Kalohk Pwehn Katohnpadahk

“Ni ahnsou me Persila oh Akwila rongada eh padahk kan, ira ahpw kahrelahng nan imwara oh kawehwehiong ni oaritik duwen pwungen Ahl en Koht.”​—WIEWIA 18:26.

1. (a) Edetehn “ngehn sarawi mih rehn Apolos,” dahme sohte itar reh? (b) Dahme Apolos anahne, pwehn wehwehki ni unsek mehkan me kin pid pali ngehn?

PERSILA oh Akwila, pwopwoud Kristian ehu ni keieun senturi, wie rongorong en Apolos ni e wia kapahrek nan sinakoke ehu nan kanihmw en Episos. Sang ni ah kin kadek kapahrek oh doadoahngki lokaia kan me kin kamwekid madamadau en aramas akan, Apolos kin kahrehong sounrongorong kan en perenki rong ah padahk. “Ngehn sarawi ieiang ih,” oh e kin “padahki padahk en Sises ni ahl pwung.” E sansal me Apolos kin “wehwehkihte papidais en Sohn.” Dahme Apolos kin kalohkiseli me mehlel ahpw ah loalokong duwen Krais sohte unsek. Apolos anahne en kalaudehla e loalokong duwen pwukoa en Sises Krais me kin utungada kupwuren Siohwa.​—Wiewia 18:24-​26.

2. Soahngen doadoahk apwal dahieu me Persila oh Akwila aleier?

² Ni soh peikasal, Persila oh Akwila luhke oh kasamwo Apolos pwehn sewese ih esehla “soahng koaros” me Sises kelehliki. (Madiu 28:19, 20) Pwuhk Sarawi kan e kasalehda me ira kasamwo Apolos “nan imwarail pwehn mihmih rehrail oh padahkiong elen Koht akan ni ahl me pwung.” Ni mehlel, mie kahrepe kan me kahrehong aramas teikan en pweiek en padahk ong ih. Ia kahrepe pwukat? Oh dahme kitail kak sukuliki sang ngoang en Persila oh Akwila en kalohki ire kan sang Pwuhk Sarawi? Iaduwen atail pahn kousapahlih ire pwukat kak sewese kitail en tehk kanahieng ong tepida onop Paipel rehn aramas akan?

Tehk Mwahu Duwen Anahn en Aramas akan

3. Dahme kahrehda kasukuhl laud me Apolos aleier sohte kin kauhdi Persila oh Akwila en padahkiong ih?

³ Apolos, me wia mehn Suhs men, kekeirda nan kanihmw en Alexandria. Alexandria wia poahson kaun en Isip oh wia wasahn kasukuhl laud ieu, oh ndandkihla library laud ehu. Kanihmwo pil audaudki mehn Suhs tohto, iangahki aramas loalokong kan. Met me kahrehda kawehwehdi Nting en Ipru kan ong ni lokaiahn Krihk me adaneki Septuagint wiawihda wasao. Ih kahrepe, Apolos kin uhdahn “wehwehki iren Pwuhk Sarawi kan”! Akwila oh Persila kin wiahda ihmw likou kan. Pwehki Apolos kin kadek wia kapahrek kan, met kin kahrehong ira en ahneki pepehm ehu me ira sohte warong en kihong ih sawas? Soh. Limpoak kin kamwekid ira en medemedewe duwen ih, ah anahn akan, oh iaduwen ira kak sewese ih.

4. Iawasa oh iaduwen Apolos aleier sawas me anahn?

⁴ Edetehn Apolos inenen kadek wia kapahrek, e anahne kaweid. Sawas me e anahne sohte pahn direkda sang sukuhl laud, ahpw sang rehn tohnmwomwohdiso kan en Kristian. Apolos eri pahn paiekihda ire kan me pahn sewese ih en ahneki loalokong pwung duwen sapwellimen Koht koasondi ong ale komour. Persila oh Akwila eri “kahrelahng nan imwara oh kawehwehiong ni oaritik duwen pwungen Ahl en Koht.”

5. Dahme ke kak ndahki pali ngehn en Persila oh Akwila?

⁵ Persila oh Akwila me kehlail ni pali ngehn oh pwoson kehlail. Kahrehda ira ‘ahnsou koaros onopada en sapeng aramas koaros me kin peidek duwen ahr koapworopwor,’ mehnda ma kepwehpwe, semwehmwe, loalokong, de emen lidu. (1 Piter 3:15) Akwila oh ah pwoud kak ‘doadoahngki mahsen en Koht ni ahl me pwung oh konehng.’ (2 Timoty 2:15) E sansal me ira kin ngoangki onop Pwuhk Sarawi. Apolos kin mwekidki laud kaweid me poasonda pohn ‘mahsen en Koht, me ieias oh manaman,’ me kin kamwekid mohngiong en aramas akan.​—Ipru 4:12.

6. Iaduwen kitail ese me Apolos kin kalahnganki sawas me e alehdi?

⁶ Apolos kin kalahnganki mehn kalemeng mwahu en ah sounpadahk kan oh met kahrehong ih en koahiekla katohnpadahk. E doadoahngki ah loalokong ong doadoahk en kalohki rongamwahu, oh e kin keieu padahkiong mehn Suhs akan. Apolos kin inenen koahiek en sewese mehn Suhs akan en kamehlele Krais. ‘Ih ohl emen me kadek kapahrek duwen Pwuhk Sarawi,’ e kak kasalehiong irail me soukohp akan en kawao kin kasikasik ketido en Krais. (Wiewia 18:24, Kingdom Interlinear Translation) Pwuhk Sarawi pil mahsanih me Apolos kohla nan Akaia, “e ahpw wiahda sawas laud ehu ong irail ako me pwosonlahr pwehki kalahngan en Koht. Pwehki eh akamai kehlail, e powehdi mehn Suhs akan nan akpwung sansal akan, kadekadehde sang nan Pwuhk Sarawi me Sises, iei Mesaia.”​—Wiewia 18:27, 28.

Sukuhlikisang Mehn Kahlemeng en Sounpadahk Teikan

7. Iaduwen Akwila oh Persila wiahla sounpadahk koahiek kei?

⁷ Iaduwen Akwila oh Persila wiahla sounpadahk koahiek kan en Mahsen en Koht? Likin ara kin kaukaule wia pein ara onop oh towehda mihding kan, ara kin karanih wahnpoaron Pohl kin kihong ira sawas laud. Erein sounpwong 18, Pohl kousoanla rehn Persila oh Akwila nan Korint. Irail kin doadoahkpene wiahda oh onehda sapahl ihmw likou kan. (Wiewia 18:2, 3) Medewehla duwen arail kin mwohndipene koasoai padahk loal kan en Pwuhk Sarawi. Oh kapai laud me ira kin alehdi ong pali ngehn ni ara kin ieiang Pohl! Lepin Padahk 13:20 mahsanih, “Ma ke pahn padahngki mehkot sang rehn me loalokong kan, ke pahn pil loalokongla.” Werek mwahu kin imwikihla mwahu ong ara pali ngehn.​—1 Korint 15:33.

8. Dahme Persila oh Akwila sukuhlikihsang ara kin kaskasawi Pohl nan ah doadoahk en kalohk?

⁸ Persila oh Akwila kin kilangwong Pohl nin duwen emen sounkalohk en Wehi me kin wia mehn kahlemeng mwahu nin duwen sounpadahk koahiek men. Pwuhken Wiewia kan mahsanihki me Pohl kin “koasoakoasoiong mehn Suhs oh mehn Krihs kan nan sinakoke kan ni rahnen Sapad koaros, oh kin songosong en kawekirailla.” Mwuri, ni ahnsou me Sailas oh Timoty iangada Pohl, e “ahpw mweidohng eh ahnsou koaros ong kalohkiseli mahseno, kadekadehdehiong mehn Suhs akan me Sises iei Mesaia.” Ni ahnsou me irail malaulau me kin perenki rong sang rehn towe kan en sinakoke, Persila oh Akwila kilangada me Pohl kin keseula ehu wasa me aramas kin perenki rong, ihmw ieu me kin mih limwahn sinakoke ieu. Ih wasao me Pohl kin sewese Krispus, “soumas en sinakokeo,” en wiahla tohnpadahk men. Persila oh Akwila mwein kin kilang me tohnpadahk menet kin inenen sawas laud en sewese aramas teikan nan ah wasahn kousoan. Pwuhk Sarawi mahsanih: “Krispus . . . ahpw pwosonla Kauno, iangahki eh peneinei koaros. Oh pil me tohtohie nan Korint me rong mahseno, re ahpw pil pwosonla oh papidaisla.”​—Wiewia 18:4-8.

9. Iaduwen Persila oh Akwila mwekidiki mehn kahlemeng mwahu en Pohl?

⁹ Sounkalohk kan en Wehi teikan kin kahlemengih mehn kahlemeng mwahu en Pohl, duwehte Persila oh Akwila. Wahnpoarono kin kangoange Kristian teikan: “Eri, kumwail kahlemengih ie, duwehte ei kin kahlemengi Krais.” (1 Korint 11:1) Sang dahme ira sukuhlikisang mehn kahlemeng mwahu en Pohl, Persila oh Akwila seweseki Apolos en esehla padahk mehlel kan en Kristian. Mwuri, e uhd sewese aramas teikan. Persila oh Akwila ni soh peikidpe kin katohnpadahk nan Rom, Korint, oh Episos.​—Wiewia 18:1, 2, 18, 19; Rom 16:3-5.

10. Dahme ke sukuhliki sang nan Wiewia irelaud 18 me pahn seweseiuk nan doadoahk en katohnpadahk?

¹⁰ Dahme kitail kak sukuhliki sang Wiewia irelaud 18? Duwehte Akwila oh Persila me kin sukuhlikihsang Pohl, kitail kak kamwahuiala atail koahiek en katohnpadahk sang ni atail pahn kahlemengih mehn kahlemeng mwahu kan en Mahsen en Koht. Kitail kak nantiong werekiong irail kan me “inenen poadidiong mahseno” oh “ngoangki kalakalohkong” aramas teikan. (Wiewia 18:5, Kingdom Interlinear Translation) Kitail kak kasawi ia mwomwen irail kin padahk pwen lel mongiong en aramas ni ahr kin ni koahiek kamwekid mohngiong en aramas akan. Koahiek wet pahn kak sewese kitail en katohnpadahk. Ni ahnsou me kitail kin onop Pwuhk Sarawi rehn aramas emen, kitail kak pil luhke tohn peneinei teikan de mehn mparail teikan en pil iang onopo. De kitail kak idek ma mie meteikan me pil men onop Pwuhk Sarawi.​—Wiewia 18:6-8.

Isaneki Ahmw Ahnsou Mwahu Koaros en Katohnpadahk

11. Iawasa kitail kak diarada tohnpadahk kapw kan?

¹¹ Pohl oh ienge Kristian akan kin song en katohnpadahk ni ahr kin kalakalohk sang ihmw lel ihmw, wasahn netinet kan, ahnsoun seiloak​—ni mehlel wasa koaros. Nin duwen sounkalohk ngoang men me kin nantiong en katohnpadahk, ke kak kalaudehla ahmw ahnsou en iang doadoahk en kalohk? Ke kak isaneki ahnsou mwahu koaros pwehn rapahki aramas warong kan oh kalohk ong irail? Ia ekei ahl akan me iengatail sounkalohk kan en rongamwahu kin katohnpadahk? Kitail tehk mahs duwen kalohk ni doadoahngki telephone.

12-14. Pwehn kawehwehda kamwahupen doadoahngki telephone ong kalohk, kihda pein omw ekspiriens de ehu me kohsang parakrap pwukat.

¹² Nan Brazil, emen Kristian me kitail pahn kadanekihla Maria, kin kalohk ni ihmw lel ihmw oh e kihong lih pwulopwul men kisin tract ni ahnsou e pahn mweselsang ah apartment. Maria tepida koasoiada oaralap en tract e wia peidek wet, “Ke men kalaudehla ahmw wehwehki duwen Pwuhk Sarawi?” Liho eri sapeng: “Ei. I men kalaudehla ahi wehwehki Pwuhk Sarawi. Ahpw ihte ngehi sounpadahk men oh ai doadoahk kin kihsang ai ahnsou laud.” Maria eri padahkiong ih me ira kak doadoahngki telephone pwehn koasoiapene oaralap en Pwuhk Sarawi kan. Liho eri kihong nah telephone nempe oh ni soutikohte e tepida onop Pwuhk Sarawi ki telephone oh doadoahngki brochure Dahme Koht Kupwurki Kitail en Wia?a

¹³ Ahnsou ehu, pioneer emen nan Ediopia doadoahngki telephone ong kalohk, ahpw e pwuriamweikihla ni ahnsou me e koasoiong ohl emen, pwe mwoaroangoroang wiawi nan imwen ohlo. Ohlo peki reh ma e kak call ih mwuhr. Eri ni ahnsou me sistero call, ohlo pek mahk oh kawehwehda me ni ahnsou me pioneer tepin call, ohlo oh ah pwoud wie akamai. Sistero kawehwehda duwen kaweid me Pwuhk Sarawi kin kihda ong kahpwal en peneinei kan. E pahdahkiong ih me peneinei tohto kin ale sawas sang pwuhk wet me oaralape koasoia The Secret of Family Happiness, ehu pwuhk me wiawihda sang rehn Sounkadehdehn Siohwa kan. Rahn kei mwurin e aleier pwuhk wet, sister menet pwurehng teleponlahng ohlo. Ohlo nda: “Pwuhk wet doarehla ai pwopwoud!” E pil wiahda mihding ehu rehn ah peneinei pwe e kak ehukihong irail ire mwahu kan me e wadekehr nan pwuhko. Onop en Pwuhk Sarawi eri tepida oh mwuri ohlo tepida iang kaukaule mihding kan en Kristian.

¹⁴ Emen Sounkalohk en Wehio nan Denmark tepida onop Paipel ni e doadoahngki telephone oh sistero kawehwehda met: “Sounapwalih en kalohk kin kangoange ie en iang kalohk ki doadoahngki telephone. Nin tepio I kin pweiek oh ndinda: ‘Met kaidehn mehkot me I kin perenki wia.’ Ahpw ehu rahn, I nantiong en dehr saloh ahpw ni eimah I tepida padik nempe en telephone. Emen lih me adaneki Sonja sapeng telephone oh mwurin kiht koasoakoasoaiapene ni ahnsou mwotomwot, e pwungki en ale sawaspen Pwuhk Sarawi ehu. Ni soutik ehu se koasoia duwen oaralap me pid kapikapikda kan, oh e men wadek pwuhko me oaralap koasoia Life​—How Did It Get Here? By Evolution or by Creation.b I padahkiong ih me e pahn mwahu ma se kak tuhpene oh koasoiapene duwen oralap wet. E pwungki koasondi wet. Sonja onopadahr ong onopo ni ai lela wasao, eri se kin onop wihk koaros sang ni ahnsowo lel met.” Riatail Kristian lih menet koasoia: “Erein sounpar tohto I kin kapakap pwen diarada ai Paipel study, ahpw I sohte lemeleme me I pahn tepida ehu Paipel study ki telephone.”

15, 16. Ekspiriens dah kan me ke kak koasoia me kin kasalehda kesempwalpen isaneki ahmw ahnsou mwahu koaros en tepida onop Paipel rehn aramas sohte lipilipil?

¹⁵ Sounkalohk tohto kin pweida mwahu nan kalohk pwehki irail kin kapwaiada kaweid en kalohk ong aramas sohte lipilipil wasa kan me irail kin mih ie. Emen sister nan United States peidi limwahn sidohsa laud nan wasahn peidi. Ni ahnsou me lih me mwohndi nan sidohsa laud kilang sistero, sistero tepida kawehwe duwen doadoahk en sewese aramas en wehwehki neirail Paipel. Liho rongorong, doudi sang sidohsa laud, oh keiong mpen waren sistero. Liho koasoia: “I inenen perenki ahmw koasoiong ie. Wereila I sohte ale noumwail pwuhk kan. Oh pil, I men pwurehng onop Paipel. Ke kak onop rehi?” Eri, e sansal me sistero kin isaneki ah ahnsou mwahu koaros en kalohki Rongamwahu.

¹⁶ Pil emen sister nan United States ahneki ekspiriens mwahu wet ni ahnsou me e mwemweitlahng imwen me mah kan oh soumwahu laud kan: Sistero tuhwong emen kaun en wasao me kin koasoanehdi wiewia tohrohr kan ong tohn wasao oh sistero idek reh ma e kak kihda ah sawas ong tohn wasao ni ah kak wiahda ah koasoandi en kaitarala anahn en pali ngehn en tohn wasao. Sistero pil kapataiong me e pahn perenki onop Paipel rehn irail sohte lipilipil me men sukuhliki Paipel. Kauno eri mweidohng sistero en tuhwong tohn wasao. Sohte pwand, sistero tepida onop Paipel rehn tohn wasao pak siluh nan wihk ehu oh irail meh 26 tohn wasao kin iang towehda, oh emen rehrail kin kaukaule iang towehda mihding kan koaros.

17. Dahme ekei sounkalohk kan kin wia me kin pweida mwahu pwehn kak tepida onop Paipel rehn aramas akan?

¹⁷ Ekei sounkalohk kan kin idek rehn aramas ma irail men onop Paipel oh koasoandi wet kin kak pweida mwahu. Ehu menseng, mwomwohdiso ehu me sounkalohk 105 kin iang koasoanehdi me irail sounkalohk kan pahn idek rehn tohnihmw koaros me irail tuhwong ma irail men onop Paipel. Sounkalohk 86 iang kalohk rahno, oh erein awa riau me irail kalohk, irail tuhwong aramas 15 me tepida onop Paipel rehrail.

Nantihong Rapahki Irail me Kin Perenki Rong

18, 19. Soangen kaweid dah kan me Sises ketikihda me e pahn mwahu kitail en tamataman, oh dahme kitail men wia?

¹⁸ Nin duwen sounkalohki Wehio, ken doadoahngki iren sawas kan me kileledi nan artikel wet. Ahpw, e pahn m,wahu en medemedewe duwen tiahk kan nan pein ahmw wasa ni ahnsou me ke medemedewe duwen wiepen kalohk me pahn keieu pweida mwahu nan ahmw wasa. Ahpw, mwohn mehkoaros, ken tamataman kaweid en Sises en rapahki irail me kin perenki rong oh sewese irail en wiahla sapwellimen Sises tohnpadahk kan.​—Madiu 10:11; 28:19.

¹⁹ Pwehn wia met, kitail anahne ‘doadoahngki mahsen mehlel ni ahl me pwung oh konehng.’ Kitail kak wia met ni atail pahn kawehwe mwahu oh doadoahngki iren Paipel kan ni ahl me pwung oh konehng. Met pahn sewese kitail en kamwekid mohngiong en aramas akan me perenki rong oh met pahn sewese irail en mwekid ni pali ngehn. Ma kitail pahn kapakap oh likih Siohwa en sewese kitail, kitail kak sewese ekei aramas en wiahla sapwellimen Sises tohnpadahk kan. Oh doadoahk wet kin inenen kaperen oh kitail pahn kak ale kapai tohto! Kitail en ‘wia uwen atail kak mwohn silangin Koht, pwe en ketin pwungkin kitail,’ oh kitail en ahnsou koaros wauneki Siohwa nin duwen sounkalohk ngoang kei me kin kalohk pwehn katohnpadahk.​—2 Timoty 2:15.

[Nting tikitik me mi pahs]

Ke Tamatamante?

• Dahme kahrehda Apolos anahne sawas en kohwong ih pwehn wehwehki mwahu duwen Ahl en Koht?

• Ni ahl dah kan Persila oh Akwila sukuhliki sang wahnpoaron Pohl?

• Dahme ke sukuhliki duwen doadoahk en katohnpadahk sang pwuhken Wiewia irelaud 18?

• Dahme ke kak wia pwehn isaneki ahmw ahnsou mwahu koaros pwehn katohnpadahk?

[Kilel nan Pali 14]

Persila oh Akwila “kahre Apolos nan imwara oh kawehwehiong ni oaritik duwen pwungen Ahl en Koht”

[Kilel nan Pali 16]

Apolos eri koahiekla ni e kin katohnpadahkih aramas akan

[Kilel nan Pali 17]

Pohl kin kalohk wasa koaros me e kin kohla ie

[Kilel nan Pali 19]

Isaneki ahmw ahnsou mwahu koaros en kalohk