Kitail en “Pepehd”
1 Mwurin Sises kasalehda duwen dahme pahn wiawi ni ahnsoun imwin rahn akan en koasoandi suwed wet, e kangoange sapwellime tohnpadahk kan en “pepehd.” (Mark 13:33) Dahme kahrehda Kristian kan anahne pepehd? Pwehki kitail mihmi nan ahnsou me keieu keper sang mahs lel met nan poadoapoad en aramas. Kitail sohte kak mweidohng pein kitail en meir ni pali ngehn. Met pahn kasalehda me kitail sohte kin kalahnganki doadoahk me Siohwa ketikihong kitail en wia ni imwin rahn pwukat. Doadoahk dahieu me kitail koasoia?
2 Siohwa ketikihong sapwellime aramas akan doadoahk en kalohkiseli Rongamwahu en Wehin Koht wasa koaros nan sampah—pwe ihte Wehin Koht me kak kamwahuwihala kahpwal kan koaros me kin wiawi sampah. Pwehki kitail kin peipeian sapwellimen Koht pwihn met kin kasalehda me kitail Kristian mehlel kan, me kin pohnese me kitail mihmi ni imwin rahn akan oh pil kitail wehwehki me aramas akan anahne rong “mahsen en mour soutuk.” (Sohn 6:68) Ni atail pahn ngoangki iang doadoahk wet me keieu kesempwal, kitail kin kasalehda me kitail pepehd ni pali ngehn.
3 Dahme Kin Kamwekid Kitail en Kalohk: Nin duwen Sounkadehdehn Siohwa kan, kitail anahne ahneki madamadau me kitail pahn pweida mwahu nan atail doadoahk en kalohk. Limpoak ong Koht oh mehn mpatail kin kamwekid pein kitail en kalohk. (1 Kor. 9:16, 17) Ma kitail pahn wia met, kitail pahn kak doarehla pein kitail oh pil irail kan me kin rong kitail. (1 Tim. 4:16) Kitail en nantihong iang kalohk kaukaule oh wia met lao lel ahnsou me Siohwa kileledi oh kasalehong aramas akan me Wehin Koht pahn wia koperment me pahn keieu mwahu ong aramas akan!
4 Kitail kak wehwehki duwen kesempwalpen doadoahk en kalohk ni atail pahn tamataman ire kesempwal wet: Kahn Kamakam Kowahlap pahn tepida ahnsou me doadoahk en kalohk wiwiawihte. Pwehki kitail sehse iahd rahno de awao met kin wehwehki me kitail anahne pepehd oh onopadahr ahnsou koaros oh pil kapakap ong Siohwa oh mweidong Ih atail kahpwal kan. (Episos 6:18) Doadoahk en kalohk uhdahn wia kekeirada ahnsou koaros. Ahpw, ehu rahn, ni ahnsou keren, doadoahk en kalohk (me wia doadoahk me keieu kesempwal sangete mahso lel met) pahn imwisekla.
5 Kitail en lelepek idawehn kehkehlik me Sises ketikihong kitail duwen en “pepehd.” E inenen kesempwal sang mahs en wia met ahnsou wet. Kitail anahne mwekidki met ni karuwaru. Rahnwet oh rahn koaros, kitail en pepehd ni pali ngehn oh wia uwen me kitail kak en papah Siohwa ahnsou koaros. Ei, kitail en “pepehd oh onohnop.”—1 Deselonika 5:6.