Wiahla Sounwadawas Peren Kan En Pwuhken Kaudiahl

“Meid pai aramas me kin lohki audepen pwuhk wet, oh irail koaros me kin iang rong mahsen kan en kokohp wet oh kin kapwaiada!”—KAUDIAHL 1:3.

1. Wahnpoaron Sohn mih nan soangen irair dahieu ni ahnsou me e ntingihdi pwuhken Kaudiahl, oh kahrepe dahieu kasansal pwukat ntingdier?

“IET ngehi Sohn, . . . I wisikdohnger ni deke me adaneki Padmos, pwehki ei kapahrengki mahsen en Koht oh wiewiahier doadoahk en sounkadehdehn Sises.” (Kaudiahl 1:9) Met iei irair me wahnpoaron Sohn mihmi loale ni ahnsou me e ntingihdi pwuhken Apocalypse de Kaudiahl. Aramas lemeleme me e kalipilipla Padmos erein kaundahn Nanmwarki en Rom, Domitian (81-96 C.E.), oh nanmwarki menet kin utungada kaudok en nanmwarki oh tepida kaloke Kristian akan. Ni ahnsou me Sohn mihmi nan Padmos, e alehda kasansal tohto me e ntingihdi. E koasoiaiong Kristian akan duwen kasansal pwukat, kaidehn pwehn kamasepwehki irail, ahpw en kakehle, kamweitala, oh kangoange irail, pwe re kin lelohng kasongosong kan ahnsowo oh re pahn pil lelohng kasongosong kan ni ahnsou kohkohdo.​—Wiewia 28:22; Kaudiahl 1:4; 2:3, 9, 10, 13.

2. Dahme kahrehda Kristian akan nan rahnpwukat kin kesempwalki en ese duwen irairo me Sohn oh ienge Kristian akan lelohng?

² Irair akan me sounnting menet kin lelohng ni ahnsou me e ntingihdi pwuhk wet nan Paipel kin wia mehn kasukuhl kesempwal ong Kristian akan nan rahnpwukat. Sohn kin lelohng kalokolok pwehki ih emen sounkadehdehn Siohwa oh sapwellime Ohl, Krais Sises. Ahpw, mendahki Sohn oh ienge Kristian akan kin nantihong en wia tohnwehi mwahu kei, re sohte kin kaudokiong nanmwarki oh ihme kahrehda aramas teikan kin uhwong irail. (Luk 4:8) Rahnwet, nan ekei wehi kan, Kristian mehlel akan kin pil mihmi nan soangen irairohte, me Wehio kin lemehda me irail me ahneki pwung en padahkiong aramas en idawehnla padahk en pelien lamalam me Wehio pilada. Ia uwen kansenamwahu mahsen ako me dierekda nan keieun irelaud en pwuhken Kaudiahl: “Meid pai aramas me kin lohki audepen pwuhk wet, oh irail koaros me kin iang rong mahsen kan en kokohp wet oh kin kapwaiada! Pwe ahnsoun eh pahn pweida kerendohr.” (Kaudiahl 1:3) Ei, aramas akan me kin wadek pwuhken Kaudiahl ni ahr kin rong kanahieng oh peikiong kaweid me mihmi loale pahn kak diarada peren mehlel oh kapai tohto.

3. Ihs me Utupen pwuhken Kaudiahl me kohwong Sohn?

³ Ihs me Utupen pwuhken Kaudiahl, oh E kin doadoahngki ihs en ketikihong aramas akan pwuhk wet? Tepin iretikitik en pwuhken Kaudiahl mahsanih: “Audepen pwuhk wet, iei mehkan me Sises Krais ketin kasalehdahr. Koht ketikihong Krais mepwukat pwe en ketin kasalehiong sapwellimen Koht ladu kan soahng kan me pahn wiawi mwadang mwurin ahnsoukis. Krais kasalehiong mepwukat sapwellime ladu Sohn, ni eh ketin poaronedohng tohnleng men.” (Kaudiahl 1:1) Met wehwehki me pwuhken Kaudiahl kin kohsang rehn Siohwa Koht, oh Ih me ketikihong Sises, oh Sises kawehwe ong Sohn ni eh poaronehdohng tohnleng men. Oh ma kitail pahn tehk mwahu, Sises pil doadoahngki Ngehn Sarawi en kawehwe ong mwomwohdiso kan rong pwukat oh ketikihong Sohn kasansal kan.​—Kaudiahl 2:7, 11, 17, 29; 3:6, 13, 22; 4:2; 17:3; 21:10; pil kilang Wiewia 2:33.

4. Dahme Siohwa kin doadoahngki pwehn kahluwa sapwellime aramas akan nin sampah?

⁴ Ni ahnsou wet, Siohwa pil kin doadoahngki sapwellime Ohl, “tapwin mwomwohdiso,” pwehn padahk ong sapwellime ladu kan nin sampah. (Episos 5:23; Aiseia 54:13; Sohn 6:45) Siohwa pil kin doadoahngki sapwellime Ngehn Sarawi en kaweidih sapwellime aramas akan. (Sohn 15:26; 1 Korint 2:10) Nin duwen Sises doadoahngki “sapwellime ladu Sohn” en kihong mwomwohdiso kan nan keieun senturi mwengen ngehn, eri, nan rahnpwukat, e pil kin doadoahngki pwihn en “ladu lelepek oh loalokong,” me wiawikihda ienge “brother” me keidi kan, pwehn ketikihong kise kan oh iengarail kan “kanarail kisin mwenge ahnsou me konehng.” (Madiu 24:45-47; 25:40) Meid pai irail akan me kin pohnese ihs me kin kihong irail ‘kisakis mwahu koaros’ me kitail kin alehdi duwehte mwengen ngehn oh ahlo me e ketin doadoahngki pwehn kihong kitail kanatail mwenge ni pali ngehn.​—Seims 1:17.

Mwomwohdiso kan me kin Ale Kaweid Sang Rehn Krais

5. (a) Mwomwohdiso en Kristian akan oh arail sounapwalih kan kin rasehng dah? (b) Edetehn kitail aramas soh unsek kei, dahme pahn kak kalaudehla atail peren?

⁵ Nan irelaud 1 oh 2 en pwuhken Kaudiahl, mwomwohdiso en Kristian akan kin rasehng dewen lamp kan. Arail sounapwalih kan kin rasehng tohnleng kan (sounpakair kan) oh usu kan. (Kaudiahl 1:20)a Krais kin mahsanih duwen pein ih ni en e padahkiong Sohn en ntingihdi met: “Iet mahsen sang ih me kin kolokol nin lime pali maun usu isuhwo, me kin ketseli nanpwungen dewen lamp kohl isuhwo.” (Kaudiahl 2:1) Rohng isuhwo me pekederalahng mwomwohdiso isuhwo nan Eisia kin kasalehda me nan keieun senturi C.E., mie en mwomwohdiso kan oh arail elder kan arail irair kaselel kan oh pil arail luwet kan. Met pahn duwehte nan atail ahnsou. Ahpw, kitail pahn kak kalaudehla atail peren ma kitail sohte pahn manokela me Krais, me kin wia atail Tapwi, kin mih nanpwungen mwomwohdiso kan. E ketin mwangih dahme kin wiawi. Irail sounapwalih kan kin ni karasaras mih “nin lime palimaun,” oh met wehwehki me irail sounapwalih kan kin mih pahn manaman oh kaweidpen Krais oh irail anahne sapeng ong ih iaduwen re kin apwalih mwomwohdiso kan.​—Wiewia 20:28; Ipru 13:17.

6. Dahme kin kasalehda me kaidehn ihte sounapwalih en mwomwohdiso kan kin anahne sapeng ong Krais?

⁶ Ahpw, kitail pahn pitih pein kitail ma kitail kin lemeleme me ihte irail sounapwalih en mwomwohdiso kan pahn anahne sapeng ong Krais arail wiewia kan. Nan ehu sapwellime padahk, Krais mahsanih: “Mwomwohdiso kan koaros ahpw pahn esehkihla me iei ngehi ih me kin iroirong nan kapehd en aramas akan oh ar lamalam akan, oh me kin katingih emen emen kumwail nin duwen eh wiewia kan.” (Kaudiahl 2:23) E wia mehn kalekekin kitail oh pil ni ahnsowohte mehn kangoangpatail​—e wia mehn kalekekin kitail pwehki Krais mwahngih wasa rir en nan atail lamalam oh e wia mehn kangoangpatail pwe Krais mwahngih atail doadoahk oh e pahn kapaikitailda ma kitail wia uwen me kitail kak.​—Mark 14:6-9; Luk 21:3, 4.

7. Iaduwen Kristian akan nan Piladelpia kin ‘kapwaiadahr sapwellimen Sises padahk en kanengamah’?

⁷ Sapwellimen Krais mahsen ong mwomwohdiso nan kahnimw en Piladelpia, sohte mahsen en kadeik mie loale, ahpw e kihda inou ehu me pahn wia kangoang laud ong kitail. “Pwehki omw kapwaiadahr ei padahk en kanengamah ni ahnsou apwal, I pahn pil silehsang uhk apwal en songosong kan me pahn lelohng sampah pwon pwe en song tohnsampah kan koaros.” (Kaudiahl 3:10) Ni lokaiahn Krihk ong “kapwaiadahr ei padahk en kanengamah” pil kak wehwehki “kapwaiadahr dahme I mahsanih duwen kanengamah.” Iretikitik 8 kin kawehwehda me irail Kristian akan nan Piladelpia sohte kin ihte kapwaiada sapwellimen Krais kosonned akan, ahpw re kin pil peikiong sapwellime kaweid kan en kanengamah ni lelepek.​—Madiu 10:22; Luk 21:19.

8. (a) Inou dahieu me Sises wiaiong Kristian akan nan Piladelpia? (b) Ihs irail me kin lelohng “apwal en songosong”?

⁸ Sises kapataiong me e pahn silehsang irail “apwal en songosong kan.” Kitail sohte wehwehki ia wehwehn met ong irail Kristian akan ni ahnsowo. Mendahki mie ahnsou mwotomwot ehu me kalokolok sohte wiawi mwurin mehlahn Domitian nan pahr 96 C.E., kalokolok kan pil pwurehng tepida pahn kaundahn Trajan (98-117 C.E.), met kin wia kasongsong laud kan ong irail. Ahpw, “apwal en songosong kan” me keieu laud kin wiawi ni “rahnen Kauno” erein “imwin ahnsou,” iei nan atail ahnsou. (Kaudiahl 1:10; Daniel 12:4) Irail Kristian me keidi kan lelohngehr kasongosong laud ni ahnsoun Mahwen Keieu en Sampah wiawi oh pil mwurinte mahweno. Ahpw, “apwal en songosong” kin mihmihte ni ahnsouwet. Oh met kin pidada “tohnsampah pwon,” iangahki aramas rar kei me wiawihkihda pwihn en pokon kalaimwun, me koapworopworki en pitsang kahn kamakam kohwalap. (Kaudiahl 3:10; 7:9, 14) Kitail pahn peren ma kitail pahn ‘kapwaiada dahme Sises mahsanih duwen kanengamah,’ e mahsanih met: “Ahpw me pahn dadaurete lel ni imwi, ihme pahn mourla.”​—Madiu 24:13.

Uhpaiong Sapwellimen Siohwa Kaunda ni Peren

9, 10. (a) Ni ahl dah kei kasansal en sapwellimen Siohwa mwoahl kamwekidada kitail? (b) Iaduwen atail pahn kin wadek pwuhken Kaudiahl pahn kalaudehla atail peren kan?

⁹ Kasansal me pid mwoalen Siohwa oh sapwellime tohnleng kan me mih nan irelaud 4 oh 5 en pwuhken Kaudiahl pahn wiaiong kitail en pwuriamweikihla. Kitail kin mwekidki kaping kan me kohsang nan kapehd en irail tohnleng kan nin duwen irail kin uhpaiong sapwellimen Siohwa kaunda pwung ni peren. (Kaudiahl 4:8-11) Ngilatail pil kak iang ngilen irail akan me kin nda: “Kaping oh wahu, lingan oh roson, ong me ketiket nan mwoale oh ong Sihmpwulo, erein dih koaros kohkohlahte.”​—Kaudiahl 5:13.

¹⁰ Ni ahl me katepe laud, met kin wehwehki me kitail pahn uhpaiong kupwuren Siohwa ni peren ni soahng koaros me kitail kin wia. Wahpoaron Pohl ntingihdi: “Eri, soahng koaros me kumwail pahn kin wia de nda, en wiawi ni mwaren Kaun Sises, oh kumwail en pil kapikapinga Koht Sahm ni mwaren Sises.” (Kolose 3:17) Atail kin wadewadek pwuhken Kaudiahl pahn kahrehong kitail en ahneki peren mehlel ma kitail, sang nan loalatail, kin pohnese sapwellimen Siohwa kaunda oh wia kupwuren Koht ni soahng koaros me kitail pahn wia nan atail mour.

11, 12. (a) Iaduwen ahn Sehdan koasoandi nin sampah pahn ohla? (b) Nin duwen pwuhken Kaudiahl irelaud 7, ihs irail akan me pahn “kesinenda” ni ahnsowo?

¹¹ En perenki uhpaiong sapwellimen Siohwa kaunda kin wia poahsoanpen atail peren oh pil peren en koaros nanleng oh sampah. Ni ahnsou keren, lapalahn rerrer en sahpw ni karasaras pahn wiawiong koasoandi en Sehdan nin sampah oh kasohrehla koasoandi wet. Sohte wasahn ruk ong irail aramas akan me kin kahng uhpaiong koperment en Wehin Krais Nanleng, me kin wehwehki sapwellimen Koht kaunda pwung. Kokohp en Kaudiahl kin kasalehda me: “Nanmwarkien sampah kan, kaun akan, oh lapalap akan, me kepwehpwe oh me manaman akan oh pil aramas teikan koaros, lidu oh maiauda kan, re rukala nan pwoaren paip oh pahn paip akan pohn nahna kan. Re ahpw weringki nahna oh paip akan, nda, “Kumwail pwupwudiong poht oh pereikitasang silangin me ketiket nan mwoahlo, oh sang ni engieng en Sihmpwulo! Pwe rahn lapalap en ara engieng e lelehr oh ihs me pahn kak pelianirahda?”​—Kaudiahl 6:12, 15-17, New World Translation.

¹² Nan irelaud en mwuhr me koasoia duwen peidek wet, ni en wahnpoaron Sohn kawehwehda duwen irail akan me wiawihkihda pokon kalaimwun me pitsang kahn kamakam kohwalap, nin duwen irail me kin “uh mwohn mwoahlo oh mwohn Sihmpwulo.” (Kaudiahl 7:9, 14, 15) Ahr kin uh mwohn mwoahlen Koht kin kasansalehda me re kin pohnese mwoahlo oh uhpaiong sapwellimen Siohwa kaunda. Ihme re kin pwunglahr rehn Koht.

13. (a) Dahme pali moron en tohnsampah kin kaudokiong, oh ia wehwehn kilel kan nin temwarail kan oh ni pehrail kan? (b) Eri, dahme kahrehda irair en dadaur me kesempwal?

¹³ Ni pali teio, irelaud 13 kasansalehda tohnsampah teikan me kin kaudokiong koasoandi en politik kan en Sehdan, me rasehng mahn lawalo. Re kin kilelkihdi nin “temwarail kan” de ni “pehrail” kilel ehu oh met kin kasalehda me irail kin utungada koasoandi en Sehdan ni ahr madamadau kan oh doadoahk kan. (Kaudiahl 13:1-8, 16, 17) Mwurin mwo, nan irelaud 14, e kapataiong met: “Mehmen me pahn pwongih mahno oh dikediko, oh ale kilele ni temwe de ni peh, e pahn pein ale oh tungoalehda sapwellimen Koht wain, iei sapwellime engieng, me e ketin wudekihdiong oh kanekediongehr nan delen sapwellime engieng . . . Iei met me kahrehda sapwellimen Koht aramas akan re en kin kanengamahiong apwal akan, irail kan me kin apwahpwalih kosonned en Koht oh loalopwoatohng Sises.” (Kaudiahl 14:9, 10, 12) Ni ahnsou kan a pahn doudoula mwowe, peidek wet pahn wia mehkot kesempwal me pahn nda: Ihs me ahmw utuht kin kohwong? Siohwa oh sapwellime kaunda de koasoandi en politik kan me sohte kamehlele Koht oh me karasaiong mahn lawalo? Meid pai irail akan me pahn liksang kilelkihdi kilel en mahn lawalo oh irail akan me pahn ni lelepek dadaurete ni arail kin uhpaiong sapwellimen Siohwa kaunda.

14, 15. Kaweid dahieu me katokehdi kawehwehpen Armakedon nan pwuhken Kaudiahl, oh ia wehwehn met ong kitail?

¹⁴ Irail kaun en sampah kan, irail doudoulahng nan irair ehu me irail pahn pelianda Siohwa ong ireo me pidada ihs me ahneki pwung en kaunda en lahng oh sampah. Met pahn wiawi ni Armakedon, “Rahn Lapalap en Koht, Wasa Lapalahpie.” (Kaudiahl 16:14, 16) Ehu ire me inenen kapwuriamwei kin pwarada nanpwungen iretikitik kan me kin kawehwe duwen kohpenehn kaun en sampah kan oh arail mahweniong Siohwa. Pein Sises pwarada nan lukopen kasansal wet oh mahsanih: “Kumwail mwasahn, pwe I pahn kohdo duwehte lipirap emen. Meid pai me kin pepehd oh mwasamwasahn, oh kin apwalih eh likou kan pwe en dehr kin kilisou kohkohseli oh namenekla mwohn aramas akan!” (Kaudiahl 16:15) Mahsen wet kak pid irail mehn Lipai kan me wia sounsilepen Tehnpas Sarawio, ahpw ma re memeir ni ahnsoun ahr kin wia ahr doadoahk en silasil, ahr likou kan pahn kohsang irail oh re pahn namenekla mwohn aramas akan.

¹⁵ Padahk wet inenen sansal: Ma kitail men pitsang Armakedon, kitail anahne en pepehd ni pali ngehn oh doadoahngkihte atail likou ni karasaras me kin kasansalehda me kitail wia Sounkadehde lelepek kan en Siohwa Koht. Kitail pahn ahneki peren mehlel ma kitail pahn liksang wiahla aramas dangahnga ni pali ngehn, oh sohla uhdisang ngoangki kalohki “rongamwahu poatopoat” en sapwellimen Koht Wehi me tepida kakaun.​—Kaudiahl 14:6.

‘Meid Pai Irail Akan Me Kin Kesempwalki Mahsen Pwukat’

16. Dahme kahrehda kaimwiseklahn irelaud kan nan pwuhken Kaudiahl kak kihong kitail peren?

¹⁶ Sounwadawad peren kan en pwuhken Kaudiahl pahn perenkihda wadek irelaud kan nan kaimwiseklahn pwuhken Kaudiahl me kin kasalehda duwen atail koapworopwor lingan ehu​—nanleng kapw oh sampah kapw, met wehwehki Wehin nanleng pwung ehu me pahn kaunda tohnsampah mwakelekel kan, oh kapinga “Siohwa Koht, Wasa Lapalahpie.” (Kaudiahl 21:22) Ni ahnsou me kasansal kaselel pwukat kaimwisekla, tohnlengo mahsanihong Sohn: “Mahsen pwukat me ke ntingihedier me uhdahn mehlel oh uhdahn pahn pweida. Kauno [“Siohwa,” NW] Koht, me kin ketin audehkihda soukohp akan Ngene, ketin poaronedohr sapwellime tohnleng pwe en patohwanohng sapwellime ladu kan dahme pahn wiawi ahnsou keren. Eri, I pahn mwadang leledo! Meid pai irail kan me kin kesempwalki oh apwalih kokohp kan en nan pwuhk wet!”​—Kaudiahl 22:6, 7.

17. (a) Kamehlele dahieu me kohsang pwuhken Kaudiahl 22:6? (b) Dahme kitail en liksang?

¹⁷ Sounwadawad peren kan en pwuhken Kaudiahl pahn tamanda me mahsen pwukat kin duwehte mahsen kan ni tepin “pwuhk wet.” (Kaudiahl 1:1, 3) Mahsen pwukat kin kamehlelehong kitail me “mehkoaros” me kokohpadahr nan pwuhken Kaudiahl, me wia kaimwiseklahn Pwuhk Sarawi, pahn “wiawi ni ahnsou keren.” Kitail kin mihmi ni imwin rahn akan, eri wiewia kan me kokohpadahr nan Kaudiahl pahn uhdahn pweida ni ahnsou keren. Ihme kahrehda, edetehn ahn Sehdan koasoandi kin mwomwen kehlail ni ahnsouwet, kitail en dehr memeir ni pali ngehn. Irail akan me kin wadek pwuhken Kaudiahl me kin pepehd pahn tamanda kaweid kan me kohwong mwomwohdiso isuh nan Eisia, oh irail pahn liksang lidip kan en noahrok mwohni de dipwisou kan, dikedik en eni kan, dipen nenek, soukautih, oh lahlahwe padahk mehlel.

18, 19. (a) Dahme kahrehda Sises anahne kohdo, oh Sohn koasoi duwen koapworopwor dahieu me kitail ahneki? (b) Ia kahrepe Siohwa pahn “kohdo”?

¹⁸ Nan pwuhken Kaudiahl, Sises pakairki pak tohto: “I pahn mwadang leledo.” (Kaudiahl 2:16; 3:11; 22:7, 20a) E pahn kohdo ni ah pahn kadeikada Papilon Lapalap, ahn Sehdan koasoandi en politik kan, oh aramas koaros me kin kahng uhpaiong sapwellimen Siohwa kaunda (sapwellimen Siohwa kaunda kin pid Wehin Mesaia ahnsou wet). Kitail kin kapataiong ngilatail kan ngilen wahnpoaron Sohn me mahsanih: “Amen! Kaun Sises, komw ketidohla!”​—Kaudiahl 22:20b, NW.

¹⁹ Siohwa mahsanih: “Kumwail rong! I pahn mwadang leledo. I pahn wa kohwei pwais me I pahn kihong emenemen nin duwen eh wiewia kan.” (Kaudiahl 22:12) Ni atail pahn awiawih kating lingan ehu en mour soutuk nin duwen pwihn me pahn iang “nanleng kapw” de “sampah kapw,” kitail pahn ngoangki iang doadoahk ehu en luhke aramas mehlel kan koaros: “‘Kohdo!’ Mehmen me men nimpildahr en kohdo; en ale pilen komour nin duwen kisakis ehu, mehmen me men ale, en ale.” (Kaudiahl 22:17) Ele mwein irail pil pahn wiahla sounwadawad peren kei en pwuhk kaselel en Kaudiahl!

[Nting tikitik me mi pah]

Ire Kesempwal kan ong Kousapahl

◻ Ihs me Siohwa doadoahngki ong kasansalehda pwuhken Kaudiahl, oh dahme kitail kak sukuhliki sang met?

◻ Dahme kahrehda kitail anahne perenkihda wadek mehn kasukuhl kan me pekederalahng mwomwohdiso isuh nan Eisia?

◻ Iaduwen kitail kak doarehla atail mour erein “ahnsoun kalokolok kan”?

◻ Soangen peren dah me pahn wia atail ma kitail pahn kapwaiada audepen kokohp me mihmi nan pwuhken Kaudiahl?

[Kilel nan Pali 25]

Meid pai irail akan me kin pohnese Utupen Rongamwahuwo

[Kilel nan Pali 28]

Meid pai mehmen me kin pepehd