Siohwa Kin Kapwaiada Sapwellime Inou Kan Ong Aramas Lelepek Kan
“Pwe Koht, me kitail kin koapworopworki uhdahn pahn ketin kapwaiada sapwellime inou.”—IPRU 10:23.
1, 2. Dahme kahrehda kitail kak likih ni unsek sapwellimen Siohwa inou kan?
SIOHWA kin kupwurki sapwellime ladu kan en kakairada oh kolokolte ahr pwoson Siohwa oh sapwellime inou kan. Ki pwoson wet, emen pahn kak likih Siohwa ni unsek me e pahn ketin kapwaiada sapwellime inou. Sapwellime Mahsen mahsanih: “Kauno [Siohwa], Wasa Lapalap, ketin kahulahr mahsanih, “Dahme I koasoanedier pahn pweida. Dahme I kupwuredahr pahn uhdahn wiawi.’”—Aiseia 14:24.
2 Mahsen wet, “Kauno [Siohwa], Wasa Lapalap, ketin kahulahr,” kin kasansalehda me e kin ketin kahukihla me e pahn ketin kapwaiada sapwellime inou kan. Ih kahrepe sapwellime Mahsen kin mahsanih: “Likih Siohwa ni mohngiongomw unsek. Dehr koapworopworki mehkan me ke pein lemeleme me ke ese. Tamanda Kauno ni omw wiewia kan koaros, oh e pahn ketin kasalehiong uhk ahl me pwung.” (Lepin Padahk 3:5, 6) Ni ahnsou me kitail kin likih Siohwa oh mweidong sapwellime erpit en kahre kitail, elen atail wasahn keid kan pahn kahrekitailong mour soutuk, pwe sapwellimen Koht erpit “kin rasehng tuhke kamour ong irail akan me kin koledi.”—Lepin Padahk 3:18; Sohn 17:3.
Pwoson Mehlel Nan Ahnsoun Mahs
3. Iaduwen Noha kasalehda eh pwoson Siohwa?
3 Sapwellimen Siohwa wiewia mwahu kan en mahs ong irail akan me kin ahneki pwoson mehlel kin kadehde duwen sapwellime likilik. Karasepe ieu, sounpar 4,400 samwa samwalahro, Koht padahkiong Noha me sampah en eh ahnsou pahn ohkihla Nohliko. E padahkiong Noha en kauwada lapalahn warihmw pwehn doarehla mouren aramas akan oh mahn akan. Dahme Noha wia? Ipru 11:7 padahkiong kitail: “Pwoson me kahrehiong Noha eh rong oh peikiong sapwellimen Koht mahsen duwen mehkan me pahn kohdo, me e sohte kak kilangki mese. E peikiong Koht oh wiahda warihmw ehu me kapitala ih oh eh peneinei.” Dahme kahrehda Noha pwoson mehkot me saikinte wiawi, mehkot “me e sohte kak kilangki mese”? Pwehki e eseier duwen sapwellimen Koht wiewia kan ong aramas akan en mahs, met kin sewesekin ih en kalahganki oh kamehlele me dahme Koht mahsanih uhdahn pahn pweida. Eri Noha uhdahn kamehlele me Nohlik pahn wiawi.—Senesis 6:9-22.
4, 5. Dahme kahrehda Eipraam kak likih Siohwa ni unsek?
4 Emen me wia mehn kahlemeng mwahu en pwoson mehlel iei Eipraam. Mpen sounpahr 3,900 samwalaro, Koht mahsanihong ih en meirongkihla Aisek, nah pwutak iehros sang eh pwoud, Serah. (Senesis 22:1-10) Iaduwen Eipraam mwekidki? Ipru 11:17 ketihtihki: “Eri, pwoson me Eipraam meirongkihla nah pwutak Aisek, ni Koht eh kupwurehda en song eh loalopwoat.” Ahpw, tohnleng en Siohwa kauhdi Eipraam. (Senesis 22:11, 12) Ahpw, ia kahrepe Eipraam medemedewe en wia met? Pwehki, nin duwen me Ipru 11:19 mahsanih, “Eipraam lemelemehte me Koht kak ketin komourada Aisek sang mehla.” Ahpw iaduwen Eipraam kak pwoson koapworopwor en kaiasada, pwe e saikinte kilang aramas iasada oh pil e sohte kileledi nan Paipel me emen iasadaier mwohn ni mwein Eipraam?
5 Kitail anahne tamataman me Sera mahkiehr sounpahr 89 ni ahnsou me Koht inoukihong ira pwutak men. Poahsoan en Sera sohte kak wiahda seri—mwomwen mehla. (Senesis 18:9-14) Koht kapwurehdohng poahsoan en Sera kehl en wiahda seri, oh e naitikihdi Aisek. (Senesis 21:1-3) Eipraam ese me ma Koht kak kapwurehdohng poahsoan en Sera kehl en wiahda seri, eri e pil pahn kak kamourada Aisek. Rom 4:20, 21 mahsanih duwen Eipraam: “Eh pwoson sohte mwahn tikitikla, oh e sohte mwahn peikasalki sapwellimen Koht inou. Eh pwoson kin kakehlahda, oh e ahpw kin kapinga Koht. Pwe e uhdahn ese me Koht pahn uhdahn ketin kapwaiada audepen sapwellime inou.”
6. Iaduwen Sosua kasalehda eh kin likih Siohwa?
6 Sounpar 3,400 samwa samwalaro, ni ahnsou me Sosua mahki sounpahr epwiki samwa oh mwurin e kilang erein eh mour duwen ia uwen likilik Koht, e kawehwehda duwen ia kahrepe e kin likih Koht: “Emenemen kumwail patohwan ese nan mohngiongimwail oh ngenomwail me Siohwa amwail Koht ketikihong kumwail soahng mwahu koaros me e ketin inoukidahr. E ketin kapwaiadahr inou koaros me e ketin wiahda, sohte ehu me sapwungala.”—Sosua 23:14.
7, 8. Wiewia dahieu me Kristian lelepek kan nan tepin senturi wia, oh pwekihda?
7 Mpen sounpahr 1,900 samwalahro, aramas karakarak tohto kasalehda ahr pwoson mehlel. Re pohnesehr sang pweidahn kokohp en Paipel kan me Sises iei Mesaia oh re kamehlele sapwellime padahk kan. Re kin pwosonla dahme Sises padahngki, oh ahr pwoson kin poahsoanda teng pohn ire mehlel kesempwal kan oh Nting en Ipru kan. Ihme kahrehda, ni ahnsou me Sises kohpada duwen sapwellimen Koht kadeik ong Suda oh Serusalem pwehki ahr salelepek, re kin kamehlele Sises. Oh pil ni ahnsou me e padahkiong irail dahme re anahne wia pwehn kamourala, re kin kapwaiada.
8 Sises padahkiong aramas akan me kin kamehlele ih me ni ahnsou me sounpei kan pahn kapilpene Serusalem, re en tang. Sounkaris kan en Rom kohdohng Serusalem nan pahr 66 C.E. Ahpw ni kahrepe soh sansal, mehn Rom kan kohkohlahsang Serusalem. Ih kilelo ong Kristian akan en tangasang kahnimwo, pwe Sises mahsaniher: “Ni amwail pahn kilang karis en sounpei kei me kapilpenehr Serusalem, kumwail pahn esehki me ahnsoun eh ohla kerendohr. Eri, ni ahnsowo irail kan me mihmi nan Sudia, re en sopolahng pohn dohl kan; oh me mihmi nan kahnimwo, re en sopohsang loale; oh me mihmi nansapw, re dehpa pwurolong nan kahnimwo.” (Luk 21:20, 21) Irail akan me ahneki pwoson mehlel en sopohsang Serusalem oh tangalahng wasa me sohte keper.
Imwilahn Soh Pwoson
9, 10. (a) Iaduwen kaunen pelien lamalam kan kasalehda ahr sohte kin pwoson Sises? (b) Pwehki ahr soh pwoson, met kin imwikihla dah ong irail?
9 Dahme irail akan me sohte ahneki pwoson mehlel wia? Re sohte tang ni ahnsou me irail kak. Irail lemeleme me ahr kaun akan pahn kak doarehla ahr mour. Ahpw, kaun pwuko oh irail akan me kin idawehnla irail pil kilang duwen mehn kadehde kan me Sises iei Mesaiao. Eri, dahme kahrehda re sohte kamehlele dahme Sises kohpadahr? Pwehki mongiongarail me suwed. Met kin sansalda mwowe, ni ahnsou me re kilang aramas tohto kapilpene Sises mwurin eh kaiasada Lasarus. Sohn 11:47, 48 mahsanih: “Eri, samworo lapalap ako oh Parisi ko ahpw kapokonepene Tohn Mwoalen Kopwung Lapalapo, oh nda, ‘Dahme kitail pahn wia? Pwehki soangen kilel kan me ohl menet kin wiewia! Ma kitail mweidohng en wiewia soahng pwukat, aramas koaros pahn pwosonla, oh lapalap akan en Rom pahn kohdo oh kauwehla atail Tehnpas Sarawio oh atail wehiet pwon!’” Iretikitik 53 mahsanih: “Eri, sang ni rahno kohla, kaunen mehn Suhs ako ahpw wiewie lamalamki duwen arail pahn kemehla.”
10 Manaman kapwuriamwei kaselel ieu me Sises wiadahr—kaiasada Lasarus! Ahpw, kaun en pelien lamalam ako men kemehla Sises pwehki e wiahda manaman wet. Ahr mwersuwed kin sansalda ni ahnsou me “samworo lapalap ako . . . wie lamalamki duwen arail pahn pil kemehla Lasarus, pwehki ih me kahrehda mehn Suhs tohtohie ar keseiraillahr oh pwosonlahr Sises.” (Sohn 12:10, 11) Lasarus ahpwtehn iasada, oh samworo ako men kilang e pahn pwurehng mehla! Re sohte kin nsenohkin kupwuren Koht oh kamwahupen aramas akan. Irail me noarok, medemedewehte duwen pein ahr pwukoah kan. “Pwehki arail kesempwalki ale kaping sang rehn aramas laudsang ale kaping sang rehn Koht.” (Sohn 12:43) Ahpw re dolungada ahr soh pwoson. Nan pahr 70 C.E., karis en mehn Rom akan pwurodo oh kasohrehla ahr wasa oh ahr wehi, oh irail tohto pil iang mehla.
Pwoson Sansalda Nan Atail Ahnsou
11. Nan tepin senturi wet, iaduwen aramas akan kasalehda pwoson mehlel?
11 Nan senturi wet, mie ohl oh lih tohto me ahneki pwoson mehlel. Karasepe ieu, nan tepin pahr akan en 1900, aramas akan kin kaskasik popohl ni ahnsou keren. Ni ahnsowohte, irail akan me kin pwoson Siohwa kin pakairki me aramas akan pahn pidelong nan ahnsou apwal ehu. Ih met me Mahsen en Koht nan pwuhken Madiu irelaud 24, 2 Timoty irelaud 3 kohpadahr. Dahme aramas pwoson pwukat koasoiada uhdahn wiawiehr, tepida nan pahr 1914 ki Mahwen Keieu en Sampah. Mehlel, sampah wet pidelong nan “imwin rahn akan” oh “ahnsou apwal ekei” me Paipel kohpadaher. (2 Timoty 3:1) Dahme kahrehda sapwellimen Siohwa ladu kan ese duwen mehlelpen irairen sampah wet, ahpw aramas teikan sehse? Pwehki, duwehte Sosua, re kin ahneki pwoson me sapwellimen Siohwa mahsen koaros pahn pweida.
12. Rahnwet, sapwellimen Siohwa inou dahieu me sapwellime ladu kan kin likih ni unsek?
12 Rahnwet, sapwellimen Siohwa ladu kan me kin likih ih, mihmiher ni uwen aramas wenerar nan sampah pwon. Re eseiehr sang sapwellimen Koht kokohp akan me kin pweida, me e pahn kerenieng kasorehla koasoandi suwed wet. Eri, irail kin likih me ahnsouwo kerendohr me irail pahn kilang pweidahn 1 Sohn 2:17, oh iren Paipel wet mahsanih: “Sampah wet oh mehkoaros nin sampah me aramas kin inengieng kin sosohrala; ahpw me kin kapwaiada kupwuren Koht pahn momour kohkohlahte.” Sapwellime ladu kan ni unsek kin likih Siohwa me e pahn ketin kapwaiada sapwellime inou.
13. Ia uwen laud komw pahn kak likih Siohwa?
13 Ia uwen laud komw pahn kak likih Siohwa? Komw kak uhdahn likih ih! Mehnda ma ke pahn mehkihla ahmw kin papah ih, e pahn kapwurehuhkodohng mour ni ahnsoun kaiasada. Sises padahkiong kitail: “Kumwail dehr pwuriamweiki mepwukat, pwehki ahnsou ehu pahn kohdo me irail koaros me mihmi nan sousou kan [met wehwehki me Koht pahn kaiasada irail me e kin tamataman] pahn rong kapitie, oh re pahn pedoisang nan arail sousou kan.” (Sohn 5:28, 29) Ke ese toahkte men, kaun en politik men, saintis men, sounpisnes men, de aramas teikan me pahn kak wia met? Ahr wiewia kan en mahs kin kasalehda me re sohte kak. Ahpw Siohwa kak, oh e uhdahn pahn kapwaiada!
Ahnsou Kohkohdo Kaselel ieu ong Aramas Lelepek kan
14. Koapworopwor kaselel dah kei ong ni ahnsou kohkohdo me sapwellimen Koht Mahsen kin inoukihong aramas lelepek kan?
14 Sises kadehdehda me kitail kak likih me pahn mie sampah kapw ehu pahnangin sapwellimen Koht Wehin nanleng ni eh mahsanih: “Meid pai me opampap akan; pwe re pahn sohsohki sampah.” (Madiu 5:5, New World Translation) Met kin kakehlailla sapwellimen Koht inou me diarekda nan Melkahka 37:29: “Me pwung kan pahn koukousoan nan sahpwo oh re pahn sapwenikihla kohkohlahte.” Oh mwohnte matalahn Sises, ni ahnsou me loallap suwed men pwosonla ih, oh Sises uhd mahsanihiong ohlo: “Ke pahn iang ie mi nan Paradais.” (Luk 23:43) Ei, nin duwen Nanmwarki en Wehin Koht, Sises pahn kilang me ohl menet pahn iang iasada nin sampah oh ale pwais ehu en mour kohkohlahte nan Paradaiso. Rahnwet, irail akan me kin pwoson sapwellimen Siohwa Wehio pil kak kaskasik momour nan Paradais ni ahnsou me “[Koht] pahn kin ketin limwihasang pilen masarail koaros. Mehla solahr pahn wiawi, solahr mwahiei, solahr nsensuwed, solahr medek.”—Kaudiahl 21:4.
15, 16. Dahme kahrehda mour pahn inenen meleilei oh popohl nan sampah kapw?
15 Eri, ni ahnsouwet, kitail en medemedewe duwen sampah kapwo. Medemedewe me kitail kin wie kokousoan wasao. Kitail kin mwadangete kilang me wasa koaros aramas peren kan kin wie koukousoanpene ni popohl mwuledek. Re kin paiekihda mih pahn irair akan me kileledihehr nan Aiseia 14:7: “Eri, met sampah pwon pereperenkiher ar kommoaldier oh popohl, oh koaros kin kokoulki koulen peren.” Dahme kahrehda re kin wiahki met? Ehu kahrepe, tehk duwen sohte loahk en wenihmw en ihmw akan. Sohte anahne loahk kan pwe sohlahr mwersuwed oh pei. E duwehte dahme sapwellimen Koht Mahsen kohpadaher: “Aramas koaros pahn mour meleilei pahn mwetehn arail tuhkehn wain de tuhke pik kan, re sohte pahn perki mehkot.”—Maika 4:4.
16 Sohlahr mahwen pwe nan sampah kapw wet, Koht kin kainapwidi mahwen. Pahn wekidohng dipwisoun mahwen kan koaros ong ni dipwisoun popohl. Ni ahl unsek, pwuhken Aiseia 2:4 pweidaher: “Eri, re pahn wekidohng neirail kedlahs akan ni mehn deipwel, oh neirail ketieu kan ni naip en pal tuhke. Sohte wehi ehu pahn mahweniong ehu wehi, de pil pwurehng onopada mahwen.” Eri, ih met me kitail kin kaskasikong! Pwekihda? Pwe pali laud en tohnsampah kapw wet sukuhlikier duwen irewet ni ahnsou me re kin papah Koht nan sampah meringo.
17. Soangen irairen mour dah kei pahn wiawi pahnangin Wehin Koht?
17 Ke pil kilang me sohte aramas semwehmwe. Sohte aramas akan me kin mih nan ihmw sakanakan de doadoahngki likou sakanakan kan de sohte imwarail kan. Aramas koaros kin imwaniki ihmw kaselel kan oh sahpw mwakelekel me tuhke oh wahn rohs kaselel kan kin keirda ie. (Aiseia 35:1, 2; 65:21, 22; Esekiel 34:27) Oh sohte aramas duhpek pwe Koht ketin kapwaiada sapwellime inou me reken mwenge ong koaros pahn wiawi: “Reken wahn pilawa en kin wiewiawihte nan wehiet; wahnsahpw en kin kipehdi dohl akan.” (Melkahka 72:16) Ni mehlel, pahnangin Wehin Koht, paradais kaselel ieu kin kipehdi sampah pwon, nin duwen me Koht kupwurki nan Ihden.—Senesis 2:8.
18. Nan sampah kapw, dahme sohlahr pahn kansensuwedih aramas akan?
18 Ke pil kin pwuriamweikihla kehl me aramas koaros ahneki. Met kin wiawi pwehki re kin ahneki paliwar unsek oh madamadau unsek. Sohlahr soumwahu, medek, de mehla. Solahr aramas me kin mih nan wheelchair de nan imwen wini. Mehpwukat koaros sohlahr pahn wiawi. (Aiseia 33:24; 35:5, 6) Mahn akan pil solahr wia mehkot kamasepwehk ong aramas akan, pwe sapwellimen Koht manaman pahn kamandala irail!—Aiseia 11:6-8; 65:25; Esekiel 34:25.
19. Dahme kahrehda rahn koaros nan sampah kapw pahn “paiamwahu oh popohl”?
19 Ia uwen kaselel irairen aramas akan me poahsoanehda tohnsampah kapw lelepek kan! Arail kehl akan oh koahiek kan oh paien sampah kan kin kadoadoahkong wiewia mwahu kan, kaidehn suwed akan; sawaspene, ah kaidehn siaipene. Oh aramas koaros me ke pahn tuhwong iei aramas akan me ke kak likih, pwehki nin duwen Koht me inoukihda, “aramas akan me sukuhlikihsang Siohwa.” (Aiseia 54:13) Pwe aramas koaros kin mih pahnangin sapwellimen Koht kosonned akan, sampah pahn “direkihla kupwurokong en Siohwa, duwehte madau eh kin direkihla pihl.” (Aiseia 11:9) Ni mehlel, nin duwen me pwuhken Melkahka 37:11 koasoia me rahn koaros nan sampah kapw wet towe kan pahn “paiamwahu oh popohl.”
Ahnsou Kohkohdo Kaperen Ieu Uhdahn Pahn Wiawi
20. Dahme kitail anahne wia, ma kitail men mih nan irairen popohl me pahn wiawi ni ahnsou kohkohdo?
20 Dahme kitail anahne wia pwehn kak ahneki ahnsou kohkohdo kaperen ieu? Aiseia 55:6 (New World Translation) padahkiong kitail: “Rapahki Siohwa, kumwail aramas akan, oh sohpeiong ih. Kapakap ong ih pwe e sohte kin ketin dohsang kumwail.” Oh ni ahnsou me kitail pahn rapahki ih, atail madamadau pahn anahne duwehte me kileledi nan pwuhken Melkahka 143:10: “Komwi me ei Koht; komw ketin padahkihong ie duwen ei pahn kapwaiada kupwuromwien.” Irail akan me pahn wia met pahn kak keid mwahu mwohn Siohwa erein imwin rahn akan oh kak kasik ehu ahnsou kohkohdo kaselel. “Tehk mwahu aramas mwahu, kilang aramas pwung; aramas meleilei kin mie kadaudoke, a me dipan akan pahn mwomwla douluhl, oh kadaudokarail kan pahn kamwomwmwomwla.”—Melkahka 37:37, 38.
21, 22. Dahme Koht kin koasoanehdi nan rahnwet, oh iaduwen kaiahn de kasukuhl wet kin wiawi?
21 Ni ahnsouwet, Siohwa kin malipe aramas akan sang wehi kan koaros irail akan me men kapwaiada sapwellime kupwur kan. E kin koasoanehdi oh kaunopada irail en wiahla poahsoan en sapwellime sampah kapw, nin duwen Paipel kohpadaher: “Ni rahn ekei me pah kohdo [ni ahnsouwet] . . . oh towe kan pahn kin nda: ‘Nna, kitail kohdalahng pohn dohlen [Siohwa] [sapwellime kaudok mehlel ileilei] . . . E ahpw pahn ketin kasalehiong kitail kupwure, pwe kitail en keid nan sapwellime ahl akan.’”—Aiseia 2:2, 3.
22 Kaudiahl 7:9 kin kawehwehda aramas pwukat nin duwen “pokon ehu me inenen kalaimwuhnie . . . re kohsang nan wehi koaros, ni kadaudok koaros, nan sahpw koaros, oh lokaia koaros.” Iretikitik 14 mahsanih: “Ih irail me keidier nan kamakam laudo,” pitsang koasoandi en ni ahnsouwet. Poahsoanpen sampah kapw wet iei mpen aramas wenerar, oh aramas kapw tohto pil kin iangala pwihn wet ehu ehu sounpar. Koaros sapwellimen Siohwa ladu lelepek kan kin ale kaiahn pwehn kaunopada irail ong mour nan sapwellime sampah kapw. Re kin sukusukuhliki mehkan me ngehnen oh koahiek teikan me anahn pwehn kak kawukihla sampah wet en wiahla paradais. Oh re likih ni unsek me Paradais pahn uhdahn pweida pwehki “Koht pahn uhdahn ketin kapwaiada sapwellime inou.”—Ipru 10:23.
Ire Kesempwal kan ong Kousapahl
◻ Pwehki aramas akan kin soh pwoson nan tepin pahro, e imwikihla dah ong irail?
◻ Ia uwen laud sapwellimen Koht ladu kan kak likih Ih?
◻ Koapworopwor dahieu mie ong aramas lelepek kan?
◻ Dahme kitail anahne wia ma kitail men mih nan sapwellimen Koht sampah kapw ni ahnsou kohkohdo?