Iaduwen​—Tepil me kin Wiaiong Kitail en Soumwahuda?

SOUMWAHU SOHTE ANAHNE EN MIE. Koht ketin kapikada kitail en mour kohkohlahte ni roson mwahu unsek. Iei ih, Sehdan, ngehn soh sansalo, me kin kahrehda soumwahu, medek, oh mehla en kaloke peneinei en aramas kan ni ahnsou me e kahrehong tepin atail pahpa oh nohno, Adam oh Ihp, nan dihp.​—SENESIS 3:1-5, 17-19; ROM 5:12.

MET kin wehwehki me soumwahu koaros kin kohsang rehn ngehn soh sansal kan? Nin duwen me kitail tehkehr nan artikel en mwowe, aramas tohto nan rahnwet kin kamehlele duwen met. En kisin Owmadji nohno kahlapo kin kamehlele duwen met. Ahpw en Owmadji mehntango​—soumwahu ehu me ekei pak kin keper ong kisin seri kan nan wasa karakar kan​—uhdahn kohsang rehn ngehn soh sansal kan?

Dahme Sehdan Wia

Paipel kin sapengla peidek wet inenen sansal. Keieu, e kasalehda me ngehnin atail pahpa/nohno kahlap akan me melahr sohte kak lidere me momour kan. Ni ahnsou me aramas mehla, “re sohte ese mehkot.” Sohte ngehnerail me kin momourte mwurin mehla. Re memeir nan sousou, wasa me “sohte pahn mie wiewia, de lamalam, de loalokong, de erpit.” (Eklesiasdes 9:5, 10) Me melahr akan sohte kak kasoumwahuwihada me momour akan!

Ahpw, Paipel kasansalehda me mie ngehn suwed kan. Meno me tepin wiahda uhwongo iei ngehn soh sansal men me adaneki Sehdan. Meteikan iangala ih oh irail uhd adanekihla ngehn saut kan de “demon” (lokaiahn wai) kan. Sehdan oh nah ngehn saut kan kak kahrehda soumwahu? Mie pak me re kahrehda ekei aramas en soumwahuda. Ekei manaman akan me Sises kin ketin doadoahngki pwehn kamwahuwihala me soumwahu kan kin pidada kausesang ngehn saut akan. (Luk 9:37-43; 13:10-16) Ahpw, pali tohtohn soumwahu kan me Sises kamwahuwihala sohte kin tepsang rehn ngehn saut kan. (Madiu 12:15; 14:14; 19:2) Rahnwet, soumwahu kan kin kohsang mwahs akan, kaidehn sang rehn ngehn soh sansal kan.

Iaduwen Sehdan Kin Doadoahk?

Kereniong nan irair koaros, en Sehdan ah kin pidada en aramas soumwahu iei sang ni ire mehlelo me Sehdan kasonge tepin pwopwoudo, oh re pwupwudi nan dihp. Sehdan oh nah ngehn saut kan sohte kin uhdahn kahrehda soumwahu koaros. Ahpw, Sehdan sohte kin uhdisang en kamwekid kitail en wiahda koasoandi kan me sapwung oh kitail en kahmahmkihla atail pwoson, me kakete pil imwikihla kauwehla atail roson mwahu. E sohte doadoahngki akmanaman, kamaramas, de kalokehki Adam oh Ihp soumwahu. E kamehleleiong Ihp en sapeik ong Koht, oh Adam idawehnla oh iangala Ihp sapeik. Imwilahn met iei soumwahu oh mehla.​—Rom 5:19.

En Owmadji nohno kahlap song en kamehleleiong Hawa en doadoahngki mwaramwar oh kapwat kan sang rehn sounwunahni kan pwehn perehdi soumwahu kan. Dahme pahn wiawi ma Hawa pahn peikiong kaweid en ah pwoud ah nohno? E pahn kasalehda me e sohte kin likih unsek Siohwa Koht, oh e solahr koapworopworki me e pahn ketin pere ih.​—Eksodus 20:5; Madiu 4:10; 1 Korint 10:21.

Medemedewe me ngehn soh sansal kan kin uhdahn kahrehda soumwahu koaros me lelohng kitail kin wia lidip ehu. E kin kahrehong kitail en masak ngehn soh sansal kan. Eri, ni ahnsou me kitail kin soumwahuda, kitail anahne en kadohwanweisang kitail ngehn saut akan. Ma Sehdan kak kamasak kitail oh kahrehong kitail en doadoahngki wiepen wiewiahn wunahni kan, met kin wehwehki me kitail kahmahmkihla Koht mehlelo, Siohwa. (2 Korint 6:15) Atail lemmwiki Koht pahn kahluwa kitail, kaidehn atail masak ah Imwintihtio.​—Kaudial 14:7.

Soangsoangen Kahrepe kan me kin Wiahda Soumwahu

Pali moron en aramas akan sohte kin kamehlele ngehn soh sansal kan. Ni ahnsou me re kin soumwahuda, re kin kohla tuhwong toahkte​—ma re kak pwain toahkte oh winio. Ni mehlel, aramas soumwahu men kak kohla tuhwong toahkte ahpw, ekei pak, e sohte pahn mwahula. Toahkte kan sohte kak wiahda manaman kapwuriamwei kan. Ahpw aramas en ketieni tohto me kak mwahula sang arail soumwahu kin tuhwong toahkte en wini ihte ma arail soumwahu doarala. Re pahn song wiepen wini kan me kohsang kosetipw mahs, oh ma wini pwukat sohte kamwahuwihirailla, re pahn uhda kohla rehn toahkte. Me tohto kin mehla mwahl pwehki met.

Meteikan kin pil mehla mwahl pwehki arail sawehwe. Re sehse kilangada kilel me kin kasalehda me re soumwahu oh sehse dahme re pahn wia pwehn irehdi soumwahu. Wehwe de loalokong kin sewese irehdi soumwahu kan me sohte anahne wiawi. Nein nohno kan me kin ese wadawad oh nting neirail seri kan me kin mehkihla soumwahu kin malaulausang nein nohno kan me sehse wadawad oh nting. Ehi, sawehwe kak keper.

Ehu me kin pil kahrehda soumwahu iei soukautih. Karasepe ehu, me tohto kin soumwahuda pwehki re mweidohng kisin kakilis de lohng en kerepseli pohn mwenge kan mwohn re kang mwenge ko de pwehki aramas ko me kaunopada mwengeo sohte wuden pehrail kan mwohn re kaunopada mwenge ko. Me pid pali roson mwahu, e kin pwung lepin kahso me “pweinen ehu oahns en irehdi [soumwahu] iei paun ehu en mwahula.”

Tiahk en mour ehu me pweipwei kahrehdahr me rar kan en soumwahuda oh mehla mwadang. Kamamsakau, nenek, kamwahl, doadoahngki wini suwed kan, oh simwok kauwehlahr roson mwahu en me tohto. Ma aramas men kin wiewia tiahk samin pwukat oh eri soumwahuda, met pwehki aramas mwesehlihdi de ngehn saut me kaloke? Soh. Pein ih me kahrehong en soumwahuda. Ma e pahn kapwukoahki ah soumwahu ngehn saut akan, met kin wehwehki me e sohte men pwukoahki ah tiahk en mour sakanakan.

Mwahula me Poatopoat

Kaidehn en Koht sapwung soumwahu. “Pwe sohte me suwed kot kak kasongosonge Koht, oh pein Koht sohte kin kasongosonge aramas.” (Seims 1:13) Ei, Koht iei limpoak. E kupwurki en sewese kitail, kaidehn en kamedekihkitailla.

Mehlel, Siohwa ketin sapwellimanki wiepen kamwahuwihala soumwahu poatopoat​—sapwellimen Sises pwoula oh iasada. Sang ni kadoadoakpen meirong tomw en Sises, irail me mohngiong pwung kan pahn pwainsapahldo sang arail irair en dihp oh pahn kedekedeo ahnekihla roson mwahu unsek oh mour soutuk nan paradais nin sampah. (Madiu 5:5; Sohn 3:16) Sapwellimen Sises manaman kapwuriamwei kan me e ketin wiahda kin wia mweten kamwahula mehlel me Wehin Koht pahn wahdo. Koht pahn ketikihsang Sehdan oh nah ngehn saut akan. (Rom 16:20) Mehlel, Siohwa sapwellimanki soahng kaselel kan me e ketin nekinekid ong irail ko me kin kasalehda arail pwoson ih. Kitail anahne en kanengamah oh dadaurete.

Nindoken met, Koht kin ketikihda erpit oh kaweid en pali ngehn sang nan Paipel oh pirien en tohnkaudok lelepek kan nan sampah pwon. E kasalehong kitail iaduwen kitail en liksang wiewia samin kan me kin kahrehda soumwahu. Oh e ketikihong kitail pirien mehlel kan me pahn sewese kitail ni ahnsou me kahpwal kan kin pwarada.

Dahme wiawihong Owmadji? Ah nohno tamanda duwen artikel ehu nan makisihn en Awake!, iengen makasihno The Watchtower, me pid duwen wini en mehntang.a E idawehn kaweid kan loale oh wiahda wini wet pwe Owmadji en nim. Ahnsouwet kisin serepeino mwahula oh ahnekiehr roson mwahu.

[Nting tikitik me mi pah]