Sawas Mehlel ong Peneinei
“E pwung en nda me mie kahpwal en peneinei nan America. Kitail kak nda met pwehki tohtohlahn mweipeseng en pwopwoud, kekeiradahn nempehn seri kan me ipwidi ahpw sohte ahr pahpa, [oh] me pwulopwul kan me kin wiakaula oh pwopwoud kan me emen ira kin wiakaula sang rehn mehteio.”
LOKAIA pwukat me sounnuhs en delepisin en United States Tom Brokaw koasoia kak kadoadoahk nan sahpw tohto. Ia wehwehn kahpwal pwukat?
Ni ahl tohto peneinei me kin wia utupen koasoandi en aramas. Ma peneinei kin mihla nan apwal, koasoandi en aramas kin pil mihla nan apwal. Pil ehu, peneinei me kin wia utupen pelien pepehm oh mwohni ong seri kan. Seri kan kin sukuhlkihdi nan peneinei tepin mehn kasukuhl en mour kan me keieu kesempwal. Ma peneinei kin mihla nan apwal, dahme seri kan kin sukuhlkihdi? Iawasa re pahn alehsang ie popohl? Soahngen aramas dah me re pahn wiahla ni ahnsou me re laudla?
Mie sawas ong peneinei kan ni ahnsoun apwal wet? Ehi. Peneinei iei koasoandi ehu me pein Koht wiahda. (Senesis 1:27, 28) Oh e ketikihdaiehr kaweid me anahn ong peneinei nan sapwellime Mahsan, Pwuhk Sarawi. (Kolose 3:18-21) Mehlel, kitail sohte kak wekidala koasoandi en aramas koaros, ahpw kitail kak kapwaiada nan pein atail peneinei kaweid en Pwuhk Sarawi. Se men padahkihong kumwail duwen ekei aramas kan me wia met oh imwila mwahu me re alehdi.
Irehdi Mweipeseng en Pwopwoud
Nan sahpw tohto persent 50 en pwopwoud koaros kin imwikihla mweipeseng en pwopwoud. Met kin kasalehda duwen soh pweida en ehupenen nanpwungen aramas! Mehlel, me tohto me arail pwoud kin mweisang irail, kin wia doadoahk kaselel ni ahr kin kak kelehpw apwaliada neirail seri kan. Ahpw me tohto pahn uhdahn pwungki me e kin mwahu ma pwopwoud ehu kin kak kapwungala ara kahpwal oh mihmihpenehte.
Nan Solomon Islands, mie pwopwoud ehu me ara mouren pwopwoud kohkohiengehr en ohla. Ohl pwopwoudo, nein soupeidien wasao, kin lemei oh kin ahneki soahngen tiahk suwed tohto. Mour kin inenen apwal ong ah pwoud lih, oh ihme karehda liho song en kemehla pein ih. Eri, ohlo pwungkihda en onop Paipel rehn Sounkadehde kan en Siohwa. E sukuhlkihdi me ma mehmen me men kaperenda Koht kaidehn en esehte dahme suwed ahpw pil en “kailongki me suwed.” (Melkahka 97:10) Met kin oarapene kailongki soahng kan me duwehte lokaia likamw, pirap, pei, oh kamamsakau. E kapwaiada kaweid wet oh mwadangete powehdi ah tiahk suwed kan oh ah kin keh lingeringer. Ah pwoudo inenen pwuriamweikihla ah wekila, oh ara mouren pwopwoud uhdahn mwahula, met sang ni kalahngan en manaman en Mahsen en Koht.
Nan South Africa emen lih me wia emen Sounkadehdehn Siohwa rongada me ah kaun en doadoahk oh ah pwoudo kin pilipilahni me ren mweipeseng. Sounkadehdeo koasoiaiong ah kaun en doadoahko duwen lamalam en Koht ong pwopwoud oh kasalehong ih pwuhko me oaralap koasoia The Secret of Family Happiness. Pwuhk wet, me Sounkadehde kan en Siohwa ntingihda, kin kasalehda mouren kosonned kan en Pwuhk Sarawi me kin kadoadoahk nan pwopwoud, oh kin kasalehda iaduwen Pwuhk Sarawi kin sewese pwopwoud kan en kapwungala arail kahpwal akan. Ira koaros, ah kaun en doadoahk oh ah pwoud, wadek pwuhko oh song ni mehlel en kapwaiada kaweid kan en Pwuhk Sarawi me pwuhko koasoia. Pwehki met, re lemehdaiehr me re solahr pahn mweipeseng en pwopwoud—ehu mouren pwopwoud me kadoadoahkpen mouren kosonned kan en Pwuhk Sarawi doarehla.
Peneinei kan me Arail Pelien Lamalam Wekpeseng
Iaduwen pwopwoud kan me en emenemen pelien lamalam wekpeseng? Ni mehlel, Paipel kaweidiki Kristian kan en pwoudkihdahte “irail ko me pwoson Kauno.” (1 Korint 7:39, NW) Ahpw, ekei pak, emen rehra kin wekidala ah pelien lamalam. Met anahne en kamweipeseng pwopwoudo? Uhdahn soh.
Nan Botswana peidek wiawihong emen lih me ahpwtehn wiahla emen Sounkadehdehn Siohwa ong duwen iaduwen ah kaudok kapwo wekidala ah mour. Sistero peki rehn ah pwoudo en sapengala peidek wet, oh iet me ohlo koasoia: “Sangete ahnsouwo me ahi pwoudo wiahla emen Sounkadehdehn Siohwa, I tehkada reh wekdekla mwahu tohto. Ahnsouwet e ahneki soahngen irair en kehl me karakarahk oh koahiek me e sohte ahneki mahso. E ahneki kehl oh kamehlel en uhdisang simwoak, tiahk sapwung ehu me I sohte kak powehdi. Ahi pwoudo kin uhd kasalehda ah limpoak ong nei seri kan oh ong ie, oh iangahki ong mehteikan. E kin materek, keieu ong seri kan. I kin kilang e kin doadoahngki ahnsou laud nan kalohk, nannanti en sewese mehteikan en kamwahuwiala arail mour. I pil kin kilang wekidekla mwahu kan rehi. I kamehlele me met kin kohsang ah mehn kalimeng mwahu.” Ia uwen mwahu en mouren kosonned kan en Pwuhk Sarawi kin kamwekidada pwopwoud wet! Me tohto me kaidehn Sounkadehdehn Siohwa kin pil koasoiahki arail pwoud kan me wiahla Sounkadehdehn Siohwa soahngen koasoi pwukatte.
Ni Ahnsou Me Pahpa Pohnsowehla Ah Pwukoa Kan
Ehupenen nanpwungen pahpa men oh nah seri kan kin wia mehn kapir en kauwada peneinei kan me kehlail. Wahnpoaron Pohl kaweidki: “Kumwail sahm akan, kumwail dehr kamwakar mwahl noumwail seri kan. A kumwail kaiahneirailda nan padahk en Siohwa.” (Episos 6:4, NW) Ihme, e sohte kapwuriamwei me, artikel ehu nan The Wilson Quarterly kin kapwukoahki pahpa kan me sohte kapwaiada ahr pwukoa ong nair seri kan kahpwal akan en mouren koasoandi en aramas. Artikelo koasoia: “Nanpwungen 1960 oh 1990, persent en seri kan me kin koukousoan dohsang rehn arail pahpa kan kin kekeirada tohtohla pak riau . . . En pahpa kan sohla kin wia arail pwukoah ong neirail seri kan kin kahrehda kahpwal suwed tohto me kin kaukauwe koasoandi en mehn Amerika.”
Met kin wehwehki me seri kan me ahr pahpa kan sohte kin kaweidih irail pahn kin imwila suwed? Soh. Sounmelkahka en mahso koasoia: “Semei oh inei pil kak keseiehla, ahpw Kauno [Siohwa] pahn ketin apwahpwalih ie.” (Melkahka 27:10) Emen pwutak me mahki sounpahr duwau nan Thailand diarada me met mehlel. Ahnsou me e wiahte kisin seri pwelel, ah nohno mehla, oh ah pahpa, me sohte perenki pwutak menet, pwilikihdi seri menet rehn ah nohno, me wehwehki en serio nohno kahlap. Pwehki pwutako pehm me sohte me perenki ih oh poakohng ih, e inenen ketiwohla oh ndandkihla kauwe mouren mehteikan. E pil kin kamasakih ah nohno kahlap. Sounkalohk kaukaule riemen en Sounkadehde kan en Siohwa, tehkada pwutako ah kin kalapw kesikesihnen likin Kingdom Hall en wasao. Eri, ehu rahn, re luhke pwutako ong nan imwara.
Re padahkihong ih duwen Koht—me Koht, duwehte sahm emen, kin poakohng nah seri kan. Re pil koasoiaiong ih duwen Paradais nan sampah me Koht ketin inoukihong aramas lelepek kan. (Kaudiahl 21:3, 4) Pwutako inenen perenkihda mehpwukat koaros, oh e kin pwurala rehra rahn koaros pwehn kalaudehla dahme e sukuhliki. Sounkadehde ko padahkihong ih me e anahne uhdisang kauwe mouren mehteikan ma e uhdahn men Koht en wiahla Seme. Met kin pahrekiong mahsen en Pohl ong mehn Rom kan: “Kumwail wia uwen amwail kak pwe kumwail en ahneki popohl rehn aramas koaros.” (Rom 12:18) E pil anahne en kadekohng ah nohno kahlap. (1 Timoty 5:1, 2) Mwurinte met, pwutako kin kapwaiada mouren kosonned kan en Pwuhk Sarawi—oh, ni mehlel, ah kapwaiada mouren kosonned pwukat kamwahuwiala ah mouren peneinei rehn ah nohno kahlap. (Kalesia 5:22, 23) Mehn mpe kan inenen pwuriamweikihla kilang en pwutako wekila me kahrehda re pil men pein neirail seri kan en onop Paipel rehn Sounkadehde kan en Siohwa!
Ngehnin Popohl
Wahnpoaron Pohl ntingiwohng mehn Kolose kan: “Eri, kumwail kapatahiong soahng pwukat limpoak, pwe ih me kin kapatapene oh oarepene mehkoaros pwe en wiahla ehu ni mehlel. Popohl en Krais en kin kakaun nan mohngiongimwail kan.” (Kolose 3:14, 15) Ngehnin popohl oh limpoak mehlel sang nan mohngiong pahn uhdahn katengehpene peneinei ehu. Oh irair pwukat pil kak kamwahuwiala liaktohrohr en peneinei. Rukia, me kin koukousoan nan Albania, solahr kin koasoiong rie pwutako erein sounpar 17 pwehki ara sapwungki emenemen. Ni ahnsou me lih menet onop Paipel rehn Sounkadehde kan en Siohwa, e sukuhlkihdi me ladu koaros en Koht kin ale kangoang en kekeirada popohl rehn mehteikan. “Rapahki popohl ni eh kehl unsek.”—1 Piter 3:11.
Rukia wehwehkihda me e anahne rapahki popohl rehn rie pwutako. E kapakap pwohngo pwon, oh mandahn rahno, ki mohngiong saloh, e aluhla ni imwen rie pwutako. Nein rie pwutako serepein me ritingada wenihmwo oh pwuriamweila kalelepek: “Dahme ke pahn wia wasaht?” Ni meleilei Rukia peki en tuhwong rie pwutako, oh kawehwehda me e men wiahda popohl rehn rieo. Dahme karehda? Pwehki ahnsouwet e wehwehkihda me met iei kupwuren Koht. Rieo pwungki met, oh ara mahkpene kin sansalkihda ara kin pwoale emenemen oh sengisengki ara peren—peneinei ehu me pwurehng miniminpene pwehki re kin kapwaiada mouren kosonned kan en Pwuhk Sarawi.
Werek Suwed kan
“Rahnwet, nan rahn ehute, seri men kin kilangkihla delepisin awa isuh. Lau lel ni imwin ah sukuhl en elementari, e kilangehr mpen kamaramas walikid samwa oh wiewiahn pepei lopw samwa.” Ih met me pwuhko The 7 Habits of Highly Effective Families koasoia. Iaduwen met kin kamwekidada serio? “Me semen” kan sohte kin pwungkihpene met nanpwungarail, ahpw Pwuhk Sarawi kin kihong kitail peneu kehlail ong werek suwed. Karasepe ehu, e mahsanih: “A ma ke pahn kompoakepahnki me pweipwei kan, ke pahn ohkihla.” (Lepin Padahk 13:20) E pil mahsanih: “Werekiong aramas suwed kan e kin kauwehla tiahk mwahu.” (1 Korint 15:33) Mouren peneinei kak mwahula ma kitail ni loalokong kin kilangwohng mouren kosonned wet me e kin doakedoake werekih aramas suwed de kilang prokram en delepisin suwed kan.
Emen nohno nan Luxembourg kin onop Paipel rehn emen Sounkadehde kan en Siohwa. Rahn ehu e ndahiong Sounkadehdeo me ni soutik kan nah kisin serepein riemeno me mahki sounpar isuh oh waluh kin men akamaipene oh mwomw lemei. Sounkadehdeo kalelepek dahme serepein ko kin wia ni soutik kan. Nohno nda me ira kin kilang delepisin ahnsou me e kin kamwakelehda wasahn mwengeo. Eri soahngen prokram dahme re kin kilang? Nohno sapengki: “Kasdohn mangnga [cartoon].” Ni ahnsou me Sounkadehdeo koasoia me soahngen prokram pwukat kin kalapw kasalehda pepei, en serepein ko nohno inoukihda me e pahn kasawihada prokram pwukat.
Rahnohte mwurin met, nohno ripohtki me e pwuriamweikihla kasdohn mangnga ko me nah serepein ko kin kilikilang. Kasdo pwukat kin kasalehda duwen soahngen menmour kamasepwehk kan sang nan wehwe me kin ni lemei kemehla soahng koaros me re tuhwong. Nohno kawehwehiong nah serepein ko me Siohwa kin kailongki wiewia suwed oh sohte kin peren ni ahnsou me kitail kin kilang soahngen wiewia lemei pwukat. (Melkahka 11:5) Serepein ko, pwehki ara men kaperenda Siohwa, pwungkihda me re sohla pahn kilang delepisin ahpw re pahn uhd mahlen. Mwadangete mwurin met, ara wiewia lemei wekila, oh arail irair en peneinei mwahula.
Mehpwukat kin wiahte ekei karasaras kan me kin kasalehda me kapwaiada mouren kosonned kan en Pwuhk Sarawi kin kamwahuwiala mouren peneinei. Kaweid en Pwuhk Sarawi kin doakedoake soahngen irair koaros. E kin mehlel oh kin kamwekid emen ong me mwahu. (Ipru 4:12) Ni ahnsou me aramas kin onopki Paipel oh ni mehlel nantiong en kapwaiada dahme e mahsanih, arail peneinei kin kehlailla, arail irair kan kin mwahula, oh re kin liksang wiahda sapwung kan. Mendahki ma emente tohnpeneinei kin idawehn kaweid en Koht, soahng kan kin mwahula. Ni mehlel, nan irair kan koaros nan mour, atail kilangwohng Mahsen en Koht en duwehte en sounmelkahkao me kasalehda: “Sapwellimomwi mahsen, iei serepei, mehn kaweid ie, oh kamarainpen elei kan.”—Melkahka 119:105.
[Kilel nan pali 5]
Kapwaiada mouren kosonned kan en Pwuhk Sarawi kin kamwahuwiala kahpwal akan en peneinei