Irelaud Eisek
Ahnsou me Emen Tohnpeneinei Soumwahu
1, 2. Ia duwen Sehdan eh doadoahngki kahpwal oh soumwahu pwe en kauwehla ahn Sohp lelepek?
SOHP iei emen nanpwungen irail kan me ahneki mouren peneinei nsenamwahu. Paipel mahsanih me “e kepwehpwehsang aramas koaros palimese.” E naineki seri ehk, pwutak isimen oh serepein silimen. E pil kin ahneki kepwe tohto me e kak doadoahngki pwe en apwalih mwahu eh peneinei. Ahpw me keieu kesempwal iei eh kin tiengla mwowe ni soahng kan me pid arail kaudokiong Koht oh kin nsenohki nah seri ko ren ahneki nanpwungmwahu rehn Siohwa. Soahng pwukat koaros kin kahrehda arail peneinei eh kin kerenpene oh nsenamwahu.—Sohp 1:1-5.
2 Sapwellimen Siohwa imwintihti me keieu laud Sehdan, kin mwasamwasahn Sohp. Ahnsou koaros e kin raparapahki dahme e pahn wia pwe en kauwehla lelepek en sapwellimen Koht ladu kan. E uhwongada Sohp ni eh kauwehla mour nsenamwahu en ahn Sohp peneinei. Ih eri “kalokehki Sohp kens suwed ehu wasa koaros ni paliwere.” Sehdan kin medewe me e pahn doadoahngki kahpwal oh soumwahu pwe en kauwehla ahn Sohp lelepek.—Sohp 2:6, 7.
3. Ia mwomwen ahn Sohp soumwahwo?
3 Paipel sohte kin kasalehda eden ahn Sohp soumwahu. Ahpw e kin kasalehda mwomwen eh soumwahwo. Mwahs kadirehla uduke oh kilio, e ohla oh kin mwerasang. Engin ewe oh paliwere pwohsuwedla. Medek kipehdi paliwere pwon. (Sohp 7:5; 19:17; 30:17, 30) Sohp mwohndiong nan pehs nan eh weiweirek oh korokorehdki paliwere kisin diper en dahl ohla ieu. (Sohp 2:8) Uhdahn kompoake!
4. Dahme peneinei koaros kin lelohng ekei pak?
4 Dahme ke pahn wia ma ke lelohng soangen soumwahu laud duwehte met? Rahnpwukat, Sehdan sohte kin kalokehki sapwellimen Koht ladu kan soumwahu me duwehte dahme e wiahiong Sohp. Ahpw pwehki soh unsek, kapwunod en mour en ehuehu rahn oh suwedlahn atail wasahn kousoan, kitail en kasik me ekei pak atail peneinei pahn soumwahuda. Mendahki me malaulaute me kin ahneki soumwahu laud duwehte Sohp, kitail koaros kin soumwahuda. Met kin wiawi mehnda ma kitail kin ale perepen soumwahu. Ni ahnsou me soumwahu kin lelohng atail peneinei, e kak uhdahn apwal. Eri kitail pahn kilang ia duwen Paipel eh kin sewese kitail en kak powehdi imwintihti en aramas me kin mihmi rehtail ahnsou koaros.—Eklesiasdes 9:11; 2 Timoty 3:16.
IA OMW PEPEHM ONG MET?
5. Dahme tohnpeneinei kin wia ni emen eh kin soumwahuda ahnsoukis?
5 Sohte lipilipil dahme kin kahrehda, wekideklahn ahn emen koasoandi ong dahme e kin wia ehuehu rahn kin ahnsou koaros apwal oh met mehlel ma soumwahu werei me kahrehda. Mehnda ma ahn aramaso soumwahu sohte kin werei, peneinei anahne ehupene, tounmetei oh wiahda wekidekla kan. Irail me sohte soumwahu anahne dehr kin katairong pwe me soumwahwo en kommoal. Mwein irail sohla pahn kin wia soahng kei me re kin wiewia. Nan peneinei tohto, seri tikitik kan pil kin poakehla riarail de arail pahpa de nohno me soumwahu, mendahki ekei pak re anahne mehn kataman pwe ren kin kadek lamalam. (Kolose 3:12) Ma emen soumwahuda ahnsoukis, tohnpeneinei kin mwadang apwalihala dahme anahn. Emenemen tohnpeneinei pahn pil kasik me eh peneinei pahn apwalih ih ma e soumwahuda.—Madiu 7:12.
6. Ia mwekid en tohnpeneinei ekei pak ma emen tohnpeneinei kin lelohng soumwahu laud ahnsou werei?
6 Ahpw ia duwen ma soumwahu ehu me uhdahn laud oh me kahrehda wekidekla laud oh pil wiawi ahnsou werei? Karasepe, ia duwen ma emen nan peneinei mwoatorala, de luwetkihla soumwahu en kanser de soumwahu teikan? De ia duwen ma emen tohnpeneinei sahliella? Nin tapio, tohnpeneinei kin poakehla me soumwahwo pwehki eh kin lokolok laud. Ahpw mwuhr mwein arail pepehm kin wekila. Ni ahnsou me tohnpeneinei kin kilangada me ahn aramaso soumwahu kin kahrehda wekidekla kan oh kin sohla arail ahnsoun wia dahme re kin men wia, e kin kahrehda irail en lingeringer. Mwein re kin tepida medewe: “Dahme kahrehda met kin wiawihong ie?”
7. Ia duwen ahn Sohp pwoudo eh mwekidki ahn Sohp soumwahwo, oh dahme e manokehla?
7 Ahn Sohp pwoudo pil kin ahneki soangen madamadauohte. Tamataman me nah seri ko melahr. Ni ahnsou me ehuehu kahpwal pwukat kin pwarada, eh nsensuwed kin uhdahn lalaudla. Oh ni eh kilang eh pwoud me kin kehlail oh pwerisek eh lokolongki soumwahu kasaut oh kamedek ehu, e manokehla ahn ih oh eh pwoud nanpwungmwahu rehn Koht me kin kesempwal sang eh kahpwal laud koaros. Paipel mahsanih: “[Ahn Sohp] pwoudo ahpw kin ndahng, ‘Ia duwe, ke dadaurete nan omw loalopwoatohng Koht? Dahme ke seu lahlahwehki, ke ahpw mehla?’”—Sohp 2:9.
8. Ni ahnsou me emen tohnpeneinei soumwahu laud, mehnia iren Paipel me pahn sewese tohnpeneinei teikan ren kin ahneki madamadau pwung?
8 Me tohto kin nsensuwed de pil lingeringer ahnsou me arail mour kin uhdahn wekila pwehki emen soumwahuda. Ahpw Kristian men me kin medemedewe mwahu duwen irairo pahn kin ese me met iei ahnsou mwahu en kasalehda limpoak mehlel. Limpoak mehlel kin “kanengamah oh kadek; . . . e sohte kin mehwo, . . . Limpoak kin sewesei kitail en loalenohng apwal akan koaros, e kin sewese atail pwoson ahnsou koaros, e kin sewesei kitail en liki Koht, oh en pil kanengamah ni mehkoaros.” (1 Korint 13:4-7) E kesempwal kitail en kin wia uwen atail kak pwe kitail en powehdi atail pepehm sapwung kan, oh dehr mweidohng en kaunkitailda.—Lepin Padahk 3:21.
9. Dahme peneinei ehu kak koapworopworki me pahn sewese arail nanpwungmwahu rehn Koht oh arail pepehm ni ahnsou me emen soumwahuda?
9 Dahme kitail kak wia pwe kitail en pere ahn tohnpeneinei pepehm oh nanpwungmwahu rehn Koht ni ahnsou me emen lelohng soumwahu laud? Mie wiepen apwalih ehuehu soumwahu oh e sohte pahn konehng en kasalehda nan pwuhk wet mehnia wiepe me mwahu. Ahpw Siohwa eh “kin ketin pwekada irail kan me kin pwupwudi,” met kin pid arail nanpwungmwahu reh. (Melkahka 145:14) Nanmwarki Depit ntingihedi: “Meid pai irail kan me kin nsenohki apwalih me semwehmwe kan; KAUN-O pahn ketin sewese irail nan arail apwal. KAUN-O pahn ketin sinsile irail oh kolokol arail mour; . . . KAUN-O pahn ketin sewese irail ni ar pahn soumwahu oh e pahn ketin kakehlairailda.” (Melkahka 41:1-3) Siohwa kin ketin apwahpwalih sapwellime kan pwe ren kin kolokol arail nanpwungmwahu reh, pil ni ahnsou me re kin pahtou laudsang dahme pein irail kakohng. (2 Korint 4:7) Peneinei tohto me emen irail ahneki soumwahu laud kin pwungki dahme sounmelkahkao koasoia: “Maing KAUN, ei lokolok kan me mwuledek; komw ketin kolokol ei mour, nin duwen me komwi ketin inoukidahr.”—Melkahka 119:107.
MADAMADAU ME KAK SAWAS
10, 11. (a) Dahme kin kesempwal pwe peneinei en kak powehdi kahpwal en soumwahu? (b) Dahme lih emen wia pwe en kak apwalih eh pwoud me soumwahwo?
10 Pwuhken Lepin Padahk mahsanih: “Omw ineng en mour kak kakehleiukada ni omw pahn soumwahu, ahpw ma omw ineng en mour pahn sohrala, omw koapworopwor sohralahr.” (Lepin Padahk 18:14) Lokolok kak kamwakid madamadau en peneinei oh pil ahn aramas “ineng en mour.” Ahpw “nan kapehd meleilei kin karosonehda paliwar.” (Lepin Padahk 14:30) Ahn peneinei eh kin powehdi kahpwal en soumwahu laud ehu de soh kin pid laud madamadau oh pepehm en tohnpeneineio.—Pil kilang Lepin Padahk 17:22.
11 Emen lih Kristian kin anahne kanengamah ni eh kilang eh pwoud kin lokolok pwehki eh mwoatorala mwurin ara pwopwoud sounparte weneu. Liho nda: “Ei pwoud sohla kak lokaia mwahu oh se sohte kak koasoipene mwahu. Ei kin song en wehwehki dahme ei pwoud kin nantihong nda kin kihong ie pwunod laud.” Pil medewehla ahn ohlo tihwohla oh lokolok. Dahme ira wia? Mendahki ara kousoan dohsang mwomwohdiso, liho kin wia uwen eh kak pwehn kolokol eh nanpwungmwahu rehn Koht ni eh kin wadek oh onopki ire kapw kan me kohsang sapwellimen Siohwa pwihn oh pil padahk mehlel me kin kohda nan Kahn Iroir oh Awake! (lokaiahn wai). Met kin kakehlaka ih en apwalih eh pwoud me e kin poakohng lao e mehla mwurin sounpar pahieu.
12. Dahme me soumwahu men kin kak sawaski ekei pak duwehte me Sohp wia?
12 Sohp iei me lelohng soumwahu ahpw e kehlail. E idek rehn eh pwoud: “Ahnsou me Koht kin ketikihong kitail mehkot mwahu, kitail kin kapingahki. Ia duwen atail pahn kaulimkihla ma e ketikihong kitail apwal?” (Sohp 2:10) Ihme kahrehda mwuhr tohnpadahk Seims koasoia me Sohp wia mehn kahlemeng mwahu en kanengamah! Seims 5:11 mahsanih: “Kumwail rongehr duwen en Sohp eh kanengamah oh dehdehkilahr duwen ni imwilah Kaun-o eh ketin kupwurehla. Pwe Kaun-o me diren kadek oh kalahngan.” Pil duwehte rahnwet, nan peneinei tohto, ahn me soumwahwo lamalam en eimah kin sewese meteikan nan peneineio ren kin ahneki madamadau pwung.
13. Ma mie me soumwahu nan peneinei, dahme irail en dehr medewe?
13 Me tohto me arail peneinei kin ahneki kahpwal en soumwahu kin pwungki me nin tapio tohnpeneinei kin apwalki wehwehki dahme kin uhdahn wiawi. Re pil kasalehda me mwomwen ahn emen kin kilangwohng irairo me uhdahn kesempwal. Mwein nin tapio re kin apwalki wekideklahn arail koasoandi kan en ehuehu rahn. Ahpw ma emen kin nantihong, e kak ahnla irair kapw wet. Ni atail wia met, e kesempwal kitail en dehr kapahrekihpene atail irair oh ahn meteikan me sohte me soumwahu nan arail peneinei oh dehr medewe me arail mour mwahusang atail oh nda, ‘met sohte pwung!’ Ni mehlel, sohte me uhdahn ese soangen kahpwal dah me ekei kin ahneki. Sapwellimen Sises mahsen kin kangoange Kristian koaros: “Kumwail kohdo rehi, kumwail koaros me pwangadahr oh toutoukilahr amwail mehn wisik kan, I ahpw pahn kommoaleikumwailla.”—Madiu 11:28.
KOASOANEHDI DAHME KEIEU KESEMPWAL
14. Ia duwen peneinei eh kak wiahda pilipil kesempwal kan?
14 Ma mie emen me soumwahu laud nan peneinei, e mwahu irail en tamataman mahsen pwukat: “Ale kaweid koaros uwen me ke kak, ke ahpw pahn pweida.” (Lepin Padahk 15:22) Ia duwe, tohnpeneineio kak kohpene oh koasoia arail irair pwehki mie me soumwahu? E uhdahn pahn konehng ren wia met ni arail kapakap oh peki kaweid sang Mahsen en Koht. (Melkahka 25:4) Dahme re anahne koasoiapene? Re anahne wiahda koasoandi me pid pali en wini, mwohni oh dahme peneinei pahn wia. Ihs me pahn apwalih me soumwahwo? Ia duwen meteikan nan peneineio arail kak sawaskipene doadoahk en apwalih me soumwahwo? Ia duwen koasoandi kan eh kak wekidala ahn emenemen tohnpeneinei koasoandi? Ia duwen ahn me apwalih soumwahwo eh nanpwungmwahu rehn Koht oh eh anahn teikan eh kak epwella?
15. Ia duwen Siohwa eh kin ketin sewese peneinei me emen rehrail ahneki soumwahu laud?
15 Atail kin poadidiong kapakapki sapwellimen Siohwa kaweid, doudouloale sapwellime Mahsen oh ni eimah idawehn dahme Paipel kin kasalehda pahn kin imwikihla kapai kan me laudsang dahme kitail kin kasik. Mwein me soumwahwo sohte pahn mwahula. Ahpw ahnsou koaros e kin imwila mwahu ong tohnpeneinei ma re kin likih Siohwa, sohte lipilipil irair dah me re mi loale. (Melkahka 55:22) Sounmelkahkao ntingihedi: “Maing KAUN, sapwellimomwi limpoak poatopoat me koliehda. Ni ahnsou me I kin pwunodada oh pahtoula, komw kin ketin kansenamwahwihiehla oh kapereniehda.”—Melkahka 94:18, 19; pil kilang Melkahka 63:6-8.
SEWESE SERI KAN
16, 17. Dahme pahpa nohno kak kasalehda ni ara kin koasoiaiong seri tikitik kan me pid duwen ahn riarailo soumwahu?
16 Soumwahu laud nan peneinei kak kahrehiong seri kan kahpwal. E kesempwal pahpa nohno en sewese seri kan ren wehwehki anahn kan me pwarada oh dahme re kak wia pwehn sawas. Ma seri men me soumwahu, pahpa nohno anahne sewese rie ko ren wehwehki me ara kin kihong ahnsou laud pwe ira en apwalih sohte kin wehwehki me ira poakepoake ih laud sang irail. Pwe en dehr mweidala lingeringer oh uhpene en wiawi nanpwungen seri kan, pahpa nohno kak sewese seri teikan ren kerenpene oh limpoakpene ni arail sawaspene apwalihala arail kahpwal pwehki soumwahu.
17 Seri tikitik kan sohte kin nohn mwekidki ahn pahpa nohno ara kin kawehwe reirei duwen soumwahwo. Ahpw re kin mwadang mwekidki ara kin sewese irail en poakehla riarail me soumwahwo. Eri ira kak ekis kawehwehda dahme wiawihong seri soumwahwo. Ma seri teiko wehwehki me soumwahwo irehdihsang serio en wia soahng tohto me irail kak wia ahnsou koaros, irail pahn kak kalaudehla arail “limpoakpene” oh “kadekpene.”—1 Piter 3:8.
18. Ia duwen pahpa nohno ara pahn kin sewese seri laud kan ren kin wehwehki ahn peneinei arail kahpwal? Ia duwen arail kak paiekihda met?
18 Pahpa nohno kin anahne sewese seri laud kan ren wehwehki me kahpwal ehu mie oh tohnpeneinei koaros anahne tounmetei. Pwehki ira anahne pwain toahkte oh pil wini, mwein pahpa nohno sohte kak kihong seri teikan dahme ira men kihong irail. Ia duwe, seri kan pahn uhwong met oh pehm me irail solahr kak ale dahme konehng ren kin ale? De re pahn wehwehki irair en peneinei oh men wiahda tounmetei kan me anahn? Met kin pid laud mwomwen arail kin koasoiapene irairo oh pil arail madamadau ong irairo. Ei, peneinei tohto me mie me soumwahu kin sewese seri kan ren kin idawehn kaweid en Pohl: “Kumwail dehr wia mehkot sang ni amwail ineng en roporop ong pein kumwail de suwei mwahl; ahpw kumwail mpahipene nanpwungamwail, oh dehr wiahki me kumwail mwahusang aramas teikan. Kumwail pohnese ineng mwahu en meteikan, kaidehn amwail kante.”—Pilipai 2:3, 4.
ATAIL MADAMADAU ONG SAWASEPEN WINI
19, 20. (a) Dahme moangen peneinei kan kin pwukoahki ni ahnsou me emen tohnpeneinei kin soumwahuda? (b) Mendahki Paipel kaidehn pwuhk en sawasepen wini ehu, dahme e kin kaweidki duwen apwalih soumwahu?
19 Kristian me ahneki madamadau toupahrek sohte kin sapwungki sawasepen wini ma e sohte kin uhwong kosonned en Koht. Ni ahnsou me emen tohnpeneinei kin soumwahuda, re kin men rapahki sawas pwe ren kamwahwihala de katikala en soumwahwo lokolok. Ahpw epwelpen soumwahu kin wekpeseng oh peneinei anahne tehk kanahieng sawas pwukat. Patehng met, soumwahu kapw kan kin pwarada rahnpwukat oh pali laud sohte wiepe me kak kamwahwihala. Ekei pak, wia keseu pwung pil kin apwal. Eri dahme Kristian men anahne wia?
20 Mendahki emen sounnting en Paipel iei toahkte men oh wahnpoaron Pohl kin kaweidki kompoakepah Timoty eh soumwahu, Paipel kaidehn pwuhk en sawaspen wini ehu. E wia pwuhk me kin kihda kaweid duwen tiahk oh duwen atail kak ahneki nanpwungmwahu rehn Koht. (Kolose 4:14; 1 Timoty 5:23) Ihme kahrehda, moangen peneinei kan anahne wiahda pilipil mwahu me pid sawasepen wini kan. Mwein re pahn medewe me re anahne kaweid sang toahkte tohto. (Pil kilang Lepin Padahk 18:17.) Re pahn uhdahn men ale sawas me keieu mwahu ong arail peneinei me soumwahu oh pali laud en irail kin rapahki sawas rehn toahktehn imwen wini. A ekei kin medewe me e pahn mwahu ren ale sawas sang ekei wasa tohrohr likin imwen wini. Met pil pein arail pilipil. Ahpw ni ahnsou me re kin apwalih soumwahwo, Kristian akan en dehr kin uhdihsang arail wiahki ‘sapwellimen Koht mahsen, sereparail, mehn kaweid irail, oh kamarainpen elerail.’ (Melkahka 119:105) Re kin pousehlahte idawehn kaweid en Paipel. (Aiseia 55:8, 9) Ihme kahrehda re kin liksang wiepen keseu kan me kin pid wunahni oh re pil kin liksang sawas akan me uhwong Paipel.—Melkahka 36:9; Wiewia 15:28, 29; Kaudiahl 21:8.
21, 22. Ia duwen lihen Eisia men eh medemedewe mwahu kaweid en Paipel oh dahme kadehdehda me eh pilipil pwungiong eh irairo?
21 Nna medewehla dahme wiawihong lihen Eisia pwulopwul men. Mwurinte eh tepida sukuhlki Paipel rehn emen Sounkadehdehn Siohwa, e naitikihdi serepein men mwohn eh ahnsoun neitik oh serio paun siluh ons pahieu. Liho uhdahn nsensuwedla ni ahnsou me toahkte ndaiong me serio pahn poakolong oh e sohte pahn kak alu. E pil kaweidki liho en wahla serio nan imwen aramas me mie arail kahpwal en madamadau oh paliwar. Eh pwoudo sohte nohn ese dahme ira anahne wia. Eri, ihs me e pahn peksawas reh?
22 Liho nda: “I tamanda dahme I sukuhlki sang Paipel me ‘seri kan, iei kisakis ehu sang rehn KAUN-O; uhdahn kapai ehu sang reh.’” (Melkahka 127:3) E medewehda en wahla “kisakis” wet ni imweo pwe en pein apwalih. E kin apwal nin tapio, ahpw pwehki sawas sang kompoakepah kan nan mwomwohdisohn Sounkadehdehn Siohwa kan, e kakehr apwalih oh kin kihong serio soangen sawas me e kin anahne. Sounpar eisek riau mwuri, serio kin iang towehda mihting kan nan Wasahn Kaudok en Sounkadehdehn Siohwa kan oh kin perenki werekiong seri teikan wasao. Nohno menet nda: “I uhdahn kalahnganki kaweid en Paipel eh sewese ie pwe I en wia dahme pwung. Paipel kin sewese ie pwe I en kolokol nsenmwakelekel mwohn Siohwa oh sohte koluhkihla dahme I wia. Ma I sohte wia met, I pahn nsensuwedla erein ei mour.”
23. Soangen nsenamwahu dah me Paipel kin ketikihong me soumwahu oh me kin apwalih irail?
23 Soumwahu sohte pahn mihmi kohkohlahte. Soukohp Aiseia kasalehda ahnsou me “sohte emen me kin kousoan nan sahpwo pahn kaulimkihla eh soumwahu.” (Aiseia 33:24) Inou wet pahn pweida nan sampah kapw me kerekerendohr. Ahpw lao lel ahnsowo, mehla oh soumwahu pahn kin ieiang kitail. Mahsen en Koht kin ketikihong kitail kaweid oh sawas. Koasoandi kan ong tiahk mwahu me Paipel ketikihda kin poatopoat oh e siklahsang madamadau en aramas soh unsek me kin wekiwekin. Ihme kahrehda aramas erpit men pahn pwungki dahme sounmelkahkao ntingihedi: “Kosonned en KAUN-O me unsek mehlel; e kin pwurehng kakehlahda aramas. Mahsen en KAUN-O me likilik, e kin kaloalokongihala me soaloalokong kan. . . . Kopwung en KAUN-O me pwung, e kin pahrek ahnsou koaros. . . . I kin ale ketingpen ei kin peikiong sapwellimomwi mahsen kan.”—Melkahka 19:7, 9, 11.
IA DUWEN IRE MEHLEL EN PAIPEL PWUKAT EH KAK SEWESE . . . PENEINEI EN APWALIH SOUMWAHU LAUD OH KAHPWAL ME KIN KOHSANG MET?
Limpoak kin kanengamah oh kin sewesei kitail en loalenohng mehkoaros.—1 Korint 13:4-7.
E kesempwal en kakairada madamadau oh pepehm mwahu.—Lepin Padahk 18:14.
E mwahu en rapahki kaweid mwohn pilipil kesempwal kan ar pahn wiawihda.—Lepin Padahk 15:22.
Siohwa kin ketikihong kitail sawas ni ahnsou me kitail kin mihla nan kahpwal.—Melkahka 55:22.
Sapwellimen Siohwa Mahsen iei mehn kaweid ni soangen irair koaros.—Melkahka 119:105.
[Kilel nan pali 137]
Kristian kan kin kasalehda arail limpoak laud ni ahnsou me arail pwoud kin soumwahu
[Kilel nan pali 145]
Ahnsou me peneinei kin sawaspene, kahpwal kan kak epwella