Rong Dahme Ngehn Sarawi Mahsanihong Mwomwohdiso Kan!

“Eri, mehmen me mie salenge mehn rong wasa, a en rong dahme ngehn sarawi mahmahsanihong mwomwohdiso kan.”​—KAUDIAHL 3:22.

1, 2. Mehnia kaweid kin pwurpwurehng kohda ni ahnsou me Sises kin mahmahsanihong mwomwohdiso isuh me kileledi nan pwuhken Kaudiahl?

SAPWELLIMEN Siohwa aramas akan anahne rong mahsen en Sises Krais kan me kin poahsoankihda ngehn sarawi oh kapwilwong mwomwohdiso isuh me pwarada nan pwuhken Kaudiahl. Emenemen mwomwohdiso pwukat koaros kin alehdi kaweid wet: “Eri, mehmen me mie salenge mehn rong wasa, a en rong dahme ngehn sarawi mahmahsanihong mwomwohdiso kan.”​—Kaudiahl 2:7, 11, 17, 29; 3:6, 13, 22.

² Kitail koasoiadahr duwen sapwellimen Sises mahsan kan ong tohnleng kan, de sounapwalih kan en Episos, Smirna, oh Perkamum. Iaduwen atail pahn kak ale kapaipen dahme e ketin mahsanih pahn kaweid en ngehn sarawi ong mwomwohdiso pahieu teikan?

Mahsen ong Tohnleng en Daiadaira

3. Iawasa Daiadaira kin mih ie, oh dahme e kin ndandkihla?

³ “Sapwellimen Kohto” kin kapinga oh kapwungala mwomwohdiso en Daiadaira. (Wadek Kaudiahl 2:18-​29.) Daiadaira (ni ahnsouwet Akhisar) koukouda pohn keilen kaseng en Pillap en Gediz (mehn mahs kin kadanekihla pillap wet Hermus) me kin mih ni pali kapi en Eisia Mainor. Kahnimw wet kin ndandkihla dipwisou kan me aramas kin wiahda. Aramas akan me kin koaduh likou kan nan pihl poh weitahta kin doadoahngki “madder root” pwen wiahda pohn ntahnmwel. Lidia, wiahla emen Kristian ni ahnsou me Pohl mwemweitlahng Pilipai nan Krihs, oh ih “me kin netiki likou pohn ntahnmwel, nan kanihmw en Daiadaira.”​—Wiewia 16:12-​15.

4. Kaping dahieu kohwong mwomwohdiso en Daiadaira?

⁴ Sises kin kapingahki mwomwohdiso en Daiadaira pwe arail wiewia mwahu kan, limpoak, pwoson, dadaur, oh doadoahk en kalohk. Oh ni mehlel, arail ‘doadoahk en ahnsou wet me laudsang mehlel arail doadoahk en mahso.’ Ahpw, mendahki atail wiewia kan en mahs me mwahu, kitail en dehr soukautih tehk kanahieng duwen atail tiahk kan ahnsou wet.

5-7. (a) Ihs “liho Sesepel,” oh dahme pahn wiawi ong kasongosong me kin kohsang reh? (b) Mahsen en Krais ong mwomwohdiso en Daiadaira kak sewese lih akan me kin pwoson Koht en wia dah?

⁵ Mwomwohdiso en Daiadaira kin mweidong tohnmwomwohdiso kan en kaudokiong dikedik en eni kan, kaudok likamw, oh dipen nenek. Nanpwungarail “liho me ede Sesepel”​—me karasaiong pwihn en lih me kin duwehte Sesepel, nanmwarki lih suwed en keinek eisek en Wehin Israel. Ekei semen en Paipel kan koasoia me ‘soukohp lih akan’ en Daiadaira kin song en kapereniehki Kristian akan en kaudokiong pwihn en aramas akan me kin wiahda dipwisou kan oh ren iang wia kasarawi kan me kin pid meirongki mwenge kan ong dikedik kan. Rahnwet, kitail en dehr mweidong soukohp lih emen en song kaunda aramas teikan nan mwomwohdiso en Kristian!

⁶ Krais ‘pahn kesehkidiong nan kie, wasa ih [Sesepel] oh irail kan me kin wia dipen kamwahl ong ih pahn lokolok laud ie. Eri, I [Krais] pahn wia met, ma re sohte weksang ni wiewia suwed kan me re wiadahr rehn liho.’ Sounapwalih en mwomwohdiso kan en dehr mweidong padahk oh wiewia suwed pwukat en wiawi nan mwomwohdiso, oh Kristian akan koaros sohte anahne wiahda dipen nenek ni pali ngehn oh pali war de kaudokiong dikedik en eni pwe dene ren kak wehwehkihla me “soahng rir kan en Sehdan” me inenen suwed. Ma kitail kin kapwaiada sapwellimen Sises kaweid, ‘kitail pahn kolokolte kehlail dahme mie rehtail,’ oh dihp sohte pahn powehkitaildi. Pwehki irail me keidi iasadahr kan kin soikala wiewia suwed akan oh ineng suwed akan, irail pahn alehdi “manaman en kaunkihda wehi kan” oh irail pahn iang Krais kauwehla wehi kan. Ni karasaras, mwomwohdiso kan en nan rahnpwukat kin ahneki usu kan, oh irail me keidi kan pahn alehdi “usuhn rahn lingaling,” ohl kamwohd, Sises Krais, ni ahnsou me re pahn iasadalahng nanleng.​—Kaudiahl 22:16.

⁷ Mwomwohdiso en Daiadaira me aleiehr kaweid en dehr mweidong lih akan me kin lahlahwe padahk mehlel en wahdohng nan mwomwohdiso arail padahk kan de wiewia kan. Sapwellimen Krais mahsen ong mwomwohdiso wet kin pil sewese lih akan en rahnwet me kin pwoson Koht en kapwaiada sapwellimen Koht koasoandi ong lih akan. Irail sohte kin song en kaunda ohl akan de kasonge brother kan en wia dipen nenek ni pali ngehn de ni paliwar. (1 Timoty 2:12) Ahpw, weksang met, lih pwukat kin wia mehn kahlemeng mwahu ong wiewia mwahu kan oh doadoahk en kapinga Koht. (Melkahka 68:11; 1 Piter 3:1-6) Ma mwomwohdiso pahn perehla​—padahk min oh tiahk mwakelekel oh kesempwaliki doadoahk en Wehio⁠—Krais pahn ketido oh ketkihong kitail kapai kaselel kan, kaidehn kamakam.

Mahsen ong Tohnleng en Sardis

8. (a) Iawasa Sardis kin mih ie, oh soangen kahnihmw dahieu Sardis? (b) Dahme kahrehda mwomwohdiso en Sardis anahne sawas?

⁸ Mwomwohdiso en Sardis anahne en mwadang ale sawas pwehki e mwomwen mehla ni pali ngehn. (Wadek Kaudiahl 3:1-6.) E mih mpen mwail 30 ni paliehr en Daiadaira, Sardis ehu kanihmw me kin pweida mwahu. Kanihmw wet me dirkihla uwen aramas 50,000, oh e kin kepwehpwehkihla pisnes kan, rek en wahn sahpw akan, likou oh carpet me wiawihkihda wunen sihpw. Soupoad Josephus kasalehda me mehn Suhs tohto kin mihmi nan Sardis ni keieun senturi B.C.E. Nanpwungen mohn ihmw akan nan kahnimwo iei sinakoke ehu oh imwen kaudok ehu ong koht lih en Episos, me ede Artemis.

9. Dahme kitail anahne wia ma kitail kin mwomwen pwangahki wia atail doadoahk en papah Koht?

⁹ Krais mahsanihong tohnleng en mwomwohdisohn Sardis: “I ese omw wiewia kan, I ese me ke iang wadohng aramas mour; eri soh, pwe ke melahr.” Ahpw iaduwen ma aramas teikan kin kilangwong kitail nin duwen aramas me kin mwasamwasahn ni pali ngehn, ahpw ni mehlel kitail kin soukautih en wia atail pwais en Kristian akan oh pwangahki wia doadoahk en kalohk, mwomwen kitail kereniong “mehla ni pali ngehn”? Eri, kitail anahne ‘tamanda dahme [kitail] padahngkiher oh dahme [kitail] rongehr’ mahsen en Wehio, oh kitail anahne pwurehng nantiong wia doadoahk sarawi wet. Sang ni atail mohngiong unsek, kitail anahne en tepida iang towehda mihding en Kristian akan. (Ipru 10:24, 25) Krais kihong kaweid ong tohnmwomwohdiso kan en Sardis: “Ma ke sohte pahn pirida, a I pahn kohwei rehmw duwehte lipirap emen, ke ahpw pahn sasairki ahnsou me I pahn pwarowei.” Iaduwen rahnwet? Ni ahnsou keren kitail pil pahn anahne sapengki Koht.

10. Edetehn ekei aramas kin mihlahr pahn soangen irair duwehte me kin wiawi nan Sardis, dahme ekei Kristian akan kin wia?

¹⁰ Edetehn ma mie aramas me kin mihlahr pahn soangen irair duwehte mwomwohdiso en Sardis, mwein pahn mie ekei aramas ‘me sohte kasaminehla ar likou kan. Oh irail kin likawih likou pwetepwet oh iang Krais kapar, pwe irail warohng iang ih.’ Ahnsou koaros aramas teikan kak kilang me irail kin wiahla Kristian mwahu, mwakelekel, oh sohte kin saminkihla tiahk samin kan oh kaudok likamw en sampah wet. (Seims 1:27) Ihme kahrehda, Sises ‘sohte pahn irisasang mwararail kan sang nan pwuhken me memour kan. E pahn kadehdehda ni pokon sansal mwohn silangin Semei oh sapwellime tohnleng kan me iei kisehi irail.’ Ni sapwellimen Krais lih kamwohd ah mweimweiongehr en iang Krais kekeidwei, lih kamwohd menet pahn kapwatkihda likou min oh mwakelekel, e kin wia kilelepen wiewia pwung en aramas sarawi kan. (Kaudiahl 19:8) Pwais kaselel kan en papah Koht me kin awiawih ihr ni ahnsou me irail pahn kohdahla nanleng kin kangoange irail en kalowehdi sampah wet. Kapai kan pahn pil kohwong aramas akan me kin ahneki koapworopwor en mour soutuk nin sampah wet. Adarail ko kin pil ntingdier nan pwuhken komour.

11. Dahme kitail anahne wia ma kitail kin memeir ni pali ngehn?

¹¹ Kitail sohte men luwetala ni pali ngehn duwehte mwomwohdiso en Sardis. Ahpw dahme kitail pahn kak wia ma kitail kin dehdehki me kitail kin mwomwen wia memeir ni pali ngehn? Kitail anahne mwadang en kapwungala met. Karasepe ieu, tehk ma kitail kin tepida ekis ekis perenkihda wiewia sapwung kan de sohte kin iang towehda mihding kan koaros de kitail sohte kin iang kalohk ahnsou koaros. Kitail kak ngidingidki wia atail kapakap pwen rapahki sapwellimen Siohwa sawas. (Pilipai 4:6, 7, 13) Wadawad en Paipel ni ehu ehu rahn oh onopki Paipel oh pwuhkan en “ladu oh lelepek” pahn sewese kitail en mwasamwasahn ni pali ngehn. (Luk 12:42-​44) Eri, kitail pahn duwehte irail aramas akan nan Sardis me Krais kin ketin kupwurki, oh kitail pahn wia mehn kangoang kan ong iengitail pwoson akan.

Mahsen ong Tohnleng en Piladelpia

12. Iaduwen ke pahn kawehwehda duwen pelien lamalam me kin wiawi nan Piladelpia en mahs?

¹² Sises kapinga mwomwohdisohn Piladelpia. (Wadek Kaudiahl 3:7-​13.) Piladelpia (ni ahnsouwet Alasehir) iei wasahn wiahda wain me kin pweida mwahu ni pali kapi en Eisia Mainor. Oh ni mehlel, arail koht me keieu kesempwal iei Dionysus, arail koht en wain. E sansal, mehn Suhs akan nan Piladelpia sohte pweida ni ahr kin song en padahkiong mehn Suhs akan me iangala Kristian en kolokolete Kosonned en Moses de pwurala rehrail.

13. Iaduwen Krais kin doadoahngki “nein Depit kih”?

¹³ Krais “kin ketin kolokol nein Depit kih,” e sapwellimankidier likilik en sapwellimanki mehkoaros me pid Wehio oh kaweidpen irail koaros me ahneki pwoson. (Aiseia 22:22; Luk 1:32) Sises doadoahngki kiho pwehn ritingada ong irail Kristian akan nan Piladelpia en mahs oh pil Kristian akan me kin mih nan wasa teikan, pwen alehdi pwukoa kan oh pwais ong Wehio. Sang nan pahr 1919 e mweidong “ladu lelepeko” en pedelong nan “wenihmw laud ehu” me kin pid kalohkihseli Wehio, oh aramas me kin uhwong doadoahk wet sohte pahn kak kauhdi. (1 Korint 16:9; Kolose 4:2-4) E sansal me wenihmw en pwais en Wehio sohte kin mweimwei ong irail me kin iang “tehnpas en Sehdan,” pwe irail kaidehn mehn Israel ni pali ngehn.

14. (a) Mehnia inou me Sises ketikiong mwomwohdiso en Pilidelpia? (b) Dahme kitail kak wia pwen sewese kitail en dehr pwupwudi ni ahnsoun “aua en kasongosong” pahn wiawi?

¹⁴ Sises inoukihong Kristian akan nan Piladelpia en mahs: “Pwehki omw kapwaiadahr ei padahk en kanengamah ni ahnsou apwal, I pahn pil silehsang uhk apwal en songosong kan me pahn lelohng sampah pwon pwe en song tohn sampah kan koaros.” Ni ahnsou me kitail kin wia atail doadoahk en kalohk, kitail anahne en alasang Sises ni e kin kasalehda kanengamah. E sohte lohdi pahn imwintihtio ahpw e kin kapwaiada kupwuren Seme. Ihme kahrehda, Krais me iasadahng mour soutuk nanleng. Ma kitail kin tengediong atail pilipil en utungada Wehio ni atail kalohkihseli Rongamwahu, kitail sohte pahn pwupwudi ni ahnsoun kasongosong, oh lohdi nan “aua me kasongosong” pahn wiawi. Kitail pahn ‘nekinekid mwahu dahme kitail kolokol met’ me kin kohsang rehn Krais ni atail pahn nantiong en kalaudehla doadoahk en Wehio. Ni atail pahn wia met e pahn imwikihla atail pahn alehdi nihn kesempwal ehu nanleng ong irail me keidi kan oh pil mour soutuk nin sampah ong irail werek lelepek kan.

15. Dahme irail me pahn wiahki ‘uhren tehnpas en Koht’ anahne en wia?

¹⁵ Krais mahsanih: “Me kin dadaurete lao powehdi me suwed koaros​—I pahn wiahki uhren tehnpas en ei Koht, . . . I pahn ntingihediong powe mwaren ei Koht, oh eden kahnimw en ei Koht, iei Serusalem kapw, me pahn kohdihdo sang nanleng, sang rehn ei Koht, I pil pahn ntingihediong powe pein mwarei kapwo.” Sounapwalih keidi kan uhdahn pahn utungada kaudok mehlel. Irail uhdahn pahn daur koasondi en wia towe en “Serusalem kapw” ni ahr kin kalohkiseli Wehin Koht oh kolokol mwakelekel ni pali ngehn. Met kesempwal ma re men wia uhr akan en tehnpas lingano nanleng oh ma irail men weuwa eden sapwellimen Koht kanihmwo nin duwen ahr wia towe mehlel en lahng kei oh pil kolokol mwaren Krais ni arail wia lih kamwohd. Oh, ni mehlel, irail anahne tungoalenki saleng kan me kin “rong dahme [ngehn sarawi, NW] mahmahsanihong mwomwohdiso kan!”

Mahsen ong Tohnleng en Laodisia

16. Ia ekei ire mehlel kan duwen Laodisia?

¹⁶ Krais ketikiong mwomwohdiso en Laodisia kaweid pwehki irail kin soukautih. (Wadek Kaudiahl 3:14-​22.) Laodisia iei kahnimw me soangen pisnes tohto kin inenen pweida, e mih mpen mwail 90 pali mese en Episos oh e mih nan kesengen ahl kesempwal kan ong wia pisnes rehn kahnimw teikan, oh e mih nan wahu ehu me wahn tuhke kan kin pweida mwahu, oh Pillap Lycus kin pwiliwei nan wahu. Oh irail kin ndandkihla likou kan me wiawihda sang wunen sihpw toantoal. Pil mie sukuhl en wini ndand ehu nan kanihmw en Laodisia, oh mwein irail me wiahda wini ong mesen aramas me adaneki Phrygian powder. Asclepius, emen koht en wini, iei emen arail koht kesempwal. Mie mehn Suhs tohto me kin kousoan nan Laodisia, oh ekei irail me kepwehpwe.

17. Dahme kahrehda kaweid kohwong mehn Laodisia kan?

¹⁷ Sises mahsan ieng mwomwohdiso en Laodisia ki “tohnleng,” emen oh ki manaman e mahsan nin duwen “sounkadehde loalopwoat oh mehlel, me tepin mehkoaros me Koht ketin wiahda.” (Kolose 1:13-​16) Tohnmwomwohdiso en Laodisia ale kaweid pwehki irail “sohte karakar de pil sohte lemwulemwur” ni pali ngehn. Pwehki irail sohte karakar oh lemwulemwur, Krais pahn mwuskinirailweisang nan ewe. E sohte pahn apwal ong irail en wehwehki karasaraso. Kahnimw en Ierapolis kin karanih Laodisia, oh mie pwarer karakar kan wasao, oh mie pihl lemwulemwur kan nan Kolose. Pwehki tohn Laodisia anahne doadoahngki pipe en pihl me kin kohsang wasa doh, ni ahnsou me pihl kin lel Laodisia, pihl wet sohlahr kin lemwulemwur de karakar. Ong ni ahnsou mwotomwot, pihlo kin tang nan warawar en pihl laud ehu. Ni ahnsou e kerendohng Laodisia, pihlo kin uhd tang nan pwoar en takai kan.

18, 19. Sawas dah kei kak kohwong irail Kristian akan en ni ahnsouwet me kin duwehte Kristian akan nan Laodisia?

¹⁸ Rahnwet, aramas akan me kin duwehte mehn Laodisia kin sohte karakar de lemwulemwur. Sises pahn mwuskinirailweisang nan douwese, pwehki pihlo sohte lemwulemwur de karakar! Sises sohte kupwurki irail en wiahla sapwellime sounkair kan, me keidi “meninkeder en Krais kei.” (2 Korint 5:20) Ma irail sohte pahn koluhla, irail sohlahr pahn kak ahneki ahr pwais nin duwen sounkalohk kan en Wehio. Mehn Laodisia kan kin rapahki kepwe en sampah oh re ‘sehse me irail paisuwed, oh pil semwehmwe, maskun oh kilisou.’ Pwen kesehla ahr kin semwehmwe, maskun, oh kilisou ni pali ngehn, aramas me kin duwehte irail rahnwet anahne en pwain sang rehn Krais ‘kohl me mwakelekelkidahr kisiniei’ iei pwoson kehlail, “likou pwetepwet” en pwung, oh “kisin wini mehn kohieng ni mesen aramas” pwe ni pali ngehn irail pahn kak kilangkihda wasa. Kristian sounapwalih kan kin perenki sewese aramas pwukat en nsenohki ahr anahn akan ni pali ngehn pwe irail en kak “kepwehpwehkihla pwoson.” (Seims 2:5; Madiu 5:3) Oh pil, sounapwali kan anahne en sewese irail en doadoahngki ni pali ngehn “kisin wini mehn kohieng ni mesen aramas”​—irail anahne en pwungki oh kapwaiada sapwellimen Sises padahk kan, kaweid kan, mehn kahlemeng kan, oh madamadau kan. Met kin karasaiong wini me kin sewese kitail en pelianda “dipen ineng en uduk, oh mehkan me aramas kin kilang oh ahnehda, oh mehkoaros me mih nin sampah me aramas kin pohnmwahsohkihda.”​—1 Sohn 2:15-​17.

¹⁹ Sises kin kapwungala oh kaweid aramas koaros me e kin ketin poakohng. Sounapwalih kan me mih pahn sapwellime manaman kin pil anahne kahlemengih ih en kasalehda limpoak. (Wiewia 20:28, 29) Mehn Laodisia kan anahne “ngoangda oh sohpeisang diparail kan,” kapwungala ahr madamadau kan oh elen mour. Eri, mie ekei rehtail me kin ahnla mourki soangen mour me kin kahrehong atail kin papah sarawi ong Koht en wiahki mehkot sohte kesempwal? Ma ih duwen, kitail anahne ‘pwainda kisin wini mehn kohieng ni mesen aramas’ pwen sewese kitail en kilang kesempwalpen ngoangki rapahki mahs Wehio.​—Madiu 6:33.

20, 21. Rahnwet, ihs me kin kasamwo Sises ni ahnsou me e kin wia “letelet,” oh dahme irail kin kasikasik?

²⁰ Krais mahsanih, “Rong! Iet I lelehr ni omw wenihmw oh wie letelet; mehmen me kin rong ngileiet oh ritingadahng ie, I pahn pedolong reh nan imwe oh iang ih, oh e pahn iang ie, se ahpw pahn konokonot.” Ni ahnsou Sises kin wie konokonot rehn aramas teikan, e kin kalapw kihda kaweid ni pali ngehn. (Luk 5:29-​39; 7:36-​50; 14:1-​24) Ni ahnsouwet e wie letelet ni wenihmw en mwomwohdiso me kin duwehte Laodisia. Eri, ni ahnsou e wie letelet, irail tohnmwomwohdiso kan pahn mwekidkihda oh pwurehng kakehlailiala arail limpoak ong ih, kasamwo ih oh mweidong ih en padahkiong irail? Ma irail pahn wia met, Krais pahn wia konokonot rehrail oh irail pahn ale kapai tohto ni pali ngehn.

²¹ Rahnwet, pwihn en “sihpw teikan” kin mweidong Sises en pedolong, oh wiewia wet kin kahrehong irail en ale mour soutuk. (Sohn 10:16; Madiu 25:34-​40, 46) Krais pahn ketikihong emen emen irail keidi kan me kin lelepek en ‘iang mwohd limwahn mwoale, duwehte e mwohd limwahn mwoalen Seme ahnsou wet.’ Ei, Sises kin inoukihong keidi lelepek kan, kating laud ieu en iang mwohd limwahn Sises ni pali maun en Seme nanleng. Pwihn en sihpw teikan kana kan pil kin kasikasik en mih nin sampah kaselel ieu pahnangin kaundahn Wehio.

Mehn Kasukuhl kan ong Kitail Koaros

22, 23. (a) Iaduwen Kristian koaros pahn kak paiekihda sapwellimen Sises mahsen ong mwomwohdiso isuh? (b) Dahme kitail anahne nantiong wia?

²² E sansal me Kristian koaros kak paiekihda dahme Sises mahsanihong mwomwohdiso isuh nan Eisia Mainor. Kristian elder limpoak kan kin wehwehki me Krais kin kapinga tohnmwomwohdiso kan ni ahnsou me konehng, met kin kamwekid irail elder kan en pil kapinga tohnmwomwohdiso kan oh mwomwohdiso kan me kin pweida mwahu ni pali ngehn. Ahpw, ni ahnsou me tohnmwomwohdiso kan mie arail luwet akan, elder kan kin sewese irail en kapwaiada sawas kan me kin kohsang Paipel. Kitail koaros kak kaukaule ale kapai kan sang kaweid me Krais ketikiong mwomwohdiso isuh, ma kitail pahn mwadang kapwaiada oh kapakap.a

²³ Ni imwin rahn pwukat, kaidehn ahnsoun sokauti, noarok mwohni, de mehkan me pahn kahrehong kitail en pwangahki papah Koht. Eri, mwomwohdiso kan koaros anahne rasehng dewen lamp kohl lingaling kan me Sises kin ketin apwapwalih. Nin duwen Kristian lelepek kan, kitail anahne ahnsou koaros en nantiong rong kanahieng sapwellimen Krais mahsan kan oh pil rong mahsen en ngehn sarawi. Eri, kitail pahn ahneki peren nin duwen soun wa marain pwen kapinga Siohwa.

[Nting tikitik me mi pahs]

Iaduwen Ke Pahn Sapeng?

• Ihs “liho me ede Sesepel,” oh dahme kahrehda lih pwoson akan sohte men alasang ih?

• Soangen irair dah kei kin wiawi nan mwomwohdiso en Sardis, oh dahme kitail kak wia pwen dehr duwehte Kristian tohto me kin mihmi nan mwomwohdiso wet?

• Dahme Sises inoukihong mwomwohdiso en Piladelpia, oh iaduwen inou pwukat kin kadoadoahkong kitail rahnwet?

• Dahme kahrehda kaweid anahne kohwong mehn Laodisia, ahpw koapworopwoar dah kan mie ong irail Kristian ngoang kan?

[Kilel nan Pali 14]

Kitail anahne en liksang wiewia suwed kan en “liho me ede Sesepel”

[Kilels nan Pali 16]

Sises kin mweidong sapwellime tohnpadahk kan en pedolong nan “wenihmw laud ehu” me kin kahluwa irail en alehdi pwais en Wehio

[Kilel nan Pali 18]

Ke kin kasamwo Sises oh rong sapwellime mahsen kan?