Peidek kan Sang Sounwadawad kan
Ma emen pahn kemehla pein ih, e pahn konehng emen Kristian minister en wia kapahrek en mehla?
Pein emenemen Kristian minister pahn anahne wiahda pein ah pilipil ma, ni nsen mwakelekel, e pahn kak wia kapahrek en mehla ong emen me likamwete kemehla pein ih. Ni ahnsou me e pahn wiahda ah pilipil, e anahne medemedewe duwen peidek pwukat: Iaduwen Siohwa kin kilangwong aramas akan me kemehla pein irail? Aramaso uhdahn kemehla pein ih? Soumwahu en madamadau de soumwahu en pwunod kahrehong aramaso en kemehla pein ih? Iaduwen aramas akan me kin kousoan nan ahmw wasa kin kilangwong aramas akan me kemehla pein irail?
Kitail me Kristian akan men wehwehki duwen kupwuren Siohwa ong aramas akan me kin kemehla pein irail. Ong Siohwa, mouren aramas me kesempwal oh sarawi. (Senesis 9:5; Melkahka 36:9) E sansal me Koht kin kupwursuwedki ma emen nseneki kemehla pein ih. (Eksodus 20:13; 1 Sohn 3:15) Eri, met kin wehwehki me emen sohte pahn kak wia kapahrek en mehla ong emen me kemehla pein ih?
Nna, medewehla duwen Nanmwarki Sohl en Israel. Ni ahnsou me e wehwehki me e pahn mehla pwe re mahweniong mehn Pilisdia kan, e sohte men ah imwintihti kan en kaloke ih, kahrehda “Sohl ketin usada pein sapwellime kedlahso, oh pein lukupoardiong powe.” Ni ahnsou me mehn Pilisdia kan diarada paliwere, re ahpw pasurdiong paliweren Sohl ni kelen kahnimw Ped San. Ni ahnsou me aramas en Sapes nan Kilead diarada dahme mehn Pilisdia kan wiahdahr, re kihdi sang kahlap en Sohl ni kehlo oh isikala. Re ahpw ale tih ko oh sarepedi. Irail eri kaisihsolki erein rahn isuh, me iei tiahk en mwahiei en mehn Israel akan. (1 Samuel 31:4, 8-13; Senesis 50:10) Ni ahnsou me Depit, Sapwellimen Siohwa me keidio, diarada dahme aramas en Sapes nan Kilead wiahda, e mahsanih: “Kauno en ketin kupwuramwahwih kumwail pwehki amwail loalopwoatohng amwail nanmwarki ni amwail sarepedi. Eri, Kauno en pil ketin kupwurkalahngan oh loalopwoatohng kumwail. I pahn pil apwalih kumwail mwahu pwehki me kumwail wiadahro.” (2 Samuel 2:5, 6) Paipel sohte kasalehda ma aramas en Sapes nan Kilead me ale kadeik pwehki irail likamwete wiahda koasoandi en kapahrek en mehla ong Nanmwarki Sohl. Oh pil, ken wadek duwen paliweren aramas akan me sohte pahn seridi pwehki ahr kin wia dahme suwed. (Seremaia 25:32, 33) Eri, emen Kristian minister ele mwein pahn kak medemedewe duwen dahme wiawiong Sohl ni eh pahn wiahda ah pilipil ma e pahn wiahda kapahrek en mehla ong emen me kemehla pein ih de soh.
Minister menet pil kak medemedewe duwen kahrepen kapahrek en mehla kin wiawi. Sounkadehdehn Siohwa kan kin weksang aramas akan me kin kamehlele me soul sohte kak mehla, oh irail sohte kin wia kapahrek en mehla me kin utungada padahk sapwung me aramas mehlahr akan kin kohla nan sahpw tohrohr wasakis. Kahrepe keieu kesempwal en wia kapahrek en mehla kaidehn ong aramas me mehlahr ahpw en kamweitala aramas pahtou kan oh kadehde ong aramas akan me kin iang towehda kapahrek duwen irairen aramas mehlahr akan. (Eklesiasdes 9:5, 10; 2 Korint 1:3-5) Pil ehu kahrepe ong kapahrek en mehlel iei en sewese koaros me rong kapahreko en wehwehki duwen ia uwen mwotomwot en atail mour. (Eklesiasdes 7:2) Ma kapahrek en mehla pahn wiawiong emen me kemehla pein ih, kahrepen kapahrek en mehla pwukat pahn pweida?
Mehlel, ekei aramas mwein pahn ahneki pepehm me aramaso nseneki kemehla pein ih, oh e wehwehki ni unsek me e wiahda dihp ong Siohwa. Ahpw, mie ehu ahl en wehwehki ni unsek ma soangen pepehm wet me pwung de sapwung? Ele mwein aramaso me pwurur ni e kemehla pein ih? Ekei aramas me kin song en kemehla pein irail kin kawekila arail madamadau oh irail sohlahr song en kemehla pein irail. Ahpw aramas me mehlahr sohte kak koluhla dahme e wiahdahr.
Pil ire kesempwal ieu kin pid soumwahu en madamadau oh pepehm, pwe met kin kahrehong aramas tohto en kemehla pein irail. Nin duwen ekei rekord kan, persent 90 en aramas akan me kin kemehla pein irail kin ahneki soumwahu en madamadau, soumwahu en pepehm de re kin kalap ale wini suwed. Eri, Siohwa pahn kasalehda mahk ong aramas pwukat me kin kemehla pein irail ni arail ahneki soangen soumwahu pwukat? Kitail sohte kak wehwehki ma emen me mehlahr wiahda dihp me sohte mahkpe mie mwohn silangin Siohwa de soh. Kristian minister kak medemedewe duwen irairen aramaso oh tehk ma e ahneki soumwahu en madamadau de pepehm me kahrehong ih en kemehla pein ih, oh ma e pahn wehwehki met—e pahn kak sewese ih en wiahda ah pilipil ma e pahn wiahda kapahrek en mehla ong emen me kemehla pein ih de soh.
Pil mie ehu irair en medemedewe: Iaduwen aramas akan me kousoan nan pein ahmw wasa kin kilangwong aramas akan me kin kemehla pein irail? Elder kan kin anahne nsenohki met, pwe irail kin kesempwaliki adamwahu en mwomwohdiso en Sounkadehdehn Siohwa kan en wasao. Ma pali laud en aramas akan nan sahpwo kin suwedki aramas akan me kin kemehla pein irail, oh keieu ong aramas emen me ahpwtehn kemehla pein ih, elder kan ele mwein sohte pahn mwomwen utungada mehla wet pwen sansal ong wehi pokon de wiahda ehu kapahrek en mehla nan Kingdom Hall.
Ahpw, ma Kristian minister emen ale luhk ehu en wiahda kapahrek en mehla, ele mwein e kin lemeleme me e pahn kakete wia met sang pein eh pilipil. Ma e pilada en wia padahko, e anahne en kanahieng en dehr nda mehkot me pahn kahrehong aramas akan en lemeleme me mwein mie koapworopwor ong aramaso me kemehla pein ih. Koapworopwor ong aramas mehlahr akan kin mih rehn Siohwa, oh aramas sohte kak nda ma aramas mehlahro pahn iang iasada de soh. Minister menet pahn kak koasoia duwen padahk mehlel kan en Paipel me kin pid mehla oh kihda mehn kamweit ong me pahtou kan.