“Kaunda Paliwaramwail” Nin Duwen Imwin Mehkoaros Kerendohr

“Eri, imwin mehkoaros kerendohr. Kumwail uhdahn pahn kaunda paliwaramwail kan oh mwasamwasahn.”​—1 PITER 4:7.

1. Dahme kin pidada en “kaunda paliwaratail”?

MAHSEN en wahnpoaron Piter me ntingdi powe pahn anahne doakdoake mour en Kristian akan nin duwen arail kin memourki pein ahr mour. Ahpw Piter sohte padahkiong irail akan me wadek nah kisinlikou ren dehr wiahda ahr pwukoa kan en ehu ehu rahn; e pil sohte kangoange irail en nohn daulihla pwunodki duwen kamakam me kerekerendo. Ahpw, e kangoange irail: “Kaunda paliwaramwail.” Pwen kak “kaunda paliwere” emen anahne kasalehda loalokong pwung oh erpit oh doadoahngki lokaia oh wiewia pwung kan. Met pahn wehwehki, kitail pahn mweidong sapwellimen Koht Mahsen en kaunda atail madamadau oh wiewia kan. (Rom 12:⁠2) Pwehki kitail kin “koukousoan nanpwungen aramas suwed oh dipan akan,” en kaunda paliwaratail me anahn pwehn powehdi kahpwal akan.​—⁠Pilipai 2:​15.

2. Iaduwen sapwellimen Siohwa kanengamah kin kapaiada Kristian akan nan rahnpwukat?

² “Kaunda paliwaratail” kin sewese kitail en ahneki lamalam pwung me pid duwen pein kitail. (Taitus 2:​12; Rom 12:3) Met kesempwal nin duwen mahsan en 2 Piter 3:​9 mahsanih: “Kauno (Siohwa) sohte kin ketin pwapwand ni wiepen sapwellime inou, duwen ekei ar kin lemeleme. Ahpw e kin ketin kanengamahiong kumwail, pwehki eh sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.” Tehk me Siohwa kin kanengamah, kaidehn ongete aramas soh-pwoson akan, ahpw pil “kanengamahiong kumwail”​—⁠tohn mwomwohdisohn Kristian akan. Pwekida? Pwehki, “eh sohte ketin kupwurki emen en lekdekla.” Mwein ekei anahne kawukila ar mour oh kapwungala ar mour pwen kak konohdi kisakis en mour soutuk. Eri, kitail pahn tehk wasa kan me kitail kak kapwungala de kamwahuiala nan atail mour.

“Kaunda Paliwaratail” Nanpwungen Tohnpeneinei kan

3. Peidek dah kei pahpa oh nohno kan kak peidek pein rehrail me pid neirail seri kan?

³ Peneinei anahne wia wasahn popohl ehu. Ahpw ekei peneinei kan kin duwehte “ihmw ehu me mie akamaipene.” (Lepin Padahk 17:1) Iaduwen omw peneinei? Omw peneinei kin “kadohwanewei sang kumwail soangen mwakar koaros, soangen lingeringer koaros, soangen lahlahwe koaros”? (Episos 4:​31) Ia duwen noumw seri kan? Irail kin pehmada limpoak sang kumwail? (Pil kilang Luk 3:​22.) Kumwail kin isaneki ahnsou mwahu en kaweid oh kaiahne irail? Kumwail kin ‘kaiane ni pwung’ oh sohte kin mwakar oh lingeringer? (2 Timoty 3:​16) Pwe seri kan iei “kisakis ehu sang rehn Siohwa,” e kin inenen nsenohkin iaduwen pahpa oh nohno kan kin apwaliahda irail.​—⁠Melkahka 127:⁠3.

4. (a) Dahme kak imwikihla ma emen ohl pwopwoud pahn lemeiong eh pwoud lih? (b) Iaduwen lih pwopwoud kan kak kalaudehla popohl nan peneinei?

⁴ Iaduwen atail pwoud? “Ohl akan uhdahn pahn poakohng ar werek kan duwehte ar kin poakohng pein paliwararail. Ohl me kin poakohng eh werek, kin poakohng pein ih. Sohte me kin kailongki pein paliwere. Pwe e kin kamwenge oh e kin kanai, duwehte Krais eh kin ketin apwalih mwomwohdiso.” (Episos 5:​28, 29) Ohl akan me kin lemei, kin kawehla onopek nan imwarail akan oh pil kin kawehla e nanpwungmwahu rehn Koht. (1 Piter 3:7) Iaduwen lih pwopwoud kan? Irail pil anahne “uhpah arail pwoud kan, duwehte arail kin uhpah Kauno.” (Episos 5:​22) Ma lih pwopwoud kan pahn medemedewe en kaperenda Koht, met pahn kak sewese ih mahkong sapwung kan en eh pwoud ohl. Ekei pak lih pwopwoud kan kin men kasalehda ahr pwung. Lepin Padahk 31:26 mahsanih duwen lih pwopwoud koahiek men: “Eh lokaia me maledek oh kin diren loalokong.” Ni eh kasalehda kadek oh wahuneki eh pwoud ohl, e kin kolokol popohl rehn Koht, oh e kin kalaudehla peren en peneineio pwon.​—⁠Lepin Padahk 14:⁠1.

5. Dahme kahrehda pwulopwul kan anahne kapwaiada kaweid en Paipel en wia mwahu ong ahr pahpa oh nohno kan?

⁵ Pwulopwul akan, kumwail kin wia mwahu ong amwail pahpa oh nohno kan? Kumwail kin doadoahngki lokaia keng de lokaia me sohte kin kasalehda wahu me aramas tohto en sampah wet kin doadoahngki? De kumwail kin peikiong kosonned en Paipel: “Seri kan, ih amwail pwukoahn Kristian akan: peikiong samamwail oh inamwail kan, pwe ih me pwung. ‘Kahkahki semomw oh inomw,’ iei tepin kosonned me inou ehu iang. Eri, iet inowo: “pwe ke en pweida mwahu oh mour werei nin sampah”?​—⁠Episos 6:⁠1-3.

6. Iaduwen kitail kak rapahki popohl rehn iengatail tohn kaudok akan?

⁶ Kitail pil kasalehda me kitail kin “kaunda paliwaratail” ni ahnsou me kitail kin “rapahki popohl ni eh kehl unsek” rehn iengatail tohnkaudok mehlel akan. (1 Piter 3:​11) Akamaipene oh sawehwepene kin pwarada ekei pak. (Seims 3:2) Ma saminiminpene kin mihmihete, popohl en mwomwohdiso pwon pahn kak sohla. (Kalesia 5:15) Eri, en mwadang kapwungala saminiminpene; oh rapahki ahl akan me pahn pweida.​—⁠Madiu 5:​23-​25; Episos 4:​26; Kolose 3:​13, 14.

“Kaunda Paliwaratail” me pid Pwukoah en Peneinei

7. (a) Iaduwen Pohl kangoange “kaunda paliwaratail” me kin pid pwukoah en peneinei nan ehu ehu rahn? (b) Iaduwen Kristian ohl oh lih pwopwoud kan pahn anahne kilangwong ahr pwukoah nan ihmw akan?

⁷ Wahnpoaron Pohl kaweidkin Kristian akan “en ese kaunda nsenarail.” (Taitus 2:​12) Pil tehk nan irelaudo, Pohl kangoange lih pwopwoud kan en “poakohng arail pwoud kan oh neirail seri kan, re en kin kanahieng pein irail pwe re en min, re en wiahla lih wiewia mwahu en nan ihmw oh peikiong arail pwoud kan.” (Taitus 2:​4, 5) Pohl ntingihdi met nan pahr 61-​64 C.E., sounpahr kei mwohn koasondi en mehn Suhs akan pahn imwisekla. Ahpw, pwukoah en ehu ehu rahn, duwehte kamwakel nan ihmw, pil kesempwal. Ohl pwopwoud oh lih pwopwoud kan anahne kilangwong ahr pwukoah me kin pid ehu ehu rahn nan ihmwarail kan nin duwen mehkot kesempwal, pwe “emen dehr lahlahwehki mahseno sang rehn Koht.” Emen ohl pwopwoud, pehk mahkong emen me mwemweitla reh pwehki e sohte onehda imweo. E kawehwehda me e sohte onehda imweo pwehki “e wia doadoahk en pioneer.” Inenen mwahu ahnsou kitail kin tohnmeteikih atail ahnsou ong Wehio, ahpw anahne en dehr tohnmeteikihla atail ahnsou ong kamwahupen atail peneinei kan.

8. Iaduwen ohl pwopwoud kan apwaliala ahr peneinei kan ni toupahrek?

⁸ Paipel kangoange pahpa kan en kihong ahr ahnsou keieu ong ahr peneinei kan, oh mehmen me sohte apwalih kiseh kan “e kahmahmkilahr eh pwoson, oh e suwedsang irail kan me sohte arail pwoson.” (1 Timoty 5:8) Koasondi en mour pahn wekpeseng nan sampah pwon, oh e pahn mwahu en dehr nohn kesempwaliki dipwisouhn sampah kan. “I en dehr wiahla aramas kepwehpwe de semwehmwe,” sounnting en Lepin Padahk 30:⁠8 kapakapki. Ahpw, pahpa oh nohno kan en dehr pohnsehsehla anahn akan en paliwar en neirail seri kan. E pahn wia elen loalokong, karasepe ehu, sohte apwaliala anahn en eh peneinei pwehn kak kalaudehla ah pwais en mwomwohdiso? Met soh pahn kalingeringer nah seri kan? Ni pali teio, Lepin Padahk 24:27 mahsanih: “Ke dehr kauwada imwomw oh koasoanehdi loale, ke lao kaunopada omw mwaht akan nan sapwomw, oh ke wehwehkiher me ke kakehr mour sang loale.” Ehi, apwalihada peneinei ni pali war me kesempwal, ahpw, ‘kauwada imwomw oh koasoanehdi loale’​—⁠ni pali ngehn oh pepehm​—⁠me kesempwal.

9. Dahme kahrehda ohl pwopwoud kan anahne en medemedewe en wiahda pilahn kan ma irail pahn mehla de soumwahuda?

⁹ Ke koasonehdier ehu koasondi en apwali omw peneinei ma ke pahn mehla? Lepin Padahk 13:22 mahsanih: “E pahn mie en aramas mwahu men eh kepwe me e pahn kihong nein nah seri kan en sohsohki.” Patehng sohsohki loalokong en Siohwa oh nanpwung mwahu reh, pahpa oh nohno kan anahne sewese neirail kan ni pali war. Nan sahpw tohto, pahpa kan me kin nsenohki ahr pwukoa kan pahn song en nekidala ekis mwohni oh legal will oh insurance. Pwe sapwellimen Koht aramas akan pil kak lelong “paisuwed.” (Eklesiasdes 9:​11) “Oh pahn doareiuk duwehte omw naineki mwohni,” oh wiahda pilahn mwahu pahn kak sewese emen en dehr lelong kahpwal. (Eklesiasdes 7:​12) Nan ekei sahpw, koperment sohte kin pwain epwelipen wini, eri ekei kak wiahda ahr pilipil en nekidala neirail mwohni kan ong anahn en arail peneinei kan me kin pid pali en wini de koasonehdi ehu koasondi en sawas.a

10. Iaduwen pahpa oh nohno Kristian akan pahn “nahkohng” neirail seri kan?

¹⁰ Iren Paipel kan pil mahsanih: “Pwe kaidehk seri kan me pahn nahkohng ar pahpa kan, pwe pahpa kan ong nair seri kan.” (2 Korint 12:14) Aramas akan nin sampah wet kin kalapw sewese neirail seri kan me pid palien sukuhl oh pwopwoud, pwe irail en kak tepida mwahu nan ahr mour. Komw medemedewe en nahkohng noumwail seri kan ahr mour ni pali ngehn? Karasepe ieu, emen seri me laudla kin nantiong en wiahla emen pioneer. Ni mehlel pioneer kan sohte pwung en idingiong aramas teikan en sewese irail ni mwohni kan, ahpw pahpa oh nohno limpoak kan kak pilada en ‘kisekisehki’ neirail seri kan pwen kak mihmihte nan doadoahk en pioneer.​—Rom 12:13; 1 Samuel 2:​18, 19; Pilipai 4:​14-​18.

11. Ma emen pahn ahneki madamadau pwung me kin pid duwen mwohni, met pahn kasansalehda me e sohte eh pwoson? Kawehwehda.

¹¹ Ma emen pahn ahneki madamadau pwung me pid duwen mwohni, met sohte pahn kasansalehda me e sohte ahneki pwoson me koasondi en Sehdan pahn kereniong sohrala. Ihte e kin kasalehda “erpit” oh loalokong pwung. (Lepin Padahk 2:7; 3:​21) Sises mahsanih “pwe aramas akan me kisehn sampah, re me kin loalokong ni mehkan me pid pein irail laudsang me kisehn marain kan ni mehkan me pid ar mour soutuk” ni ahr doadoahngki neirail mwohni. (Luk 16:8) Ihme kahrehda, ekei kilangehr anahnpen en kawukihla ahr doadoahngki neirail mwohni kan, pwe irail en kak apwaliahda mwahu anahn akan en ahr peneinei kan.

“Kaunda Paliwaromwail” me pid Palien Kasukuhl

12. Iaduwen Sises padahkiong sapwellime tohnpadahk kan en powehdi irair kapw kan me pwarada?

¹² “Mwomwen sampah wet pahn mwadang rosala,” oh wukideklahn mwohni kan oh pelien saiens kan kin kekeirada. (1 Korint 7:​31) Ahpw, Sises padahkiong sapwellime tohnpadahk kan en wekid arail koasoandi en pwung ong ahnsouwo. E padahkiong irail ni ahnsou me e tepin kadarpeseng irail en kalohk: “Kumwail dehr wa kohl, silper, de mwohni nan amwail pwekid kan; pil dehr wa edin seiloak, de sekid riau, de suht, de sokon. Pwe tohndoadoahk kin warohng ale soahng kan me e anahne.” (Madiu 10:​9, 10) Ahpw, ehu ahnsou mwuri, Sises mahsanih: “Eri met, ma mie me nah edin mwohni oh koaruk en seiloak mie, a en wahda.” (Luk 22:36) Dahme wukihla? Irair akan. Pelien lamalam kan uhweng ahr doadoahk, oh ni ahnsowet irail anahne apwaliala pein irail.

13. Ia kahrepe keieu ong kasukuhl, oh iaduwen pahpa oh nohno kan kak sewesehda neirail seri kan?

¹³ Duwehte nan atail ahnsou, pahpa oh nohno kan ele mwein anahne medemedewe duwen apwal en mwohni nan rahnpwukat. Karasepe ieu, ke kin tehk me noumw seri kan kin ale kasukuhl mwahu? Kahrepe keieu ong kasukuhl iei en sewese pwulopwul kan en wiahla sounpapah koahiek kan en Siohwa. Kasukuhl me keieu kesempwal iei me kin pid kasukuhl ni pali ngehn. (Aiseia 54:13) Pahpa oh nohno kan pil kin nsenohki duwen koahiek en neirail seri kan ma irail pahn kak apwaliahda pein irail mwuhr. Eri, kaweid noumwail seri kan oh sewese irail en pilada mehnia oaralap kan nan sukuhl me pahn kak sewese irail mwuhr, oh koasoiapene ma e pahn mwahu irail en kalaudehla ahr sukuhl de soh. Pilipil pwukat iei pwukoa en peneinei kan, aramas teikan en dehr kawe ahr pilipil kan. (Lepin Padahk 22:6) Iaduwen irail kan me pilada en kasukuhlih neirail seri kan nan imwarail kan?b Tohto me pweida, ahpw ekei diarada me met doadoahk laud ehu, oh neirail seri kan pil nsensuwedla pwehki met. Eri, ma ke pahn medemedewe duwen ale kasukuhl ni pein imwamwail kan, pilahn mwahu mahs, tehk ma ke koahiek oh pil ahneki kanengamah en kapwaiada soahngen kasukuhl wet.​—Luk 14:28.

‘Dehr Raparapahki Ehu Kamwahu’

14, 15. (a) Iaduwen Paruk sohla ahneki toupahrek ni pali ngehn? (b) Dahme kahrehda e sohte wia elen loalokong ong ih en ‘raparapahki ehu kamwahu ong pein ih’?

¹⁴ Pwehki imwin koasondi wet saikinte leledo, ekei aramas ele pahn rapahki dahme sampah wet kin kihda​—⁠doadoahk ndand kan oh doadoahk pwei mwahu kan oh mwohni. Medemedewe sekretari en Seremaia, Paruk. E weirengki: “I solahr kak! Kauno, pil ketikidohng ie pahtou pwehn kalaudehla ei kahpwal akan. Solahr angi pwehki ei weirek, oh I solahr kak kommoal!” (Seremaia 45:3) Paruk pwangada. Papah nin duwen sekretari en Seremaia iei doadoahk apwal ehu oh kapwunod. (Seremaia 36:​14-​26) Oh kapwunod wet mwomwen sohte pahn imwi. Sounpar 18 pahn dauli mwohn Serusalem pahn ohla.

¹⁵ Siohwa mahsanihong Paruk: “Ahpw ngehi, Kauno, pahn kauwehla dahme I kauwadahr oh usada dahme I padokedier. Ih met me I pahn wiahiong sampah pwon. Ia duwe, ke raparapahki ehu kamwahu ong pein kowe? Eri, ke dehr wia met.” Paruk sohlahr doadoahngki eh toupahrek. E tepida ‘raparapahki ehu kamwahu ong pein ih,’ mwein mwohni, ndandla, de dihpwisou kan. Pwe Siohwa pahn “usada dahme e padokedier,” ia katepe en raparapahki mehpwukat? Siohwa ketkihong Paruk kataman wet: “Pwe I pahn ketikihdo kahpwal pohn aramas koaros, ahpw kowe, ke pahn pitla sohte mehla, wasa kis me ke pahn kohla ie.” Dipwisou kan en sampah sohte pahn kak pitlasang ohlahn Serusalem! Siohwa inoukihda me “mouren” Paruk te pahn pitla.​—⁠Seremaia 45:​4, 5.

16. Dahme sapwellimen Siohwa aramas akan nan rahnpwukat sukuhliki sang mouren Paruk?

¹⁶ Paruk kapwaiada sapwellimen Siohwa kaweid, oh me pwungiong sapwellimen Siohwa inou, Paruk pitala. (Seremaia 43:​6, 7) Met wiahda iren kasukuhl kehlail ong sapwellimen Siohwa aramas nan rahnpwukat! Met kaidehn ahnsou en ‘raparapahki ehu kamwahu ong pein kitail.’ Pwekida? Pwehki “sampah me aramas kin inengieng kin sosohrala.”​—1 Sohn 2:​17.

Doadoahngki Mwahu Ahnsou Me Luwehdi

17, 18. (a) Iaduwen Sona mwekidki ahn mehn Ninipe kan kolukihla dihparail kan? (b) Iren mehn kaweid dah me Siohwa padahkiong Sona?

¹⁷ Iaduwen kitail pahn kak doadoahngki mwahu ahnsou me luwehdi? Sukuhlikisang mouren soukohp Sona. E “kohla Ninipe . . . , oh pakairki: ‘Mwurin rahn pahisek kahnimw Ninipe pahn mwomwla.’” Sona ahpw pwuriamwekihla pwe mehn Ninipe kan mwekidki eh pakair oh koluhla! Eri, Siohwa sohte kawehla kanihmwo. Iaduwen Sona mwekidki met? “Eri Maing Kaun,[Siohwa], komwi ketikihweisang ei mour, pwe ei mehla mwahusang ei momour.”​—Sona 3:​3, 4; 4:⁠3.

¹⁸ Siohwa uhd padahkiong Sona mehkot kesempwal. Koht, ahpw “ketin kawosehda tuhke pwoat pwe Sona en mih pahn mweteh, pwe en nsenamwahu. Sona eri inenen perenkihda tuhke pwoatet.” Ahpw ahn Sona perenkihda tuhke pwoatet, sohte werei, pwehki tuhke wet mangada. Sona tepida “lingeringer”. Siohwa kasansalehda mouren eh men padakih Sona ni eh mahsanih: “Ia duwe, omw lingeringerki tuhkeo me pwung? . . . eri, ia uwen ei sohte pahn poakehla tohn kahnihmw wet Ninipe, [irail sohte ese ia wekpeseng en pehrail kan ni pali mwaun oh pehrail kan ni pali meing] kahnimw kalaimwun wet me seri soh dipe kei me tohtohsang 120,000 mi loale, oh pil mahn tohtohie?”​—Sona 4:​6, 7, 9-​11.

19. Lamalam en roporop ong pein kitail dah me kitail en liksang?

¹⁹ Sona kin medemedewe duwen pein eh ineng kan! E kak poakehla tuhkeo ahpw e sohte kak poakehla aramas en Ninipe​—⁠aramas pwukat me ni pali ngehn ‘sohte ese ia wekpeseng pehrail kan ni pali maun oh pehrail kan ni pali meing.’ Kitail mwein pil kaskasik kamwomwalahn aramas suwed kan nin sampah wet! (2 Deselonika 1:8) Ahpw, ni ahnsou me kitail kin kaskasik ahnsowo, kitail kohwahki pwukoa ehu en sewese aramas akan ni pali ngehn me sehse ‘wekpeseng en pehrail kan ni pali maun sang pehrail kan ni pali meing.’ (Madiu 9:​36; Rom 10:​13-​15) Ke pahn doadoahngki ahnsou mwotomwot me luluwehdi pwehn sewese aramas tohto en sukuhliki loalokong kesempwal en Siohwa? Soangen doadoahk dah kei me kak kapwarehda soahngen peren duwehte sewese aramas akan en koanoahdi mour soutuk?

Pousehla Memourki “Kaunda Paliwaratail”

20, 21. (a) Ia ekei ahl akan kitail kak kasalehda atail kak “kaunda paliwatail kan” erein rahn kan kohkohdo? (b) Kapai dah kei pahn kohsang memourki “kaunda paliwaratail kan”?

²⁰ Nin doken ahn Sehdan koasoandi pahn ohla, kitail pahn lelong irair kapw kan. 2 Timoty 3:​13 kohpada: “Aramas suwed oh me likamw akan pahn nantihweite sang ni me suwed ong ni me suwedsang.” Ahpw dehr “mworusala oh nan kapehd tikitikla.” (Ipru 12:3) Liki Siohwa. (Pilipai 4:​13) Sukuhliki en kawukihla omw mour pwen kak powehdi irair suwed, oh dehr medemedewe duwen dahme wiawihda mahs. (Eklesiasdes 7:​10) Doadoahngki erpit, kapwaiada kaweid me kohsang “ladu lelepek oh loalokong.”​—Madiu 24:45-​47.

²¹ Uwen ahnsou me luluwehdi, kitail sehse. Ahpw, kitail kak nda ni likilik me “imwin sampah kerendohr.” Lao lel imwio, kitail en “kaunda paliwaratail” ni wiewia kan nanpwungen pein emen emen kitail, ni atail kin apwalih pein atail peneinei kan, oh atail doadoahk ong mwohni kan. Ni ahl wet, kitail kak ni likilik en diarekda “mwakelekel oh pwung mwohn silangin Koht ni kapehd popohl”!​—2 Piter 3:​14.

[Nting tikitik kan me mi pah]

Ire kan ong Kousapahl

◻ Iaduwen kitail kak “kaunda paliwartail kan” me kin pid nanpwungen peneinei kan?

◻ Iaduwen kitail kak kasalehda toupahrek en apwalih pwukoa kan nan peneinei?

◻ Dahme kahrehda pahpa oh nohno kan anahne nsenohki en neirail seri kan ahr kasukuhl?

◻ Dahme kitail sukuliki sang Paruk oh Sona?

[Kilel nan pali 10]

Ni ahnsou me ohl pwopwoud men oh lih pwopwoud men pahn lemei ong pein emen emen, ira kin kaluwetala ahr nanpwungmwahu rehn Siohwa

[Kilel nan pali 11]

Pahpa oh nohno kan anahne nsenohki kasukuhl en neirail seri kan