Iaduwen Komw Kak Kasalehda Uhdahn Karakarahk Mehlel?
KARAKARAHK mehlel me keieu kesempwal mwohn silangin Koht. Seims ntingihdi: “Koht kin ketin sohpeisang me aklapalap, oh kin ketikihong me karakarahk kan sapwellime kalahngan.” (Seims 4:6, New World Translation) Wasaht Seims kin koasoakoasoia duwen padahk tohto me kin sansalda nan Pali Nting en Ipru. “Mehnda ma komw kin ketiket wasa ileilehie, ahpw komw kin ketin kupwure me tikitik kan; oh me aklapalap akan sohte kak ruksang komwi.” “Rahn ehu pahn leledo me aklapalap en aramas pahn imwisekla oh pohnmwahso en aramas pahn mwomwla. Eri, Kauno kelepw me kaping pahn kowohng.” “E sohte kin ketin kupwure me aklapalap akan, ahpw e kin ketin uhpalihki me aktikitik kan.”—Melkahka 138:6; Aiseia 2:11; Lepin Padahk 3:34.
Wahnpoaron Piter pil kin kangoangehkin kitail en karakarahk. E ntingihdi: “Kumwail koaros pwuhriong nan likoun karakarahk oh uhpahpene nanpwungamwail; pwe Pwuhk Sarawi mahsanih, “Koht kin ketin pelianda me aklapalap akan, a e ketikiohng sapwellime kalahngan me karakarahk kan.”—1 Piter 5:5.
En Krais Mehn Kalimeng en Karakarahk
Ele ke pahn kalelepek, Ia kamwahupen en karakarahk? Ong aramaso me nannanti en wia Krisitan mehlel men—iei en karakarahk duwehte Krais. Sises kasalehda ah karakarahk ni ah alehda pwukoah tohrohr ehu en ketido sampah sang nanleng oh wiahla aramas tikitik men, me tikitik sang tohnleng kan. (Ipru 2:7) Mendahki ih iei sapwellimen Koht Ohl, e dadaurete pahn kanamenek kan me ah imwintihti en pelien lamalam kan wiahiong ih. E sohte luwetala erein ah kasongosong, mendahki e kak eker tohnleng ngederehnie en sewese ih.—Madiu 26:53.
Ikmwuri, Sises langada ni tuhkehn kalokolok, ahpw mendahki met e kolokol ah lelepek oh Semeo. Ihme kahrehda, Pohl kak ntingihdi duwen ih: “Eri, kumwail uhdahn pahn ahnekihla soangen lamalamohte me Krais Sises ketin sapwellimanki: E sapwellimanki roson en Koht ahnsou koaros, ahpw sohte ketin kupwukupwure en kapahrekiong Koht pein ih. Eri, pwehki sang ni sapwellime kupwur saledek e ketin tounmeteikihla mehkoaros, oh ketin wiahla ladu men. E ketin wia-aramasala oh ketidohng sampah ni mwomwen aramas. E ketin mpai, oh e ketin weid nan elen peik lao lel mehla—eh pwoula pohn tuhkeho.”—Pilipai 2:5-8.
Eri iaduwen kitail kak kasalehda uhdahn karakarahk mehlel? Nan irair kan en mour, iaduwen kitail kak karakarahk ahpw kaidehn aklapalap?
Wiewiahn Aramas Karakarahk Men
Kitail en tehk iaduwen karakarahk kin doadoahk nan wasahn doadoahk de nan atail papah nin duwen Kristian men. Pwe doadoahk en kak pweida mwahu, anahne en mie sounapwalih kan oh kaun en doadoahk kan. Emen anahne en wiahda koasoandi kan. Iaduwen ke kin mwekidki met? Ke kin lemeleme, “Ihs ih pwehn padahkiohng ie dahme I en wia? I wiewiaher doadoahk wet sounpar tohto sang ih.” Ehi, ma ke aklapalap, ke pahn nsensuwedki uhpaiong ih. Ni pali teio, aramas karakarahk men kin nantiong en “dehr wia mehkot sang ni amwail ineng en roporop ong pein kumwail de suwei mwahl; ahpw kumwail mpahipene nanpwungamwail, oh dehr wiahki me kumwail mwahusang aramas teikan.”—Pilipai 2:3.
Iaduwen ke kin mwekidki iren sawas kan me kin kohsang rehn emen me pwulopwul sang uhk de sang rehn emen lih? Ma ke karakarahk, ke pahn medemedewe iren sawas wet. Ma ke aklapalap, ke pahn kailongki de soikala. Mehnia me ke mwahuki, kaping likamw me pahn kahluwalahng omw ohla de kaweid katepe me pahn mwahu ong komwi?—Lepin Padahk 27:9; 2:5.
Ke kak powehdi kahpwal akan sang mehn uhwong kan? Karakarahk pahn sewese uhk en powehdi irair apwal akan oh sewese uhk en dadaur, duwehte me Sohp wia. Ma ke aklapalap, ke pahn nsensuwedla oh uhwongda irair kansensuwed kan oh kisin sapwung tikitik kan.—Sohp 1:22; 2:10; 27:2-5.
Karakarahk Kin Limpoak oh Mahk
Ekei aramas kin apwalki nda, “Komw kupwurmahk. I wiahda sapwung ehu. Komwi me pwung.” Dahme kahrehda? Pwehki re nohn aklapalap! Ahpw, pak tohto pek mahk mehlel kak kauhdi akamai nan pwopwoud.
Ke kin men mahkong emen me wia sapwung ong uhk? De, nan omw aklapalap, ke kin kolokol omw kailongki aramaso, ele erein rahn kei oh sounpwong kei, ke sohte men koasoiong meno me kansensuwedih uhk? Ke kin iang pidada nan mwekid en ikih wiewia sapwung? Aramas kan kin kamakamla nan ekei soahngen mwekid en ikih wiewia sapwung kan. Rehn mehteikan, re kin nantiong kauwehla adamwahu en aramaso me re kailongki. Me weksang met, aramas karakarahk men kin limpoak oh mahk. Dahme kahrehda? Pwehki limpoak sohte kin inapwtihmwomw. Siohwa kupwurki en mahkohng mehn Israel kan ma re pahn liksang aklapalap. Ma emen men wiahla tohnpadahk en Sises me kin kasalehda uhdahn karakarahk mehlel, e men mahkong mehteikan, pil pak tohto!—Soel 2:12-14; Madiu 18:21, 22; 1 Korint 13:5.
Aramas karakarahk men kin ‘tiengla mwowe kasalehda wauneki meteikan.’ (Rom 12:10) The New International Version kawehwe: “Wauneki meteikan kesempwal sang kesempwalki pein kowe.” Ke kin kapinga meteikan oh kalahnganki arail koahiek kan? De ke kin ahnsou koaros anahne en rapahki sapwung ehu pwehn kauwehla ederail? Ehi, ke uhdahn kak kapinga aramas teikan? Ma ke kin apwalki wia met, ele omw kahpwalo iei sohlikilik oh aklapalap.
Aramas aklapalap men kin sehse kanangamah. Aramas karakarahk men kin kak kanangamah. Iaduwen komwi? Ke kin mwadang nsensuwedkihla sapwung ehu me wiawiohng uhk? Soahngen mwekid wet kin pelian kanangamah. Ma ke karakarahk, ke sohte pahn medemedewe pein uhk daulihla. Tamanda dahme wiawi ni ahnsou me sapwellimen Sises tohnpadahk kan kin nohn medemedewe pein irail daulihla—re akamaikihda duwen ihs me keieu kesempwal. Re manokehla me irail koaros wia “lidu soh katepe kei”!—Luk 17:10; 22:24; Mark 10:35-37, 41.
Sounnting en Prans Voltaire kin koasoia me karakarahk iei “en wehwehki me mie soahng kan me ke kak wia oh soahng kan me ke sohte kak wia . . . peliepen aklapalap.” Ehi, karakarahk iei lamalam en aktikitik. Aramas karakarahk men kin wehwehki me e sohte kak wia soahng koaros oh e sohte kin aklapalap. E kin uhdahn kasalehda wahu oh kadek.
Eri, dahme kahrehda kitail en nantiong en karakarahk? Pwehki Koht kin ketin kupwurperenki aramas karakarahk oh met kin sewese kitail en ale kaweid sang rehn Koht. Pwehki Daniel karakarahk, Siohwa kin ketin wiahki soukohpo emen me “inenen mwahu” oh kadarala reh emen tohnleng me kasalehong ih kasansal ehu! (Daniel 9:23; 10:11, 19) Karakarahk kin wahdo kating tohto. E kin wahdo kompoakepahmw mehlel kan me uhdahn poakohng uhk. Laud sang met, e kin wahdo kapai en Siohwa. “Lemmwiki Kauno [“Siohwa,” New World Translation] oh mpai, eri, ke ahpw pahn kepwehpwehla, waunla, oh pil mour werei.”—Lepin Padahk 22:4.
[Kilel nan pali 7]
Lokaia karakarahk ni pek mahk kin kak wiahda meleilei