Koasoi Ngenin Kan Kin Wia Mehn Kangoang

“Dehr wia koasoi me pahn kamedekehla emen. Kumwail doadoahngkihte mahsen mwahu, soangen mahsen me kin sewese oh kakairada dahme anahnepe mie, oh kin kamwahuwihala me kin rong kumwail kan.”​—EPISOS 4:29.

1, 2. (a) Ia uwen kesempwal en ahn aramas lokaia? (b) Sapwellimen Siohwa ladu kan kin mwahuki wia arail lokaia kan ni ahl dah?

“AHN emen lokaia kan wia mehkot me rir ehu; kisakis sang rehn Koht, manaman ehu.” Ih met me emen ohl me kin wiahda diksineri Ludwig Koehler ntingihdi. Ele kitail sohte kin nohn nsenohki kisakis kesempwal wet. (Seims 1:17) Ahpw, medewehla ni en emen me kitail poakohng eh kin mwoatorala (pwehki stroke). Ekei pak, e kin kak luhsla mehkot me inenen kesempwal me iei kisakis en lokaia wehwe mwahu. Joan, me ah pwoud ahpwtehn mwoatorala kawehwehda: “Se kin koasoakoasoipene mwahu me kahrehong sen inenen kerenpene. Ia uwen ahi kin loaleidki aht koasoakoasoipene kan!”

² Koasoakoasoipene kin kak kahrehda nanpwung mwahu kan oh wiahda kompoakepah mwahu kan, kapwungala sawehwe kan, kangoange me nsensuwedlahr kan, kakehle pwoson oh kamwahuwihala mour kan​—⁠ahpw, imwila mwahu pwukat sohte kin pein wiawihte. Nanmwarki erpit Solomon kasalehda: “Lokaia mwahl kin kauwehla wasa rasehng kedlahs, ahpw lokaiahn loalokong kin kamwahuwihala wasa.” (Lepin Padahk 12:18) Nin duwen sapwellimen Siohwa ladu kan, kitail kin mwahuki wia lokaia kan me pahn kamwahula oh wia mehn kangoang ahpw kaidehn soangen lokaia me pahn kamedek oh kauwehla wasa. Kitail pil mwahuki wia lokaia kan me pahn kapinga Siohwa, sohte lipilipil ma kitail kalohk ong aramas akan de pil pein atail koasoakoasoi teikan. Sounmelkahka koulki: “Se pahn kin kapinga komwi ahnsou koaros oh patohwan kapingkalahngan ong mwaromwi kohkohlahte.”​—Melkahka 44:8, NW.

3, 4. (a) Soangen kahpwal dah kitail koaros kin lelohng me pid atail koasoi? (b) Dahme kahrehda atail koasoi kan kesempwal?

³ Tohnpadahk Seims mahsanih: “Sohte aramas emen kak irehdi lowe.” E pil katamankin kitail: “Kitail koaros kin kalap sapwungala ni ah lokaia. Me sohte kin sapwungala ni eh lokaia, iei ih me unsek, oh ih me kin kak kaunda paliwere unsek.” (Seims 3:2, 8) Sohte emen kitail me unsek. Mendahki kitail kin song uwen me kitail kak en lokaia mwahu, ahpw atail koasoi sohte kin ahnsou koaros kangoange meteikan de wia mehn kaping ong Sounkapikpatail. Eri, kitail anahne en esehla iaduwen atail pahn kin tehk mwahu dahme kitail kin nda. Sises mahsanih: “Eri, kumwail en ese pwe ni Rahnen Kadeiko, aramas koaros uhdahn pahn pwukoahki lokaia mwahl koaros me re wiahier. Pwe pein amwail koasoi kan me pahn kadeingkumwailda; re pahn kasalehda amwail mwakelekel de amwail dipan.” (Madiu 12:36, 37) Ei, Koht mehlelo kin kapwukoahkin kitail atail koasoi kan.

⁴ Ehu ahl me keieu mwahu en liksang koasoi keper kan iei en kekeirada en ahnla wia koasoi me pid soahng ngenin kan. Nan artikel wet, kitail pahn sukuhliki iaduwen kitail kak wia met oh soangen oaralap dah kan kitail kak koasoia oh soangen kapai dah kan kitail kak alehsang koasoi pwukat.

Tehk Mwahu Audepen Atail Mohngiong Karasaras

5. Iaduwen mohngiong kin inenen kesempwal pwe en kak wia koasoi en kangoang kan?

⁵ En kekeirada ahnepen koasoi kangoang kan, kitail anahne keieu pohnese me atail koasoi kan kin kasalehda dahme mih nan atail mohngiong. Sises mahsanih: “Ewen aramas kin kapwadewei audepen nan eh mohngiong.” (Madiu 12:34, NW) Ni lokaia mengei, kitail kin mwahuki koasoia soahng kan me katapan oh kesempwal ong kitail. Ihme kahrehda, kitail anahne pein idek rehtail: ‘Dahme ahi koasoi kin kasalehda duwen audepen ahi mohngiong? Ni ahnsou me I kin mih rehn ahi peneinei de iengei tohnkaudok kan, ahi koasoi kin pid mehkan me ngenin de e kin pidahte mwadong, likou, kasdo, mwenge, kepwe kapw kan de pil mehkan me sohte nohn mie katepe?’ Ele mwein kitail sohte kehn me ahnsou wet atail mour oh madamadau kan kin uhd uhlahngete soahng kan me sohte uhdahn kesempwal. Ni atail pahn wekidala atail pilipil kan me pid dahme keieu kesempwal nan atail mour, kitail pahn kak kamwahuwihala atail koasoi oh pil atail mour.​—Pilipai 1:10.

6. Iaduwen doudouloale ah kin doadoahk nan atail koasoi kan?

⁶ Doudouloale katapan kan iei pil ehu ahl me emen kak kamwahuwihala dahme e kin koasoia. Ma kitail pahn kin pehmitikiong oh song en medewe mehkan me ngenin, kitail pahn kin diarada me wia koasoi ngenin kan pahn mengei ong kitail. Nanmwarki Depit pil diarada met. E koulki: “Maing Kaun [“Siohwa,” NW], komwi me silepei oh sounkomourpei, komw ketin kupwurehla ei pato oh ei lamalam!” (Melkahka 19:14) Oh sounmelkahka Asap koulki: “I pahn medemedewe duwen mehkoaros me komw ketin wiadahr; I pahn medemedewe duwen sapwellimomwi wiewia manaman akan.” (Melkahka 77:12) Mohngiong oh madamadau me kin inenen kesempwaliki padahk mehlel kan en Mahsen en Koht pahn kin pein direkihla koasoi kan me konehng oh kapinga Siohwa. Seremaia sohte kak uhdi sang koasoia mehkan me Siohwa kin ketin padahkiong ih. (Seremaia 20:9) Kitail pil kak duwehte met ma kitail pahn kin ahnsou koaros medemedewe mehkan me ngenin.​—1 Timoty 4:15.

7, 8. Soangen iren koasoi dah kan me mwahu pwe en kak wia koasoi en kangoang kan?

⁷ Ahneki koasoandi mwahu kan ong pali ngehn kin kihong kitail soangen koasoi en kangoang tohto. (Pilipai 3:16) Kapokon kan, mihding en mwomwohdiso kan, pwuhk kapw kan, iren rahn akan kin kadirekinkitailla “takai kesempwal kan” ni pali ngehn pwe kitail en kak ehukihong meteikan. (Madiu 13:52) Oh pil, ia uwen atail ekspiriens kan nan kalohk kin kamwekid kitail ni pali ngehn!

⁸ Nanmwarki Solomon kin pwuriamweikihla uwen tohto en soangsoangen tuhke kan, mahn akan, menpihr kan oh mwahmw akan me e kin kilang nan Israel. (1 Nanmwarki 4:33) E kin perenki koasoia sapwellimen Koht kapikipik kan. Kitail pil kak wia met. Sapwellimen Siohwa ladu kan kin perenki koasoia soahng tohto ahpw irail me kin kesempwaliki arail pali ngehn kin keieu perenki koasoia mehkan me ngenin.​—1 Korint 2:13.

“Kaukaule Medemedewe Mehpwukat”

9. Dahme Pohl kaweidkihong mehn Pilipai kan?

⁹ Sohte lipilipil dahme kitail kin koasoia, ahpw atail koasoi kak kangoange meteikan ma kitail pahn idawehn dahme Pohl kaweidki mwomwohdiso en Pilipai. E ntingihdi: “Mehkan me mehlel, mehkan me katapan, mehkan me pwung, mehkan me mwakelekel, mehkan me mwahu, mehkan me koasoipe mwahu, mehkan me pid duwen tiahk mwakelekel oh mehkan me konehng ale kaping, kaukaule medemedewe mehpwukat.” (Pilipai 4:8, NW) Soahng kesempwal kan me Pohl kasalehda inenen kesempwal, ihme kahrehda e mahsanih en kin “kaukaule medemedewe mehpwukat.” Kitail anahne audaudkihda atail madamadau oh mohngiong mepwukat. Kitail en tehk iaduwen ehu ehu soahng waluh pwukat me Pohl kasalehda kak en sewese atail koasoi.

10. Iaduwen atail koasoi kan pahn kak pidada mehkan me mehlel?

¹⁰ Mehkan me mehlel kin pidada laudsang ihte ire kan me pwung ahpw kaidehn sapwung. E kin wehwehki mehkot me uhdahn mwahu oh likilik, duwehte padahk mehlel kan sang Mahsen en Koht. Ihme kahrehda, ni atail kin koasoiong meteikan duwen padahk mehlel en Paipel kan me kitail kin perenki oh pwuriamweikihla, de padahk kan me kin kangoange kitail, de iren kaweid kan me kin sewese kitail, kitail kin medemedewe mehkan me mehlel. Ni pali teio, kitail kin soikala “loalokong sapwung kan” me kin mwomwen mehlel. (1 Timoty 6:20) Kitail pil kin kalekeikitail sang iang uhse lipahned kan de iang koasoia mehkan​—⁠duwehte ekspiriens kan​—⁠me kitail sohte kak ese ma e uhdahn pwung oh mehlel.

11. Soahng me katapan dah kan me kak pil wia kisehn atail koasoi kan?

¹¹ Mehkan me katapan iei ire kan me kesempwal, kaidehn ire kan me mwahl oh sohte katepe. Ire pwukat iei me kin pid duwen atail doadoahk en Kristian kan, ahnsou apwal akan me kitail mih loale, oh anahnepen kitail en kolokolete tiahk mwahu. Ni atail kin koasoia soangen ire katapan kan duwehte mehpwukat, kitail kin kakehle atail pilipil kehlail en pepehd ni pali ngehn oh kolokolete atail lelepek en kaukaule kalohki duwen Rongamwahu. Ekspiriens kaselel kan nan atail doadoahk en kalohk oh pil mwekimwekid en sampah wet kin katamandohng kitail me kitail mihmiher ni imwin rahn akan oh met kin kihong kitail soangen iren koasoi tohto.​—Wiewia 14:27; 2 Timoty 3:1-5.

12. Me pid duwen ahn Pohl kaweid ohng soahng kan me pwung oh mwakelekel, dahme kitail anahne liksang?

¹² Lepin lokaia pwung kin wehwehki en pwung mwohn silangin Koht​—me wehwehki en wia dahme Koht kupwurki. Mwakelekel kin wehwehki en mwakelekel ni madamadau oh tiahk. Kauwe aramas, kamwan suwed de soangen koasoi me kin kasaire soahng kan me pid nenek: soangen koasoi pwukat sohte konehng kitail en koasoia. (Episos 5:3; Kolose 3:8) Nan wasahn doadoahk de sukuhl, irail Kristian akan kin, ni elen loalokong, kohkohla ni ahnsou me koasoi kan kin tepida pidada mehpwukat.

13. Kihda ekei karasepe koasoi kan me kin pid mehkan me mwahu oh koasoipe mwahu.

¹³ Ni en Pohl kin koasoia en kin medemedewe mehkan me mwahu, e kin wehwehki ire kan me kin pwung oh ire kan me kin kekeirada limpoak, a kaidehn mehkan me kin kahrehda kailongki aramas, lingeringer de mehn akamai. Mehkan me koasoipe mwahu iei soangen ire kan me adamwahu de ripoht mwahu kan. Soangen ripoht mwahu pwukat kin iangahki koasoipen irail riatail brother oh sister lelepek kan me kin kalap pwurada nan Watchtower (Kahn Iroir) oh Awake! makisihn kan. Kitail soh ehukihong meteikan soangen ire kan me kitail kin perenki oh pwuriamweiki mwurinte atail kin wadekala artikel kakehl pwukat? Ia uwen a wia mehn kangoang ni atail kin rong duwen en meteikan arail kin kekeirada ni pali ngehn! Soangen koasoi pwukat pahn kakairada atail limpoak oh ehupene nan mwomwohdiso.

14. (a) Dahme kitail anahne wia pwehn kasalehda tiahk mwakelekel? (b) Iaduwen atail pahn kak wia koasoi en kaping kan?

¹⁴ Pohl koasoia duwen “mehkan me pid duwen tiahk mwakelekel.” Tiahk mwakelekel kin wehwehki wiewia mwahu kan de tiahk mwahu. Kitail en kin kanahieng pwe atail lokaia kan en dehr weksang dahme pwung, mwakelekel oh waun, ahpw en kin pwung ong kaweid en Pwuhk Sarawi. Soahng kan me konehng kaping wehwehki “mehkan me kapingpe laud.” Ma ke rong padahk mwahu ehu de kilang emen me inenen lelepek nan mwomwohdiso, a ken koasoia met ong aramaso oh pil meteikan. Wahnpoaron Pohl kin kalap kapinga irair mwahu kan en ienge tohnkaudok kan. (Rom 16:12; Pilipai 2:19-​22; Pailimwon 4-7) Oh pil, mehkan me Sounkapikpatail kapikada pil warohng ale kaping. Sang mepwukat, kitail kak diarada soahng tohto me kitail kak koasoia.​—Lepin Padahk 6:6-8; 20:12; 26:2.

Iang Wia Koasoi Kangoang kan

15. Mehnia kehkehlik en Paipel kasalehda duwen en pahpa oh nohno pwukoa ong neirail seri kan?

¹⁵ Deuderonomi 6:6, 7 (NW) mahsanih: “Mahsen pwukat me I padahkiong kumwail rahnwet pahn mihmi nan mohngiongamwail; oh ke pahn padahkiong noumwail seri kan. Katamankin irail ahnsou me kumwail kin mihmi nan imwamwail oh pil ni ahnsou me kumwail kin mihmihseli ekis wasa tohrohr, ni ahnsou me kumwail kin kommoal oh pil ni ahnsou me kumwail kin wiewia amwail doadoahk.” E sansal me kaweid wet kin kasalehda me pahpa oh nohno kan anahne en wia koasoi katapan oh ngenin ong neirail seri kan.

16, 17. Dahme irail pahpa oh nohno Kristian kan kak sukuhliki sang mehn kahlemeng mwahu en Siohwa oh Eipraam?

¹⁶ Kitail kak medewehla duwen koasoakoasoipene reirei nanpwungen Sises oh Semeo nanleng ni ara kin koasoia duwen ahn Sises pwukoa nin sampah. Sises mahsanih ong sapwellime tohnpadahk kan: “Semei me ketin kadariehdo, pein ih me ketin mahsanih dahme I pahn koasoia oh kadehdehda.” (Sohn 12:49; Deuderonomi 18:18) Semen keinek Eipraam ele kin kihong ahnsou laud koasoakoasoiong sapwellime pwutak Aisek iaduwen Siohwa kapaiada irail oh samarail kahlap ako. Soangen koasoi pwukat uhdahn sewese Sises oh Aisek koaros en, ni karakarahk, kapwaiada kupwuren Koht.​—Senesis 22:7-9; Madiu 26:39.

¹⁷ Neitail seri kan anahne koasoi kangoang kan. Pahpa oh nohno kan anahne koasoanehdi arail ahnsou, mendahki arail kedirepw, pwehn kak koasoiong neirail seri kan. Ma kak, ke soh koasoanehdi tohn ahmw peneinei pwon en mwengepene mehnda ma pak ehu nan rahn ehu? Ni erein de mwurin mwenge pwukat, e pahn mie ahnsou mwahu en wia koasoi en kakehl kan me pahn mwahu ong kekeirada pali ngehn en ahmw peneinei.

18. Kasalehda ehu ekspiriens me kasalehda kapai kan me kin kohsang koasoakoasoipene mwahu kan nanpwungen pahpa/nohno kan oh neirail seri kan.

¹⁸ Alejandro, emen pioneer me sounpahr rieisek samwa, tamanda me e kin ahneki peikasal ni ahnsou me e sounpahr 14. E koasoia: “Pwehki songosong kan sang rehn tohnsukuhl kan oh sounpadahk kan, met kahrehiong ahi kin peikasalki me Koht uhdahn mie oh ma padahk kan en Paipel mehlel. Ahi pahpa oh nohno kin, ni kanengamah, kesehla awa tohto songosong en kaweid pwungih ahi lamalam. Ara koasoi kan kin sewese ie kaidehn ihte en powehdi ahi peikasal erein ahnsou apwalo ahpw e pil sewese ie en kak wiahda pilipil mwahu kan nan ahi mour.” A iaduwen ahnsou wet? Alejandro pousehla oh koasoia: “I kin mihmihte rehn ahi pahpa oh nohno. Ahpw, pwehki aht kin kedirepw, met kahrehong e kin apwal ong ngehi oh ahi pahpa en kin koasoakoasoi kelepw. Ihme kiht me riemen kin mwengepene pak ehu nan wihk ehu ni ah wasahn doadoahk. I kin inenen kesempwaliki aht koasoi kan.”

19. Dahme kahrehda kitail koaros anahne koasoi ngenin kan?

¹⁹ Kitail soh pil kin kesempwaliki atail ahnsou mwahu en koasoi soangen koasoi ngenin kan rehn riatail me pwoson kan? Kitail kak diar ahnsou mwahu pwukat nan mihding kan, oh ahnsoun kalohk, oh ahnsoun pokonpene mwemweit kan, oh pil ahnsoun seiloak. Pohl kin kasikasik ahnsou kan me e kin koasoiong irail Kristian akan nan Rom. E nting ong irail oh mahsanih: “Pwe I kin anahne mehlel I en pwarowohng rehmwail, pwe I en kak kihong kumwail kapai ehu ong pali ngehn mehn kakehlakai kumwail. Eri, met wehwehki me kitail pahn sawaspene, amwail pwoson en sewese ie, oh ei pwoson en sewesei kumwail.” (Rom 1:11, 12) Emen elder me adaneki Johannes koasoia: “Koasoia mehkan me pid pali ngehn ong riomw Kristian akan kin kaitarehla wasa me anahn kesempwal. E kin kansenamwahuwih mohngiong oh kamarahra ahmw wisik kan en ehuehu rahn. I kin kalap peki rehn irail me mah kan en kin koasoiaiong ie duwen arail mour oh iaduwen irail kak kolokolete arail lelepek. Erein sounpahr kei, I kin koasoiong me tohto oh emenemen kin kihdo erpit oh kamarain me kin kapaiada ahi mour.”

20. Dahme kitail kak wia ma kitail tuhwong emen me kin namenek?

²⁰ Iaduwen ma emen sohte mwomwen perenki ni ahmw pahn kin wia koasoi ngenin kan? Ke dehr uhdi sang met. Ele ke pahn kak diarada ehu ahnsou mwahu mwuhr. Solomon ntingihdi: “Koasoia mehkot me konehng ahnsowo kin rasehng kilel me wiawihkihda kohl oh kapwatkihda silper.” (Lepin Padahk 25:11) Kasalehda irair en wehwehki ong irail me namenek kan. “Madamadau en aramas kin rasehng pihl me mi nan pwarer loal, ahpw mehmen me ahneki erpit kak idipasang.”a (Lepin Padahk 20:5) Me keieu kesempwal iei en dehr mweidohng dahme meteikan kin wia de nda en kolediuk sang koasoia mehkan me kin sair ahmw mohngiong.

Koasoi Ngenin kan Kin Wia Kapai

21, 22. Soangen kapai dah kan kitail kak alehdihsang atail pahn kin iang wia koasoi ngenin kan?

²¹ Wahnpoaron Pohl kaweidki: “Dehr wia koasoi me pahn kamedekahla emen. Kumwail doadoahngkihte mahsen mwahu, soangen mahsen me kin sewese oh kakairada dahme anahnepe mie, oh kin kamwahuwihala me kin rong kumwail kan.” (Episos 4:29; Rom 10:10) Mehlel, e kin anahne emen en kin wia uwen a kak en kahrehiong koasoi kan en kolahng ni ahl pwung ahpw kapai kan me tohto. Koasoi ngenin kan kin kahrehiong kitail en kak ehukihong meteikan atail pwoson oh kekeirada atail pirien en Kristian.

²² Eri, kitail en doadoahngki atail kisakis en koasoi pwe en kangoange meteikan oh kapinga Koht. Soangen koasoi pwukat kin kahrehiong kitail en ahneki pepehm en peren oh nsenamwahu oh re pahn kak kangoange meteikan. Ahpw, dahme keieu kesempwal, koasoi pwukat pahn wahdo peren ong mohngiong en Siohwa pwehki E kin karonge atail koasoi kan oh E kin kupwurperenki ni atail kin lokaia pwung. (Melkahka 139:4; Lepin Padahk 27:11) Ni atail kin wia koasoi ngenin kan, kitail kak kamehlele me Siohwa pahn tamataman kitail. Me pid irail akan me kin papah Siohwa rahnwet, Paipel mahsanih: “Aramas akan me kin lemmwiki Siohwa ahpw koasoakoasoipene nanpwungarail, oh Siohwa ketin karonge oh kupwure duwen me re koasoia. Mwohn silangi, e ntingdier nan pwuhk ehu duwen irail kan me lemmwiki oh wauneki Siohwa oh irail me kin medemedewe duwen mware.” (Malakai 3:16, NW; 4:5) Ia uwen kesempwal atail koasoi kan e kin wia mehn kangoang ni pali ngehn!

[Nting tikitik me mi pah]

Iaduwen Ke Pahn Sapeng?

• Dahme atail koasoi kan kin kasalehda duwen kitail?

• Soangen mehn kangoang dah kitail kak koasoia?

• Iaduwen koasoakoasoipene nan peneinei oh mwomwohdiso en Kristian kan kin wia mehkot kesempwal?

• Soangen kapai dah kei kitail kin alehdihsang koasoakoasoipene koasoi en kangoang kan?

[Kilel nan Pali 8]

Koasoi en kangoang kan kin pidada . . .

[Kilel nan Pali 8]

“mehkan me mehlel”

[Kilel nan Pali 8]

“mehkan me katapan”

[Kilel nan Pali 8]

“mehkan me konehng ale kaping”

[Kilel nan Pali 8]

“mehkan me koasoipe mwahu”

[Kilel Credit nan Pali 8]

Video cover, Stalin: U.S. Army photo; Creator book cover, Eagle Nebula: J. Hester and P. Scowen (AZ State Univ.), NASA

[Kilel nan Pali 9]

Ahnsoun mwenge kan kin wia ahnsou mwahu en koasoia mehkan me pid pali ngehn