Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • w09 2/1 pp. 29-32
  • Ia Duwen Kristian kan en Kilangwohng Tiahk kan en Mehla?

Sohte kasdo ong met

Kupwurmahk, mehkot sapwung en kihda kasdo

  • Ia Duwen Kristian kan en Kilangwohng Tiahk kan en Mehla?
  • Kahn Iroir Pakpakairki Wehin Siohwa—2009
  • Sawaspen Oaralap kan
  • Ire kan me Duwehte Met
  • “Dehr Sair Mehkot Samin”
  • Omw Pilipil kan en Sansal
  • Ntingihdi Omw Koasoandi kan
  • En Wia Koasoandi en Mehla ni Ahl me Konehng
  • Mwurin Mehlao Seridi
  • Meteikan en Kilang Wekpeseng kan
  • Ahn Kristian Madamadau ong Tiahk en Mehla kan
    Atail Doadoahk ong Wehio—2006
  • Kohpwahn Peidek
    Atail Doadoahk ong Wehio—1997
  • Peidek kan Sang Sounwadawad kan
    Kahn Iroir Pakpakairki Wehin Siohwa—2002
Kahn Iroir Pakpakairki Wehin Siohwa—2009
w09 2/1 pp. 29-32

Ia Duwen Kristian kan en Kilangwohng Tiahk kan en Mehla?

KE KAK rong ngilen aramas akan mwahmwahiei. Tohn mwahiei kan kin likou toantoal oh kin weriwer, oh pwumwpwupwseli pohn tahto ki ar pahtou. Aramas akan kin kihdi mwohni de kisakis ni keilen de nan loalen kohpwahn me melahro. Soangen ahnsou dahieu met? Soangen wiewia pwukat iei tiahk kan en mehla me ele aramas epwiki kei kin pokonpene pwehn kamwurala me melahr akan.

Tohto Sounkadehdehn Siohwa kan kin kousoan wasa me arail peneinei oh mehn mparail kan kin ketieni oh pil masak me melahr akan. Aramas rar kei kamehlele me ni en emen kin mehla, e kin wiahla ngehn ehu me kak sewese de lidere irail. Lamalam wet kin wia kisehn tiahk kan en mehla. E sohte sapwung en pahtouki me melahr men. Mie pak me Sises oh sapwellime tohnpadahk kan kin pahtouki kompoakparail kan me mehla. (Sohn 11:33-35, 38; Wiewia 8:2; 9:39) Ahpw sohte pak ehu me re kin kasalehda arail pepehm en pahtou nohn daulihala duwehte me kin wiawi nan arail ahnsou. (Luk 23:27, 28; 1 Des. 4:13) Pwekida? Pwehki re ese padahk mehlel kan me pid duwen mehla.

Paipel mahsanih: “Me momour kan ese me re pahn mehla, ahpw me melahr akan sohte ese mehkot . . . Arail limpoak, kailok, oh ineng en nan kapehdirail, iang irail mehla . . . Sohte pahn mie wiewia, de lamalam, de loalokong, de erpit, nan wasahn me melahr akan [sousou]—oh iei wasa me ke pahn kohla ie.” (Ekl. 9:5, 6, 10) Iren Paipel pwukat kin kasalehda ni sansal me ni en emen kin mehla, e sohte kin kehn mehkot. Sohte eh madamadau, pepehm, e sohte kak lokaia de wehwehki mehkot. Ia duwen en wehwehkihla ire kesempwal wet sang nan Paipel kak kamwakid koasoandi kan en mehlahn Kristian men?

“Dehr Sair Mehkot Samin”

Sohte lipilipil soangen tiahk dah me re tikida loale, Sounkadehdehn Siohwa kan kin soikala tiahk kan me pidada lamalam kan me dene me melahr kan kak kehn wasa oh kak lidere de sewese me momour kan. Tiahk kan duwehte pehden pwong, kamadipw en mehla, kataman en mehla, meirong ong me melahr kan kin wia soangen tiahk kei me samin oh kin kansensuwedihala Koht. Soangen tiahk pwukat iei kisehn padahk en ngehn saut akan, me dene ngenen me melahro mihmihte oh sohte kin mehla. Padahk pwukat sohte kin poahsoanda sang Paipel. (Mel. 146:4) Kristian mehlel kan “sohte kak mwohdehng sapwellimen Kaun-o tehpel oh pil ni tehpel en tepil kan,” eri irail sohte kin iang pidada tiahk pwukat. (1 Kor. 10:21) Re kin peikiong kehkehlik wet: “Kumwail . . . tohrohreweisang irail. Kumwail dehr sair mehkot samin rehrail.” (2 Kor. 6:17) Ahpw en wia met sohte kin mengei ahnsou koaros.

Me tohto kin kamehlele me ma re sohte pahn kapwaiada tiahk kan en mehla, ngenen me melahro, de ngenen arail peneinei kan me melahr pahn nsensuwedla. En sohte kapwaiada met wia mehkot laud oh kakete wahdo imwila suwed de keria ong tohn wasao. Pwehki tohto sapwellimen Siohwa aramas akan sohte kin iang wia soangen tiahk pwukat me sohte kohsang Paipel, aramas akan kin kauwe irail, kasarowei irail, oh wiahkin irail kaidehn kisehrail. Re kin karaun likamwih Kristian pwukat me dene re sohte men patehng irail oh sohte kin wauneki me melahr kan. Mie pak me re kin ngihtehte oh men koasoanehdi ahn Kristian kan koasoandi en mehla. Eri, ia duwen kitail en dehr akamai ong irail kan me kin ngihtehtehki kitail en wia tiahk kan me kin kansensuwedihala Koht? Ahpw kesempwal sang met, dahme kitail kak wia pwehn liksang tiahk samin oh wiewia kan me kak kauwehla atail nanpwungmwahu rehn Siohwa?

Omw Pilipil kan en Sansal

Nan ekei wasa, e wia tiahk ehu me kaunen keinek kan de kisehn peneineio en iang wiahda koasoandi kan me pid ahnsoun seridi. Kahrehda, Kristian lelepek men anahne kasalehda ni sansal me Sounkadehdehn Siohwa kante me pahn pwukoahki wiahda koasoandi pwukat pwehn pahrekiong kaweid en Paipel. (2 Kor. 6:14-16) Dahme pahn wiawi ni soangen ahnsou pwukat sohte anahne kauwehla nsenmwakelekel en riatail Kristian kan de kadipikelekelih meteikan me ese dahme kitail kin kamehlele oh pil padahngki duwen me melahr kan.

Ma emen sang mwomwohdisohn Kristian me pahn wiliandi oh pwukoahki wiahda koasoandi kan, elder kan kak kihda iren sawas akan pwehn sewese Kristian pahtoulahr kan en uhdahn wehwehki kaweid kan me kak kadoadoahk ong soangen ahnsowo, pwe koasoandi koaros en kak pahrekiong kaweid kan en Paipel. Ma irail kan me sohte wia kisehtail nan kaudok men kapatahiong tiahk samin kan, e uhdahn kesempwal kitail en kehlail oh eimah kawehwehiong irail ni elen kadek oh wahu, dahme kitail kamehlele nin duwen Kristian men. (1 Pit. 3:15) Ahpw ia duwen ma emen kisehn peneinei me sohte kin iang atail kaudok ahpw ahneki manaman en wiahda koasoandi ngihtehtehki en kapatahiong tiahk sapwung kan? Eri, peneinei Kristiano anahne en kohkohlahsang mehlao. (1 Kor. 10:20) Ma met pahn wiawi, eri padahk mwotomwot ehu kak wiawi nan Wasahn Kaudok de wasa ehu me konehng. Eri, irail pahn kak ehukihpene ‘kakehlepen loalarail me Pwuhk Sarawi kin ketikihda’ rehn irail kan me pahtoukihla kompoakparail me melahro. (Rom 15:4) Mehnda ma paliwaro sohte mie, soangen koasoandi wet kak kasalehda wahu oh pil wia tiahk pwung ehu. (Deud. 34:5, 6, 8) Irail kan me kin uhwong atail koasoandi en mehla kin kak kahrehdo kapwunod oh pahtou laud. Ahpw kitail kak ale kamweit ni atail kin ese me atail eimah en wia dahme pwung sohte pahn manokonokla rehn Koht me kak ketikihong kitail “manaman lapalap.”​—2 Kor. 4:7.

Ntingihdi Omw Koasoandi kan

Ni ahnsou me emen kin ntingihdi eh koasoandi kan ong dahme pahn wiawi ni ahnsou me e pahn mehla, e pahn mengei en kawehwehiong peneinei kan me kaidehn kisehtail nan kaudok, pwe re pahn kak men wauneki koasoandio. Dahme kesempwal en ntingihdi iei dahme pahn wiawi ni ahnsoun mehlao, iahd oh iawasa pahn wiawi oh ihs me pahn pwukoahki koasoanehdi. (Sen. 50:5) E pahn keieu mwahu ma dahme ke ntingihdio pahn sainla oh mie sounkadehde. Irail me kilangwohng ahnsou kohkohdo ki kupwurokong oh erpit me poahsoanda sang Paipel ese me re sohte anahne awih lao re uhdahn mahla de soumwahula mwohn arail kapwaiada koasoandi wet.​—Lep. Pad. 22:3; Ekl. 9:12.

Ekei kin pweiek en ntingihdi arail koasoandi kan nan doaropwe. Ahpw en wia met kin kasalehda koahiek en Kristian men oh duwen eh kin nsenohki meteikan. (Pil. 2:4) E pahn inenen mwahu ma pein kowe en koasoanehdi soahng koaros sang omw en mweidohng tohn peneinei kan en wia met. Pwehki ar pahn pahtoukihla me melahro, re kakete mweidada soangen tiahk samin kan en wiawi me me melahro sohte kin kamehlele de pwungki.

En Wia Koasoandi en Mehla ni Ahl me Konehng

Me tohto kin kamehlele me arail koasoandi en mehla kan anahne en laud oh aramas akan anahne en kapingahla pwe re dehr kamwakara ngenen me melahro de arail peneinei melahr kan. Ekei kin wiahki ahnsoun mehla pwe ren “pohnmwahsohkihda” ia uwen arail kin poakohng me melahro, de ia uwen arail kepwehpwe oh paiamwahu. (1 Sohn 2:16) Re kin anahne ahnsou laud, doadoahk laud oh dipwisou tohto pwehn wiahda koasoandi mwahu ong me melahro. Met kak pidada irail en kareireila ahnsoun seridi en paliwar mehlao ong rahn kei, kakete lella wihk kei, pwehn kihpene mwohni en pwainla pweinen mehlao, duwehte pweinen sompihr me pahn wahdo paliwar en me melahro oh pil kisehn peneineio nan uhdahn sapwarail pwehn sarepedi mehlao. Koasoandi en mehla kan kin pil pidada ren kaunopada wasahn mwahiei kan pwe tohn wasao pahn kohpene ie oh kilang me melahro. Peneinei kan de kompoakparail kan me kin kohdo pwehn kasalehda ar wahu ong me melahro pahn kin mwengemwenge oh ekei kin pweidi ni pwong kan wasao. Ma ahnsoun serdio pahn keseula ong ehu rahn tohrohr, eri peneineio anahne en pil doulahte oh apwahpwalih anahn en tohn mwahiei kan. Met pil kalaudehla pweinen koasoandio oh kak wia kahpwal ong peneinei en me melahro. En kasalehda elen erpit ong ia duwen re pahn doadoahngki soangen sawas akan, peneineio kak kolokolte arail koasoandi en kaudok ong Koht.​—Pil. 1:10.

Kristian koahiek kan kin kilang duwen erpit en soikala soangen tiahk me aramas me sehse de sohte katapanki kupwuren Koht kin wia. Kitail ese me soangen tiahk de wiewia pwukat ‘sohte kohsang rehn Sahm, re kohsang nin sampah wet me kin sosohrala.’ (1 Sohn 2:15-17) Kitail anahne kanaiehng en dehr siaipene de peirinpene pwe met kaidehn wiewiahn Kristian. (Pil. 2:3) Dahme kin kalapw wiawi, iei ma masak me mehlao wia mehkot laud nan tiahk de mouren aramas en wasao, met kin kahrehiong koasoandi kan mehla kan en kin wia doadoahk laud oh apwal oh kak mwadangete pingada. Kesempwalki me melahr akan kin mengei en kahrehiong irail me sohte iang atail kaudok en wia tiahk kan me kin kansensuwedihala Koht. Nan soangen mehla pwukat, tohn mwahiei kan kin kak sengiseng nohn daulihala dahme konehng, pwoalehdi paliweren me mehlao, lokaiahiong paliwaro likamwete e momour oh kihdi sent de dipwisou kan pohn paliwaro. Ma met pahn wiawi ni mehlahn Kristian men, e pahn kauwehla mwaren Siohwa oh pil sapwellime aramas kan.​—1 Pit. 1:14-16.

Ni atail esehier duwen irair en me melahr kan, met pahn kihong kitail eimah en koasoanehdi atail koasoandi kan en mehla ni ahl pwung. (Ep. 4:17-19) Mendahki Sises wia aramas men me keieu lapalap oh kesempwal, e ketin seridi wasa ehu me konehng oh soandi mwahu. (Sohn 19:40-42) Ong irail kan me “audaudki kupwur en Krais,” soangen seridi wet wia koasoandi ehu me kasalehda wahu oh pil konehng. (1 Kor. 2:16) Ei, ni mehlahn Kristian men kin wiawi ni ahl me konehng, met keieu mwahu en soikala tiahk kan me sohte poahsoanda sang Pwuhk Sarawi. E pil sewese koasoandi en mehlao en wiawi ni wahu oh meleilei oh pil konehng irail kan me kin poakohng Koht.

Mwurin Mehlao Seridi

Tiahk kan en mehla me sohte kin poahsoanda sang Paipel kin kalapw wiawi mwurin mehlao pahn seridi. Ekei wasa, nanpwung suwed de sawehwe kan nanpwungen tohn peneineio kin kapwungpwungla oh re kin anahne mahkpene pwe dene met pahn kaperenda ngenen me melahro. Karasepe ehu, nan ekei kisin deke kan, kisin takai en nansed kan, me kin wia kilelepen mahkpene oh wiliakapwala en emen, kin koasoansoandi ni keilen sousouo. Re anahne en wia met pwehki re masak re de kansensuwedihala ngenen me melahro.

Kristian mehlel kan ese duwen irair en me mehla kan oh re sohte masak irail. (Eks. 9:5, 10) Kahrehda, en ese me tiahk kan en mehla kin pidada padahk en ngehn saut kan, eri e sohte konehng Kristian mehlel kan en koasoanehdi de iang towehda tiahk pwukat. En wia soangen tiahk pwukat me kin kauwehla kaweid en Paipel kin kasalehda me kitail sohte wauneki Siohwa Koht oh pil nsenmwakelekel en iengetail sounkaudok kan.

Meteikan en Kilang Wekpeseng kan

Ia uwen kitail kin kalahnganki atail solahr masak me melahr kan me aramas tohto me sohte wehwehki padahk mehlel kin ahneki! (Sohn 8:32) Nin duwen “aramas marain” kei, kitail kin kasalehda atail nsensuwed oh pahtou ni ahl me kasalehda atail mourki padahk mehlel en Paipel, ni ahl me konehng, wahu, oh kin kasalehda me atail koapworopwor en kaiasada uhdahn mehlel. (Ep. 5:8; Sohn 5:28, 29) Soangen koapworopwor wet pahn sewese kitail en dehr pahtoula nohn daulihla duwehte irail me “sohte ar koapworopwor.” (1 Des. 4:13) E pahn kihong kitail eimah en kesihnenda teng ong kaudok mwakelekel, oh en dehr masak aramas akan.​—1 Pit. 3:13, 14.

Atail lelepek ong kapwaiada kaweid kan en Paipel pahn kahrehong aramas akan en “kilang wekpeseng en aramas pwung kan oh aramas suwed kan.” (Mal. 3:18) Ehu rahn, mehla solahr pahn wiawi. (Kaud. 21:4) Erein atail kasikasik inou kaselel wet, kitail en wia uwen atail kak pwe kitail en kin mwakelekel oh pwung mwohn silangin Siohwa, oh tohrohrwei sang sampah suwed wet oh pil tiahk sapwung kan.​—2 Pit. 3:14.

[Kawehwehpen kilel kan nan ehu ehu pali 30]

Ntingihdi omw koasoandi en mehla iei elen erpit

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share