Watchtower ONLINE LIBRARY
Watchtower
ONLINE LIBRARY
Ponapean
  • PAIPEL
  • SAWASEPEN PAIPEL KAN
  • MIHTING KAN
  • w99 4/1 pp. 18-23
  • “Siohwa, Koht Emen Me Diren Mahk Kalahngan Oh Kadek”

Sohte kasdo ong met

Kupwurmahk, mehkot sapwung en kihda kasdo

  • “Siohwa, Koht Emen Me Diren Mahk Kalahngan Oh Kadek”
  • Kahn Iroir Pakpakairki Wehin Siohwa—1999
  • Sawaspen Oaralap kan
  • Ire kan me Duwehte Met
  • Pwutak Uhwong Men me Mweselsang Imwe
  • Nsensuwedla Nan Sahpw Doh Ieu
  • Pwutako Koluhlahr Nan Kapehde
  • Kasamwo Limpoak Ehu
  • Kahlemengih Sapwellimen Siohwa Mahk
    Kahn Iroir Pakpakairki Wehin Siohwa—1999
  • Iaduwen Ahmw Pahn Sewese Seri Men Me “Salongalahr”?
    Kahn Iroir Pakpakairki Wehin Siohwa—2002
  • Pwutak Salongalao Pwurodo
    Atail Mour en Kristian oh Kalohk—Doaropwehn Kasukuhl ong Mihting—2018
  • Ke Kin “Dehdehkihla Pwuhk Sarawi”?
    Kahn Iroir Pakpakairki Wehin Siohwa—2014
Kilang Pil Ekei
Kahn Iroir Pakpakairki Wehin Siohwa—1999
w99 4/1 pp. 18-23

“Siohwa, Koht Emen Me Diren Mahk Kalahngan Oh Kadek”

“Siohwa, Siohwa, Koht emen me diren mahk kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel.”​—EXODUS 34:​6, New World Translation.

1. (a) Mehn kamweit dahieu Paipel ketikihda ong irail ko me arail peneinei kesehla kaudok mwakelekel? (b) Ia lamalam en Siohwa ong irail kan me wiahda sapwung?

“NEI SEREPEINO padahkihong ie me e sohla men iang kisehn pwihn en mwomwohdisohn Kristian,” koasoia emen pahpa Kristian. “Erein rahn tohto, oh wihk kan, oh pil mwurin sounpwong kei, I kin pehm loalei inenen medek. E suwedsang mehla.” E kin inenen kansensuwed en kilang emen me kitail kin poakohng en sohla keid nan elen kaudok mwakelekel. Komw lelohngehr nan soahngen irair wet? Ma ehi, ke pahn perenki ese me Siohwa wehwehki omw pepehm. (Eksodus 3:7; Aiseia 63:9) Ahpw iaduwen e kin kilangwohng irail pwukat me kin wiahda me sapwung? Paipel kasalehda me Siohwa kin ni mahk luhke irail en kapwurpwurdohng pahn kupwure. E peki rehn mehn Suhs kahngohdi kan ni mwehin Malakai: “Kumwail pwurodohng rehi, oh I ahpw pahn sapahlwohng rehmwail.”​—Malakai 3:7.

2. Iaduwen Paipel kasalehda me mahk kin wia kisehn sapwellimen Siohwa irair?

2 Sapwellimen Koht mahk kin sansalda ong Moses pohn Nahna Sainai. Wasao, Siohwa kasalehda me pein ih “Koht emen me diren mahk kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel.” (Eksodus 34:6) Mahsen pwukat kin kasalehda me mahk kin wia kisehn irair en Siohwa. E “kupwurki koaros en wiliakapwala oh sohpeisang nan diparail kan,” Kristian wahnpoaron Piter ntingihdi. (2 Piter 3:9) Ahpw, mie imwin sapwellime Koht mahk. E padahkihong Moses: “I uhdahn pahn kaloke me dipan akan.” (Eksodus 34:7; 2 Piter 2:9) Mendahki met, “Koht iei limpoak,” oh mahk kin wia pali laud en irair wet. (1 Sohn 4:8; Seims 3:​17) Siohwa sohte pahn “ketin dadaur sapwellimomwi engieng,” oh eh kin ketin “kasalehiong kiht sapwellimomwi limpoak poatopoat.”​—Maika 7:​18, 19.

3. Iaduwen en Sises kin kilangwohng mahk kin weksang lamalam en Sounkawehwehn Kosonnedo oh Parisi kan?

3 Sises kin wia kasansal unsek en Semeo nanleng. (Sohn 5:​19) Ah wiewiahn mahkohng me dipan akan sohte kin wehwehki me e pwungki diparail kan ahpw e kin wia kasalepen pepehm en limpoakohte me e kin kasalehong irail kan me soumwahu ni paliwar. (Pil tehk Mark 1:​40, 41.) Ehi, Sises kin wiahki mahk me e iang “ire kesempwal kan” en Kosonned en Koht. (Madiu 23:23) Me weksang met, tehk duwen irail Sounkawehwehn Kosonnedo oh Parisi kan, me arail lamalam en kopwungpwung kin kalap kihsang douluhl mahk. Ni ahnsou me re kilang Sises patohng me dipan akan, re lipahnedki: “Ohl menet kin kasamwo me sekeniken kan oh pil kin iang sak rehrail.” (Luk 15:​1, 2) Sises sapeng irail ko me kin karaune ih ki karasaras siluh, oh ehuehu karasaras pwukat kin kasalehda sapwellimen Koht mahk.

4. Karasaras riau dah kei me Sises kasalehda, oh ia mouren ehuehu karasaras pwukat?

4 Keieu, Sises mahsanih duwen ohl emen me pwilikihdi nah sihpw 99 pwehn rapahki emen sihpw me salongala. Ire kesempwal dahieu me Sises men kasalehda? “Nanleng pahn perenkihda koluhla oh wiliakapwalahn me dipan emen laudsang aramas keniken duwehk duwemen me sohte anahne koluhla.” Mwuri, Sises mahsanih duwen lih emen me rapahki nah mwohni silper ehu me salongala oh perenda ni ahnsou me e diarada mwohnio. Dahme Sises kin kadoadoahkohng met? “Ih duwen tohnleng en Koht kan, re kin perenkihda me dipan emen eh kin koluhla oh wiliakapwala.” Sises kasalehda sapwellime karasaras kesiluhwo ni mwomwen soai ehu me mie mehn kasukuhlpe.a Me tohto kin kilangwohng karasaras wet me iei ehu karasaras mwotomwot me keieu kaselel. Atail tehkpene karasaras wet pahn sewese kitail en kalahnganki oh alasang sapwellimen Koht mahk.​—⁠Luk 15:​3-10.

Pwutak Uhwong Men me Mweselsang Imwe

5, 6. Iaduwen pwutak tikitiko nan en Sises karasaras kesiluhwo kasalehda ah soh kalahngan?

5 “Ohl emen mie me naineki pwukat riemen. Me tikitiko ahpw ndahng seme, ‘Ipa, kihongiehla pwaisei me uhdahn ahi sang nin sohso.’ Semeo eri pwalangpeseng sohso ong nah pwutak riemeno. A mwurin rahn ekei, me tikitiko ahpw netikihla pwaise sang ni eh sohso, oh wahda mwohni ko oh seiloaklahng sahpw doh ieu, wasa e kesehla mwahl ie nah mwohni ko ni mour suwed oh tiahk suwed.”​—⁠Luk 15:​11-13.b

6 Pwutak tikitiko kasalehda ah soh kalahngan. Keieu, e ngidingidki en ale pweise sang nin sohso, oh ih eri kesehla mwahl nah mwohni ko “ni mour suwed oh tiahk suwed.” Lepin lokaia ko “mour suwed oh tiahk suwed” kin kawehwehsang lepin lokaiahn Krihk ehu me wehwehki “mour ping.” Emen me loalokong koasoia me lepin lokaiao kin “kasalehda soahngen mour me kin kesehla irair mwahu kan.” Ihme kahrehda, pwutako nan sapwellimen Sises karasaraso kin kalap adaneki, ni lokaiahn wai, prodigal, lepin lokaia ehu me kin kasalehda duwen emen me kin ni soh nsenoh wia kau nah mwohni oh dipwisou kan.

7. Ihs nan rahnwet me kin rasehng pwutak tikitiko nan karasaraso, oh dahme karehda soahngen aramas pwukat kin rapahki uhtohr nan “sahpw doh ieu”?

7 Mie aramas nan rahnwet me rasehng pwutako? Ehi, e inenen kansensuwed pwe, mie aramas malaulau kei me pidoisangehr nan perepen “tehnpasen” Samatail nanleng, Siohwa. (1 Timoty 3:15) Ekei irail pwukat kin lemeleme me nan irair en tehnpasen Koht me nohn kakos, oh me silangen Siohwa me kin mwasamwasahn irail kin wia mehn kerempwa ehu ahpw kaidehn mehn perepe ehu. (Pil tehk Melkahka 32:⁠8.) Tehk duwen emen lih Kristian me tikida mourki kosonned kan en Paipel ahpw mwuhr kin uhd iang pidada kamamsakau oh doadoahngki wini suwed kan. Ni ah kin tamanda ahnsou suwedo nan ah mour, e koasoia: “I men kadehdehda me I kak wiahda ehu mour mwahu ong pein ngehi. I men wia dahme I men wia, oh I sohte men emen en padahkihong ie ehu soahng tohrohr.” Duwehte pwutako nan karasaraso, serepein menet rapahki en uhtohrda. E inenen kansensuwed pwe, pwehki ah wiewia kan me sohte konehng Pwuhk Sarawi, e anahne pisikensang mwomwohdisohn Kristian.​—⁠1 Korint 5:​11-13.

8. (a) Soahngen sawas dahieu me kak kohwong irail ko me inengieng mour likin kosonned kan en Koht? (b) Dahme kahrehda emen anahne medemedewe loal ah pilipil me pid kaudok?

8 E kin inenen kansensuwed ma emen iengatail me pwoson kin kasalehda ineng en mour likin kosonned kan en Koht. (Pilipai 3:18) Ni ahnsou me met kin wiawi, elder kan oh mehteikan me koahiek ni pali ngehn kin nantiong pwehn kapwungala meno me wiahda sapwung. (Kalesia 6:⁠1) Mendahki met, sohte me kin mih pahn idihd en wiahla emen tohnpadahk en Kristian. (Madiu 11:​28-30; 16:24) Ni ahnsou me re kin lelehr sounpahr me re kakehr wiahda pein ahr koasoandi kan, me pwulopwul kan anahne wiahda arail pilipil nan ire wet me pid kaudok. Pwehki emenemen kitail ahneki nsen saledek, kitail pahn wehkohng Koht duwen pein kitail. (Rom 14:12) Ni mehlel, ‘mehkot me aramas pahn padokedi, ihme e pahn dolung’​—⁠mehn kasukuhl ehu me pwutako nan en Sises karasaraso pahn mwadang sukuhlkihdi.​—⁠Kalesia 6:​7, 8.

Nsensuwedla Nan Sahpw Doh Ieu

9, 10. (a) Wekidekla dahieu me lellong pwutako, oh iaduwen e mwekidiki met? (b) Karasahda iaduwen ekei nan rahnwet me kin kesehla kaudok mehlel kin lellong soahngen irairohte me duwehte irair en pwutako nan karasaraso.

9 “E kamwusala mehkoaros me e ahneki. Mwuri, lehk lapalap ehu ahpw lel sahpwo, pwutako ahpw tapihada duhpekla. Ih eri pwarala rehn pwilidak en sahpwo men pwe en doadoahk reh. Pwilidak en sahpwo eri kadarala pwutako nan eh kelen pwihk pwe en kin apwahpwalih nan pwihk kan. Pwutako ahpw kin mehkihla eh men iang kang kenen pwihk ko, ahpw sohte me kin kihong.”​—Luk 15:14-​16.

10 Mendahki e semwehwehla, pwutako saikinte lemeleme me e pahn pwurala ni imweo. Ahpw, e tuhwongada emen pwilidak en sahpwo me kihong ih doadoahk en apwahpwalih nah pwihk kan. Pwehki Kosonned en Moses kin oaritikada me pwihk kan iei mahn samin kei, mehn Suhs men sohte kin pwungki soahngen doadoahk wet. (Lipai 11:​7, 8) Ahpw ma kadeikpen loalen pwutako kin kerempwehkin ih met, e anahne kauhdi pepehm wet. Pwe, e sohte kasik me ah kaun en doadoahk, emen pwilidak en sahpwo, pahn nsenohki pepehm en emen mehn liki me semwehmwe. Irair me pwutako mihla loale kin duwehte dahme kin wiawihong me tohto nan rahnwet me kin kesehla ahl inen en kaudok mwakelekel. Pak tohto, soahngen aramas pwukat kin iangala wia tiahk kan me mahso re kin lemeleme me samin. Karasepe ehu, ni ah mahki sounpahr 17, emen pwutak pwulopwul pelianda ah kaiahn en Kristian. E wehkada: “Tiahk en nenek oh doadoahngki wini suwed kan irissangehr padahk en Paipel kan me I sukusukuhlkiehr erein sounpahr tohto.” Mwurinte met, pwutak menet kohlong nan imweteng pwehki e pirap doadoahngki dipwisoun pei oh e kamaramas. Mendahki e pwurodo ni pali ngehn, ia uwen e luhsla laud pwehki e “perenki dihp ahnsou mwotomwot”!​—⁠Pil tehk Ipru 11:​24-26.

11. Dahme pil kahpwalihla irair kapwonopwono me pwutako miehr loale, oh iaduwen ekei nan rahnwet kin diarada me lingan en sampah wia “widing likamw akan”?

11 Irair kapwonopwono me pwutako mihla loale kin apwalkihla ire mehlelo me “sohte me kin kihong ih mehkot.” Ia kompoakepah kapw kan? Ahnsouwet, pwehki sohla nah mwohni, e wialahr “mehn kailok ehu” ong irail. (Lepin Padahk 14:​20, NW) Me duwehte met, me tohto nan rahnwet me kin peilasang pwoson diaradahr me lingan oh lamalam en sampah wet kin imwikihla “widing likamw akan.” (Kolose 2:⁠8, NW) Emen lih pwulopwul me ahnsoukis kesehla pwihn en Koht koasoia: “I lellong medek oh mwasik en mohngiong pwehki I kesehla kaweid en Siohwa. I songosong en alasang sampah, ahpw pwehki I sohte uhdahn duwehte mehteikan, re soikiehla. I pehm me I duwehte seri men me anahne ah pahpa en kahluwa. Iei ih ahnsouwo me I pohnesehda me I anahne Siohwa. I solahr men pwurehng mour uhtohr sang ih.” Pwutako nan en Sises karasaraso pil wehwehkihda irair wet me e mihla loale.

Pwutako Koluhlahr Nan Kapehde

12, 13. Ire dah kei me sewese ekei nan rahnwet en koluhla nan kapehderail? (Kilang koakon “Re Koluhlahr nan Kapehderail”.)

12 “Kedekedeo, ni eh kolulahr nan kapehde, e ahpw mengimengloalki, ‘Ia uwen reken kisin mwenge rehn nein ei pahpa tohndoadoahk ko, a I ahpw mehkihla ei men mwenge! I pahn uhda oh pwurala rehn semeo oh ndaiong, ‘Ipa, I dipadahr rehn Koht oh rehmw. I solahr warohng ke en nainekin ie. Eri, wiahkiniehla emen noumw tohndoadoahk.”’ Ih eri uhdahte pwurala rehn seme.”​—Luk 15:17-​20, NW.

13 Pwutako “kolulahr nan kapehde.” Erein ahnsou kis mahso, e kin wia tiahk en raparapahki mehn kansenamwahu kan, likamwete e auauraman. Ahpw ahnsouwet e pehmadahr ia uhdahn ah irair en pali ngehn. Ehi, mendahki e pwupwudi ni pali ngehn, miehte koapworopwor ong pwutak menet. Mie irair mwahu kan me kak dierekda reh. (Lepin Padahk 24:16; pil tehk 2 Kronikel 19:​2, 3.) Iaduwen irail ko nan rahnwet me kesehla pwihn en Koht? E pwung en nda me solahr sawas me kak kohwong irail koaros, me nan irair koaros arail mour suwed kadehdehdahr me re dipadahr ong ngehn sarawi en Koht? (Madiu 12:​31, 32) Soh. Ekei irail kin nsensuwedkihla arail elen mour suwed, oh kedekedeo pali tohtohn irail pwukat kin koluhla nan kapehderail. “I sohte kin manokehla Siohwa, pil rahn ehu soh,” emen sister koasoia, ni ah tamanda ahnsou me e sohla kin iang pwihn en Koht. E koasoia: “I kin ahnsou koaros kapakapki me ni ahl soh lipilipil me ehu rahn Siohwa pahn kupwureiedohng nan padahk mehlel.”​—⁠Melkahka 119:176.

14. Dahme pwutako nan karasaraso koasoanehdi me e pahn wia, oh iaduwen e kasalehda karakarahk ni ah wia met?

14 Ahpw dahme irail ko me peila kak wiahiong arail irair kan? Nan sapwellimen Sises karasaras, pwutako koasoanehdi me e pahn pwuralahng imweo oh peki rehn ah pahpa en mahkohng ih. “Wiahkiniehla emen noumw tohndoadoahk,” pwutako koasoia. Soahngen pwukoahn tohndoadoahk me pwutako peki ah pahpa en wiahkihla ih iei soahngen pwukoah me aramas kin pwainda pwehn wia doadoahk en ehuehu rahn me re pil kakete kakommoalehdi sang ah doadoahk erein rahn ehute. Pwukoah en soangen tohndoadoahk menet kin tikitiksang pwukoahn ladu me kin duwehte emen tohnpeneinei. Ihme pwutako sohte kin lemeleme me e pahn peki en pwurala duwehte mahso me wia emen nein ohlo pwutak. E pil men ale pwukoah me keieu tikitik pwehn kadehdehda ah loalopwoat ong ah pahpa ehuehu rahn. Ahpw, pwutako uhdahn pahn pwuriamweila.

Kasamwo Limpoak Ehu

15-17. (a) Iaduwen pahpao mwekidikihda ah kilang nah pwutako? (b) Dahme likouwo, rihngo, oh suhto me pahpao kihong nah pwutako kin kasalehda? (c) En pahpao koasoanehdi pwehn mie ehu kamadipw kin kasalehda dahieu?

15 “E saikinte karanih ihmwo, a eh pahpao kilangada. Nan kapehde mwekidkihda kowahlap kompoakehn pwutako; ih eri tangalahte pwoalehdi oh metik. A pwutako ahpw nda, ‘Ipa, I dipadahr rehn Koht oh pil rehmwi; I solahr warohng ke en wiahkin ie noumw pwutako. Wiahkiniehla emen noumw tohndoadoahk. A semeo ahpw ekerpene eh ladu ko oh ndahng irail, ‘Kumwail pitipit wahdo likou me keieu kaselel oh kalikawihada. Kumwail kihong rihng nin sendin peh oh suht nin neh kan. Kumwail wahdo kou pwul mworourou oh kemehla, pwe kitail en kamadipw! Pwe nei pwutaket melahr, e ahpw mourdahr; e salongalahr, e ahpw dierekier.’ Irail eri tapihada arail kamadipwo.”​—Luk 15:20-​24, NW.

16 Pahpa de nohno limpoak men pahn inengieng nah seri en pwurodo ni pali ngehn. Ihme kahrehda, kitail kak medewehla duwen pahpao nan karasaraso me kin mwasamwasahn ahlo mwohn imweo rahn koaros, oh kin ngoangkihla koapworopworki me nah pwutako pahn pwurodo. Ahnsouwet e kilangada nah pwutako kohkohdahdo nan ahlo! Mwomwen pwutako ni mehlel wekila. Ahpw mendahki met, semeo ese me ih met nah pwutako mendahki e “saikinte karanih ihmwo.” E sohte katapanki ah likou tei oh mwomwen nsensuwed en pwutako; e kilangada nah pwutako, oh e tangala reh pwehn tuhwong!

17 Ni ahnsou me semeo tangala rehn nah pwutako, e pwoalehdi oh metik. Ih eri padahkihong nah ladu ko en wahdohng nah pwutako ehu likou, ehu rihng, oh suht. Likou wet kaidehn ihte likou sohte lipilipil, ahpw “me keieu kaselel”​—⁠ele likou pwupw deiad me kin kohiengete irail me wahu kan me kin lukedo. Pwehki ladu kan sohte kin doadoahngki rihng de suht, semeo kin kasansalehda me e kasamwo nah pwutako nin duwen emen towe mehlel en ah peneinei. Ahpw semeo kin pil wia laud sang met. E kaweidki me kamadipw ehu en wiawihda pwehn kasarawih pwuredohn nah pwutako. E sansal me, en ohl menet ah mahkohng nah pwutako sohte kin wiawi ni menseirin de ihte pwehki pwurodohn nah pwutako kahrehong en pwukoahki mahkohng; e men kasalehda mahk. Met kin kaperenda ih.

18, 19. (a) Dahme karasaras en pwutako kin padahkihong komwi duwen Siohwa? (b) Nin duwen me sansaldahr nan sapwellime wiewia ong Suda oh Serusalem, iaduwen Siohwa kin “kaunopada” ong pwurodohn me dipan emen?

18 Eri sang ni mehkan me kitail sukuhlkiehr leler met, dahme karasaras en pwutako padahkihong kitail duwen Kohto me kitail kin paiekihda kaudokiong? Keieu, iei me Siohwa me “diren kalahngan oh kadek, me sohte kin mwadang lingeringerda, oh me diren limpoak lapalap oh loalopwoat mehlel.” (Eksodus 34:⁠6) Mehlel, mahk kin wia irair sansal ehu en Koht. Irair wet kin wia elen sapwellime wiewia ong irail ko me anahne sawas. Oh, sapwellimen Sises karasaraso kin padahkihong kitail me Siohwa me “diren mahk.” (Melkahka 86:⁠5) E kin ketin mwasamwasahn, ni karasaras, pwehn kasawih ma aramas dipan akan kin wekidala mohngiongarail pwehn kihong ih poahsoan en ketikihda mahk.​—⁠2 Kronikel 12:12; 16:⁠9.

19 Medemedewe duwen en Koht wiewia ong mehn Israel kan. Siohwa kamwekidki soukohp Aiseia ngehn sarawi en kasalehda me Suda oh Serusalem ‘soumwahu sang ni moangarail lel ni nehrail.’ Ahpw e pil mahsanih: “Kauno [“Siohwa,” NW] ketin kaunopada en kupwurmahk oh kalahngan ong kumwail.” (Aiseia 1:​5, 6; 30:18; 55:7; Esekiel 33:11) Duwehte sahmo nan en Sises karasaraso, Siohwa kin ni karasaras, ‘mwasamwasahn ahlo.’ E kin kasikasik pwurodohn irail kan me kesehla kaudok mehlel. Kaidehn ih met me kitail pahn kasik sang rehn emen pahpa limpoak?​—⁠Melkahka 103:13.

20, 21. (a) Ni ahl dahieu me tohto nan rahnwet kin mwekidkihda sapwellimen Koht mahk? (b) Dahme pahn pwarada nan artikel en mwuri?

20 Ehuehu sounpahr, sapwellimen Siohwa mahk kin kamwekidada me tohto en koluhla nan kapehderail oh pwurodohng kaudok mehlel. Ia uwen met kin wadohng arail peneinei kan peren! Tehk, karasepe ehu, duwen pahpa Kristiano me koasoipe wiawi nan tepin artikel wet. E inenen peren pwe nah serepeino pwurodo ni pali ngehn oh ahnsouwet kin papah nin duwen sounkalohk kaukaule men. E koasoia: “I uhdahn peren nan koasoandi mering wet. Ahi nsensuwed uhd wekohng peren.” Ni mehlel, Siohwa pahn pil kupwurperenkihda met!​—⁠Lepin Padahk 27:11.

21 Ahpw pil miehte wehwehn karasaras en pwutako. Sises pousehlahte sapwellime karasaras pwehn kasalehda wekpeseng en sapwellimen Siohwa mahk oh lamalam en kadeik me Sounkawehwe kan en Kosonnedo oh Parisi kan kin kalap kasalehda. Iaduwen e wia met​—⁠oh ia wehwehn met ong kitail​—⁠pahn pwarada nan artikel en mwuri.

[Nting tikitik kan me mi pah]

a  Soai kan oh karasaras teikan me kin pwarada nan Paipel sohte kin uhdahn wiawi nan uhdahn mour. Oh pil ehu, pwehki kahrepen soai pwukat iei en kihda ehu mehn kasukuhl, kitail sohte anahne rapahki wehwehn karasaras en oaritik koaros.

b  Wehwe kesempwal en soai wet kin sansalda nan Watchtower (lokaiahn wai) en February 15, 1989, pali 16, 17.

Ni Kousapahl

◻ Ia wekpeseng lamalam en Sises oh lamalam en Parisi ong mahk?

◻ Ihs nan rahnwet kin rasehng pwutako nan karasaraso, oh iaduwen?

◻ Irair dah kei me kahrehong pwutako nan karasaraso en koluhla nan kapehde?

◻ Iaduwen pahpa kasalehda mahk ong nah pwutako me koluhla?

[Koakon nan pali 21]

RE KOLUHLAHR NAN KAPEHDERAIL

Dahme seweseiehr ekei me mahso pisikensang mwomwohdisohn Kristian en koluhla? Kitail kak wehwehkihda duwen met sang dahme aramas pwukat koasoia.

“Nan mohngiongih I ese iawasa padahk mehlel. I onopkiehr Paipel sounpar tohto oh ahi kin iang towehda mihding en Kristian kan kin wia mehkot laud nan ahi mour. Iaduwen ahi kak pein sohpeisang Siohwa ahnsou reirei? E sohte keseieihla; ngehi me kesehla ih. Ikmwuri, I pein wehkada duwen ia uwen ahi sapwung oh kahngohdi oh me Mahsen en Siohwa kin pwung ahnsou koaros​—⁠‘ke kin dolung dahme ke padokedi.’”​—⁠C.W.

“Nei kisin serepeino ahpwtehn tepiada lokaia, oh met kin kamwekidih mohngiongih pwehki I men padahkihong ih soahng kan me duwehte ihs me Siohwa oh iaduwen e kak kapakap ong ih. I sohte kak meir, oh ehu pwong I dake sidohsa tangala ni ehu wasahn mwemweit oh wie sengiseng. I sengiseng, oh I kapakap ong Siohwa, mehkot me I ehdin wia mwurin ahnsou reirei. Ihte me I ese iei me I anahne Siohwa en pwurehng mih nan ahi mour, oh I koapworopworki me e pahn mahkohng ie.”​—G.H.

“Ni ahnsou me oaralapo kaudok kin pwarada, I kin padahkihong aramas kan me ma mie ahi pilipil en pilada mehnia kaudok me kin padahngki padahk mehlel, I men wiahla emen Sounkadehde kan en Siohwa. Eri I kin nda me mahso ngehi emen Sounkadehde, ahpw I sohte kak mour pahrekiong met, ihme I sohla wia emen Sounkadehde. Ni ahi kin pehmada met, I kin namenekla oh nsensuwedla. Ikmwuri I pein wehkada, ‘I nsensuwedkihla met. I anahne wiahda wekidekla kan.’”​—⁠C.N.

“Sounpar silisek limau samwalahro ahi pwoud oh ngehi pisikensang mwomwohdiso. Eri, nan 1991, se pwuriamweiki elder riemen ara pwarek kiht oh padahkihong kiht me se kak pwuredo rehn Siohwa. Sounpwong weneu mwuri, se perenkihda en kasapahldo nan pwihn en Koht. Ahi pwoudo sounpar 79 oh ngehi sounpar 63.”​—⁠C.A.

    Pwuhk kan en lokaiahn Pohnpei (1987-2025)
    Log Out
    Log In
    • Ponapean
    • Share
    • Me Ke Mwahuki
    • Copyright © 2025 Watch Tower Bible and Tract Society of Pennsylvania
    • Terms of Use
    • Privacy Policy
    • Privacy Settings
    • JW.ORG
    • Log In
    Share