Pweinen Aklapalap​—Ia Uwen Laud?

MIE pak me aramas men kin song en mwamwahlekin uhk? Ele mwein emen kaunen doadoahk, de emen sounapwalih, de pil emen kisehmw me kin masileiong uhk de mwamwahlikin uhk? Ia omw pepehm ong aramas menet? Komw kin perenki ah irair? Uhdahn soh! Pwekihda? Pwehki aklapalap kin irepeseng nanpwungen aramas kan oh kihsang kapehsepene.

Emen me kin akalapalap kin mwamwahleki aramas koaros, oh ihme kahrehda aramas menet kak pehm me ih ileile sang aramas koaros. Aramas menet me ahneki soahngen lamalam wet sohte kin kalapw koasoia mwahu en mehteikan. Ahnsou koaros e pahn kin nda mehkot suwed en mehteikan​—⁠duwehte e pahn nda “ehi, ele men mehlel, ahpw aramaso ahneki kahpwal wet de e ahneki sapwung wet.”

Nan pwuhko Thoughts of Gold in Words of Silver, e kin kasalehda me aklapalap “kin wia tiahk suwed ehu me kin kauwehla emen. E kin kauwehla aramas emen, kahrehda sohla mehkot rehn menet me aramas pahn perenki.” E kapwuriamwei me sohte aramas kin nsenamwahuki mih rehn aramas aklapalap men? Ni mehlel, pweinen en emen aklapalap kin kahrehong en sohte kompoakepah mehlel. Pwuhkohte pousehla koasoia, “me weksang met, sampah kin poakohng me karakarahk kan​—⁠kaidehn me karakarahk kan me aklapalapkihla met, ahpw me uhdahn karakarahk mehlel.” Ni pwung, Paipel mahsanih: “Aklapalap en emen kin wahdohng ih kanamenek, meno me kin karakarahkla pein ih pahn ale wahu.”​—⁠Lepin Padahk 29:​23, The Jerusalem Bible.

Ahpw, me kesempwal sang en ahneki kompoakepah kan de en wahula rehn aramas kan, iaduwen aklapalap kin kamwekidih en emen nanpwung rehn Koht? Iaduwen Koht kin kilangwohng me aklapalap, me pohnmwahso kan, oh me lemei kan? Aklapalap de karakarahk​—⁠Koht kin tehk ma aramas kin ahneki irair pwukat?

Mehn Kasukuhl ehu en Karakarahk

Sounnting sarawi en Lepin Padahk ketihtihki: “Lemei kin kahrehiong aramas paisuwed, oh aklapalap kin kahrehiong aramas en pwupwudi. Aktikitik oh semwehmwe mwahusang aklapalap oh iang paieki arail dipwisoun kohl kan.” (Lepin Padahk 16:​18, 19) Loalokong en mahsan pwukat kin dehdehda mwahu sang rehn kaunen sounpei en Siria Nahman, me momour ni mwein soukohp en Israel Elisa.

Nahman wia ohl tokutok men. Ni ah raparapahki en mwahula sang ah soumwahuwo, e seiloaklahng Sameria ni ah lemeleme me pein Elisa pahn tuhwong ih. Ahpw, soukohpo kadarala nah laduwo ki kaweid me Nahman en duhdu pak isuh nan Pillap Sordan. Nahman lingeringerki wiepe wet oh kaweid wet. Dahme karehda soukohpo sohte pein tuhwong ih oh koasoi ong ih ahpw kadaredo ladu men pwehn lokaiahng ih? Oh ni mehlel, pillap akan nan Siria mwahu duwehte Pillap en Sordan! En Nahman kahpwalo iei ah aklapalap. Ia imwilahn met? E peikiong kaweid erpit wet. “Nahman eri kohdihla oh duhdu pak isuh nan Pillap Sordan, nin duwen me Elisa kehkehlingkihong ih. Eri, kilin paliwereo ahpw mwahula duwehla kilin seri pwelel, e ahpw mwakelekella mehlel.”​—⁠2 Nanmwarki 5:14.

Ekei pak kapai laud kin kohsang karakarahk.

Pweinen Pohnmwahso

Ahpw, pweinen atail aklapalap kin laud sang ihte atail katiasang ekei kapai kan. Mie ehu irair en aklapalap me kin kawehwehda nan lepin lokaiahn Krihko “hubris,” me kin wehwehki “aklapalap daulihla de pohnmwahso me kin kalapw imwikihla kalokepe.” (Webster’s Ninth New Collegiate Dictionary) Lepin lokaia wet kin kohsang rehn mehn Krihk, oh nin duwen me loalokong en pelien Krihk William Barclay kasalehda, “hubris kin doalohngete aklapalap oh lemei . . . , pohnmwahso me kin kahrehong [ohl emen] en mwamwahleki ienge mehteikan.”

Karasepe sansal en soahngen aklapalap wet me kin daulihla pwarada nan Paipel. E sansalda met rehn Anun, nanmwarki en Ammon. Insight on the Scriptures kawehwehda: “Pwehki limpoak kadek me Nahas kin kasalehong Depit, Depit kadarala meninkeder kei pwehn kamweitala Anun pwehki mehlahn Nahas ah pahpa. Ahpw Anun, pwehki ah kamehlele nah soupeidi kan me dene Depit wia met pwehn lipahroke kahnimwo, kanamenekihla nein Depit ladu ko ni ah sehkasang apali arail alis ko oh lupukasang arail likou ko lel nan lukope oh kadarirailla.”a Me pid ire wet, Barclay kosoia: “Wiewia wet iei hubris. Wiewia wet kin oarepene irair pwukat koaros: kasaroh, kamwarak, oh kanamenekihla mwohn wehipokon.”​—2 Samuel 10:​1-5.

Ehi, aramas aklapalap men kin kak lemei, oh kanamenekihla mehteikan. E kin perenki kamedekihla mehteikan ni elen lemei, oh eri kin kouruhrki en aramaso nsensuwed oh sansaro. Ahpw kihsang wahu en emen kin rasehng kedlahs au riau ehu. E kin imwikihla sohla kompoakepahn emen, oh ni mehlel, wiahda imwintihti kan.

Iaduwen Kristian mehlel men kak kasalehda soahngen aklapalap wet, pwehki ah Soumas kehkehlingki me ‘en poakohng mehn mpe duwehte pein ih’? (Madiu 7:12; 22:39) E kin uhwong soahng koaros me Koht oh Krais kin kupwurki. Nan irair wet, Barclay kasalehda: “Hubris iei aklapalapo me kin kahrehiong emen en uhwong Koht.” Aklapalap me kin kosoia: “Sohte Siohwa.” (Melkahka 14:⁠1) De nin duwen me Melkahka 10:4 kasalehda: “Aramas suwed sohte kin nsenohki Kauno; nan eh aklapalap e kin lemeleme me sohte katepen Koht.” Soahngen aklapalap, de pohnmwahso, sohte kin ihte katohrohrla emen sang kompoakepah kan oh kiseh kan ahpw pil kin katohrohr ih sang rehn Koht. Ia uwen laud en pweipwei wet me e pahn pwain!

Dehr Mweidohng Aklapalap en Kauweiukala

Aklapalap kin pwarada ni irair tohto​—⁠aklapalap me kin kohsang uhki en emen wehi, sang uhki keinek, sang pwihn en aramas oh mouren aramas, sang sukuhl, kepwehpwe, pai, oh manaman. Ni ahl sohte lipilipil, aklapalap kakete mihla rehmw oh kauwela omw mour.

Aramas tohto kin mwomwen karakarahk nan arail wiewia ong irail me lapalap kan de pil ong iengerail kan. Ahpw dahme kin wiawi ni ahnsou me aramas menet me mwomwen aktikitik kin kohieng nan pwukoah manaman ehu? Mwadangete, e wiahla kaun lemei men me kin kahpwaliala mour en irail kan me dene mih pahnangih! Met kin wiawi ong ekei me kin pwuhriong nan ehu uniform de weuwa ehu metel en polis de sounpei me kin kasalehda me re ahneki manaman. Pil irail tohndoadoahk en koperment kan kin kak aklapalapla nan arail wiewia ong tohnwehipokon, ni ahr kin medemedewe me tohnwehipokon me pahn papah irail, ahpw kaidehn irail me pahn papah aramas kan. Aklapalap kin kak wiahiong uhk en lemei, sempoak; karakarahk kak wiahiong uhk en kadek.

Sises kak aklapalap oh lemei ong sapwellime tohnpadahk kan. E wia ohl unsek men, sapwellimen Koht Ohl, me kin mih rehn werek kan me sohunsek, kohwei kohdo, oh pwurur. Ahpw, luhk dahieu e ketikihong irail ko me kin rong ih? “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla. Kumwail ale oh kapaikada ei mehn wisiket, oh kumwail padahngkisang ie, pwe I me opampap oh nan kapehd karakarahk; kumwail ahpw pahn diar kommoalpen ngenomwail kan. Pwe mehn wisik me I pahn kihong kumwail me mengei, oh audepe kan me marahra.”​—⁠Madiu 11:​28-30.

Kitail kin ahnsou koaros idawehnla mehn kalimeng mwahu en Sises? De kitail kin lemei, kakos, sohmahk, oh aklapalap? Duwehte Sises, nantiong en kadek, kaidehn soangen aramas me kin kaloke mehteikan. Pelianda irair suwed en aklapalap.

Waunekin Pein Uhk Pelianki Pohnmwahso

Lepin lokaiahn wai “pride” kin pil wehwehki “irair mwahu ehu iei en wauneki pein emen.” (Webster’s Ninth New Collegiate Dictionary) Met kin wehwehki me ke kin nsenohki dahme aramas teikan kin lemelemehkin uhk. Ke kin nsenohki mwomwomw oh edemwen. Lepin padahk en Spein wet kin mehlel, “Padahkiohng ie ihs me ke kin ieiang oh I pahn padahkiohng uhk ihs kowe.” Ma ke kin perenki patehng aramas kan me kin samin, dangahnga, oh ausamin, eri ke pahn duwehla irail. Ke pahn alehda arail irair kan, oh duwehte irail, ke sohla pahn wauneki pein uhk.

Ni mehlel, mie aklapalap me kin wiahiong emen en pohnmwahso. Sounkawehwehn Kosonnedo oh Parisi kan ni mwein Sises kin pohnmwahsohki arail tiahk kan oh arail liksansal me dene re nohn sarawi. Sises kehkehlingki duwen irail: “Mehkoaros me re kin wia, re kin wiahda pwe en sansal mwahu mwohn aramas akan. Kumwail tehk mwahu lauden kisin koakon kan me kin mi pohn temwarail oh ni pehrail kan, me pwuloi en ire tikitik en Pwuhk Sarawi kan kin mi loale, oh tehlap en pwunginpen ar likou kan. Re kin mwahuki mwohd lempahntamw ni kamadipw kan oh mwohndi nan dewen me lapalap akan nan sinakoke kan. Re kin anahne aramas en poaridi oh rahnmwahwih irail nan wasahn pokon kan, oh ekerkin irail ‘Sounpadahk.’​—⁠Madiu 23:​5-7.

Dahme anahn iei en ahneki lamalam touparek. En pil tamataman me Siohwa kin mwahngih mohngiong, kaidehn pali liki te. (1 Samuel 16:7; Seremaia 17:10) Sapwellimen Koht pwung kaidehn iei ih pwung en pein emen. Ahpw, peideko met iei, Iaduwen atail kak kekeirada aktikitik mehlel met oh liksang pwain pweilaud en aklapalap?

[Nting tikitik me mi pah]

[Kilel nan pali 4]

En Nahman karakarahk wahdohng ih kapai laud