Kasalehda Limpoak-kadek Ong Irail Me Anahne Sawas

“Kasalehda limpoak-kadek nanpwungamwail.”​—SEKARAIA 7:9, NW.

1, 2. (a) Dahme kahrehda kitail anahne kasalehda limpoak-kadek? (b) Mehnia peidek kan me kitail pahn koasoipene?

SAPWELLIMEN KOHT MAHSEN kin kangoange kitail en kasalehda “limpoak-kadek.” (Maika 6:8, footnote) E pil kin kawehwehda kahrepe kan kitail anahne en wia met. Ehu kahrepe iei me “aramas emen me kin kasalehda limpoak-kadek pahn ale kapai kan.” (Lepin Padahk 11:17, NW) Met inenen mehlel! Ma kitail pahn kasalehda limpoak-kadek, de limpoak poatopoat, met kin sewese kitail en ahneki nanpwung mwahu rehn aramas teikan. Imwilahn met: kitail pahn ahneki kompoakpatail lelepek kan​—kating kesempwal mehlel ieu!​—Lepin Padahk 18:24.

² Paipel kin pil padahkiong kitail: “Mehmen me kin rapahki pwung oh limpoak-kadek pahn diarada mour.” (Lepin Padahk 21:21, NW) Ei, ma kitail pahn kasalehda limpoak-kadek, met pahn sewese kitail en karanih Koht oh kitail pahn kak ale kapai kan ni ahnsou kohkohdo, iangahki mour soutuk. Ahpw, iaduwen kitail kak kasalehda limpoak-kadek? Kitail anahne kasalehong ihs limpoak-kadek? Limpoak-kadek kin weksang kadek me aramas kin kasalehda?

Kadek en Aramas oh Limpoak-Kadek

3. Ia wekpeseng limpoak-kadek oh kadek en aramas?

³ Kadek en aramas oh limpoak-kadek kin wekpeseng. Karasepe ieu, kadek en aramas kin kalap pwarada nanpwungen aramas akan mendahki ma irail sohte nohn kin ese emenemen. Ahpw, ma kitail pahn kasalehda limpoak-kadek ong aramas emen, met kin wehwehki me kitail men karanih aramaso oh kasalehong ih limpoak. Nan Paipel, limpoak-kadek nanpwungen aramas akan kin wiawi pwehki arail pehsepeneiehr mahs. (Senesis 20:13; 2 Samuel 3:8; 16:17) De, wiewiahn limpoak-kadek kin poahsoankihda wiewia kadek kan me wiawiher mahs. (Sosua 2:1, 12-14; 1 Samuel 15:6; 2 Samuel 10:1, 2) Pwehn sewese kitail en wehwehki duwen wekpeseng en irair riau pwukat, kitail pahn kilang karasaras riau nan Paipel, ehu me kin pid kasalehda kadek en aramas oh pil ehu me kin pid kasalehda limpoak-kadek oh kasalehda irair pwukat nanpwungen aramas akan.

4, 5. Iaduwen poadopoad riau nan Paipel kin kasansalehda wekpeseng en kadek me aramas kin kasalehda oh limpoak-kadek?

⁴ Ehu karasaras duwen kasalehda kadek en aramas ong pwihn en aramas ieu iangahki wahnpoaron Pohl ni ahnsou me wararail sohp seradahng pohn takai kan. Irail ahpw papolong nan deke me adaneki Malda. (Wiewia 27:37–28:1) Mendahki mehn Malda kan sohte ese irail kahrehda re sohte pweipwandkihong irail mehkot de anahne kapwurehong irail mehkot, tohn dekeo kasamwo irail mehn keiru kan, oh kin “inenen kadek” ong irail. (Wiewia 28:2, 7) Arail kasamwo aramas pwukat me kadek, ahpw irail sohte pilahn en wia met oh arail kadek pil kohwong aramas akan me irail sehse. Eri, soangen kadek wet iei kadek me aramas akan kak kasalehda nanpwungarail.

⁵ Menlau kapahrekihpene dahme wiawi nan dekehn Malda ong kadek me Nanmwarki Depit kasalehong Mepiposed, nein kompoakepah Sonadan. Depit padahkiong Mepiposed: “Ke pahn kin iang ie tungoal ni ei tehpel ahnsou koaros.” Depit kawehwehda ia kahrepe e wiahda koasoandi wet: “Pwe I pahn kadekohng uhk pwehki omw pahpa Sonadan.” (2 Samuel 9:6, 7, 13) Kadek poatopoat me Depit kasalehda iei kasalepen limpoak-kadek, kaidehn ihte soangen kadek me aramas akan kak kasalehda nanpwungarail, pwe kadek wet kin kasalehda ahn Depit lelepek ong emen me e karanih. (1 Samuel 18:3; 20:15, 42) Duwehte rahnwet, sapwellimen Koht ladu kan kin kasalehda kadek ong aramas koaros. Ahpw, re kin kasalehda limpoak-kadek de limpoak poatopoat ong irail akan me kenikenla rehn Koht.​—Madiu 5:45; Kalesia 6:10.

6. Mahsen en Koht kin kasansalehda irair dah kei en limpoak-kadek nanpwungen aramas akan?

⁶ Pwehn sewese kitail en wehwehki pil ekei irair akan en limpoak-kadek, kitail pahn ni mwotomwot koasoiapene poadopoad siluh me mihmi nan Paipel me kin kasansalehda irair wet. Sang poadoapoad pwukat, kitail pahn sukuhliki me aramas akan kin kasalehda limpoak-kadek (1) sang ahr wiewia kan, (2) perenkihda kasalehda irair wet, oh (3) re kin kasalehong aramas akan me anahne sawas. Oh pil, poadoapoad pwukat pahn kasansalehda iaduwen kitail pahn pil kak kasalehda limpoak-kadek rahnwet.

Sahm Emen Me Kin Kasalehda Limpoak-Kadek

7. Dahme nein Eipraam laduwo ndaiong Petuel oh Lapan, oh koasoi kesempwal dahieu e pil kihda?

⁷ Pwuhken Senesis 24:28-67 kin kawehwehda duwen poadopoad en nein Eipraam laduwo, me kawehwehda nan artikel en mwowe. Mwurin e tuhwong Repeka, e ale luhk en pedolong nan imwen ahn Repeka pahpa, Petuel. (Iretikitik kan 28-32) Ih ahnsowo me laduwo kawehwehda ni oaretik duwen eh kin rapahki emen serepein pwehn pwoudikihda nein Eipraam pwutak. (Iretikitik kan 33-47) E kawehwehda duwen eh madamadau ong dahme pweida ni ahnsowo, me met kin wia kilel ieu me kohsang rehn Siohwa, “Koht en ei soumas Eipraam, me ketin kahluwaiedohng rehn rien ei soumaso, wasa I diarehr ie en nein ei soumasao pwutak eh pwoud.” (Iretikitik 48) Laduwo koapworopwoarki me eh kawehwe ni oaretik me kohsang mohngiongih duwen dahme wiawiehr pahn kak kamwekid Petuel oh nah pwutak Lapan en kamehlele me Siohwa ketin kapaiada doadoahk wet. Laduwo koasoia: “Eri, ma komw men kasalehong ei soumaso limpoak-kadek, a komw menlau padahkihdo; ma soh, komw pil mahsanihodo, pwe I en koasoanehdi dahme I pahn wia.”​—Iretikitik 49.

8. Iaduwen Petuel mwekidkihda irair pwukat me kin pid Repeka?

⁸ E sansal me Siohwa ketin kasalehongehr Eipraam limpoak-kadek. (Senesis 24:12, 14, 27) Eri, Petuel pahn pil kasalehda limpoak-kadek ni eh pahn mweidong Repeka en iangada nein Eipraam laduwo? Iaduwen​—limpoak-kadek en aramas pahn pil patehng sapwellimen Koht limpoak-kadek pwe koasoandi wet en kak pweida mwahu? De iaduwen​—seiloak doh me ladu menet wia pahn sohte katepe? Nein Eipraam laduwo me inenen perenkihda rong Lapan oh Petuel sapeng: “Irair wet eh kohsang ni kupwuren Siohwa.” (Iretikitik 50, NW) Eri, e sansal me ira wehwehki me Siohwa ketin koasonehdi met en wiawi, oh ira mwadangete kapwaiada sapwellime kupwur kan. Mwurin met, Petuel kasalehda limpoak-kadek ni ih eri nda met: “Eri, iet Repeka; komw ale oh ketikihda. En pwoudikihda nein omw soumaso, pwutak, nin duwen me Kauno [“Siohwa, NW] ketin kupwurkiher.” (Iretikitik 51) Repeka perenki iangada nein Eipraam laduwo, oh mwuhr e wiahla ahn Aisek pwoud.​—Iretikitik kan 49, 52-58, 67.

Emen Ohl me Kasalehong Semeo Limpoak-Kadek

9, 10. (a) Dahme Seikop peki rehn nah ohl Sosep? (b) Iaduwen Sosep kasalehda limpoak-kadek ong semeo?

⁹ Limpoak-kadek pil kohwong nein nein Eipraam pwutak me ede Seikop. Senesis irelaud 47 kin kawehwehda me Seikop eri kousoanla nan Isip, oh “kereniongehr mehla.” (Iretikitik kan 27-29) Seikop kin pwunod pwe e ese me e pahn mehla likin sahpwo me Koht ketin inoukihong Eipraam. (Senesis 15:18; 35:10, 12; 49:29-​32) Seikop sohte men seridi nan sapwen Isip, kahrehda e koasonehdi me re pahn wahla paliwere ni sapwen Kenan pwehn seridi wasao. Mie emen me pahn kak konehng sang Sosep oh ahneki manaman duwehte ih me kak kapwaiong ahn Seikop ah pekipek?

¹⁰ Paipel mahsanih: “Ni eh kereniongehr mehla, e ahpw ekerodo nah pwutak Sosep oh ndaiong: ‘Ma I kenikenla rehmw, . . . ke anahne kasalehong ie limpoak-kadek oh loaloapwoat. (Mour en ah koasoi iei: “Menlau, dehr serepiehdi nan Isip.”) I anahne seridi wasao me semei ko seridi ie. Eri, ke pahn waielahsang Isip, oh sarepiehdi nan ar sousou ko.’ ” (Senesis 47:29, 30) Sosep inoukihong semeo me e pahn kapwaiada pekipek wet, oh sohte pwand, Seikop mehla. Sosep oh nein Seikop ohl teikan wahlahng “Kenan, oh sarepedi nan pwoaren paipo nan Makpela, wasa me Eipraam pwainsang Epron, mehn Id, pwe en wiahla eh wasahn sousou.” (Senesis 50:5-8, 12-​14) Eri, Sosep kasalehong semeo limpoak-kadek.

Limpoak-Kadek Sang Rehn Ahn Nah Pwutak Pwoud

11, 12. (a) Iaduwen Rud kasalehong Naomi limpoak-kadek? (b) Ni ahl dahieu me Rud kasalehda limpoak-kadek mwuhr mwahu sang “nin tepio”?

¹¹ Pwuhken Rud kin kawehwehda iaduwen Rud, mehn Mohap, kasalehda limpoak-kadek ong ahn eh pwoud ah nohno liohdi men. Ni ahnsou me Naomi wiahda ah pilipil en pwurala Pedleem nan wehin Suda, Rud kasalehda limpoak-kadek oh uwen laud e men iang Naomi: “Wasa kis ke pahn kohla ie, iei wasa me I pil pahn kohla ie; wasa kis ke pahn kousoan ie, iei wasa me I pil pahn kousoan ie. Kisehmw kan iei kisehi; oh omw Koht iei ei Koht.” (Rud 1:16) Mwuhr, Rud kasalehong Naomi limpoak-kadek ni e pwungki en pwoudki ahn Naomi peneinei ohl mah men, Pohas.a (Deuderonomi 25:5, 6; Rud 3:6-9) E padahkiong Rud: “Omw limpoak-kadek me ke kasalehda ni ahnsou wet me mwahu sang nin tepio, pwehki ke sohte rapahki mwahnakapw emen me kepwehpwe de semwehmwe.”​—Rud 3:10.

¹² Ni ahnsou me Rud kasalehda limpoak-kadek “nin tepio” met kin wehwehki ahnsou e kohkohlahsang eh peneinei oh iangada Naomi. (Rud 1:14; 2:11) Ahpw, limpoak-kadek me e kasalehda “nin tepio” sohte duwehte limpoak-kadek me e kasalehda mwuhr​—iei me Rud pwungki en pwoudki Pohas. Kahrehda, Rud kakehr wiliandi Naomi oh neitikihada kadaudoke pwehki Naomi dauliher sounpar en neitik. Pohas oh Rud eri pwopwoudada, oh ni ahnsou me Rud neitik, lih en Pedleem weriwerki: “Seri ohl emen ipwidiong Naomi.” (Rud 4:14, 17) Rud “lih mwahu men” oh ih eri ale kating sang rehn Siohwa ni e wiahla nohno kahlap en Sises Krais.​—Rud 2:12; 3:11; 4:18-​22; Madiu 1:1, 5, 6.

Kasalehda Limpoak-Kadek Sang Arail Wiewia Kan

13. Iaduwen Petuel, Sosep, oh Rud kasalehda limpoak-kadek?

¹³ Ke kilang iaduwen Petuel, Sosep, oh Rud kasalehda arail limpoak-kadek? Re kin kasalehda limpoak-kadek kaidehn ihte sang arail lokaia kadek kan ahpw sang arail wiewia mwahu kan. Petuel sohte ihte nda, “Eri, iet Repeka” ahpw e “mweidala Repeka en iangada irail.” (Senesis 24:51, 59) Sosep sohte ihte ndaiong semeo: “I pahn kapwaiada kupwuromwien” ahpw ih oh rie pwutak kan “kapwaiada soahng koaros me arail pahpao kehkehlingkiong irail en wia.” (Senesis 47:30; 50:12, 13) Rud pil sohte ihte nda, “Wasa kis ke pahn kohla ie, iei wasa me I pil pahn kohla ie” ahpw e kohkohlahsang eh peneinei oh iangada Naomi, oh “ira ahpw seiseiloak lao lel Pedleem.” (Rud 1:16, 19) Nan Suda, Rud kapwaiada “soahng koaros me Naomi padahkihong.” (Rud 3:6) Ei, Rud oh aramas teikan me kin kasalehda limpoak-kadek, kin kasalehda met sang arail wiewia kan.

14. (a) Rahnwet, iaduwen sapwellimen Koht ladu kan kin kasalehda limpoak-kadek? (b) Nan ahmw mwomwohdiso, Kristian akan kin kasalehda limpoak-kadek ni ahl dah kei?

¹⁴ E inenen kansenamwahu en kilang iaduwen sapwellimen Koht ladu kan nan rahnwet kin pousehlahte kasalehda limpoak-kadek sang arail wiewia kan. Karasepe ieu, medemedewe duwen irail akan me kin kangoange aramas soumwahu kan, nsensuwed kan, de iengarail kan me kin pahtou. (Lepin Padahk 12:25) De medemedewe duwen Sounkadehdehn Siohwa tohto me limpoak oh kin kaukaule idanlahng riarail me mah kan nan Kingdom Hall pwehn iang towehda mihding en mwohmwohdiso kan nan wihk koaros. Anna, me mahki sounpar 82 oh iang soumwahu en nan koakon medek, kin wiliwilian pepehm en me tohto ni a koasoia: “Peidaidlahng wasahn mihding kin wia kapai ieu me kohsang rehn Siohwa. I kin kalahngankihong Ih sang nan ahi mohngiong unsek pwehki E kin ketikihong ie soangen brother oh sister limpoak pwukat.” Ke kin iang wie soangen wiewia mwahu kan nan ahmw mwomwohdiso? (1 Sohn 3:17, 18) Ma ke kin wia met, ke kak kamehlele me irail me kin ale soangen sawas pwukat kin kalahnganki limpoak-kadek me ke kin kasalehda.

Ken Perenki Wia Met

15. Sang poadoapoad siluh pwukat nan Paipel, ia pil ehu irairen limpoak-kadek?

¹⁵ Poadopoad en Paipel pwukat me kitail ahpwtehn koasoiapene kin kasalehda me aramas akan me kin kasalehda irairen limpoak-kadek kin perenki wia met, kaidehk ni mehnseiren. Petuel perenki sewese nein Eipraam ladu, oh Repeka pil perenki wia iang nein Eipraam ladu oh pwoudki Aisek. (Senesis 24:51, 58) Aramas akan sohte anahne kangoange Sosep en kasalehda limpoak-kadek. (Senesis 50:4, 5) Rud “ngoangki mehlel en iang Naomi.” (Rud 1:18) Ni ahnsou me Naomi padahkihong Rud en tuhwong Pohas, limpoak-kadek kin kamwekid lihen Mohap menet en koasoia met: “I pahn wia soahng koaros me ke nda.”​—Rud 3:1-5.

16, 17. Dahme kahrehda limpoak-kadek me Petuel, Sosep, oh Rud kasalehda kin wia wiewia kaselel kan oh dahme kin kamwekid irail en kasalehda irair wet?

¹⁶ Limpoak-kadek me Petuel, Sosep, oh Rud kasalehda me inenen kaselel, pwehki Eipraam, Seikop, oh Naomi sohte kak mwomwen idingkihong aramas pwukat en sewese irail. Petuel sohte anahne mweidong nah serepein en pwopwoud. E kakete padahkiong nein Eipraam laduwo: ‘Soh, pwe I men nei serepein me kin doadoahk laud en mihmihte rehi.’ (Senesis 24:18-​20) Duwehte Sosep, e kak wiahda ah pilipil en kapwaiada pekipek en semeo de soh, pwe Seikop sohte kak idingkihong Sosep en kapwaiada eh pekipek ni ahnsou me e pahn mehla. Naomi pein padahkiong Rud me e kak mihmihte nan Mohap. (Rud 1:8) Rud pil saledek ahnsowo me wehwehki me e kakete pwoudki “mwahnakapw emen” oh sohte anahne pwoudki ohl mah men: Pohas.

¹⁷ Petuel, Sosep, oh Rud kin perenki kasalehda limpoak-kadek; oh irail wia met sang nan loalerail kan. Irail pehm me re pwukoahki kasalehda irair wet ong aramas akan me re pehsepeneiehr mahs, duwehte Nanmwarki Depit pepehm me e ahneki pwukoah en kasalehong Mepiposed limpoak-kadek.

18. (a) Pepehm dahieu irail elder en Kristian akan kin ahneki ni arail kin “apwalih sapwellimen Siohwa sihpw kan”? (b) Dahme emen elder koasoia duwen ah pepehm akan ni ahnsou me e kin sewese ienge pwoson akan?

¹⁸ Pil nan atail ahnsou, limpoak-kadek kin wia kilel ieu ong ihs me kin wiahla sapwellimen Koht aramas akan, iangahki irail ohl akan me kin apwaliada sapwellimen Koht pwihn. (Melkahka 110:3; 1 Deselonika 5:12) Elder kan (sounapwalih mwomwohdiso kan) kin ahneki pepehm me re kin pwukoahki kapwaiada arail pwais me irail ale ni likilik nin duwen elder idihdda kei. (Wiewia 20:28) Doadoahk en apwaliahda tohnmwomwohdiso kan oh wiewiahn limpoak-kadek teikan sohte kin wia “ni mehnseiren ahpw ni kupwur mwahu duwen kupwur en Koht.” (1 Piter 5:2) Elder kan kin wia doadoahk en silepen sihpw pwehki irail kin ahneki pwukoa ieu oh irail kin perenki wia doadoahk wet. Irail kin kasalehda limpoak-kadek ong sapwellimen Krais sihpw pwehki irail anahne oh pil irail kin perenki wia met. (Sohn 21:15-​17) Emen elder en Kristian koasoia: “I kin perenki mwemweitla rehn riei kan de telephonela rehrail pwen kasalehong irail me I kin medemedewe duwen irail. Sewese riei kan kin kihong ie peren laud oh nsenamwahu!” Elder limpoak kan wasa koaros nan sampah kin pwungki sang nan mohngiongarail kan dahme elder menet koasoia.

Kasalehda Limpoak-Kadek ong Irail akan me Anahne Sawas

19. Poadoapoad en Paipel kan me kitail koasoiada nan artikel wet kin kasansalehda ire mehlel dahieu ong kitail?

¹⁹ Poadoapoad en Paipel kan me kitail ahpwtehn koasoia kin kasansalehda me kitail kak kasalehda limpoak-kadek ong irail akan me sohte kak pein kaitarala arail anahn akan. Eipraam anahne sawas sang rehn Petuel, ma kadaudok en Eipraam pahn pweida. Seikop anahne sawas sang rehn Sosep ma paliware pahn kak wisiklahng Kenan. Pwen mie kadaudoke, Naomi anahne sawas sang rehn Rud. Eipraam, Seikop, de Naomi sohte kak pein kaitarala anahn pwukat, irail koaros anahne sawas sang meteikan. Duwehte rahnwet, kitail anahne kasalehda limpoak-kadek ong aramas akan me anahne sawas. (Lepin Padahk 19:17) Kitail anahne alasang Sohp, me kin nsenohki “me semwehmwe kan me kin peki sawas, oh me sepwoupwou kan oh mehmen me sohte sawasparail” oh irail akan “me mihla nan apwal mwuledek.” Sohp pil kin ‘kaperenda mohngiong en liohdi kan’ oh ‘wia mesen maskun kan, oh nehn me nehtuk kan.’​—Sohp 29:12-​15.

20, 21. Ihs irail akan me kitail anahne kasalehong limpoak-kadek, oh dahme pein emenemen kitail anahne nantihong wia?

²⁰ Ni mehlel, mie ‘aramas akan me kin sengisengki ahr mihla nan apwal kan oh pek sawas’ nan mwomwohdisohn Kristian akan koaros. Mwein irail kin sangat, de pahtou, de ahneki pepehm me pein irail sohte kesempwal, de re nsensuwed pahn mehteikan, de iang soumwahu laud ieu, de emen kompoakparail mehla oh mehpwukat kin wia ekei kahrepe me irail pahn anahne sawas. Ahpw, sohte lipilipil kahpwal dah irail kin lelohng, koaros irail kompoakpatail kan kin anahne sawas oh kitail kak kihda atail sawas kan ni peren oh kasalehda limpoak-kadek ahnsou koaros.​—1 Deselonika 5:14.

²¹ Eri, kitail en nantihong kahlemengih Siohwa Koht, me “diren limpoak-kadek.” (Eksodus 34:6; Episos 5:1) Kitail kak ni peren tepida wia mehkot pwehn sewese irail, keieu ong irail akan me anahne sawas. Ma kitail pahn wia met, kitail pahn kawauwih Siohwa oh paiekihda peren laud ni atail kin “kasalehda limpoak-kadek nanpwungatail.”​—Sekaraia 7:9.

[Nting tikitik me mi pahs]

Iaduwen Ke Pahn Sapeng?

• Iaduwen limpoak-kadek kin weksang kadek en aramas?

• Iaduwen Petuel, Sosep, oh Rud kasalehda limpoak-kadek?

• Madamadau dahieu kitail anahne ahneki ni ahnsou me kitail kin kasalehda limpoak-kadek?

• Ihs irail akan me kitail anahne kasalehong limpoak-kadek?

[Kilel nan Pali 26]

Iaduwen Petuel kasalehda limpoak-kadek?

[Kilel nan Pali 29]

Limpoak poatopoat me Rud kasalehda kin wia kapai ieu ong Naomi

[Kilels nan Pali 31]

Limpoak-kadek me aramas kin kasalehda, sohte kin wiawi ni mehnseiren ahpw kin wiawi ni peren, oh kin sansalkihda wiewia mwahu kan, oh kin kohwong irail akan me anahne sawas