IRELAUD EHU

Mie Sawas ong Nsenamwahu en Peneinei?

1. Dahme kahrehda peneinei me kin ahneki nanpwungmwahu kehlail kesempwal?

PENEINEI iei koasoandi ehu me keieu werei nan sampah oh e uhdahn kesempwal ong mouren aramas. Erein poadopoad en aramas, peneinei me arail nanpwungmwahu kin kehlail kin sewese wiahda wehi kehlail kan. Peneinei iei koasoandi me keieu mwahu en kakairada seri kan pwe ren wiahla aramas koahiek.

2-5. (a) Kawehwehda pepehm en seri men me mi nan peneinei nsenamwahu. (b) Soangen kahpwal dah kan me ekei peneinei ahneki?

² Peneinei nsenamwahu iei wasa ehu me tohnpeneinei pahn nsenamwahu oh sohte perki mehkot. Nna, song medewehla soangen peneinei me aramas kin men ahneki. Erein arail mwengehn soutik, nohno kin mwohndi rehn neira seri kan oh irail koasoiapene dahme wiawi rahno. Seri kan kin pereperen koasoakoasoiaiong arail pahpa oh nohno dahme wiawi nan sukuhl. Soangen ahnsou duwehte met kin kakehlaka koaros ong dahme re pahn lelohng mandahn rahno ni arail sohte mi rehn peneinei.

³ Nan peneinei nsenamwahu ehu, seri men kin ese me eh pahpa oh nohno pahn kin apwalih ni eh pahn soumwahuda, mwein ira kin weliweliali pwehn apwalih ih pwohngo. E kin ese me e kak kohla rehn eh pahpa de nohno pwe en ale kaweid oh sawas ong eh kahpwal kan. Ei, serio sohte pahn kin perki mehkot mendahki diren kahpwal likin eh peneinei.

⁴ Ni seri kan ar laudla, re kin pwopwoudida oh ahneki peneinei. Lepin padahk en Sapan ehu koasoia: “Emen kin esehda uwen lauden eh pweipwand ong eh pahpa oh nohno, ni ahnsou me mie pein nah seri.” Pwehki ar kalahngan oh limpoak laud, seri kan me laudla kin song en wiahiong pein arail peneinei en nsenamwahu oh re pil kin apwalih arail pahpa oh nohno me mahlahr me kin perenki mi rehn nein neirail kan.

⁵ Mwein met ke medemedewe: ‘I kin poakohng ei peneinei, ahpw ei peneinei sohte wia soangen peneinei wet. Ngehi oh ei pwoud kin ahneki koasoandi en doadoahk me wekpeseng oh se sohte kin kalapw kilang emenemen. Ma se kin koasoipene, met kalapw pid kahpwal en mwohni.’ De ke kin nda, ‘Nei seri kan oh neirail kan mi ehu wasa tohrohr oh I sohte kin kilang irail.’ Pwehki kahrepe kan me emen sohte kak wekidala, mouren peneinei tohto sohte kin duwehte soangen peneinei me aramas kin men ahneki. Ahpw mie ekei me ahneki peneinei me nsenamwahu. Ia duwen met eh kak wiawi? Mie sawas ong peneinei en nsenamwahu? Ei mie. Ahpw mwohn atail pahn koasoia duwen met, kitail anahne sapengala peidek kesempwal ehu.

DAHKOT PENEINEI?

6. Soangen peneinei dah me kitail pahn koasoiapene nan pwuhk wet?

⁶ Pali tohto en peneinei kan kin wiawihkihda pahpa men, nohno men oh seri kan. Pahpa nohno kahlap kan ele kin mi nan pein imwarail lao re sohla kak kelehpw. Mendahki peneinei ehu kin pil tehk kisehrail kan, re sohte anahne pwukoahki soahng koaros me pid arail mour. Ih soangen peneinei wet me kitail pahn koasoiapene nan pwuhk wet. Ahpw rahnpwukat, tohtohla soangen peneinei kan me duwehte peneinei me pahpa de nohno kelehpw mie, peneinei me emen rehra de ira koaros pwurehng pwopwoudida oh mie pein neira seri oh pil peneinei me pahpa nohno sohte kin mihmihpene pwehki kahrepe kan.

7. Ia mwomwen mouren ekei peneinei?

⁷ Peneinei tohto kin kousoanpene rehn kisehrail kan. Nan soangen peneinei wet, seri kan kin apwalih arail pahpa oh nohno me mahla. Soangen kerenpene wet oh pwukoa kan en peneinei kin kohwong kisehrail kan. Karasepe, tohnpeneinei ele kin iang sewese, apwalih nein riarail kan de kisehrail teikan oh pil pwain arail sukuhl. Kaweid kan me kitail pahn koasoiapene nan pwuhk wet pil kin doadoahk ong soangen peneinei pwukat.

PENEINEI MIHLA PAHN KAHPWAL

8, 9. Soangen kahpwal dah kan nan ekei sahpw me kasalehda me peneinei kin wekiwekila?

⁸ Ahnsou pwukat peneinei kin wekiwekila, ahpw kaidehn ni irair mwahu. Karasepe nan India, lih pwopwoud men kin mi rehn peneinei en eh pwoud oh kin doadoahk pahn arail kaweid. Rahnpwukat, lih pwopwoud kan nan India kin kalapw repen doadoahk en mwohni. Ahpw tohnpeneinei kin kasik irail en kapwaiada arail pwukoahn nan ihmw. Eri ehu peidek me pwarada nan sahpw tohto iei, Ma ke karasapene uwen laud en doadoahk en tohnpeneineio oh lih me kin doadoahk en mwohni, ia pahn uwen laud en doadoahk me liho anahne wia nan imwarailo?

⁹ Nan ekei sahpw nan Eisia, e wia tiahk ehu me peneinei oh kisehrail kan ren kin kousoanpene. Ahpw tiahk wet luwetala pwehki madamadau me kohsang Amerika de Iurop me emen en nsenohkihte pein ih oh pil kahpwal en mwohni. Kahrehda me tohto kin kilangwohng arail apwalih tohnpeneinei me mah kan nin duwen mehkot me katoutou ong irail a kaidehn pwukoa de pwais kaselel ehu. Ekei kin wiakauwe arail pahpa oh nohno me mahlahr kan. Aramas ar wiakauwe oh sohte apwalih mwahu me mah kan kin wiawi nan sahpw tohto rahnpwukat.

10, 11. Dahme kasalehda me peneinei kin wekiwekla nan sahpw tohto?

¹⁰ Mweipeseng en pwopwoud kin tohtohla. Sounpar kei samwalahro nan Spein, pwopwoud ehu sang pwopwoud 100 kin mweipeseng. Ahpw rahnwet, pwopwoud 12 sang pwopwoud 100 kin mweipeseng. Nan Iurop, Britain iei sahpw me mweipeseng kin keieu tohto (pwopwoud 4 sang pwopwoud 10 kin mweipeseng). Nan sahpwo, peneinei me pahpa de nohno kelehpw kin mwadangete tohtohla.

¹¹ E mwomwen me me tohto solahr nsenohki kousoanpene nin duwen kisin peneinei. Ekei sohte pwopwoud ahpw naineki seri. Irail me pilada ren kousoanpene ahpw sohte kapwaiada pwukoa en pwopwoud kin tohtohla. Soahng pwukat kin wiawi nan sampah pwon.

12. Ia duwen seri kan ar kin lokolongki wekideklahn peneinei rahnpwukat?

¹² Dahme kin wiawihong seri kan? Nan Amerika oh wehi teikan, tohtohla seri kan me ipwisang rehn nohno me sohte pwopwoud oh ekei seri ipwisang rehn irail me pwulopwulte. Serepein pwulopwul tohto kin naineki seri kan me arail pahpa kaidehn mehtehmen. Ripoht sang sampah pwon kin koasoia me seri rar kei me sohte arail wasahn kousoan kin kohkohseli nanial kan. Seri tohto kin tangasang imwarail pwehki tohnpeneinei kin wiakauwe oh ekei pwehki tohnpeneinei kaus irail pwe re solahr kak apwalih.

13. Soangen kahpwal dah kan me kin kauwehla nsenamwahu nan peneinei?

¹³ Ei, kahpwal lelohngehr peneinei. Patehng kahpwal kan me kitail ahpwtehn koasoiapene, seri sapeik, wiakaulahn seri, keme ahn emen pwoud, sohla kak uhdihsang sakau en wai oh kahpwal laud teikan kin kauwehla nsenamwahu nan peneinei tohto. Ong seri oh aramas laud tohto, peneinei sohte kin wia wasa ehu me mie nsenamwahu.

14. (a) Dahme ekei aramas kin ndahki kahrepen kahpwal kan me lelohngehr peneinei? (b) Ia duwen wahnpoaron Pohl eh kawehwehda irair en rahnpwukat oh dahme pweidahn kokohp wet wiahiong mouren peneinei?

¹⁴ Dahme kahrehda kahpwal lelohngehr peneinei? Ekei kin kapwopwohnki lih akan ar kin iang doadoahk en mwohni. Ekei kin nda me susuwedlahn tiahk en aramas me kahrehda. Oh pil mie kahrepe teikan. Kereniong sounpar riekid samwalahro, wahnpoaron Pohl kohpada me kahpwal tohto pahn lelohng peneinei ni eh ntingihedi: “Uhdahn pahn mie ahnsou apwal ekei ni imwin rahn akan. Aramas pahn roporop ong pein irail, mehwo, aksuwei oh pohnmwahso; re pahn kamwakara, re sohte pahn peikiong ar pahpa oh nohno kan, oh re sohte pahn kin kasapahlkalahnganki mehkot. Re sohte pahn poadidi ong pelien lamalam; irail pahn sempoak, soh mahk, karaun likamw oh pehmara, lemei, oh re pahn kailongki me mwahu; re pahn pangala iangarail kan, re pahn loaumwohmw oh kalahwasa, oh re pahn inengieng pein arail peren laudsang kupwur en Koht.” (2 Timoty 3:1-4) Mie me kin peikasalki me mahsen pwukat pweidahr rahnwet? Pwehki sampah wet eh milahr nan soangen irair pwukat, e kin kapwuriamwei peneinei tohto ar milahr nan kahpwal?

SAWAS ONG NSENAMWAHU EN PENEINEI

15-17. Dahme pwuhk wet kin kasalehda me pahn wia sawas ong peneinei en nsenamwahu?

¹⁵ Aramas tohto kin rapahki kaweid sang pwuhk en sawas kan, tohnpeneinei me mah kan de sounwunahni ni ahnsou me irail pahn lelohng kahpwal kan. Ahpw kaweid me aramas akan kihda kin uhpene oh kaweid me aramas kin doadoahngki rahnwet ele solahr pahn kak doadoahk ong lakapw.

¹⁶ Eri ia wasa kitail kak rapahki kaweid mwahu ong peneinei? Ia duwe, ke pahn rapahki sawas sang pwuhk ehu me wiawihda sounpar 1,900 samwa samwalahro? De ke pahn medewe me soangen pwuhk wet sohte pahn doadoahk ong rahnpwukat? Ahpw ni mehlelo, sawas mehlel ong peneinei en nsenamwahu kin dierek nan pwuhk wet.

¹⁷ Pwuhk wet iei Paipel. Mehn kadehde tohto kasalehda me e pwilsang rehn Koht. Kitail kin diar mahsen pwukat nan Paipel: “Audepen Pwuhk Sarawi unsek pwilisang rehn Koht, oh e mwahu ong atail doadoahk en padahkihong aramas akan me mehlelo, ong atail peneu ong tiahk sapwung, ong atail kapwungala wiewia sapwung kan, oh pil ong atail padahk duwen mour lelepek.” (2 Timoty 3:16) Sang pwuhk wet, se kin kangoange iuk ken medewe ia duwen Paipel eh kak sewese iuk ken “kapwungala wiewia sapwung kan” ni omw pahn ahneki kapwunod oh kahpwal kan me kin lelohng peneinei rahnpwukat.

18. Dahme kahrehda e konehng en pwungki me Paipel kak kihda kaweid mwahu ong pwopwoud?

¹⁸ Ma ke pahn medewe me Paipel sohte kak sewese peneinei en nsenamwahu, medewehla met: Meno me ketin kamwakid aramas ren ntingihedi Paipel iei ih me ketin wiahda koasoandi en pwopwoud. (Senesis 2:18-25) Paipel mahsanih me mware iei Siohwa. (Melkahka 83:18, NW)a Ih me Sounkapikada oh “Samatail, me iei tapwin peneinei koaros.” (Episos 3:14, 15) Siohwa kin ketin tetehk mouren peneinei sangete nin tapio. E kin ketin mwahngih kahpwal akan me kak pwarada oh kin ketikihda kaweid me pahn kamwahwihala. Sangete mahs leledo met, irail kan me kin nantihong kapwaiada kaweid en Paipel nan arail mour kin uhdahn nsenamwahu.

19-21. Karasepe dahkei me kasalehda me Paipel ahneki kehl en kamwahwihala kahpwal kan en pwopwoud?

¹⁹ Karasepe, lih pwopwoud men nan Indonesia kin mouren pilein mwohni. Erein sounpar tohto, e kin soukautih en apwalih nah seri silimeno oh kalapw akamaiong eh pwoudo. Mwuhr e tepida onop Paipel. Ekisekis, liho kamehlelehla dahme Paipel mahsanih. Ni eh kin kapwaiada dahme Paipel kaweidki, e wiahla lih pwopwoud mwahu men. Eh kin nantihong kapwaiada kaweid en Paipel kin kahrehiong eh peneinei pwon en nsenamwahu.

²⁰ Emen lih pwopwoud nan Spein koasoia: “Mwurin sounpar ehute me se pwopwoudki, se tepida ahneki kahpwal laud kan.” Ih oh eh pwoud sohte kin pwungkipene soahng tohto oh ira sohte kalapw koasoipene, ihte ni ahnsou me ira kin akamai. Mendahki mie neira kisin serepein men, ira lemehda me ira en tohrohrpeseng. Ahpw mwohn ara wia met, mie me kangoange ira en tehk Paipel. Ira onopki kaweid en Paipel ong ohl oh lih pwopwoud kan oh tepida kapwaiada. Sohte pwand, ira kakehr koasoipene ni popohl oh ara kisin peneinei miniminpene ni peren.

²¹ Paipel pil kin sewese aramas mah kan. Karasepe, medewehla dahme wiawihong ehu pwopwoud en Sapan. Ohlo kin keh-lingeringer oh ekei pak lemei. Neira serepein ko me tepida mahs onop Paipel, mendahki ira kin uhwong. Mwuri, ohlo iangala serepein ko onop, ahpw liho kin uhwongete. Erein sounpar ko, liho kin kilang kaweid en Paipel kan ar kin kamwahwihala eh peneinei. Nah serepein ko kin apwalih ih mwahu oh eh pwoudo mwahula. Soangen wekidekla pwukat kahrehda liho en pil pein tehk Paipel oh Paipel pil kamwahwihala ih. Lih mah menet kin pwurepwurehng nda: “At pwopwoud uhdahn mehlella.”

22, 23. Ia duwen Paipel eh kin sewese aramas sang sahpw koaros ren ahneki nsenamwahu nan arail peneinei?

²² Kaidehn irail pwukatte ahpw pil mie me tohto me sukuhlkier duwen sawas ong peneinei en nsenamwahu. Irail kin ale kaweid en Paipel oh kapwaiada. Mehlel me irail pil mi nan sampah me lemei, tiahk suwed oh ahneki kahpwal en mwohni. Irail pil soh unsek, ahpw re diarada nsenamwahu ni arail kin song en wia kupwuren Meno me ketikihda koasoandi en peneinei. Nin duwen Paipel eh mahsanih, Siohwa Koht iei “me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie.”—Aiseia 48:17.

²³ Mendahki Paipel wiawihda kereniong sounpar 2,000 samwalahro, eh kaweid kan kak doadoahk ong rahnpwukat. E pil wiawihda ong aramas koaros. Siohwa “ketin wiahda kadaudok koaros sang rehn ohltehmen,” oh e ketin mwahngih dahme aramas wiawihkihda. (Wiewia 17:26) Kaweid en Paipel kin doadoahk ong aramas koaros. Ma ke pahn kapwaiada, ke pil pahn esehla sawas ong nsenamwahu en peneinei.

[Nting tikitik me kileldi pah]

KE KAK SAPENG PEIDEK PWUKAT?

Dahme kin wiawihong peneinei rahnwet?—2 Timoty 3:1-4.

Ihs me tapihada koasoandi en peneinei?—Episos 3:14, 15.

Ia sawas ong nsenamwahu en peneinei?—Aiseia 48:17.

[Kilel laud nan pali 4]