Sukuhliki Oh Padahki Duwen Tiahk Mwakelekel En Kristian
“Ke kin padahkih meteikan—a dahme ke sohte pil padahkiki pein kowe?”—ROM 2:21.
1, 2. Ia ekei kahrepe kan ke kin perenki onop Paipel?
KE ahneki kahrepe mwahu tohto en onop Mahsen en Koht. Mwein ke men esehla ire kesempwal kan me mihmi nan Paipel—me kin pid aramas akan, wiewia kan, sahpw akan, oh pil soahng teikan. Ke men ese padahk mehlel kesempwal akan me kin weksang padahk sapwung kan me pelien lamalam teikan kin padahkih, duwehte padahk en Trinity de lehn kisiniei. (Sohn 8:32) Ke pil anahne en esehla Siohwa pwe met pahn sewese iuk en kahlemengih Ih oh iang Koht kekeid ni ahl me pwung.—1 Nanmwarki 15:4, 5.
2 Kahrepe kesempwal en onopki Mahsen en Koht iei pwehki ke men padahkiong pein uhk oh meteikan—kompoakpahmw kan, aramas akan me ke ese, oh pil irail akan me ke saikinte ese. En wia met kaidehn pilipil ehu ong irail Kristian mehlel akan—ma re pahn wia de soh. E sansal me Sises padahkiong sapwellime tohnpadahk kan: “Kumwail eri kohwei wasa koaros oh padahkihong tohn wehi kan koaros; pwe re en wiahla nei tohnpadahk, . . . oh kehkehlingkihong irail re en peikiong mehkoaros me I koasoanediong kumwail.”—Madiu 28:19, 20.
3, 4. Dahme kahrehda e wia elen wahu ehu ong kitail en padahk nin duwen me Sises padahkiong kitail en wia?
3 Ma emen kin onop Paipel pwehki e men padahki aramas teikan—met kin wia mehkot me wahun oh kak wahdo nsenamwahu me sohte pahn kak uhdi. Sangete mahs, aramas akan kin wauneki irail me kin wia doadoahk en sounpadahk kan. Encarta Encyclopedia koasoia: “Aramas laud tohto sang rehn mehn Suhs akan kin kilangwong irail sounpadahk kan nin duwen sounkaweid kan en komour oh irail kin kangoange neirail seri kan en kasalehda wahu ong arail sounpadahk kan laudsang arail kasalehda wahu ong arail pahpa oh nohno kan.” E kin wia elen wahu ehu ong Kristian akan en pein sukuhliki Pwuhk Sarawi oh uhd padahkiong aramas teikan dahme irail kin sukuhliki.
4 “Sang doadoahk en mwohni koaros, pali laud en aramas kin wia doadoahk en sounpadahk kan. Mpen ohl oh lih million pak 48 kin wia doadoahk en sounpadahk kan nan sampah pwon.” (The World Book Encyclopedia) Sounpadahk en sukuhl kan kin ahneki pwukoa kesempwal ehu en padahkiong aramas pwulopwul kan oh met pahn kakete sewese erein sounpar tohto. Ahpw, ma ke pahn peikiong sapwellimen Sises kaweid en padahkiong aramas teikan duwen padahk mehlel, ke pahn wia laud sang sounpadahk kan en sukuhl en sampah wet pwehki ke pahn kak sewese aramas akan en ale komourparail oh ale mour kohkohlahte. Wahnpoaron Pohl kasansalehda met ni ahnsou me e kangoange Timoty: “Kanakanahieng pein kowe oh pil kanahieng omw padahk kan. Nantihong wiewia soahng pwukat, pwe ma ke pahn wia, ke pahn doarehla pein kowe oh pil irail kan me kin rong uhk.” (1 Timoty 4:16) Ei, ahmw kin padahki aramas teikan kin pidada komour.
5. Dahme kahrehda padahk me Kristian akan kin wia me keieu kesempwal?
5 Padahkih pein kowe oh mwuri meteikan iei kaweid me kin kohsang rehn Ih me keieu lapalap nan lahng oh sampah. Wiepe wet wia elen padahk me mwahusang wiepe teikan koaros me mie—e sohte lipilipil ma e pid kasukuhl nan wasahn sukuhl, kakoahiekihala ahn emen doadoahk, de pil me pid koahiek teikan en palien wini. Padahk me Kristian akan kin wia kin wehwehki me irail tohnsukuhl akan pahn sukuhliki en kahlemengih sapwellimen Koht Ohl, Krais Sises, oh pil padahkiong aramas teikan en pil wia met.—Sohn 15:10.
Dahme Kahrehda E Kesempwal en Padahki Pein Kowe?
6, 7. (a) Dahme kahrehda kitail anahne padahki pein kitail mahs mwohn meteikan? (b) Ni ahl dahieu irail mehn Suhs akan nan keieun senturi sohte pweida nin duwen sounpadahk kan?
6 Dahme kahrehda kitail anahne padahkiong pein kitail mahs? Eri, kitail sohte kak ni ahl konehng padahki aramas teikan ma kitail saikinte padahki pein kitail. Pohl kasansalehda ire mehlel wet ni ahnsou me e padahkiong mehn Suhs akan duwen padahk kesempwal wet en kawao, ahpw e pil kin wia padahk kesempwal ehu ong Kristian akan nan rahnpwukat. Pohl wia peidek wet ong irail: “Ke kin padahkih meteikan—a dahme ke sohte pil padahkihki pein kowe? Ke kin nda, “Dehr pirap”—a ia duwe, ke sohte kin pirap? Ke pil kin nda, “Dehr kamwahl? Ke kin kasohwe dikedik en eni kan—a ia duwe, ke sohte kin pirapa imwen kaudok kan? Ke kin suweiki omw ahneki Kosonned en Koht—a ia duwe, ke sohte kin kihsang waun Koht ni omw kin kauwehla sapwellime kosonned?”—Rom 2:21-23.
7 Pohl doadoahngki peidek kan me kin kasansalehda kosonned riau me kohsang Kosonned Eisek me pid wiewia sapwung riau oh koasoia: Dehr pirap, oh dehr kamwahl. (Eksodus 20:14, 15) Ekei mehn Suhs akan ni mwehin Pohl kin suweiki me re kin ahneki sapwellimen Koht Kosonned akan. Irail ‘padahngkihsangehr nan Kosonnedo oh re kin iang kamehlele me irail sounkahluwepen me maskun kan oh kamarainpen me mihmi nan rotorot akan ni soh peikasal.’ (Rom 2:17-20) Ahpw, ekei irail me mwalaun, pwehki irail kin pirap de wia dipen kamwahl. Met sohte pahn kasalehda wahu ong Kosonnedo oh Ih me ketiket nanleng me ketin wiahda kosonnedo. Ke kak kilang ni sansal me irail sohte konehng en padahki aramas teikan; pwe irail pil sohte kin padahki pein irail.
8. Ele mwein, iaduwen ekei mehn Suhs akan ni mwehin Pohl kin ‘pirapa imwen kaudok kan’?
8 Pohl koasoia duwen aramas akan me kin pirapa imwen kaudok kan. Eri, ekei mehn Suhs akan kin uhdahn wia met? Ia madamadau en Pohl ni ahnsou e koasoia met? Ni mehlel pwehki iren Paipel wet sohte kin kawehwehda ni oaretik, kitail sohte kak uhdahn wehwehki ia mwomwen irail mehn Suhs akan kin ‘pirapa imwen kaudok kan.’ Soun nting en kahnimw en Episos kasalehda me iengen Pohl akan kaidehn soangen aramas akan me kin ‘pirapa imwen kaudok kan,’ oh met kin kasalehda me ekei aramas kin ahneki madamadau me aramas akan kin kadipe irail mehn Suhs akan nin duwen sounlipirap imwen kaudok kan. (Wiewia 19:29-37) Irail kin pein doadoahngki de netikihla dipwisou kesempwal pwukat me kohsang imwen kaudok en mehn pakan kan me aramas akan de pwihn en kaudok me kin uhwong mehn Rom kan kalowehdier? Nin duwen Kosonned en Koht, kohl oh silper me mih rehn dikedik en eni kan pahn kamwomwahla douluhl, oh aramas akan sohte pahn doadoahngki ong pein irail. (Deuderonomi 7:25)a Eri, mwein Pohl kin koasoiahda duwen irail mehn Suhs akan me kin pohnsehsehla sapwellimen Koht kosonned akan oh doadoahngki de alehdi wihn en mwohni sang dipwisou kan me kin kohsang tehnpas sarawi en mehn pakan kan.
9. Soahngen wiewia dah kei me kin pid Tehnpas Sarawio me mih nan Serusalem kin duwehte pirapa Tehnpas Sarawio?
9 Ni pali teio, Sosephus koasoia duwen mehn Suhs pahmen me wiahda likamw ehu nan Rom, kaun en pwihn wet iei emen sounpadahk en Kosonnedo. Aramas pahmen pwukat pitihdi emen lihen Rom, me wekidala eh pelien lamalam oh iangala mehn Suhs akan, oh re kahrehong lih menet en kisakiskiong irail kohl oh dipwisou kesempwal teikan ong Tehnpas Sarawio me mih nan Serusalem. Ahpw, ni ahnsou me irail alehdi kisakis wet, re uhd doadoahngki ong pein irail—mwomwen duwehte irail kin pirapa imwen kaudok.b Aramas teikan pil kin pirapa sapwellimen Koht Tehnpas Sarawio ni arail kin meirongki mahn soumwahu kan oh wiahda pisnes nan Tehnpas Sarawio, “wiahkilahr dewen lipirap akan.”—Madiu 21:12, 13; Malakai 1:12-14; 3:8, 9.
Padahki Duwen Tiahk Mwakelekel en Kristian
10. Kitail en dehr pohnsehsehla mehnia mouren Padahk en Pohl me ntingihdi nan pwuhken Rom 2:21-23?
10 Eri, edetehn kitail kin wehwehki de sohte nohn wehwehki duwen dahme Pohl koasoiada me pid wiewia kan me kin wiawi nan keieun senturi me kin pid pirap, kamwahl, oh pirapa Tehnpas Sarawi kan, kitail anahne wehwehki mouren en sapwellime padahk. E wia peidek wet: “Ke kin padahkih meteikan—a dahme ke sohte pil padahkihki pein kowe?” E kesempwal en wehwehki me karasaras kan me Pohl kin kihda kin pid duwen tiahk pwung oh mwakelekel. Wahnpoaron Pohl sohte kin kasansalehda duwen padahk kan en Paipel de poadoapoad kan. Pohl kin kasalehda me ma emen pahn padahkih pein ih oh pil padahki aramas teikan—mehpwukat kin pid duwen tiahk pwung en Kristian akan.
11. Dahme kahrehda ke anahne nsenohki tiahk mwakelekel en Kristian ni ahnsou me ke pahn onop Mahsen en Koht?
11 Ma kitail men kapwaiada kaweid en Rom 2:21-23, kitail anahne wia tiahk mwakelekel me kitail kin sukuhliki, oh mwuhr, kitail anahne padahkiong aramas teikan en pil wia met. Kahrehda, ni ahnsou me ke pahn onop Paipel, rapahki mouren sapwellimen Siohwa koasoandi kan, pwe tiahk en Kristian mehlel kan kin poahsoankihda koasoandi pwukat. Doudouloale duwen kaweid kan oh padahk kan me ke kin wadek nan Paipel. Pwehn doadoahngki kaweid oh padahk pwukat nan ahmw mour, ke anahne eimah oh nannanti. E mengei ong aramas soh-unsek kan en ahneki madamadau kan me dene irail en dehr katapanki koasoandi kan me pid tiahk mwakelekel en Kristian. Mwein irail mehn Suhs akan me Pohl koasoiada kin pitih pein irail—kahrehda re kin pohnsehsehla pein arail sapwung kan de pil pitih aramas teikan. Sapwellimen Pohl mahsen kan kin kasansalehda me e sohte konehng en mwamwahleki de doadoahngki pein atail pilipil kan en pohnsehsehla tiahk mwakelekel me Kristian kan anahne kasalehda.
12. Iaduwen tiahk mwakelekel kin kaperenda Siohwa Koht oh tiahk suwed kin kansensuwedih Ih, oh dahme kahrehda e pahn kesempwal kitail en tamataman duwen met?
12 Wahnpoaron Pohl kasansalehda duwen ehu kahrepe kesempwal ong kitail en sukuhliki oh wia tiahk mwakelekel me kitail kin sukuhliki nan Paipel. Tiahk sapwung kan en mehn Suhs akan kin kauwehla mwaren Siohwa: “Ke kin suweiki omw ahneki Kosonned en Koht—a ia duwe, ke sohte kin kihsang waun Koht ni omw kin kauwehla sapwellime kosonned? Pwe Pwuhk Sarawi mahsanih, ‘Pwehki kumwail mehn Suhs akan me mwaren Koht wiemwahlkilahr rehn mehn liki kan.’ ” (Rom 2:23, 24) E pil pahn duwehte nan atail ahnsou—ma kitail sohte pahn katapanki tiahk mwakelekel me Kristian kan anahne kasalehda, kitail kin kauwehla mwaren Siohwa me kin wia Utupen koasoandi en tiahk mwakelekel kan. Ahpw, ma kitail pahn kolokol oh kapwaiada sapwellimen Koht koasoandi kan, met pahn kawahuwih Ih. (Aiseia 52:5; Esekiel 36:20) Ahmw kin wehwehki duwen met, pahn kak kakehlailih iuk en powehdi kasongosong kan me ke kin lelohng de ke pahn kak liksang irair akan me e pahn mengei ong uhk en pohnsehsehla tiahk mwahu en Kristian kan. Oh pil, sapwellimen Pohl mahsen kan kin pil padahkiong kitail duwen mehkot kesempwal. Laudsang ahmw kin pein wehwehki me ahmw tiahk kin kak kapinga Koht de soh, nin duwen ke kin padahkiong aramas teikan, sewese irail en wehwehki ni arail kin kapwaiada koasoandi en tiahk mwakelekel kan, met pahn wahdohng Siohwa kaping. Tiahk en Kristian akan sohte kin ihte kahrehong emen en nsenamwahu oh perehla pali roson en paliwar. E pil kin kawahuwih Ih me kin ketikihda koasoandi mwahu pwukat oh pil kin kangoange kitail en wia tiahk mwakelekel.—Melkahka 74:10; Seims 3:17.
13. (a) Iaduwen Paipel kin sewese kitail en kolokolete tiahk mwakelekel? (b) Kawehwehda mouren kaweid en 1 Deselonika 4:3-7.
13 Tiahk mwakelekel kan kin pil dokedoke mouren en aramas teikan. Ke kak kilang met sang poadoapoad kan me mih nan Mahsen en Koht duwen kesempwalpen kapwaiada sapwellimen Koht koasoandi en tiahk mwakelekel kan oh pil dahme kin wiawiong irail akan me kin wia dahme suwed. (Senesis 39:1-9, 21; Sosua 7:1-25) Ke pil kak diarada kaweid konehng kan me kin pid tiahk mwakelekel: “Eri, iet kupwuren Koht ong kumwail: e ketin kupwurki kumwail en sarawihla oh uhdahn mweisang douluhl tiahk samin kan. Emenemen kumwail ohl akan en uhdahn ese duwen eh pahn pwoudikihda lih emen nin duwen mwohmw ehu me sarawi oh wahu. Kaidehn ni ineng suwed, duwehte aramas rotorot akan me sehse Koht. Eri, ni ire wet, kaleke emen de wia sapwung ehu ong rie [Kristian], de kauwehla eh pwung kan. . . . Koht sohte ketin malipeikitaildohng nan mour samin, pwe nan mour sarawi.”—1 Deselonika 4:3-7.
14. Mehnia peidek kan ke kak wia ong pein kowe me pid duwen kaweid me kohsang 1 Deselonika 4:3-7?
14 Kereniong aramas koaros pahn kak wehwehki sang iren Paipel wet me dipen nenek kin kauwehla koasoandi en tiahk mwakelekel en Kristian. Ahpw, mie wehwe loal sang met. Kitail pahn kak onop oh doudouloale duwen ekei iren Paipel oh met pahn kak imwikihla atail kin wehwehkihla mwahu iren Paipel kan. Karasepe ieu, ke kak medemedewe duwen wehwehn mahsen en Pohl ni ah kasalehda me dipen nenek kak kahrehong emen en “wia sapwung ehu ong rie [Kristian], de kauwehla eh pwung kan.” Soangen pwung dah kan me wasaht koasoia, oh iaduwen ahmw kin wehwehki duwen pwung pwukat pahn kak kamwekid uhk en kolokol tiahk mwakelekel en Kristian akan? Iaduwen dahme ke sukuhliki sang ahmw research duwen ire wet pahn kak sewese iuk en padahki meteikan oh sewese irail en wauneki Koht?
Onop Pwe Ken Kak Padahk
15. Ni ahmw pahn wia pein ahmw onop, mehnia mehn doadoahk ke pil kak doadoahngki ong padahki pein uhk?
15 Sounkadehdehn Siohwa kan kin naineki mehn doadoahk kan me re kin doadoahngki ong rapahki pasapeng kan ong peidek kan de irair kan me kin kohda ni ahnsou me re kin wia pein arail onop oh ahnsou me re kin padahk ong aramas teikan. Ehu mehn doadoahk me wiawihda ni lokaia tohto iei Watch Tower Publications Index. Ma ke kin naineki pwuhk wet, e pahn kak sewese iuk en rapahki ire kan me mih nan sawaspen Paipel kan en Sounkadehdehn Siohwa kan. Ke kak rapahki ire kesempwal kan ni ahmw pahn doadoahngki oaralap kan nan index de iren Paipel kan. Pil ehu mehn doadoahk me wiawihda ni lokaia tohto oh me Sounkadehdehn Siohwa kan kin kalap doadoahngki iei Watchtower Library. Prokram en computer wet nan CD-ROM kin audaudkihda pwuhk tohto. Prokram wet kin sewese emen en rapahki oaralap kan oh iren Paipel kan. Ma mehn doadoahk riau pwukat de ehute ke kak doadoahngki, menlau wia uwen me ke kak en doadoahngki ni ahnsou me ke kin onop Mahsen en Koht pwe ken kak pil padahk ong aramas teikan.
16, 17. (a) Iawasa ke kak diarada sawas pwen wehwehki duwen pwuhken 1 Deselonika 4:6 me pid duwen pwung en aramas akan? (b) Ni ahl dah kan dipen nenek pahn kak kauwehla pwung en aramas teikan?
16 Kitail kak kasawihada iren Paipel wet: 1 Deselonika 4:3-7 me ntingdi nan parakrap 13. Peidek kan me kohda duwen pwung kan. Ahn ihs pwung kan? Oh iaduwen aramas pahn kak kauwehla pwung pwukat? Ma ke pahn doadoahngki mehn doadoahk kan ong onop me kitail ahpwtehn koasoia nan parakrap en mwowe, ke kak diarada ekei sawas kan ong iretikitik pwukat, oh pil duwen pwung kan me Pohl koasoiahdahr. Ke kak wadek sawas pwukat nan pwuhken Insight on the Scriptures, Volume 1, pali 863-864; True Peace and Security—How Can You Find It?, pali 145; oh pil The Watchtower, November 15, 1989, pali 31.
17 Ni ahmw pahn wia onop wet, ke pahn kilang me pwuhk pwukat kin kasalehda me mahsen en Pohl kin inenen mehlel. Emen me wiahda dipen nenek kin wiahda dihp ong Koht oh kin kak iangada soumwahu kan. (1 Korint 6:18, 19; Ipru 13:4) Ohl emen me kin wia dipen nenek rehn emen lih, kin kauwehla pwung en liho. E kin kihsang reh tiahk mwakelekel oh nsenmwakelekel. Ma liho kiripw, e kin mwomwen kawehla ahn liho pwung en pwoudiki emen ohl nin duwen lih meipwon emen, oh ahn ohl pwung me e pahn pwoudiki ehu rahn pil ohlahr. E pil kin kansensuwedih ahn liho pahpa oh nohno oh ah pwoud ma e pwopwoud. Ohl dipan menet kin kauwehla pwung en pein eh peneinei en ahneki adamwahu en kolokol tiahk mwakelekel. Ma ih emen tohnmwomwohdiso en Kristian, e pahn kauwehla adamwahu en mwomwohdiso.—1 Korint 5:1.
18. Iaduwen ke kin paiekihda sang onop Paipel duwen tiahk mwakelekel en Kristian akan?
18 Kawehwe wet duwen pwung kan soh kin sewese iuk en wehwehki duwen wehwe loal en iren Paipel wet? Soangen onop wet kin uhdahn katapan. Ni ahmw pahn nantiong en wia met, ke kin padahki pein uhk. Ahmw kin koledi teng duwen ia uwen kehlail oh mehlel en sapwellimen Koht mahsen pahn kekeirada. Ke pahn kakehlahda omw kin men kapwaiada oh koledi tiahk mwakelekel en Kristian edetehn kasongosong kan pahn pwarada. Oh medemedewe ia uwen laud omw pahn kak koahiekla nin duwen sounpadahk men! Karasepe ieu, ni ahnsou me ke pahn padahk ong aramas teikan duwen padahk mehlel en Paipel, ke kak padahkiong irail duwen wehwe loal en 1 Deselonika 4:3-7, oh sewese irail en kalaudehla arail loalokong oh kesempwaliki tiahk mwahu en Kristian akan. Eri, ahmw kin onop Paipel pahn kak sewese pein uhk oh aramas tohto en kawahuwih Koht. Kitail pil koasoiada duwen ehu karasaraste me kohsang sapwellimen Pohl kisinlikou ong mehn Deselonika kan. Mie irair tohto en tiahk mwahu en Kristian akan, oh pil karasaras teikan me kin duwehte met nan Paipel oh kaweid kan me ke kak onopki, kapwaiada, oh padahkiong aramas teikan.
19. Dahme kahrehda e kesempwal ken kolokolete tiahk mwakelekel en Kristian?
19 Sohte peikidpe duwen erpit en kolokolete tiahk mwakelekel en Kristian. Seims 3:17 mahsanih “erpit me sang powe,” kin kohsang rehn Siohwa Koht, “me mwakelekel.” Met ni sansal kin padahkiong kitail en kapwaiada sapwellimen Koht koasoandi kan me kin pid tiahk mwakelekel. Ni mehlel, Siohwa kin kupwurki me irail akan me kin wiliandi Ih ong padahkiong aramas akan duwen Paipel kin anahne wiahla mehn kahlemeng mwahu en “mwakelekel.” (1 Timoty 4:12) Mouren tohnpadahk kan en kawao, duwehte Pohl oh Timoty kin wia mehn kadehde met; ira kin liksang dipen nenek, Pohl pil ntingihdi met: “E sohte konehng mahsenpen mehkot me pidada nenek de soangen samin teikan de noahrok, en kin wiawi nanpwungamwail. E pil sohte konehng kumwail en kin lokaia suwed, kamwan suwed, de lokaia sohte konehng.”—Episos 5:3, 4.
20, 21. Dahme kahrehda ke kin pwungki dahme wahnpoaron Sohn ntingihdi nan 1 Sohn 5:3?
20 Edetehn koasoandi en tiahk mwakelekel kan nan Mahsen en Koht kin wiawi ni sansal oh oaretik, koasoandi wet sohte kin wiahla mehn katoutou ieu ong kitail. Sohn, wahnpoarono me mour keieu werei nin sampah, pil uhdahn wehwehki duwen ire wet. Poahsoanda pohn dahme e pein kilangada nan sounpar tohto, e wehwehki me tiahk mwakelekel en Kristian sohte kin wia mehkot suwed. Ahpw, e kin wia mehkot mwahu, katapan, oh kapai. Sohn kasansalehda duwen met ni e ntingihdi met: “Pwe iet duwen wehwehn poakohng Koht: kitail en peikiong sapwellime kosonned akan. Oh sapwellime kosonned akan me sohte apwal.”—1 Sohn 5:3, New English Translation.
21 Eri, menlau tehk mwahu iren Paipel wet, pwe Sohn sohte nda me peikiong Koht ni atail kolokol tiahk mwakelekel kin wia ahl me keieu mwahu ihte pwehki e pahn kak perehla kitail sang kahpwal akan oh sang imwila suwed akan. E kawehwehda duwen madamadau pwung me kitail pahn ahneki duwen peikiong Koht: keieu, ma kitail pahn tiahk mwahu oh mwakelekel—met kin kasalehda uwen laud atail limpoak ong Siohwa Koht. Ni mehlel, pein kitail anahne en pwungki oh kapwaiada sapwellimen Koht koasoandi ileile kan ma kitail pahn padahkiong aramas teikan duwen poakong Koht oh kapwaiada sapwellime koasoandi kan. Ei, e kin wehwehki me kitail anahne en padahki pein kitail oh pil aramas teikan duwen tiahk mwakelekel en Kristian.
[Nting tikitik me mi pahs]
a Edetehn Sosephus sohte nda me irail mehn Suhs akan kin mwamwahleki mehkan me sarawi, e pwurehng koasoia duwen sapwellimen Koht kosonned ni ahl wet: “Dehr lahlahwe koht akan me aramas nan kanihmw teikan kin kaudokiong, oh pil dehr pirapa imwen kaudok en mehn keiru kan, oh pil dehr kihsang dipwisou kesempwal kan me kin kasarawihla ni mwaren koht teikan sohte lipilipil mehnia koht.”—Jewish Antiquities, Pwuhk 4, irelaud 8, parakrap 10.
b Jewish Antiquities, Pwuhk 18, irelaud 3, parakrap 5.
Ke Tamatamante?
• Dahme kahrehda kitail anahne onop pwehn padahki pein kitail mwohn kitail pahn padahk ong aramas teikan?
• Dahme atail tiahk kan pahn kak wia ong Siohwa?
• Aramas emen me wiahda dipen nenek pahn kakete kauwehla ahn ihs pwung kan?
• Dahme ke koasoanehdi nan kapehdomw me pid pein ahmw mour oh kolokol tiahk mwakelekel en Kristian?
[Kilel nan Pali 18]
“Sapwellime kosonned akan sohte kin apwal”