Kahluwahki Ahmw Elen Kahk Kan Kaweid Akan En Koht
“Siohwa kupwurki padahkihiuk pwe en wia kamwahu ehu ong uhk.”—AISEIA 48:17, NW.
1. Iaduwen Sounkapikpatailo kin kaweid aramas?
NI en saintis kan arail nannanti wehwehkihla soahng rir akan me pid duwen audepen nan wehwe, irail pwuriamweikihla uwen lap en kehl me keirek oh audehla pahn pwetenleng me pidakih kitail pene. Atail ketipin—me wia usu ieu me sais mwahute—kin wiahda lapalahn usu wet ahng de kehl me pahrekiong “pakudang billion pak 100 me audaudki angin hydrogen me pospeseng ni sekond ehu.” Sounkapikpen mehpwukat kak apwalih oh kaweid usu kan koaros ki sapwellime kehl en katangahwei. (Sohp 38:32; Aiseia 40:26) A iaduwen kitail aramas, me ahneki kisakis en saledek en pilipil, oh ese pilada tiahk mwakelekel, kak medemedewe imwilahn wiewia kan, oh kak wehwehki mehkan me pid atail pali ngehn? Iaduwen Sounkapikpatail a ketin pilada en kaweid kitail? Ni limpoak, E kin ketin kaweid kitail ki sapwellime kosonned unsek kan oh mehn kaweid kaselel akan, pwehn patehng atail kehl en wia kadeikpen loale me kin kasukuhlda mwahu.—2 Samuel 22:31; Rom 2:14, 15.
2, 3. Soangen elen peik dah me Koht kin kupwurperenki?
2 Koht kin kupwurperenki sapwellime mehn kapikipik loalokong kan me kak pilada en peikiong Ih. (Lepin Padahk 27:11) E sohte anahne en ketin koasoanehdi wasakis nan loaletail pwe kitail en peik, me rasehng dahme kin wiawihiong robot (misihn me mwomwen aramas) ahpw Siohwa kin ketikihong kitail saledek en pilipil pwe kitail en kak wiahda koasoandi kan sang atail wehwehki dahme pwung.—Ipru 5:14.
3 Sises, me kin wia mehn kasalepe mwahu en Semeo, mahsanih ong sapwellime tohnpadahk kan: “Eri, kumwail iei kompoakepahi, ma kumwail kin wia dahme I padahkihong kumwail. I solahr pahn kahdanekin kumwail ladu kan.” (Sohn 15:14, 15) Kawao, ladu kan sohte arail pilipil ahpw ihte ren peikiong ilek en arail kaun. Weksang met, kompoakepah kin poahsoankihda kasalepen irair akan me kin kaperenda mohngiong. Kitail kak wiahla kompoakepahn Siohwa. (Seims 2:23) Elen kompoakepah wet kin ale kakehlepe sang ni limpoak pwehn pali riau ni mehlel. Sises kin karasapene peikiong Koht oh limpoak ni ah mahsanih: “Mehmen me poakohng ie pahn kapwaiada ei padahk kan oh Semei pahn loalloale ih.” (Sohn 14:23) Pwehki Sahmo kin ketin loalloale kitail kupwurki en ketin kaweid kitail ni ahl me mwahu—Siohwa kin luhke kitail en mourki kaweid me E kin ketikihong kitail.
Kaweid Sang Koht
4. Ia wehwehn “mouren kaweid”?
4 Ia wehwehn “mouren kaweid kan”? “Mouren kaweid” kin wehwehki “oaralap pen de poahsoan en padahk mehlel: irair tehlap ehu oh poahsoan en kosonned, elen padahk, de madamadau en aramas teikan kin poahsoanda powe, de pil kosonned de elen kaweid kin kohsang ie.” (Webster’s Third New International Dictionary) Petehk keneinei en Paipel kasalehda me Samatail nanleng ketikihda mehn kaweid kesempwal kan me kipe soangsoangen irair en ahnsou kan oh irair en mour. E kin ketin wia met ohng mehn wia kamwahupatail ohng ahnsou kohkohlahte. Met kin pahrekiong dahme Nanmwarki Solomon ntingihdi: “Rong ie, samwa. Rong oh ale ei padahk kan ni mehlel, ke ahpw pahn mour werei. I pahn pil kaweid uhk nan ahl me erpit; I pahn kahluwaiuk nan ahl akan me pwung.” (Lepin Padahk 4:10, 11, NW) Elen kaweid akan me Siohwa kin ketikihda kin kesempwal ohng kitail ni atail ehuiong Ih oh pil ehuiong aramas teikan, ohng atail kaudok, oh ohng atail mour en ehuehu rahn. (Melkahka 1:1) Kitail tehkpene ekei mouren kaweid kesempwal kan.
5. Kihda ekei karasepen mouren kaweid kesempwal kan.
5 Me pid atail ehuiong Siohwa, Sises mahsanih: “Ke pahn poakohng Kauno [“Siohwa,” NW] omw Koht sang nan kapehdomw unsek, sang ni ngenomw unsek, sang ni omw lamalam koaros unsek.” (Madiu 22:37) Patehng met, Koht ketikihda kaweid akan me pid atail wiewiahiong aramas teikan, me duwehte “Kosonned Kesempwal” me mahsanih: “Eri, kumwail wiahiong meteikan me kumwail kin anahne aramas akan en wiahiong kumwail.” (Madiu 7:12; Kalesia 6:10; Taitus 3:2) Me pid duwen kaudok, kehkehlik kohwong kitail me mahsanih: “Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene.” (Ipru 10:24, 25) Me pid irair en atail mour en ehuehu rahn, wahnpoaron Pohl mahsanih: “Eri, mehkoaros me kumwail kin wia, sohte lipilipil, de mehkot me kumwail kin tungoale de nim, kumwail wia ong ni kalinganpen Koht.” (1 Korint 10:31) Kitail kak diar kaweid tohto me tohrohr nan Mahsen en Koht.
6. Iaduwen kaweid kan kin weksang kosonned akan?
6 Kaweid akan kin doadoahk, wia poahsoan en padahk mehlel, oh Kristian kan kin kaiahnda en poakohng irail. Siohwa kamwekid Solomon en ntingihdi: “Rong kanahieng dahme I nda. Rong ei koasoi kan. Dehr mweidohng en dohsang uhk. Tamataman oh kolokol nan kapehdomw. Padahk pwukat pahn kahrehda mour oh kakehlahda mehmen me wehwehki.” (Lepin Padahk 4:20-22) Iaduwen kaweid akan kin weksang kosonned akan? Kaweid akan iei me kin poahsoanehda kosonned akan. Kosonned akan, me kin oaritik, kin wiawihda ohng irair en ahnsou ieu de ohng irair ehu, ahpw kaweid kin sohte imwi. (Melkahka 119:111) Sapwellimen Koht kaweid akan sohte kin wereila oh eri suwedla de sohla doadoahk. Mahsen en soukohp Aiseia kin sansal me e mehlel: “Ei, dihpw kin mengila oh rohs kin pwupwudi; ahpw mahsen en atail Koht kin mour poatoapoat.”—Aiseia 40:8.
Medemedewe oh Mwekidki Kaweid akan
7. Iaduwen Mahsen en Koht kin kangoangehkin kitail en poahsoankihda atail madamadau oh wiewia kan pohn mouren kaweid akan?
7 “Mahsen en Koht” kin pwurupwurehng kangoangehkin kitail en poahsoankihda atail madamadau oh wiewia kan pohn mouren kaweid kan. Ni aramas akan peki rehn Sises en oaralapiheda Kosonnedo, E wiahda mahsen en kaweid riau—ehu kasansalehda limpoak ong Siohwa, oh meteio ong limpoak ohng mehn mpomw. (Madiu 22:37-40) Sises kin kihsang sapwellime kaweid sang ekei mahsen en Kosonned en Moses, me mih nan Deuderonomi 6:4, 5: “Kauno [“Siohwa,” NW] atail Koht, ihete me Koht. Eri, ke en poakohng Kauno [“Siohwa,” NW] omw Koht sang nan mohngiongomw unsek, ni ngenomw unsek, oh ni omw kehl koaros.” E sansal me Sises kin medemedewehki sapwellimen Koht kaweid me dierek nan Lipai 19:18. Ni imwila sansal, wehwe pwung oh kehlail en pwuhken Eklesiasdes, mahsen kan en Nanmwarki Solomon oaralapiheda diren sapwellimen Koht kosonned akan: “Mwurin mehpwukat koaros, meteieu me I pahn nda: lemmwiki Koht, oh kapwaiada sapwellime mahsen, pwehki ih kahrepe wet me aramas kepikipikihda. Koht pahn ketin kadeikada atail wiewia koaros, mehnda ma suwed de mwahu, mehnda ma pil mehkot me wiawi ni rir.”—Eklesiasdes 12:13, 14; Maika 6:8.
8. Dahme kahrehda e wia mehn perepe ong kitail ma kitail kolokol teng mouren kaweid kesempwal kan en Paipel?
8 Ni atail kin kolokol teng mouren kaweid kesempwal pwukat, e pahn kak sewese kitail en wehwehki oh kak idawehn kosonned akan. Ahpw, ma kitail sohte uhdahn wehwehki oh pil pwungki mouren kaweid kesempwal akan, kitail mwein sohte pahn kak wiahda pilipil pwung oh atail pwoson pahn mengei en mwerada. (Episos 4:14) Ma kitail katengehdiong soangen kaweid pwukat nan atail lamalam oh mohngiong, kitail pahn kak ahnsou koaros doadoahngki ni atail pahn wiahda pilipil akan. Ma kitail pahn wehwehki ahpw doadoahngki mehpwukat, kitail pahn pweida mwahu.—Sosua 1:8; Lepin Padahk 4:1-9.
9. Dahme kahrehda e sohte kin mengei en ahnsou koaros wehwehki oh idawehn mouren kaweid akan en Paipel?
9 Wehwehki oh doadoahngki mouren kaweid akan en Paipel sohte kin mengei duwehte idawehn kosonned akan. Nin duwen aramas soh-unsek kan, kitail kakete sohte doadoahngki mouren kaweid akan ni atail wia pilipil akan pwehki kitail pehm me e doadoahk laud en medemedewe iaduwen kitail pahn doadoahngki kaweid en Paipel me pid atail pilipilo. Kitail ele pahn men doadoahngki kosonned ehu ni ahnsou me kitail lelohng wiahda pilipil ieu de lelohng kahpwal laud ehu pwehki e mengei. Ekei pak, kitail ele kin rapahki kaweid sang emen Kristian mah—mwein emen elder nan mwomwohdiso—ni atail lemeleme me kitail pahn alehdi sang ih kosonned ieu me konehng atail irairo. Ahpw, ele Paipel de pwuhk kan me ntingkihda kaweid akan me kohsang nan Paipel, sohte kin kihda kosonned ehu me dokedoke ireo, de ma pil mie kosonned, a mwein e sohte kin kipe ahnsou koaros, de pil irair koaros. Ke mwein tamanda ohl emen me idek rehn Sises: “Maing, Sounpadahk, komw mahsanihong mahs rieio en nehkpeseng nanpwungat sohsohn at pahpao.” Sises sohte mwadangete kihda kosonned ieu pwe en kapwungala akamaio me wiawi nanpwungen pirieno, ahpw e kihong ih kaweid wet: “Kumwail kalekeikumwailsang noahrok suwed koaros.” Eri, Sises ketikihda mehn kaweid me katapan ahnsowo oh pil leledo ahnsou wet.—Luk 12:13-15.
10. Iaduwen atail wiewia kan me poahsoankihda mourki mouren kaweid akan kin kasalehda madamadau mehlel en mohngiongatail?
10 Ke mwein kin kilang aramas akan me kin mwadangete peikiong kosonned, pwehki arail masak ale kalokolok. Irail me wauneki mouren kaweid sohte kin ahneki soangen elen madamadau wet. Mour en kaweid kin kamwekid irail akan me kin idawehn en mwekidki audepen mohngiongarail. Ni mehlel, kaweid tohto sohte kin mwadangete wahdo kalokolok ma aramas sohte kapwaiada. Met kin kihong kitail ahnsou mwahu en kasalehda kahrepen atail kin peikiong Siohwa oh kin kasalehda audepen mohngiongatail. Kitail kin kilang karasepen met ni ahn Sosep sohpeisang wia tiahk suwed me ahn Podipar pwoudo me wiahiong ih. Edetehn Siohwa saikinte ketikihda kosonned ehu me sansal nan doaropwe me uhwong wia dipen kamwahl oh sohte kaweid sarawi me pid kalokolokpe wendi rehn ahn emen pwoud, Sosep ese mour en kaweid akan me pid lelepek ong sapwellimen Koht kasarawi en pwopwoud. (Senesis 2:24; 12:18-20) Kitail kak kilang sang ni ah pasapeng me soangen mour en kaweid wet kin inenen kamwekid ih ni e mahsanih: “Eri a, ia duwen ei pahn wiahda soangen sapwung laud wet, oh dipikihda mwohn Koht?”—Senesis 39:9.
11. Kristian akan men ale kaweid sang Siohwa me pid irair dah kan?
11 Rahnwet, Kristian akan men ale kaweid sang Siohwa me pid pein ahn emenemen irair akan me duwehte: ihs me e pahn werekiong, soangen mehn kamweit e pahn iang, oh keseng e pahn rong oh mehn wadawad akan me e pahn wadek. (1 Korint 15:33; Pilipai 4:8) Ni atail loalokong a pahn laudla, wehwe oh kalahnganki dahme Siohwa kin wia oh sapwellime ahl akan, atail mehn kadeikpen loale, atail tiahk mwakelekel, pwehn sewese kitail en doadoahngki mour en kaweid sarawi ni ahnsou soh lipilipil, pil lelohng mehkan me kitail kelepw pahn ese. Sang kaweid en Paipel, kitail sohte pahn rapahki masemwei nan sapwellimen Koht kosonned; oh kitail pil sohte pahn alasang irail oko me songosong en kilang ia uwen werein arail ahn kohkohwei oh sohte kauwehla kosonned ieu. Kitail esehier me soahng pwukat kin pein uhwong atail mour oh kin wiahda me suwed.—Seims 1:22-25.
12. Dahme kesempwal ma kitail men idawehn kaweid en Koht akan?
12 Kristian mah kan ese me dahme kesempwal ong idawehn kaweid en Koht akan iei en inengieng ese ia kupwuren Siohwa ong irair ehu me e pahn wia. Sounmelkahka mahsanih: “Kumwail me kin poakohng Siohwa, kumwail tateki me suwed.” (Melkahka 97:10, NW) Lepin Padahk 6:16-19 kin kairekihedi ekei soahng kan me Koht kin ketin kalahdeki ni ah mahsanih: “Mie soahng isuh me Kauno [“Siohwa,” NW] kin ketin suwedki oh inenen kalahdeki mehlel: mwomwen aklapalap, au likamw, peh kan me kin kemehla aramas me soh-dipe, mohngiong me kin koasoanehdi mehkot suwed, mehmen me kin mwadang en wiahda me suwed, sounkadehde me kin kalap lokaia likamw, oh aramas emen me kin kahrehda kahpwal nanpwungen irail kan me limpoakpene.” Ni ahnsou me kitail kin inengieng medemedewe kanahieng ia kupwuren Siohwa ong mehkan me kin kaweid atail mour, eri mour nin duwen kaweid akan pahn wia atail tiahk me sohte pahn kin wekiwekid.—Seremaia 22:16.
Poahsoankihda Loalamwahu Iei Me Anahn
13. Soangen madamadau dah me Sises kin kasalehda me kesempwal sang sapwellime Kapahrek en Pohn Dohl?
13 Esehla oh doadoahngki kaweid akan pil kin pere kitail sang iang pwupwudiong nan soangen kaudok me sohte mourih. Mie wekpeseng en idawehn kaweid akan oh idawehn mengihtik en kosonned akan. Sises kasansalehda met nan sapwellime Kapahrek en Pohn Dohl. (Madiu 5:17-48) Tamataman me irail me rongorong Sises—irail mehn Suhs kei, kahrehda arail wiewia kin poahsoankihda kosonned en Moses. Ahpw, ni mehlel, arail wehwehki Kosonnedo kin pirek sang uhdahno. Irail kin nsenohkihla wehwehn mesen nting kan nan Kosonnedo a kaidehn mouren Kosonnedo. Oh irail kesempwaliki laud arail tiahk kan—laud sang padahk en Koht. (Madiu 12:9-12; 15:1-9) Imwilahn met, aramas akan sohte kaiahniong en medemedewe mour en kaweid akan.
14. Iaduwen Sises sewese irail me kin rong ih en medemedewe duwen mouren kaweid kan?
14 Weksang met, Sises ketikihda nan sapwellime Kapahrek en Pohn Dohl mour en kaweid limau me pid tiahk en aramas: lingeringer, pwopwoud/mweipeseng, inou kan, ikih mehkot, oh limpoak/kailok. Nan ehuehu irair pwukat, Sises kasalehda kamwahupen idawehn mour en kaweid. Kahrehda, Sises kin kasalehong sapwellime tohnpadahk kan kesempwalpen idawehn mour en kaweid. Karasepe, me pid duwen tiahk en kamwahl, Sises ketikihong kitail kaweid me pahn pere kaidehn ihte atail wiewia kan, ahpw pil atail madamadau kan oh ineng kan: “Mehmen me pahn kilikilang lih emen oh men dihpki, nahn e wiadahr dipen kamwahl nan kapehde.”—Madiu 5:28.
15. Iaduwen atail kak irehdi sang kitail idawehn mengihtik en kosonned akan?
15 Karasepe wet kin kasalehda me kitail dehpa mwamwahlekihla kahrepe oh mour en sapwellimen Siohwa kaweid kan. Kitail en dehpa song en wia pwe Koht en kupwurkin kitailla sang ni mwohmw. Sises kasalehda sapwung en soangen madamadau wet ni ah kasalehda duwen sapwellime Koht mahk oh limpoak. (Madiu 12:7; Luk 6:1-11) Ma kitail pahn idawehn mouren kaweid en Paipel, kitail pahn pere kitail sang (oh pil kitail sohte pahn kasik me meteikan pahn anahne) songosong en mourki kosonned akan me kin nohn kakos me nda wia met oh ken dehr wia mwo, me kin kohla oh daulihala padahk en Paipel kan. Kitail pahn nsenohki tehk mouren kaweid kan me pid limpoak oh peik ong Koht kaidehn mwomwetail ong duwen atail pahn kaudok.—Luk 11:42.
Imwila Kaperen kan
16. Kihda karasepe kan en mouren kaweid me kin utung kosonned en Paipel.
16 Ni atail kin nantihong peikiong Siohwa, e kesempwal en wehwehki me sapwellime kosonned akan kin poahsoankihda mour en kaweid kesempwal akan. Karasepe, Kristian akan sohte pahn kaudokiong dikedik en eni kan, sohte pahn wia dipen kamwahl oh nenek oh pil sohte pahn doadoahngki nta ni ahl sapwung. (Wiewia 15:28, 29) Dahme kin poahsoanehda pilipil en Kristian akan ong ire kesempwal pwukat? Koht kin ketin warohng alehsang rehtail lelepek unsek; kitail en lelepekiong atail pwoud; oh Siohwa me Sounketikihda Mour. (Senesis 2:24; Eksodus 20:5; Melkahka 36:9) Ni atail pahn wehwehki oh kalahnganki poahsoanpen mouren kaweid pwukat, e kin kamengeiala kitail en alehda oh idawehn kosonned akan me utung kaweid pwukat.
17. Imwila mwahu dah kan me kak kohsang wehwehki oh doadoahngki mouren kaweid akan en Paipel?
17 Ni atail kin wehwehki oh doadoahngki mouren kaweid akan, kitail kin diarada me re kin wia mehn kamwahupatail. Kapai en pali ngehn akan me sapwellimen Koht aramas akan kin paiekihda kin iangodo kapai teikan me kitail kak kilang. Karasepe, irail akan me kin liksang simoak, oh kin mourki mour mwakelekel, oh wauneki sarawi en nta kin pil sohte lelohng soangsoangen soumwahu kei. Pil duwehte, mour pahrekiong padahk mehlel me kitail sukuhliki sang Paipel kak wia kamwahu ong ni palien mwohni, atail ehuong aramas teikan oh ahl teikan me pid atail mour en peneinei. Soangen kapai pwukat, me kitail kin kilang, kin wia mehn kadehdehpen mwahu en sapwellimen Siohwa kaweid me pid mour, oh kaweid pwukat me inenen konehng oh katapan ong atail mour. Ahpw, ale soangen kamwahu pwukat kaidehn iei kahrepe me keieu kesempwal me kitail en doadoahngki mouren kaweid kan sang Koht. Kristian mehlel akan kin peikiong Siohwa pwehki irail limpoak ong Ih, pwehki Ih me warohng sapwellimaniki arail kaudok oh pwehki iei me pwung irail en wia.—Kaudiahl 4:11.
18. Ma kitail men wia Kristian pweida kei, dahme pahn kahluwa atail mour?
18 Ma kitail pahn mweidohng mouren kaweid en Paipel en kahluwa atail mour, e pahn imwikihla elen mour me keieu mwahu, me meteikan kak kilang oh kahluwa irail dohng Koht. Me keieu kesempwal, atail elen mour kin kawahuwihala Siohwa. Kitail wehwehkihdahr me Siohwa iei Koht limpoak menme kin kupwurki dahme keieu mwahu ong kitail. Ni atail kin wiahda pilipil kan nin duwen kaweid en Paipel, kitail pahn kilang iaduwen Siohwa kin kapaiada kitail, oh met pahn kakaranih kitail dohng Ih. Ei, kitail kin kakehlailihala atail nanpwung mwahu ong Samatail nanleng.
Ke Tamataman?
• Ia wehwehn “mouren kaweid”?
• Iaduwen mouren kaweid kan weksang kosonned akan?
• Dahme kahrehda e wia kamwahu ong kitail en poahsoankihda atail madamadau oh wiewia kan pohn mouren kaweid akan?
[Kaokon nan Pali 28]
Wilson, emen Kristian sang Ghana, ah kaunen doadoahk padahkiong ih me mwurin rahn ekei e pahn lekideksang ah doadoahk. Ni kaimwiseklahn ah rahn en doadoahk, irail kilelehiong en kamwakele weren Managing Director en kompanio pein were sidohsa. Ahnsou me Wilson diar diren mwohni nan sidohsao, ah kauno ndaiong ih me Koht me ketikihdo mwohni ko pwe E mwahngih me Wilson pahn neksangehr doadoahk rahno. Ahpw, Wilson doadoahngki mouren kaweid en Paipel me pid mehlel, Wilson eri kapwurehlahng Director mwohni ko. Directoro inenen pwuriamweikihla oh lingankihda mehlel en Wilson, ih eri mwadangete padahkiong Wilson me e pahn wiahlahr tohndoadoahk mehlel oh pil kaiada en wiahla aramas lapalap nan kompanio.—Episos 4:28.
[Kaokon nan Pali 30]
Rukia iei emen lihen Albania me mahkier sounpahr 60 samwa. Pwehki nanpwung suwed en peneinei, e sohla kin lokaiahiong rie ohl erein sounpahr 17. Rukia eri tepida onop Paipel rehn Sounkadehdehn Siohwa kan oh sukuhliki me Kristian mehlel anahne ahneki meleilei rehn meteikan, oh sohte pahn inaptihnmwomw. Ih eri kapakap pwohngo pwon, oh ni ah saloh ih eri aluhlahng ni imwen rie ohlo. Nein rie ohl serepein kohdo oh ritingada wenihmwo. E pwuriamwei oh idek rehn Rukia: “Ihs me mehla? Dahme ke kohdohn wia?” Rukia eri idek ia rie ohlo. Ni lokaia meleilei, e kawehwehda me sang ni ah sukuhliki mouren kaweid en Paipel oh pil sukuhliki duwen Siohwa—soahng pwukat kamwekid ih en kohdo oh rapahki meleilei en miehla nanpwungen ih oh rie ohlo. Mwurin ara sengisengpene oh pwoalehdi emenemen, ira oh ara peneinei eri kamadipw pwehki kamwahupene wet!—Rom 12:17, 18.
[Kilel nan Pali 29]
[Kilel nan Pali 29]
[Kilel nan Pali 29]
[Kilel nan Pali 29]
“Ni Sises eh mahsanihada pokono, e ahpw ketidahla pohn dohl ehu oh ketidiong powe; a sapwellime tohnpadahk ko ahpw keiong mpe; oh e tapihada padahki irail.”—MADIU 5:1, 2