Dahme Kahrehda Kitail En Papidaiskihla?

“Kumwail eri kohwei . . . oh padahkihong tohn wehi kan koaros pwe re en wiahla nei tohnpadahk; papidaisihirailla.”​—MADIU 28:19.

1, 2. (a) Ekei papdais kan kin wiawi pahn soahngen irair dah kei? (b) Peidek dah kei kin kohda me pid papidais?

NANMWARKI Charlemagne en Frank kin idingkihong mehn Saxon kan en papidaisla ni ahnsou teio nin duwen pwihn laud kan nan pahr 775⁠-⁠777 C.E. Soupoad John Lord ntingihdi, “E kin idingkihong irail en iangala Kristian ni ahdte.” Ni soangen ahlohte, mwurin kaun en Russia Vladimir I ah pwoudkihda serepein soupeidi men me kin iang pelien lamalam Greek Orthodox, e piladahr me nah aramas akan pahn uhdahn iangala “Kristian.” E wiahda kosonned me mwutumwut en aramas akan me mih pahn ah kaunda en kin papidaisla ni ahnsou teio​—oh irail akan me sohte men papidais pahn kamakamala!

² Soangen papidais wet konehng en wiawi? Oh mie katepen soangen papidais pwukat? Oh iaduwen​—⁠aramas sohte lipilipil kak papidais?

Papidais​—Iaduwen?

3, 4. Dahme kahrehda kusupewei pihl de wudekihdi pihl pohn moangen aramas kaidehn papidais ieu en Kristian me pwung?

³ Ni ahnsou me Charlemagne oh Vladimir I kin idingkihong aramas akan en papidaisla, kaun pwukat sohte kin kapwaiada Mahsen en Koht. Ni mehlel, ma papidais pahn wiawi ni kusupewei pihl pohn aramas akan de wudekihdi pihl pohn moangen aramas akan de pil kaduhdi nan pihl ma aramas pwukat saikinte sukuhliki duwen padahk mehlel en Paipel, eri papidais pwukat sohte pwung.

⁴ Medewehla dahme wiawi ni ahnsou me Sises en Nasaret kohla rehn Sohn Sounpapidais nan pahr 29 C.E. Sohn kin kapapidais aramas akan nan Pillap Sordan. Aramas pwukat sang pein nsenarail kin kohla rehn Sohn pwehn papidaisla. Iaduwen​—⁠e kin kesihnenirailda nan Pillap Sordan oh idipada ekis pihl oh wudekihdiong pohn moangarail kan de pihl kusupewei pohrail? Eri, dahme wiawi ni ahnsou me Sohn kapapidaisih Sises? Madiu kawehwehda me mwurin Sises papidaisla, “e ahpw ketida sang nan pihlo.” (Madiu 3:16) Met wehwehki me ahnsou me Sises papidaisla, e mih nan pihlo, pwehki e kaduhdi nan Pillap Sordan. Ni soangen mwomwohte, ohl lapalap en Idiopia lelepeko papidaisla “nan lepin pihl ehu.” Lepin pihl anahn pwehki papidais kan me Sises oh sapwellime tohnpadahk kan kin wia kin pid kaduhdi ong nan pihl.​—Wiewia 8:36.

5. Iaduwen irail tepin Kristian akan papidaisla aramas akan?

⁵ Ni lokaiahn Krihk lepin lokaia wet “papidais” oh “papidaisla” kin wehwehki kaduhdi nan pihl. Smith’s Bible Dictionary koasoia: “Papidais ni pwung kin wehwehki kaduhdi ong nan pihl.” Ihme kahrehda ekei kawehwehn Paipel kan kin doadoahngki soangen ahd pwukat: “Sohn the Immerser” oh “John the dipper.” (Madiu 3:1, Rotherham; Diaglott interlinear) Pwuhk me Augustus Neander ntingihdi me oaralap koasoia History of the Christian Religion and Church, During the Three First Centuries koasoia: “Nin tepio, papidais kin wiawi ni kaduhdi aramas nan pihl.” Doadoahk ndand en mehn French Larousse du XX^e Siècle (Paris, 1928) koasoia: “Tepin Kristian akan kin wia papidais ni arail kin kaduhdi nan pihl wasa kan me pihl kak dierek ie.” New Catholic Encyclopedia koasoia: “E sansal mwahu me papidais me kin wiawi nan tepin Mwomwohdiso, aramas akan kin kaduhduhdi ong nan pihl.” (1967, Volume II, pali 56) Eri, rahnwet, papidais pwehn wiahla emen Sounkadehdehn Siohwa iei kahk ehu me emen pahn pein nsenkihda en wia ni eh pahn kaduhduhdi ong nan pihl.

Kahrepe Kapw Ieu en Papidais

6, 7. (a) Kahrepe dahieu Sohn kin kapapidaisihala aramas akan? (b) Ahpw wiewia kapw dahieu duwen papidais en sapwellimen Sises tohnpadahk kan tepida wiawi?

⁶ Kahrepen papidais kan me Sohn kin wia me weksang papidais kan me sapwellimen Sises tohnpadahk kan kin wia. (Sohn 4:1, 2) Sohn papidaisla aramas akan pwe arail papidais pahn wiahla kilel ehu ong wehi pokon me irail kohluhkihla diparail kan me kin kauwehla Kosonnedo.a (Luk 3:3) Ahpw, mehkot kapw kin pid papidais kan me sapwellimen Sises tohnpadahk kan kin wia. Nan Pendekos 33 C.E., wahnpoaron Piter kangoange aramas akan me kin karonge ih: “Emenemen kumwail en koluhla oh wiliakapwala, oh pil papidaisla ni mwaren Sises Krais, pwe [mahkepen dipamwail kan en mie].” (Wiewia 2:37-​41) Edetehn Piter kin koasoiong mehn Suhs akan oh aramas akan me iangala pelien lamalam en mehn Suhs akan, e sohte koasoiada duwen papidais ieu me kin karasaiong koluhkihla dihp akan me kin kauwehla Kosonnedo; e pil sohte kin wehwehki me papidaiski mwaren Sises pahn wia kilelepen lapwapen dihp akan.​—Wiewia 2:10.

⁷ Ni ahnsowo, Piter doadoahngki keieun “kih kan en wehio.” Kahrepe dahieu? Pwen kak ritingihda wenihmw en alehda loalokong duwen arail pahn kak pedelong nan Wehin nanleng. (Madiu 16:19) Pwehki mehn Suhs akan me soikala Sises nin duwen Mesaiao, koluhla oh pwoson Sises tepida wia ahl kesempwal ieu en rapahki oh alehda sapwellimen Koht mahk. Irail pahn kak kihda mehn kadehdeh ieu ong wehi pokon duwen arail pwoson ma irail pahn kaduhdi nan pihl ni mwaren Sises Krais. Met pahn kasalehda me re wiahdaher pein ahr inou ong Koht ki Krais. Rahnwet, aramas koaros me kin inengiengada en kenikenla rehn Koht pahn anahne ahneki soahngen pwosonohte, inoukihong Siohwa Koht arail mour, oh papidaisla nin duwen Kristian emen pwen kak wia mehn kadehde ieu duwen arail inou mehlel ieu ong Koht Wasa Lapalapie.

Loalokong Pwung me Kesempwal

8. Dahme kahrehda papidais en Kristian kaidehn ong aramas koaros?

⁸ Papidais en Kristian kaidehn aramas koaros pahn kak wia. Sises kehkehlikiong sapwellime tohnpadahk kan: “Kumwail eri kohwei . . . oh padahkihong tohn wehi kan koaros; pwe re en wiahla nei tohnpadahk: papidaisihirailla ni mwaren Sahm oh Sapwellime oh ngehn sarawi, oh kehkehlingkihong irail re en peikiong mehkoaros me I koasoanediong kumwail.” (Madiu 28:19, 20) Mwohn aramas akan pahn kak papidais, irail anahne ‘peikiong mehkoaros me [Sises] koasoanediong sapwellime tohnpadahk kan.’ Ihme kahrehda e pahn sohte katapan soahngen papidais me aramas kin idingki aramas teikan en wia, ahpw mehlel ma aramas pwukat sohte kin pwoson loalokong pwung en Mahsen en Koht, met pahn kin uhwong kaweid me Sises ketikihong sapwellime tohnpadahk mehlel akan en wia.​—Ipru 11:6.

9. Ia wehwehn papidaisla “ni mwaren Sahm”?

⁹ Ia wehwehn en papidaisla “ni mwaren Sahm”? Met kin wehwehki me aramas me pahn kaukaunop en papidais kin pohnese me Samatail nanleng kin sapwellimaniki pwung oh manaman en kaunda aramas akan. E kin kamehlele me Siohwa Koht iei atail Sounkapikada, “Wasa Lapalap nin sampah pwon,” oh Kaunepen lahng.​—Melkahka 83:18; Aiseia 40:28; Wiewia 4:24.

10. Ia wehwehn Papidaisla ‘ni mwaren Sapwellime’?

¹⁰ Papidaisla ‘ni mwaren Sapwellime’ kin wehwehki me aramaso pohnese ahn Sises pwukoa oh manaman nin duwen sapwellimen Koht Iehros. (1 Sohn 4:9) Irail aramas akan me kak ohng papidaisla kin pwungki Sises nin duwen ih me Koht kin doadoahngki “pwe en tounmeteikihla moure, pwe me ngeder en maiauda.” (Madiu 20:28; 1 Timoty 2:5, 6) Aramas akan me pahn papidais pil anahne pohnese me Koht kin ketin kasapwilada sapwellime Ohl “wasa me keieu ileile.”​—Pilipai 2:8-​11; Kaudiahl 19:16.

11. Ia wehwehn papidaisla ‘ni mwaren ngehn sarawi’?

¹¹ Ia wehwehn papidaisla ‘ni mwaren ngehn sarawi’? Met kin wehwehki me aramas akan me pahn papidais kin pohnese me ngehn sarawi iei sapwellimen Siohwa kehl, me kin doadoahk nin duwen sapwellime kupwur kan ni soahngen ahl tohto. (Senesis 1:2; 2 Samuel 23:1, 2; 2 Piter 1:21) Irail akan me ahneki irair en kakehr papidaisla kin pohnese oh kamehlele me ngehn sarawi kin sewese irail en wehwehki “sapwellimen Koht kupwur rir,” oh wia doadoahk en kalohki Wehio, oh kasalehda wahn ngehn “limpoak, peren, popohl, kanengamah, kadek, kamwahu, pwoson, opampap, liksang me suwed.”​—1 Korint 2:10; Kalesia 5:22, 23; Soel 2:28, 29.

Kesempwalpen Koluhla oh Wiliakapwala

12. Iaduwen papidais en Kristian ah kin pidada koluhla?

¹² Likin Sises me sohte dipe, papidais ong aramas teikan kin wia kilel ehu nin duwen kupwuren Koht me pid koluhkihla diparail kan. Ni ahnsou me kitail kin koluhla, me wehwehki me kitail kin inenen nsensuwedkihla mehkot me kitail wiahda de sohte wiahda. Irail mehn Suhs akan nan keieun senturi me men kaperenda Koht anahne koluhkihla diparail kan me irail wiaiong Krais. (Wiewia 3:11-​19) Ekei mehn liki kan nan Korint kin koluhkihla dihp kan me re wiahda, duwehte dipen nenek, pwongih dikedik en eni, pirap, oh dihp laud teikan. Ahpw pwehki arail kin koluhla, re “mwakelekelsangehr” dihp pwehki ntahn Sises oh “kasarawihongher,” de tohrohrla pwe ren kak wia sapwellimen Koht doadoahk; oh “pwunglahr” ni mwaren Krais oh ki sapwellimen Koht ngehn sarawi. (1 Korint 6:9-​11) Koluhla iei kahk kesempwal ieu en sewese kitail en ahne⁠ki nsenmwakelekel oh sawas sang rehn Koht pwehki atail kin nsensuwedkihla dipatail kan.​—1 Piter 3:21.

13. Me kin pid papidais, wiliakapwala kin pid duwen dah?

¹³ Kitail anahne wiliakapwala mwohn atail pahn papidaisla oh wiahla Sounkadehdehn Siohwa kan. Wiliakapwala iei wiewia ehu me pein emen pahn nsenkihda en wia oh eh pilipil pahn kohsang nan mohngiong unsek en idawehnla Krais Sises. Aramas pwukat kin kesehla arail wiewia sapwung kan en mahs, oh irail kin nantiong en wia dahme Koht kin kupwurki. Nan Paipel, lepin lokaia kan ni lokaiahn Ipru oh Krihk me kin pid wiliakapwala kin wehwehki pwurodohng. Wiewia wet kin kasansalehda me emen sohlahr kin wia sapwung kan ahpw kin sohpeiwong Koht. (1 Nanmwarki 8:33, 34) Ma emen pahn wiliakapwala, e pahn “wia soahng kan me pahn kasalehda me [e koluhla].” (Wiewia 26:20) Met kin wehwehki me kitail pahn tangasang kaudok likamw, kapwaiada sapwellimen Koht kosonned akan, oh kaudok ong Siohwa kelepw. (Deuderonomi 30:2, 8-​10; 1 Samuel 7:3) Wiliakapwala kin wehwehki atail madamadau kan, mehn akadei kan, oh pein atail irair akan pahn wekidekla. (Esekiel 18:31) Kitail kin “pwurodohng” ni ahnsou atail irair akan en aramas kapw kin uhd wiliandi atail irair suwed akan.​—Wiewia 3:19; Episos 4:20-​24; Kolose 3:5-​14.

Inou Sang Mongiong Unsek me Kesempwal

14. Ia wehwehn inou me irail sapwellimen Sises tohnpadahk kan kin wia?

¹⁴ Mwohn sapwellimen Sises tohnpadahk kan kin papidais, irail pil anahne inoukihong Koht arail mour unsek. Inou kin kasansalehda me emen kin katohrehla pein ih pwen wia mehkot sarawi ieu. Pwehki kahk wet me inenen kesempwal, kitail anahne wia kapakap ong Siohwa oh kasalehda atail pilipil en lelepek unsek ong Ih kohkohlahte. (Deuteronomy 5:9) E sansal me atail inou kaidehn ong emen aramas ahpw ong Koht.

15. Dahme kahrehda aramas akan me pahn papidais anhane kaduhdi nan pihl?

¹⁵ Ni ahnsou me kitail kin inoukihong Koht ki Krais atail mour, kitail kin kasansalehda me kitail kin nantiong en doadoahngki atail mour ong wia kupwuren Koht nin duwen me Paipel kin kasalehda. Pwen wia kilel ieu me emen wiahda eh inou, irail akan me kin papidais kin kaduhdi ong nan pihl, duwehte Sises papidaisla nan Pillap Sordan pwehn kasalehda me e toukihda pein ih en wia kupwuren Koht. (Madiu 3:13) Tehk duwen ire wet: Sises wia kapakap ni ahnsou kesempwal wet.​—Luk 3:21, 22.

16. Iaduwen kitail kak kasalehda atail peren ni ahnsou kitail kilang aramas akan papidais?

¹⁶ Ahnsou me Sises papidaisla, e kin wia ahnsou kesempwal oh kaperen ieu. Eri, papidais en Kristian nan rahnpwukat kin pil wia ahnsou kesempwal oh kaperen ieu. Ni ahnsou me kitail kin kilang aramas akan kasalehda ahr inou ong Koht ki papidais, kitail kak kasalehda atail peren ni atail kin lopolop oh kapinga irail ni wahu. Ahpw, pwehki kitail kin ese duwen sarawi en kasalepen wiewiahn pwoson wet, kitail sohte kin weriwer de kuwai, de pil wia soahng teikan me rasehng mehpwukat. Atail peren kin wiawi ni wahu.

17, 18. Dahme kin wiawi pwen kadehde ma aramas akan kakehr papidais?

¹⁷ Sounkadehdehn Siohwa kan sohte kin idingki aramas akan en papidaisla, irail kin weksang aramas akan me kin usupiki pihl pohn seri pwelel kan de idingkihong pwihn laud en aramas akan en papidaisla. Ni mehlel, irail sohte kin papidaisih aramas akan me saikinte alehdi irair en kehlail ni pali ngehn. Mwohn emen pahn kak wiahla sounkalohk en Rongamwahu me saikinte papidais, irail elder kan en Kristian pahn tehk kanahieng ma aramas menet kin wehwehki padahk kesempwal kan en Paipel, kapwaiada padahk pwukat, oh kin sapengki ei ong soangen peidek pwukat, “Ke uhdahn men wiahla emen Sounkadehdehn Siohwa kan?”

¹⁸ Ni ahnsou me aramas akan kin mehlelong doadoahk en kalohki Wehio oh pein kasalehda me irail men papidaisla, Kristian elder kan kin tuhpene pwen tehk ma re kin uhdahn ahneki pwoson oh ma irail wiahdahr arail inou ong Siohwa oh kapwaiada sapwellime koasondi kan ong papidais. (Wiewia 4:4; 18:8) Pasepeng kan sang rehrail ong peidek kan me tohto sang 100 me pid padahk kan en Paipel pahn kak sewese irail elder kan en wiahda arail pilipil ma aramas pwukat kin kapwaiada koasoandi en Paipel kan pwen kak papidais. Ekei aramas saikinte lel irairo, kahrehda irail sohte kak ale papidais en Kristian.

Dahme kin Kerempwa Iuk en Papidaisla?

19. Nin duwen pwuhken Sohn 6:44 mahsanih, ihs irail akan me pahn iang Sises kakaun?

¹⁹ Aramas tohto me kin idihdiong ren iang mwutumwut en aramas akan oh papidaisla ele kin ale kaweid me re pahn kohdahla nanleng ni ahnsou me irail pahn mehla. Ahpw, Sises mahsanih duwen sapwellime tohnpadahk kan me kin kahlemengih ih: “Sohte emen me pahn kak kohdo rehi, ma Semei me ketin kadariehdo sohte kainangihedo rehi.” (Sohn 6:44) Siohwa ketin karehdohng Krais irail meh 144,000 me pahn wiahla iengen Sises kaun akan nan Wehin nanleng. Irail me idihdiong papidaisla kan sohte kin kasarawihong en alehdi pwais lingan ehu nan sapwellimen Koht koasondi.​—Rom 8:14-​17; 2 Deselonika 2:13; Kaudiahl 14:1.

20. Dahme pahn kak sewese aramas akan me saikinte papidaisla?

²⁰ Tepida sang mpen sounpar 1935, irail aramas tohto me kin ahneki koapworopwor en pitsang “kahn kamakam kohwalap” oh mour kohkohlahte nin sampah kin iangala sapwellimen Sises “sihpw teikan.” (Kaudiahl 7:9, 14; Sohn 10:16) Irail pwukat kin warohng ren papidaisla pwehki irail kin kapwaiada Mahsen en Koht oh poakong Ih ‘sang nan kapehdarail unsek, mour unsek, kehl koaros unsek, oh madamadau unsek.’ (Luk 10:25-​28) Edetehn ekei aramas kin pohnese me Sounkadehdehn Siohwa kan kin ‘kaudokiong Koht ni ngehn oh mehlel,’ irail saikinte kahlemengih mehn kahlemeng mwahu en Sises oh saikinte papidaisla pwen kasalehda ong wehi pokon duwen arail limpoak mehlel oh lelepek ong Siohwa. (Sohn 4:23, 24; Deuderonomi 4:24; Mark 1:9-​11) Ma aramas pwukat pahn poaden kapakap oh wia kasalada ni oaretik, ele met pahn kak sewese irail en ngoangki oh eimah kapwaiada unsek Mahsen en Koht ni arail pahn wiahda arail inou mehlel sang nan kapehd unsek ong Siohwa Koht oh eri papidaisla.

21, 22. Kahrepe dah kei me ekei aramas akan kin pweiek en wiahda ahr inou oh papidaisla?

²¹ Ekei aramas kin pweiek en wiahda ahr inou oh papidaisla pwehki irail kin poakong sampah de irail kin men wiahla aramas kepwehpwe men kahrehong irail sohte ahneki ahnsou laud ong mehkan ni pali ngehn. (Madiu 13:22; 1 Sohn 2:15-​17) Ia uwen laud arail peren ma irail kin kawekihla ahr madamadau kan oh mehn akadei kan! Karanih Siohwa pahn sewese irail en kekeirada ni pali ngehn, oh katikitikila arail pwunod kan, oh wahdohng rehrail popohl oh nsenamwahu me kin kohsang arail kin kapwaiada kupwuren Koht.​—Melkahka 16:11; 40:8; Lepin Padahk 10:22; Pilipai 4:6, 7.

²² Aramas teikan kin nda me re kin poakong Siohwa ahpw irail sohte men wiahda ahr inou oh papidaisla pwehki re lemeleme ma irail sohte pahn papidaisla, eri, Koht sohte pahn kapwukoahkinirail arail wiewia kan. Ahpw emenemen kitail uhdahn pahn wehkohng Koht duwen pein ih. Ni ahnsou kitail tepida rong duwen mahsen en Siohwa, iei ahnsowo me kitail tepida pwukoahki pein atail mour ong Siohwa. (Esekiel 33:7-9; Rom 14:12) Nin duwen ‘aramas pilipil kei,’ mehn Israel akan en mahs kin ipwidi nan wehi inouda ieu ong Siohwa, oh mie arail pwukoa en papah Ih ni lelepek nin duwen sapwellime kosonned akan. (Deuderonomi 7:6, 11) Rahnwet, aramas akan sohte kin ipwidi nan wehi ieu me inoukihda ahr mour ong Koht, ahpw ma kitail alehdier kaweid mehlel en Paipel, kitail anahne pwoson oh kapwaiada.

23, 24. Aramas akan en dehr mweidong soangen pwunod dah kei en kahrehong irail en dehr papidaisla?

²³ Ekei aramas kin pweieksang papidaisla, pwehki re kin perki arail soh itarki akan ong loalokongkihla Paipel. Ahpw, atail kin sukuhliki duwen Paipel sohte pahn uhdi pwehki ‘aramas akan sohte pahn kak wehwehki duwen sapwellimen Koht mehlel doadoahk sang nin tepio lel ni imwi.’ (Eklesiasdes 3:11, New World Translation) Medemedewe duwen ohlen Idiopia. Nin duwen emen me iangala pelien lamalam mehn Suhs akan, e kin wehwehki duwen Paipel, ahpw e sohte kak sapengki peidek kan koaros duwen sapwellimen Koht kupwur kan. Mwurin e sukuhliki duwen sapwellimen Siohwa koasondi ong komour ki meirong tomw en Sises, ohl menet mwadangete papidaiski pihl.​—Wiewia 8:26-​38.

²⁴ Ekei aramas kin pweiek en wiahda ahr inou ong Koht pwehki re kin masak me irail pahn sohte kak kapwaiada arail inou. Monique me mahki sounpar 17 koasoia: “I kin pweiek sang papidais pwe I kin masak ma I sohte kak kapwaiada ai inou.” Ma kitail kin likih Siohwa ni mohngiongitail unsek, E pahn ‘kasalehiong kitail ahl me pwung.’ E pahn pil sewese kitail en “momourki mour mehlel” nin duwen sapwellime ladu lelepek kan me kin inoukihda arail mour ong Koht.​—⁠Lepin Padahk 3:5, 6; 3 Sohn 4.

25. Peidek dahieu me kesempwal kitail en koasoiapene?

²⁵ Pwehki aramas akan kin likih ni unsek Siohwa oh poakong ih, met kin kamwekid aramas kid kei ni ehu ehu sounpar en wiahda ahr inou ong Koht oh papidaisla. Oh sapwellimen Koht aramas inouda kan pil men kolokolte ahr lelepek ong ih. Ahpw, kitail kin momour nan ahnsou apwal akan, oh kitail kin pil lelong kasongpen atail pwoson akan. (2 Timoty 3:1-5) Dahme kitail kak wia pwen momourki atail inou ong Siohwa? Kitail pahn koasoiada met nan artikel en mwuhr.

[Nting tikitik me mi pahs]

Ke Tamanda?

• Iaduwen papidais en Kristian kin wiawi?

• Loalokong dahieu me kesempwal emen en ahneki mwohn e pahn kak papidaisla?

• Mehnia kahk kan kin sewese kitail en papidaisla nin duwen Kristian mehlel akan?

• Dahme kahrehda ekei kin pweiek sang papidais, ahpw dahme pahn kak sewese irail?

[Kilels nan Pali 24]

Ke wehwehki ia wehwehn papidaisla ‘ni mwaren Sahm, Sapwellime, oh ngehn sarawi’?