Dahme Kahrehda Kitail en Kamehlele Sises Krais?

“PIL aramas tohto me kaidehn Kristian kin kamehlele me e wia sounpadahk men me lapalap oh erpit. Ni mehlel e wia emen aramas me keieu kamwekidada mouren aramas tohto.” (The World Book Encyclopedia) Ihs “ih”? Sises Krais, meno me tepiada pelien lamalam en Kristian.

Ahpw, mendahki dahme encyclopedia koasoia, ong aramas rar rar kei nan sahpw kan ni Palimesehn sampah oh wasa teikan, Sises Krais kin wia emen me re sehse, e wiahte ahd ehu me re tamanda sang nan pwuhk en sukuhl kan. Pil nan pelien lamalam en Kristendom, mie sounpadahk oh kaun en pelien lamalam kan me kin koasoia me dene kitail uhdahn sehse ihs me Sises oh kin peikasalki mehlel en rongamwahu pahieuwo me pid ah mour me dierek nan Paipel.

Sounnting en Rongamwahu ko kak likamwkihda koasoipen mouren Sises? Uhdahn soh! Sounpoadoapoad ndando Will Durant, ntingihdi mwurin ah kasawih Rongamwahu ko: “Pwe aramas malaulau kei nan dih ehute en pein wiahda koasoipen irair en emen me manaman oh ile, pahn wia manaman ehu me inenen kapwuriamwei sang mehkan me ntingdi nan Rongamwahuwo. Mwurin sounpar riepwiki en Higher Criticism, mour, irair, oh padahk en Krais, wie sansalte, oh ihme wiahda pali me keieu kapwuriamwei nan poadoapoad en aramas kan ni Palikapi en sampah.”

Ahpw, miehte irail kan me kin soikala Sises Krais pwehki dahme re lemeleme me sapwellime werek kan wiahda. ‘Re kesehdi kinsi pakudang ehu pohn Nagasaki,’ ekei nan Sapahn kin nda. ‘Oh mie Kristian tohto nan Nagasaki sang kahnimw teikan nan Sapahn.’ Ahpw ke kak kapwukoahki toahkte men en emen soumwahu ma soumwahuwo sohte pahn idawehnla kaweid en toahkteo? Aramas tohto me kin kose me irail Kristian kin pohnsowehla kaweid en Sises en powehdi kahpwal kan en tohnsampah. Ahpw, Sises ketikihda wini en kamwahuwiala atail kahpwal kan en ehuehu rahn iangahki kahpwal kan me kin lelohng tohnsampah nan sampah pwon. Ihme kahrehda se luke komwi en wadek artikel en mwuri oh pein kasawihda duwen soahngen ohl dah men Sises.