Iaduwen Ke Kak Kakehlailihala Ahmw Pwopwoud

MEDEWEHLA ma ihmw ieu me milahr nan irair en sohla epwel. Litepw kan sansarasang, oahs akan pwoarpeseng, oh likin ihmw sohte mwet. E sansal me ihmwo ele ohkihla kisinieng kehlail ni erein pahr akan oh sohla me tehk ihmwo. Iaduwen​—⁠en kamweremwerdihsang? Ele e sohte anahnepe. Ma poahsoan ehu me teng oh kehlail, ihmwo kakete onohnsapahlada.

Iaduwen​—⁠irair en ihmwo kin katamandong uhk pein omw pwopwoud? Ni erein pahr akan me dower powe, engimah tohto, ni lokaiahn karasaras, ele kin wia kahpwalpen ahmw irair en pwopwoud. Ele pil mie irair en soukautihla kin mihla rehn emen de pil kumwa koaros me pid amwa pwopwoud. Mwein ahmw pepehm kin duwehte Sandy. Mwurin sounpahr 15 me e pwopwoudkihier, e koasoia: “Sohte mehkot me aht lamalam duwehpenehte loale ihte se pwopwoud. Oh met kelepw sohte itar.”

Mehnda ma amwa pwopwoud lelehr nan irair wet, ke dehr lingeringer oh nda me e pahn nekier pwopwoud. Ele ahmw pwopwoud pahn kak mwahula. Met pahn kohsang ni ia uwen utuhtpene me mie nanpwungen komwi oh ahmw werek. Dadaur pahn kin kolokol pwopwoud ni ahnsou en apwal. Ahpw, dahkot dadaur? Oh iaduwen Paipel ah pahn sewese uhk oh kakehlailihada irair wet?

Dadaur kin Pidada Laud Pepehm en Pwukoahki

Dadaur kin wehwehki ahneki irair en pwukoah. Ekei pak, lepin lokaiao kin kadoadoahk ong mehkot me kaidehn nanpwungen aramas, me duwehte inou nanpwungen pisnes kan.

Edetehn pwopwoud kaidehn duwehte inou nanpwungen pisnes kan me sohte ah pepehm, dadaur wasaht kin wia pwukoa ieu. Kowe oh ahmw werek inoukihda mwohn Koht oh aramas me kumwa pahn mihmihpene sohte lipilipil nan soangen irair dah. Sises mahsanih: “Kumwail sohte kin wadek mahsen wet nan Pwuhk Sarawi duwen Sounwiepen aramas eh ketin wiahda ohl oh lih nin tapio? Oh Koht mahsanih, ‘Iei kahrepen me ohl pahn mweikihsang seme oh ine oh patehng eh pwoud, oh ira riemen pahn wiahla warteieu.’” Sises pil kapataiong: “Eri, kaleke aramas de kamweidpeseng me Koht ketin kapatapenehr.” (Madiu 19:4-6) Ni kahpwal akan arail kin pwarada, kow oh ahmw werek uhdahn en kapwungala pwe en kapwaiada inou en dadaur me kumwa wiahdahro.a Emen lih pwopwoud koasoia: “Ahnsou me se uhdi sang medemedewe me mweipeseng me pahn kapwungala aht pwopwoud, mwurihte mehkan koaros mwahula.”

Dadaur nan pwopwoud kin laud sang medemedewehn pwukoah. Eri, dahme met kin pidada?

Sawaspene oh Utuhtpene

Dadaur nan pwopwoud sohte kin wehwehki me pwopwoud ieu sohte pahn mie uhpenehn madamadau. Ahnsou me wekpeseng en madamadau pahn pwarada, pahn mie ineng en kapwungala irairo. Me pid ohl oh lih pwopwoud, Sises mahsanih: “Ira solahr wia riemen, pwe warteieu.”

Ia wehwehn wiahla “warteieu” ong ahmw pwoud? Wahnpoaron Pohl ntingihdi me “ohl pwopwoud uhdahn pahn poakohng ar werek kan duwehte ar kin poakohng pein paliwararail kan.” (Episos 5:28, 29) Met pil kin pidada en nsenohki kamwahupen ahmw pwoud duwehte ahmw kin nsenohki pein kowe.

Ekei pwopwoud me sohte kin peren kin mihmihpene pwehki neira seri kan de pwehki mwohni. Mehlel me kitail kak kapingki me arail pwopwoud tengeteng lelodo ahnsou wet, ahpw tamataman me amwa mehn akadei keieu laud iei en ahnekipene irair en limpoak, kaidehn en ahnekihte irair en ehupene ahnsou reirei.

Wiewia kan en Soh Roporop

Nan irair en pwopwoud me kin pweida, ira koaros en kasalehda ngenen tohnmetei oh pil kasalehda wahu nanpwungara. Iaduwen ahmw pahn kak wia met? Ieremen ken medemedewe peidek wet: ‘Kamwahu dah me I pahn alehsang ehupene wet?’ ahpw ken uhd medemedewe met: ‘Dahme I wiewia pwehn kakehlailihala ahi pwopwoud?’ Kasawih pein ahmw wiewia kan nan erein wihk me nekiero. Pak depe ke kin wia mwekid kadek kan me pahn wia kamwahu ongete ahmw pwoudo? Ni ahnsou me ahmw pwoud men koasoi, ke kin rong ih​—⁠mehnda ma ke sohte pehm me ke men koasoakoasoi? Wiewia depe me ke kin nantihong wiahda me pahn mwahu ong ahmw pwoud laud sang a pahn mwahu ong uhk?

Wiewia kan me kasalehda me ke kin mendahkihla pein kowe pahn kin kakehlailihala ahmw pwopwoud pwehki re kin kasalehda me ke kin kesempwaliki ahmw pwopwoud oh men en dehr ohla.

Madamadau me Ahmw Pwopwoud en Wie Reirei Kohla

Siohwa Koht kin ketin kupwurki loalopwoat. Mehlel me Paipel mahsanih: “Komwi [Siohwa] kin ketin loalopwoat ong irail kan me kin loalopwoat ong komwi.” (2 Samuel 22:26) Kolokol loalopwoat iong Koht kin pidada atail loalopwoat iong koasoandi en pwopwoud me pein Ih me ketin wiahda.​—Senesis 2:24.

Ma kowe oh ahmw pwoud kin loalopwoat iong emen emen, kumwa pahn kin nsenamwahuki tengeteng en amwa ehupene. Ma ke medemedewehla sounpwong akan oh pahr akan me kohkohdo, ke kak kilang me kumwa pahn wie tengetengpene kohkohla.

Ni rahn me ke kapwopwoud, ke wiahda inou en wie dadaur erein ahmw pwoud ah wie momour. Irair en madamadau wet pahn wia mehkot kesempwal iong ahmw elen madamadau oh wiewia nin duwen ahmw wia aramas pwopwoud emen. Ke soh kamehlele me ke uhdahn pahn tengeteng ong ahmw pwoud kaidehn ihte pwehki ke kamehlele me irair sarawi ieu met ahpw pil pwehki ke poakohng aramas me ke pwoudikidahro?

[Nting tikitik me mi pah]

[Kaokon nan Pali 5]

Nan Pwopwoud, Dadaur Kin Pid . . .

● Pwukoah “Kapwaiada dahme ke inoukihda me ke pahn wia. E mwahu ken dehr wiahda inou sang ahmw pahn wiahda inou oh sohte kapwaiada.”​—Eklesiasdes 5:4, 5, NW.

● Sawaspene oh Utuhtpene “Aramas riemen mwahusang emente . . . Ma emen ira pahn pwupwudi, meteio kak sewesehda.”​—Eklesiasdes 4:9, 10.

● Mendahkihla Pein Kowe “Kihwei kaperen sang ale.”​—Wiewia 20:35.

● Madamadau me Ahmw Pwopwoud en Wie Reirei Kohla “Limpoak . . . kin kanengamah ni mehkoaros.”​—1 Korint 13:4, 7.