Kakairada Irair En Peik Pwehki Imwin Sampah Kerendohr
“[Shiloh] me pahn sapwellimanki peik en aramas.”—SENESIS 49:10, NW.
1. (a) Mahs, dahme peikiong Siohwa kin kalapw pidada? (b) Soangen kokohp dah me pid peik me Seikop kohpada?
PEIKIONG Siohwa kin pak tohto wehwehki peikiong irail sapwellime kan me kin weliwelian ih. Irail pwukat iei tohnleng kan, tapwin keinek kan, sounkopwung kan, samworo kan, soukohp kan oh pil nanmwarki kan. Mwoalen nanmwarki en Israel kan pil kin adaneki mwoalen Siohwa. (1 Kronikel 29:23) Ahpw, kaun en Israel tohto kin sapeikiong Koht, eri met kin wahdohng irail oh arail sounpapah kan kahpwal kan. Ahpw, Siohwa sohte kin likidmeliehla irail me lelepek kan; e ketin kansenamwahuwih irail pwukat ki inou ehu me e pahn ketin kasapwilada Nanmwarki mehlel men me aramas pwung kan pahn perenki peikiong. (Aiseia 9:6, 7) Seikop me wia tapwin keinek ni ah pahn sipallahr kohpada met duwen kaun en ahnsou kohkohdo: “Sokon en Nanmwarki sohte pahn kohsang Suda oh nein sounruwes tuhkeo sohte pahn pil kohsang nanpwungen paten neh kan lao Shiloh pahn ketido oh iei ih me pahn sapwellimanki peik en aramas akan.”—Senesis 49:10.
2. Ia wehwehn “Shiloh,” oh dahme e pahn kaunda?
2 “Shiloh” iei mahsen en Ipru ehu me wehwehki “Ih Me Sapwellimanki.” Ei, Shiloh pahn sohsohki manaman koaros en kaunda me sansalkihda sokon en nanmwarkio oh manaman en ruwes me sansalkihda sapwellimen sounruwes tuhkeo. Oh kaunda wet kaidehn ohngete kadaudok en Seikop kan ahpw ong “aramas koaros.” Met pahn pwungiong inou en Siohwa ong Eipram: “Kadaudokomw kan pahn kalowehdi ar imwintihti kan. Oh ki kadaudokomwio, wehi koaros en sampah pahn paiekihda.” (Senesis 22:17, 18, NW) Siohwa kasalehda ihs “kadaudok” menet nan 29 C.E. ni ahnsou me Sises mehn Nasared keikihdi ngehn sarawi.—Luk 3:21-23, 34; Kalesia 3:16.
Sapwellimen Sises Keieun Wehi
3. Soangen kaunda dah me Sises alehdi ni ah ketidahla nanleng?
3 Ni en Sises ketidahla nanleng, e sohte tepida kaunda aramas en sampah kan ni ahnsowohte. (Melkahka 110:1) Ahpw, e alehdi wehi ehu iangahki sounpapah kei me pahn kin peikiong Ih. Wahnpoaron Pohl kasalehda wehi wet ni ah ntingidi: “E [Koht] ketin kapitkitailsang pahn manaman en rotorot, oh ketin kahreikitaildohng nan wehin Sapwellime Iehros kompoak.” (Kolose 1:13) Koasoandi en kapitala wet tepiada pweida oh wiawi nan Pendikos 33 C.E. ni ahnsou me ngehn sarawi mwerediong pohn irail ako me kin ni lelepek idawehn Sises.—Wiewia 2:1-4; 1 Piter 2:9.
4. Ni ahl dah kei me sapwellimen Sises tepin tohnpadahk ko kin kasalehda peik, oh iaduwen Sises kin kasalehda irail nin duwen pwihn ehu?
4 Nin duwen “meninkeder kei me weliwelian Krais,” irail tohnpadahk keidi ko kin ni peik kihpene irail teikan me pahn “iang kisehn tohn wehin” wehi en ngehno. (2 Korint 5:20; Episos 2:19; Wiewia 1:8) Pil patehng met, irail pwukat anahne “en miniminpene oh ahneki lamalam teieu oh kupwurteieu” pwe irail en kak paiekihda en nanmwarki Sises Krais ah pahn kupwurperenkin irail. (1 Korint 1:10) Nin duwen pwihn ehu irail wiahda pwihn en “ladu lelepek oh loalokong.”—Madiu 24:45; Luk 12:42.
Paiekihda Omw Peikiong Sapwellimen Koht “Ladu”
5. Sang mahsie, iaduwen Siohwa kin kasukuhlih sapwellime aramas akan?
5 Siohwa kin ahnsou koaros ketikihda sounpadahk kan ong sapwellime aramas akan. Karasepe ehu, mwurin mehn Suhs akan arail pwurodohsang Papilon, Esra oh ohl pilipilda kei sohte ihte wadekiong aramas ako kosonned en Koht, ahpr irail “kawehwehda ni oaritik” kosonnedo, ‘kihong wehwehn kosonnedo oh kasalehda Mahsen en Koht ni ahl me wehwe.—Nehmaia 8:8, NW.
6, 7. Iaduwen irail pwihn en ladu kan kin kihda mwengen ngehn kan ki Governing Body, oh dahme kahrehda e konehng en uhpah irail pwihn en ladu wet?
6 Nan senturi keieu, ahnsou me peidekpen sirkumsais pwarada nan pahr 49 C.E., irail pwihn en Governing Body en ahnsouwo kin kapakap oh peki kaweid ki ire wet oh mwuri diarada pasapengpen met sang nan Pwuhk Sarawi. Ahnsou me irail pakairkihda arail pilipil nan kisinlikou kan, irail tohnmwomwohdiso kan kapwaiada kaweid wet oh paiekihda kapai tohto sang Koht. (Wiewia 15:6-15, 22-29; 16:4, 5) Duwehte nan atail ahnsou, irail ladu lelepek kan, ki Governing Body pil kawehwehda padahk kesempwal kan duwehte en dehr poupali, nta wia mehkot sarawi oh me pid duwen doadoahngki wini en kasahliel kan oh tipaker. (Aiseia 2:4; Wiewia 21:25; 2 Korint 7:1) Siohwa kin kapaiada irail akan me kin peikiong sapwellime Mahsen oh sapwellime ladu lelepeko.
7 Ni sapwellimen Koht aramas akan arail kin peikiong irail pwihn en ladu wet, irail kin kasalehda me irail kin uhpah arail Kaun, Sises Krais. Soangen uhpah duwehte met kin keieu kesempwal nan ahnsouwet pwehki kalaudelahn en Sises kaunda me sansaldahr nan kokohp en Seikop ni eh kereniongehr mehla.
Shiloh Sapwellimaniki Pwung en Kaunda Sampah
8. Ia mwomwen oh iahd me sapwellimen Sises kaunda pahn kalaudla?
8 Nan kokohp en Seikop, e kohpada me Shiloh pahn kaunda “peik en aramas akan.” E sansal me Krais sohte pahn kaunda Israel en ngehn kelehpw. Ahpw dahme e pahn pil kaunda? Kaudiahl 11:15 sapeng: “Atail Kaun oh sapwellime Mesaia uhd sapwellimankiher manaman en kaunda sampah ahnsou wet, oh e pahn ketin kaunda erein dih koaros kohkohlahte.” Paipel kasalehda me Sises alehdi manaman wet ni imwilahn “ahnsou isuh” en kokohp—“ahnsou kileledi en wehi kan”—nan 1914.a (Daniel 4:16, 17; Luk 21:24) Nan pahro sapwellimen Krais “ketiketier nan mwoale nanleng” ni soh sansal duwen nanmwarki en wehio tepidahr, oh pil sapwellime ahnsou en “kaundahr eh imwintihti kan.”—Madiu 24:3; Melkahka 110:2.
9. Dahme Sises wia ni ahnsou me e alehdi Wehio, oh dahme met wiaiong irail aramas akan eri ni mehlel sapwellime tohnpadahk ko?
9 Tepin mwekid me Sises wia mwurin e alehdi manaman en wia nanmwarki iei kesehdihdo ih me keieu wadawadki sapeik—Sehdan—oh pil iangahki sapwellime ngehn saut akan “pohn sampah wet.” Sangehr ahnsowo kohdo, irail ngehn suwed pwukat kin kahrehda kahpwal ong aramas akan oh irail me kin kahrehiong wasa kitail mih ie de soahng kan me kapilkitailpene en kahrehda en apwal ohng kitail en peikiong Siohwa. (Kaudiahl 12:7-12; 2 Timoty 3:1-5) Ni mehlel, en Sehdan mahwen en ngehn kin keieu doake irail sapwellimen Siohwa keidi kan “me kin kapwaiada sapwellimen Koht kosonned akan oh kin kadehde duwen Sises”, iangahki iengarail “sihpw teikan.”—Kaudiahl 12:17; Sohn 10:16.
10. Pweidahn mehnia kokohp en Paipel me kasalehda ni mehlel lohdi en Sehdan nan sapwellime mahwin ohng Kristian mehlel akan?
10 Sehdan pahn lohdi ni ahnsou kohkohdo pwehki met iei “Rahn en Kauno,” oh sohte mehkot kak ‘kauhdi Sises sang e pahn kalowehdi eh imwintihti kan.’ (Kaudiahl 1:10; 6:2) E pahn pere oh apwalih lao nekla doadoahk en kileldi en irail 144,000 me kisehn Israel en ngehn. E pahn pil apwalih irail “pokon kalaimwuno, me sohte me kak wadekedi, me kohsang nan Wehi koaros, ni kadaudok koaros, sahpw koaros oh lokaia koaros.” (Kaudiahl 7:1-4, 9, 14-16) Weksang iengarail me keidi ko, irail pwukat pahn wiahla sounpapah peik kei en Sises me pahn mihmi sampah. (Daniel 7:13, 14) Arail mour pohn sampah rahnwet kin kihda kilel mehlel me Shiloh iei kaun en “wehi kan en sampah.”—Kaudiahl 11:15.
Met iei Ahnsou en “Kapwaiada Rongamwahuo”
11, 12. (a) Ihs irail kan te me pahn komourla ni imwilahn koasondi en ahnsouwet? (b) Soangen irair dah kan me irail me kin ale “ngehnin sampah wet pahn kasalehda?”
11 Koaros me men ale mour soutuk anahne en esehla peik pwehki Paipel kasalehda ni sansal me “irail akan me sehse Koht oh irail me sohte men peikiong rongamwahu en Kaun Sises” sohte pahn komourla ni Rahn en kadeik en Koht. (2 Deselonika 1:8) Ahpw pwehki suwed en mour en ahnsouwet oh ngehn en uhwong kosonned en Paipel oh padahk kan, met kin kahrehong en apwal ong kitail en kapwaiada rongamwahuo.
12 Paipel kin kawehwehda me ngehn en uhwong Koht wet iei “ngehn en sampah wet.” (1 Korint 2:12) Pwe en kawehwehda iaduwen ngehn wet kin kamwekid aramas akan, wahnpoaron Pohl ntingihdi mahsen pwukat ong Kristian akan en Episos: “Ni ahnsowo kumwail kin weweidki ahl suwed en sampah wet; kumwail kin peikiong kaun manaman en nan wehwe, iei ngehn me kin kamwakamwakid oh kakaun irail kan me kin uhwong Koht. Kitail koaros pil iang duwehte irail mahso nan atail mour, ni atail kin weweidki ineng en paliwaratail kan oh kin kapwaiadahte mehkot me paliwaratail de pein atail lamalam pahn nsenki. Kahrehda kitail pil uhdahn iang tohn sampah koaros mi pahn engieng en Koht.”—Episos 2:2, 3.
13. Iaduwen irail Kristian akan arail kak soikweisang irail ngenin sampah wet oh kapai dah pahn kohsang met?
13 Mehn Episos kan sohte wiahte lidu kan en ngehn en sapeik. Weksang met, irail wiahla sapwellimen Koht seri kei me kin uhpaiong sapwellime ngehn oh kin dolung wah kaselel kan. (Kalesia 5:22, 23) Duwehte rahnwet, sapwellimen Koht ngehn—kehl me keieu kehlail nanleng oh sampah—iei me kin sewese irail meh rar kei me kin uhd peikiong Siohwa, oh imwilahn met, irail pwukat “kak kolokolete arail koapworopwor lel imwi.”—Ipru 6:11; Sekaraia 4:6.
14. Iaduwen Sises kasalehiong irail Kristian akan me memour ni imwin rahn akan ni oaretik soahng kan me pahn song arail peik?
14 Tamataman me Shiloh oh Semeo kin utung kitail oh ira sohte pahn mweidong atail imwintihti kan—ngehn suwed kan de aramas akan—en kasonge atail peik oh dauliala uwen me kitail kakong. (1 Korint 10:13) Ni mehlel, pwehn sewese kitail nan mahwen en ngehn wet, Sises kawehwehda ni oaretik kahpwal ekei me kitail pahn lel ohng ni imwin rahn akan. E wia met ki mesen nting isuh me e kasalehiong wahnpoaron Sohn ni kasansalo. (Kaudiahl 1:10, 11) Pwe en wia mehn kamehlel, re audaudeki iren kaweid kesempwal kan ohng Kristian akan en ahnsowo, ahpw ni mehlel audepe kan kin dokedoke “rahnen Kauno me tepidahr nan pahr 1914. Ia uwen ah konehng kitail en kilang atail lamalam oh madamadau ong ire pwukat!b
Liksang Sempoak, Dipen Nenek, Noahrok Kepwe kan
15. Dahme kahrehda kitail anahne en kaleke kitail sang soangen kahpwal kan me wekidala mwomwohdiso en Episos oh iaduwen kitail kak wia met? (2 Piter 1:5-8)
15 Sapwellimen Sises keieun kisin likou kohlahng mwomwohdiso en Episos. Mwurin ah kapingahkin irail arail kin kanengamah oh dadaurete, Sises mahsanih: “Ahpw iei mehkot me I suwedkirehmw: omw limpoakohng ie tikitiklahr, e sohte duwehte omw limpoak en mahso.” (Kaudiahl 2:1-4) Rahnwet, ekei me mahs kin wia Kristian ngoang kei pil duwehlahrmet oh arail limpoak loal ohng Koht pil salongala. Met kak kaluwetala en emen nanpwungmwahu ong Koht oh ihme e anahne mwadang tehkada met. Iaduwen soangen limpoak wet ah kak pil ehu kehlailda? Sang ni ahmw pahn kaukaule onop Pwuhk Sarawi, iang towehda mihding kan, kapakap, oh doudouloale. (1 Sohn 5:3) Ei met anahne ken “kihong uwen omw kak koaros,” ahpw e uhdahn mie katepe. (2 Piter 1:5-8) Ma ke pein tehk ahmw mour ni mehlel oh diarada me ahmw limpoak tikitikla, eri mwadang kapwungala irairo oh peikiong sapwellimen Sises kaweid: “Tamanda duwen omw doohweisangieier! Eri, koluhla oh wiliakapwala, oh pwurehng nan omw mouren wiewia mwahu en mahso.”—Kaudiahl 2:5.
16. Soangen mehn keper en pali ngehn dah me pwarada nan mwomwohdiso en Perkamum oh Daiadaira oh dahme kahrehda sapwellimen Sises mahsen kan pil pwung ong rahnwet?
16 Kristian en Perkamum oh Daiadaira kin ale kaping ki arail loalopwoat, kanengamah, oh ngoang. (Kaudiahl 2:12, 13, 18, 19) Ahpw mwuri irail duwehla irail ako me kin kasalehda ngehn suwed en Palaam oh Sesepel, me kin wia dipen nenek oh kaudokiong Paal oh kasaminehla mouren irail Israel en mahso. (Nempe 31:16; 1 Nanmwarki 16:30, 31; Kaudial 2:14, 16, 20-23) A iaduwen nan atail ahnsou—“Rahn en Kauno”? Soangen wiewia suwed pwukat pil kin sansalda? Ei, dipen nenek me kin keieu kahrehong sapwellimen Siohwa aramas akan en piskenla. Ia uwen kesempwal en liksang werekiong irail kan koaros—nan mwomwohdiso oh likin mwomwohdiso—me kin wia tiahk samin kan oh kak kahreong kitail en duwehla irail! (1 Korint 5:9-11; 15:33) Irail akan me men wia sapwellimen Shiloh sounpapah peik kan anahne en liksang mehn kamweit me sohte mwahu kan oh pil kilel suwed kan nan Internet.—Amos 5:15; Madiu 5:28, 29.
17. Iaduwen madamadau oh lamalam en irail ako nan Sardis oh Laodisia eh kin kaparekiong lamalam en Sises duwen irair en pali ngehn?
17 Likin irail me malaulau nan mwomwohdiso en Sardis, mwomwohdiso pwon sohte ale kaping ehu douluhl. E mwomwen me e memour ah sempoak ahpw e sohte nsenohki mehkan me ngehnin me inenen laud me kahrehda ong Sises e “mehlahr.” E kin peikiong rongamwahu ni mwohmwte. Met iei mahsen en kadeik kehlail ehu! (Kaudiahl 3:1-3) Mwomwohdiso en Laodisia pil duwehte met. E kin kalahki eh kepwepwe oh kin nda, “I me kepwehpwe,” ahpw ong Krais e “paisuwed, semwehmwe, maskun oh kilisou.”—Kaudiahl 3:14-17.
18. Iaduwen emen e pahn kak kalekei ih sang en loula ni pali ngehn mwohn silangin Koht?
18 Rahnwet, ekei irail Kristian akan me mahs kin lelepek pil pwupwudihong nan soangen elen sapeik wet. Ele mwein irail mweidong ngehnin sampah wet en kaluwetala arail lamalam en karuaru oh uhd loula ni mehkan me ngenin me duwehte onop Paipel, kapakap, iang towehda mihding en Kristian akan, oh kalohk. (2 Piter 3:3, 4, 11, 12) Ia uwen kesempwal ong kitail en peikiong Krais oh en doadoahngki kepwehpwehn pali ngehn akan ong kamwahupen ahnsou kohkohdo—ei, “en pwain sang [Krais] kohl me mwakelekelkihdahr kisiniei”! (Kaudiahl 3:18) Soangen kepwehpwe tohrohr wet kin pidada ‘wia me mwahu, kepwehpwehki doadoahk mwahu oh sapan de perenki sewese meteikan.’ Sang ni atail pahn kihpene soang ngenin kesempwal pwukat, ‘kitail kaunopada pai kesempwal ehu ong pein kitail me pahn wia poahsoan kehlail ong ni ahnsou kohkohdo pwe en kak ale mour me uhdahn mour mehlel.’—1 Timoty 6:17-19.
Ale Kaping ki Arail Peik
19. Soangen kaping oh kangoang dah Sises ketikihong Kristian kan en Smirna oh Piladelpia?
19 Mwomwohdiso en Smirna oh Piladelpia kin wia mehn kalemeng mwahu oh tohrohr duwen peik, pwe ihme Sises sohte kadeik ira nan sapwellime kisinlikou ko ong ira. Ong irail mehn Smirna ko, e mahsanih: “I ese duwen omw kahpwal akan, I ese duwen omw semwehmwe ahpw soh pwehki me inenen kepwehpwe.” (Kaudiahl 2:9) Ia uwen met ah weksang irail ako nan Laodisia, me kin kalaki arail kepwehpwehn sampah ahpw ni mehlel irail semwehmwe! Ei, Tepilo sohte kin perenki kilang emen en kasalehda lelepek oh peik ong Krais. Ihme kahrehda Sises kalekehki: “Ke dehr masak dahme ke nektehn lokolongki. Kilang pwe Tepilo pahn kesehlong nan imweteng ekei kumwail, pwe ensong amwail pwoson; oh erein rahn eisek kumwail pahn lokolongki. Ke en loalopwoatohng ie mehnda ma ke mehla, I ahpw pahn kihong uhk nihnen mour soutuk.” (Kaudiahl 2:10) Duwehte met Sises pil kapinga irail mehn Piladelpia ko oh mahsanih: “Ke kapwaiadahr ei padahk oh ke me loalopwoatohng ie. I pahn pwarowei mwadang. Nekinekid mwahu dahme ke kolokol met pwe emen dehr adihasang uhk ketingpen omw powehdi.”—Kaudiahl 3:8, 11.
20. Iaduwen irail meh rar kei rahnwet kin kolokolete de kapwaiada sapwellimen Sises mahsen mendahki irair dah kan?
20 Ni “Rahn en Kauno,” me tepidahr nan 1914, irail pwihn lelepek kan oh iangahki iengarail sihpw teikan me met lelehr meh rar kei pil kin kapwaiada mahsen en Sises sang ni arail kin ngoangki wia doadoahk en kalohk oh kin kolokolete arail loalopwoat. Duwehte riarail brother kan nan keieun senturi, irail kin lelohng kalokolok kan pwehki arail kin peikiong Krais, ekei pil kin lekideklong nan imweteng oh wasahn kalokolok kan. Ekei kin kolokolete soangen mour me sohte kin raparapahki kepwe tohto mendahki wasa irail mih ie me diren kepwehpwe oh noarok. (Madiu 6:22, 23) Ei, nan wasa koaros oh nan irair koaros, Kristian mehlel akan, ki arail peik anahne en kaukaule wahdo peren ong mohngiong en Siohwa.—Lepin Padahk 27:11.
21. (a) Doadoahk de pwais en ngehn dahieu me irail pwihn en laduo anahne en doudoulahte kapwaiada? (b) Iaduwen kitail kak kasalehda me kitail uhdahn men peikiong Shiloh?
21 Ni atail kerenlahngehr kahn kamakam kowahlap, irail ladu lelepek oh loalokong kin tehngediong arail madamadau en dehr pangala ekis arail peikiong arail Kaun, Sises. Met kin pidada arail kin kaunopada mwengehn ngehn akan ong irail akan nan Tehnpas en Koht ni ahnsou me konehng. Ihme kahrehda kitail en kin kalahnganki sapwellimen Siohwa koasoandi en diokrasi wet oh soahng kan me e kin ketikihda. Ni ahl wet, kitail pahn kak kasalehda atail uhpah Shiloh me pahn ketingih irail sounpapah peik kan koaros ki mour soutuk.—Madiu 24:45-47; 25:40; Sohn 5:22-24.
[Nting tikitik me mi pahs]
a Pwe en kilang kawehwehn “ahnsou isuh,” kilang pwuhken Knowledge That Leads to Everlasting Life, irelaud 10, me Sounkadehdehn Siohwa kan wiahdahr.
b Pwehn diarada kawehwe ni oaretik me pid mesen nting isuho, kilang pwuhk en Revelation—Its Grand Climax At Hand!, me Sounkadehdehn Siohwa kan wiahda, tepikihda pali 33.
Ke Tamanda?
• Soangen pwais dah me Sises pahn wia nan kokohp en Seikop?
• Iaduwen atail pahn pohnese me Sises iei Shiloh, oh soangen ngehn dah me kitail anahne liksang?
• Soangen iren kaweid dah me konehng nan atail ahnsou me mih nan meseng nting isuh ong mwomwohdiso isuho nan Kaudiahl?
• Ni ahl dah kan me kitail kak alasang irail me iang mwomwohdiso en Smirna oh Piladelpia?
[Kilels nan Pali 26]
Siohwa kin kapaiada sapwellime aramas akan me kin uhpaiong “ladu” lelepeko
[Kilel nan Pali 27]
Kasongosong en Sehdan kin kahrehda en apwal en peikiong Koht
[Kilels nan Pali 29]
Ahneki nanpwungmwahu kehlail rehn Siohwa kin sewese kitail en peikiong Ih