Kahlemengih Sapwellimen Siohwa Mahk
“Kumwail eri kin kalahngan, duwehte Samamwail me ketin kupwurkalahngan.”—LUK 6:36.
1. Iaduwen Parisi kan kasalehda me pein irail soh mahk?
MENDAHKI aramas kapikipikada ni mwomwen Koht, re sohte kin kalap kahlemengih sapwellime mahk. (Senesis 1:27) Karasepe ehu, tehk Parisi kan. Nin duwen pwihn ehu, re sohte kin perenki en Sises kamwahuwiala ohl emen me mwoator apali peh ni rahnen Sapad. Ahpw, re wia lamalamki Sises “pwe ren kemehla ih.” (Madiu 12:9-14) Ni ahnsou tohrohr ehu, Sises kamwahuwiala ohl emen me maskun sang ni eh ipwidi. Pil pwurehng, “ekei Parisi kan” sohte perenki en Sises limpoak. Ahpw, re lipahnedki: “Ohl me wiadahr met sohte pwarodo sang rehn Koht, pwehki eh sohte peikiong kosonned en rahnen Sapad.”—Sohn 9:1-7, 16.
2, 3. Ia wehwehn sapwellimen Sises mahseno, “Kalikasang kumwail ihsen Parisi”?
2 Lamalam keptakai en Parisi kan kin wia mehkot me sapwung ong aramas oh dihp ehu ong Koht. (Sohn 9:39-41) Ihme ki kahrepe mwahu, Sises kaweidki sapwellime tohnpadahk kan, “Mwasahn, oh kalikasang kumwail ihsen” pwihn en Parisi oh pelien kaudok teikan, duwehte Sadusi kan. (Madiu 16:6) Paipel kin karasakihong ihs dihp oh samin. Ihme Sises kin mahmahsanih me padahk kan en “sounkawehwehn Kosonnedo oh Parisi kan” kak kasaminehla kaudok mwakelekel. Iaduwen? Pwe padahk pwukat kin padahkihong aramas kan en kilangwohng Kosonned en Koht me e kin pidadahte kosonned oh tiahk lemei kan, oh ren kin pohnsowehla “kosonned kesempwal kan,” me iangahki mahk. (Madiu 23:23) Soahngen mwomwen tiahk en kaudok wet kin wiahiong kaudok en Koht en wiahla wisik toutou ehu.
3 Nan pali keriau en sapwellime karasaras en pwutak tikitiko, Sises kin kasansalehda madamadau samin en kaun en pelien lamalam en Suhs kan. Nan karasaraso, pahpao, me mwete Siohwa, kin ngoangki pwehn mahkohng nah pwutako me koluhlahr. Ahpw rien pwutako pwutak laudo, me kin mwete “Parisi kan oh sounkawehwehn Kosonnedo,” kin ahneki lamalam me weksang met.—Luk 15:2.
Rie Pwutako Mwakarda
4, 5. Ni ahl dahieu pwutak laudo “salongala”?
4 “A nindoken mepwukat eh wiewiawi, pwutak laudo mihmi nansapw. Ni eh pwuredo oh kerendohng ni ihmwo, e rongada ar kesekeseng oh kahkahlek nan ihmwo. Ih eri ekerodo emen ladu ko oh idek dahme wiewiawi mwo. A laduwo sapeng, ndahng, ‘Riomwio me pwurodohr, semomwio ahpw kemehla kou pwul mworourouwo, pwehki eh pwurodo ni eh mour oh kehlail.’ Pwutak laudo ahpw mwakarkihda oh sohte men pedolong nan ihmwo.”—Luk 15:25-28.
5 E sansal me, kaidehn pwutak tikitikohte nan sapwellimen Sises karasaraso me ahneki kahpwal ehu. Ehu pwuhk koasoia: “Pwutak riemenet koaros me sansalda wasaht salongalahr. Me tikitiko salongala pwehki sapwung me kasaminehla ih, oh me laudo sang ni ah madamadau en aklapalap me kamaskunla ih.” Tehk me pwutak laudo sohte ihte sohte men iang peren ahpw e “mwakarada.” Utupen lepin lokaiahn Krihko “mwakar” kin wehwehki, kaidehn en lokaia lingeringerte, ahpw e kin wia irair en madamadau. E sansal me pwutak laudo kin kokou ah engieng, ihme e lemeleme me e sohte konehng en kasarawih pwuredohn emen me sohte anahne en kohkohsang ah peneinei.
6. Ihs me pwutak laudo kin mwete, oh pwekihda?
6 Pwutak laudo kin mwete irail ko me kin lingeringerki limpoak oh nseno me Sises kin wiahong me dipan akan. Irail me aklapalap pwukat sohte kin mwekidikihda mahk en Sises; re pil sohte kin kasalehda peren me kin wiawi nanleng ni ahnsou me mahk kin kohwong emen me dipan. Ahpw, sapwellimen Sises mahk kin kalaudehla arail mwakar, oh re kin tepiada “kolokol lamalam suwed” nan kapehderail. (Madiu 9:2-4) Ehu ahnsouwo uwen lauden en ekei Parisi kan arail lingeringer, re ekerodo emen ohl me Sises kamwahuwiala oh eri “kausasang” nan sinakoke—sansal me re pisikenla ih! (Sohn 9:22, 34) Duwehte pwutak laudo me “sohte men pedolong nan ihmwo,” kaun en lamalam en mehn Suhs kan kin uhdihsang arail ahnsou mwahu en “iang peren rehn me kin pereperen kan.” (Rom 12:15) Sises pil pousehla kasansalehda arail lamalam suwed ni ah pousehla sapwellime karasaraso.
Lamalam Sapwung
7, 8. (a) Ni ahl dahieu pwutak laudo sehse wehwehn en wia nein ohlo pwutak? (b) Iaduwen pwutak laudo weksang semeo?
7 “Semeo ahpw pedoila oh pekih reh en pedolong iang kamadipwo. E ahpw sapeng semeo, nda, ‘Sounpar tohtohie I doadoahkohnguhkehr duwehte ladu men oh sohte mwahn kauwehla omw kosonned ehu. A dahme ke kihong ie? Pil sohte kisin kuht kis me I en kamadipwehki kompoakepahi kan! A noumw pwutak menet me kamwusalahr pwaise sang ni eh sohso ong lih suwed kan, ke ahpw kemehiong kou pwul mworourouwen, ni eh pwurodohr!’”—Luk 15:28-30.
8 Ki lokaia pwukat, pwutak laudo kasalehda ni sansal me e sehse ia uhdahn wehwehn en wia nein ohlo pwutak. E doadoahkohngehr ah pahpao duwehte tohndoadoahk men me kin doadoahkohng ah kaun en doadoahk. Nin duwen me e ndahng semeo: “I doadoahkohnguhkehr duwehte ladu men.” Mehlel, saikinte pak ehu me pwutak laudo kohkohsang ni ihmw de kauwehla ehu en semeo kosonned kan. Ahpw ah peik kin mwekidiki limpoak? E kin diar peren mehlel ni ah doadoahkohng semeo, de e kin ekis ekis itarkihla met, oh kin kamehlele me e wia pwutak mwahu men pwehki e kin wiahda ah pwukoah kan “nan sahpw”? Ma e uhdahn wia nein ohlo pwutak me poadidi, dahme kahrehda e sohte kasalehda lamalam en semeo? Ni ahnsou me e ahneki ahnsou mwahu en kasalehong rie pwutak tikitiko mahk, dahme kahrehda e sohte ahneki limpoak nan mohngiongih?—Pil tehk Melkahka 50:20-22.
9. Kawehwehda iaduwen kaun en lamalam en mehn Suhs kan kin rasehng pwutak laudo.
9 Kaun en lamalam en mehn Suhs kan kin rasehng pwutak laud menet. Re kamehlele me re loalopwoatohng ong Koht pwehki re kin kapwaiada unsek kosonned kan. Mehlel, peik me kesempwal. (1 Samuel 15:22) Ahpw arail kin mwohnekihla doadoahk kan kin kahrehong kaudok en Koht en wiahla tiahk ehu me sohte audepe, ihte liksansal en poadidi ahpw sohte irair mehlel en pali ngehn. Arail madamadau kan kin audaudkilahr tiahk en aramas. Sohte limpoak nan mohngiongarail. Re kin pil kilangwohng aramas semwehmwe kan duwehte pwelpar pahn nehrail kan, oh kin pil kahdanekin irail “aramas riahla.” (Sohn 7:49) Ni mehlel, iaduwen Koht kak perenki doadoahk en soahngen kaun pwukat me mohngiongarail inenen dohsang ih?—Madiu 15:7, 8.
10. (a) Dahme kahrehda mahsen ko, “I anahne amwail mahk, kaidehn amwail meirong en mahn akan” kin wia kaweid pwung? (b) Ia uwen toutou en ire wet soh mahk?
10 Sises padahkihong Parisi kan en “kohwei oh rapahki ia wehwehn mahsen en Pwuhk Sarawi pwoatet, ‘I anahne amwail mahk, kaidehn amwail meirong en mahn akan.’” (Madiu 9:13, New World Translation; Oseia 6:6) Dahme re kin mwohneki kin pingada, pwehki ma sohte mahk, eri arail meirong kan koaros pahn sohte katepe. Met kin wia ire toutou ehu pwehki Paipel kin mahsanih me irail kan me “soh mahk” kin iang wadawadohng irail ko me Koht kin kilangwohng me re “warohng mehla.” (Rom 1:3, 32) Ihme kahrehda, e sohte kapwuriamwei me Sises mahsanih me nin duwen pwihn ehu kaun en lamalam kan kin kilelediohng kasohrala soutuk. E sansal me, arail soh mahk kin keieu kahrehong arail warohng kadeik wet. (Madiu 23:23) Ahpw ele mie irail kan sang nan pwihn wet me kak ale sawas. Ni kaimwselahn ah karasaras, Sises kin nantiong en kapwungala lamalam en soahngen mehn Suhs pwukat sang ni mahsen en pahpao ong nah pwutak laudo nan karasaraso. Kitail en kilang iaduwen.
En Pahpa Men Mahk
11, 12. Iaduwen pahpao nan en Sises karasaraso kin nantiong en kawehwehiong nah pwutak laudo duwen nanpwungen pwutak laudo oh rie me tikitiko, oh ia kesempwalpen en pahpao doadoahngki lepin lokaia ko “riomw pwutak”?
11 “Semeo ahpw sapeng, nda, ‘Lao, nei seri kompoake kowe, ke kin mihmihte rehi ahnsou koaros, oh ei dipwisou koaros iei ahmw. Me mwahu ke en iang kiht perenda oh wia kamadipw wet, pwe riomw melahr, ahpw mourdahr; e salongalahr, e ahpw dierekier.’”—Luk 15:31, 32.
12 Tehk me pahpao kin doadoahngki lepin lokaiao “riomw pwutak.” Dahme kahrehda? Eri, tamanda me mwowe, ni ah koasoakoasoiong semeo, pwutak laudo ekerki pwutak tikitiko “noumw pwutak”—kaidehn “riei pwutak.” E sohte mwomwen pohnese selen peneinei nanpwungen ih oh rieo. Ihme met, semeo, ni karasaras, ndahng nah pwutako laudo: ‘Kaidehn e wiahte nei pwutak. Ih iei riomw pwutak, pein udukomw oh ntahmw. Ke anahne perenki ah pwurodo!’ Sapwellimen Sises rohng pahn ahnsouwet sansalohngehr kaun en mehn Suhs akan. Me dipan kan me re kin kailongki ni mehlel iei “riarail kan.” Ehi, “sohte aramas emen nin sampah me kin wia me pwung ahnsou koaros oh sohte sapwungala pak ehu.” (Eklesiasdes 7:20) Eri, mehn Suhs lapalap akan ahneki kahrepe koaros, en perenda ni ahnsou me aramas dipan men koluhla.
13. Peidek kesempwal dahieu kitail anahne sapengla sang ni kaimwseklahn en Sises karasaraso?
13 Mwurin en pahpao pekipek, karasaraso uhdi. E mwomwen me Sises kin luhke irail kan me rongorong ah karasaraso en pein medewehda ia imwilahn karasaraso. Mendahki dahme pwutak laudo sapengki met, mie peidek me emenemen sounrongorong kan anahne sapengla, ‘Komw pahn iang kisehn pereno me kin wiawi nanleng ni ahnsou me aramas dipan men kin koluhla?’ Kristian kan nan rahnwet pil ahneki ahnsou mwahu en kasalehda arail pasepeng ong peidek wet. Iaduwen?
Kahlemengih Sapwellimen Koht Mahk Rahnwet
14. (a) Iaduwen atail kak kapwaiada kaweid en Pohl me diarek nan Episos 5:1 ni ahnsou me e kin pidada mahk? (b) Sawehwe dahieu me pid sapwellimen Koht mahk me kitail anahne liksang?
14 Pohl kaweidki mehn Episos kan: “Nan amwail wialahr sapwellimen Koht seri kompoak kei, kumwail song en kahlimengih ih.” (Episos 5:1) Ihme kahrehda, nin duwen Kristian kan, kitail en kalahnganki sapwellimen Koht mahk, padokedi loal nan mohngiongatail, oh eri kasalehda irair wet nan atail wiewia ong meteikan. Ahpw, kitail anahne kanaieng. Kitail endehr lemeleme me sapwellimen Koht mahk kin katikitikihla toutou en dihpo. Karasepe ehu, mie ekei me ele pahn mwamwahleki met oh lemeleme, ‘Ma I wiahda dihp ehu, I kak ahnsou koaros kapakap ong Koht en mahkohng ie, oh e pahn mahkohng ie.’ Soahngen lamalam wet kin pahrekiong dahme sounnting en Paipel Sud kin kahdaneki me “wekidalahr kalahngan en Koht ong ni poadoarepen ar tiahk suwed kan.” (Sud 4) Mendahki Siohwa me diren mahk, “e uhdahn pahn kaloke” me dipan akan me sohte koluhla.—Eksodus 34:7; pil tehk Sosua 24:19; 1 Sohn 5:16.
15. (a) Dahme kahrehda elder kan keieu anahne kolokol lamalam toupahrek ong mahk? (b) Nindoken ahr sohte kin mweidala wiewia sapwung kan me emen kin pein nsenkihda en wiawi, dahme elder kan en nantiong wia, oh dahme kahrehda?
15 Ni pali teio, kitail anahne en pil kanaieng liksang nohn daulihla—lamalam en kakos oh kin kadeikada irail kan me kin kasalehda ahr koluhla mehlel oh nsensuwedkihla diparail kan. (2 Korint 7:11) Pwehki likilik kin kohwong elder kan en apwalih sapwellimen Siohwa sihpw kan, e kesempwal ren kolokol lamalam en toupahrek ong ire wet, keieu ni ahnsou me re kin tenekih dihp me emen wiahda. Mwomwohdisohn Kristian anahne en mwakelekel, oh eh pwungong Pwuhk Sarawi en “kesepwekehsang aramas suwedo” ni ah pahn pisikensang mwomwohdiso. (1 Korint 5:11-13) Ni ahnsouwohte, e mwahu en kasalehda mahk ma mie poahsoan sansal en met. Ihme nindoken elder kan sohte kin mweidala wiewia sapwung kan me emen pein nsenkihda oh wiewia, re kin nantiong en rapahki ahl ehu me limpoak oh diren mahk, me audaudki kopwungpwung. Re kin pohnese mouren kosonned en Paipelo: “Pwe ni Koht eh pahn ketin wia sapwellime kadeik, e sohte pahn ketin kupwurkalahngan ong aramas me sohte ahneki kalahngan. Pwe me kin kalahngan kin pitsang kadeik.”—Seims 2:13; Lepin Padahk 19:17; Madiu 5:7.
16. (a) Doadoahngki Paipel, kasalehda iaduwen Siohwa uhdahn kupwurki irail kan me wiahda sapwung en pwurodo reh. (b) Iaduwen kitail kak kasalehda me kitail kin pil kasamwo pwuredohn me dipan akan me koluhla?
16 Karasaraso me ntingihdi nan Luk 15:11-32 kin kasalehda ni sansal me Siohwa kupwurki me dipan akan en pwurodohng ih. Mehlel, e kin kolokol luhk wet ong irail lau re kadehdehda me pein irail uhdahn sohte men koluhla. (Esekiel 33:11; Malakai 3:7; Rom 2:4, 5; 2 Piter 3:9) Duwehte semen pwutak tikitiko nan karasaraso, Siohwa kin ketin kasalehda ah wauneki irail ko me pwurodo, oh kin ketin kasapahliraildo nin duwen towe mehlel en sapwellime peneinei. Komw kin kahlemengih Siohwa ni ahl wet? Ni ahnsou me emen iengetail me pwoson kin, pisikenla ahnsoukis, oh kasapahldo, iaduwen omw kin mwekidiki met? Kitail eseiehr me mie “peren nanleng.” (Luk 15:7) Ahpw mie peren nan sampah, nan omw mwomwohdiso, oh pil nan mohngiongomwen? De, duwehte pwutak laudo nan karasaraso, miehte kailok, likamwete menet me sohte anahne kesehla pwihn en Koht sohte warohng kasamw en kohieng?
17. (a) Irair dahieu pwarada nan Korint nan senturi keieu, oh iaduwen Pohl kaweidiki irail ko nan mwomwohdiso en apwalihala ireo? (b) Dahme kahrehda en Pohl kaweido me katapan, oh iaduwen atail kak kapwaiada met nan rahnwet? (Kilang koakon “Kasalehiong Amwail Limpoak Mehlel.”)
17 Pwehn sewese kitail en pein kasawih kitail nan ire wet, tehk dahme wiawi mpen pahro 55 C.E. nan Korint. Wasao, emen ohl me mahso pisikensang mwomwohdiso ikmwuri kamwakelehdahr ah mour. Dahme rie kan ni pali ngehn pahn wia? Ren kalikamwe ah koluhla oh pouselahte dehr patohng? Me weksang met, Pohl kangoangehki mehn Korint kan: “Eri met, kumwail mahkohng oh sewesehda, pwe eh nsensuwed dehr lalaudla oh kauwehla eh mouren souleng. Eri, I peki rehmwail ni ngidingid, kumwail en kasalehiong amwail limpoak mehlel.” (2 Korint 2:7, 8) Ahnsou koaros, irail kan me kin wiahda dihp ahpw mwuhr koluhkihla kin pehmitikiong pepehm en namenek oh nsensuwed. Ihme kahrehda, irail pwukat anahne en ale mehn kamehlel me iengerail me pwoson kan oh Siohwa kin poakohng irail. (Seremaia 31:3; Rom 1:12) Met me kesempwal. Dahme kahrehda?
18, 19. (a) Iaduwen mehn Korint kan mwowe kasalehda me re kin nohn mweidala wia nsenarail? (b) Iaduwen lamalam en soh mahk kak imwikihla “Sehdan en powehdi” mehn Korint kan?
18 Ni ah kaweidih Kristian kan en kasalehda mahk, Pohl kasalehda ia ehu kahrepen met “pwe Sehdan en dehr powekitaildi; pwe kitail eseier duwen eh koasoandi kan.” (2 Korint 2:11) Ia wehwehn mahsen en Pohl wasaht? Eri, mwowe Pohl anahne kihda kaweid kehlail ohng mwomwohdisohn Korint pwehki e nohn mweidala towe kan en wia pein nsenarail. Re mweidalahte ohl menette en wiewia dihp ni soh kalokepe. Ni arail wia met, mwomwohdiso—keieu elder kan nan mwomwohdiso—kin mwekid ni ahl ehu me kin kaperenda Sehdan, pwe e men kahrehong irair en mwomwohdiso en sohla likilik.—1 Korint 5:1-5.
19 Ma met elder kan nohn daulihla oh sohte men mahkohng emen me koluhla, Sehdan pahn poweiraildi ni ahl teio. Iaduwen? Iei me e pahn isaneki arail lemei oh soh mahk. Ma me dipan koluhlao “eh nsensuwed lalaudla oh kauwehla eh mouren souleng”—de nin duwen me Paipelo Today’s English Version kawehwehda, “nsensuwedla lau re sohla men pwuredo”—ia uwen elder kan pwukoahki laud met mwohn Siohwa! (Pil Kalang Esekiel 34:6; Seims 3:1) Ki kahrepe mwahu, mwurin ah kaweidih sapwellime werek kan en dehr kadipikelekelih “emen me tikitik pwukat,” Sises mahsanih: “Kumwail eri kaleke pein kumwail! Ma riomw men dipada, kopwungala ni meleilei; oh ma e koluhla, mahkohng.”a—Luk 17:1-4.
20. Ni ahl dahieu pahn mie peren nanleng oh sampah ni ahnsou me aramas dipan men koluhla?
20 Me kid kan me pwuredohng kaudok mwakelekel ehuehu sounpar kin kalahnganki mahk me Siohwa kin kasalehong irail. Emen sister Kristian kosoiahki ah kasapahldo: “I sohte tamanda ahnsou ehu nan ahi mour me I inenen perenki mehkot duwehte met.” Ni mehlel, tohnleng kan kin iang ih peren. Kitail en pil iang “nanleng perenda” ni ahnsou me emen me dipan kin koluhla. (Luk 15:7) Ni atail wia met, kitail kin kahlemengih sapwellimen Siohwa mahk.
[Nting tikitik me mi pah]
a Mendahki aramaso me wiahda sapwungo nan Korint kasapahldo mwurin ahnsou mwotomwot kiste, met en dehr kadoadoahkohng pisikenla koaros. Ehuehu irair kin wekpeseng. Ekei me kin wiahda sapwung kin tepiada kasalehda koluhla mehlel mwurinte arail pisikenla. Ahpw, ekei kin anahne ahnsou reirei mwohn lamalam en koluhla kin sansalda. Ahpw, nan irair koaros, irail ko me kasapahldo anahne en mahs kasalehda kadehdehpen arail nsensuwedkihla diparail, oh anahne kasalehda wiewia kan me kasalehda me re koluhla.—Wiewia 26:20; 2 Korint 7:11.
Kousapahl
◻ Ni ahl dahieu pwutak laudo kin rasehng kaun en lamalam en mehn Suhs akan?
◻ Ni ahl dahieu pwutak laudo sehse ia uhdahn wehwehn en wia nein ohlo pwutak?
◻ Ni atail kin kasalehda sapwellimen Koht mahk, ire riau dah kei me kitail anahne kalikasang kitail?
◻ Iaduwen atail kak kahlemengih sapwellimen Koht mahk nan rahnwet?
[Koakon nan pali 27]
“KASALEHIONG AMWAIL LIMPOAK MEHLEL”
Me pid aramas dipano me pisikenla oh mwuhr kasalehda ah koluhla, Pohl padahkihong mwomwohdisohn Korint: “I peki rehmwail ni ngidingid, kumwail en kasalehiong amwail limpoak mehlel.” (2 Korint 2:8) Lepin lokaiahn Krihk me kawehwe “kasalehiong” kin kohsang lepin lokaia ehu me wehwehki “kamanahla.” Ehi, irail kan me koluhla me kasapahldo anahne en pehm me tohnmwomwohdiso poakohng irail oh me re pil pwurodoiehr nin duwen tohnmwomwohdiso kei.
Ahpw, kitail anahne tamataman me, me pali moron en tohnmwomwohdiso sohte kin wehwehki dahme kin keieu kahrehong aramaso en pisikenla de en kasapahldo. Patohngete met, ele mie irail kan nan mwomwohdiso me pein apwalkihla de medengkihla met—ele ong ahnsou reirei—pwehki wiewia sapwung en aramaso me kolulahr. Ihme kahrehda, pwehki atail kin pehmtikiong soahngen ire wet, ni ahnsou me pakair kin wiawi pwehki emen kin kasapahldo, kitail en koledi sang mahs kasamwo ih lau kitail kak pein kasamwo ih.
Ia uwen e kin kakehlehda pwoson en irail ko me kasapahldo en ese me re kakehr wia tohnmwomwohdisohn Kristian! Kitail kak kangoange irail pwukat me kolulahr ni atail pahn kosoiong irail oh perenki werekiong irail nan Kingdom Hall, nan kalohk, oh ni ahnsou konehng teikan. Ihme ni atail kasalehiong, de kamanahla, atail limpoak ong kompoakepatail pwukat, kitail sohte kin katikitikiala toutou en dihpo me re wiahda. Ahpw, iangahki tohnleng kan nanleng, kitail kin perenki ire mehlelo me re soikalaiehr arail wiewia dipano oh pwuredohngehr rehn Siohwa.—Luk 15:7.
[Kilel nan pali 25]
Pwutak laudo sohte men perenki en rieo pwurodo