Rapahki Meleilei En Koht Nan Mouren Peneinei

“Tohnsampah koaros, kumwail kapinga Kauno (Siohwa); kumwail kapinga sapwelime lingan oh manaman.”​—MELKAHKA 96:7.

1. Siohwa wiahda mouren peneinei en tepida ni ahl dahieu?

SIOHWA tepiada mouren peneinei en meleilei oh peren ni ahnsou me e kapatapene tepin ohlo oh liho nan pwopwoud. Ni mehlel, Adam inenen peren me karehong en kasalehda ah peren ni tepin lokaia kaselel pwukat: “Iet met emen me rasehng iehte-tih me sang tih kat, oh uduk sang ni udukei. E pahn adaneki ‘Lih’ pwehki eh kohsang rehn ohl.”​—Senesis 2:23.

2. Dahme Koht kupwurki ong pwopwoud likin wahdohng sapwelime seri aramas kan nsenamwahu?

² Ni ahnsou me Koht tepiada koasoandi en pwopwoud oh koasoandi en peneinei, e kupwurki mehkot laudsang ihte en wahdohng sapwelime seri en sampah kan nsenamwahu. E kupwurki ren wia kupwure. Koht padahkiong keioun pwopwoudo: “Kumwa kaparaparla pwe kadaudokamwa kan pahn kousoanla wasa koaros nin sampah oh kaunda mehkoaros. I kihong kumwa manaman en kaunda mwahmw akan, menpihr kan oh mahn lawalo kan koaros.” (Senesis 1:28) Ni mehlel met wia pwukoa kating ehu. Ia uwen Adam, Ihp oh neira seri kan me re pahn naineki mwuhr pahn nsenamwahu ma keioun pwopwoudo pahn peik wia kupwuren Koht!

3. Dahme peneinei kan anahne wia pwehn mourki arail lelepek ong Koht?

³ Pil nan rahnpwukat, peneinei kan kin peren ni arail kin doadoahkpene pwehn wia kupwuren Koht. Oh ia uwen kapai kaselel me soahngen peneinei peik pwukat kin ahneki! Wahnpoaron Pohl ntingihdi: “Kaian en pali ngehn me inenen katapan mehlel ni soahng koaros, pwe e pahn karehiong kitail mour ahnsouwet, oh pil ahnsou kohkohdo.” (1 Timoty 4:8) Peneinei kan me kin momourki mour lelepek mehlel ong Koht kin idawenla kosonned kan en Mahsan en Siohwa oh wia kupwure. Re kin rapahki meleilei en Koht oh eri diar paiamwahu nan “mour en ahnsouwet.”

Mouren Peneinei Mihla Nan Keper

4, 5. Dahme karehda kitail kak ndahki me mouren peneinei kin ahnsouwet mihla nan keper wasa koaros nan sampah?

⁴ Uhdahno, kitail sohte kin diar popohl oh nsenamwahu nan peneinei koaros. Nuhso me adaneki The New York Times kosoiahki roporop ehu me ehu pwihn me adaneki Population Council wiahda: “Nan sahpw kepwehpwe kan oh semwehmweh kan, koasoandi en mouren peneinei kin inenen wekila.” Emen souninting en roporop wet kosoia: “Lamalamo me dene mouren peneinei tengeteng oh kin miniminpene me pahpao kin wia emen sounwiahda mwohni oh nohno kin wia emen sounkihda epwel en pali en pepehm kin wiahlahr soai likamw ehu. Ni mehlelo irair kan me duwehte lih kan me neitik ahpw sohte pwopwoud, kekeiradahn mweipeseng, [oh] peneinei kan me sohte pahpa de nohno. . . kin wie pwarapwarada wasa koaros nan sampah.” Pwehki soahngen irair pwukat, peneinei rar kan solahr kin tengeteng, solahr meleilei, oh solahr kin nsenamwahu, oh me tohto kin pil mweipeseng. Nan Spain totohlahn mweipeseng kan keirkihda pwopwoud 1 sang nanpwungen pwopwoud 8 me tepida sang nan 1980​—kekeirada laud ehu sang pwopwoud 1 sang napwungen pwopwoud 100 sounpar 25 samwalahro. Ehu sahpw nan Iurop me pwopwoud keiou mweipeseng tohto iei England​—pwopwoud 4 sang nanpwungen me 10 kin ohla. Nan sahpwo nempehn peneinei kan me pahpao sohte pwopwoud de nohno sohte pwopwoud kin wie kekeirada.

⁵ E mwomwen me ekei aramas sohte kak awih en mweisang arail pwoud kan. Me tohto kin pokonlahng wasa ehu me adaneki “Tie Severing Shrine” (Ihmw Sarawi en Kamwei) me karanih Tokyo, Sapan. Ihmw Sarawi en Shinto wet kin alehda pekipek kan en mweipeseng oh en kauwehla nanpwungen riemen me sohte mwahu. Emen emen tohnkaudek kan kin ntingihdi ah pekipeko pohn kisin lepin tuhke menipinip, oh tenekihda nan ihmw sarawio oh eri kapakapki pasepengpe. Ehu nuhspehpa en Tokyo kosoia me ni ahnsou me imhw sarawio tepin wiawihda mpen sounpar epwiki samwalahro, “lih kan me pwoudki ohlen pisnes kepwehpwe kan kin ntingihdi kapakap kan me kin pekih arail pwoud kan en kesehla arail kerir kan oh pwuredo rehrail.” Ahpw, rahnwet, pali laud en pekipek pwukat kin pekih mweipeseng, kaidehn ren pwurpene. Ni soh peikidpe, mouren peneinei kan milahr nan keper nan sampah pwon. Met kin wia mehkot kapwuriamwei ong Kristian kan? Soh, pwehki Paipel kin kaloalokongkin kitail dahme karehda peneinei kan mihkihla nan kahpwal rahnpwukat.

Dahme Karehda Peneinei Mihla nan Apwal

6. Iaduwen 1 Sohn 5:19 kin pidada kahpwal en peneinei rahnwet?

⁶ Ehu karepe peneinei kan mihla nan apwal rahnwet pwehki ire wet: “Sampah unsek mih pahn manaman en Me Suwedo.” (1 Sohn 5:19) Dahme kitail kak kasik sang rehn Me Suwedo, Sehdan me Tepil? E wia sounlikamw suwed men. (Sohn 8:44) Ihme e sohte kapwuriamwei me ah sampah kin dirkihla likamw oh tiahk samin, me kin inenen kauwehla mouren peneinei! Likin pwihn en Koht, manaman en Sehdan kin kauwehla sapwelimen Siohwa koasoandi en pwopwoud oh katokehdi mour meleilei en peneinei.

7. Iaduwen peneinei kan kak mihla pahn irair me aramas tohto nan imwin rahn pwukat kin kasalehda?

⁷ Ehu karepe apwal en peneinei kin ahnsouwet mihla rehn tohnsampah kin pwarada nan 2 Timoty 3:1-5. Mahsan en kokohp en Pohl me kileledi wasaht kin kasalehda me kitail momour ni “imwin rahn akan.” Peneinei kan sohte kak meleilei on nsenamwahu ma tohn arail peneinei kin “roporop ong pein irail, mehwo, aksuwei, oh pohnmwahso, kamwakar, sohte peikiong ar pahpa oh nohno kan, sohte kin kasapahlkalahnganki mehkot. Re sohte poadidi ong pelien lamalam; irail pahn sempoak; soh mahk, karaun likamw oh pehmara, lemei, oh re pahn pangala iengerail kan, re pahn loaumwohmw oh kalawasa, oh re pahn inengieng pein arail peren laudsang kupwuren Koht. Re pahn liksansalmwahuki mwomwen atail pelien lamalam, ahpw re pahn kahmahmki katepe.” Peneinei ehu sohte kak uhdahn nsenamwahu ma emen tohn peneineio sempoak de soh mahk. Mouren peneinei pahn kak meleilei ma emen nan peneineio me lemei oh limwakarakar? Me pil suwed sang met, iaduwen meleilei oh nsenamwahu kak mie ma tohn peneinei kan kin inengieng pein arail peren laud sang arail poakohng Koht? Mepwukat iei irair en aramas en sampah wet me Sehdan kin kaunda. Ihme e sohte kapwuriamwei me nsenamwahu en peneinei me apwal en mie nan rahnpwukat!

8, 9. Iaduwen wiewiahn seri kan kak kauwe nsenamwahu en peneinei?

⁸ Pil ehu karepe peneinei tohto sohte kak meleilei oh nsenamwahu pwehki wiewia suwed en seri kan. Ni ahnsou me Pohl kohpada duwen irair kan ni imwin rahn akan, e kohpada me seri tohto pahn sapeik ong ahr pahpa oh nohno kan. Ma kowe emen me pwulopwul, amw wiewia kin sewese wiahda pwe amw peneinei en meleilei oh nsenamwahu?

⁹ Ekei wiewiahn seri kan sohte kin wia mehn kalimeng mwahu. Karaspe ehu, emen pwutak pwulopwul ntingihlahng ah pahpa kisinlikou lemei wet: “Ma ke sohte waiehlang Alesandria I sohte pahn ntingwohng uhk nomw kisinlikou, de I sohte pahn lokaiahng uhk, de rahnmwahuwih uhk, oh ma ke kohla Alesandria I sohla pahn pwurehng koledi pehmwen de pil kasamwo uhk. Ih met me pahn wiawi ma ke sohte kahre ie. . .Ahpw I pekih uhk, kadaredohng ie ehu [ahrp] en. Ma ke sohte wia met, I sohte pahn mwenge oh I sohte pahn nim. Ke les!” Met soh kin wiawi rahnpwukat? Eri, kisinlikou kiset me kisin pwutak menet wiahiong ah pahpao ntingdi nan Isip en mahsie mpen sounpar 2,000 samwalahro.

10. Iaduwen me pwulopwul kan kak sewese arail peneinei en rapahki meleilei en Koht?

¹⁰ Lamalam en me pwulopwul en Isipo sohte kin wiahda meleilei en peneinei. Ni mehlel, mie apwal laud kan me kin wiawi nan peneinei nan imwin rahnpwukat. Ahpw mendahki met, kumwail me pwulopwul kan kak sewese amwail peneinei en rapahki meleilei en Koht. Iaduwen? Ni amwail pahn kapwaiada kaweid en Paipel wet: “Kumwail seri kan, kumwail pahn kin peikiong amwail pahpa oh nohno kan pwe iei me Koht kin ketin kupwurperenki.”​—Kolose 3:20.

11. Iaduwen pahpa oh nohno kan kak sewese neirail seri kan en wiahla ladu lelepek kan en Siohwa?

¹¹ Iaduwen kumwail pahpa oh nohno kan? Ni limpoak sewese nomw seri kan en wiahla ladu lelepek en Siohwa. Lepin Padahk 22:6 mahsanih: “Padahkiong kisin seri men duwen eh pahn momour eri, e pahn tamataman erein eh mour.” Ki padahk kaselel kan en Pwuhk Sarawi oh kalimeng mwahu en pahpa oh nohno, pwutak tohto oh serepein tohto sohte kin soupeisang ahl pwungo ni ahnsou me re laudla. Ahpw pali laud kin poahsonda pohn irair oh uwen laud en kaian en Paipel oh mohngiong en me pwulopwulo.

12. Dahme karehda imwen Kristian ehu anahne en meleilei?

¹² Ma tohn atail peneinei kan koaros kin nantiong wia kupwuren Koht, kitail pahn paikihda meleilei en Koht. Imwen Kristain ehu anahne en dirkihla ‘koampoakepa kan me popohl.’ Nan Luk 10:1-6 kasalehda me Sises kin medemedewe soahngen aramas pwukat ni ahnsou me e kadarpeseng sapwelime tohnpadahk 70 kan nin duwen sounkalohk oh padahkiong irail: Ni amwail pahn kin lel ni kahnimw ehu, kumwail pahn kin nda, ‘Popohl ong tehnpas wet.’ A ma aramas en popohl emen mie nan tehnpaso, amwail popohl pahn mihla reh.” Ni en sapwelimen Siohwa ladu kan ni popohl kohla sang ihmw lel ihmw ki “rongamwahu en popohl,” re kin rapahki koampoakepah kan en popohl. (Wiewia 10:34-36; Episos 2:13-18) Ni mehlel, peneinei en Kristian ehu me wiawihkihda koampoakepah kan en popohl anahne en pil kasalehda popohl.

13, 14. (a) Dahme Naomi pwungki en wiawihong Rud oh Orpa? (b) Imwen Kristian ehu anahne wia wasahn kommoal en dah?

¹³ Ihmw ehu pahn wia wasahn meleilei oh koammoal. Liohdi maho Naomi koapwoaroapwoarki me Koht pahn ketikihong liohdi kan en nah pwutak riemeno ara pwoud ko Rud oh Orpa, wasahn koammoal oh kamweit me kohsang ar pwoudkihda ohl mwahu kan oh en miehla imwara. Naomi kosoia: “Kauno (Siohwa) en pil ketin kupwure pwe kumwa en pil pwurehng pwopwoudida, pwe en mie amwa peneinei oh wasahn koauson.” (Rud 1:9) Me pid duwen dahme Naomi pwungki en wiawi, emen me loalokong ntingihdi me nan soahngen ihmw wet Rud oh Orpa “pahn diar kamaiou sang pingiping oh pwunod. Re pahn diar kommoal. E pahn wia wasa ehu me re kak mourie, oh wasa me ara pepehm loal kan oh ineng pwung kan kak diar kaitarpe oh kommoal. Moure lokaiahn Ipruo. . .kin sansalda mwahu nan mahsan kan en [Aiseia 32:17, 18].”

¹⁴ Menlau tehk Aiseia 32:17, 18. Wasao kitail wadek: “Pwehki aramas koaros pahn weweidiki me pwung, oh popohl oh meleilei pahn kakaun kohkohlahte. Imwen sapwelimen Koht aramas akan pahn kin diren popohl oh nsenamwahu, oh re sohte pahn kin pwunodki mehkot.” Imwen Kristian ehu pahn wia wasahn kommoal en pwung, meleilei, oh popohl. Ahpw iaduwen ma kasongosong kan, sapwung kan, oh kahpwal akan kin pwarada? Eri kitail keiou anahne ese mehn kapiro ong nsenamwahu en peneinei.

Mouren Kosonned Kesempwal Pahieu

15. Iaduwen komw kak kawehwehda mehn kapir ong nsenamwahu en peneinei?

¹⁵ Peneinei koaros pohn sampah pweipwandkihong Siohwa Koht adarail, Sounkapikadahn peneinei kan. (Episos 3:14, 15) Ihme karehda irail ko me inengieng ahneki nsenamwahu en peneinei anahne rapahki sapwelime kaweid oh kapinga ih, duwehte me sounmelkahkao wia: “Tohnsampah koaros, kumwail kapinga Kauno (Siohwa); kumwail kapinga sapwelime lingan oh manaman.” (Melkahka 96:7) Mehn kapir ong nsenamwahu en peneinei mih nan pali kan en Mahsan en Koht, Paipel, oh kadoadoahkpen mouren kosonned pwukat. Peneinei ehu me kin kapwaiada mouren kosonned pwukat pahn nsenamwahu oh pahn paikihda meleilei sang rehn Koht. Ihme kitail en tehkpene mouren kosonned kesemwpwal pahieu pwukat.

16. Iaduwen irair en kanengamah oh irair en powehdi ineng kan kin kadoadoahk nan mouren peneinei?

¹⁶ Ehu mouren kosonned pwukat kin poahsonda pohn met: Irair en kak powehdi ineng kan me kesempwal pwehn mie meleilei en Koht nan mouren peneinei. Nanmwarki Solomon kosoia: “Ma ke sohte kak kanangamahiong omw lingeringer, eri, ke me luwet duwehte kahnimw ehu me sohte keledi, me mengeiong aramas en mahweniong.” (Lepin padahk 25:28) Kanangamah​—me kesemwpwal ma kitail men ahneki peneinei ehu me pahn meleilei oh nsenamwahu. Mendahki atail sohunsek, kitail anahne kasalehda irair en kak powehdi atail ineng kan, me wia wahn ngehn sarawi en Koht. (Rom 7:21, 22; Kalesia 5:22, 23) Ngehno pahn kapwarehda loaletail irair en kak powehdi atail ineng kan ma kitail kapakapki irair wet, oh kapwaiada kaweid en Paipel duwen met, oh werekiong irail ko me kin kasalehda irair wet. Ahl wet pahn sewese kitail en “tangwei sang nenek.” (1 Korint 6:18) Irair en kak powehdi ineng kan pahn pil sewese en soikala wiewia mwersuwed, oh liksang de powehdi kamamsakau, oh ni meleilei apwaliala irair apwal akan.

17, 18. (a) Iaduwen 1 Korint 11:3 kin kadoadoahk ong mouren peneinei en Kristian? (b) Iaduwen pohnese koasoandi en tapwi kin karehda en mie meleilei en Koht nan peneinei?

¹⁷ Ehu mouren kosonned kesemwpwal kin kak sansalda ni ahl wet: Pohnese tapwi pahn sewese kitail en rapahki meleilei en Koht nan atail peneinei. Pohl ntingihdi: “I men kumwail en dehdehkihla mwahu padahk wet: duwen Krais eh tapwin aramas koaros, duwen ohl pwopwoud eh moangen eh pwoud, oh duwen Koht eh tapwin Krais.” (1 Korint 11:3) Met kin wehwehki me ohlo kin tiengla mwowe nan peneinei, oh ah pwoudo kin lelepek utungada, oh nah seri kan kin peik. (Episos 5:22-25, 28-33; 6:1-4) Soahngen wiewia pwukat pahn karehda meleilei en Koht nan mouren peneinei.

¹⁸ Kristian ohl pwopwoud men anahne tamataman me koasoandi en tapwi sang nan Pwuhk Sarawi sohte kin wiawi ni elen lemei. E anahne kalimengih Sises, ah Tapwi. Mendahki ih me pahn wia “tapwin mehkoaros,” Sises “ketido, kaidehn pwe aramas akan en papah, a pwe en papah aramas akan.” (Epsos 1:22; Madiu 20:28) Ni ahl ehu me parekiong met, Kristian ohl emen kin wia tapwi ni elen limpoak me karehong ih en kak apwalih mwahu mehkan en ah peneinei. Oh ni mehlel lih Kristian men pahn uhpaiong ah pwoudo. Nin duwen ahn ohlo “sounsawas” oh “sounkaunsekpe,” liho kin kaitarala irair kan me sohte mih rehn ah pwoudo oh eri kihong ohlo utuht me anahn. (Senesis 2:20; Lepin Padahk 31:10-31) Kadoadoahk pwung en tapwi kin sewese ohl pwopwoud oh lih pwopwoud kan en wauneki emen emen oh kamwekid seri kan en peik. Ehi, pohnese koasoandi en tapwi kin karehda en mie meleilei en Koht nan mouren peneinei.

19. Dahme karehda kapehse mwahu me kesemwpwal ong meleilei oh nsenamwahu en peneinei?

¹⁹ Mouren kosonned kesemwpwal kesiluh kin kak sansalda ni lokaia pwukat: Pehse mwahu me kesempwal ong meleilei oh nsenamwahu en peneinei. Seims 1:19 padahkiong kitail: “Emen emen kumwail koaros en nan kapehd mwadang ong rong, ahpw dehr nan kapehd karuaru en lokaia oh lingeringer.” Tohn peneinei kan anahne rong emen emen oh kosoiong emen emen pwehki kapehsehn peneinei kin pidada riemen ara kosoipene. Ahpw, mendahki ma dahme kitail pahn nda me mehlel, e uhdahn pahn wiahda mehkot suwed sang mehkot mwahu, ma e kin wiawi ni lokaia lemei, akalapalap, de ni ahl ehu me kin mwamwahleki meteio. Atail lokaia en kin kadek, “doalki soahl.” (Kolose 4:6) Peneinei kan me kin idawen mouren kaweid en Pwuhk Sarawi oh kin kapehse mwahu pene kin rapahki meleilei en Koht.

20. Dahme karehda komw kak ndahki me limpoak me kesempwal ong meleilei en peneinei?

²⁰ Mouren kosonned kapahieu iei met: Limpoak me kesemwpwal ong meleilei oh nsenamwahu en peneinei. Limpoak nanpwungen ohl oh lih kin wia ire kesemwpwal ehu nanpwungen tohn peneinei ehu. Ahpw, me keiou kesemwpwal sang met, iei limpoak me lokaiahn Krihk kin kahdaneki agape. Limpoak wet iei me kitail kin kekeiradahng Siohwa, ong Sises, oh ong mehn impetail. (Madiu 22:37-39) Siohwa kasalehong tohnsampah limpoak wet ni ah ketikihdo “sapwelime Iehros, pwe mehmen me kin pwosonla ih en dehr salongala, a en ahneki mour soutuk.” (Sohn 3:16) Ia uwen mwahu pwe kitail kak kasalehda soahngen limpoak ohte ong tohn atail peneinei! Limpoak ile wet kin wia “sahl unsek en kaminimin.” (Kolose 3:14) E kin kapatapene pwopwoud ehu oh kamwekid ira en wia dahme keiou mwahu ong emen emen oh ong neira seri kan. Ni ahnsou me kahpwal kan kin pwarada, limpoak pahn sewese ira en miniminpene apwaliala ireo. Kitail kak kamehlele met pwehki “limpoak . . . sohte kin mehwo . . . Limpoak kin sewesei kitail en loalenohng apwal akan koaros, e kin sewese atail pwoson ahnsou koaros, e kin sewesei kitail en liki Koht, oh en pil kanangamah ni mehkoaros. Limpoak me poatopoat, sohte imwi.” (1 Korint 13:4-8) Meid pai mehlel peneinei kan me arail limpoak ong emen emen kin tengkihpene arail limpoak ong Siohwa!

Kaukaule Raparapahki Meleilei en Koht

21. Dahme pahn uhdahn kalaudehla meleilei oh nsenamwahu en omw peneinei?

²¹ Mouren kosonned pwukat oh meteikan me kohsang nan Paipel kin pwarada ni mwomwen oarelap akan nan pwuhk kan me Siohwa ni kadek ketikihda sang rehn “pwihn en ladu lelepek oh loaloakong.” (Madiu 24:45) Karaspe ehu, soahngen iretik pwukat kin dierek nan pwuhko me mih ni teh 192 The Secret of Family Happiness, me kohpeseng nan Kapokon en District me Sounkadehde kan en Siohwa wiahda nan sampah pwon nan 1996/97. Wia pein omw onop oh onop en peneinei doadoahngki Pwuhk Sarawi ki sawas en soahngen pwuhk pwukat kak imwikihla kapai tohto. (Aiseia 48:17, 18) Ehi, kapwaiada kaweid en Pwuhk Sarawi uhdahn pahn kalaudehla meleilei oh nsenamwahu en omw peneinei.

22. Dahme kitail en poahsonehda atail mour en peneinei powe?

²² Siohwa kin ketin nekinekid ong peneinei kan me kin wia kupwure soahng mwahu kan, oh e warohng atail kaping oh kaudek. (Kaudial 21:1-4) Ihme wiahiong omw peneinei en poahsonehda arail mour pohn kaudek en Koht mehlelo. Oh samatail limpoak nanleng, Siohwa, en kapaiahkin uhk nsenamwahu nin doken amw raparapahki meleilei en Koht nan mouren omw peneinei!

Iaduwen Komw Pahn Sapeng?

◻ Dahme anahn pwe peneinei en mourki mour lelepek ong Koht?

◻ Dahme karehda miehki kahpwal en peneinei rahnwet?

◻ Ia mehn kapir ong nsenamwahu en peneinei?

◻ Ia ekei mouren kosonned kan me pahn sewese kitail en wiahda meleilei on nsenamwahu nan mouren peneinei?

[Kilel nan pali 18]

Kapehse mwahu pahn sewese kitail en rapahki meleilei en Koht nan mouren peneinei