen pwuhk kan duwehte Knowledge That Leads to Everlasting Life. Elder kan nan Epsos en mahs kak kadehdehda me Pohl kin padahkohng irail “mwohn koaros oh sang ihmw lel ihmw.” (Wiewia 20:20, 21) Ni mehlel, ekei Sounkadehde lelepek kan en Siohwa kin ahneki soumwahu toutou kan me kin kak ekei pak kauwe arail doadoahk en kalohk, ahpw re kin rapahki elen padahkiong meteikan duwen Siohwa oh sapwelime Wehio oh kin ale peren laud sang met.​—Melkahka 145:10-14.

12, 13. Ong karepe dah me kitail en liksang mwenge oh nim daulihla?

¹² Liksang mwenge oh nim daulihla pahn sewese kitail en wie pepehd ni pali ngehn. Ni en Sises kosoia duwen ah ketier, e kangoangehkin sapwelime wahnpoaron kan: “Kumwail pein mwasamwasahn kumwail. Kumwail dehr kedirepwehkin kumwail mwenge laud oh sakau kehlail, oh pwunod kan en sampah wet: pwe Rahno kakete leledohng kumwail ni ahnsou mwadang. E pahn kohdo, rasehng nsar ehu ong aramas koaros pohn sampah.” (Luk 21:7, 34, 35) Kapehden mwenge oh kamam sakau kin uhwong mouren kosonned en Paipel. (Deuderonomi 21:18-21) Lepin Padahk 23:20, 21 kosoia: “Dehr patehng aramas me kin kamam sakau, de medkihla kisin mwenge. Me kin kamam sakau oh kapehd en mwenge kan pahn semwehwehla. Ma ihte me ke kin wia: mwenge oh memeir, ke pahn mwadang kihoula.”​—Lepin Padahk 28:7.

¹³ Mendahki ma kitail saikinte lel ni irair en mwenge oh nim daulihla, ahpw e kak karehong emen en men meir, oh pil dangahnga oh soukautih en wia kupwuren Koht. Uhdahn pahn mie kapwunod kan me pahn kin pidada mouren peneinei, arail roson, oh soang kan me duwehte met. Ahpw, kitail pahn peren ma kitail kin mwohneki mahs Wehin Koht nan atail mour oh koapworopworki me Samatail nanleng pahn apwalih kitail. (Madiu 6:25-34) Pwe ma soh, eri “rahno” pahn kohdong kitail duwehte “nsar ehu,” ele duwehte lidip ehu me soh sansal me pahn saik kitaildi ni atail sasairki de duwehte lidip ehu me mie pahne, duwehte soangen pahn lingan akan me kin lidipihdi mahn akan ni ar sasairki. Met sohte pahn wiawiohng kitail ma kitail kin pepehd, oh uhdahn dehdehki me kitail momour ni “imwin ahnsoun imwi.”​—Daniel 12:4.

14. Dahme karehda kitail en kapakap ngidingidki?

¹⁴ Kapakap ngidingid iei ehu ahl me pahn sewese kitail en pepehd ni pali ngehn. Nan sapwelimen Sises kokohp lapalap, e pil kangoangehki: “Kumwail eri mwasamwasahn, oh kapakap ahnsou koaros pwe kumwail en kehail oh itarohng pitsang mepwukat koaros me pahn wiawi, oh pil warohng uh mwohn silangin Nein aramas.” (Luk 21:36) Ehi, kitail en kapakapki me kitail en ahnsou koaros mih ni pali en Siohwa oh paikihda ahneki kesihnen pwung ni ahnsou me Sises, Nein aramas pahn kohdo pwehn kauwehla koasoandi suwed wet en mehkan. Ong pein kamwahupatail oh ong kamwahupen iengetail me pwoson kan me kitail kin kapakapki, kitail anahne ‘pepehd oh kapakap.’​—Kolose 4:2; Epsos 6:18-20.

Ahnsou Mwotomwotlahr

15. Dahme pahn pweida sang ni atail papah nin duwen sounkalohk kan en me pwung?

¹⁵ Ni atail kin awiawih rahn lapalap en Siohwa, ni mehlel kitail kin inengieng wia uwen atail kak koaros nan sapwelime doadoahk. Ma kitail kin ngidingid kapakapkihong ih duwen met, “doadoahk laud oh katapan mehlel” pahn ritidahng kitail. (! Korint 16:8, 9) Ni ahnsou me Koht kileleohng, Sises pahn wia kadeik oh katohre “sihpw pwung kan me warohng mour soutuk sang rehn “kout” sapwung kan me warohng kasorala soutuk. (Sohn 5:22) Kaidehn kitail me pahn katohre sihpw kan sang rehn Koht kan. Ahpw atail doadoahk nin duwen sounkalohk en me pwung kin ahnsouwet kihong aramas kan ahnsou mwahu en pilada mouren papah Koht oh eri ahneki koapworopwor en katohrorlahng mour ni ahnsou me Sises pahn “ketido nan ah lingan.” Mwotomwotlahn koasoandi wet en mehkan kin kalaudehla anahn en wia doadoahk mehlel sang nan mongiong unsek ni atail rapahki irail ko “me warohng mour soutuk.”​—Madiu 25:31-46; Wiewia 13:48.

16. Dahme karehda kitail en wia sounkalohk ngoang kan en Wehio?

¹⁶ Ahnsou pil mwotomwotla ni mwein Noha, oh ni ahnsou keren e pahn pil mwotomwotlahng koasoandi wet en mehkan. Ihme karehda kitail en wia sounkalohk ngoang kan en Wehio. Atail doadoahk en kalohk kin wie pweipweida, pwehki ehu ehu sounpar aramas kid kid kei kin papdaisla pwehn wia kadehdehpen arail inou ong Koht. Re wialahr kisehn sapwelimen Siohwa pwihn pai​—“sapwelime aramas, sapwelime pelin sihpw.” (Melkahka 100:3) Ia uwen e wia kapai ehu en iang kisehn doadoahk en kalohki Wehio me kin wadohng aramas tohto koapworopwor mwohn “rahn lapalap oh kamasepwehk en Siohwa”!

17, 18. (a) Ni atail kalohk, dahme kitail en kasik me ekei aramas pahn wia? (b) Dahme pahn uhdahn lelohng irail kan me kin kapailok?

¹⁷ Duwehte Noha, kitail ahneki sapwelimen Koht utuht oh perepe. Ehi, aramas kan oh tohnleng kan me wia aramasla, oh Nephilim kan kin kouruhrki rohng me Noha kin wahseli, ahpw met sohte kin kauhdi Noha. Rahnwet, ekei kin kouruhrki atail kin idialahng mehn kadehde kan me kitail momour ni “imwin rahn akan.” (2 Timoty 3:1-5) Kokohp en Paipel me pid soangen kapailok pwukat kin pweida ni ketier en Krais, pwe Piter intingihdi: “Mwohn mehkoaros, kumwail en ese pwe ni imwin ahnsou kan aramas ekei pahn pwarodo me pahn kin kaweidki ar mour pein ar ineng suwed kan. Re pahn kin kepitkin kumwail, ndinda, ‘E soh inoukihong kumwail me e pahn pwurodo? Eri, ia ih? Samatail ko melahr, a mehkoaros duweduwehte sang nin tepin sampah eh wiawihda!’”​—2 Piter 1:16; 3:3, 4.

¹⁸ Irail akan nan rahn wet me kin wia kapailok ele pahn lemeleme: ‘Sohte mehkot me wekla sangete nin tepin kawa. Mour duweduwehte, aramas kan mwengemwenge, niminim, pwopwoud, oh wiahda arail peneinei. Ma Sises pil momour ahnsouwet, e sohte pahn wia kadeik nan ahi ahnsou.’ Ia uwen arail sapwung! Ma irail sohte mehkihla mehkot tohror ahnsouwet, rahn kamasepwehk en Siohwa pahn koanoairaildi, duwehte me Nohliko wia ni ah kauwehla dih suwedo ni mwein Noha.​—Madiu 24:34.

En Uhdahn Wia Pepehd!

19. Iaduwen kitail en kilangwohng atail doadoahk en katohnpadahk?

¹⁹ Ma kitail wiadahr atail inou ong Siohwa, kitail en dehpa men meirkihla atail lamalam sapwung. Met iei ahnsoun wie pepehd, en kasalehda pwoson kokohp sarawi, oh en kapwaiada atail pwukoa en “katohnpadahkihla aramas kan en wehi kan.” (Madiu 28:19, 20) Ni en koasoandi wet kohkohwohng imwisekla, sohte kapai ehu me laudsang atail en papah Siohwa Koht pahn kaundahn Sises Krais oh en iang kisehn doadoahk en kalohngki “rongamwahu wet en Wehio” nan sampah pwon mwohn imwio pahn kohdo.​—Madiu 24:14; Mark 13:10.

20. Kalimeng dah me Kalep oh Sosua wiahda, oh dahme ara wiewia kasalehong kitail?

²⁰ Ekei sapwelimen Siohwa aramas kan papahkiongiher erein sounpar tohto, ele mwein erein arail mour. Oh mendahki ma kitail apwtehn iangala padahk mehlel, kitail en duwehte mehn Israelo Kalep, me kin “idawen Siohwa unsek.” (Deuderonomi 1:34-36) Ih oh Sosua onopadahngehr en pedolong nan Sapwen Inou mwurinte mehn Israel kan pitsang sensel pahn mehn Isip kan. Ahpw, pali moaron en aramas laud kan en Israel sohte pwoson oh eri anahne mihmhite nan sahpwten erein sounpar 40, wasa re mehla ie. Kalep oh Sosua iang irail dadaur pahn apwal akan ahnsou koaros, ahpw kedekedeo ohl riemenet pedolong nan sapwen en inou. (Nempe 14:30-34; Sosua 14:6-15) Ma kitail ‘idawen Siohwa unsek’ oh wie pepehd ni pali ngehn, se pahn ahneki kapai en pedolong nan sapwelimen Koht sampah kapwo.

21. Dahme kitail pahn lelohng ma kitail wie pepehd ni pali ngehn?

²¹ Mehn kadehde kan kasalehda me kitail momour ni ahnsoun imwi oh me rahn lapalap en Siohwa kerendohr. Met kaidehn ahnsoun men meir oh soukautihla nan atail doadoahk en kupwur sarawio. Kitail pahn ale kapai ihte ma kitail wie pepehd oh apwapwalih atail likou mehn kadehde me kitail Kristian mehlel kei oh pil ladu kan en Siohwa. Kitail en nantiong “mwasamwasahn oh dadaurete nan amwail pwoson, kumwail kommwad, oh nan kapehd kehlail.” (1 Korrint 16:13) Nin duwen ladu kan en Siohwa, kitail en kehlail oh eimah. Eri kitail pahn iang kisehn irail ko me kaunopadahngehr ahnsouwo me rahn lapalap en Siohwa pahn leledo, ni atail papah lelepek iang irail me pai kan me wie pepehd.

Iaduwen Komw Pahn Sapeng?

◻ Iaduwen komw pahn kawehwehda atail likouhn liki ni karasaras, oh iaduwen atail kak apwapwalih met?

◻ Ia ekei ahl akan me kitail kak pepehdte ni pali ngehn?

◻ Dahme karehda kitail en kasik me pahn mie irail kan me pahn kapailok, oh iaduwen atail en kilangwohng irail?

◻ Iaduwen atail en kilangwohng atail doadoahk en katohnpadahk nan imwin rahn pwukat?

[Blurb nan pali 16]

Kristian kan ahneki sapwelimen Koht ngehn sarawi pwehn sewese irail pepehd oh kapwaiada arail pwukoa kan

[Kilel nan pali 15]

Komw pahn nantiong pepehd ni pali ngehn oh kolokolte amw likouhn liki ni karasaras?