Tepin Kristian Akan Oh Kosonned En Moses

“Eri, Kosonnedo kin wia atail sounkaweid me kin kahluwaikitaillahng Krais.”​—KALESIA 3:24, NW.

1, 2. Irail mehn Israel akan me kin kapwaiada Kosonned en Moses kin alehdi soangen kapai dah kan?

NAN 1513 B.C.E., Siohwa ketikihong mehn Israel akan kosonned akan. E padahkiong aramas akan ma irail pahn peikiong Ih, E pahn ketin kapaiada irail oh re pahn paiekihda mour kaperen oh kansenamwahu.​—Eksodus 19:5, 6.

² Koasoandi en Kosonnedo, adaneki Kosonned en Moses, de “Kosonnedo,” oh Kosonned wet iei “sarawi oh pwung oh mwahu.” (Rom 7:12) E kin utungada irair kaselel kan duwehte kadek, mehlel, tiahk mwakelekel, oh kadek ong mehn mparail kan. (Eksodus 23:4, 5; Lipai 19:14; Deuderonomi 15:13-​15; 22:10, 22) Kosonnedo pil kin kangoange mehn Suhs akan en limpoakpene. (Lipai 19:18) Oh pil, irail sohte kak werekiong mehn liki kan de pil pwoudkihda lih en mehn liki kan me sohte kin mih pahn Kosonnedo. (Deuderonomi 7:3, 4) Nin duwen “kehl” ehu me kin katohrohrpeseng mehn Suhs akan oh mehn liki kan, Kosonned en Moses kin pere sapwellimen Koht aramas akan en dehr saminkihla madamadau oh wiewia kan en mehn liki kan.​—Episos 2:14, 15; Sohn 18:28.

3. Pwehki sohte emen aramas me kak kapwaiada Kosonnedo ni unsek, met kin imwikihla dah?

³ Ahpw, irail mehn Suhs akan me kin nantiong kapwaiada Kosonnedo ni oaretik, eri, irail pil sohte kak kapwaiada ni unsek. Siohwa kin nohn kakos ong irail? Soh. Ehu kahrepe Kosonnedo me kohwong mehn Israel akan iei en “kasalehda dahkot sapwung.” (Kalesia 3:19) Kosonnedo kin kahrehong mehn Suhs me mehlel akan en wehwehki me irail anahne emen me pahn kasapahledo aramas akan. Ni ahnsou me Sises leledohr, mehn Suhs lelepek kan me pereperen. Ahr kin pitsang dihp oh mehla kerendohr!​—Sohn 1:29.

4. Ni ahl dahieu me Kosonnedo kin duwehte emen “sounkaweid me kin kahluwaikitaillahng Krais”?

⁴ Kosonned en Moses iei koasoandi ieu me pahn wiawi ni ahnsoukiste. Wahnpoaron Pohl ntingwong ienge Kristian akan nin duwen emen “sounkaweid me kin kahluwaikitaillahng Krais.” (Kalesia 3:24) Mahs, sounkaweid kan kin kahre seri kan ong wasahn sukuhl oh pil kapwureirailla mwurin sukuhl. Ahpw, e sohte kin wia pwukoa en sounpadahk emen; ihte e kin kahre seri kan rehn arail sounpadahk. Duwehte Kosonned en Moses, e wiawihda pwen kahre mehn Suhs akan me kin lemmwiki Koht ong Krais. Sises inoukihdahr me e pahn ketin ieiang sapwellime kan “ahnsou koaros lel ni imwin kawa.” (Madiu 28:20) Ni ahnsou me mwomwohdiso en Kristian tepida, “sounkaweido”​—Kosonnedo⁠—sohlahr katepe. (Rom 10:4; Kalesia 3:25) Ahpw, ekei mehn Suhs me iangala Kristian kin ekis pwand en wehwehki padahk kesempwal wet. Ihme kahrehda irail kin kapwaiada Kosonnedo pil mwurin kaiasadahn Sises. Ahpw, aramas teikan kapwungala ahr madamadau kan. Pwehki irail kapwungala ahr madamadau kan, re kin wia mehn kahlemeng mwahu ong kitail rahnwet. Kitail pahn kilang dahme irail wia.

Wehwe Kapw ong Padahk Kesempwal kan en Kristian

5. Kaweid dah kei me Piter alehdi nan kaudiahl ehu, oh dahme kahrehda e pwuriamweikihla?

⁵ Nan pahr 36 C.E., Kristian wahnpoaron Piter kilangada kaudiahl kapwuriamwei ehu. Ahnsowo, ngihl ehu sang nanleng peidihdo, oh padahkiong ih en kemehla oh kang menpihr kan oh mahn akan me samin nin duwen Kosonnedo kin kaweidkin irail. Piter inenen pwuriamweikihla! E saikinte “tungoale mehkot me samin ong kaudok oh sohte mwakelekel.” Ahpw ngihlo pwurehng mahsanih: “Ke dehr wiahki me samin mehkot me Koht mahsaniher me mwakelekel.” (Wiewia 10:9-15) Piter sohte ngihtehte kolokolete Kosonnedo, e kapwungala eh madamadau. Met kin kahrehong ih en wehwehki duwen mehkot kapwuriamwei duwen sapwellimen Koht kupwur kan.

6, 7. Dahme sewese Piter en kamehlele me e pahn kak tepida kalohk ong mehn liki kan, oh soangen madamadau dah kei me e pil ahneki?

⁶ Eri, iet me wiawi. Ohl silimen kohla ni ihmw me Piter kin pweidi, oh irail peki rehn Piter en iang irail kohla ni imwen mehn liki soh-sirkumsais me kin lemmwiki Koht, ede Kornilius. Piter kasamwo ohl pwukat oh irail pedolong nan ihmw. Ni ahnsou me Piter wehwehki duwen kaudiahlo, mandahn rahno Piter iang irail kohla ni imwen Kornilius. Wasao, Piter kadehde duwen Sises Krais. Ni ahnsowo, Piter mahsanih: “Met I wehwehkidahr me Koht sohte ketin lipilipilki aramas. E kin ketin kupwurperenki mehmen me kin lemmwiki, oh pil wiewia me pwung.” Kaidehn Kornilius kelepw, ahpw pil kiseh kan oh kompoakepah kan pwoson Sises, oh “ngehn sarawi ahpw ketidihdo pohn irail koaros me rongorong mahseno.” Pwehki Piter pohnese me Siohwa ketin wia met, e “padahkihong irail en papidaisla ni mwaren Sises Krais.”​—Wiewia 10:17-​48.

⁷ Dahme sewese Piter en kamehlele me mehn liki kan me sohte kin utungada Kosonned en Moses pahn kak wiahla sapwellimen Sises Krais tohnpadahk kan? Pwehki e ahneki kehl en dehdehki mehkan ni pali ngehn. Pwehki Koht kin kasalehda me E kin ketin kupwurki mehn liki kan me sohte sirkumsais, ni E ketin kamweridiong pohrail sapwellime ngehn sarawi, Piter kin dehdehkihla me irail kak papidaisla. Ni ahnsowohte, Piter wehwehki me Koht sohte kin kasik mehn liki kan me iangalahr Kristian en kapwaiada Kosonned en Moses nin duwen mehkot me irail anahne kapwaiada mwohn irail pahn kak papidaisla. Ma ke momour ahnsowo, ke kak kahlemengih Piter oh kapwungala ahmw madamadau?

Ekei Aramas kin Nantihongete Idawehn “Sounkaweido”

8. Madamadau dahieu me pid sirkumsais me weksang madamadau en Piter me ekei Kristian akan nan Serusalem kin utungada, oh dahme kahrehda?

⁸ Mwurin Piter mweselsang imwen Kornilius, e kohlang Serusalem. Mwomwohdiso me mih wasao, rongehr me mehn liki kan me sohte sirkumsais “aleier mahsen en Koht” oh met kahrehong ekei tohnpadahk en mehn Suhs akan en nsensuwed. (Wiewia 11:1-3) Edetehn irail wehkada me mehn liki kan kak wiahla sapwellimen Sises tohnpadahk kan, “aramas akan me kin utungada sirkumsais” kin kahngohdi nda me aramas akan me kaidehn mehn Suhs anahne kapwaiada Kosonnedo pwehn kak ale komourparail. Weksang met, nan sahpw me pali laud en towe kan iei mehn liki kan, oh mehn Suhs akan me iangala Kristian me malaulau, aramas nan wasa pwukat sohte kin akpwungkihpene duwen sirkumsais. Madamadau riau pwukat kin wiwiawi erein sounpar 13. (1 Korint 1:10) Met wia kasonge lelepek en irail tepin Kristian akan​—keieu ong irail mehn liki kan me kin kousoan nan wasa kan me mehn Suhs kin kousoan ie!

9. Dahme kahrehda e kesempwal en kapwungala kahpwal me pid sirkumsais?

⁹ Irair wet kapwungpwungla nan pahr 49 C.E. ni ahnsou me Kristian akan me kin kohsang Serusalem kohlahng Andiok nan Siria, wasa me Pohl kalakalohkseli. Irail tepida wia padahk me irail mehn liki kan me iangala Kristian anahne sirkumsais nin duwen Kosonnedo. Akamai laud wiawi nanpwungarail oh Pohl oh Parnapas pil akamai ong irail! Ma irail sohte kapwungala duwen ire wet, ekei Kristian kan​—⁠sohte lipilipil ma irail mehn Suhs de mehn liki​—⁠irail pahn kak dipwekelekelkihda met. Eri, koasoandi ieu wiawi ong Pohl oh pil ekei irail en kohlahng Serusalem oh peki rehn Governing Body en Kristian en sewese irail en kapwungala met.​—Wiewia 15:1, 2, 24.

Mwurin Sawehwe, Irail eri Ahnekihda Miniminpene!

10. Ia ekei ire kesempwal kan me Governing Body koasoiapene mwohn irail wiahda arail pilipil me pid irair en mehn liki kan?

¹⁰ Nan ehu mihding, ekei aramas kin utungada anahnepen sirkumsais, ahpw ekei kin uhwong met. Ahpw, irail sohte kin mweidong arail pepehm en kaweid irail. Mwurin irail koasoiapene duwen ire wet, wahnpoaron Piter oh Pohl kawehwehda duwen kilel akan me Siohwa ketin wia ong aramas pwoson kan me sohte sirkumsais. Ira kawehwehda me Koht ketin kamwerediong mehn liki soh-sirkumsais kan ngehn sarawi. Ira kihda peidek wet: ‘Mwomwohdiso en Kristian kak ni pwung en soikala aramas akan me Koht ketin pwungkihla?’ Mwurin met, tohnpadahk Seims wadek iren Paipel kan, oh met kin sewese irail koaros me iang towehda mihdingo en wehwehki duwen kupwuren Siohwa.​—Wiewia 15:4-​17.

11. Dahme sohte kerempwa pwihno ni ahnsou me irail wiahda arail pilipil me pid sirkumsais, oh dahme kin kasansalehda me Siohwa kin kupwurki arail pilipil?

¹¹ Koaros kin awiawih Governing Body en wiahda arail pilipil. Pwehki irail mehn Suhs akan, eri irail pahn pwungki sirkumsais? Soh. Ohl lelepek pwukat kin mweidohng iren Paipel kan oh sapwellimen Koht ngehn sarawi en kaweid irail. Mwurin irail rong duwen mehn kadehde kesempwal kan, irail koaros me iang kisehn Governing Body pwungkipene me irail mehn liki kan me iangala Kristian sohte anahne sirkumsais oh sohte anahne idawehn Kosonned en Moses. Ni ahnsou me Kristian teikan rong duwen pilipil wet, re perenda, oh mwomwohdiso kan “wie tohtohla rahn koaros.” Irail Kristian akan me utungada kaweid me kohsang rehn Koht kin alehdi pasapeng pwung me kohsang iren Paipel kan. (Wiewia 15:19-​23, 28, 29; 16:1-5) Ahpw, pasapeng ong peidek kesempwal ieu saikinte wiawi.

Iaduwen Irail Mehn Suhs akan me Iangala Kristian?

12. Mehnia peidek saikinte ale pasapeng?

¹² Pwihn en Governing Body kasalehda ni sansal me irail mehn liki kan me iangala Kristian sohte anahne sirkumsais. Ahpw iaduwen mehn Suhs akan me iangala Kristian? Pilipil en Governing Body sohte sapeng peidek wet ni oaretik.

13. Dahme kahrehda e sapwung en nda me aramas akan anahnehte kapwaiada Kosonned en Moses ma irail men komourala?

¹³ Ekei mehn Suhs akan me iangala Kristian kin “poadidiong Kosonnedo” oh irail kin pousehla sirkumsais neirail pwutak kan oh kapwaiada pil ekei kosonned teikan me mih nan Kosonnedo. (Wiewia 21:20) Ekei kin wia daulih met, irail kin ngihtehte nda me mehn Suhs akan me iangala Kristian anahne en kapwaiada Kosonnedo ma irail men komourala. Irail me inenen sapwung. Karasepe ieu, iaduwen emen Kristian kak meirongki mahn pwen ale mahkpen dipe kan? Ni mehlel, meirong en Krais kihweisang anahnepen meirong en mahn akan. Oh iaduwen ehu kosonned sang Kosonnedo me nda me mehn Suhs akan en dehr nohn karanih mehn liki kan? E pahn inenen apwal ong sounkalohk ngoang en Kristian akan en kapwaiada kosonned pwukat oh ni ahnsowohte kapwaiada kaweid en padahkiong mehn liki kan soahng koaros me Sises padahkiong irail. (Madiu 28:19, 20; Wiewia 1:8; 10:28)a E sohte sansal ma peidek wet me kapwungpwungla nan mihding kan en Governing Body. Ahpw, mwomwohdiso pahn alehdi sawas.

14. Kaweid dahieu me kin pid Kosonnedo me ahn Pohl kisinlikou kan me kohsang rehn Koht ketikihda?

¹⁴ Kaweid sohte kohsang kisinlikou me kohsang rehn Governing Body, ahpw e kohsang kisinlikou kan me Koht ketin kamwekid irail wahnpoaron akan en ntingihdi. Karasepe ieu, wahnpoaron Pohl kadaralahng mehn Suhs oh mehn liki kan me kin mih nan Rom kisinlikou kehlail ehu. Nan sapwellime kisinlikou me e kadaralahng irail, e kawehwehda me mehn Suhs mehlel “me kin wia mehn Suhs loale, met wehwehki me eh mohngiong sirkumsaislahr​—⁠iei doadoahk en ngehnen Koht.” (Rom 2:28, 29) Nan kisinlikouohte, Pohl doadoahngki karasaras ehu pwen kasalehda me Kristian akan sohlahr mih pahn Kosonnedo. E kasalehda me lih emen sohte kak pwoudkihda ohl riemen. Ahpw, ma eh pwoud mehla, e pahn kak pwurehng pwopwoud. Pohl uhd kasalehda ia wehwehn karasaraso oh e kasalehda me irail Kristian me keidi kan sohte kak mih pahn Kosonned en Moses oh iangala Krais ni ahnsowohte. Irail anahne “mehsangehr Kosonnedo” pwe irail en ehupene rehn Krais.​—Rom 7:1-5.

Pwand en Wehwehki

15, 16. Dahme kahrehda ekei mehn Suhs me iangala Kristian sohte kak wehwehki ma irail anahnehte idawehn Kosonnedo, oh dahme met kin kasalehda duwen kesempwalpen mwasamwasahn ni pali ngehn?

¹⁵ Dahme Pohl koasoia duwen Kosonnedo kin uhdahn pwung, sohte me kak kasapwunge. Eri, dahme kahrehda ekei mehn Suhs akan me iangala Kristian sohte kak wehwehki duwen met? Ehu kahrepe, pwehki irail sohte kak dehdehki mehkan ni pali ngehn. Karasepe ieu, irail sohte kin kang mwenge kekeluwak en pali ngehn. (Ipru 5:11-​14) Irail pil sohte kin kalapw iang towehda mihding en Kristian kan. (Ipru 10:23-​25) Pil ehu kahrepe me ekei aramas akan sohte kin wehwehki duwen met pwehki koasoandi en Kosonnedo. E kin pid mehkan me aramas kak kilang oh doahke, duwehte tehnpaso oh pwihn en samworo kan. E pahn mengei ong emen me sohte kehlail ni pali ngehn en kamehlele Kosonnedo sang padahk loal kan en pelien Kristian akan, me kin poahsoanda pohn mehkan me kitail sohte kak kilangki mesetail.​—2 Korint 4:18.

¹⁶ Pohl kawehwehong mehn Kalesia kan nan sapwellime kisinlikou duwen pil ehu kahrepe ekei aramas me kin dene irail iangala Kristian kin ngoangki en kapwaiada Kosonnedo. E kawehwehda me ohl pwukat kin men ale wahu sang rehn aramas akan me kin iang pelien lamalam me pali moron en aramas kin iang. Irail sohte men ren weksang aramas teikan nan wasao, ahpw irail kin nantiong ren duwehte meteikan. Irail kin keieu nsenohki kenikenla rehn aramas akan sang kenikenla rehn Koht.​—Kalesia 6:12.

17. Iahd me madamadau pwung me kin pid Kosonnedo sansal ong koaros?

¹⁷ Kristian akan me kin dehdehki mehkan ni pali ngehn oh onop kanahieng dahme Koht kamwekidada Pohl oh mehteikan en ntingihdi, irail kin wiahda arail pilipil pwung kan duwen Kosonnedo. Ahpw, sang nan pahr 70 C.E. madamadau pwung duwen Kosonned en Moses kin sansal ong mehn Suhs akan me iangala Kristian. Met kin sansal ni ahnsou me Koht ketin mweidong Serusalem, oh tehnpase, oh rekohd kan me pid pwihn en samworo kan en kasohrala. Sang ni ahnsowo, aramas akan sohte kak kapwaiada oaritik en Kosonnedo.

Doadoahngki Mehn Kasukuhlo Rahnwet

18, 19. (a) Soangen madamadau dah kei kitail anahne ahneki oh soangen madamadau dah kei kitail anahne liksang ma kitail men kolokolete atail kehl ni pali ngehn? (b) Dahme mehn kahlemeng mwahu en Pohl kin padahkiong kitail duwen kaweid me kitail kin ale sang rehn brother mah kan ni pali ngehn? (Kilang koakon nan pali 16.)

¹⁸ Pwehki kitail ahpwtehn sukuhliki duwen dahme wiawi mahs, mwein ke kin medemedewe: ‘Ma I iang momour nan ahnsowo, dahme I pahn wia ni ahnsou me sapwellimen Koht koasoandi kan kin ekis ekis sansalda? I pahn ngihtehtehki idawehn madamadau kan me kohsang tiahk me ke kin ahn? De I pahn kanengamah awih lao lel madamadau pwung pahn sansalda? Oh ni ahnsou me madamadau pwung sansaldahr, I pahn utungada madamadau pwungo sang mohngiong unsek?’

¹⁹ Ni mehlel, kitail sehse dahme kitail pahn wia ma kitail momour ahnsowo. Ahpw kitail kak pein idek rehtail peidek wet: ‘Iaduwen I kin mwekidki kawehwe kapw kan ong atail kin wehwehki Paipel nan rahnwet? (Madiu 24:45) Ni ahnsou me kaweid en Paipel kin kohda, I kin song en kapwaiada, kaidehn ihte oaretik en kaweido, ahpw mouren kaweido? (1 Korint 14:20) I kin ni kanengamah awiawih Siohwa ni ahnsou me ai peidek kan kin pwand en pasapengla?’ E kesempwal kitail en doadoahngki mwahu mwengehn pali ngehn me kin kohwong kitail rahnwet, pwe kitail en “dehr peiweisang padahk mehlel.” (Ipru 2:1, NW) Ni ahnsou me Siohwa ketikihong kitail kaweid sang sapwellime Mahsen, ngehn sarawi, oh sapwellime pwihn sansal nin sampah, kitail en rong kanahieng. Ma kitail pahn wia met, Siohwa pahn kapaikitailda kitail ni E pahn ketikihong kitail mour soutuk me pahn kaperen oh kansenamwahu.

[Nting tikitik me mi pahs]

Iaduwen Ke Pahn Sapeng?

• Ni ahl dahieu me Kosonned en Moses kin duwehte emen “sounkaweid me kin kahluwaikitaillahng Krais”?

• Iaduwen ahmw pahn kawehwehda wekpeseng en ahl akan me pid ahn Piter oh “irail akan me kin utung sirkumsais” arail kin mwekidki kapwungpwunglahn wehwe kapw en padahk mehlel?

• Dahme ke sukuhliki duwen ahl me Siohwa kin kasansalehda padahk mehlel nan rahnwet?

[Box on Page 16]

Pohl kin ni Lamalam Aktikitik Powehdi Kasongosong

Mwurin Pohl wia eh seiloak en misineri me pweida mwahu, e kohlahng Serusalem nan pahr 56 C.E. Kasongosong lelohng ih wasao. Rohng lelehr mwomwohdisowo me irail solahr anahne idawehn Kosonnedo. Ohl mah kan perki me irail mehn Suhs kan me ahpwtehn iangala Kristian pahn dipwekelekelki mahsen kehlail en Pohl duwen Kosonnedo oh irail ele mwein pahn lemeleme me Kristian akan sohte kin wauneki sapwellimen Siohwa koasoandi kan. Nan mwomwohdiso, mehn Suhs me iangala Kristian pahmen me wiahda arail inou, mwein inou en mehn Nasaraid. Irail anahne kohla ni Tehnpas Sarawio pwen kanekehla koasondi kan en inouo.

Ohl mah kan idek rehn Pohl en iang aramas pahmen pwukat en kohla ni Tehnpas Sarawio oh pil apwalih irail. Pohl ntingihdi kisinlikou riau me e kin kasalehda me aramas akan solahr anahne idawehn Kosonnedo pwen kamourala. Ahpw, e kin kanahieng pwen dehr kansensuwedih kadeikpen loalen aramas teikan. E ntingihdi: “Ahpw I wiahkiniehla duwehte aramas en pahn Kosonnedo men . . . pwe I en komourala irail kan me mihmi pahn Kosonnedo.” (1 Korint 9:20-​23) Pohl sohte kauwehla mouren kaweid kesempwal kan en Paipel, ni ahnsou me e lemeleme me e kak rong kaweid en ohl mah kan. (Wiewia 21:15-​26) E sohte sapwung ong Pohl en wia met. Koasondi ong inou kan sohte kin uhwong Pwuhk Sarawi, oh aramas akan kin doadoahngki Tehnpas Sarawio ong kaudok min, kaidehn ong kaudokiong dikedik en eni kan. Eri, Pohl kapwaiada dahme ohl mah kan padahkiong ih en wia, pwe e sohte men kahrehong irail en dipwekelekel. (1 Korint 8:13) Sohte peikidpe me Pohl kin kasalehda lamalam aktikitik, oh met kin kalaudehla atail kalahnganki ih.

[Kilel nan Pali 14, 15]

Erein sounpar kan, madamadau wekpeseng me kin pid duwen Kosonned en Moses kin wiawi nanpwungen Kristian akan