Kihwei Laudsang Uwen Me Ke Kakong

“KE KAK likwerikin ie soun pekipek emen; ahpw I sohte pahn nsensuwedki. I pekpeki sawas en mwohni pwukat ong Sises.” Mahsen kamwekid pwukat en minister en Pros menet kin kasalehda pingiping me kin pwarada me pid mwohni me pelien lamalam kan kin ale. Pelien lamalam kan me wehi kin pohnese oh sewese kin mwomwen me e pahn kak memourte ihte ma e alehdi mwohni tohto. Irail anahne pwain salarih kan (pwain tohndoadoahk kan), imwen kaudok kan anahne kokouda oh apwalih, oh pil irail anahne mwohni ong padahki Rongamwahu. Iawasa irail pahn kihsang ie mwohni pwukat?

Ong pelien lamalam tohto, pasapengo iei ale persent 10 en pweinen emen.a Emen sounpadahk en Rongamwahu me adaneki Norman Robertson koasoia: “Ale persent 10 en pweinen emen iei sapwellimen Koht ahl en katanga (me pid mwohni) sapwellime wehi sampah. Met iei sapwellimen Koht koasoandi en economics me kak kahrehong Rongamwahu en kak lohkseli.” E sohte kin namenek en katamankihong irail tohn sarawi kan arail pwukoa en kin kihwei ahpw e kin ni koasoi en idihd nda: ‘Kihwei eisek kis ehu en pweinomw kaidehn mehkot me ke pahn wia pwe ke kakong. Met wiewia en peik ehu. Ma ke sohte pahn kihda eisek kis ehu en pweinomw, eri, e sansal me ke kauwehla sapwellimen Koht kosonned. Met duwehte ahmw ale oh doadoahngkihla ni sapwung mwohni ehu ong pein kowe ni en mwohni wet nein emen tohrohr.’​—Tithing​—God’s Financial Plan.

Me tohto pahn pwungki me kihkihwei iei kisehn kaudok en Kristian. Ahpw, iaduwen​—⁠ke kin pehm me idihd en kihda mwohni kin lidere ahmw madamadau oh pepehm de mwein pil kin kansensuwed ong uhk? Emen ohlen Brazil me kin onopki soahng kan me pid Koht me adaneki Inácio Strieder kin karaunihki sarawi kan me irail kin doadoahngki mwohni pwukat me kin kohsang eisek kis ehu en pweinen aramas akan ong kapwungala arail kahpwal en wia ahd akan, oh e kin kahdaneki soangen tiahk pwukat “sapwung ong kosonned, kamwakara mwahl oh sapwung ong kosonned en Koht.” E pil kasawihada me imwilahn met “irail aramas akan me sohte kin doadoahk, liohdi kan, me kin mihmi nanial kan (sohte imwarail) oh me sohte madamadau pwung kan kin uhd lemeleme me Koht keseiraillahr oh irail kin ale idihd en kihong nohn laud ong ‘irail sounpadahk kan’ kahrehong arail peneinei en kin duhpekla.”

Ele ke pahn medemedewe: ‘Pelien lamalam me kin ale eisek kis ehu en pweinen aramas akan​—⁠irail kin doadoahngki iren Pwuhk Sarawi kan ni pwung? De ele ekei pelien lamalam kan kin kahrehong arail tohnsarawi en masak kadeik sang rehn Koht pwe en kak alehdi mwohni kan sang irail? Mehlel​—⁠Koht sohte kin kasik kitail en kihda laudsang uwen me kitail kakong?

[Nting tikitik me mi pahs]