Sounwia Dahl Lapalap Oh Sapwellime Doadoahk
“E pahn doadoahk ong ni kahrepe kesempwal kan, . . . onopohngehr soangen doadoahk mwahu koaros.”—2 TIMOTY 2:21.
1, 2. (a) Ni ahl dahieu me sapwellimen Koht doadoahk en kapikadahn ohl oh lih iei doadoahk kaselel ieu? (b) Dahme kahrehda Sounwia Dahl Lapalap kapikada Adam oh Ihp?
SIOHWA iei Sounwia Dahl Lapalap. Doadoahk kaselel ehu me e ketin kapikada iei atail tepin pahpa, Adam. Paipel padahkiong kitail: “Siohwa eri ketikihda nesen pwehl ehu sang nanpwel oh ketin wiahkihda war ehu me mwomwen aramas. E ahpw ketikihong ni waro angin mour; ni ahnsowohte ohlo wiahla mour ehu,” iei, “mour me wia esingek.” (Senesis 2:7, footnote, New World Translation) Kapikadahn tepin aramaso me unsek, aramaso wiawihda pwehn rasehng Koht, oh met kin wia mehn kadehde duwen sapwellime erpit oh limpoak ong dahme pwung.
2 Sang ni eh doadoahngki tihnkopwou sang rehn Adam, Koht wiahda sawasepen ohl—iei lih. Lingan unsek en Ihp kin siksang lih akan me keieu kaselel nan rahnpwukat. (Senesis 2:21-23) Tepin pwopwoudo pil aleier paliwar kan oh madamadau kan me unsek pwehn kapwaiada ara pwukoah en wiaiong sampah wet en kak wiahla paradais ehu. Ira pil aleier manaman en kapwaiada sapwellimen Koht kosonnedo me ntingihdi nan Senesis 1:28: “Kumwa kaparaparala pwe kadaudokamwa kan pahn kousoanla wasa koaros nin sampah oh kaunda mehkoaros. I kihong kumwa manaman en kaunda mwahmw akan, menpihr kan oh mahn lawalo kan koaros.” Ni kaimwseklahn mehkoaros, sampah lingan wet pahn audaudkihda aramas lik kei me nsenamwahu oh miniminpene pwehki limpoak me kin “wiahla ehu ni mehlel.”—Kolose 3:14.
3. Iaduwen atail tepin pahpa oh nohno wiahla dahl ehu ong mehn doadoahk mwahl akan, oh met imwikihla dah?
3 Ahpw inenen kansensuwed pwe tepin atail pahpa oh nohno pein pilada en uhwong ara Sounkapikada, me iei Sounwia Dahl Lapalap. Ara mour kin duwehte me ntingihdi nan Aiseia 29:15, 16 [NW]: “Irail kan me songosong en karirihala ar koasoandi kan sang Siohwa pahn ohla! Re kin wiahda ar koasoandi kan ni rir oh lemeleme me sohte emen me kilang de ese dahme re wiewia. Re kin wekidala mehkoaros. Mehnia me keieu kesempwal, sounwia dahl de pwehl en wiahda dahl? Mie mehkot me aramas wiahda kak ndahng aramaso, ‘Kaidehn kowe me wiaiehda’? De e kak ndahng aramaso, ‘Ke sohte ese dahme ke wiewia’?” Ah Adam oh Ihp sapeik kahrehda kahpwal—kadeik en mehla soutuk. Oh pil, aramas koaros me kohsang ira kin sohsohkihda dihp oh mehla. (Rom 5:12, 18) Lingan en sapwellimen Sounwia Dahl Lapalap kapikipikda kan inenen ohlahr.
4. Ong ni doadoahk kesempwal dahieu me kitail kak papah?
4 Ahpw, mendahki kitail wiahla aramas soh unsek kei, kitail me kohsang Adam me dipan kak kapinga Siohwa duwehte me ntingihdi nan Melkahka 139:14: “I kin patohwan kapingahkin komwi omwi lemmwin kowahlap; wiepen nin limomwi kan me kapwuriamwei oh inenen mwahu mehlel.” Ia uwen kansensuwed mehlel pwe tepin doadoahk en Sounwia Dahl Lapalap ohlahr!
Sounwia Dahlo kin Kalaudehla Sapwellime Doadoahk
5. Iaduwen semenen Sounwia Dahl Lapalap ah pahn kak kadoadoahk?
5 Ia uwen kapai ong kitail pwe semen me mih rehn atail Sounkapikada me wia Sounwia Dahl pahn kadoadoahk laudsang ihte wiahda aramas akan. Wahnpoaron Pohl padahkiong kitail met: “Pwe ihs kowe, pwe ken kak uhwong Koht? Dahl ehu me wiawikihda pwehl sohte kin ndahng me wiahdao, ‘Dahme ke wiahkiniehda ni soangen mwohmwet?’ Eri, sounwia dahlo soh ahneki pwungen pilada soangen pwehl dah me e men doadoahngki: oh pil wiahda dahl riau sang ni nsen pwehl ehu, ehu me kaselel ong ni doadoahk kesempwal akante, a ehu ong mehn doadoahk mwahl akan?”—Rom 9:20, 21, NW.
6, 7. (a) Iaduwen aramas tohto nan rahnpwukat kin wiahda pein ahr pilipil pwe ren wiawihda ong mehn doadoahk mwahl akan? (b) Iaduwen me pwung kan kin wiawihda ong mehn doadoahk kesempwal kan?
6 Ehi, ekei doadoahk kan en Sounwia Dahl Lapalapo pahn wiawihda ong ni doadoahk kesempwal kan, ahpw ekei ong mehn doadoahk mwahl akan. Irail akan me wiahda ahr pilipil en iang sampah wet me kin kohkohdi nan dihp ni ahl ehu me pahn kileledi arail kasohrala. Ni ahnsou Nanmwarki lingan, Krais Sises pahn ketido pwehn kadeikada sampah, dahl akan ong mehn doadoahk mwahl akan pahn oarepene aramas akan me kin rasehng kuht akan nin duwen me Madiu 25:46 [NW] mahsanih, me re pahn “mehla soutuk.” Ahpw irail akan me kin rasehng sihpw akan, “me pwung kan,” irail akan me kin wiawihda ong “doadoahk kesempwal kan”, pahn alehdi “mour soutuk.”
7 Ni karakarahk, aramas pwung pwukat kin uhpaiong koasoandi me kohsang powe. Re kin mourki elen Koht. Re kin kapwaiada kaweido me diarekda nan 1 Timoty 6:17-19: “Panawiheki koaros me kepwehpwe nan mour wet re en dehr aklapalap, oh dehr koapworopworki soahng kan me sohte kin tengeteng, duwehte atail kepwehpwehn sampah; ahpw re en koapworopworki Koht, me kin ketin kalahngan oh me kin ketin sapankihong kitail soahng koaros pwe kitail en peren.” Re kin pein wiahda met en “kin wia me mwahu, re en kepwehpwehki doadoahk mwahu, re en sapan oh perenki sewese meteikan. Ih duwen met ar pahn kaunopada ehu pai kesempwal ong pein irail, me pahn wia ehu poahsoan kehlail ong ni ahnsou kohkohdo. Eri, irail ahpw pahn kak lelohng ni mouro me uhdahn mour mehlel.” Irail kin mweidohng padahk mehlel me kohsang powe en kahre ahr mour oh re kin ahneki pwoson kehlail ong sapwellimen Siohwa sawas me kohsang rehn Krais Sises, me “ketin meirongkihlahr pein ih” pwehn ketin doarehla aramas akan koaros me salongkihlahr dipen Adam. (1 Timoty 2:6) Eri, kitail anahne sang ni pein nsenatail en kapwaiada kaweid en Pohl en “pwuhriongehr nan likoun mour kapw en aramas kapw. Iei aramas kapw me Koht, Sounwiepe, kin ketin onohne sapahl ahnsou koaros nin duwen pein sapwellime roson, pwe en ketin kamakamarainihekin kumwail duwen pein ih”!—Kolose 3:10.
Soahngen Dahl Dahieu Komw Pahn Wiahla?
8. (a) Dahme pahn kasalehda soahngen dahl dah me emen emen wiawihkihda? (b) Irair riau dah kei kin kak kamwekid emen?
8 Dahme pahn kak kamwekid emen ong duwen soangen dahl dahieu e pahn wiahla? Eh madamadau oh tiahk. Irair pwukat kin tepida sang atail ineng kan oh pil iaduwen mohngiongatail kin kamwekid kitail. Nanmwarki loalokong Solomon koasoia: “Mohngiong en tohnsampah kak medewehda pein ele, ahpw pein Siohwa me kin ketin kaweid eh ewen kahk kan.” (Lepin Padahk 16:9, NW) Keriau, irair pwukat kin pil kohsang dahme kitail kin kilang oh rong, oh atail werekiong aramas teikan oh pein atail ekpiriens kan. Ia uwen kesempwal, kitail en kapwaiada kaweid wet: “Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.” (Lepin Padahk 13:20) Nin duwen 2 Piter 1:16 kaweidkin kitail, kitail en liksang “soai likamw akan,” de nin duwen me Pwuhk Sarawi en Knox (Roman Catholic) koasoia: “soai akan me kohsang rehn aramas akan.” Met pahn pidada padahk kan oh kamadipw kan en pelien lamalam kan me kohsang Kristendom me kin lahlahwe padahk mehlelo.
9. Iaduwen kitail kak mwekidki ni ahl me pwung kaiahn me kohsang rehn Sounwia Dahl Lapalap?
9 Nin duwen dahme kitail pahn mwekidki, Koht pahn kak kaiahne kitail. Ni lamalam en aktikitik ong Siohwa, kitail kak kahlemengih sapwellimen Depit kapakap: “Maing Koht, komw ketin kasawih ie, pwe komwi en mwahngih mohngiongiet; komw ketin song ie, pwe komwi en mwahngih ei lamalam akan. Komw ketin rapahki ma mie suwed ehu rehi oh ketin kahluwa ie nan ahl en mour soutuk.” (Melkahka 139:23, 24) Siohwa kin kahrehong rongamwahu en Wehio en lohkseli wasa koaros. Mohngiongatail ni kalahngan kin mwekidki rongamwahuo oh sapwellime Koht sawas kan. Sang sapwellime pwihn, e kin ketkihong kitail soangsoangen pwais kan me kin pid kalohki rongamwahuo; kitail en kolokolte oh kesempwaliki pwais kaselel wet.—Pilipai 1:9-11.
10. Iaduwen kitail kin nantiong idawehnla koasoandi kan me kin kakehlail atail pali ngehn?
10 E inenen kesempwal kitail en rong kanahieng Mahsen en Koht, idawehn koasoandi en wadek Paipel ni ehu ehu rahn oh poahsoankihda atail koasoakoasoi kan rehn atail peneinei oh koampoakpatail kan nting en Paipel. Prokram en kaudokiong Koht ni menseng koaros kin wiawihda ni ahnsoun mwenge en ni menseng en peneinei en Bethel oh ehu ehu pwihn en misineri kan en Sounkadehdehn Siohwa kan oh irail pil kin wadek Paipel ehu wihk oh wihko mwuri irail kin wadek Pwuhken Pahr kapwo. Omw peneinei pil kak wia soangen koasoandi duwehte met? Iaduwen kapai tohto kitail pil kin ale sang ni atail kin werekiong mwomwohdisohn Kristian, ni mihding kan, oh keieu sang ni atail pahn iang pasepeng nan onop en Kahn Iroir ni ehu ehu wihk!
Ale Kaiahn Pwehn Powehdi Kahpwal akan
11, 12. (a) Iaduwen kitail kak kapwaiada kaweid en Seims nan atail mour ni ahnsou me kitail kin lelohng kasongosong? (b) Iaduwen dahme Sohp lelohng kin kangoange kitail en kolokolte atail lelepek?
11 Nan atail mour en ehu ehu rahn, Koht kin ketin mweidong ekei irair akan en wiawi oh ekei pak irair pwukat kin apwal ong kitail. Iaduwen kitail pahn kilangwong soangen kahpwal pwukat? Nin duwen me Seims 4:8 kaweidki, kitail en dehr loalsuwed, ahpw kitail en karanih Koht, likih Ih ki mohngiongatail unsek, ‘kumwail keido mpen Koht, oh e pahn ketin keiong mpamwail.’ Mehlel, kitail anahne dadaur pahn kahpwal kan oh kasongosong kan, ahpw mehpwukat kin wiawi pwehn kaiahne kitail, oh kin imwila mwahu. Seims 1:2, 3 kamehlele ong kitail: “Riei ko! Kumwail perenkihda ma soangen apwal koaros kin lelohng kumwail, pwe kumwail ese me ni amwail pwoson eh kin powehdi apwal pwukat, e kin kalaudehla amwail kanengamah ni ahnsou apwal.”
12 Seims pil koasoia met: “Mehmen me lelohng nan songosong pwehki apwal me kohiengehr en dehr nda me, ‘Kasongosong wet sang rehn Koht.’ Pwe sohte me suwed kot kak kasongosonge Koht, oh pein Koht sohte kin kasongosonge aramas. A aramas kin lelohng nan songosong sang ni pein eh ineng suwed eh kin kainangiong pein ih oh kahrehiong nan dihp.” (Seims 1:13, 14) Mwein kitail kin lelohng kasongosong tohto, duwehte Sohp, ahpw kasongosong pwukat kin kaiahne kitail. Mehn kamehlel me nting en Paipel kin kihong kitail nan Seims 5:11: “Kitail kin kapaiahkin irail arail kanengamah nan arail lokolok. Kumwail rongehr duwen en Sohp eh kanengamah oh dehdehkilahr duwen ni imwilah Kauno [“Siohwa,” NW] eh ketin kupwurehla. Pwe Kauno [“Siohwa,” NW] me diren kadek oh kalahngan.” Nin duwen dahl akan nan limen Sounwia Dahl Lapalapo, kitail en kolokolte atail lelepek ahnsou koaros, duwehte Sohp me kin likih Koht me soahng koaros pahn pweida mwahu ni imwio!—Sohp 2:3, 9, 10; 27:5; 31:1-6; 42:12-15.
Kaiahne Neitail Pwulopwul kan
13, 14. (a) Iahd pahpa oh nohno kan en tepida kaiahne neirail seri kan, oh met kak imwikihla dah? (b) Ia ekei ekspiriens kaperen kan me ke kak koasoia?
13 Pahpa oh nohno kan kak kaiahne neirail seri kan, sang ni ahnsou me irail wia seri pwelel kan, oh neitail me pwulopwul kan kak wiahla sounkolokol lelepek kan! (2 Timoty 3:14, 15) Met kin pweida mendahki ma me pwulopwul kan kin lelohng kasongosong laud kan. Sounpar kei samwalahro, ni ahnsou me kalokolok kin laud nan ehu sahpw en Aprika, peneinei ehu me lelepek kin ni rir wiahda makasihn en The Watchtower nan ehu imwen nahk. Ehu rahn, sounpei kan kohla sang ihmw lel ihmw pwehn rapahki ohl pwulopwul kan en iangala sounpei. Mie ahnsou me pwutak pwulopwul riemen nan peneinei wet kak rukala, ahpw ma sounpei kan pahn rapahki ihmwo, re pahn diarada misihn me kin wiahda makasihn kan. Met kak imwikihla kalokolok de kamakamalahn peneineio pwon. Eri, dahme wiawi? Pwutak riemenet ni eimah koasoia duwen Sohn 15:13: “Iet limpoak me keieu laud me emen kak ahneki ong kompoakepah kan, ma e pahn tounmeteikihla eh mour pwehki kompoakepah ko.” Ira pilada en mihmihte nan pere en koasoakoasoi. Mehlel, sounpei kan kak diarada ira oh kaloke ira de mwein kemehla ira ma ira pahn kahng iangala irail. Ahpw, met pahn kahrehong sounpei kan en dehr repenla nan pere teikan en ihmwo. Misihn en wiahda makasihn kan iangahki tohnpeneinei teikan pahn pitsang. Ahpw mehkot kapwuriamwei wiawi. Sounpei kan sohte repen ihmwo, irail daulih ihmwo oh uhd repen nan ihmw teikan! Aramas ako me ale kaiahn ong doadoahk kesempwal akan, iangahki misihn en wiahda makasihn kan, pitla oh re kak pousehla arail doadoahk en wiahda makasihn kan me kin kamwenge pein irail oh mehteikan ni pali ngehn. Ni ahnsouwet, emen pwutak sang nanpwungen pwutak riemenet oh riera serepein kin doadoahk nan Bethel; oh pwutako kin doadoahngkihte misihn meringo en wiahda makasihn kan.
14 Me pwulopwul kan kak sukuhliki en kapakap, oh Koht kin ketin sapengla ahr kapakap kan. Ekspiriens kaselel duwen ire wet wiawi erein kamakamalahn aramas akan nan Rwanda. Emen serepein me sounpar weneu iangahki eh pahpa oh nohno kesihnendahte awiawih imwintihti kan en kamehkihla irail kisin pakudang, ahpw serepeino kin ngidingid wia eh kapakap ni ngihl laud peki rehn Siohwa en doarehla arail mour pwe irail en kak kalaudehla ahr papah Siohwa. Aramas pwukat me men kemehla irail mwekidki kapakap wet oh irail uhd nda, “Se sohte kak kemehla kumwail pwehki kisin serepein menet.”—1 Piter 3:12.
15. Pohl kihda kaweid duwen soangen irair suwed dah kei?
15 Pali laud en neitail pwulopwul kan sohte kin lelohng kahpwal duwehte me ntingihdi nan parakrap en mwowe, ahpw kasongosong tohto kin lelohng irail nan sukuhl oh sang aramas me kin wia tiahk suwed nan rahnpwukat duwehte: kasongosong kan en wia lokaia suwed, oh wadek pwuhk suwed kan, oh kilang oh rong mehn kamweit suwed kan, oh iengarail kan kin kasonge irail en iang wia tiahk suwed. Pak tohto, wahnpoaron Pohl kin pwurpwurehng kihda kaweid duwen kasongosong pwukat.—1 Korint 5:6; 15:33, 34; Episos 5:3-7.
16. Iaduwen emen kak wiahla dahl ehu ong doadoahk kesempwal kan?
16 Mwurinte Pohl koasoia duwen dahl akan me wiawihda “ong doadoahk kesempwal akante, a ehu ong mehn doadoahk mwahl akan,” e mahsanih met: “Ma emen pahn kamwakelehda pein ih sang soahng suwed pwukat koaros, e pahn doadoahk ong ni kahrepe kesempwal kan, pwe e kasarawihalahr pein ih ong doadoahk en eh Kauno, oh pil onopohngehr soangen doadoahk mwahu koaros.” Eri kitail en kangoange neitail pwulopwul kan en kanahieng ihs me re kin werekiong. Me pwulopwul kan anahne rong kaweid wet: “Kalekehkin uhk ineng en mwahnakapw akan; nantihong ke en pwung, pwoson, limpoak, oh popohl, iangahki irail kan me inengieng mwakelekel, me kin likweriong Kauno pwe en ketin sewese irail.” (2 Timoty 2:20-22) Koasoandi en peneinei pwehn “kakehlakahda emenemen kumwail” me inenen kesempwal ong kaiahne neitail pwulopwul kan. (1 Deselonika 5:11; Lepin Padahk 22:6) E pahn kihda sawas laud ma rahn koaros kitail pahn wadek oh onop neitail Pwuhk Sarawi oh pil doadoahngki sawaspen Paipel kan me kohsang Society.
Kaiahn ong Koaros
17. Iaduwen kaweid pahn kak kaiahne kitail, oh met pahn imwikihla dah?
17 Siohwa kin kihong kitail kaweid me kohsang sapwellime Mahsen oh sang sapwellime pwihn pwehn kaiahne kitail. Dehr soikala kaweid me kohsang rehn Koht! Kapwaiada kaweid wet, oh mweidong kaweid wet en kaiahne komwi pwe ken wiahla mehkot kesempwal ong Siohwa. Lepin Padahk 3:11, 12 kin kihda kaweid wet: “Samwa, ni ahnsou me Kauno [“Siohwa,” NW] pahn kapwunguhkala, rong kanahieng, oh alehda nin duwen kehkehlik ehu. Kauno [“Siohwa,” NW] kin ketin kapwungala irail kan me e kin ketin loalloale, duwehte sahm emen eh kin kapwungala nah pwutak me e kin suweiki.” Kaweid nin duwen sahm akan pahn kihong nah seri kan kin kohsang Ipru 12:6-11: “Pwe Kauno [“Siohwa,” NW] kin ketin kapwungala me e kin ketin loalloale . . . Kalokolok koaros likamwete kin kahrehiong kitail nsensuwed, kaidehk peren. Ahpw mwuhr, kalokolok kin kahrehda popohl oh mour pwung ong irail kan me kin ale.” Ahlo me kesempwal ong ale soangen kaiahn me kin kohsang sapwellimen Koht Mahsen.—2 Timoty 3:16, 17.
18. Dahme kitail sukuhliki sang pwuhken Luk irelaud 15 me kin pid koluhla?
18 Siohwa me diren mahk kalahngan oh kadek. (Eksodus 34:6) Ni ahnsou me emen kin kohluhkihla mehlel dihp toutou ehu me e wiahda, Siohwa kin mahkong ih. Nan rahnpwukat, irail me kohluhkihla dihp toutou me re wiahda kin duwehte pwutako nan karasaraso me ntingihdi nan Luk 15:11-32, oh irail kak ale kaiahn en wiahla dahl kan ong doadoahk kesempwal kan. (Luk 15:22-24, 32) Dipatail kan ele mwein sohte toutou duwehte dipen pwutak nan karasaraso. Ahpw ma kitail kin, ni lamalam aktikitik, mwekidki kaweid en Pwuhk Sarawi, e pahn kak kaiahne kitail en wiahla dahl akan ong doadoahk kesempwal kan.
19. Iaduwen kitail kak pousehla papah Siohwa nin duwen dahl akan ong doadoahk kesempwal kan?
19 Ni ahnsou me kitail tepin sukuhliki padahk mehlel, kitail kin ngoangki mweidong Siohwa en kaiahne kitail. Kitail kesehlahr atail tiahk suwed en sampah wet, oh tepida wiahla aramas kapw, oh mwuhr inoukihongehr Koht atail mour oh pepdaislahr. Kitail pil peikiongehr kaweid en Episos 4:20-24 me koasoia, ‘Eri, kumwail kesehla amwail mouren mahs, me kahrehiongkumwailehr nan mour suwedo—amwail mour me kin ohkihla ineng widingan kan. Eri, kumwail pahn onehda sapahl pein kumwail ong ni aramas kapw me wiawihda rasehng Koht, oh me kin kasalehda pein ih ni mour mehlel en pwung oh sarawi.’ Ahpw, ni ahnsouwet, pein emenemen kitail anahne pousehlahte mweidong Siohwa, Sounwia Dahl Lapalap, en kaiahne kitail oh kitail en papah Ih nin duwen dahl akan ong doadoahk kesempwal kan!
Kousapahl
◻ Dahme Sounwia Dahl Lapalap kupwurki duwen atail sampah?
◻ Iaduwen komw kak ale kaiahn ong wia doadoahk kesempwal kan?
◻ Ni ahl dah kei neitail seri kan kak ale kaiahn?
◻ Iaduwen kitail pahn kilangwong kaiahn?
[Kilel nan pali 20]
Komw kin mweidong Koht en kaiahne komwi ong doadoahk kesempwal ehu de soh?
[Kilel nan pali 22]
Me pwulopwul kan kak ale kaiahn sang ni ahnsou me re wia seri pwelel