Koapworopworki Siohwa

“Maing Kaun Siohwa, Wasa Lapalap, komwihte me ei koapworopwor; komwihte me I kin likih sang ni ei tikitik.”​—MELKAHKA 71:5, NW.

1. Kahpwal dahieu me Depit, emen pwutak me kin wia silepen sihpw, lelohng?

OHLO reirei sang piht duau. Ih kahrepe karis en mehn Israel kan kin masak peiong ih! Erein wihk tohto, ni menseng koaros oh ni soutik koaros, kodon en mehn Pilisdia, Kolaiad werlahng karis en mehn Israel kan, oh padahkiong irail en pilada emen kehlail pwe en pei ong ih. Mwuhr, irail pilada emen pwe en peiong Kolaiad, ahpw kaidehn emen sounpei, ahpw emen pwulopwul. Depit, emen pwutak me wiahla silipen sihpw me inenen tikitik sang Kolaiad. Mwein e marahra sang ahn Kolaiad ah tehtehn mahwen kan! Ahpw, pwutak pwulopwulo peiong kodon menet oh e wiahla mehn kahlemeng mwahu ong kitail pwehki ih emen me kin kasalehda eimah.​—1 Samuel 17:1-​51.

2, 3. (a) Dahme kahrehda Depit kak ni eimah peiong Kolaiad? (b) Kitail pahn sukuhliki duwen kahk riau dah kei me pahn sewese kitail en likih Siohwa?

² Dahme kahrehda Depit kak kasalehda eimah? Kitail pahn tehk ekei mahsen kan me Depit ntingihdi ni ahnsou me e mahlahr: “Maing Kaun, Wasa Lapalap, komwihte me ei koapworopwor, komwihte me I kin likih sang ni ei tikitik.” (Melkahka 71:5) Ei, ni ahnsou me Depit pwulopwul, e kin liki Siohwa ni unsek. Depit ndaiong Kolaiad: “Ke kohkodohng peikihong ie kedlahs, oh ketieu laud oh pil ketieu tikitik, a ngehi I pahn peikihong uhk mwaren Kauno [“Siohwa,” NW] Wasa Lapalap, Koht en karis en Israel kan, me ke peliandahr.” (1 Samuel 17:45) Kolaiad kin likih pein ah kehl oh dipwisoun mahwen kan, ahpw Depit kin likih Siohwa. Pwehki Kaunepen lahng oh sampah kin sewese ih, mie kahrepe Depit en masak emen aramas, edetehn e wiahla lapalahn aramas oh doadoahngki tehtehn mahwen kan?

³ Ni ahnsou me ke kin wadek duwen Depit, ke kin mehn tehno ahmw likih Siohwa en kak kehlailda? Mwein pali laud en kitail kin ahneki madamadau wet. Eri, kitail kak kasawiahda kahk riau me pahn kak sewese kitail en koapworopworki Siohwa. Keieu, kitail anahne powehdi mehn kerempwa ehu ong atail koapworopwor. Kariau, kitail anahne sukuhliki duwen ia wehwehn likih Siohwa.

Powehdi Mehn Kerempwapen Atail Koapworopworki Siohwa

4, 5. Dahme kahrehda aramas tohto kin apwaliki likih Koht?

⁴ Dahme kin kerempwa aramas akan en likih Koht? Pak tohto, aramas akan kin pwonopwonki kahrepen wiewia suwed kan kin wiawi. Aramas tohto kin sukuhliki me Koht kin pwukoahki atail kin lelohng kalokolok kan. Ni ahnsou me kahpwal kin wiawi, kaun en pelien lamalam kan kin nda me Koht kin “wahsang” aramas me lelong kahpwal oh mehlao en iang Ih mih nanleng. Oh pil, kaun en pelien lamalam tohto kin wia padahk me Koht kin ketin koasonehdi wiewia kan koaros​—iangahki kahpwal akan oh pil wiewia suwed akan​—me kin wiawi nin sampah wet. E pahn apwal en likih soangen Koht sempoak men. Sehdan, kin karotongala madamadau kan en aramas soh pwoson akan, oh e kin ngoangki utungada “padahk kan en ngehn saut akan” koaros.​—1 Timoty 4:1; 2 Korint 4:4.

⁵ Sehdan men kilang aramas akan en sohlahr likih Siohwa. Imwintihti en Koht menet sohte men kitail en wehwehki duwen kahrepen aramas akan kin lelong kalokolok kan. Oh ma kitail sukuhlikier sang Pwuhk Sarawi kahrepen atail kin lelohng kalokolok kan, Sehdan pahn perenkihda, kitail en manokehla kahrepe pwukat. Ihme kahrehda, e pahn mwahu ong kitail en kousapahlih ekei ahnsou duwen kahrepe silu tohnsampah wet kin lelong kahpwal akan. Atail kin wia met pahn kamehlelehiong kitail me Siohwa sohte kin pwukoahki kahpwal akan me kitail kin lelohng nan atail mour.​—Pilipai 1:9, 10.

6. Ia ehu kahrepe kitail kin lelohng kalokolok kan me ntingihdi nan pwuhken 1 Piter 5:8?

⁶ Ehu kahrepe aramas akan kin lelong kahpwal akan, iei pwe Sehdan men kauwehla pwoson en sapwellimen Siohwa aramas lelepek kan. E song en kawehla ahn Sohp lelelek ong Koht. Sehdan sohte pweida, ahpw e sohte uhdi en kawehla pwoson en aramas lelepek kan. Nin duwen kaun en sampah wet, e kin raparapahki en “kadallehla” sapwellimen Siohwa ladu lelepek kan. (1 Piter 5:8) Met kin pidada emen emen kitail koaros! Pwe Sehdan men kauhdi atail kin papah Siohwa. Ih kahrepe e kin kalapw doadoahngki kalokolok kan. Ahpw mehndahki kalokolok pwukat kin kamedek ong kitail, kitail kin ahneki kahrepe mwahu kan en dadaurete. Pwe, sang ni atail kin dadaurete pahn kalokolok kan, kitail kin kasalehda me Sehdan ih sounlikamw emen oh met kin kaperenda Siohwa. (Sohp 2:4; Lepin Padahk 27:11) Ni ahnsou me Siohwa pahn ketin kakehlailihala kitail pwe en dadaurete pahn kalokolok kan, atail kin likih Ih pahn pil kehlailla.​—Melkahka 9:9, 10.

7. Pwuhken Kalesia 6:7 kin sewese kitail en wehwehki duwen kahrepe dahieu kitail kin lelohng kalokolok kan?

⁷ Kahrepe keriau kitail kin lelong kalokolok kan kin dierekda nan mouren kaweid wet: “Pwe mehkot me aramas pahn padokedi, ihme e pahn dolung.” (Kalesia 6:7) Ekei ahnsou aramas akan kin mwomwen padokedi pilipil sapwung kan, oh met kin imwikihla arail dolung kahpwal akan. Mwein irail kin pein pilada ren sohte diraipih wararail sidohsa kan ni keneinei oh imwikihla aksident. Aramas tohto kin pein pilada en simwoak sika kan oh met kin imwikihla soumwahu en mohngiong de soumwahu en ngolungol. Irail akan me kin pilada en wia dipen nenek kin kak lelong nanpwungsuwed rehn tohnpeneinei kan, sohlahr waunla, soumwahu kan me kin kohsang dipen nenek, oh liseianda ahpw saikinte pwopwoud. Aramas akan mwein kin ikidiki Koht ahr kalokolok kan, ahpw ni mehlel, irail kin lelohng kahpwal akan pwehki sang pein ahr pilipil sapwung kan.​—Lepin Padahk 19:3.

8. Nin duwen pwuhken Eklesiasdes 9:11 mahsanih, dahme kahrehda aramas akan kin lelohng kalokolok kan?

⁸ Kahrepe kesiluh kitail kin lelong kalokolok kan kin mih nan pwuhken Eklesiasdes 9:11 me mahsanih: “I pil wehwehkidahr ehu soahng tohrohr: me nin sampah wet, me kaidehkin me marahrahn tang kan me kin kalap kana ni weirin tang; kaidehkin me kommwad akan me kin kalap powehdi nan mahwen; kaidehkin me loalokong kan me kin kalap diarada ar mehn komour; kaidehkin me neksang sukuhl kan me kin kalap kepwehpwehla; kaidehkin me koahiek kan me kin kalap lapalapala mwohn aramas; pwe paisuwed kin lelohng aramas koaruhsie.” Ekei ahnsou, aramas kin mih wasa sawpung ni ahnsou me pil sapwung, kahrehda re kin loi iong kahpwal. Mehndahki kitail kehlail de luwet, sohte lipilipil ahnsou dah, kitail pahn kak lelohng kalokolok kan oh pil mehla. Karasepe ieu, ni mwehin Sises, me wasahn iroir ehu nan Serusalem pwupwudiong pohn aramas ehk welimen oh kemeirailla. Sises kawehwehda me Koht sohte kaloke aramas pwukat pwehki dihp me irail wiahda mahs. (Luk 13:4) Soh, Siohwa sohte kin pwukoahki soangen kalokolok pwukat.

9. Dahme aramas tohto sohte kin wehwehki duwen kalokolok kan?

⁹ E kesempwal kitail en wehwehkihla kahrepen kitail kin lelohng kalokolok kan. Ahpw, mie mehkot me aramas tohto kin apwaliki en wehwehki. Iet duwen aramas kin apwaliki en wehwehki: Dahme kahrehda Siohwa Koht kin mweidong kitail en lelohng kalokolok?

Dahme Kahrehda Siohwa kin Mweidong Kalokolok en Wiawi

10, 11. (a) Nin duwen pwuhken Rom 8:19-​22 mahsanih, dahme wia ong “audepen lahng oh sampah”? (b) Iaduwen kitail pahn kak esehki ihs me kin kahrehong wiepen lahng oh sampah pwupwusangehr koasoandihpe?

¹⁰ Ekei iretikitik kan me mih sapwellimen Pohl kisinlikou ong mehn Rom akan kin kawehwehda duwen oaralap kesempwal wet. Pohl ntingihdi: “Kapikapik koaros kin kasikasik ahnsou me Koht pahn ketin kasalehda irail kan me sapwellime. Pwe kapikapikda kan pwupwusangehr koasoandihpahr, kaidehk sang ni pein nsenarail, ahpw pwehki kadeik en Koht. Ahpw mie koapworopwor wet: ehu rahn me kapikapik kan uhdahn pahn maiaudahsang mouren liduwih mehla, oh pahn iang sapwellimen Koht seri kan nan arail saledek lingan. Pwe kitail eseier me kapikapik kan koaros kin weiweirek, rasehng medek en neitik, lao lel ahnsou wet.”​—Rom 8:19-​22, NW.

¹¹ Pwen wehwehki mouren iretikitik pwukat, kitail anahne en wehwehki duwen pasapengpen peidek kesempwal kei. Karasepe ieu, ihs me ketikihda kadeikpen lahng oh sampah me pwupwsangehr nan koasoandi pahrail? Ekei aramas kin nda: Sehdan; oh ekei kin nda: Adam. Ahpw, ira koaros sohte kak wia met. Dahme kahrehda? Pwehki mehmen me kin kadeikada wiepen lahng oh sampah me pwupwusangehr nan koasoandi pahrail kin pil ketikihda “koapworopwor.” Ei, e kin kihda koapworopwor, me aramas lelepek kan “pahn maiaudahsang mouren liduwih mehla.” Adam de Sehdan sohte kak kihda soahngen koapworopwor wet. Siohwa kelepwte. E sansal ong kitail, me Ih me ketin kadeik lahng oh sampah me pwupwusangehr nan koasoandi pahrail.

12. Soangen pingkidahn madamadau dah ieu me aramas akan ahneki ong wehwehpen “kapikapikda kan koaros,” oh iaduwen kitail kak sapengla peidek wet?

¹² Ahpw, ia wehwehn “wiepen lahng oh sampah koaros” me iretikitik pwukat kin koasoia? Ekei aramas kin nda me “wiepen lahng oh sampah koaros” kin wehwehki weren sampah oh audepen sampah pwon, iangahki mahn akan oh tuhke kan. Ahpw, mahn akan oh tuhke kan kin ahneki koapworopwor en ale “sapwellimen Koht seri kan nan arail saledek lingan”? Soh. (2 Piter 2:12) Eri, “kapikapik kan koaros” wasaht kin wehwehki tohn sampah. Pwe met iei kapikapik kan me kin wiahda dihp oh mehla pwehki uhwong Koht me wiawi nan mwetuwel en Ihden, oh irail me anahne koapworopwor wet.​—Rom 5:12.

13. Dahme uhwong me wiawi nan Ihden wia ong aramas akan?

¹³ Dahme uhwong wet kin wiahiong aramas akan? Pohl kin kawehwehda duwen imwilahn uhwong wet ni lepin mahsen ehute: irair en sohte katepe.a Ehu kawehwehpen mahsen kan, kin kawehwehda lepin mahsen wet ni ahl wet, “irair en sohte katepen mehkot de mehmen me sohte kak wia dahme e kilelediong en wia.” Aramas akan wiawihda pwe en mour kohkohlahte, doadoahkpene nin duwen peneinei unsek oh miniminpene apwahpwalih sampah me pahn wiahla paradais ehu. Ahpw, irail kin mour mwotomwot oh lelong kahpwal kamedek kan oh ahneki mour kansensuwed. Sohp mahsanih, “aramas koaros ahneki soangen mourteieu me mwotomwot oh diren apwal.” (Sohp 14:1) Ni mehlel, aramas kin ahneki mour me sohte katepe!

14, 15. (a) Kaselepen kopwungpwung dahieu kitail kin kilang ni ahnsou me Siohwa kadeikada aramas? (b) Dahme kahrehda Pohl mahsanih me kapikapikda kan sohte lelohng kahpwal akan pwehki “sang ni pein nsenarail”?

¹⁴ Ni ahnsouwet, kitail kak wia peidek kesempwal wet: Dahme kahrehda “Sounkopwung en sampah pwon” pahn kadeikada aramas akan en lelong soahngen mour kamedek oh kansensuwed? (Senesis 18:25) E kin pwung ni E ketin wia met? Tamanda, dahme tepin atail pahpa oh nohno wia. Ni ara kin uhwong Koht, ira kin utungada Sehdan, me kin uhwong sapwellimen Siohwa kaunda. Ara wiewia kan kin kasalehda me ira kin utungada madamadau ieu me aramas akan pahn pweida mwahu ma Siohwa sohte pahn kaunda ira, oh ma pein aramas pahn mih pahn manaman en ngehn suwed emen me uhwong Siohwa. E konehng Siohwa en kadeikada aramas riemen me uhwongada Ih. E ketin mweidong aramas en pein kaunda irail pahn manaman en Sehdan. Pilipil me Koht ketin wiahda en mweidong aramas en lelong kahpwal akan ahpw kihong irail koapworopwor ehu, eri, met kaidehn elen kopwung loal ehu?

¹⁵ Ni mehlel, met kaidehn “sang ni pein nsenarail.” Kitail kin ipwikihdi wia lidun dihp, soumwahu oh mehla, ahpw met kaidehn atail pilipil. Pwehki Siohwa kin diren mahk kalahngan, e ketin mweidong Adam oh Ihp en momour erein ahnsou ehu oh wiahda seri kan. Edetehn kitail, kadaudokara kan, mih pahn kaundahn dihp oh mehla, kitail kak wia mehkot me Adam oh Ihp sohte wia. Kitail kak peikiong Siohwa oh sukuhliki me sapwellime kaunda me pwung oh unsek, oh kaundahn aramas kan kin imwikihla medek, nsensuwed, oh sohte katepen mour. (Seremaia 10:23; Kaudiahl 4:11) Sehdan kin kalaudehla kahpwal akan ong aramas akan. Poadoapoad en aramas akan kin kadehdehda ire mehlel pwukat.​—Eklesiasdes 8:9.

16. (a) Dahme kahrehda kitail kak kamehlele me Siohwa sohte kin pwukoahki kalokolok kan me kin wiawi nin sampah rahnwet? (b) Koapworopwor dahieu Siohwa kin ni elen limpoak ketikihong sapwellime aramas lelepek kan?

¹⁶ E sansal me Siohwa kin sapwellimaniki kahrepe pwung kan en kadeikada aramas akan oh lelong kahpwal akan. Ahpw, met kin wehwehki me Siohwa kin kahrehong emen emen kitail nan rahnwet en lelohng kalokolok kan? Eri, kitail kak karasaiong irair wet ong sounkopwung men me kin wia kadeik pwung ong aramas emen me kawehla kosonned en wehi. Aramas menet me kawehla kosonned en wehi mwein pahn kak lelohng kalokolok lao lel e pahn saledeksang kadeiko, ahpw e kak ni pwung ikidiki sounkopwung menet, me sounkopwung menet me kahrehong ah kin lelohng kalokolok? Uhdahn soh! Oh pil, Siohwa sohte kin wia utupen suwed akan. Seims 1:13 mahsanih: “Pwe sohte me suwed kot kak kasongosonge Koht, oh pein Koht sohte kin kasongosonge aramas.” Kitail en pil tamanda me Siohwa ketkihda kadeik wet, ahpw Koht pil kihong aramas “koapworopwor” ehu. Ni limpoak e ketin wiahda koasoandi kan ong kadaudok lelepek kan en Adam oh Ihp pwe irail pahn kak kilang imwin kalokolok oh irair en sohte katepe oh perenkihda kilang “sapwellimen Koht seri kan nan arail saledek lingan.” Ni ahnsou kohkohlahte, aramas lelepek kan sohte pahn pwunodki me audepen lahng oh sampah pwon pahn pwurehng mihla nan irair en sohte katepe. Pwe Sapwellimen Siohwa kopwungpwung pahn kasalehda me sapwellime kaunda me pwung kohkohlahte.​—Aiseia 25:8.

17. Iaduwen atail kin kousapahlih kahrepen kalokolok kan me kin wiawi nin sampah rahnwet pahn kak kamwekidada atail madamadau kan?

¹⁷ Ni atail kin tehk sapahlih ia kahrepen aramas ahr kin lelohng kalokolok kan, kitail kin diarada kahrepe kan me kak kihong kitail pwuhng en ikidiki Siohwa suwed pwukat oh kahrehong kitail en sohlahr likih Ih? Soh, pwe kousapahl wet pahn kihong kitail kahrepe kan en pwungki mahsen en Moses: “Kauno [“Siohwa,” NW] iei silepamwail me manaman, sapwellime wiewia kan me unsek oh pwung. Amwail Koht me loalopwoat oh mehlel, e kin ketin wiahda dahme pwung oh pahrek.” (Deuderonomi 32:4) Sang ni atail kin doudouloale duwen ire kesempwal pwukat, kitail kak ekei ahnsou pwurehng kousapahlih pwen kak wehwehkihla mwahu kahrepen kalokolok kan. Pwe ni ahnsou me kitail pahn lelong kalokolok kan, kitail pahn kak soikala ahn Sehdan kin nantiong en kahrehong kitail en ahneki madamadau en peikasal. Ahpw, ia kahk keriau? Ia wehwehn atail pahn likih Siohwa?

Ia Wehwehn Atail Pahn Likih Siohwa

18, 19. Mahsen dah kei me mih nan Pwuhk Sarawi me kin kangoange kitail en likih Siohwa, ahpw madamadau sapwung dah kei me ekei aramas kin ahneki me kin pid duwen likih Koht?

¹⁸ Sapwellimen Koht Mahsen kin kangoange kitail: “Likih Siohwa ni mohngiongomw unsek. Dehr koapworpworki mehkan me ke pein lemeleme me ke ese. Tamanda Siohwa ni omw wiewia kan koaros, oh e pahn ketin kasalehiong uhk ahl me pwung.” (Lepin Padahk 3:5, 6, NW) Mahsen pwukat me inenen kaselel oh kin kamehlelehiong aramas akan me kitail kak likih Koht. Ni mehlel, sohte mehmen nan audepen lahng oh sampah pwon me kitail kak likih laud sang Samatail limpoak me kin ketiket nanleng. Ahpw, e mengei ong kitail en wadek mahsen pwukat me mih nan pwuhken Lepin Padahk, ahpw e sohte mengei en kapwaiada.

¹⁹ Aramas tohto kin ahneki madamadau sapwung duwen ahr kin kawehwehda ia wehwehn likih Siohwa. Ekei aramas kin lemeleme me irair wet kin pid atail pepehm kan, irair en peren ieu me kin pein kohdahsang nan mohngiongitail kan. Aramas teikan kin kamehlele me arail kin likih Koht kin wehwehki me irail kak kasikasik me Koht pahn perehla kitail sang soangen kahpwal koaros, kapwungala atail kahpwal koaros ni ahl me kitail kin koapworopworki​—oh E pahn ketin mwadang kapwaiada met! Ahpw sohte poahsoanpen soahngen madamadau pwukat. Irair en likih emen kin wehwehki laudsang en mihte ni pepehm, oh e sohte kin poahsoanda pohn mehkot me sohte kahrepe. Ong aramas mah kan, irair en likih emen kin pidada doudouloale oh eri wiahda pilipil pwung kan.

20, 21. Ia wehwehn likih Siohwa? Kihda karasaras ehu.

²⁰ Menlau pwurehng tehk dahme Lepin Padahk 3:5 mahsanih. E kin kawehwehda duwen wekpeseng atail kin likih Siohwa oh likih pein atail loalokong, oh kitail sohte kak wiahda koaros. Ahpw, met kin wehwehki me kitail sohte kak doadoahngki atail loalokong kan? Kitail kak doadoahngki, pwe Siohwa me ketkihong kitail loalokong wet, oh ih me kin kasik kitail en doadoahngki loalokong wet ni atail kin papah Ih. (Rom 12:1) Ahpw, ni ahnsou me kitail kin wiahda atail pilipil kan, ihs me kitail kin likih? Ma pein atail madamadau kan sohte kin pahrekiong kupwuren Siohwa, kitail kin utungada sapwellime kupwur kan pwehki​—sapwellime erpit me ileile sang atail? (Aiseia 55:8, 9) Likih Siohwa kin wehwehki me kitail kin mweidong sapwellime erpit en kahre kitail.

²¹ Karasape ieu: Medemedewe ma seri tikitik men iang dake sidohsa pwoat oh mih nan sehr en mwurio, a ah pahpa oh nohno kin mwohd mwowe. Ah pahpao me diraip. Ma kahpwal ehu pahn pwarada ni ahnsou me irail kin tangatang kohwei​—⁠me duwehte mehnia ahl me pwung irail en tangatang ie, de ma iren nan wehwe me suwed de ahlo sakanakan⁠—dahme seri peik emen me kin likih ah pahpa oh nohno pahn wia? E pahn wer ong oh kaweid ah pahpa ong ia mwomwen e pahn diraipih sidohsa? E kin sapwungki pilipil kan me ah pahpa oh nohno kin wia, de e kin uhwong ira ni ahnsou me ira kin ndaiong en dehr kihsang ah seat belt? Soh, edetehn ah pahpa oh nohno soh unsek, e kin likih ah pahpa oh nohno. Siohwa iei Samatail me unsek. E soh konehng kitail en ni unsek likih Siohwa, keieu ni ahnsou me kitail kin lelohng kahpwal akan?​—Aiseia 30:21.

22, 23. (a) Dahme kahrehda kitail anahne likih Siohwa ni ahnsou me kitail kin lelong kahpwal akan, oh iaduwen kitail kak wia met? (b) Dahme kitail pahn sukuhliki nan artikel en mwurin met?

²² Ahpw, Lepin Padahk 3:6 mahsanih me kitail anahne ‘tamanda Siohwa ni atail wiewia kan koaros,’ kaidehn ihte ni ahnsou me kitail kin lelohng kahpwal akan. Pilipil kan me kitail kin wiahda ni ehu ehu rahn, anahne kasalehda me kitail kin likih Siohwa. Ni ahnsou me kitail kin lelong kahpwal akan, kitail sohte kin mworusala, masapwehkada, de soikala sapwellimen Siohwa kaweid kan me kin sewese kitail en powehdi atail kahpwal akan ni ahl me keieu mwahu. Kitail anahne kilang ong atail kasongosong kan nin duwen ahnsou kan me kitail kak kasalehda atail kin utungada sapwellimen Siohwa kaunda, oh pil kasalehda me Sehdan emen me likamw, oh kakehlailiala atail kin peikiong Siohwa iangahki irair teikan me kin kaperenda Ih.​—Ipru 5:7, 8.

²³ Kitail kak kasalehda atail kin likih Siohwa mendahki kahpwal akan kin mih mwotail. Kitail kak wia met sang atail kapakap kan oh ni atail kin peikiong sapwellimen Siohwa Mahsen oh sapwellime pwihn. Ahpw, rahnwet, iaduwen kitail kak kasalehda atail kin likih Siohwa ni ahnsou me kitail kin lelong kahpwal akan me kin pwarada nin sampah? Artikel en mwurin met pahn koasoia duwen oaralap wet.

[Nting tikitik me mi pah]

Iaduwen Ke Pahn Sapeng?

• Iaduwen Depit kasalehda me e kin likih Siohwa?

• Ia kahrepe silu me aramas akan rahnwet kin lelohng kalokolok kan, oh dahme kahrehda e mwahu kitail en pwurehng kousapahlih kahrepe pwukat ekei ahnsou?

• Kadeik dahieu me Siohwa mahsanihong aramas akan, oh dahme kahrehda kadeik wet me pwung?

• Ia wehwehn atail pahn likih Siohwa?

[Kilels nan Pali 22]

Depit kin likih Siohwa

[Kilel nan Pali 24]

Sises kawehwehda me ni ahnsou me wasahn iroir ehu nan Serusalem pwupwudi, Siohwa sohte kin pwukoahki dahme wiawi