Kapai Laud kan Sang ni Inou Kapw
“Sises aleier doadoahk en samworo ehu, me siksang mehlel doadoahk en samworo teiko, duwehte inou lap me e ketin kauwada nanpwungen Koht oh aramas eh siksang mehn mahso.”—IPRU 8:6.
1. Ihs ‘kadaudok en liho’ me inoupe wiawihda nan Ihden, oh iaduwen ‘Sehdan kehpene keimwen neho’?
MWURIN Adam oh Ihp dipada, Siohwa kadeikada Sehdan, meno me pitihdi Ihp, oh Koht mahsanih: “Kowe oh liho pahn kin imwintihtipene; nein liho oh pil noumw kan pahn pil kin imwintihtipene kohkohlahte. Aramas akan pahn sok pohn moangomwen pwe en kamwutepene; oh ke pahn ke keimwen neh.” (Senesis 3:15) Ni ahnsou me Sises papidaisla nan Pillap Sordan nan pahr 29 C.E., Kadaudoko me inoupe wiawihda nan Ihden eri pwarada. Ni ah pwoula pohn tuhkehn kalokoloko nan pahr 33 C.E., kisehn kokohp en mahso pweida. Sehdan ‘kehpeneiehr keimwen nehn’ Kadaudoko.
2. Nin duwen me pein Sises mahsanih, iaduwen ah pwoula kin kapaiada tohnsampah?
2 E kaperen pwe, ohla wet, nin doken e kamedek, sohte poatopoat. Sises iasada sang mehla nin duwen ngehn men me sohte kak pwurehng mehla oh poukdala rehn Semeo nanleng, wasa me e ketikihda kesempwalpen sapwellime nta me kapwilpwildi nin duwen “meirong ehu pwehn wiliandi me tohto.” Ihme karehda, pein sapwellime mahsan pweida: “Ih duwen Nein-Aramas eh uhdahn pahn langada, pwe mehmen me pwosonla ih en ahneki mour soutuk. Pwe iei uwen Koht eh ketin loalloale sampah, me e ketikihdohki Sapwellime Iehros, pwe mehmen me kin pwosonla ih en dehr salongala, a en ahneki mour soutuk.” (Madiu 20:28; Sohn 3:14-16; Ipru 9:12-14) Inou kapw kin wia mehn kapir ong pweidahn kokohp en Sises.
Inou Kapw
3. Iahd inou kapw tepin sansalda ah doadoahk?
3 Mwohnte ah pwoula, Sises padahkihong sapwellime werek kan me nta me kapwilpwildi iei “ntahn inou [kapw].” (Madiu 26:28; Luk 22:20) Rahn eisek mwurin e poukdala nanleng, inou kapw kin sansalda ah doadoahnk ni ahnsou me ngehn sarawi wudekedi pohn tohnpadahk 120 ko me pokopokon nan pere powe nan Serusalem. (Wiewia 1:15; 2:1-4) Wisikpenen tohnpadahk 120 ko ong nan inou kapwo kin kasalehda me inoun “mahso,” inoun Kosonnedo, kin ahnsouwet sohla doadoahk.—Ipru 8:13.
4. Inou mering sohte itar? Kawehwehda.
4 Inou mering sohte itar? Kaidehn. Mehlel, pwehki ahnsouwet e wilialihda, Israel en uduk sohla wia sapwellimen Koht aramas tohrohr kan. (Madiu 23:38) Ahpw met pwehki en Israel sapeik oh arail kesehla sapwellimen Siohwa Me Keidio. (Eksodus 19:5; Wiewia 2:22, 23) Ahpw, mwohn Kosonnedo welialihda, e kin kapwaiada soahng tohto. Erein sounpar epwiki kei, e kin ketikihda elen pwarewohng mwohn Koht oh kihda perepe kan sang kaudek likamw. Kosonnedo kin audaudki ire kan me mwete inou kapw, oh, ki ah meirong kan me kin pwurpwurehng, kin kasalehda en aramas anahne pweipwei sapahl sang nan dihp oh mehla. Mehlel, Kosonnedo kin “kakaun kitail lao lel en Krais eh ketido.” (Kalesia 3:19, 24; Rom 3:20; 4:15; 5:12; Ipru 10:1, 2) Ahpw, sangete ni inou kapw me kapai kan me inoupe wiawihiong Eipraam pahn pweida douluhl.
Wehi Kan Paiekihda Kadaudok En Eipraam
5, 6. Ni pweidahn inoun Eipraam ni pali ngehn, ihs Kadaudok en Eipraam, oh wehi dahieu me tepin alehda kapai kan sang reh?
5 Siohwa inoukihong Eipraam: “Wehi koaros pahn peki I en kapaiirailda nin duwen ei kapaiadahr kadaudokomw kan.” (Senesis 22:18) Pahn inou mering, mehn liki opampap tohto paiekihda arail werekiong Israel, wehi kadaudok en Eipraam. Ahpw, nan ah pweida ni pali ngehn, Kadaudok en Eipraamo iei ohl unsek men. Pohl kawehwehda met ni ahnsou me e mahsanih: “Eri, Koht ketin wiahda inou kei ong Eipraam oh kadaudoke. E sohte mahsanih, ‘oh kadaudoke kan,’ me wehwehki aramas tohto. A e mahsanih, ‘oh kadaudokomw,’ me wehwehki aramastehmen, iei ih Krais.”—Kalesia 3:16.
6 Ehi, Sises iei Kadaudok en Eipraam, oh pwehki Ih wehi kan kin alehda kapai ehu me mwahu sang soahng koaros me wiawihda ong Israel en uduk. Mehlel, tepin wehi me alehda kapai wet iei pein Israel. Mwurin Pendekos 33 C.E., wahnpoaron Piter padahkihong pwihn en mehn Suhs kei: “Eri, sapwellimen Koht inou kan me e ketikihong soukohp ako iei uhdahn ong kumwail, oh kumwail pil iang ahneki inou me Koht ketin wiahiongehr samatail mehn mahs ako. Nin duwen eh mahsanihong Eipraam, ‘I pahn kapaiahkihda aramas en sampah koaros kadaudokomw.’ Koht eri ketin pilada sapwellime Ladu oh poaronehdo mahs rehmwail, pwe en ketin kapaiakumwailda ni eh pahn ketin kahrehiong kumwail koaros en weksang amwail wiewia suwed kan.”—Wiewia 3:25, 26.
7. Wehi dah kei paiekihda Sises, Kadaudok en Eipraam?
7 Mwuri kapaio pil kohieng mehn Sameria kan oh mwuri Mehn Liki kan. (Wiewia 8:14-17; 10:34-48) Ahnsoukis nanpwungen pahr 50 oh 52 C.E., Pohl ntingihong Kristian kan nan Kalesia nan Eisia Mainor: “Pwuhk Sarawi pil kohpadahr mahso me Koht pahn ketin kapwungala mehn liki kan pwehki ar pwoson. Eri, Pwuhk Sarawi padahkiohng Eipraam rongamwahuwo mahso: ‘Pwehki kowe me Koht pahn ketin kapaiahkihda aramas koaros nin sampah.’ Eri, Eipraam ahpw pwosonla, oh Koht ketin kapaiahda. Eri, irail koaros me kin pwosonla, Koht pil pahn ketin kapaiairailda, nin duwen eh pil ketin kapaiahda Eipraam.” (Kalesia 3:8, 9; Senesis 12:3) Mendahki tohtohn Kristian kan nan Kalesia iei “aramas en wehi kan,” re paikihda Sises pwehki arail pwoson. Ni ahl dahieu?
8. Ong Kristian kan ni mwein Pohl, paiekihda Kadaudok en Eipraam kin pil pidada dah, oh ia uwen tohtohn irail, me ikmwuri, alehda soahngen kapai pwukat?
8 Pohl padahkihong Kristian en Kalesia kan, me kohsang ni wehi soh lipilipil kan: “Ma kumwail sapwellimen Krais, eri, kumwail kadaudok en Eipraam, oh kumwail pahn ale dahme Koht ketin inoukidahr.” (Kalesia 3:29) Ong mehn Kalesia ko, kapai kan me kohsang Kadaudok en Eipraam kin pidada arail iang towehda inou kapw oh pil iang kisehn sohso en Sises, iang Sises nan kadaudok en Eipraam. Kitail sehse ia uwen tohtohn mehn Israel kan en mahs. Kitail esehte me re “uhdahn tohto duwehte pihk en oaroahr.” (1 Nanmwarki 4:20) Ahpw, kitail ese me, nempe unsek en iengen Sises kadaudok ngehnino iei meh—144,000. (Kaudial 7:4; 14:1) Irail 144,000 ko kohsang nan “kadaudok koaros, oh lokaia koaros, wehi koaros, oh sahpw koaros” en tohnsampah oh kin iang kisehn apwalihong pil mehteikan kapai en inoun Eipraam.—Kaudial 5:9.
Kokohp Ehu Pweida
9. Iaduwen irail ko nan inou kapw ntingihdi kosonned en Siohwa loalerail?
9 Ni ah kohpada inou kapw, Seremaia ntingihdi: “Inou kapw me I pahn wiahiong mehn Israel pahn duwe met: I pahn kihdi ei kosonned nan kapehdirail kan oh ntingihediong nan mohngiongirail kan.” (Seremaia 31:33) Irair ehu me irail ko nan inou kapwo kin sansalkihda iei me re kin papah Siohwa pwehki ahr poakohng ih. (Sohn 13:35; Ipru 1:9) Sapwellimen Siohwa kosonned kin ntingdi nan mohngiongarail, oh re kin inengieng mehlel en wia kupwure. Mehlel, nan Israel en mahs ekei aramas lelepek kan kin poakohng mehlel sapwellimen Siohwa kosonned. (Melkahka 119:97) Ahpw me tohto sohte kin poakohng sapwellime mahsen. Ahpw mendahki met, re wiahte kisehn wehio. Sohte me kak mihmihte nan inou kapw ma kosonned en Koht sohte kin ntingdi nan mohngiongarail.
10, 11. Ong irail ko nan inou kapw, ni ahl dahieu Siohwa “wiahla arail Koht,” oh iaduwen irail koaros pahn esehla ih?
10 Siohwa pousehla mahsanihki irail ko nan inou kapwo: “I pahn wiahla ar Koht, oh re pahn wiahla nei aramas.” (Seremaia 31:33) Nan Israel en mahsie, me tohto kin kaudokiohng koht en wehi kan, ahpw re wiahte mehn Israel. Ki poahsoan en inou kapw, Siohwa ketin wiahda wehi ngehnin ehu, “Israel en Koht,” me pahn uhd wiliandi Israel en uduk. (Kalesia 6:16; Madiu 21:43; Rom 9:6-8) Ahpw, sohte me kak ieiangete kisehn Israel ngehnin kapw ma e sohla kin kaudok ong Siohwa oh ih kelehpw.
11 Siohwa pil ketin mahsanih: “Sohte emen rehrail pahn anahne padahkihong tohn eh wehi men en ese Kauno (Siohwa), pwehki koaros pahn ese ie, sang me tikitik lel me lapalap.” (Seremaia 31:34) Nan Israel, me tohto kin pohnsowehla Siohwa, oh kin koasoia: “Kauno (Siohwa) sohte kin ketin wia mehkot mwahu de suwed.” (Sepanaia 1:12) Emen sohla pahn iang kisehn Israel en Koht ma e pohnsowehla Siohwa, de kasaminehla kaudek mwakelekel. (Madiu 6:24; Kolose 3:5) Mehn Israel kan ni pali ngehn iei “aramas kan me ese ahr Koht.” (Daniel 11:32) Re perenki ‘loalokongkihla Koht mehlelo oh pil esehla Sises Krais.’ (Sohn 17:3) Esehla Sises kin kaloalehla arail loalokongkihla Koht pwehki, ni ahl tohrohr ehu, Sises “kin ketin kasalehiong aramas akan duwen [Koht].”—Sohn 1:18; 14:9-11.
12, 13. (a) Ki poahsoan dahieu me Siohwa mahkohng dipen irail ko nan inou kapw? (b) Nin duwen mahkpen dihp, iaduwen inou kapw ah mwahusang inou mering?
12 Ikmwuri, Siohwa ketin inoukihda: “I pahn mahkikihong diparail kan oh I solahr pahn tamanda arail sapwung kan.” (Seremaia 31:34b) Kosonned en Moseso kin audaudki kosonned nting epwiki kei me mehn Israel kan anahne kapwaiada. (Deuderonomi 28:1, 2, 15) Koaros me kin kauwehla Kosonnedo kin wiahda meirong kan pwehn pwainkihdi diparail kan. (Lipai 4:1-7; 16:1-31) Mehn Suhs tohto eri kamehlele me re kak pwungkihla pein arail doadoahngki Kosonnedo. Ahpw, Kristian kan, wehwehki me re sohte kak pwainda pwung sang ni pein arail doadoahk kan. Re sohte kak liksang dehr wiahda dihp. (Rom 5:12) Pahn inou kapw, emen kak ahneki nanpwung mwahu mwohn Koht ihte pwehki poahsoan en meirong en Sises. Ahpw, soahngen nanpwung mwahu wet kin wia kisakis ehu, kisakis kadek sapan ehu sang rehn Koht. (Rom 3:20, 23, 24) Siohwa kupwurkihte sapwellime ladu kan en peikiong ih. Pohl mahsanih me irail ko nan inou kapw kin “mih pahn kosonned en Krais.”—1 Korint 9:21.
13 Ihme karehda, pil mie meirong en dihp ong Kristian kan, ahpw ehu me kesempwal sang meirong kan pahn inoun Kosonned. Pohl ntingihdi: “Samworo en mehn Suhs koaros kin wiewia ar doadoahk rahn koaros, wiewiahte soangen meirongkohte pak tohto; ahpw meirong pwukat sohte kak lapwahda dihp kan. A Krais me ketin wiahda meirong ehute me manaman poatopoat ong ni lapwepen dihp akan, e ahpw ketidiong ni palimaun en Koht.” (Ipru 10:11, 12) Pwehki Kristian kan nan inou kapw kin kasalehda pwoson meirong en Sises, Siohwa kin kasalehda me re pwung, sohte diparail, oh irail eri kin mihla nan irair ehu en keidi nin duwen sapwellimen Siohwa seri ngehnin kan. (Rom 5:1; 8:33, 34; Ipru 10:14-18) Ni arail kin wiahda dihp pwehki irail aramas soh unsek, re kin pekih mahk rehn Siohwa, oh ki poahsoan en meirong en Sises, Siohwa kin ketin mahkohng irail. (1 Sohn 2:1, 2) Ahpw, ma irail pein nsenkihda wiahda dihp, re pahn katiasang arail nanpwung mwahu oh iangahki kapai en iang mih nan inou kapw.—Ipru 2:2, 3; 6:4-8; 10:26-31.
Inou Mering oh Inou Kapw
14. Sirkumsais dahieu me anahn pahn inoun Kosonned? pahn inou kapw?
14 Ohl akan nan inou mering kin sirkumsaisla pwehn wia kilel me re mih pahn Kosonnedo. (Lipai 12:2, 3; Kalesia 5:3) Mwurin mwomwohdisohn Kristian tepida, ekei kin pepehm me Kristian kan me kaidehn mehn Suhs anahne en pil sirkumsaisla. Ahpw wahnpoaron kan oh elder kan nan Serusalem, me mwekidkih Mahsen en Koht oh ngehn sarawi, wehwehkihda me re sohte anahne sirkumsaisla. (Wiewia 15:1, 5, 28, 29) Sounpar kei mwuri, Pohl mahsanih: “Eri, ihs me mehn Suhs mehlel, ihs me sirkumsais ni mehlel? Kaidehn ih me sirkumsaisla liki, me e sirkumsais mie ni paliwerehte. Ahpw ih me mehn Suhs mehlelen, me kin wia mehn Suhs loale, met wehwehki me eh mohngiong sirkumsaislahr-iei doadoahk en ngehnen Koht, kaidek doadoahken Kosonned me ntingdier.” (Rom 2:28, 29) Sirkumsais en paliwar, pil ong mehn Suhs en pali uduk kan, solahr kin wia mehkot kesempwal ni pali ngehn mwohn silangen Koht. Ong irail ko nan inou kapw, mohngiong, ah kaidehn paliwar, me anahne sirkumsaisla. Soahng koaros nan arail madamadau, arail ineng kan, oh mwekid kan me suwed de samin mwohn silangen Siohwa anahne lopsang.a Mouren me tohto rahnwet kin wia mehn kadehde duwen manaman en ngehn sarawi ah kak wekidala lamalam en aramas ni ahl wet.—1 Korint 6:9-11; Kalesia 5:22-24; Episos 4:22-24.
15. Iaduwen Israel en uduk oh Israel en Koht kaparekpene ong ni kaundahn nanmwarki?
15 Nan koasoandi en inoun Kosonned, Siohwa kin wia Nanmwarki en Israel, oh kedekedeo e kin ketin kasalehda sapwellime kaunda unsek sang ni ah kin doadoahngki aramas nanmwarki kan nan Serusalem. (Aiseia 33:22) Siohwa kin pil wia Nanmwarki en Israel en Koht, Israel en ngehn, oh sangete nan pahr 33 C.E., e kin kaunda nin doken ah kin ketin doadoahngki Sises Krais, me alehda “manaman koaros. . .nanleng oh pohn sampah.” (Madiu 28:18; Episos 1:19-23; Kolose 1:13, 14) Rahnwet, Israel en Koht kin pohnese me Sises, iei iei Nanmwarki en Wehin Koht nanleng, me kokouda nan 1914. Sises wia Nanmarki men me mwahusang Esekaia, Sosaia, oh nanmwarki lelepek teikan en Israel en mahsie.—Ipru 1:8, 9; Kaudial 11:15.
16. Soahngen koasoandi en samworo dahieu me Israel en Koht kin wia?
16 Israel sohte ihte wia wehi ehu ahpw e pil wia koasoandi en samworo idihdda ehu. Nan pahr 33 C.E., Israel en Koht wiliandi Israel en uduk oh wiahla sapwellimen Siohwa “ladu,” sapwellime “sounkadehde kan.” (Aiseia 43:10) Mahsen en Siohwa ong Israel me kileledi nan Aiseia 43:21 oh Eksodus 19:5, 6 eri kin kadoadoahkiohng Israel en Koht ni pali ngehn. Sapwellimen Koht wehi ngehnin kapw kin ahnsouwet “wia keinek pilipil ehu, pwihn samworo en nanmwarki, wehi sarawi ehu, sapwellimen Koht aramas kei me pilipilda,” me pwukoahki ‘en kalohkiseli wiewia kapwuriamwei kan en nin limen Koht.’ (1 Piter 2:9) Koaros nan Israel en Koht, ohl oh lih kan, kin wiawikihda pwihn en samworo ehu. (Kalesia 3:28, 29) Nin doken arail wia pali keriau en kadaudok en Eipraam, met re kin nda: “Kumwail wehi kan, kumwail en kapinga sapwellimen Kauno aramas akan.” (Deuderonomi 32:43) Irail Israel en ngehn ko me momourte pohn sampah kin wiawikihda pwihn en “ladu lelepek oh loalokong.” (Madiu 24:45-47) Papah sarawi pwung ihte kak wiawihiong Koht ma kitail werekih irail kelehpw.
Wehin Koht—Kaimwsekpen Pweidahn Kokohp
17. Soahngen ipwidi dahieu irail ko nan inou kapw kin alehda?
17 Mehn Israel kan me ipwidi mwurin pahr 1513 B.C.E. mihla pahn inoun Kosonned sangete ni ahnsou me re ipwidi. Irail ko me Siohwa wahlong ong nan inou kapw pil alehda ipw ehu—rehrail, ipw ehu ni pali ngehn. Sises mahsanih duwen met ong mehn Parisio Nikodihmus ni ah mahsanih: “I ndaiong uhk ni mehlel: mehmen me sohte ipwsapahl, e sohte pahn kak kilang Wehin Koht.” (Sohn 3:3) Tohnpadahk 120 ko ni Pendekos en pahr 33 C.E. kin wia tepin aramas soh unsek kan me alehda ipw kapw wet. Ni arail pwungla pahn inou kapw, re alehda ngehn sarawi nin duwen “kadehdehpen” arail sohsohn nanmwarki. (Episos 1:14) Re “ipwisang ngehno” pwehn wiahla seri pwekipwek kan en Koht, me wiahkin irailla rien Sises oh eri wiahla “tohnsohso iang Krais.” (Sohn 3:6; Rom 8:16, 17) Arail “ipwsapahl” ritingada ahl en koapworopwor kaselel kan.
18. Ipwsapahl kin ritingada wenihmw ong koapworopwor kaselel dahieu ong irail ko nan inou kapw?
18 Ni ahnsou me e wiahda inou kapw, Sises wiahda pil ehu inou rehn sapwellime werek kan, oh mahsanih: “Nin duwen Semei eh ketikihongieier manaman en kaunda wasa, I pil pahn kihong kumwail soangen manamanohte.” (Luk 22:29) Inoun Wehi wet kaunopada ahl ong pweidahn kasansal kapwuriamwei ehu, me kileledi nan Daniel 7:13, 14, 22, 27. Daniel kilangada “emen me likamwete aramas” me alehda manaman en nanmwarki sang rehn “ih me sapwellimanki mour poatopoat,” Siohwa Koht. Mwuri Daniel kilangada me “sapwellimen Koht aramas [sarawi] akan ale manaman en kaunda wasa.” Sises iei meno me “likamwete aramas” me, nan 1914, alehsang rehn Siohwa Koht Wehin nanleng. Sapwellime tohnpadahk kan me keiekihdi ngehn sarawi iei me “sarawi kan” me iang ih nan Wehio. (1 Deselonika 2:12) Iaduwen?
19, 20. (a) Ong irail ko nan inou kapw, kaimwsekpen kokohp lingan dahieu me Siohwa inoukihong Eipraam me pahn pweida? (b) Peidek dahieu kitail anahne pil tehk?
19 Mwurin arail mehla, me keidi pwukat kin duwehte Sises me pahn kaiasada sang mehla nin duwen ngehn kei me sohte kak pwurehng mehla pwehn iang ih papah nin duwen nanmwarki kei oh samworo kei nanleng. (1 Korint 15:50-53; Kaudial 20:4, 6) Ia uwen met kin wia koapworopwor kaselel ehu! “Re pahn kakaun nin sampah,” kaidehn ihte sapwen Kenan. (Kaudial 5:10) Re pahn ‘kalowehdi ar imwintihti kan’? (Senesis 22:17) Ehi, oh ni ahl ehu me pahn pweida douluhl, ni ahr pahn kadehde ohlahn kaudok likamw me rasehng lihen netikih paliwere, Papilon Lapalap, oh ni ahnsou me keidi idihdda kaiasada pwukat pahn iang Sises kaunkihda wehi kan “sokon mete” oh kamwutepene moangen Sehdan. Eri irail pahn iang kisehn kapwaiada kaimwsekpen oaretik kan en kokohp en Senesis 3:15.—Kaudial 2:26, 27; 17:14; 18:20, 21; Rom 16:20.
20 Ahpw, ele kitail pahn kalelepek, Inoun Eipraam oh inou kapw kin pidadahte 144,000 lelepek pwukat? Soh, mehteikan me sohte uhdahn iang mih nan inou pwukat pahn pil paiekihda inou pwukat, nin duwen me pahn sansalda nan artikel en mwuri.
[Nting tikitik me mi pah]
a Kilang Insight on the Scriptures, Volume 1, pali 470, ntingda sang rehn Watchtower Bible and Tract Society of New York, Inc.
Komw Tamataman?
◻ Iahd me inou kapw tepin sansalda ah doadoahk?
◻ Dahme inou mering kapwaiada?
◻ Ihs me tepin wia Kadaudok en Eipraam, oh ni ireirekdi dahieu wehi kan kin paikihda Kadaudoko?
◻ Ong irail 144,000 ko, ia kaimwsekpen pweidahn inoun Eipraam oh inou kapw?
[Kilel nan pali 23]
Mahkpen dihp kin wia mehkot laud ong irail ko pahn inou kapw sang irail ko pahn inou mering