“Amwail Tiahk Nanpwungen Wehi Kan En Kin Mwahu”
“Kumwail wauneki aramas koaros, poakohng riamwail kan koaros.”—1 PITER 2:17.
1, 2. (a) Dahme soun nuhs men koasoia duwen Sounkadehdehn Siohwa kan? (b) Dahme kahrehda Sounkadehde Siohwa kan kin nantihong kolokolete arail tiahk mwahu?
SOUNPAHR kei samwalahro, soun nuhs men nan Amarillo, Texas, U.S.A., mwemweitla rehn ekei ihmw sarawi kan nan wasao oh e kasalehda dahme e diarada. E diarada me ehu pelien lamalam me inenen weksang pelien lamalam teikan. E koasoia: “Erein sounpar siluh, I kin iang towehda kapokon kan en Sounkadehdehn Siohwa kan me kin wiawi ni pahr koaros nan Amarillo Civic Center. Ni ai kin mihmi rehrail, sohte pak ehu me I kilang emen isikada sika, de kadingada pwoat en pihru, de doadoahngki lokaia suwed. Irail kin wia pwihn en aramas me keieu mwakelekel, tiahk mwahu, doadoahngki likou konehng, oh peren ahnsou koaros.” Pak tohto aramas kin ntingihdi soangen koasoi duwehte met me kin pid Sounkadehdehn Siohwa kan. Dahme kahrehda aramas akan kin kalap kapinga Sounkadehde kan edetehn irail sohte kin iang arail pwoson?
2 Pali laud en ahnsou, sapwellimen Koht aramas akan kin ale kaping pwehki arail tiahk mwahu. Mendahki pali moron en aramas nan rahnwet kin kak wia tiahk suwed oh pil tiahk me sohte konehng Kristian, Sounkadehdehn Siohwa kan kin ahneki pepehm me arail tiahk mwahu ahnsou koaros kin wia mehkot kesempwal oh kisehn arail kaudok. Irail wehwehki me arail tiahk mwahu kak kamwekid madamadau en aramas teikan ong duwen irail pahn kilangwohng Siohwa oh riarail Kristian kan oh pil me arail tiahk mwahu kin utungada padahk mehlel me re kin kalohki. (Sohn 15:8; Taitus 2:7, 8) Kitail kak kilang iaduwen kitail kak kolokolete atail tiahk mwahu oh utungada adamwahu ong Siohwa oh sapwellime aramas akan me iei Sounkadehdehn Siohwa kan oh pil kamwahu kan me kitail pahn ale ma kitail pahn wia met.
Peneinei en Kristian
3. Dahme peneinei en Kristian akan anahne wia pwen alehdi mehn perepe mwahu ieu?
3 Tehk duwen atail tiahk kan nanpwungen tohn peneinei kan. Pwuhk ehu me Gerhard Besier oh Erwin K. Scheuch ntingihdi me oaralap koasoia Die Neuen Inquisitoren: Religionsfreiheit und Glaubensneid (The New Inquisitors: Freedom of Religion and Religious Envy) koasoia: “Ong irail [Sounkadehdehn Siohwa kan], koasoandi en peneinei wia koasoandi kesempwal ieu oh koasoandi me e kesempwal en pere.” Koasoi wet me mehlel, pwe rahnwet keper tohto kin lelohng peneinei kan kahrehda irail anahne pere arail peneinei kan pwe irail sohte pahn lohdi pahn keper oh kasongosong pwukat. Seri tohto rahnwet “sohte kin peikiong arail pahpa oh nohno kan” oh aramas laud tohto kin “sempoak” de “sohte kak powehdi arail ineng kan.” (2 Timoty 3:2, 3) Nan peneinei kan, ohl pwopwoud oh lih pwopwoud kin peipene, pahpa oh nohno kan kin doadoahngki lokaia kamedek ong neirail seri kan oh keme irail nohn daulihla de sohte apwalih irail mwahu, oh seri kan kin uhwong pahpa oh nohno kan, doadoahngki wini kasahliel oh wia dipen nenek, oh pil tang sang imwarail kan wehwehki tang sang arail pahpa oh nohno kan. Mehpwukat koaros kin wiawi pwehki manaman suwed en ‘ngehnen sampah wet.’ (Episos 2:1, 2) Kitail anahne perehla atail peneinei kan sang ngehn en sampah suwed wet. Iaduwen kitail kak wia met? Sang ni atail pahn kapwaiada sapwellimen Siohwa kaweid me E kin ketikihong tohnpeneinei kan.
4. Pwukoa dah kei me irail tohnpeneinei en Kristian akan pwukoahki ong pein emenemen irail?
4 Pwopwoud en Kristian akan kin pohnese me irail kin ahneki pwukoa kan ong emenemen irail, me pid duwen anahn en pepehm akan en arail pwoud, oh anahn en pali ngehn oh pil paliwar. (1 Korint 7:3-5; Episos 5:21-23; 1 Piter 3:7) Pahpa oh nohno Kristian akan kin ahneki pwukoa laud ong neirail seri kan. (Lepin Padahk 22:6; 2 Korint 12:14; Episos 6:4) Oh pil, ni ahnsou me seri kan me kohsang peneinei en Kristian akan kin laudla, irail anahne wehwehki me irail pil kin ahneki pwukoa kan. (Lepin Padahk 1:8, 9; 23:22; Episos 6:1; 1 Timoty 5:3, 4, 8) Pwen kapwaiada pwukoa en peneinei kan, tohnpeneinei kan anahne nannanti, wia uwen arail kak en kapwaiada arail pwukoa kan, oh pil ahneki ngehnen limpoak oh tohnmetei. Eri, ma tohnpeneinei kan koaros pahn wia uwen me irail kak en kapwaiada arail pwukoa kan me Koht ketikihong irail, irail pahn wia kapai ehu ong pein emenemen tohnpeneinei kan oh pil ong mwomwohdiso. Ahpw, keieu, irail pahn kasalehda me irail wauneki Ih me wiahda koasoandi en peneinei, me iei Siohwa Koht.—Senesis 1:27, 28; Episos 3:15.
Pirien en Kristian
5. Kapai dah kei kitail kin dolungada sang ni atail pahn miniminiong iengatail Kristian akan?
5 Nin duwen Kristian akan, kitail pil kin ahneki pwukoa kan me kin pid iengatail pwoson akan nan mwomwohdiso oh, keieu, ong irail “riatail [Kristian] akan wasa koaros nin sampah.” (1 Piter 5:9) Atail kin miniminiong mwomwohdiso kin wia mehkot kesempwal ong atail kehl en pali ngehn. Ni ahnsou me kitail kin miniminiong iengatail Kristian akan, kitail kin paiekihda arail kangoang kan oh ketihnain en pali ngehn sang rehn “ladu lelepek oh loalokong.” (Madiu 24:45-47) Ma mie atail kahpwal akan, kitail kak tuhwong riatail brother kan pwehn ale kaweid pwung kan me kin poahsoankihda kaweid kan en Pwuhk Sarawi. (Lepin Padahk 17:17; Eklesiasdes 4:9; Seims 5:13-18) Ni ahnsou me kitail anahne sawas, riatail brother oh sister kan sohte pahn kesehkitailla. Ia uwen kapai laud kitail ahneki pwehki kitail wia kisehn sapwellimen Koht pwihn!
6. Iaduwen Pohl kasalehda me kitail kin pwukoahki en wia mehkot ong Kristian teikan?
6 Kitail sohte kin iang mwomwohdiso ihte pwehki kitail men ale sawas; ahpw, kitail kin pil men kihda atail sawas. Ni mehlel, Sises mahsanih: “Kihwei kaperen sang ale.” (Wiewia 20:35) Wahnpoaron Pohl kin kasalehda ngehnen kihwei ni ahnsou me e ntingihdi met: “Kitail kolokol tengeteng koapworopwor me kitail kin kadehdehda, pwe Koht, me kitail kin koapworopworki uhdahn pahn ketin kapwaiada sapwellime inou. Kitail nsenoh sawaspene ni kasalepen atail limpoak oh atail wiewia mwahu kan. Kitail dehr tokedihsang atail tiahk en pokonpene, duwen ekei ar kin epwehnki wia. A kitail nantihong kakehlaka nan kapehd en emenemen, pwe duwen amwail ese Rahnen Kauno kerendohr.”—Ipru 10:23-25.
7, 8. Iaduwen kitail kin kasansalehda ngehnen kihwei ong iengatail tohnmwomwohdiso kan oh pil ong irail Kristian akan me kin mih nan sahpw teikan?
7 Nan mwomwohdiso, kitail kin kolokol tengeteng “koapworopwor me kitail kin kadehdehda” ni ahnsou me kitail kin iang wia pasepeng kan nan mihding kan oh pil ni ahnsou me kitail wia atail padahk de kamwomwada de soahng pwukat. Ni mehlel, atail wia soahng pwukat kin wia sawas laud ong kangoange riatail brother oh sister kan. Kitail pil kin kangoange irail ni atail kin koasoiong irail mwohn oh mwurin mihding kan. Ahnsou pwukat kin wia ahnsou kan me kitail pahn kak kakehle irail me luwet akan, kamweitala irail me pahtou oh soumwahu kan. (1 Deselonika 5:14) Kristian mehlel akan kin ahnsou koaros kasalehda soangen kadek wet, oh ih kahrepe aramas tohto me kin tepin iang atail mihding kan kin pwuriamweikihla kilang limpoak wet nanpwungatail.—Melkahka 37:21; Sohn 15:12; 1 Korint 14:25.
8 Ahpw, kitail sohte pahn kasalehda limpoak ongete tohnmwomwodiso en pein atail mwomwohdiso kelepw. Kitail anahne kasalehda limpoak ong riatail brother oh sister kan wasa koaros nan sampah. Karasepe ieu, ih kahrepe koakon en meirong oh sawas kin mie (Kingdom Hall Fund) nan Kingdom Hall koaros. Ele mwein pein atail Kingdom Hall kin mwahu, ahpw kitail ese me iengatail Kristian kid kei nan sahpw teikan sohte kin ahneki wasa mwahu en pokonpene ie. Ni ahnsou me kitail kin kihdi atail sawas en mwohni ong Kingdom Hall Fund, kitail kin kasalehda limpoak ong brother oh sister kan me anahne sawas edetehn kitail saikinte tuhwong irail.
9. Ia kahrepe kesempwal ieu me kin kamwekid Sounkadehdehn Siohwa kan en limpoakpene?
9 Dahme kahrehda Sounkadehdehn Siohwa kan kin limpoakpene? Irail kin wia met pwehki Sises kehkehlikiong irail en wia met. (Sohn 15:17) Oh pil, limpoakpene wet nanpwungarail kin kasansalehda me sapwellimen Koht ngehn sarawi kin doadoahk ong emen emen irail oh pil ong irail nin duwen pwihn ehu. Limpoak kin wia kisehn “wahn ngehn kan.” (Kalesia 5:22, 23) Pwehki Sounkadehdehn Siohwa kan kin wia arail onop Paipel, iang towehda mihding en Kristian akan, oh poadidi kapakap ong Koht, irail kin ahnla kasalehda limpoak mendahki irail kin mih nan sampah ieu me ‘limpoak en me tohto wie tikitikla.’—Madiu 24:12.
Powehdi Irairen Sampah kan Me Pidahkikitailpene
10. Kitail kin pwukoahki dah ong tohnsampah pwukat me kin kapilpene kitail?
10 Ni Pohl mahsanihki “lohkiseli ong wehi pokon duwen atail koapworopwor,” met kin katamankin kitail duwen pil ehu pwukoa. “Lohkiseli ong wehi pokon” kin wehwehki me kitail pahn pwukoahki iang doadoahk en kalohki Rongamwahu ong aramas akan me saikinte wiahla iengatail Kristian kan. (Madiu 24:14; 28:19, 20; Rom 10:9, 10, 13-15) Kalohk kin wia mehn kadehde en kihwei. Doadoahk wet kin kahrehong kitail en doadoahngki atail ahnsou, kehl, ahnsoun kaunopada mwahu, kaiahn, oh pil doadoahngki atail pai teikan. Ahpw, Pohl ntingihdi: “Pwehki mie ei pweipwand ong aramas akan koaros, ong me marainlahr oh pil ong me rotorot akan, ong me loalokong oh me lampwon kan. Ihme kahrehda I pil inengieng lohki Rongamwahu ong kumwail me kin koukousoan Rom.” (Rom 1:14, 15, NW) Kitail en kahlemengih Pohl, en dehr pweiehksang pwainda “pweipwand wet.”
11. Mouren en kaweid en Pwuhk Sarawi riau dah kei kin kaweidih kitail ong atail wiewia kan me kin pid sampah wet, ahpw dahme kitail kin pohnese?
11 Kitail pil kin ahneki pwukoa teikan ong aramas akan me saikinte wiahla iengatail pwoson akan? Ei, uhdahn. Mehlel, kitail kin wehwehki me “sampah unsek mih pahn manaman en Me Suwedo.” (1 Sohn 5:19) Kitail ese me Sises mahsanih duwen sapwellime tohnpadahk kan: “Ngehi me kaidehn kisehn sampah, pil ih duwen irail, kaidehn irail kisehn sampah.” Ahpw, kitail kin mih nan sampah wet, anahne doadoahk nan sampah wet, oh pil, mie soahng kan me tohnsampah kin wia ong kitail. (Sohn 17:11, 15, 16) Eri, mie atail pwukoa kan nan sampah wet. Ia atail pwukoa? Wahnpoaron Piter sapeng peidek wet. Mwohnte ohlahn Serusalem, e ntinglahng Kristian akan nan Eisia Mainor kisinlikou ehu, oh wasakis nan kisinlikou wet kin kak sewese kitail en ahneki madamadau toupahrek me pid sampah wet.
12. Iaduwen Kristian akan kin duwehte “mehn liki kei oh mehn keiru kei,” oh dahme irail anahne en liksang?
12 Keieu, Piter mahsanih: “Kompoakepahi ko, I kangoangehkin kumwail nin duwen mehn liki kei oh mehn keiru kei nin sampah wet, pwe kumwail en mweisang ineng suwed en paliwaramwail kan, me kin pelipelian [atail mour] ahnsou koaros.” (1 Piter 2:11) Kristian mehlel akan, ni pali ngehn, kin wia “aramas en keiru kei” pwehki arail koapworopwor iei mour soutuk—ong irail me keidi kan re kin koapworopworki me irail pahn ahneki mour soutuk nanleng oh ong irail “sihpw teikan” re koapworopworki me irail pahn ahneki mour soutuk nin sampah. (Sohn 10:16; Pilipai 3:20, 21; Ipru 11:13; Kaudiahl 7:9, 14-17) Eri, soahng dah kan kin wia ineng en uduk kan? Ekei ineng en uduk kan iei ineng en kepwehpwehla, ineng en wiahla aramas ndand men, ineng suwed akan, oh ineng kan duwehte “peirin” oh “noahrok.”—Kolose 3:5; 1 Timoty 6:4, 9; 1 Sohn 2:15, 16.
13. Iaduwen ineng en uduk akan kin “pelipelian atail mour”?
13 Ineng pwukat kin “pelipelian [atail mour].” Re kin ekis ekis kauwehla atail nanpwung mwahu rehn Koht oh atail koapworopwor nin duwen Kristian akan (atail “soul,” de atail mour) pahn mihla nan irair en keper. Karasepe ieu, ma kitail pahn kainengihada mehkan me kin pid dipen nenek, iaduwen kitail pahn kak mweidala paliwaratail “en wiahla mehn meirong momour, me sarawi oh kaperen pahn kupwuren Koht”? Ma kitail pahn pwupwudiong nan lidip en noarokehda dipwisou de mwohni, eri, iaduwen—kitail kin “rapahki mahs Wehio”? (Rom 12:1, 2; Madiu 6:33; 1 Timoty 6:17-19) Dahme keieu mwahu ong kitail iei en kahlemengih Moses, me soikala lidip kan en sampah wet pwehn rapahki mahs wia sapwellimen Siohwa doadoahk. (Madiu 6:19, 20; Ipru 11:24-26) Met kin wia ire kesempwal ma kitail men ahneki madamadau toupahrek me pid duwen sampah wet.
‘Kolokolete Amwail Tiahk Mwahu kan’
14. Dahme kahrehda kitail nin duwen Kristian akan anahne nantiong kolokolete tiahk mwahu?
14 Pil ehu kaweid me dierekda nan mahsen kan en Piter iei met: “[Kolokolete] amwail tiahk mwahu nanpwungen me rotorot akan en sampah wet, pwe ni ar pahn kin kinehiong kumwail likamw, me dene aramas suwed kei kumwail, eri, ni ar pahn kin kilang amwail wiewia mwahu kan, re en kapingahki Koht ni Rahnen eh pahn ketido.” (1 Piter 2:12) Nin duwen Kristian akan, kitail en nantihong en wia mehn kahlemeng mwahu. Nan sukuhl, kitail en nantihong onop mwahu. Nan atail wasahn doadoahk, kitail en doadoahk laud oh mehlel ong atail doadoahk—mendahki atail kaun en doadoahk sohte kin kasalehda limpoak de medemedewe kamwahupen meteikan. Nan peneinei kan me emen rehn ohlo (pahpa) de liho (nohno) saikinte iang padahk mehlel, ih me iang padahk mehlel en nantihong kapwaiada kaweid en Kristian akan. E sohte mengei ahnsou koaros, ahpw kitail ese me atail wia mehn kahlemeng mwahu kan kin kaperenda Siohwa oh kin pil sewese aramas akan me sohte iang Sounkadehde kan.—1 Piter 2:18-20; 3:1.
15. Iaduwen kitail ese me aramas tohto kin ese duwen koasoandi en tiahk mwahu en Sounkadehdehn Siohwa kan?
15 E sansal me pali laud en irail Sounkadehdehn Siohwa kan kin kolokolete arail tiahk mwahu kan oh met kin sansal sang dahme aramas teikan kin koasoia duwen irail nan nuhs kan erein ahnsou kerendo kan. Karasepe ieu, Il Tempo en Italy koasoiahki: “Aramas akan me kin iang Sounkadehdehn Siohwa kan nan arail wasahn doadoahk kin kawehwe me Sounkadehde kin wia tohndoadoahk lelepek kei, oh irail me iang Sounkadehde nan arail wasahn doadoahk kin lemeleme arail poadidi me nohn daulihala; ahpw, pwehki ahr tiahk mwakelekel, irail kin kasalehong irail wahu.” Nuhspepa Herald en Buenos Aires, Argentina, koasoia: “Sounkadehdehn Siohwa kan kin kasalehda me irail pwihn en aramas akan me kin doadoahk laud, oh irail kin mehlel, ese kasoutik, oh towe mehlel en wehi kan me kin lemmwiki Koht.” Emen mehn Russia me sukuhl laud Sergei Ivanenko koasoia: “Nin sampah pwon, aramas akan kin ese me irail Sounkadehdehn Siohwa kan kin kapwaiada kosonned akan oh keieu irail kin ni lelepek pwain daksis kan.” Emen kaun en wasahn kapokon ieu nan Zimbabwe me Sounkadehdehn Siohwa kan kin doadoahngki ong arail kapokon koasoia: “I kin kilang ekei Sounkadehde kan rikada kid kan oh kamwakel imwen kainen kan. Ni ahnsou me amwail kapokon nekier, wasahn kapokon kin mwakelekel sang mwowe. Irail me pwulopwul kan kin kapwaiada mouren kaweid en Paipel. I koapworopworki me sampah pwon kin dirkihla Sounkadehdehn Siohwa kan.”
Uhpa Mwahu en Kristian akan
16. Ia mwomwen kitail ohng kaun en wehi kan, oh dahme kahrehda?
16 Piter kin pil koasoiada duwen ia mwomwen kitail ohng kaun en koperment kan. E koasoia: “Pwehki Kauno kumwail peikiong aramas koaros me ahneki manaman en kaunda wasa: ong nanmwarki lapalapo, me sapwellimanki manaman unsek en wehi pokon, oh ong kepina kan, me kin pekederdo sang rehn nanmwarkio pwe re en kin kapwungala aramas suwed kan oh katingih me mwahu kan. Pwe ih kupwur en Koht en met: kumwail en katokihekihdi ngihl suwed en aramas pweipwei kan amwail wiewia mwahu kan.” (1 Piter 2:13-15) Kitail kin kalahnganki sawas kan me kin kohsang rehn koperment me kin soandi mwahu, oh kitail kin mweidong kaweid en Piter en kamwekidada kitail en peikiong kosonned akan en koperment oh pwain neitail daksis kan. Kitail kin wehwehki me Koht kin ketin mweidong koperment kan en kaloke aramas akan me kin kauwehla kosonned akan, ahpw kahrepe keieu kesempwal kitail kin uhpaiong koperment kan iei “pwehki Kauno.” Met iei kupwuren Koht. Oh pil, kitail sohte men kauwehla mwaren Siohwa ki atail pahn lelong kalokolok pwehki sapwung kitail wiahda.—Rom 13:1, 4-7; Taitus 3:1; 1 Piter 3:17.
17. Ni ahnsou me “aramas pweipwei kan” kin uhwong kitail, dahme kitail kak likih?
17 E inenen kansensuwed pwehki ekei “aramas pweipwei kan” me kin ahneki manaman laud kin kaloke kitail de uhwong kitail ni ahl teikan—duwehte irail kin padahkiong aramas teikan koasoi likamw duwen kitail. Ahpw, ni sapwellimen Siohwa ahnsou me konehng, arail likamw akan kin sansalda, oh “ngihl suwed en aramas pweipwei kan” kin tokedi. Atail rekord en tiahk mwahu en Kristian kin kasalehda ihs me kin koasoi mehlel. Ih kahrepe kaun en koperment mehlel akan kin kalapw kapinga kitail nin duwen aramas akan me kin wia me mwahu.—Rom 13:3; Taitus 2:7, 8.
Lidun Koht kei
18. Nin duwen Kristian akan, ni ahl dah kei kitail kak en dehr kauwehla atail saledek?
18 Piter kihda kaweid wet: “Kumwail en kin mour saledek; ahpw kumwail dehpa kin doadoahngki amwail saledek pwehn wia mehn pwaindi mehkot suwed, ahpw kumwail en kin momour nin duwen lidun Koht kei.” (1 Piter 2:16; Kalesia 5:13) Rahnwet, atail loalokongkihla padahk mehlel en Paipel kin kihong kitail saledek sang padahk likamw en kaudok likamw akan. (Sohn 8:32) Mehlel, mie atail saledek en pilipil, oh kitail kak wia pein atail pilipil kan duwen soahng tohto. Ahpw, kitail sohte men doadoahngki atail saledek ni ahl me sapwung. Ni ahnsou me kitail pahn wiahda atail pilipil kan me kin pid ihs me kitail pahn werekiong, mehnia likou kitail pahn doadoahngki, mwomwatail kan, mehn kamweit akan—oh pil mwenge oh sakau en wai—kitail anahne tamanda me Kristian mehlel akan kin wia lidun Koht kei, kitail sohte men kaperenda pein kitail. Kitail pilada en papah Siohwa, kaidehn en wia lidun atail ineng en uduk kan de wiewia kan de irair akan en sampah wet.—Kalesia 5:24; 2 Timoty 2:22; Taitus 2:11, 12.
19-21. (a) Iaduwen kitail kin kilangwong irail akan me kin ahneki pwukoa laud kan nan koperment? (b) Iaduwen ekei kin kasalehda “limpoak ong pwihn en riarail kan koaros nin sampah pwon”? (c) Mehnia pwukoa me keieu kesempwal kitail kin ahneki?
19 Piter pousehla mahsanih: “Kumwail wauneki aramas koaros, poakohng riamwail [Kristian] kan, lemmwiki Koht, oh wauneki nanmwarki lapalapo.” (1 Piter 2:17) Pwehki Siohwa Koht kin mweidong aramas akan en ahneki soangsoangen manaman akan, kitail kin kasalehda aramas pwukat wahu. Kitail kin pil kapakapki irail, pwe kitail pahn kak ale mweimwei en wia atail doadoahk en kalohk ni popohl oh lelepek ong Koht. (1 Timoty 2:1-4) Ni ahnsowohte kitail kin “poakohng [riatail Kristian akan] koaros.” Kitail kin ahnsou koaros wia dahme mwahu ong riatail Kristian akan kaidehn wia soahng kan me pahn kamedekirailla.
20 Karasepe ieu, ni ahnsou me ehu wehi nan Aperika mwerpeseng pwehki uhpenehn keinek kan, tiahk kan en irail Kristian en Sounkadehdehn Siohwa kan kin siksang mehteikan. Nuhspepa en Switzerland Reformierte Presse ripohtki: “Nan pahr 1995, pwihn ehu me adaneki African Rights . . . kasansalehda me irail pelien lamalam koaros iang [peipene] wet, ahpw ihte Sounkadehdehn Siohwa kan sohte iang.” Ni ahnsou nuhs duwen wiewia suwed wet kin lel wasa koaros nan sampah, Sounkadehdehn Siohwa kan nan sapwen Iurop mwadangete kadarala mwenge oh wini ong riarail kan oh pil ong aramas teikan nan sahpwo me kin lelong kahpwalo. (Kalesia 6:10) Irail kapwaiada mahsen kan en Lepin Padahk 3:27: “Ahnsou koaros me ke kak, sewese irail kan me kin anahne sawas.”
21 Ahpw, mie ehu pwukoa me kesempwal sang atail kin wauneki kaun en wehi kan oh pil limpoak me kitail kin pweipwand ong riatail kan. Pwukoa dahieu? Piter koasoia: “Lemmwiki Koht.” Ni mehlel, atail pweipwand ong Siohwa laudsang atail pweipwand ong aramas teikan. Iaduwen met mehlel? Oh iaduwen kitail kak ahneki madamadau toupahrek ni atail kin kapwaiada atail pwukoa kan ong Koht oh atail pwukoa ong kaun en wehi kan? Peidek pwukat pahn pasepengla nan artikel en mwurin met.
Ke Tamanda?
• Mehnia pwukoa kan me Kristian akan ahneki nanpwungen tohnpeneinei kan?
• Iaduwen kitail kak kasalehda ngehnen kihwei nan mwomwohdiso?
• Mehnia pwukoa kan kitail kin ahneki ong irail kaun en wehi kan en sampah wet?
• Ia ekei kapai kan kitail kin alehdi me kin kohsang atail kin kolokolete atail tiahk mwahu?
[Kilel nan Pali 19]
Iaduwen peneinei en Kristian wiahla utupen peren mehlel ieu?
[Kilels nan Pali 20]
Dahme kahrehda Sounkadehdehn Siohwa kan kin limpoakpene?
[Kilels nan Pali 20]
Kitail kak kasalehda limpoak ong riatail brother oh sister kan edetehn kitail saikinte pein tuhwong irail?