Ahn Kristian Madamadau ong Tiahk en Mehla kan
1, 2. Ni ahnsou me emen mehla, dahme ah peneinei kin anahne oh soangen kahpwal dah me Kristian kan kin lelohng?
1 Mehla karuwaru en emen kompoakpatail me inenen kansensuwed. Met kin kahrehong kitail en pwuriamweikihla, oh mwuri, pwunod laud. Met kin weksang ni ahnsou kitail kin kilang emen kompoakpatail soumwahuda lokolok oh mehla, ahpw, kitail pahn pil ahneki pwunod, nsensuwed oh pahtou laud.
2 Sohte lipilipil iaduwen kompoakpatail men ah kin mehla, ah peneinei kin anahne sawas oh kamweit. Kristian men me kompoakepah mehla, mwein pil kin lelohng kalokolok sang rehn irail akan me kin ngihtehtehki ahr tiahk en mehla kan me sohte kin poahsoanda pohn Pwuhk Sarawi. Met kin kalap wiawi nan Africa oh pil nan deke kan en Micronesia.
3. Nin duwen me Seims 1:27 kasalehda, dahme kitail pahn keieu nsenohki me pid duwen koasoandi en mehla, oh soangen peidek dah kan me kitail en pein idek rehtail?
3 Dahme pahn sewese Kristian men me kompoakepah men mehla en liksang tiahk en mehla kan me sohte kin poahsoanda pohn Pwuhk Sarawi? Iaduwen ienge me pwoson akan kak sawas ni soangen ahnsou pwukat? Koaros me kin men kaperenda Siohwa kin kesempwaliki pasapengpen peidek pwukat, pwe “iet duwen poadidi ong papah Koht me uhdahn pwung oh unsek mehlelen, me Samatail Koht kin ketin kupwurki: apwalih me sepwoupwou kan oh liohdi kan nan ar apwal akan, oh dehr saminkihla tiahk suwed kan en sampah wet.”—Seims 1:27.
4. Tiahk en mehla tohto kin poahsoanda pohn mehnia padahk, oh soangen pepehm dah kan me aramas kin ahneki?
4 Tiahk en Mehla kan kin Poahsoanda Pohn Padahk me Aramas Tohto Kamehlele: Tiahk en mehla tohto kin poahsoanda pohn padahk me dene aramas mehla kan kin momour ni soh sansal ekis wasa tohrohr oh irail kin mih rehn pahpa oh nohno kahlap mehlahr akan. Pwehn kaperenda irail me melahr akan, me momour akan anahne wiahda tiahk kei. Irail kin masak en kansensuwedih mehn mparail kan me kin kamehlele me mehkot suwed pahn wiawiong arail kousapw ma tiahk pwukat sohte wiawihda.
5. Tiahk en mehla tohto kin uhwong mehnia padahk en Paipel?
5 E sohte konehng Kristian mehlel men en masak aramas oh iang tiahk kan me kin kansensuwedihala Koht. (Lepin Padahk 29:25; Madiu 10:28) Pwuhk Sarawi kin kasansalehda me irail aramas mehla akan sohte kak kehn mehkot, pwe e mahsanih: “Ei, me momour kan ese me re pahn mehla, ahpw me melahr akan sohte ese mehkot. . . . Nantiong doadoahk laud ni soahng koaros me ke pahn wia met, pwe e sohte pahn mie wiewia, de lamalam, de loalokong, de erpit, nan wasahn me melahr akan—oh iei wasa me ke pahn kohla ie.” (Eklesiasdes 9:5-10) Ihme kahrehda, Siohwa Koht padahkiong sapwellime aramas akan en mahs en dehr song kaperenda de koasoiong irail me mehlahr akan. (Deuderonomi 14:1; 18:10-12; Aiseia 8:19, 20) Padahk mehlel en Paipel pwukat kin kasalehda me tiahk en mehla tohto kin uhwong Paipel.
6. (a) Nan sahpw tohto, dahme kin wiawi ni ahnsou me aramas emen kin mehla? (b) Ia kahrepe met kin wiawi?
6 Wiewia kan me kin Wiawi ni Pehdinpwong: Nan wehi tohto, aramas kin kohpene nan imwen me mehlahro oh pehdinpwong. Ni ahnsoun pehdinpwong, aramas kin kamakamadipw oh wia keseng ni ngihl laud pwe irail kin kamehlele me wiewia pwukat pahn kaperenda me mehlahro oh pere tohnpeneinei kan me momour sang wunahni. Aramas kin wiahda kapahrek en kaping pwehn kansenamwahuwih me melahro. Mwurin emen pahn wia kapahrek ieu, tohn mwahiei kan mwein pahn koulki koul en sarawi ehu oh mwurin met, emen tohrohr pahn uhd kesihnenda wia ehu kapahrek. Met kin kak wiawi lao lel ni menseng.a
7. (a) Dahme kahrehda Kristian kan sohte kin iang pehdinpwongki? (b) Dahme kahrehda pehdinpwong kin kalap pidada wunahni?
7 Kristian mehlel emen sohte kin iang tiahk kan me kin wiawi nan pehdinpwong pwehki Pwuhk Sarawi kasalehda me aramas mehlahr akan sohte kak sewese de lidere aramas me momour akan. (Senesis 3:19; Melkahka 146:3, 4; Sohn 11:11-14) Pwuhk Sarawi kin kasalehda me wunahni sapwung. (Kaudiahl 9:21; 22:15) Ahpw, liohdi Kristian emen mwein pahn apwaliki en kauhdi meteikan en wia wiewia kan me kin pid wunahni. Re kak idingki en wia pehdinpwong ni imwe. Dahme riatail me pwoson akan kak wia pwehn sewese irail Kristian pahtoula kan me kin lelohng soangen kahpwal pwukat?
8. Ni ahnsou me en emen Kristian ah peneinei ahpwtehn mehla, iaduwen ienge me pwoson kan kin kak sewese ih en kolokol tiahk mwakelekel en pali ngehn ni ahnsou me meteikan men wia tiahk en wunahni?
8 Elder kan nan mwomwohdiso kin kalap sewese peneinei en Kristian akan me emen nan arail peneinei mehla, ni ahr kin koasoiong mehn mparail kan oh kiserail kan duwen dahme kitail kin kamehlele. Mwurin arail kin song en kawehwehiong irail, ekei aramas kin ni meleilei pwungki en mwesel sang ihmwo oh pwurodo ni rahn me kapahrek en mehla pahn wiawi. Ahpw, iaduwen ma ekei kin tepida uhwong oh lokaia tohto? Ekei kakete men peiong kitail ma kitail pahn nantihong kawehwehiong irail dahme kitail kin kamehlele. ‘Ladun Kauno men en dehr akamai. E pahn kin kadek ong aramas koaros, sounpadahk mwahu oh kanengamah men.’ (2 Timoty 2:24) Eri, ma kiseh kan pahn lokaia tohto oh ni lemei wia arail kaudok, Kristian liohdi men oh nah seri kan mwein sohte kak kauhdi irail. Ahpw, irail sohte pahn iang sarawi en kaudok likamwo me wiawi nan imwarail, pwe irail kin peikiong kaweid en Pwuhk Sarawi: “Eri, kumwail dehr kapahrek kumwail ong me seupwoson akan ni amwail doadoahk kan, pwe met sohte kak wiawi.”—2 Korint 6:14.
9. Iaduwen kitail kak doadoahngki kaweid en 2 Korint 6:14 ni ahnsou me kaunen kaudok likamw kin wia kapahrek en mehla?
9 Mouren kaweid wet kin pil dokedoke ahnsoun seridi. Sounkadehde kan sohte kin iang koul, kapakap, de wiewia teikan me pid kaudok likamw. Ma Kristian kan kin wia peneinei en aramaso me mehlahro oh irail lemeleme me irail anahne iang towehda ahnsoun seridi, irail kak iang, ahpw irail sohte pahn iang wiewia kan en kaudok likamw.—2 Korint 6:17; Kaudiahl 18:4.
10, 11. (a) Ia kahrepe Sounkadehdehn Siohwa kan kin wia kapahrek en mehla? (b) Iaduwen ekei aramas lapalap nan South Africa mwekidki koasoandi en mehla me wiawi wasao?
10 Sarawi en Mehla kan me kin Waunla: Sarawi en mehla kan me Sounkadehdehn Siohwa kan kin wia sohte kin, ni soangen mwohmw de wiewia en sarawi kan, song en kaperenda me mehlahro. Padahk en Paipel kin wiawi nan Kingdom Hall, de nan wasahn kapahrek en mehla (funeral parlor), de nan imwen aramas mehlahro, de wasahn seridi. Kahrepen kapahrek iei en kamweitala aramas akan me kompoakparail men mehla ni arail kin kawehwe dahme Paipel kin mahsanihki duwen mehla oh koapworopwor en kaiasada. (Sohn 11:25; Rom 5:12; 2 Piter 3:13) Mwein irail pil kin koulki oapwoat koul me poahsoanda pohn Pwuhk Sarawi, oh imwin kapahreko kapakap kin wiawi.
11 Ehu kasarawi en mehla me duwehte met wiawihong Sounkadehdehn Siohwa men me rien Nelson Mandela serepein tikitik. (Nelson Mandela iei president en South Africa mahs.) Mwurin padahko wiawi, president menet wia kaping mehlel ong ih me wia kapahreko. Emen cabinet minister koasoia, “Nan sarawi en mehla koaros me I iangehr, sarawi wet me keieu wahu.”
12. Soangen wiewia dah kan kin wiawi nan ekei sahpw akan me pid duwen mwahiei oh met konehng Kristian kan en wia?
12 E Konehng en Doadoahngki Likoun Mwahiei? Sounkadehdehn Siohwa kan kin mwahieiki kompoakparail mehlahr akan. Duwehte Sises, irail kin sengisengki me mehlahro. (Sohn 11:35, 36) Ahpw, irail sohte lemeleme me e konehng en wia soangen mwohmw de mwekid ehu pwehn kasalehiong wehi pokon arail nsensuwed. (Madiu 6:16-18) Nan sahpw tohto, liohdi kan anahne likoukihda likoun mwahiei kan pwehn kaperenda me mehlahro. Irail anahne doadoahngki likou pwukat ni erein sounpwong kei de pil lel sounpahr ehu mwurin mehla. Oh pil, irail kin wiahda pil ehu kamadipw ni ahnsou me irail pahn sohla doadoahngki arail likoun nsensuwed kan.
13, 14. Dahme wiawi ni ahnsou me ekei brother oh sister kan kasalehda me irail sohte men wia tiahk en mwahiei oh met imwikihla dah?
13 Irail kin medemedewe me irail pahn kansensuwedihala de uhwong me mehlahro ma irail sohte pahn mwahiei de sengiseng pwe koaros en kak kilang. Ihme kahrehda, nan ekei wasa nan Swaziland, kaunen keinek kan kin kausasang Sounkadehdehn Siohwa kan sang nan imwarail kan oh sapwarail kan. Ahpw, Kristian lelepek pwukat kin ahnsou koaros ale sawas sang riarail brother oh sister kan ni pali ngehn me kin mih nan sahpw teikan.
14 Mwoalen Kopwung Lapalap en Swaziland me kamanala en mweidong Sounkadehdehn Siohwa kan en pwurala ni imwarail kan oh sapwarail kan. Pil Kristian liohdi emen me alehdi mweimwei en mihmi nan sapwe mwurin e kasalehda kisinlikou ieu oh tape recording ehu me kasalehda ni sansal me ah pwoud ohl me mehlahro sohte pwungki ih en doadoahngki likoun mwahiei kan. Ni ahl wet, e kak kasalehda me e kin wauneki dahme ah pwoud kin pwungki.
15. Dahme kitail kak wia pwehn sewese irail me arail peneinei ahpwtehn mehla en koasoanehdi koasoandi en mehla me pahn wauneki Siohwa?
15 E inenen kesempwal Sounkadehde kan en kasalehda sansal dahme irail mwahuki en wiawi ni ahnsou me irail mehla, mehlel nan wasa kan me tiahk en mehla me sohte poahsoanda pohn Paipel kin kalap wiawi. Medewehla dahme wiawiong Victor me kin kousoan Cameroon. E ntingihdi ni sansal duwen dahme pahn wiawi ni ahnsou me e pahn mehla. Mie aramas tohto nan ah peneinei me wadawad oh irail kin kalap wia tiahk me pid duwen me mehlahr akan, iangahki kaudokiong tihn moahng. Pwehki ah peneinei kin wauneki ih, e ese me irail pahn pil kaudokiong tihn moahng ni arail doadoahngki arail tiahk. Kahrehda, e ntingihdi nan doaropwe me e mwahuki Sounkadehdehn Siohwa kelepw en wia soahng koaros ni ahnsou me e pahn mehla. Met sewese laud ah pwoud oh nah seri kan pwehn kamengeila koasoanehdi koasoandi en eh mehla, oh pwehki met, kadehde mwahu kohwong aramas koaros me kin mihmi nan ah wasahn kousoan.
16. (a) Dahme kahrehda ekei sohte kin wiahda pilipil mwahu kan me pid duwen koasoanehdi koasoandi kan ni ahnsou me arail peneinei mehla? (b) Nin duwen dahme 1 Korint 10:32 kin kasalehda, dahme kitail pahn anahne medemedewe?
16 Liksang Wia Tiahk me Sohte Poahsoanda Pohn Paipel: Ekei aramas me kin wehwehki Paipel masak weksang aramas teikan. Pwehki irail sohte mwahuki aramas en uhwong oh kapailoke irail, irail kin song en kaperenda aramas teikan ni arail kin wia pehdinpwong ong arail peneinei me mehlahr. E mwahu en mwemweitla rehn peneinei en aramaso me mehlahro pwehn kihong irail mehn kamweit, ahpw met sohte wehwehki me kapahrek, kapakap oh koul pahn wiawi pwong koaros mwohn kapahrek en seridi. Ma kitail pahn wia met, e pahn kadipekeleke meteikan, pwehki irail pahn lemeleme me kitail sohte kamehlele dahme Paipel mahsanih duwen irair en me mehlahr akan.—1 Korint 10:32.
17. (a) Nan ekei mwomwohdiso kan, dahme wiawiong mihding kan oh kalohk ni ahnsou me emen mehla? (b) Soangen kaweid dah me kohsang Paipel me kak sewese kitail en ahneki toupahrek en pali ngehn?
17 Paipel kin kangoange Kristian akan en mwohneki arail kaudok ong Koht nan arail mour oh pil doadoahngki mwahu arail ahnsou kan. (Madiu 6:33; Episos 5:15, 16) Nan ekei wasa kan, mihding kan oh kalohk sohte wiawi erein wihk ehu de reireisang pwehki mehla. Kahpwal wet sohte kin wiawihte nan Afrika kelepw. Me pid duwen mehla ieu me wiawi, ripoht sang South America kasalehda: “Aramas malaulau iang towehda mihding siluh. Oh pil, sohte sounkalohk iang kalohk erein rahn eisek. Aramas teikan, mehn liki kan iangahki aramas me kin onop Paipel rehn Sounkadehde kan, inenen pwuriamweikihla me ekei brother oh sister kan wiewia kedirepw en mehla erein rahn tohto.”
18. Tiahk en mehla dah kan me ekei kin alasang, oh met kahrehda aramas teikan en ahneki soangen madamadau dahieu?
18 Nan ekei wasa kan, peneinei en aramaso mehlahro pahn luhkehla ekei kompoakparail nan imwarail mwurin mehla oh seridi wiawi. Ahpw, nan ekei wasa nan Afrika, aramas epwiki kei kin kohla ni imwen aramas mehlahro oh kasikasik me ah peneinei pahn kaunopada lapalahn kamadipw ong irail, oh irail pil pahn meirongki mahn akan. Ekei tohnmwomwohdiso kan kin wiewia tiahk wet, kahrehda met kin kahrehiong meteikan en lemeleme me irail wia kamadipw pwehn kaperenda me mehlahro.
19. (a) Dahme pahn sewese kitail en wiahda pilipil mwahu me pid duwen ia mwomwen atail pahn doadoahngki neitail mwohni ni ahnsoun mehla kan? (b) Ni soangen irair dah kan me tohnmwomwohdiso pahn anahne sawas?
19 Ni ahnsou me emen Sounkadehdehn Siohwa kin mehla, dahme kin wiawi ni mehla oh seridi sohte kin wia mehn katoutou de pweilaud ong peneineio. Kahrehda, e sohte anahn en wiahda koasoandi tohrohr ehu me aramas pahn anahne kihda arail sawas en mwohni laud pwehn pwainda dahme kin wiawi ni mehla pweilaudo. Ma liohdi kan me semwehmwe sohte kak pwainda soahng koaros me anahn ni ahnsoun mehla, meteikan nan mwomwohdiso pahn perenki sewese ih. Ma sawas pwukat sohte itar, elder kan pahn koasoanehdi en sewese irail me warohng kan ni palien mwohni oh dipwisou kan.—1 Timoty 5:3, 4.
20. Me pid duwen tiahk en mehla kan, dahme irail me kin poakohng Siohwa kin nantihong wia?
20 Tiahk en mehla kan sohte kin ahnsou koaros uhwong kaweid en Paipel. Ahpw, ni ahnsou me re kin uhwong Paipel, Kristian kan anahne wia dahme pahn pahrekiong kaweid en Paipel.b (Wiewia 5:29) Mendahki met pahn kak kahrehong aramas teikan en uhwong irail de kauwe irail, sapwellimen Koht ladu kan kin kasalehda me irail kak powehdi uhwong oh kasongosong kan ni ahl me pweida mwahu. Irail kak wia met ni arail pahn likih sapwellimen Siohwa kehl, “Koht en pwarer en kansenamwahu koaros,” iangahki sawas limpoak me kohsang iengerail me pwoson kan me kin kamweit irail ni ahnsoun apwal.—2 Korint 1:3, 4.
[Nting tikitik me mi pahs]
a Nan ekei sahpw oh keinek kan, lepin lokaia wet “pehdinpwong” kin wehwehki, ni ahnsou mwotomwot, mwemweitla rehn aramas akan me arail peneinei mehlahr pwehn kamweitirailla. Met sohte kin uhwong Pwuhk Sarawi.
b Nan soangen wasa kan me tiahk en mehla kan kin uhwong Paipel, met kin kahrehda Kristian kan kin lelohng kasongosong laud kan, e pahn mwahu elder kan en sewese irail me pilahn en papidais en wehwehki dahme mih mwohrail. Ni ahnsou me irail pahn tuhwong irail me kapw kan pwehn wia peidek kan sang kisin pwuhko ‘Kohwei, Katohnpadahk, oh Papidaisihirailla’ (de pwuhken Organized To Do Jehovah’s Will), elder kan pahn kousapahlih mwahu duwen oaralap kan me pidada “soul, sin and death (dihp oh mehla)” oh “interfaith.” Pahnangin oaralap pwukat, mie peidek teikan (optional questions) me elder kan kak wia. Nan soangen irair pwukat, elder kan kak kasalehda duwen tiahk en mehla kan me kin uhwong Paipel oh kihda sawas sang Mahsen en Koht me pahn kasalehda dahme Kristian kan pahn wia pwehn ren dehr iang pidada soangen tiahk pwukat.