Mweidohng Sapwellimen Koht Kosonned oh Ire Mehlel kan en Kaiahne Kadeikpen Loalomw
‘I kin medemedewe sapwellimomwi kaweid kan.’—MEL. 119:99.
1. Dahme kasalehda me aramas weksang mahn akan?
SIOHWA ketikihong aramas akan mehkot tohrohr. Met iei kadeikpen loalatail. Met wia irair ehu me kasalehda atail weksang mahn akan. Ia duwen atail ese me mie kadeikpen loalen Adam oh Ihp? Mwurin ara sapeikiong Koht, ira rukusang ih. Kadeikpen loalara kahrehiong ira en pwunodada.
2. Ia duwen kadeikpen loalatail eh duwehte kampos ehu? (Menlau kilang tepin kilel.)
2 Kadeikpen loalatail iei atail pepehm en dahme pwung oh sapwung me kak kaweid kitail nan atail mour. Aramas emen me kadeikpen loale sohte kaiahnda mwahu kin duwehte sohp ehu me ohla kamposo. Kisinieng oh ahd en sehd kak kahrehiong sohpo en peila ehu wasa tohrohr. Ahpw kampos ehu me doadoahk mwahu pahn sewese kapdino en katanga mwahu sohpo. Ni ahlohte, ma kitail kaiahnehda kadeikpen loalatail ni pwung, e pahn kak kaweid kitail mwahu.
3. Dahme kak wiawi ma kitail sohte kaiahnehda kadeikpen loalatail ni pwung?
3 Ma kadeikpen loalatail sohte kaiahnda ni pwung, e sohte pahn kauhdi kitail sang wia mehkot sapwung. (1 Tim. 4:1, 2) E pahn kakete kahrehiong kitail en medewe me “me suwed me mwahu.” (Ais. 5:20) Sises mahsanihong sapwellime tohnpadahk kan: “Ahnsou ehu pahn kohdo me irail koaros me kemeikumwailla pahn leme me re kin papah Koht.” (Sohn 16:2) Met iei me irail kan me kemehla Stipen medewe. (Wiewia 6:8, 12; 7:54-60) Nan poadopoad, me tohto me kin poadidiong arail pelien lamalam kin wia tiahk mwersuwed kan, duwehte kamaramas, oh kose me re wia met ong Koht. Ahpw ni mehlel, dahme re wia uhwongada sapwellimen Koht kosonned kan. (Eks. 20:13) Eri e sansal me kadeikpen loalarail sohte kaweid irail ni pwung!
4. Ia duwen atail kak tehk mwahu me kadeikpen loalatail kin doadoahk mwahu?
4 Eri ia duwen atail kak tehk mwahu me kadeikpen loalatail kin doadoahk mwahu? Kosonned oh kaweid oh ire mehlel kan sang nan Paipel kin “mwahu ong padahk, ong peneu, ong kapwungala soahng kan, oh ong kaiahn nin duwen sapwellimen Koht koasoandi pwung.” (2 Tim. 3:16) Kitail anahne kaukaule onopki Paipel, doudouloale dahme e mahsanih, oh doadoahngki nan atail mour. Ni ahl wet, kitail pahn kalaudehla atail sukuhlki en ahneki soangen elen madamadauohte me Siohwa ketin sapwellimanki. Eri kitail kak kamehlele me kadeikpen loalatail kak kaweid kitail mwahu. Kitail pahn koasoiapene ia duwen atail kak doadoahngki sapwellimen Siohwa kosonned oh ire mehlel kan pwehn kaiahnehda kadeikpen loalatail.
MWEIDOHNG SAPWELLIMEN KOHT KOSONNED KAN EN KAIAHNE IUK
5, 6. Ia duwen sapwellimen Koht kosonned kan ar kin sewese kitail?
5 Ma kitail men sapwellimen Koht kosonned kan en sewese kitail, kitail anahne wia laudsang en ihte wadek de ese ia wehwehn. Kitail anahne poakohng oh wauneki kosonned pwukat. Paipel mahsanihong kitail: “Kumwail tatki me suwed, oh kesempwalki dahme mwahu.” (Eimw. 5:15) Ahpw ia duwen atail kak wia met? Kitail anahne sukuhlki en kilangwohng soahng kan duwehte Siohwa eh kin ketin kilangwohng soahng kan. Medewehla duwen met. Medewehla me ke sohte kin meir mwahu, oh omw toahkteo ndaiong uhk ken kang mwenge me mwahu ong omw roson, eksersais, oh wiahda wekidekla kan nan omw mour. Ke idawehn eh kaweid, oh e pweida mwahu! Ia pahn omw pepehm ong kaweid me toahkteo kihda?
6 Ni ahlohte, Sounkapikpatail ketikihong kitail kosonned kan pwehn pere kitail sang imwila suwed en dihp oh pil en kamwahwihala elen atail mour. Karasepe, Paipel padahkihong kitail me kitail en dehr likamw, pirap, wia tiahk samin me pid nsenen pwopwoud, kasalehda tiahk lemei, de wia sohte lipilipil soahng kan me pid wunahni. (Wadek Lepin Padahk 6:16-19; Kaud. 21:8) Ni atail pehm imwila mwahu kan sang atail peikiong Siohwa, atail limpoak ong ih oh sapwellime kosonned kan kin laudla.
7. Ia duwen soahng kan me wiawi nan Paipel eh kak sewese kitail?
7 Kitail sohte anahne lokolongki imwila suwed kan me kohsang atail kauwehla sapwellimen Koht kosonned kan pwehn esehla dahme pwung oh sapwung. Kitail kak sukuhlkihsang sapwung kan me meteikan wiahda mahso. Karasepe pwukat kileldi nan Paipel. Lepin Padahk 1:5 (NW) mahsanih: “Aramas loalokong men kin rong oh alehdi kaweid tohto.” Kaweid wet kohsang rehn Koht oh met kaweid me keieu mwahu! Karasepe, medewehla ia uwen Depit eh lokolok mwurin eh sapeikiong Siohwa oh wia tiahk samin me pid nsenen pwopwoud rehn Padsipa. (2 Sam. 12:7-14) Ni omw wadek duwen met, pein idek rehmw: ‘Ia duwen Depit eh kakete soikala kahpwal pwukat? Dahme I pahn wia ma I lelohng soangen irairohte? I pahn wia tiahk samin me pid nsenen pwopwoud duwehte Depit de I pahn tangasang duwehte me Sosep wia?’ (Sen. 39:11-15) Ma kitail medewe mwahu duwen imwila suwed kan me kohsang dihp, e pahn laudla atail “tatki me suwed.”
8, 9. (a) Dahme kadeikpen loalatail kin sewese kitail en wia? (b) Ia duwen kadeikpen loalatail oh sapwellimen Siohwa ire mehlel kan eh kin doadoahkpene?
8 Kitail kin soikala soahng kan me Koht ketin kalahdeki. Ahpw mie soangen irair teikan me Paipel sohte kasalehda kosonnedpe. Ia duwen atail ese dahme Koht kupwurki kitail en wia? Ma kitail mweidohng Paipel en kaiahne kadeikpen loalatail, kitail pahn wiahda pilipil loalokong ehu.
9 Pwehki Siohwa ketin poakohng kitail, e ketikihda ire mehlel kan me kak kaweid kadeikpen loalatail. E ketin kawehwehda: “Ngehi me KAUN-O omw Koht, me kupwurki padahkihiuk pwe en wia kamwahu ehu ong uhk oh kaweid uhk nan ahl me ke pahn keid ie.” (Ais. 48:17, 18) Ni atail doudouloale kaweid oh ire mehlel kan sang nan Paipel oh mweidohng mepwukat en sair mohngiongitail, kitail kak kapwungala kadeikpen loalatail. Met kin sewese kitail en wiahda pilipil loalokong kan.
MWEIDOHNG SAPWELLIMEN KOHT IRE MEHLEL KAN EN KAWEID UHK
10. Dahme kaweid oh ire mehlel kan kin sewese kitail en wia, oh ia duwen Sises eh ketin doadoahngki nan sapwellime padahk?
10 Kaweid oh ire mehlel kan kin kaweid atail madamadau oh kin sewese kitail en wiahda pilipil mwahu kan. Atail ese sapwellimen Siohwa ire mehlel kan kin sewese kitail en wehwehki sapwellime madamadau oh dahme kahrehda e ketikihong kitail ekei kosonned kan. Sises ketin doadoahngki kaweid oh ire mehlel kan pwehn padahkihong sapwellime tohnpadahk kan me mie imwilahn arail madamadau oh wiewia kan. Karasepe, e ketin padahngki me lingeringer kin imwikihla tiahk lemei, oh ahneki madamadau samin me pid nsenen pwopwoud kin imwikihla kamwahl. (Mad. 5:21, 22, 27, 28) Ni atail mweidohng sapwellimen Siohwa ire mehlel kan en kaweid kitail, kadeikpen loalatail pahn kaiahnda mwahu, oh kitail pahn wiahda pilipil kan me pahn kawauwihala Koht.—1 Kor. 10:31.
Kristian koahiek men kin wauneki kadeikpen loalen meteikan (Menlau kilang parakrap 11, 12)
11. Ia duwen kadeikpen loalen emen eh kak weksang kadeikpen loalen meteikan?
11 Ni Kristian kan ar kin doadoahngki Paipel pwehn kaiahnehda kadeikpen loalarail, arail madamadau ong soangen irair kei pahn kakete wekpeseng. Ehu karasepen met iei me pid ma emen en nim sakau en wai de soh. Paipel sohte mahsanih me e sapwung en nim sakau, ahpw e kehkehlikihong kitail me kitail en dehr nim daulihala de sakaula. (Lep. Pad. 20:1; 1 Tim. 3:8) Ia duwe, met wehwehki me ni Kristian men eh sohte kin nim sakau daulihala, e sohte anahne medewe mehkot ni eh wiahda eh pilipilo? Soh. Mehnda ma pein kadeikpen loale mweidohng en nim sakau, e anahnehte medewe duwen kadeikpen loalen meteikan.
12. Ia duwen Rom 14:21 eh kak sewese kitail en wauneki kadeikpen loalen meteikan?
12 Pohl kasalehda me kitail anahne wauneki kadeikpen loalen meteikan ni eh ntingihedi: “Me keieu mwahu iei en dehr kang uduk de nim wain de wia mehkot me pahn kahrehiong riomw men en dipekelekel.” (Rom 14:21) Eri mendahki mie atail pwuhng en nim sakau, kitail pahn men tounmeteikihla met ma kitail ese me nim sakau pahn kadipikelekelih kadeikpen loalen Kristian teikan. Ele brother men kin apwalki uhdihsang nim sakau mwohn eh esehla padahk mehlel oh pilada en sohla douluhl nim sakau. Kitail sohte pahn men wia mehkot pwehn kahrehiong ih en pwurehng wia dahme e kin wia mahso. (1 Kor. 6:9, 10) Ia duwe, ma kitail kasamwohdo brothero ni imwatailo, kitail pahn song en wia pwehn iang nim sakau, mehnda ma e sohte men ale? Uhdahn soh!
13. Ia duwen Timoty eh wauneki kadeikpen loalen meteikan pwehn sewese irail en esehla rongamwahwo?
13 Ni Timoty eh wia mwahnakapw men, e pwungki en sirkumsaisla mendahki e kamedek. E ese me sirkumsais wia mehkot kesempwal ong mehn Suhs ko me e pahn kalohk ong. Timoty, pil duwehte Pohl, sohte men kadipikelekelih meteikan. (Wiewia 16:3; 1 Kor. 9:19-23) Ia duwe, ke pil men wiahda tounmetei pwehn sewese meteikan?
“NANTIHONGETE KOAHIEKLA”
14, 15. (a) Ia wehwehn en koahiekla? (b) Ia wiewiahn Kristian koahiek kan ong meteikan?
14 Kitail koaros pahn men “doula sangehr tepin padahk kan duwen Krais” oh “nantihongete koahiekla.” (Ipru 6:1) Kitail sohte kin wiahla Kristian koahiek kei ihte pwehki kitail mi nan padahk mehlel sounpar tohto. Kitail kin anahne “nantihongete” pwehn koahiekla. Kitail anahne doulahte kalaudehla atail loalokong oh wehwehki soahng kan. Eri kitail anahne wadek Paipel rahn koaros. (Mel. 1:1-3) Ni omw wadek Paipel rahn koaros, ke pahn wehwehkihla mwahu sapwellimen Siohwa kosonned oh ire mehlel kan.
15 Kosonned dahieu me keieu kesempwal ong Kristian kan? Kosonned me pid limpoak. Sises mahsanihong sapwellime tohnpadahk kan: “Pwe koaros pahn esehki me kumwail nei tohnpadahk kan—ma kumwail kin limpoakpene nanpwungamwail.” (Sohn 13:35) Paipel kahdaneki limpoak “kosonned en nanmwarki” oh “kapwaipen kosonnedo.” (Seims 2:8; Rom 13:10) Kitail sohte kin pwuriamweiki me limpoak uhdahn kesempwal, pwehki Paipel mahsanih me “Koht iei limpoak.” (1 Sohn 4:8) Ong Koht, limpoak wia mehkot me laudsang ihte pepehm ehu. E ketin kadehdehda sapwellime limpoak sang sapwellime wiewia kan. Sohn ntingihedi: “Iet duwen limpoak en Koht eh sansalda me pid duwen kitail, me Koht ketin poaronedohng sampah sapwellime Iehros pwe kitail en ale mour pwehki ih.” (1 Sohn 4:9) Ni atail kin kasalehiong Siohwa, Sises, riatail Kristian kan, oh aramas teikan atail limpoak, kitail kin kadehdehda me kitail wia Kristian koahiek kei.—Mad. 22:37-39.
Kadeikpen loalatail pahn kaweid kitail mwahu ni atail medewe ni toupahrek kaweid oh ire mehlel kan sang nan Paipel (Menlau kilang parakrap 16)
16. Ni atail wiahla Kristian koahiek kei, dahme kahrehda e kin laudla atail kesempwalki kaweid oh ire mehlel kan?
16 Ni atail wiahla Kristian koahiek kei, atail kesempwalki kaweid oh ire mehlel kan kin laudla. Kosonned kan kin kalapw dokedoke soangen irair ehu, ahpw kaweid oh ire mehlel kan kin dokedoke soangsoangen irair tohto. Karasepe, seri pwulopwul men sohte wehwehki ia uwen keper en kompoakepahnkihla aramas suwed kan, eri eh pahpa nohno kin anahne wiahda kosonned kan pwehn pere ih. (1 Kor. 15:33) Ahpw ni serio eh koahiekla, e sukuhlki ia duwen eh kak medewe ni toupahrek kaweid oh ire mehlel kan sang nan Paipel pwehn wiahda pilipil kan. Kaweid oh ire mehlel pwukat pahn sewese ih en pilada kompoakepah mwahu kan. (Wadek 1 Korint 13:11; 14:20.) Ni atail kalaudehla atail kin medewe ni toupahrek duwen kaweid oh ire mehlel kan sang nan Paipel, e pahn laudla atail kin likih kadeikpen loalatail. E kin kalaudehla atail wehwehki dahme Koht kupwurki kitail en wia nan soangen irair sohte lipilipil.
17. Dahme kahrehda kitail kak nda me kitail ahneki dahme kitail anahne pwehn wiahda pilipil loalokong kan?
17 Mie soahng koaros me kitail anahne pwehn wiahda pilipil kan me pahn kaperenda Siohwa. Nan Paipel, kitail kin diarada kosonned oh kaweid oh ire mehlel kan me kin sewese kitail en “uhdahn koahiekla oh onopadahr ni unsek ong doadoahk mwahu koaros.” (2 Tim. 3:16, 17) Kaweid oh ire mehlel kan sang nan Paipel kin sewese kitail en “wehwehkihla dahme Siohwa ketin kupwurki.” Ahpw kitail kin anahne nantihong en diarada kaweid oh ire mehlel pwukat. (Ep. 5:17) Pwehn sewese kitail, mie neitail mehn sawas kan duwehte Sawas ong Wia Roporop en Sounkadehdehn Siohwa kan, Watch Tower Publications Index, Watchtower Library, Watchtower ONLINE LIBRARY, oh JW Library app. Ni atail doadoahngki mehn sawas pwukat, kitail pahn paiekihda pein atail onop oh onop en peneinei.
KADEIKPEN LOALATAIL ME KAIAHNDA SANG PAIPEL KIN WAHDO KAPAI
18. Dahme kin wiawi ni atail doadoahngki sapwellimen Siohwa kosonned oh ire mehlel kan nan atail mour?
18 Atail mour kin uhdahn pweida mwahu ni atail doadoahngki sapwellimen Siohwa kosonned oh ire mehlel kan! Melkahka 119:97-100 mahsanih: “Ia uwen ei poakohng sapwellimomwi kosonnedo! I kin medemedewe sang nimenseng lel nipwong. Sapwellimomwi kosonnedo kin ieiang ie ahnsou koaros oh kin kahrehda ei loalokong sang ei imwintihti. I loalokong sang ei sounpadahk kan koaros, pwehki ei kin medemedewe sapwellimomwi kaweid kan. I koahiek sang me mah kan, pwehki ei kin kapwaiada sapwellimomwi kosonned kan.” Ni atail kin doadoahngki ahnsou pwehn doudouloale sapwellimen Koht kosonned oh ire mehlel kan, atail mwekid ni erpit oh dehde mwahu pahn laudla. Oh ni atail doadoahngki sapwellime kosonned oh ire mehlel kan pwehn kaiahnehda kadeikpen loalatail, kitail pahn “wiahla aramas koahiek kei, oh uhdahn koahiekla duwehte Krais.”—Ep. 4:13.