Ke Kak Ahneki Pwoson Mehlel

Ahnsou me Sarah Jayne lel sounpahr 19, e diarada me e ahneki kanser en wasahn neitik. Mwurin pwal me e wia, e nsenamwahula oh pwurehng ahnekihda koapworopwor mwahu ong ahnsou kan me pahn kohdo. Ah koapworopwor me laud, kahrehong ahnsou me e sounpahr 20, e inou en pwopwoudida oh tepiadahr wiahda koasoanpen ah pahn kapwopwoud. Ahpw, nan pahrohte, kansero pwurehng, oh e esehda me ah mour pahn reireikihte wihk kei. Sarah Jayne eri mehla nan June 2000, mwohnte a lel sounpahr 21.

DAHME kapwuriamwei ong irail oko me pwarek rehn Sarah Jayne nan imwen wini iei ah meleilei oh koapworopwor laud me mwahu pahn mie ni ahnsou kohkohdo, oh ah pwoson laud Koht oh sapwellime Mahsen, Paipel. Mendahki apwal laud me e sohsohpai, e inenen koapworopworki laud duwen mehlel en kaiasada​—⁠oh me e pahn pwurehng tuhwong kompoakepah koaros. (Sohn 5:28, 29) E kin ndaiong irail: “I pahn kilang kumwail koaros nan sapwellimen Koht koasoandi kapw.”

Ekei wiahki me ah madamadau mwuhro salongala. Ludovic Kennedy wia peidek wet: “Ihte irail me sohte arail koapworopwor men kamehlele me mie mehkot mwurin mehla, oh ni imwin arail mour . . . pahn mie mehkan me kaperen ong irail, me nan wasa mwahu ieu pahn perepereniong irail oko me mehla mwohrail oh pil pahn mehla mwurarail?” Eri, sang nan madamadau wet, kitail kak wia pil ehu peidek. Mehnia me ngoaren pwung​—⁠en kamehlele me “mour wet . . .ihte mour me mie . . . eri kitail anahne isaneki mour wet,” nin duwen Kennedy kawehwehda . . . de pwoson Koht oh sapwellime inou en kaiasada? Sarah Jayne pilada en pwoson Koht oh sapwellime inou kan. Dahme e wia pwe e kak ahneki soangen pwoson kehlail duwehte met?

“Rapahki Koht . . . oh Diar Ih ni Mehlel”

Pwe aramas emen en ahnekihda pwoson oh likihala aramas emen tohrohr, e anahne esehla ih oh sukuhliki iaduwen ah kin madamadau oh ah wiewia kan. Pwehn alehdi met, mohngiong oh madamadau anahn. Ni mehlel, e pil duwehte wiepen pwoson Koht. Ke anahne esehla Ih, pil esehla sapwellime irair akan oh sapwellime wiewia kan, oh en diarada ia uwen likilik me E kin wia ni dahme E kin mahsanih oh wia.​—Melkahka 9:10; 145:1-​21.

Ekei pehm met sohte kak wiawi. Irail kin koasoia me Koht me nohn dohsang aramas, oh sohte me kak wehwehki Ih​—ma iei E uhdahn mie. Ekei aramas kin wia peidek kan duwehte met: “Ma Koht uhdahn mehlel ong Kristian kan duwehte Sarah Jayne, a dahme kahrehda e sohte wiahiong kitail koaros en esehla ih?” Ahpw, iaduwe​—⁠Koht uhdahn nohn doh oh sohte me kak diar Ih? Nan sapwellimen wahnpoaron Pohl kapahrek ong aramas loalokong kei nan Adens, e mahsanih: “Koht me ketin kapikada sampah oh audepe kan koaros, ih me Kaunepen lahng oh sampah” pil ketikihda soahng koaros me anahn pwe kitail en “kak rapahki [Ih] . . . oh pil diar Ih.” Ni mehlel, Pohl mahsanih: “Koht sohte dohsang emenemen kitail.”​—Wiewia 17:24-​27.

Eri, iaduwen ahmw kak “rapahki Koht . . . oh uhdahn diar Ih”? Ekei kin wia met sang arail kin tetehk audepen lahng oh sampah me pidahkihirailpene. Ong aramas tohto, mepwukat kin itar wia mehn kadehde ong irail me uhdahn mie Sounkapikpatail me wiahda mepwukat.a (Melkahka 19:1; Aiseia 40:26; Wiewia 14:16, 17) Irail ahneki pepehmohte me Pohl sapwellimaniki me “sapwellimen [Koht] irair soh sansal kan kin sansalada mwahu sang ni kepikpikdahn sampah kohkohdo, pwehki aramas kak kilang sang ni mehkan me wiawihda, pil iangahki sapwellime roson unsek oh sapwellime irair en wia Koht emen.”​—Rom 1:20; Melkahka 104:24.

Ke Anahne Paipel

Pwe ken kak kekeirada ahmw pwoson Sounkapikpatail, ke anahne mehkot tohrohr me E ketikihda. Dahkot met? Paipel​—sapwellimen Koht Mahsen me kohkihdo manaman en ngehn sarawi, me E kin ketin doadoahngki pwehn kasalehda sapwellime kupwur oh koasoandi kan. (2 Timoty 3:16, 17) Ekei kin nda: “Ahpw awih mahs, iaduwen ahmw pahn kak kamehlele mehkot me Paipel koasoia ni ahmw kilang soahng suwed akan me aramas akan me dene irail kin idawehn mahsen en Paipel kin wiewia?” Mehlel, palien Kristendom arail rekord kapwuriamwei kan me pid mwalaun, lemei oh tiahk samin. Ahpw, aramas marain kan kin kilang me Kristendom kin mwomwehdahte me dene re kin kapwaiada kaweid en Paipel akan.​—Madiu 15:⁠8.

Pein Paipel kin kasalehda me aramas tohto pahn nda me irail kin kaudok ong Koht ahpw irail pahn “kesehla ih me wia irailada.” Wahnpoaron Piter mahsanih: “Pwehki arail wiewia kan, aramas akan pahn lahlahwehkihla Elen Komour mehlel.” (2 Piter 2:1, 2) Sises Krais mahsanih me irail pwukat kin mourki “mouren tiahk suwed kan” oh irail pahn sansaliki arail wiewia suwed kan. (Madiu 7:15-​23) Ma kitail sohte kamehlele Mahsen en Koht pwehki wiewiahn palien Kristendom, eri e pahn duwehte omw adihasang kisinlikou ieu sang kompoakepahmw me ke likih oh kesehla pwehki dene aramas me wahdo kisinlikouwo aramas suwed emen.

Ma pahn sohte Mahsen en Koht, eri, sohte me pahn kak ahneki pwoson mehlel. Ihte sang nan Paipel me Siohwa ketikihda sapwellime kupwur kan. E kin ketin kasalehda pasapeng ong soangen peidek kan me duwehte dahme kahrehda E ketin mweidohng aramas en lelohng apwal oh medek ahnsou wet oh dahme E pahn ketin wiawiong irair wet. (Melkahka 119:105; Rom 15:⁠4) Sarah Jayne kamehlelehla me Paipel iei sapwellimen Koht Mahsen me pwilisang ngehn sarawi. (1 Deselonika 2:13; 2 Piter 1:19-​21) Iaduwe? Kaidehn pwehki ah pahpa oh nohno me ndaiong ih, ahpw pwehki e alehiong ih ahnsou pwehn kasawih ni mehlel mehn kadehde koaros me kasalehda me Paipel iei kaudiahl tohrohr ehu sang rehn Koht. (Rom 12:2) Karasepe, e kasawih kehl en Paipel me kin kamwekid mour en irail oko me kin tengediong oh kapwaiada kaweid en Paipel akan. Sang ni sawaspen pwuhk kan me duwehte The Bible​—God’s Word or Man’s?,b e kin doadoahngki pwehn kasawih kanahieng mehn kadehde ngeder akan me kasalehda me Mahsen en Koht pwilisang rehn Koht.

“Pwoson Kin Pwilisang ni Rong Mahsen en Koht”

E sohte itar ihte ken naineki Paipel de pil kamehlelehte me met Mahsen en Koht. Wahnpoaron Pohl ntingihdi: “Pwoson kin pwilisang ni rong Mahsen en Koht.” (Rom 10:17) Rong Paipel, a kaidehn ihte naineki Paipel, iei me kin kekeirada pwoson. Ke kin “rong” dahme Koht pahn ketin mahsanih sang ni ahmw pahn wadek oh onop sapwellime Mahsen. Pil irail me pwulopwul kan kak wia met. Pohl kin kasalehda me Timoty ale kasukuhl “sang ni seri pwelel” sang rehn ah nohno oh nohno kahlap. Eri, met ira kin wia pwe Timoty en sohla kak medemedewe ehu soahng tohrohr ahpw ihte Paipel​—⁠likamwete aramas iahk? Soh! Ira sohte widingih de pitih Timoty. E kin “kaweid ong en pwoson” dahme e rong oh wadek.​—2 Timoty 1:5; 3:14, 15.

Sarah Jayne pil pein kamehleleiong ih mepwukat ni soangen ahlohte. Duwehte mehn Peria en nan senturi keieu, e kin “alehda mahsen [sang ah pahpa oh nohno oh sounpadahk teikan] oh inenen ngoangki esehla.” Sangete ni ah wia seri tikitik, e sansal me e kin likih dahme ah pahpa oh nohno kin ndaiong ih. Mwuhr, ni ah laudila, e sohte kin kamehlelehte soahng koaros me e sukuhliki ni ah sohte wehwehki. E kin ‘kasawih kanahieng iren Paipel kan me iei mehpwukat me mehlel.’​—Wiewia 17:11.

Ke Kak Kekeirada Pwoson Mehlel

Pil kowe​—⁠ke kak kekeirada pwoson mehlel​—⁠soangen pwoson me wahnpoaron Pohl mahsanih nan sapwellime kisinlikou ong Kristian en Ipru ko. Soangen pwoson wet, duwen me e mahsanih, iei “kamehlele mehkan me kitail kin koapworopworki de kasikasik, kamehlele mehkan me kitail sohte kak kilangki masatail.” (Ipru 11:⁠1) Ahneki soangen pwoson wet pahn wiahiong uhk ken uhdahn kamehlele me ahmw koapworopwor koaros oh me ke kasik koaros, iangahki sapwellimen Koht inou en kaiasada, pahn pweida. Ke pahn kamehlele unsek me soangen koapworopwor pwukat sohte kak likamw, ah kaidehn mehkot me aramas kin auramenihte. Ke pahn diarada me Siohwa sohte kin ketin likamw ong kapwaiada sapwellime inou kan. (Sosua 21:45; 23:14; Aiseia 55:10, 11; Ipru 6:18) Sapwellimen Koht inou me pid sampah kapw pahn wia mehkot me mehlel ong uhk​—⁠likamwete e mihier nan ahnsou wet. (2 Piter 3:13) Oh ke pahn kilangki mesomw pwoson me Siohwa Koht, Sises Krais oh sapwellime Wehio​—⁠mehpwukat me uhdahn mehlel, oh kaidehn madamadau likamw ekei.

Ke sohte pahn kelepwiki wiahda ahmw pwoson mehlel. Likin ah sapankihong uhk sapwellime Mahsen, Siohwa pil ketikihda mwomwohdiso en Kristian ieu me kipe sampah pwon pwehn sewese aramas me mohngiong mehlel akan ren kekeirada ahr pwoson Koht. (Sohn 17:20; Rom 10:14, 15) Alehda soangen sawas koaros me Siohwa ketikihda sang pwihn wet (mwomwohdiso en Kristian mehlel). (Wiewia 8:30, 31) Oh pil, pwehki pwoson wia ehu wahn ngehn en Koht, kahrehda kaukaule kapakapki ngehn sarawi en sewese iuk ken ahnekihla pwoson mehlel.​—Kalesia 5:⁠22.

Ken dehr mweidohng irail me peikasal akan en kalomwati pwe uhwong mehmen me nda me e pwoson Koht oh sapwellime Mahseno. (1 Korint 1:18-​21; 2 Piter 3:3, 4) Ni mehlel, pwoson mehlel wie mehkot inenen kesempwal mehn kakehlailihiuk ahnsou en lel kasongosong kan. (Episos 6:16) Sarah Jayne diarada me met mehlel, oh e kin wia mehn kangoang ong irail ko me kin pwarek ih nan imwen wini oh arail pwoson kin kehlailkihda. E kin nda: “Wiahkihla padahk mehlel pein ahmw. Onop Mahsen en Koht. Ahnsou koaros ken karanih sapwellimen Koht pwihn. Poadidiong kapakap. Pwerisek nan sapwellimen Siohwa doadoahk en kalohk.”​—Seims 2:17, 26.

Ni emen ners me kin apwalih ih ah kilang ahn Sarah Jayne ah pwoson Koht oh koapworopwor en iasada, e nda: “Ke uhdahn kamehlele met.” Ni arail idek reh dahme kihong ih soangen nan kapehd mwahu oh saledek me e ahneki, e sapengki: “Met kin kohsang ahi pwoson Siohwa. Ih uhdahn kompoakepai ni mehlel, oh I inenen poakohng Ih.”

[Nting tikitik me mi pahs]

[Kilel nan Pali 6]

Ahn Timoty nohno oh nohno kahlap padahkiong Timoty “padahk mehlel kan en Koht” sangete ahnsou me e wia “seri pwelel”

[Kilel nan Pali 6]

Kaping kohwong mehn Peria kan pwe re kin kasawihada iren Paipel kan rahn koaros

[Credit Line]

Sang “Photo-Drama of Creation,” 1914

[Kilels nan Pali 7]

Ma aramas emen kin rong oh kapwaiada dahme e wadek nan Paipel, kaidehn ihte naineki Paipel, e kin kekeirada eh pwoson

[Kilel nan Pali 7]

“I pahn kilang kumwail koaros nan sapwellimen Koht sampah kapw”