Dahme Ke Anahne Ese Duwen Wunahni

WUNAHNI en rahnwet kin apwal en kawehwehda. Met pwehki irail ko me kin wia tiahk en wunahni kin wekpeseng wiepen arail wia tiahk wet. Sohte manaman ehu de padahk ehu de pwuhk sarawi ehu me kin kaminiminipene arail kamehlele kan. Arail tiahk, koasoandi en pwihn, oh tiahk sarawi kan, oh madamadau ong ihs koht me ren kawauwih pil wekpeseng. Emen sounnting koasoia: “Pelien wunahni kin kihong aramas akan duwehte ‘wasahn saledek’ en tehk madamadau sohte lipilipil.” Emen koasoia: “Pali moron en ‘Neo-Pagans’ kin sapwungkihpene kereniong soahng koaros.”

Ong me tohto, arail sapwungkipene soahng kan kaidehn kahpwal ehu. Ehu pwuhken kaweid ong irail sounwunahni kan koasoai: “Ma ke lelohng kahpwal ehu me ke sehse mehnia me pwung, kasawih ire wet oh wiahda pilipil ong mehnia en idawehn. Rong omw pepehm. De, saledek en pilada nanpwungen tiahk en wunahni kan me ntingdi oh pwuhk en wunahni pwehn pilada dahme komw pehm me pwung.”

Ong irail ko me pohnese duwen irair en mehlel, wekpeseng pwukat kin wia kahpwal ehu. Me mehlelo uhdahn kin mehlel. Soahng kan sohte kin mehlel ihte pwehki aramas men pehm de koapworopworki de kamehlele me e mehlel. Karasepe ehu, mie ahnsou ehu me toahkte kan kin kamehlele me re kak kamwahuwihla soumwahu en “pneumonia” (ngolungol wisekesek) ni ahr pahn lekepeseng emen malek me momour wiahda pali riau oh pwilikihdiohng pohn mwaremwaren me soumwahuwo. Ni mehlel, me soumwahu tohto kin uhdahn kamehlele me wiepen wini wet kak kamwahuwihirailla. Ahpw, arail kamehlele kan, oh koapworopwor, sohte kin pwungohng ire mehlelo​—me soangen wiepen wini wet sohte kak kamwahuwihla soumwahu en “pneumonia.” Aramas sohte kin wiahda mehlel; re kin nantihong pwehn wehwehkihla.

Paipel kin audaudki me mehlelo me pid soahng ngehnin kan. Sises Krais, ni ahnsou me e ketiket pohn sampah, patohwanong Seme ni kapakap: “Sapwellimomwi mahsen, iei me mehlel.” (Sohn 17:17) Wahnpoaron Pohl ntingihdi: “Audepen Pwuhk Sarawi unsek pwilisang rehn Koht.” (2 Timoty 3:16) Me tohto me kin wia tiahk en wunahni sohte kin pwungki met. Ahpw, re kin uhd rapahki ngehn sarawi oh kaweid sang ni soai kan, kaudok en mahs akan, oh pil soai en palien sains. Eri, e soh konehng en tehk dahme Paipel mahsanih? Pwehki, kereniong aramas koaros nan sampah kin wiahki me pwuhk wet pwuhk sarawi ehu. E pil wia pwuhk en sarawi ehu me keieu mering me mihmihte sangete mahs lelodo rahnwet. Paipel ntingda erein sounpar 1,600, ahpw padahk kan me kin mihmi loale sohte kin uhpene. Kitail en kapahrekihong padahk kan en Paipel ong ekei padahk kan me irail kan me kin utungada wunahni kin kamehlele.

Ihs me Koukousoan nan Wasahn Ngehn kan?

Peidek ehu me pidada rapahki wehwehn pali ngehn iei met, Ihs me kin kousoan nan wasahn ngehn kan? Ekei sounwunahni en ahnsouwet kin wiahki wunahni mwomwen kaudok ehu me pid pein sapwatail oh sohte keper oh pil kin kaudokiong Koht tohto; oh ekei kin kaudokihong emen nohno-lih koht lapalap, me kin wia pwukoa silu en serepein, nohno, oh lih koht, me kin wiliwilian kahk kan en mour. Eh mwohnlimpoak iei koht emen me mie kode. Ekei sounwunahni kan kin kapatapene ahr kaudokiohng koht ohl men oh koht lih men. Emen sounnting koasoia: “Koht liho oh Koht ohlo iei kadehdehpen irair en lih oh ohl. Emenemen kin ahneki irair kan me wekpeseng oh ni ahnsou me re kin patpene kin imwikihla pahrekpenen kapikipikdahn mour.” Emen sounnting ntingihdi: “Ehu pilipil kesempwal nan wunahni iei omw pahn pilada koht akan (koht ohl de koht lih) me ke pahn doadoahkohng. . . . Tiahk en wunahni kin kihong uhk saledek en pilada oh kawahuwih pein omw Koht.”

Paipel sohte kin utung madamadau pwukat. Sises Krais kin doadoahngkiohng ah kalohk pwon padapadahkiong meteikan duwen Siohwa, “Koht mehlelo.” (Sohn 17:3) Paipel mahsanih: “Kauno [“Siohwa,” New World Translation] me lapalap oh konehng ale kaping lapalahpie; kitail uhdahn pahn wauneki laudsang koht teikan koaros. Koht en wehi teikan koaros, iei irail me dikedik en eni.”​—1 Kronikel 16:25, 26.

Iaduwen Tepilo? Webster’s Ninth New Collegiate Dictionary kawehwehda wunahni me iei “kapehse ong Tepilo.” E pahn apwal en diarada emen sounwunahni rahnwet me pahn pwungki kawehwe wet, pwe me tohto sohte kin kamehlele me mie Sehdan me Tepil. Emen lih pwulopwul, me sansalda nan The Irish Times nin duwen emen “sounwunahni me kohwa pwukoa laud oh kaunen ehu pwihn en sounwunahni ndand en Ireland,” koasoia met: “Kamehlele me Tepil mie kin wehwehki en kamehlele pelien Kristian . . . [Tepilo] sohte kak kousoan nan wasa ehu me sohte Koht.”

Paipel kin kadehdehda me Tepil mie oh kin kapwukoahkin ih pali lauden kalokolok kan oh pingiping kan nan sampah. (Kaudial 12:12) Sises sohte ihte padahngki me Tepil mie ahpw pil kasalehda me aramas kakete wia kupwuren Tepil ni ahr sasairki. Karasepe ehu, irail kaunen pelien lamalam kan nan keieun senturi me kin kose me pein irail me keieu pwung kin kose me re wia seri en Koht ekei oh re kin kamehlele me re kin wiewia kupwuren Koht. Sises, me wehwehki dahme mih nan mohngiongarail, ese me met soh. E padahkiohng irail ni inen: “Kumwail kadaudok en Tepil, pwehki iei ih samwamwail, oh kumwail kin nantihong kapwaiada mehkan me samwamwailo kin inengieng.” (Sohn 8:44) Pil ehu, Paipel pwuhk en Kaudial kin mahsanih me Tepil “kin pitipitih sampah pwon.”​—Kaudial 12:9.

Mie Ekei Akmanaman me Mwahu?

Ni mehlel, akmanaman kin ahnsou koaros pidada pelien wunahni.a Aramas tohto mahso oh nan rahnwet kin kamehlele me akmanaman me sounwunahni kan kin wiahda iei pwehn kamedekihla meteikan. Sounwunahni kan kin ahneki manaman en kamedekihla de pil kemehla meteikan ki wiepen akmanaman. Aramas tohto kin kamehlele me sounwunahni kan me pwukoahki kereniong soahng suwed koaros me kin pwarada, iangahki soumwahu, mehla, oh soh pweidahn wahnsahpw kan.

Sounwunahni kan nan rahnwet kin sapwung soahng pwukat me aramas kin koasoiahkin irail. Nindoken ahr kin pohnese me mie sounwunahni suwed kan me kin kahrehda me suwed, sounwunahni tohto kin kose me arail akmanaman kin kadoadoahk pwehn wahdo kamwahu kan, ahpw kaidehn medek. Wiccan kin padahngki me manaman en akmanamano pahn pwuredo pahn pak silu ong aramaso me kin wiewia tiahk wet oh koasoia me met kin kauhdi karia kan. Karasepen akmanaman wet kin iangahki akmanaman kan en pere pein uhk, en kamwakel nan imwomw sang irair suwed kan me kak kamedekiuhkala me aramas kan me kin kousoan loale mwohn uhk pwilikihdi loale, en kahrehong emen en limpoak ong uhk, en kahrehda mwahula sang soumwahu oh en roson mwahu, en irehdi uhk sang katiasang omw doadoahk en mwohni, oh en alehdi mwohni. Pwehki aramas kin kose me wunahni kin kak wiahda soangen manaman pwukat, e sohte kapwuriamwei me wunahni kin ndandla.

Ahpw, Paipel sohte kin padahngki me mie wekpeseng en wunahni me mwahu oh wunahni me suwed. Nan Kosonnedo me kohieng Moses, Koht ketin kasalehda sapwellime kupwur ni sansal: E mahsanih: “Dehr wia soangen tiahk en akmanaman de kosetipw.” (Lipai 19:26) Kitail pil wadek: “Dehr mweidohng amwail aramas akan en wia soangen tiahk me duwehte kosetipw, pweh, wunahni de mesehl, oh dehr mweidohng re en kin ketieni.”​—Deuderonomi 18:10, 11.

Dahme karehda Koht mahsanihki met? Met kaidehn pwehki e men irehdi kitail sang dahme mwahu. Siohwa ketikihong sapwellime aramas akan kosonned pwukat pwehki e poakohng irail oh sohte kupwurki ren kaliduhla pahn masak oh ketieni. Ahpw, e ketin luhke sapwellime ladu kan en pwarkiohng ih mehkan me re anahne. Ih me Sounketikihda “kisakis mwahu koaros oh wiewia sapan koaros.” (Seims 1:17) Wahnpoaron Sohn kamehleleiong ienge me pwoson kan: “Kitail kin ale sang reh mehkoaros me kitail kin peki, pwehki atail kin peikiong sapwellime kosonned akan oh pil wia soahng kan me kin kaparanda kupwure.”​—1 Sohn 3:22.

Iaduwen Ngehn Suwed kan?

Sounwunahni tohto kin pwungki dahme Paipel kin padahngki: Me mie ngehn suwed kan. Nan ehu pwuhk me pid duwen irewet emen me kin utung wiewiahn wunahni kaweidki: “Mie Ngehn akan: Re momour, nan wasa soh sansal kan me pahrekiong pein atail, me momour kan. . . . Lepin lokaiahn wai pwukat ‘Imp,’ ‘Evil Spirit’ oh ‘Demon’ kin uhdahn mehlel. Re uhdahn kehlail. . . . Soahng me keieu loalokong rehrail . . . kin kak (ma emen pahn sewese ritingada ahl ong irail) en pedolong rehtail. . . . Re kak pedolong nan paliwaromw . . . , pil kak kaunuhkada. Ehi, met uhdahn duwehte soai kan me Temwon de ngehn saut kin tihda pohn aramas.”

Ni mwein Paipel, ngehn saut akan kin tihada pohn aramas ni soangsoangen ahl akan. Irail ko me re kin tihada powe kin lohtengla, ekei kin maskunla, ekei kin mwomwen pweipweila, oh ekei kin uhdahn kehlailla kehlailsang aramas. (Madiu 9:32; 12:22; 17:15, 18; Mark 5:2-5; Luk 8:29; 9:42; 11:14; Wiewia 19:16) Ekei pak lokolok me aramaso ahneki kin uhdahn laudla ma ngehn saut tohto kin wiahkinteieu tiahda powe. (Luk 8:2, 30) Ihme, ni mehlel, mie kahrepe mwahu me Siohwa kaweidki aramas akan en liksang soangen wunahni koaros.

Kaudok Poahsoanda Pohn Mehlel

Aramas tohto nan rahnwet kin wiahki wunahni mwomwen kaudok ehu me pid pein sapwatail oh sohte keper. Nan ekei kousapw kan, aramas kan kin pwungkilahr tiahk wet. Re solahr masak. Ahpw e wialahr mehkot tikitik. Nan wasa kan me pelien lamalam kin saledek, me kin kahrehda me tohto en wia tiahk kapwuriamwei kan, soangen wunahni wialahr mehkot me wahu.

Mehlel, pelien lamalam kan en sampah wialahr mwomwen wasaht netinet, wasa me aramas akan kak saledek pilada ehu pelien lamalam me pwungohng arail anahn akan, duwehte emen me pwainda ehu suht. Me weksang met, Sises mahsanih duwen pilipil riau. E mahsanih: “Kumwail keid nan ewen kehl wetikitik, pwe elen kolahng nan ehl me tehlap oh mengei, oh aramas ngeder kin keid ie. A wenihmw me kolahng mour me wetikitik oh elen kolahng ie me apwal, eri, me malaulau me kin diar.” (Madiu 7:13, 14) Uhdahno kitail kin saledek en pilada mehnia ahl kitail en keid loale. Ahpw pwehki kamwahupatail soutuk kin mihla nan keper, pilipilo me kitail wiahda me keieu kesempwal. Pwehn alehdi marain en pali ngehn, kitail en rapahki elen me mehlel​—ahlo me ihte dierekda nan Mahsen en Koht, Paipel.

[Nting tikitik me mi pah]

[Kilel nan Pali 5]

Aramas tohto nan rahnwet kin wiahki wunahni mwomwen kaudok ehu me pid pein sapwatail oh sohte keper

[Kilel nan Pali 6]

Akmanaman kin kalap pidada wunahni

[Kilel nan Pali 6]

Sounwunahni kan kin sasairki wiewia dahme Tepil mwahuki irail en wia?

[Kilel nan Pali 7]

Paipel kin kasalehda elen me mehlelo