Dahme Ke Kin Wehwehki Duwen Wunahni?

WUNAHNI! Dahme lepin lokaia wet kin katamankihong uhk?

Ong me tohto, wunahni kin wia ketieni oh soai likamw kan, mehn mwadongte. Ong irail, wunahni ihte soai likamw kan​—duwen lih laud kersuwed me tepin weren arail likouli kin uhdahla ni kepin paiki oh me kin doalohng nan arail ketel en suhp pehnpihr en pwehk, oh kak kawekihong aramas en wiahla kairu, oh kin pihrda nan ni pwong kan pohn kepennok ni ahr kin kouruhr ni mwomwen widing.

Ong meteikan, wunahni kaidehn mehn mwadong ehu. Ekei sounroporop kan koasoia me elep en tohnsampah kin kamehlele me mie sounwunahni oh re kak kamwekidih mouren mehteikan. Aramas rar kan kin kamehlele me wunahni me suwed, keper, oh kitail en uhdahn masak. Karasepe ehu, ehu pwuhk me kin koasoia duwen pelien lamalam en mehn Aperika koasoia: “Kamehlele wiewia oh keper kan en akmanaman suwed, kosetipw oh wunahni kin inenen teng nan mouren mehn Aperika. . . . Aramas kan kin kailongki sounwunahni kan oh sounkosetipw. Pil lao lel rahnwet mie wasa kan oh ahnsou kan me aramas kin keme irail lao re kemehirailla.”

Ahpw, nan sahpw kan en United States, aramas kin mwomwen waunekihla wunahni. Pwuhk kan, T.V., oh kasdo kan kin katikitikihla en aramas masak wunahni. Emen ohl me adaneki David Davis me kin kasawih mehn kamweit kan koasoia: “Nan rahnpwukat, sounwunahni kan kin pwulupwul oh kaselel. Hollywood kin samanihla alehda wiewia pwukat. . . . Ni ahr kin kasalehda sounwunahni kan me mesamwahu oh aramas kin poakpoake irail, aramas tohto me kin kilang kasdohn irail kin uhd perenki met, iangahki lih kan oh kisin seri kan.” Hollywood kin ese iaduwen ren wiakihla tiahk wet ong en wiahda mwohni.”

Ekei kin koasoia me wunahni kin wie mwomwen irair en pali ngehn ehu me kin wie kekeirada mwadang nan United States. Nan sahpw semwehmwe kan, aramas tohto, me kin mwekidiki irail kan me kin utungada lih kan me dene re ahneki pwung duwehte ohl akan oh irail akan me kin sohla pwungki pelien kaudok laud kan, kin rapahki arail irair en pali ngehn kan ni wunahni. Ni mehlel, mie soangen mwomwen wunahni tohto me kahrehda en aramas akan ahr kin kawehwehda lepin lokaia wet “wunahni” sohte kin pahrekpene. Ahpw, irail kan me dene irail sounwunahni kei kin kalap adaneki Wicca​—me ehu dikseneri kawehwe me iei “pelien lamalam en ‘pagan’ me tepsang mwohn Kristian kan nan western Iurop oh e pil pwurehng sapahldo nan senturi 20.”a Kedekedeo, me tohto kin kahdanekin pein irail “pagans” de “neopagans.”

Erein poadoapoad, aramas kin kailongki sounwunahni kan oh kin kaloke irail, oh kemehirailla. Ihme, e sohte kapwuriamwei me sounwunahni kan en rahnpwukat kin men kamwahuwihla mwomwerail. Nan ehu roporop, peidek wiawihong irail sounwunahni tohto duwen dahme re keieu men kasalehong wehipokon duwen irail. Arail pasapeng, me sounroporop Margot Adler oaralapihada, iei: “Se sohte suwed. Se sohte kin kaudokiong Tepil. Se sohte kin kamedekihala aramas de pitih irail. Se sohte keper. Se wia aramas duwehte kumwail. Mie at peneinei, at doadoahk, koapworopwor, oh soahng kan me se kin kasikasik. Kaidehn kiht “cult” ehu. Se sohte weksang meteikan. . . . Kumwail sohte anahne en masak kiht. . . . Se uhdahn duwehte kumwail laud sang dahme kumwail kin kihkihong.”

Aramas tohto kin pwungkihla ire wet. Ahpw met kin wehwehki me sohte kahrepen kitail en tehk duwen tiahk en wunahni? Kitail en tehk peidek wet nan artikel en mwuhr.

[Nting tikitik me mi pah]