Dahme Kahrehda Kitail En Poadidiong Kapakap?

“Poadidiong kapakap ahnsou koaros. Kumwail kasapahlkalahngan ong Koht ni mehkoaros.”​—1 DESELONIKA 5:17, 18.

1, 2. Iaduwen Daniel ah kasalehda me e kesempwaliki kapai en wia kapakap, oh imwila dah me e ahneki ong ah ehuiong Koht?

SOUKOHP Daniel kin wiahki ah tiahk en kin kapakap ong Koht pak siluh nan ehu rahn. E kin kelepwikihdi mpen ah wenihmwtok pohn pwelengen imweo, wasa me sallahng Serusalem, oh e kin wia ah sakarada ni kapakap. (1 Nanmwarki 8:46-​49; Daniel 6:10) Pil ni ahnsou me kosonned en sahpwo keinepwih aramas en kapakap ohng emen tohrohr likin nanmwarki en Media, Darius, Daniel sohte kin pweiek ahnsou kis sang ah kin wia kapakap. E sohte lipilipil ma irairo keper ong mour en Daniel de soh, ohlen kapakap menet kin ngidingid oh kaukaule kapakap.

² Ia sapwellimen kupwur ong Daniel? Ni ahnsou me tohnleng Kapriel wahdo pasapengpen ehu en Daniel kapakap akan, e mahsanih me soukohpo “wia aramas emen me Siohwa kin poakpoake.” (Daniel 9:20-​23; The New English Bible) Nan kokohp en Esekiel, Siohwa ketin kawehwehda me Daniel ohl pwung men. (Esekiel 14:14, 20) Ni erein eh mour, e sansal me ahn Daniel kapakap akan kin kahrehiong ih en karanih Koht, mehkot me pil Darius mwahngih.​—Daniel 6:16.

3. Nin duwen ah sansal sang ni ekspiriens en misineri men, iaduwen kapakap a kak sewese kitail en kolokol lelepek?

³ Kapakap ahnsou koaros pil kak sewese kitail ni atail kin lelohng kahpwal akan. Karasepe, kitail kak tamanda irair en Harold King, misineri men nan China me lekidek ong nan imweteng ki erein sounpahr limau (solidary confinement). Me pid ah ekspiriens, Brother King koasoia: “Mendahki I solahr kak patehng aramas teikan, ahpw sohte me kak katohre ie sang Koht. . . . Kahrehda, mehnda ma aramas sohte lipilipil kin daulih ahi perehn kalapwuhs oh kilang ie, I kin kelepwikihdi nan ahi perehn selidio pak siluh nan ehu rahn oh kapakap ngihl laud, oh I kin tamataman Daniel oh dahme Paipel kin koasoia duwen ih. . . . E kin mwomwen me ni soangen ahnsou duwe met akan sapwellimen Koht ngehn sarawi kin kahluwa ahi madamadau ong mehkan me inenen kesempwal oh kin kihong ie pepehm en meleilei. Ia uwen kapakap a kin wia mehn ketihnain en pali ngehn oh kansenamwahu ong loaleiet!”

4. Peidek dah kei me pid kapakap me kitail pahn tehkpene nan artikel wet?

⁴ Paipel mahsanih: “Poadidiong kapakap ahnsou koaros. Kumwail kasapahlkalahngan ong Koht ni mehkoaros.” (1 Thessalonians 5:17, 18) Ni atail pahn kin tamataman kaweid wet, kitail en medemedewe peidek pwukat: Dahme kahrehda kitail en tehk kanahieng duwen atail kapakap akan? Kahrepe dah kan me kahrehda kitail en kaukaule kapakap ong Siohwa? Oh dahme kitail en wia ma kitail pehm me kitail sohte warohng kapakakiong Koht pwehki atail soh-itar akan?

Sang Ni Kapakap Wiahda Elen Kompoakepahnki Siohwa

5. Soangen kompoakepah tohrohr dah me kapakap kin seweseiong kitail?

⁵ Ke men Siohwa en wiahkin uhk kompoakepah? E mahsanih me pahpahn keinek Eipraam wia kompoakepah. (Aiseia 41:8; Seims 2:23) Siohwa kupwurki kitail en kakairada soangen ehupene wet ong Ih. Ni mehlel, E kin ketin luhke kitail en karanih Ih. (Seims 4:⁠8) Luhk wet soh pahn wiahiong kitail en medemedewe duwen kisakis tohrohr en wia kapakap? E inenen apwal kitail en wiahda “appointment” pwe kitail en tuhwong aramas lapalap akan nan koperment, oh pil wiahla kompoakparail pil ahpw apwalsang! Ahpw, Siohwa, me kapikada lahng oh sampah, kin kangoangekin kitail en kohdohng reh ni saledek en kapakap, ni ahnsou kan koaros me kitail kin mwahuki de anahne. (Melkahka 37:5) Atail poaden kapakap akan pahn sewese kitail en kompoakepahnkihla Siohwa.

6. Dahme mehn kahlemeng mwahu en Sises kin padahkiong kitail me pid duwen anahn en “poadidiong kapakap”?

⁶ Ia uwen mengei kitail en kin manokehla wia kapakap! Sangete ni kapwunod en ehuehu rahn kak kangasang kitail ahnsou laud en atail madamadau me kin kahrehong kitail en sohte kin nantihong kapakap ong Koht. Sises kangoange sapwellime wahnpoaron kan en “kaukaule kapakap,” oh pein ih kin wia met. (Madiu 26:41) Mendahki pak tohto Sises kin kedirepw sang ni menseng lel ni pwong, e kin koasoanehdi ah ahnsou pwehn kapakap ong Seme nanleng. Ekei pak, Sises kin pirida “ni sohrahn, nin rotorot,” pwe en kapakap. (Mark 1:35, NW) Ni ahnsou teikan, e kin kelepwla wasakis me sohte katairong​—⁠ni imwin rahno​—⁠pwe en kapakap ong Siohwa. (Madiu 14:23) Sises kin ahnsou koaros wiahda ahnsou ong wia kapakap, oh kitail pil kak iang wia met.​—1 Piter 2:21.

7. Soangen irair dah kan kak wiawi ehu ehu rahn me kitail kak kapakap ong Samatail nanleng?

⁷ Ahnsou mwahu tohto kitail kak diar kitail en kin kapakap ni ehu ehu rahn, ni ahnsou me kitail kin lel apwal akan, ni ahnsou me kitail kin lelohng kasongosong kan, oh ahnsou en wiahda pilipil akan. (Episos 6:18) Ni atail kin rapahki kaweid en Koht ni soangsoangen irair koaros en mour wet, atail wia irair en kompoakepahki Ih pahn laudla. Ma aramas riemen me kompani kin sawaspene ni ahnsou me ira lelohng kahpwal, met soh kin kakehlailihala ara irair en kompoakepahki emen emen? (Lepin Padahk 17:17) Met pil duwehte ni ahnsou me kitail kin utuht rehn Siohwa oh ale sapwellime sawas.​—2 Kronikel 14:11.

8. Sang ni karasepe en Nehmaia, Sises oh Ana, dahme kitail kak sukuhliki duwen uwen reirei en atail wia kapakap?

⁸ Ia uwen kansenamwahu pwehki Siohwa sohte kin irehdi ia uwen reirei de pak depe kitail kak kapakap ong Ih! Nehmaia wia kapakap mwadang oh mwotomwot nan kapehde mwohnte a wia a sakarada mwohn nanmwarki en Persia. (Nehmaia 2:4, 5) Sises pil wia kapakap mwotomwot ni ah peki Koht en ketikihong ih kehl en kaiasada Lasarus. (Sohn 11:41, 42) Weksang kapakap mwotomwot pwukat, Ana “kapakap werei mwohn Siohwa” ni ahnsou me e wehkada audepen mohngiongi ong Siohwa. (1 Samuel 1:12, 15, 16) Atail kapakap akan kak mwotomwot de pil kak reirei nin duwen anahnepe de irair en ahnsou kan.

9. Dahme kahrehda atail kapakap akan en iangahki kaping oh kalahnganki mehkan koaros me Siohwa ketin wiahiong kitail?

⁹ Kapakap akan tohto nan Paipel kin kasalehda pepehm en mohngiong pwehki irail kalahnganki sapwellimen Siohwa irair en lapalap oh sapwellime doadoahk kaselel akan. (Eksodus 15:1-​19; 1 Kronikel 16:7-​36; Melkahka 145) Sang nan kaudiahl ehu, wahnpoaron Sohn kilangada ohl mah 24​—iei nempe unsek me weliwelian irail Kristian keidi kan koaros nan deuerail nanleng​—oh irail kin kapikapinga Siohwa, ndinda: “Maing Siohwa, komwi me uhdahn warohng sapwellimaniki lingan, wahu oh roson. Pwe komwi me ketin wiadahr mehkoaros, oh pwehki kupwuromwien, me mehkoaros mihmiehki oh momourki.” (Kaudiahl 4:10, 11, NW) Pil kitail ahneki kahrepen atail en kapinga Sounkapikpatail kaukaule. Ia uwen peren me pahpa oh nohno kin ahneki ni ahnsou me neira seri men kin kasalehda ah kalahngan ong ira sang nan mohngiong pwehki mehkot me re wiahiong ih! Sang atail kin wia kasalehda atail kalahnganki sapwellimen Siohwa kadek oh limpoak oh ni atail kin kasalehda audepen kaping me mih nan mohngiongatail, met kin wia ahl ehu en kamwahuwihala audepen atail kapakap.

“Poadidiong Kapakap”​—Pwekihda?

10. Dahme kapakap kin wia pwehki kakehle atail pwoson?

¹⁰ Kaukaule wia kapakap iei mehkot anahn ong atail pwoson. Mwurin Sises a wia karasaras en anahnpen “poaden kapakap oh dehr tokedihsang,” e mahsanih: “Kumwail lemeleme me Nein-Aramas pahn ketin diar pwoson nin sampah ni eh pahn ketido?” (Luk 18:1-8) Kapakap me kin uhdahn kohsang nan mohngiong kin kalaudehla pwoson. Ni ahnsou me pahpahn keinek Eipraam likeilapalahr oh awiawih ah pahn naineki seri, e kapakap ong Koht duwen ire wet. Siohwa sapeng mah ni ah padahkiong ih en kilangdahla nanleng oh wadek usu kan, ma e kak. Mwurin mwo, Koht kamehlelehiong Eipraam mahsanih: “Pwe iei pahn duwen ngeder en kadaudokomw kan.” Ia imwila? Eipraam “pwosonla Siohwa; oh Ih eri wiahkihla Eipraam aramas pwung.” (Senesis 15:5, 6) Ma kitail pahn langahiong Siohwa mohngiongatail akan ni atail kin kapakap, oh kamehlele sapwellime mahsen sang nan Paipel, oh peikiong Ih, E pahn ketin kakehle atail pwoson.

11. Iaduwen kapakap ah kak sewese kitail en kamwahuwihala atail kahpwal akan?

¹¹ Kapakap pil kak sewese kitail en kakehle kitail ni ahnsou me kahpwal akan kin pwarada. Iaduwen​—⁠rahn koaros ke kin lelohng katoutou kan oh kahpwal akan me kin apwal en powehdi? Paipel mahsanih ong kitail: “Mweidohng Kauno [“Siohwa,” NW] omw kahpwal akan, eri e pahn ketin doareiukala; pwe e sohte kin ketin mweidohng me lelepek kan en lohdi.” (Melkahka 55:22) Ni atail pahn kin lelohng irair me kitail pahn kin wiahda pilipil kesempwal akan, kitail kak kahlemengih dahme Sises wia. E wia ah kasakas pwong ehu pwon mwohn ah tepiada pilada sapwellime wahnpoaron 12 ko. (Luk 6:12-​16) Oh ni pwong mwohn e matalao, Sises kasakas ni ngidingid oh “pwudowe lao kerediong nanpwel likamwete dingiding en ntahn aramas.” (Luk 22:44) Ia imwila? “Pwehki eh kin lahn Koht, Koht ketin karonge sapwellime pekipeko.” (Ipru 5:7) Atail ngidingid oh kaukaule kapakap pahn sewese kitail en kak powehdi atail irair kapwunod akan oh kalokolok apwal akan.

12. Iaduwen kapakap ah kin kasalehda me Siohwa kin ketin nsenohkin kitail?

¹² Ehu kahrepen atail en karanih Siohwa ki kapakap iei pwehki E kin pil karanih kitail. (Seims 4:8) Ni atail kin langahiong Siohwa mohngiongatail ni kapakap, kitail soh kin pehmada me E kin karonge atail anahn akan oh ni limpoak apwalih kitail? Kitail kin kehn sapwellimen Koht limpoak ni ahl tohrohr akan. Siohwa sohte pilada emen tohrohr en pwukoahki rong ehuehu kapakap me sapwellime ladu kan kin wia ong Samatail nanleng. (Melkahka 66:19, 20; Luk 11:2) E kin ketin luhke kitail en ‘kihong Ih katoutoupatail koaros pwe E kin ketin nsenohkin kitail.’​—1 Piter 5:6, 7, NW.

13, 14. Ia kahrepe kan me kin kahrehiong kitail en kaukaule wia kapakap?

¹³ Kapakap kak kihong nan loaletail ngoang laud en iang kalohk oh kakehle kitail ni ahnsou me uhwong pahn kapahtoula kapehdetail likamwete kitail men uhdi sang atail papah Siohwa. (Wiewia 4:23-​31) Kapakap pil kak pere kitail sang “widing en Tepil.” (Episos 6:11, 17, 18) Ni atail kin nantihong powehdi kasongosong kan me lelohng kitail ehuehu rahn, kitail kak ahnsou koaros peki rehn Siohwa en pere kitail. Kapakap en Sises pil kin nda kitail en peki rehn Siohwa en “pere kitail sang ih Me Suwedo,” Sehdan me Tepil.​—Madiu 6:13.

¹⁴ Ma kitail kin kaukaule kapakap peki sawas pwe kitail en kak powehdi atail luwet akan, kitail pahn kehn me Siohwa kin sewesewese kitail. Pwuhk Sarawi kin kamehlelehiong kitail me: “Koht me uhdahn mehlel, oh e sohte pahn ketin mweidohng kumwail en ale songosong me kumwail sohte kak powehdi; ahpw ahnsoun songosong, e pahn ketikihong kumwail kehlail pwe kumwail en kak dadaur oh pitsang nan songosongo.” (1 Korint 10:13) Pein wahnpoaron Pohl kin kehn sapwellimen Siohwa epwel en kakehl ni soangen irair laud tohto. Pohl mahsanih: “I kakong mehkoaros sang ni manamano me Koht kin ketikihong ie.”​—Pilipai 4:13; 2 Korint 11:23-​29.

Poadidiong Kapakap Mendahki Luwet akan

15. Dahme pahn kak wiawi ni ahnsou me atail wiewia kan sohte kin lel sapwellimen Koht koasoandi me pid duwen wiewia mwahu?

¹⁵ Pwe atail kapakap akan Siohwa en karonge, kitail en dehr mwamwahleki kaweid sang ni Mahsen en Koht. Wahnpoaron Sohn ntingihdi: “Kitail kin ale sang reh mehkoaros me kitail kin peki, pwehki atail kin peikiong sapwellime kosonned akan oh pil wia soahng kan me kin kaperenda kupwure.” (1 Sohn 3:22) Ahpw, dahme pahn wiawi ni ahnsou me atail wiewia kan sohte kin idawehn sapwellimen Koht koasoandi me pid wiewia mwahu? Adam oh Ihp rukila mwurin ara wiahda dihp nan mwetuwel en Ihden. Pil kitail ele pahn men ruk “sang mwohn silangin Siohwa” oh sohla kapakap. (Senesis 3:8) Klaus, brother men me wereila nan doadoahk en soundoulik, tehehr me: “I kin kilang me kereniong ahnsou koaros me tepin sapwung me aramas me kin peiweisang Siohwa oh sapwellime pwihn kin wia iei met: irail kin uhdi sang wia kapakap.” (Ipru 2:1) Iei met me pil wiawihiong José Ángel. E koasoia: “Kereniong sounpahr waluh I sohte kin kapakap ong Siohwa. I kin pehm me I sohte warohng kapakap ong Ih, mendahte ahi kin wiahkihte Ih Semei me ketiket nanleng.”

16, 17. Kihda karasepe kan me pid ia uwen kaukaule en kapakap me kak sewese kitail en powehdi luwet en pali ngehn.

¹⁶ Ekei kitail pahn kakete pehm me kitail sohte warohng kapakap pwehki atail luwet ni pali ngehn de pwehki kitail pwupwudi nan dihp. Ahpw, iei ahnsou duwehte met me kitail anahne isaneki koasoandi me Siohwa wiahda ong kitail: kapakap. Sona tangasang pwukoa me kohwong ih. Ahpw, ‘nan ah apwal, Sona likweriong Siohwa, oh Siohwa kin ketin sapeng ih. Sang nan kapehden Sheol, Sona peki sawas, oh Siohwa karonge ngile.’ (Sona 2:2, NW) Sona kapakap, Siohwa ketin sapeng ah kapakap, oh Sona kehlailda ni pali ngehn.

¹⁷ José Ángel pil kapakap ngidingid oh peki sawas. E tamanda: “I ritingada mohngiongi oh peki rehn Koht ni karakarahk en mahk ong ie. Oh Ih eri sewese ie. I sohte leme me I pahn kak pwurodohng nan padahk mehlel ma I sohte kapakap. Ahnsou wet I kin kapakap rahn koaros, oh I kin ngoangki ahi ahnsou en kapakap akan.” Kitail en ahnsou koaros ahneki saledek en koasoi saledek ong Koht me pid atail sapwung kan oh peki reh ni karakarahk en ketin mahk ong dipatail. Ni ahnsou me Nanmwarki Depit wehkada ah sapwung kan, Siohwa ketin mahkohng dipe kan. (Melkahka 32:3-5) Siohwa kupwurki sewese kitail, oh sohte kasohwei kitail. (1 Sohn 3:19, 20) Oh kapakap en ohl mah kan en nan mwomwohdiso kak sewese kitail ni pali ngehn, pwe soangen kapakap pwukat kin “inenen manaman.”​—Seims 5:13-​16.

18. Koapworopwor dah me sapwellimen Koht ladu kan kak ahneki, sohte lipilipil ia uwen peila me re ahneki?

¹⁸ Ihs pahpa men me pahn sohte men sewese nah pwutak emen me pahn sohpeiong ih ni karakarahk oh peki reh sawas oh kaweid mwurin ah wiahdahr sapwung ieu? Karasaras en pwutak me kesehla ah pai kasalehda me sohte lipilipil ia uwen aramas akan arail salongala, Samatail nanleng kin peren ni ahnsou me irail kin pwurodohng reh. (Luk 15:21, 22, 32) Siohwa kin kangoangehki irail koaros me wiahda sapwung kan en likweriong Ih “pwe E pahn ketin mahkohng ni ahl me inenen laud.” (Aiseia 55:6, 7, NW) Mendahte Depit ah wiahda dihp laud ekei, e likweriong Siohwa, ndinda: “Maing Koht, komw ketin karonge ei kapakap; komw dehr ketin sohpeisang ei pekipek.” E pil nda: “Ni menseng, nin souwas oh ni pwong kaulim oh sengloal en nan kapehdiet kin leldalahng mwohn silangi, oh [Siohwa] kin ketin karonge ngileiet.” (Melkahka 55:1, 17) Met inenen wia mehn kameleilei!

19. Dahme kahrehda kitail sohte kak ndahki me kapakap akan me likamwete sohte pasapengpe sohte wia kilelepen me Koht sohte kupwurki?

¹⁹ Ahpw, iaduwen ma atail pekipek sohte alehdi pasapengpe mwadang? Eri, kitail en tehk kanahieng pwe atail pekipek en kin pahrekiong kupwuren Siohwa oh en wiawi ni mwaren Sises. (Sohn 16:23; 1 Sohn 5:14) Tohnpadahk Seims kin koasoia duwen ekei Kristian akan me arail kapakap akan sohte kin alehdi pasapengpe pwehki irail kin “pekipek ni kahrepe sapwung.” (Seims 4:3) Ahpw, kitail en dehr mwadangete lemeleme me atail kapakap akan me saikinte pasapengpe ahnsou koaros kin wia kilelepen me Siohwa sohte kupwure. Ekei pak, Siohwa kakete mweidohng sapwellime tohnkaudok lelepek kan en pwurepwurehng kapakapki ire ieu erein ahnsou ehu mwohn sapwellime pasapeng ah pahn sansal ong irail. Sises mahsanih: “Kumwail peki, kumwail ahpw pahn ale.” (Madiu 7:⁠7) Kahrehda, kitail anahne “poadidiong kapakap.”​—Rom 12:12.

Kapakap Ahnsou Koaros

20, 21. (a) Dahme kahrehda kitail anahne poadidiong kapakap ahnsou koaros ni “imwin rahn akan”? (b) Dahme kitail pahn ale ma kitail kin rahn koaros pwaredohng mwoalen Siohwa me diren kalahngan?

²⁰ Katoutou oh apwal akan me tohto nan “imwin rahn akan,” oh wia kilelepen “ahnsou suwed oh apwal en powehdi.” (2 Timoty 3:1, NW) Oh kahpwal oh kasongosong kan kin mengei en kaitonla atail madamadau. Ahpw, atail pwerisek wia kapakap pahn sewese kitail en kolokol atail mour ong me ngenin, mendahki kahpwal ahnsou koaros, kasongosong kan oh mehn kaluwete atail lamalam akan. Atail kapakap ong Siohwa rahn koaros kak kihong kitail utuht kesempwal me kitail anahne.

²¹ Siohwa, “Sounkaronge kapakap,” sohte kin nohn kedirepw en karonge kitail. (Melkahka 65:2) Kitail en dehpa nda me kitail nohn kedirepw oh sohte kak kapakap ong Ih. Atail kompoakepahnki Koht iei mehkot me keieu kesempwal me atail. Kitail dehpa mwamwahleki. “Eri, kitail eimah oh keiong mpen mwoalen Koht, wasahn ale kalahngan. Iei wasao me kitail pahn ale kalahngan ie, mehn sewesei kitail ni ahnsoun atail anahn laud kan.”​—Ipru 4:16.

Ia Mwomwen Omw Pahn Sapeng?

• Dahme kitail kak sukuhliki sang soukohp Daniel duwen kesempwalpen kapakap?

• Iaduwen atail kak kakehlailihala atail kompoakepahnki Siohwa?

• Dahme kahrehda kitail en kaukaule wia kapakap?

• Dahme kahrehda pepehm en sohte warohng en dehr ireikitaildihsang atail kapakap ong Siohwa?

[Kilel nan Pali 12]

Nehmaia wia kapakap mwadang oh mwotomwot nan kapehde mwohnte a wia a sakarada mwohn nanmwarki

[Kilel nan Pali 13]

Ana “kapakap werei mwohn Siohwa”

[Kilel nan Pali 14]

Sises wia ah kasakas pwong ehu pwon mwohn ah tepiada pilada sapwellime wahnpoaron 12 ko

[Kilel nan Pali 16]

Ahnsou mwahu tohto kitail kak diar ehu ehu rahn me kitail kak kapakap