Sampah Wia Wasakis Ong Ihte Posongosongpen Mouren Aramas?
E inenen peren! Emen tohnsukuhl pahs tes ehu. Erein wihk riau e onop laud oh met e ahpwtehn rong me e pahs teso. Ahnsouwet e kakehr pousehla alehda doadoahk me e kin inengieng.
Aramas tohto kin kilangwohng mour pohn sampah ni ahl wette. Re kin medewehong mour pohn sampah nin duwen tes ehu me koaros anahne en alehdi. Irail ko me “pahs” tes wet kin pousehla ong mehkot me mwahusang ni mwomwen mour ehu mwurin mehla. Mehlel, e uhdahn pahn kansensuwed, ma mour en ahnsouwet—ong me tohto ihte pwehn mour—ihte uwen me aramas kak kasik en mourki. Mendahki pali laud en ah mour e ahneki roson mwahu oh kepwehpwe, Sohp me mih nan Paipel koasoia: “Aramas, me ipwisang rehn lih, kin mour mwotomwot oh dirkihla apwal.”—Sohp 14:1. New World Translation.
Ni ah kasalehda lamalam en me tohto, New Catholic Encyclopedia koasoia: “Lingan en nanleng iei me Koht koasoanehdiohngehr aramas. . . . En aramas nsenamwahu kin sansal sang ah ahneki nsenamwahu en nanleng.” Ehu roporop me Church of Christ ahpwtehn wiahda nan United States kin kose me persent 87 en irail kan me sapeng roporopo kin kamehlele me re kakete kohla nanleng mwurin re mehla.
Pelien lamalam tohto me kaidehn Kristian pil kin kamehlele me re pahn mwesel sang sampah kohla wasa ieu me mwahusang mwurin re mehla. Karasepe ehu, mehn Muslim kin koapworopworki me re pahn kohla nan paradais ehu nanleng. Irail kan me kin idawehn pelien lamalam me adaneki Pure Land en Buddhism nan Saina oh Sapahn kin kamehlele me ni arail pahn kin sohte uhdisang kapakapki kapakap me adaneki “Amitabha,” eden Buddha en Unlimited Light, re pahn ipwsapahl nan wasao me adaneki Pure Land, de Western Paradise, wasa me re pahn momour ni nsenamwahu.
Paipel, pwuhko me keieu kawehwehdi ni lokaia tohto oh aramas nan sampah pwon naineki, sohte kin padahngki me sampah iei wasa me aramas en pitsang ie, de ihte wasa ieu me ren pahs kasongosong pwe ren kak pousehla mour mwahu mwurin re mehla. Karasepe ehu, Paipel mahsanih: “Me pwung kan pahn koukousoan nan sahpwo oh re pahn sapwenikihla kohkohlahte.” (Melkahka 37:29) Nan Paipel pil dierek sapwellimen Sises mahsen ndand ko: “Meid pai me opampap: pwe re pahn sohsohkihla sampah.”—Madiu 5:5, King James Version.
Aramas ahr kin kalap kamehlele me atail kousoan pohn sampah ihte ong ahnsoukis kin kasalehda me mehla iei wenihmw en pedolong ong nan mour me sohte kak mehla me kansenamwahu. Ma met mehlel, eri mehla kin wia kapai ehu. Ahpw aramas kin kilangwohng mehla ni ahl wet, de re kin songosong en kareireila arail mour? Ekpiriens kan kasalehda me ni ahnsou me aramas kin ahneki roson mwahu oh mour meleilei, re sohte men mehla.
Mendahki met, pwehki mour pohn sampah kin dirkihla me suwed oh lokolok, aramas tohto kin kilangwohngete nanleng me ihte wasa me re kak diar ie meleilei mehlel oh nsenamwahu. Nanleng kin ihte wia wasa kansenamwahu meleilei, saledek sang douluhl me suwed oh pingiping? Oh mour mwurin mehla ihte pahn wiawi nanleng? Ke pahn pwuriamweikihla pasepeng en Paipel kan. Menlau pousehlahte wadek artikel en mwurin met.