Iaduwen Ahmw Pahn Sewese Seri Men Me “Salongalahr”?
“Me mwahu ke en iang kiht perenda . . . pwe e salongalahr, e ahpw dierekier.”—LUK 15:32.
1, 2. (a) Iaduwen ekei pwulopwul kan kin mwekidkihda padahk mehlel en Kristian akan? (b) Ia pepehm akan en irail pahpa oh nohno kan oh seri kan me kin mihla pahn soangen irair wet?
“I PAHN KESEHLA padahk mehlel!” E inenen kapwuriamwei en rong sang rehn seri men koasoi pwukat, keieu ma eh pahpa oh nohno kin lemmwin Koht oh nantihong sewese neirail seri kan en kekeid ni elen Kristian! Pil ekei irail me pwulopwul kin mwomwen “peiweisang padahk mehlel” sohte kin koasoiada duwen arail pepehm akan. (Ipru 2:1) Pali moron en pwulupwul pwukat kin duwehte pwutak me salongala nan karasaras me Sises kihda, pwe pwutako tangasang semeo oh kesehla mwahl eh sohso nan sahpw doh.—Luk 15:11-16.
2 Edetehn pali moron en Sounkadehdehn Siohwa kan sohte kin lelong kahpwal wet, ong irail me kin mihla nan irair apwal wet, sohte lokaiahn kamweit me pahn kak ni unsek kihsang rehrail arail nsensuwed. Oh kitail pil sohte pahn kak pohnsehsehla nsensuwed laud me seri sapeiko pahn pein lelohng. Ele mwein nan kapehde, kadeikpen loale kin lidere ih. Nan karasaras me Sises kihda, pwutak me salongala “kolulahr nan kapehde,” oh met kin kaperenda eh pahpa. Iaduwen pahpa oh nohno oh aramas teikan nan mwomwohdiso pahn kak sewese seri salongala kan en ‘koluhla nan kapehdarail kan’?—Luk 15:17.
Dahme Kahrehda Ekei kin Pilada en Kesehla Padahk Mehlel
3. Dahme kahrehda ekei irail me pwulopwul kan kin pilada en solahr iang mwomwohdiso en Kristian?
3 Irail me pwulopwul rar rar kei kin, ni peren, papah Siohwa nan mwomwohdiso en Kristian. Eri, dahme kahrehda ekei irail me pwulopwul kan kin kesehla padahk mehlel? Mwein re kin lemeleme irail katiasang soahng kan me sampah wet kin kihda. (2 Timoty 4:10) Ekei irail mwein kin lemeleme me mehn perepe kan me sapwellimen Siohwa pwihn en sihpw kin kihda kin nohn kakos. Iet ekei kahrepe kan me ekei irail me pwulopwul kan kin peiweisang sapwellimen Koht pwihn en sihpw: Suwedlahn nsen mwakelekel, de re mwahukihda emen serepein de emen pwutak, de re men irail me pwulopwul teikan en perenkin irail. Pil ekei irail me pwulopwul kan kin solahr men papah Koht pwehki re lemeleme me ah pahpa oh nohno de emen Kristian me mwalaun.
4. Pali laud en ahnsou, ia poahsoanpen me kin kahrehong ekei irail me pwulopwul kan en peiweisang padahk mehlel?
4 Madamadau kan oh wiewia kan en uhwong me seri men kin ahneki kin pak tohto wiawi pwehki e luwet ni pali ngehn, oh madamadau wet kin pil kasalehda duwen eh pepehm loal kan. (Lepin Padahk 15:13; Madiu 12:34) Ahpw, sohte lipilipil ia kahrepe emen pwulopwul kin peiweisang padahk mehlel, poahsoanpen kahpwalo iei met: e sohte kin “wehwehkihla mwahu duwen padahk mehlel.” (2 Timoty 3:7, New World Translation) Mehlel, e sohte mwahu ong irail me pwulopwul kan en kaudokiong Siohwa ni soh-peren, eri, e kesempwal ren wiahda arail nanpwung mwahu rehn Koht ma re pahn perenki papah Koht. Dahme pahn sewese irail en wia met?
Karanih Koht
5. Ma emen me pwulopwul men karanih Koht, dahme keieu kesempwal e anahne en wia?
5 Tohnpadahk Seims ntingihdi: “kumwail keido mpen Koht oh e pahn ketin keiong mpamwail.” (Seims 4:8) Ma met pahn pweida ong irail me pwulopwul kan, sawas pahn anahne kohwong irail en perenki wadek Mahsen en Koht. (Melkahka 34:8) Ni tepio, e anahne nim “pilen dihdi” me kin wehwehki padahk mengei kan nan Paipel. Ahpw, ni ahnsou me e pahn perenki wadek Mahsen en Koht oh perenki sukuhliki “kisin tungoal kekeluwak” me kin wehwehki padahk loal kan ni pali ngehn, e pahn kak wiahla aramas me mah ni pali ngehn. (Ipru 5:11-14; Melkahka 1:2) Emen pwulopwul wehkada me mie ahnsou ehu me e kin perenki mourki mouren sampah, ahpw ni ahnsouwet, e pwurehng tepida kalahnganki soahng ngehnin kan. Dahme sewese ih en wekidala eh mour? E mwekidki sawas ehu me kohwong ih en wadek Paipel pwon, oh e nantihong kolokol eh koasoandi en wadek Paipel. Ei, en kaukaule wadek Mahsen en Koht me kesempwal en sewese emen en karanih Siohwa.
6, 7. Iaduwen pahpa oh nohno kan kak sewese neirail seri kan en perenki wadek Mahsen en Koht?
6 E inenen kesempwal pahpa oh nohno kan en sewese neirail seri kan en perenki wadek Mahsen en Koht! Mendahki ma peinakapw emen kin iang eh peneinei onop Paipel ahnsou koaros, e kin werek suwed. Peinakapw menet koasoia duwen arail onop en peneinei: “Ni ahnsou me ai pahpa kin wia peidek ong kitail, I kin ihte wadek pasapeng kan sang nan pwuhko, oh I pil sohte kin sohpeiong ai pahpa.” Ihme kahrehda, pahpa oh nohno loalokong kan sohte pahn wadekte pwuhko me ahr peneinei kin doadoahngki ong onop en peneinei, ahpw irail pahn, ni koahiek, kawehwe ong oh padahkiong neirail seri kan. (2 Timoty 4:2) Pwe emen me pwulopwul en kak perenki onop, e anahne pehm me onopo kin pid duwen dahme e kin lemeleme oh pid duwen pein eh mour. Dahme ke soh doadoahngki soangen peidek kan me pahn kahrehong ih en kasalehda pein eh pepehm akan? Kangoange me pwulopwulo en pein doadoahngki dahme e sukuhliki sang makisihn de pwuhk me peneinei kin onopki oh doadoahngki soahng pwukat nan eh mour.a
7 Oh e pil kesempwal en wia onop en Paipel ni elen kaperen. Ni ahnsou me konehng, ke kak mweidong noumw seri kan en wiahda sipai me kin pid poadopoad kan en nan Paipel. Ni ahnsou me kumwail pahn koasoiapene duwen ehu sahpw nan Paipel, sewese irail en medemedewe duwen iawasa oh ia mwomwen sahpwo. Ke kak doadoahngki mep kan oh chart kan. Ei, ma pahpa oh nohno kan pahn kaunopada mwahu ong arail onop en peneinei, arail ahnsoun onop pahn inenen kaperen. Pahpa oh nohno kan pil anahne tehk duwen pein arail nanpwungmwahu rehn Siohwa. Ni ahr kin karanih Siohwa, re pil pahn kak sewese neirail seri kan en wia met.—Deuderonomi 6:5-7.
8. Iaduwen kapakap kin sewese emen en karanih Koht?
8 Kapakap pil kin sewese emen en karanih Koht. Emen serepein me mahki nanpwungen sounpar eisek silu oh eisek limau mihla nan irair en pwunod laud pwehki e sohte kak pilada mehnia mour me e mwahuki: eh mouren Kristian de eh mouren kaperenih kompoakepah kan me sohte kin kamehlele padahk mehlel. (Seims 4:4) Dahme e wia? E wehkada, “Edin nan ahi mour, I kasalehong Siohwa ai pepehm akan ni kapakap.” Mwurin mwo, e koasoia me Siohwa sapeng eh kapakap pwe e diarada emen nan mwomwohdiso en Kristian me e kak kompoakepahki oh kasalehda eh pepehm loal kan. Met, serepein menet ahneki pepehm me Siohwa kin apwalih ih, eri e tepida karanih Koht. Pahpa oh nohno kan kak sewese neirail seri kan en kamwahuiala irairen pein arail kapakap kan. Ni ahnsou me kapakap en peneinei kin wiawi, pahpa kan pahn kak kasalehda ni unsek ahr pepehm akan, kahpwal akan, pwe neirail seri kan pahn kak kilang duwen me arail pahpa oh nohno kan kin karanih Siohwa.
Kaweid Kehlail Ahpw Ni Elen Kanengamah
9, 10. Mehn kahlehmeng dahieu me Siohwa wia ni e kin kasalehda kanengamah ong mehn Israel akan me kin wiewia suwed?
9 Ni ahnsou me emen pwulopwul kin tepida peiweisang padahk mehlel, mwein e pahn song en kelepwla oh uhwong eh pahpa oh nohno ni ahnsou me ira men sewese ih. Dahme pahpa oh nohno kan pahn kak wia ma soangen irair wet pahn pwarada nan arail peneinei? Kitail pahn tehk dahme Siohwa kin wiawiong mehn Israel akan en mahs. E kin kanengamah ong mehn Israel “keptakai” kan ni daulihlahr sounpar 900 oh mwurin met e kesehlahr irail. (Eksodus 34:9; 2 Kronikel 36:17-21; Rom 10:21) Mendahki irail kin pwurupwurehngete ‘kasongosonge Koht,’ Siohwa kin “ketin mahkikihong” irail diparail kan. “Pak tohto e ketin koledi sapwellime engieng oh pein katokehdi engieng en nan kupwure.” (Melkahka 78:38-42) Sapwellimen Koht wiewia kan ong irail kin unsek ahnsou koaros. Pahpa oh nohno limpoak kan kin kahlemengih Siohwa oh kin kanengamah ni ahnsou me neirail seri kan sohte kin mwadangete mwekidkihda ahr sawas kan.
10 Kanengamah sohte kin wehwehki “mihla pahn lokolok ni ahnsou reirei,” ahpw e kin wehwehki me emen sohte pahn kesehla eh koapworopwor me aramas me ahneki kahpwalo pahn mwahula. Siohwa kin wia mehn kahlemeng mwahu ehu en kanengamah. Pein ih kin kupwurki en kadaralahng mehn Israel akan soukohp kei. Siohwa kin “kupwurki sapwellime aramas akan,” edetehn irail “kouruhrki sapwellimen Koht meninkeder kan, sohte men rong sapwellime mahsen.” (2 Kronikel 36:15, 16) E mahsanih ong mehn Israel akan: “Tokedihsang amwail mour suwed oh wiewia suwed kan.” (Seremaia 25:4, 5) Ahpw, Siohwa sohte kin kauwehla sapwellime koasoandi pwung kan. Irail mehn Israel akan me ale kaweid en “pwurala” rehn Koht oh sapwellime koasoandi kan.
11. Iaduwen pahpa oh nohno kan kak kihda kaweid kehlail ahpw ni elen kanengamah me pahn sewese emen neirail seri me peiweisang padahk mehlel?
11 Pahpa oh nohno kan kak kahlemengih Siohwa en pil kasalehda kanengamah ni arail sohte pahn mwadang kesehla arail koapworopwor ong neirail seri me kin sohpeisang padahk mehlel. Re pahn kak tiengala mwowe en kolokol irairen koasoakoasoipene en saledek de song en pwurehng koasoakoasoipene. Ni ahr kin kapwaiada mouren kaweid pwung kan, irail kak “pwurupwurehngete” song en lel mohngiong en serio pwehn sewese ih en pwurodohng kekeid nan elen padahk mehlelo.
Ni Ahnsou Emen Me Pwulopwul Piskenla
12. Pwukoa dahieu me pahpa oh nohno kan ahneki ong neirail seri pwulopwul me kousoan rehrail ahpw piskensang mwomwohdiso?
12 Ahpw, dahme pahn wiawi ma emen me pwulopwul me kin kousoan rehn eh pahpa oh nohno wiahda dihp laud oh pwehki e sohte koluhla, e piskensang mwomwohdiso? Pwe e kin kousoante rehn eh pahpa oh nohno, ira pwukoahki kaweidih oh kaiahne serio ki sapwellimen Koht Mahsen. Iaduwen met pahn kak wiawi?—Lepin Padahk 6:20-22; 29:17.
13. Iaduwen pahpa oh nohno kan kak song en lel mohngiong en neirail serio me wiahda sapwung?
13 Pahpa oh nohno pahn kak—oh met wia mehkot me keieu mwahu—en kihda kaweid oh kaiahn ni ahnsou me pahpa oh nohno men pahn kelepwla rehn serio ni ahnsoun onop Paipel. Pahpa oh nohno kan en dehr kadeikada serio pwehki eh kin lamalam aklapalap oh mwomwen keptakai ahpw ren song kilang dahme mih nan eh mohngiong. Dahme kahrehda e luwetala ni pali ngehn? (Lepin Padahk 20:5) Ke kak lel eh mohngiong? Mehnia iren Paipel kan ke kak doadoahngki ni ahl koahiek? Wahnpoaron Pohl kamehlelehong kitail: “Ni mehlel, mahsen en Koht wie momour oh manaman, e keng sang kedlahs me au riau. E kin lellong loalen aramas lel wasa keieu rir, wasa me mour oh ngehn kin tuhpene ie, wasa me kakon oh sahl akan kin tuhpene ie. E kin kadeikada ineng oh lamalam en nan kapehd en aramas.” (Ipru 4:12) Ei, pahpa oh nohno kan kak wia laudsang ihte padahkiong neirail seri kan en dehr pwurehng wiahda dihp. Irail kak song en tepida kamwahuiahla oh kapwungala arail madamadau kan.
14. Ia keieun kahk emen me pwulopwul me wiahda dihp laud kak wia pwehn pwurehng ahneki nanpwung mwahu rehn Siohwa, oh iaduwen pahpa oh nohno kan kak sewese serio en wia met?
14 Emen me pwulopwul me wiahda dihp laud anahne pwurehng kamwahuiahla eh nanpwungmwahu rehn Siohwa. Keieu, e anahne “koluhla . . . oh wiliakapwala.” (Wiewia 3:19; Aiseia 55:6, 7) Ni arail kin sewese neirail serio me kin kousoan rehrail en koluhla mehlel, pahpa oh nohno kan en ‘dehr akamai, oh kadek ni [arail] pahn kapwungala’ seri sapeiko. (2 Timoty 2:24-26) Irail anahne “kapwungala” serio ni ahl me Paipel kin kawehwehda. Lepin mahsen en Krihk “kapwungala” pil kak wehwehki “kadehde ong” emen. (Kaudiahl 3:19; Sohn 16:8) Ihme kahrehda, kapwungala serio kin wehwehki me pahpa de nohno men pahn kasalehong serio mehn kadehde tohto pwehn sewese ih en kamehlele me eh wiewia kan me sapwung. Ahpw, ni mehlel, met sohte mengei en wia. Ni ahnsou me irail kak, pahpa oh nohno kan en nantihong lel eh mohngiong, nantihong kawekihla eh madamadau kan ni arail doadoahngki iren Paipel kan me pahn mwahu ong ih. Irail anahne song en sewese serio en wehwehkihla duwen anahnpen “tateki dahme suwed oh kesempwaliki dahme mwahu.” (Eimwos 5:15) Ele mwein e pahn kak pwurehng “pehmada pein ih oh tangasang lidip en Tepil.”
15. Dahme kahrehda kapakap inenen kesempwal pwehn sewese emen en pwurehng ahneki nanpwungmwahu rehn Siohwa?
15 Ma emen men pwurehng ahneki nanpwungmwahu rehn Siohwa, e pahn anahne kapakap. Ni mehlel, sohte konehng emen en “kapakap ong Koht” duwen aramas men me sohlahr iang mwomwohdiso en Kristian ahpw ni sansal kin nseneki wia dihp oh sohte koluhla mehlel. (1 Sohn 5:16, 17; Seremaia 7:16-20; Ipru 10:26, 27) Ahpw, pahpa oh nohno kan kak peki rehn Siohwa en ketikihong irail erpit pwehn wehwehki dahme re kak wia. (Seims 1:5) Ma emen pwulopwul me piskenla kin kasansalehda me e koluhla mehlel ahpw sohte kak “saledek en koasoi ong Koht,” eh pahpa oh nohno pahn kak kapakap ong Koht duwen serio oh ma Koht pahn diarada kahrepen eh pahn kak mahk ong serio, sapwellime kupwur en pweida. (1 Sohn 3:21) Ni ahnsou me pwulopwul menet pahn rong kapakap pwukat, met pahn kak sewese ih en kamehlele me Siohwa kin wia Koht me diren mahk kalahngan.b—Eksodus 34:6, 7; Seims 5:16.
16. Iaduwen kitail kak sewese tohnpeneinei kan me emen me pwulopwul piskenla nan arail peneineio?
16 Ma emen me pwulopwul me papidaisla ahpw piskenla, tohnmwomwohdiso teikan anahne tamataman en “dehr patehng ih.” (1 Korint 5:11; 2 Sohn 10, 11) Met pahn kak sewese ih en pwurehng ‘pehmada pein ih’ oh pwurala rehn sapwellimen Koht pwihn. (Luk 15:17) Mehnda ma serio pahn pwurodo nan padahk mehlel de soh, tohnmwomwohdiso teikan pahn kak kangoange eh peneinei. Kitail koaros kak rapahki ahnsou kan en kasalehda “limpoak” oh “kadek” ong peneinei.—1 Piter 3:8, 9.
Iaduwen Aramas Teikan Kak Kihda Arail Sawas
17. Dahme tohnmwomwohdiso kan pahn anahne medemedewe ni ahnsou me re kin sosong en sewese emen seri me tepida peila sang padahk mehlel?
17 Ahpw, iaduwen emen me pwulopwul me sohte piskensang mwomwohdiso en Kristian ahpw e tepida luwetala ni pali ngehn? Wahnpoaron Pohl ntingihdi, “Ma kakon en war ehu kin medekla, kakon koaros kin iang medekla.” (1 Korint 12:26) Tohnmwomwohdiso teikan kak kasalehda me re nsenohki pwulopwul menet. Ahpw, irail pil anahne en kanahieng, pwe pwulopwul menet me luwetala ni pali ngehn pil kak kaluwetala me pwulopwul teikan. (Kalesia 5:7-9) Nan ehu mwomwohdiso, ekei tohnmwomwodiso me laud kan men kasalehda me re nsenohki sewese ekei irail me pwulopwul kan me tepida luwetala ni pali ngehn, oh tohnmwomwohdiso pwukat eri luhke me pwulopwul pwukat en iang irail mwadong oh mweidong me pwulopwul pwukat en iang irail kesengki koul en sampah. Edetehn pwulopwul pwukat kin mwadangete iang oh perenki ahnsoun pokonpene en keseng pwukat me wiawi, arail werek suwed kahrehong me pwulopwul koaros en solahr men iang mwomwohdiso. (1 Korint 15:33; Sud 22, 23) Dahme pahn kak sewese serio me luwetala ni pali ngehn, kaidehn ahnsoun kohpene en mwadong me sohte epwel mwahu mie, ahpw werekiong irail me pahn kak sewese ih en pwurehng kesempwaliki soahng ngehnin kan.c
18. Iaduwen kitail kak alasang madamadau en semen pwutak me salongala nan karasaras me Sises kihda?
18 Ni ahnsou me emen me pwulopwul kin luwetala oh solahr kin iang miniminiong tohnmwomwohdiso eri pwurehng pedolong nan Kingdom Hall de iang towehda kapokon, kitail anahne en medemedewe duwen eh pepehm akan. E soh konehng kitail en kasamwo ih duwehte me semen pwutak me salongalahr wia nan karasaras me Sises kihda? (Luk 15:18-20, 25-32) Emen mwahnakapw me sohlahr iang mwomwohdiso en Kristian pwurehng iang towehda Kapokon en District koasoia: “I lemeleme me aramas koaros pahn pohnsehsehla soangen aramas duwehte ngehi, ahpw irail brother oh sister kan tuhwong ie oh re kin kasamwo ie. I mwekidkihda arail kadek me re kasalehong ie.” Ih eri pwurehng onop Paipel oh papidaisla.
Dehr Mworusala
19, 20. Dahme kahrehda kitail anahne kolokolete soangen madamadau en pweida oh ahneki koapworopwor me kin pid duwen emen seri me salongala?
19 Pahpa oh nohno kan oh aramas teikan anahne kasalehda kanengamah pwe e sohte pahn mengei en sewese emen seri “salongala” en ‘pehmada pein ih.’ Ahpw dehr mworusala. “Kauno sohte kin ketin pwapwand ni wiepen sapwellime inou, duwen ekei ar kin lemeleme. Ahpw, e kin ketin kanengamahiong kumwail, pwehki eh sohte ketin kupwurki emen en lekdekla, pwe e ketin kupwurki koaros en wiliakapwala oh sohpeisang nan diparail kan.” (2 Piter 3:9) Paipel kin kamehlelehong kitail me Siohwa kin kupwurki aramas akan en koluhla mehlel oh ale komourparail. Ni mehlel, e tiengala mwowe en wiahda koasoandi ehu en mweidong aramas en wiahla kompoakepah kan. (2 Korint 5:18, 19) Sapwellime irairen kanengamah kin kahrehong aramas rar kei en pehmada pein irail.—Aiseia 2:2, 3.
20 Eri, e soh konehng irail pahpa oh nohno kan en doadoahngki sawas tohto me kohsang rehn Paipel en sewese neirail pwulopwul kan me salongala en pehmada pein irail? Ni ahnsou me ke pahn kahlemengih Siohwa, kanengamahiong noumw seri oh nantihong sewese ih en pwurehng karanih Siohwa. Kolokolete teng ahmw kapwaiada mouren kaweid kan en Paipel, oh nantihong kasalehda sapwellimen Siohwa irair kan duwehte limpoak, kopwungpwung, oh erpit ni ahnsou me ke pahn kapakap ong Siohwa oh peki sapwellime sawas. Mehlel, aramas tohto kin pelianda Koht, ahpw mwuhr, re kin mwekidki sapwellimen Siohwa luhk me kohwong irail ni elen limpoak en pwurala rehn Koht, eri, ehu rahn noumw pwutak de serepein me salongala mwein pil pahn pwurala rehn sapwellimen Koht pwihn.—Luk 15:6, 7.
[Nting tikitik me mi pahs]
a Ma ke men ale pil ekei sawas ong iaduwen ke kak padahkiong irail me pwulopwul kan ni ahl me pahn pweida, menlau kilang The Watchtower en July 1, 1999, pali 13-17.
b Kapakapki emen seri me piskenla sohte pahn wiawi nan mihding en mwomwohdiso kan, pwe aramas teikan ele mwein sohte pahn wehwehki duwen irairen aramas piskenlahro.—Kilang The Watchtower en October 15, 1979, pali 31.
c Ke kak kilang kaweid kan me pid duwen oaralap wet nan Awake! en June 22, 1972, pali 13-16; September 22, 1996, pali 21-23.
Ke Tamanda?
• Ia poahsoanpen ekei irail me pwulopwul kan solahr iang mwomwohdiso?
• Sawas dahieu pahn kak kohwong irail pwulopwul kan en karanih Siohwa?
• Dahme kahrehda pahpa oh nohno kan anahne kihda kaweid kehlail ahpw ni elen kanengamah me pahn sewese emen neirail seri salongala?
• Iaduwen tohnmwomwohdiso kan kak sewese seri salongala kan en pwurala rehn Koht?
[Kilel nan Pali 27]
Wadek Mahsen en Koht kin wia mehkot kesempwal ma emen men karanih Siohwa
[Kilel nan Pali 27]
Kapakap en pahpa oh nohno kan me kohsang mohngiongarail pahn kak sewese neirail seri kan en kilang me arail pahpa oh nohno kan kin karanih Siohwa
[Kilel nan Pali 29]
Kasamwo seri salongala men ni ahnsou me e ‘pehmada pein ih’
[Kilel nan Pali 30]
Doadoahngki ewen kahk konehng kan en sewese noumw seri en pwurehng karanih Siohwa