Epwel Sang Kaundahn Koht Ni Mwein Kristian Kan

“E ketin kasalehiong kitail dahme e ketin nekinekid nan kupwure . . . duwen eh pahn ketikipene soahng koaruhsie nanleng oh sampah pahn tahpwteieu, iei pahn Krais.”​—EPISOS 1:9, 10.

1, 2. (a) Iaduwen kihkihpenehn “mehkan nanleng” kin wiawi kohkohdo, tepida sang nan pahr 33 C.E.? (b) Iaduwen Kristian keidi kan kin kasalehda ngehnohte me duwehte Moses oh Elaisa sang 1914?

KIHKIHPENEN “mehkan nanleng” tepiada nan pahr 33 C.E., ni ahnsou me “Israel en Koht” ipwidi. (Kalesia 6:16; Aiseia 43:10; 1 Piter 2:9, 10) Mwurin senturi keieu C.E., rikrikpene wet ekis wawaila nin doken Kristian mehlel kan (me Sises kahdaneki “war mwahu”) dirkihla weren “dihpw” likamw me Sehdan kamwerehdi. Ahpw nin doken “ahnsoun imwi” kerekerendo, Israel en Koht mehlel sansalda mwohn mesen aramas oh nan 1919 idihdda pohn mehkan koaros en Sises.a​—Madiu 13:24-30, 36-43; 24:45-47; Daniel 12:4.

² Erein mahwen keieu en sampah, Kristian keidi kan kin wiahda doadoahk manaman kan me duwehte me Moses oh Elaisa kin wia.b (Kaudiahl 11:5, 6) Sangete nan 1919 re kin kalohki rongamwahuo nan sampah ehu me lemei, oh re kin wia met ki eimahohte me Elaisa anehki. (Madiu 24:9-14) Oh sangete 1922 re kin pakairki en Siohwa kadeik ong tohnsampah, duwehte Moses ah wahdo kalokolok kan en Koht pohn Isip en mahs. (Kaudiahl 15:1; 16:2-17) Luhwen Kristian me keidi pwukat iei me rahnwet wiahda poahsoan en koasoandi en sampah kapw en Sounkadehde kan en Siohwa.

Mwekid en Governing Body

3. Wiewia dah kei kasalehda me mwomwohdisohn Kristian kan en mahs kin soandi mwahu?

³ Sangete nin tepio, werek keidi kan en Sises kin soandi mwahu. Nin doken nempehn tohnpadahk kan kin wie tohtohla, mwomwohdiso kan kin kokouda oh elder kan kin idihdda. (Taitus 1:5) Mwurin pahr 33 C.E., wahnpoaron 12 ko mwekid nin duwen pwihn en governing body ehu. Nin duwen met, re kin ni soh masak tiengla mwowe. (Wiewia 4:33, 35, 37; 5:18, 29) Re koasoanehdi kohpeseng en mwenge kan ong me semwehmwe kan, oh re kadaralahng Sameria Piter oh Sohn en tehkada ripoht kan duwen irail kan me perenki rong. (Wiewia 6:1-6; 8:6-8, 14-17) Parnapas karelahng irail Pohl pwehn kadehdeiong irail me ohl menet me mahs kin kaloke Kristian kan ahnsou wet wialahr emen werek en Sises. (Wiewia 9:27; Kalesia 1:18, 19) Oh mwurin Piter kalohkong Kornelius oh eh peneinei, e pwurela Serusalem oh kawehwe ong wahnpoaron kan oh ekei brother kan en Sudia iaduwen ngehn sarawi kasalehda kupwuren Koht nan irair wet.​—Wiewia 11:1-18.

4. Dahme wiawi pwehn kemehla Piter, ahpw iaduwen ah mour poadoandoarla?

⁴ Eri, governing body mihla pahn lokolok laud. Piter seldi nan imweteng, oh tohnleng men me doarehla ah mour. (Wiewia 12:3-11) Ih tepin ahnsou me emen likin emen wahnpoaron 12 ko ahnekihla pwais ile ehu nan Serusalem. Ni ahnsou me Piter saledek sang nan imweteng, e padahkiong pwehn ehu me pokopokon nan imwen en Sohn Mark nohno: “Kumwail koasoiaiong Seims met, oh pil ong riatail teikan.”​—Wiewia 12:17.

5. Iaduwen tohn governing body wekidekla mwurin kamakamlahn Seims?

⁵ Mwowe, mwurin Sudas Iskariot, wahnpoarono me kahmahmkihla Sises, kemehla pein ih, mie anahn ehu me sansalda en kihong “e pwais doadoahk” nin duwen wahnpoaron men ong emen tohrohr me ieiangehr Sises erein ah kalohk oh me kadehde ah poula oh iasada. Ahpw, ni ahnsou me Seims, rien Sohn, kamakamla, sohte me wiliandi ih nin duwen emen 12 ko. (Wiewia 1:20-26; 12:1, 2) Ahpw, iren Pwuhk Sarawi mwuri me kin koasoia duwen governing body kin kasalehda me e wie tohtohla. Ni ahnsou me akamai ehu pwarada me pid ma Mehn Liki kan me kin idawenla Sises anahne peikiong Kosonned en Moses de soh, ireo wisiklahng “wahnpoaron kan oh ohl mah kan nan Serusalem pwe ren koasoanehdi met. (Wiewia 15:2, 6, 20, 22, 23; 16:4) Dahme kahrehda “ohl mah kan” kin ahnsou wet sansal me re iang pwihn en governing body? Paipel sohte koasoia, ahpw mie kating sansal. Mehlahn Seims oh seldi en Piter kin kasalehda me wahnpoaron kan kak ehu rahn seldi de kamakamla. Nan soangen pwihn wet me koaros kin likih, elder kan, me kin koahiek ni wiepen koasoandi en governing body, pahn tehk pwe koasoandi mwahu en epwel en kohkohweite..

6. Iaduwen governing body kaukaule wie doadoahk nan Serusalem, mendahki uhdahn towe kan solahr mih nan kahnimwo?

⁶ Ni ahnsou me Pohl kodohng Serusalem mpen pahn 56 C.E., e ripohtki ong Seims oh, Paipel mahsanih me, “irail me mah kan en mwomwohdiso pil iang mihmi wasao.” (Wiewia 21:18, New World Translation) Dahme kahrehda wasaht sohte koasoia me wahnpoaron ko iang mihding wet? Paipel sohte kihda pasepeng. Ahpw sounpoadoapoad me adaneki Eusebius mwuhr ripohtki me ahnsoukis mwohn pahr 66 C.E., “luhwen wahnpoaron ko, pwehki arail kalap lelohng apwal sang irail kan me kin pilahni pwehn kemehla irail, pokousang nan Sudia. Ahpw pwehn padahngki arail rohng re seiloklahng nan sahpw koaros ni manaman en Krais.” (Eusebius, Book III, V, v. 2) Mehlel, koasoai kan en Eusebius sohte kohsang nan Pwuhk Sarawi, ahpw e kin parekiong dahme Pwuhk Sarawi kin koasoia. Karasepe ehu, mpen pahr 62 C.E., Piter mihmi nan Papilon​—dohsang Serusalem. (1 Piter 5:13) Mendahki met, nan pahr 56 C.E., oh ele lau lel pahr 66 C.E., ehu governing body kin wie doadoahk nan Serusalem.

Epwel nan Ahnsou Pwukat

7. Kaparekiong governing body en senturi keieu, wekpeseng dahieu me pid irail kan me towehda Governing Body rahnwet?

⁷ Sang pahr 33 C.E. lau lel kamakam kowahlap pohn Serusalem, e sansal me irail tohn governing body kin audaudkihda Kristian mehn Suhs akan. Ahnsou me e pwarek nan pahr 56 C.E., Pohl esehda me Kristian mehn Suhs tohto nan Serusalem, mendahki “ahr kin kolokolte Kosonned en [Moses].”c (Seims 2:1; Wiewia 21:20-25) Soangen mehn Suhs pwukat ele kin apwalki medemedewe me emen Mehn Liki kak iang wia emen tohn governing body. Ahpw, nan ahnsou pwukat, mie ehu wekidekla ong irail ko me towehda pwihn wet. Rahnwet, pali moron en towehkan iei Kristian Mehn Liki keidi kan, oh Siohwa kin inenen kapaiada arail epwel.​—Episos 2:11-15.

8, 9. Wiewia dah kei me pwarada rehn Governing Body nan ahnsou pwukat?

⁸ Sangete ahnsou me Watch Tower Bible and Tract Society of Pennsylvania tepiada nan 1884 lau lel nan pahr 1972, president en Society kin anehki manaman laud nan pwihn en Siohwa, nin doken Governing Body kin miniminiong board of directors en Society. Kapai kan me re kin paiekihda erein pahr ko kin kadehdehda me Siohwa kin pwungki soangen koasoandio. Sang nan pahr 1972 lau lel nan pahr 1975, tohn Governing Body kin tohtohkihla aramas 18. Koasoandi kan pil parekiong koasoandio nan keieu senturi ni ahnsou me manaman pil kohwohng pwihn wet, oh ekei irail kin wia director en Watch Tower Bible and Tract Society of Pennsylvania.

⁹ Sangete nan 1975 ekei rehn me 18 pwukat kanekehlahr arail mour nan sampah. Re kalowedier sampah oh ‘iang Sises mwohndi pohn sapwellime mwoahl nanleng.’ (Kaudiahl 3:21) Pwehki met oh kahrepe teikan, ahnsou wet Governing Body audaudki aramas ehk, iangahki emen me kapatapatong nan 1994. Pali moron en irail mahlahr douluhl. Ahpw, brother keidi pwukat kihdaier utuht mwahu ni arail kapwaiada arail pwukoa toutou kan. Iawasa utuht wet kin dierek ie? Atail kilang kekeirada kan nanpwungen sapwellimen Koht aramas akan nan ahnsou wet pahn sapengla peideko.

Utungada Israel en Koht

10. Ihs me iangada me keidi kan nan doadoahk en Koht nan imwin rahn pwukat, oh iaduwen met kin mih nan kokohp?

¹⁰ Mahs nan 1884 kerenieng irail ko koaros me kin werekiong Israel en Koht iei Kristian keidi kan. Ahpw, kedekedeo, ehu pwihn tepiada pwarada, oh nan 1935 pwihn wet sansalda me irail iei “pokon kalaimwun” me Kaudiahl irelaud 7 kin koasoia. Pwehki re anehki koapwoaroapwoar en mour nan sampah, irail pwukat kin mwete “soahng koaruhsie nan sampah” me Siohwa kupwurki en kihpene rehn Krais. (Episos 1:10) Re kin mwete “sihpw teikan” nan ahn Sises karasaras en pelin sihpw kan. (Sohn 10:16) Sangete nan pahr 1935, sihpw teikan kin pokondohng pwihn en Siohwa. Re kin pokondo duwehte “depwek kei, likamwete mwuroi kei me pipihr pwurupwurodohng nan pasarail kan.” (Aiseia 60:8) Pwehki pokon kalaimwun wie tohtohla oh pwihnen me keidi kan kin wie malaulaula nin doken me tohto rehrail kin kanekehlahr arail mour nin sampah ni ahr mehla, sihpw teikan me koahiek kin iangehr alehda pwukoah tohto kan nan doadoahk en Kristian. Ni ahl dah?

11. Kapai dah kei, me mahs kin kohwongete Kristian keidi kan, me pil kohwongehr sihpw teikan?

¹¹ Kalohkiseli wasa koaros wiewia kapwuriamwei kan en Siohwa kin ahnsou koaros wia pwukoah tohrohr ehu ong sapwellimen Koht “wehi sarawio.” Pohl kin koasoiahki met nin duwen meirong en tehnpas, oh ong irail ko me pahn wiahla “pwihn en samworo,” Sises ketikihong irail kehkehlik en kalohk oh katohnpadahk. (Eksodus 19:5, 6; 1 Piter 2:4, 9; Madiu 24:14; 28:19, 20; Ipru 13:15, 16) Mendahki met, The Watchtower en August 1, 1932, kin keieu kangoangehkin irail ko me mwete Sonadap en iang kisehn doadoahk wet. Mehlel, tohtohn soangen sihpw teikan kin wiewiaiehr doadoahk wet. Rahnwet, sihpw teikan kin kerenieng wiahda doadoahk en kalohk koaros me kin keieu wia kisehn arail “papah [Koht] ni rahn oh ni pwong.” (Kaudiahl 7:15) Me rasehng met, nan tepin poadoapoad en sapwellimen Siohwa aramas kan ahnsou pwukat, elder en mwomwohdiso kan kin wia Kristian keidi kan, “usu kan” nin limen pali maun en Sises Krais. (Kaudiahl 1:16, 20) Ahpw, The Watchtower en May 1, 1937, pakairki me sihpw koahiek teikan kak wia laduhn pwihn (presiding overseers). Mendahki ma pil mie ohl keidi kan, sihpw teikan kak alehda pwukoah kan ma ohl keidi kan sohte kak alehda pwukoah wet. Rahnwet, kerenieng elder en mwomwohdiso kan koaros kin iang pwihn en sihpw teikan.

12. Mehn kalimeng dah kan nan Pwuhk Sarawi me kohwong sihpw koahiek teikan me kin alehda pwukoah toutou kan en pwihn?

¹² E sapwung en kihong sihpw teikan soangen pwukoah toutou pwukat? Soh, pwe met kin idawehn dahme wiawi nan poadoapoad. Ekei proselaid en liki kan (mehn keiru) kin anehki pwukoah laud nan Israel en mahs. (2 Samuel 23:37, 39; Seremaia 38:7-9) Mwurin kalipilipla nan Papilon, Nedinim koahiek kan (irail kaidehn mehn Israel me kin wia laduhn tehnpaso) kin alehda kapai en papah nan tehnpaso me mahs mehn Lipai kante me kin pwukoahki. (Esra 8:15-20; Nehemaia 7:60) Pil ehu, Moses, me sansalda ah wekila oh linganla rehn Sises, alehda kaweid mwahu me mehn Midiano Sedro kihda. Mwuri, e pekih rehn nein Sedro pwutako Opap en kaluwa irail nan sahpwtehno.​—Eksodus 18:5, 17-24; Nempe 10:29.

13. Ni arail kin ni karakarak kihong sihpw koahiek teikan pwukoah kan, ngehn kaselel en ihs me keidi kan kin alasang?

¹³ Kerenlahng ni imwin sounpahr 40 nan sahpwtehno, Moses, ni ah mwangih me e sohte pahn pidelong nan Sapwen Inouwo, kapakapki me Siohwa en ketikihda emen me pahn wiliandi. (Nempe 27:15-17) Siohwa padahkiong ih en pilada Sosua mwohn aramas kan oh Moses kapwaiada met, mendahki e kehlailte oh saikinte uhdi ah papah Israel. (Deuderonomi 3:28; 34:5-7, 9) Ki soangen ngehnin aktikitikohte, me keidi kan kin pil kihong ohl koahiek kan en sihpw teikan pwukoah kapai tohto.

14. Kokohp dah kei me kin idialahng kekeiradahn pwukoahn sihpw teikan nan koasoandi en pwihn?

¹⁴ Kekeiradahn pwukoahn sihpw teikan nan pwihn kin pil wia iren kokohp. Sekaraia kohpada me mehn Pilistia kan me kaidehn mehn Israel pahn “duwehla kaun en keinek men nan Suda.” (Sekaraia 9:6, 7) Kaun en keinek kan kin adaneki “shiekhs”, ihme Sekaraia kin koasoakoasoia me emen me mahs kin wia imwintihti en Israel pahn alehda kaudok mehlel oh pahn duwehla kaun en keinek men nan Sapwen Inou. Mwuri, ni ah mahmahsaniong Israel en Koht, Siohwa mahsanih: “Mehn liki kan pahn papah kumwail, nei aramas akan. Re pahn apwalih noumwail pelinmen kan, oh wiahda mwetuwel nan sapwamwail oh apwalih amwail mwetin wain kan. A kumwail, kumwail pahn wiahla samworoun Kauno [Siohwa], ladun atail Koht.” (Aiseia 61:5, 6) “Mehn liki kan” iei sihpw teikan. Irail pwukat alehdaiehr pwukoah kan pwehn wiahda doadoahk tohto nin doken luhwen me keidi kan kanokehla ahr mour nin sampah oh kohla pwehn papah ni irair ehu me unsek nanleng nin duwen “samworoun Siohwa,” ni ahr kapilpene mwoahl lapalap en Siohwa nin duwen “sounpapah kan en atail Koht.”​—1 Korint 15:50-57; Kaudiahl 4:4, 9-11; 5:9, 10.

“Diho . . . Pahn Kohdo”

15. Nan ahnsou imwi wet, mehnia pwihn en Kristian me “mahlahr,” oh mehnia pwihn me kin mwete “dih . . . pahn kohdo”?

¹⁵ Luhwen me keidi kan kin ngoangki kasukuhlihda sihpw teikan ong doadoahk tohto kan. Melkahka 71:18 mahsanih: “A met ni ei mahlahr oh moangepwetalahr, Maing Koht, komw dehr ketin likidmelieiela! Komw ketin ieiang ie nindokon ei pahn kalohki sapwellimomwi roson oh manaman ong dih en mwuhr kan.” Ni ah koasoia ire wet, Watchtower en December 15, 1948, koasoia me mwomwohdisohn Kristian keidi kan uhdahn mahlahr. E pousehla oh koasoia duwen me keidi kan ahr kin ni peren “kilangwohng marain en kokohp en Paipel oh kilangada dih kapw ehu.” Ihs me met kin keieu koasoia? The Watchtower koasoia: “Sises kin koasoiahkin irail me iei sapwellime ‘sihpw teikan.’” ‘Diho me pahn kohdo’ kin wehwehki aramas kan me pahn mour pahn epwel kapw nin sampah me wehin nanleng pahn kaunda.

16. Kapai dah kei irail ko me kisehn ‘dih me pahn kohdo’ kin kilikilangwohng?

¹⁶ Paipel sohte kasalehda ni sansal iahd me Kristian keidi kan koaros pahn mweselsang riarail kan en ‘diho me pahn kohdo’ oh pahn kohla pwehn iang Sises Krais linganla. Ahpw me keidi pwukat kin koapwoaroapwoarki me ahnsouwo me met pahn wiawi kerekerendohr. Wiewia kan me kokohp lapalap en Sises kohpada duwen “ahnsoun imwi” pweidahier sangete nan 1914, oh met kasalehda me ohlahn sampah wet kerendohr. (Daniel 12:4; Madiu 24:3-14; Mark 13:4-20; Luk 21:7-24) Ahnsou keren, Siohwa pahn ketin kapidelong sampah kapw ehu was me ‘diho me pahn kohdo’ pahn ‘sohsohkihla Wehio [nan sampah] me kaunopadahng irail sang nin tepin kawa.’ (Madiu 25:34) Re kin perenki kasikasik kapwurpwurdohn Paradais oh kaiasadahn me mehlahr rar kan sang nan Hades. (Kaudiahl 20:13) Me keidi kan pahn mih wasao pwehn kasamwo irail me iasada pwukat? Mahso nan 1925, Watch Tower en May 1 koasoia: “Kitail en dehr nda dahme Koht pahn wia de dahme e sohte pahn wia . . . [Ahpw] kitail en koasoia me tohn Sarawi [Kristian keidi kan] pahn linganla mwohn kaiasadahn mehn mahs akan [sounkadehde lelepek kan mwohn mwein Kristian kan].” Me parekiong met ni ah koasoia ma ekei me keidi kan pahn momourte pwehn kasamwohdo me iasada kan, Watchtower en September 1, 1989 koasoia: “Met kaidehn anahn ehu.”d

17. Kapai kaselel dah kei me keidi kan, nin duwen pwihn ehu, pahn ehukihong Nanmwarkio, Sises Krais?

¹⁷ Mehlel, kitail sohte ese dahme pahn wiawihong emen emen Kristian keidi. Ahpw ahn Moses oh Elaisa ara iang Sises nan wekilao oh linganlao kin kasalehda me Kristian keidi kan me kaiasada pahn iang Sises ni ahnsou me e pahn kohdo ni lingan pwehn “kopwung ong emen emen nin duwen ah wiewia kan” ni ah ketikihda kadeik. Pil ehu, kitail kin tamanda inou en Sises me Kristian keidi kan me ‘kana’ pahn iang ih ‘kaunda wehi kan ki sokon mete’ ni Armakedon. Ni ahnsou me Sises pahn kohdo ni lingan, re pahn iang ih mwohndi oh “kadeikada keinek eisek riau en Israel.” Rehn Sises, re pahn ‘kamwutpeseng Sehdan pahn aluweluwerail kan.’​—Madiu 16:27–​17:9; 19:28; Kaudiahl 2:26, 27; 16:14, 16; Rom 16:20; Senesis 3:15; Melkahka 2:9; 2 Deselonika 1:9, 10.

18. (a) Ia irair me pid ‘kihkihpenehn mehkan en nanleng rehn Krais’? (b) Dahme kitail kak ndahki ‘kihkihpenehn mehkan en sampah rehn Krais’?

¹⁸ Ni ah apwaliala mehkan, Siohwa kin ketin mwekimwekidwei pwehn “kihpene mehkoaruhsie rehn Krais.” Nin duwen “me koaruhsie nanleng,” kupwure kereniong unsekla douluhl. Tuhpenen Sises oh 144,000 koaros nanleng ong “kapwopwoud en Simwpwulo.” kerendohr. Ihme kahrehda, brother mah tohto sang sihpw teikan, me kin wiliwilian “mehkan en sampah,” alehier pwukoah tohto pwehn utung riarail me keidi kan. Ia uwen atail ahnsou kin wia ahnsou kaperen en momour ie! Ia uwen kaperen en kilang kupwuren Koht kohkohwong en pweida! (Episos 1:9, 10; 3:10-12; Kaudiahl 14:1; 19:7, 9) Oh ia uwen sihpw teikan kin perenki utung riarail me keidi kan nin doken pwihn riau pwukat koaros kin papahpene nin duwen “pwihn ehu” pahn “silepe tehmen” pahn Nanmwarkio, Sises Krais, oh ong kalinganpen Kaun Lapalapie, Siohwa Koht!​—Sohn 10:16; Pilipai 2:9-11.

[Nting tikitik kan me mi pah]

Komw Kak Kawehwe?

◻ Iaduwen pwihn en Koht kin mwekimwekidwei mwowe nan keieun senturi?

◻ Iaduwen Governing Body wiawihda nan poadoapoad en Sounkadehde kan en Siohwa nan rahn pwukat?

◻ Iren Pwuhk Sarawi dah kei me kihda mweimwei en kihong sihpw teikan nan pwihn en Siohwa manaman?

◻ Iaduwen “mehkan nanleng oh sampah” kin kohpene rehn Krais?

[Kilel nan pali 16]

Mendahki tepin tohn governing solahr mihmi nan Serusalem, governing body wiahte ah doadoahk wasao

[Kilel nan pali 18]

Kristian mah keidi kan kin wia kapai ehu ong sapwellimen Siohwa aramas

C. T. Russell 1884-1916

J. F. Rutherford 1916-42

N. H. Knorr 1942-77

F. W. Franz 1977-92

M. G. Henschel 1992-