Kihwei Me Kin Wahdo Peren

GENIVAL, me kin mihmi nan wasa semwehmwe nan pali epeng en pali mese en Brazil, kin apwaliki ah pwoud oh nah seri kan kisin pweine tikitik me e kin ale sang ah doadoahk nin duwen sounsilasil men nan imwen wini ehu. Mendahki kahpwal akan, e kin nantihong kihla eisek kis ehu en pweine pwehki e lemeleme met me pwung. “Ekei pak ahi peneinei kin duhpekila,” e katamanda mehpwukat ni ah kin damwdamwur kapehde, “ahpw I men kihong Koht me keieu mwahu, sohte lipilipil soangen meirong dah me I anahne wia.”

Mwurin ah solahr doadoahk, Genival kihkihdahte eisek kis ehu en ah pai ong ah sarawio. Minister en ah sarawio idingkihong en song Koht sang ni ah pahn wiahda meirong laud ehu, ministero inoukihong me Koht pahn uhdahn kapaiada ih. Genival eri medewehda en netikihla imweo oh kihong mwohni me e koledi sang pweinen ihmwo ong sarawio.

Kaidehn Genival kelepw me kin ahneki mohngiong mehlel en kihkihwei. Me uhdahn semwehmwe tohto pil kin iang kapwaiada met oh kihda eisek kis ehu en arail pai kan pwehki irail kin sukuhliki nan arail ihmw sarawi me met iei anahn ehu sang nan Paipel. Iaduwen​—⁠met mehlel?

Eisek Kis Ehu oh Kosonned en Moses

Kosonned en meirongki eisek kis ehu en arail pai kan iang kisehn kosonned me Koht me E kihong keinek 12 en Israel en mahso daulihier sounpahr 3,500 samwalahro. Kosonnedo kehkehliki me eisek kis ehu en arail wahnsahpw oh wahntuhke kan oh eisek kis ehu sang tohtohlahn neirail mahn akan pahn kohieng keinek en Lipai pwe en sewese irail nan arail doadoahk nan impwal sarawio.​—Lipai 27:30, 32; Nempe 18:21, 24.

Siohwa kamehleleiong mehn Israel ko me Kosonnedo ‘sohte pahn nohn apwal ong irail.’ (Deuderonomi 30:11) Ma irail pahn kin lelepek ong kapwaiada sapwellimen Siohwa kosonned akan, iangahki meirongki eisek kis ehu en arail pai kan, eri Koht inoukihong irail me irail pahn dolung wah tohto. Pwe en wia mehn perepe ieu, irail pil anahne wiahda meirong tohrohr ehu en eisek kis ehu en arail pai kan ong ehuehu pahr. Met kin kalapw wiawi ni kamadipw sarawi kan me re kin wia ni wehio arail kin patpene. Meirong pwukat kin kohieng ‘irail mehn liki kan, me sepwoupwou kan, oh liohdi kan’ pwe ren kak nsenamwahuki.​—Deuderonomi 14:28, 29; 28:1, 2, 11-​14.

Kosonnedo sohte kasalehda ni oaritik soangen kalokolok dah me pahn kohieng emen me sohte kapwaiada en wia meirong wet. Ahpw, emen emen irail mehn Israel ko pwukoahki ni pwung en utungada kaudok mehlel ni ahl wet. Ni mehlel, Siohwa kin karaunehki irail ako me sohte kin meirongki eisek kis ehu en arail pai kan me irail pwukat ‘kin pirapa Ih ni meirong en eisek kis ehu en arail pai kan oh pil meirong teikan.’ (Malakai 3:8, New International Version) Kristian en rahn pwukat pahn pil dipkihda soangohte ma irail sohte kapwaiada meirongki eisek kis ehu en arail pai kan?

Nna, medewehla met. Kosonned en wehi ehu sohte kin manaman nan wehi teikan. Karasepe, kosonned nan Britain me irail me kin dake tehnwar akan anahne en tang pali meing en ahlo sohte kin doadoahk nan France. Pil duwehte met, kosonned me pid meirongki eisek kis ehu en arail pai kan kisehn inou me mie nanpwungen Koht oh wehin Israel kelepw. (Eksodus 19:3-8; Melkahka 147:19, 20) Irail mehn Israel ko kelepw me mih pahn kosonned wet.

Kapataiong met, mendahki mehlel me Koht sohte kin wekila, ahpw ekei pak dahme E kin kupwurki sapwellime aramas akan en wia kin kak wekila. (Malakai 3:6) Paipel kin kasalehda ni sansal me matalahn Sises nan 33 C.E. “kasohrela” de “kaimwisekla” Kosonnedo iangahki “kosonned en rikada eisek kis ehu en pai kan.”​—Kolose 2:13, 14; Episos 2:13-​15; Ipru 7:5, 18, New World Translation.

Kihwei en Kristian

Mendahki met, meirong kan me pahn sewesehda kaudok mehlel pil anahnte. Sises kehkehlikiong sapwellime tohnpadahk kan en ‘kadehde ih lelohng ni irepen sampah.’ (Wiewia 1:8) Ni en irail me kamehlele Sises oh sapwellime padahk kan tohtohla, anahn en sounpadahk kan, sounkalohk kan oh pil sounapwalih kan en mwemweitala oh kakehle mwomwohdiso kan pil laudla. Liohdi kan, me sepwoupwou kan, oh me pil anahne sawas kan pil kin anahne kohieng epwelparail ekei pak. Iaduwen irail Kristian en keieun senturi apwalihala arail anahn akan?

Mpen pahr 55 C.E., pekipekehu kohlahng irail Kristian me kaidehn mehn Suhs kan nan Iurop oh Asia Minor. Pekipek wet wiawihda pwehki irail me semwehmwe kan en mwomwohdiso en Sudea anahne sawas. Nan sapwellime kisinlikou kan ong mwomwohdiso en Korint, wahnpoaron Pohl kawehwehda iaduwen ‘meirong me pahn sewese me sarawi kan’ pahn wiawi. (1 Korint 16:1) Ele ke pahn pwuriamweiki sapwellimen Pohl mahsen kan me pid duwen kihkihwei en Kristian.

Wahnpoaron Pohl sohte doadoahngki lokaia me nohn daulihla pwe en kak kangoange ienge tohnkaudok kan en kihda arail meirong. Ni mehlel, irail Kristian kan nan Masedonia mihlahr nan “apwal laud” oh “semwehmwe” ahpw irail kin ‘ngidingidkihong ih en ale ahr kisakis kan oh re en iang wia sawas ong Kristian teikan.’​—2 Korint 8:1-4.

Mehlel, Pohl kangoange irail Kristian akan nan Korint me kepwehpwe en alasang kadek sapan en riarail Kristian ko nan Masedonia. Ehu mehn kadehde koasoia me e ‘sohte kin koasoanehdi dahme pahn wiawi, ahpw e kin kangoange oh peki irail ni lokaia mwahu oh kadek. Irail mehn Korint sohte pahn wia arail meirong kan pwehki irail pein nsenkihda de pwehki arail limpoak ma irail idihd en wia.’ Pohl ese me “Koht kin kupwurperenki irail kan me kin kihwei ni peren,” kaidehn irail me kin kihwei “ni mehnseiren de ni mwomwen idihd.”​—2 Korint 9:7.

Pwoson kehlail oh loalokong iangahki limpoak mehlel ong riarail Kristian akan sewese irail mehn Korint ko en kihwei ni ar pein nsenkihda.​—2 Korint 8:7, 8.

‘Duwen Me E Koasoanehdier Nan Kapehde’

Pohl sohte kasalehda ni oaretik uwe ieu de persent depe emen anahne meirongki, ahpw ihte e kangoange irail met: “nin tepin wihk koaros, emenemen kumwail pahn katohrehsang ekis mwohni ni uwe ehu me konehng sang ni me e kin koadoahkihada, oh nekidala.” (1 Korint 16:2) Sang ni arail pahn kin koasoanehdi oh katohrehla uwen mwohni ehu ahnsou koaros, irail mehn Korint kan sohte pahn ahneki pepehm me irail idihd en kihda meirong eri kihwei ni arail sohte men ni ahnsou me Pohl kin mwemweitla rehrail. Ong emenemen Kristian, koasoandi en uwen mwohni me e pahn meirongki pahn wia mehkot me ih kelepw pahn ese, oh e pahn kihda eh kisakis ‘duwen me e koasoanehdier nan kapehde.’​—2 Korint 9:5, 7.

Ma irail mehn Korint kan mwahuki dolung tohto, irail pil anahne kamwerehdi tohto. Sohte me kin ndaiong irail en kihwei laudsang uwen me irail kakong. Pohl kamehlelehiong irail: ‘I sohte men katoutouwihkumwailla. Koht kin kupwurperenki uwen me kumwail pahn kak kihwei, ahpw E sohte kin kupwurperenki amwail kihwei mehkot me kumwail sohte kakong.’ (2 Korint 8:12, 13; 9:6) Nan ehu kisinlikou en mwuhr, wahnpoaron Pohl kaweidki: “Eri, ma emen sohte kin apwalih kiseh kan, ahpw mehlel uhdahn kisehn pein eh peneinei, e kahmahmkilahr eh pwoson, oh e suwedsang irail kan me sohte arail pwoson.” (1 Timoty 5:8) Pohl sohte kin kangoange emen en wia eh meirong me pahn kauwehla kaweid wet.

E kesempwal kitail en tehk me Pohl apwalih rikirikpene meirong kan ong ‘irail me sarawi kan’ me anahne sawas. Kitail sohte wadekada nan Pwuhk Sarawi me Pohl oh ienge wahnpoaron kan kin kihpene eisek kis ehu en paien aramas akan ong pein arail doadoahk. (Wiewia 3:6) Pohl kin ahnsou koaros kalahnganki kisakis kan me mwomwohdiso kan kin kadarodohng ih, ahpw e kin kanahieng pwe e dehr kihong rie kan nan “katoutou laud.”​—1 Deselonika 2:9; Pilipai 4:15-​18.

Rahnwet Ken Wia Meirong Ni Omw Pein Nsenkihda

E sansal me irail Kristian kan nan keieun senturi kin wia arail meirong ni arail kin pein nsenkihda ahpw kaidehn eisek kis ehu en ahr pai kan. Ahpw, ele mwein ke kak pil medemedewe ma met kak pil doadoahk rahnwet pwe en sewese doadoahk en kalohki Rongamwahu oh sewese irail akan me anahne sawas.

Nna, medewehla mepwukat. Nan pahr 1879, irail sounwiahda makisihn wet kasalehda ni sansal me irail “sohte pahn pekipek rehn aramas akan en sawas.” Ahpw, iaduwen​—⁠met kerempwehla en Sounkadehdehn Siohwa kan arail kin nannanti kalohki padahk mehlel en Pwuhk Sarawi?

Nan rahnpwukat, Sounkadehdehn Siohwa kan kin kihseli Pwuhk Sarawi kan, pwuhken Kristian kan oh pwuhk teikan nan sahpw 235. Kahn Iroir (The Watchtower), makisihn ehu me kin kasukuhlki duwen Paipel, mahs kin wiawihda oh kohpeseng pak ehu nan sounpwong ehu oh kin tohtohki meh 6,000 ni lokaia ehute. Met, The Watchtower makisihn kin wiawihda pak riau nan sounpwong ehu oh me tohtohsang 24,000,000 ni lokaia 146. Pwehn koasoanehdi mwahu doadoahk wet en kasukuhlki Paipel nan sampah pwon, irail Sounkadehde kan kauwadahr Branch kan nan sahpw 110. Patehng met, irail pil kauwada ihmw sarawi kid kei iangahki wasahn kapokon laud kan me pahn itarohng irail akan me kin men kalaudehla arail sukuhliki Paipel.

Ni arail kin keieu mwohnki en apwalih en aramas anahn en pali ngehn, Sounkadehdehn Siohwa kan pil kin kesempwaliki sewese iengerail akan anahn en paliwar akan. Ni riarail akan arail kin lelohng kahpwal akan me kohsang mahwin, rerrer en sahpw, sohte keteu, oh melimel kan, irail kin mwadangete sawaskihda wini kan, mwenge, likou, oh pil anahn teikan. Epwel pwukat kin kohsang sawas kan me emenemen Kristian kan de mwomwohdiso kan kin kihda.

Sawas pwukat pil kin sewesehda katikihla kahpwal akan en irail me apwal akan, duwehte Genival, me koasoipe wiawiher ekis mwowe. E paiamwahu pwehki mwohn e kak netikihla imwe, emen sounkalohk kaukaule me adaneki Maria mwemweitala reh oh tuhwong Genival. Genival pil katamanda oh koasoia: “Aht koasoipene kapitasang ahi peneinei kahpwal soh katepe tohto.”

Genival diarada me sapwellimen Koht doadoahk sohte kin poahsoankihda eisek kis en pai kan. Ni mehlel, meirongki eisek kis en pai kan solahr wia kosonned en Paipel ehu. E sukuhliki me Kristian kan kin paiekihda arail kin kihwei ni peren oh irail sohte pwukoahki kihwei laud sang me irail kakong.

Ni Genival eh kin kihwei ni e kin pein nsenkihda​—⁠met kin wahdohng ih peren mehlel. E kin kasalehda met ni ahl wet: “Ele mwein I kin kihda de pil sohte kihda persent 10, ahpw I kin inenen perenki ahi sawas en mwohni kan oh I pil ese me Siohwa pil kin perenki met.”

[Kaokon nan Pali 6]

Iaduwen​—⁠Irail Pahpa en Sarawi en Mahs akan kin Padahki Duwen Meirongki Eisek Kis Ehu en Pai kan?

“Me kepwehpwe nanpwungatail pil pahn sewese irail me anahn akan . . . Irail me pweida kan oh irail me men sewese meteikan en kihda dahme emenemen lemeleme me konehng.”​—The First Apology, Justin Martyr, c. 150 C.E.

“Irail mehn Suhs akan kin kihda eisek kis ehu en ahr pai kan ohng Koht ahpw irail Kristian kan kin katohrehla arail pai koaros ong soahng kan me Koht kupwurki, . . . nin duwen me liohdi semwehmweho wia ni e meirongkihla ah mour pwon ong Koht.”​—Against Heresies, Irenaeus, c. 180 C.E.

“Mendahki mie neitail kohpwa en soahng kesempwal kan, audepe kan sohte pahn pwainda komour nin duwen pelien lamalam ehu me mie pweine. Pak ehu nan sounpwong ehu, ma emen mwahuki, e kak kihdiong nan kohpwao kisin sawas en mwohni; ahpw ihte ma e perenki oh ihte ma e kakong: sohte idihd ahpw sang ni pein nsenen emenemen.”​—Apology, Tertullian, c. 197 C.E.

“Ni Sarawi ah laudla oh soangsoangen pwihn kan pwarada, e wiahla anahn ehu irail en wiahda kosonned akan pwe en kak itar en pwain irail kan me kin wia doadoahk sarawi kan. Irail eri alehda oh doadoahngki Kosonned en Moses me pid meirongki eisek kis ehu en pai kan . . . Tepin kokoudahn kosonned wet sansalda nan kisinlikou ehu me wiawihda sang irail kaun en sarawi kan ni arail tuhpene nan Tours nan pahr 567 C.E. oh mwuhr pwarada nan kosonned en sarawi sang irail pwihn en wia kosonned akan en Council of Macon nan pahr 585 C.E..”​—The Catholic Encyclopedia.

[Kilel nan Pali 4, 5]

Kihda atail sawas sang mohngiongatail kin wahdo peren

[Credit Line]

Coin, top left: Pictorial Archive (Near Eastern History) Est.

[Kilels nan Pali 7]

Sawas me kin kohwong doadoahk en kalohk, sewese aramas me lelohng apwal, oh pil wiahda ihmw sarawi kapw kan kin kohsang aramas me pein nsenkihda kihda arail sawas