Kristian Akan Anahne Sawas En Emenemen

“Kitail koaros wia kisehn paliwarteieu.”​—EPISOS 4:25.

1. Dahme ehu encyclopedia koasoia duwen paliwar en aramas?

PALIWAR en aramas wia kapikapikada kapwuriamwei ieu! The World Book Encyclopedia koasoia: “Ekei ahnsou, aramas akan kin karasaiong paliwar en aramas me e duwehte misihn ehu​—paliwar en aramas wia misihn keieu kaselel ehu sangehr mahs lel met. Edetehn paliwar en aramas kaidehn uhdahn misihn ehu, ahpw ni ahl tohto, e kin rasehng misihn ehu. Pwe misihn ehu oh paliwar en aramas kin wiawikihda kakon tohto. Ehu ehu kakon en paliwaro kin duwehte ehu ehu kakon en misihn ehu pwe irail koaros kin wia doadoahk kesempwal kan. Ahpw, kakon kan koaros nan paliwar kin doadoahkpene pwe paliwar en aramas de “misihn” en paliwar pahn kak doadoahk mwahu.”

2. Ni ahl dah kei me paliwar en aramas oh mwomwohdiso en Kristian duwehpenehte?

² Ei, mie kakon tohto nan paliwar en aramas, oh ehuehu kakon kin toukihda mehkot me anahn. Sohte selen nta ieu, uduk ehu, de kakon en paliwar teikan me sohte kesempwal, koaros kin kesempwal. Met pil rasehng emenemen tohnmwomwohdiso en Kristian pwe koaros kin kihda arail sawas me pahn kakehle roson en pali ngehn en mwomwohdiso. (1 Korint 12:14-​26) Edetehn e sohte konehng emenemen tohnmwomwohdiso en ahneki madamadau ieu me e laudsang mehteikan, e pil sohte pwung tohnmwomwohdiso kan en lemeleme me irail sohte katepe.​—Rom 12:3.

3. Iaduwen pwuhken Episos 4:25 kasalehda me Kristian akan anahne emenemen irail?

³ Duwehte kakon kan nan paliwar en aramas kin sawaspene, ih me Kristian akan pil kin wia: irail anahne sawas en emenemen. Wahnpoaron Pohl padahkiong ienge pwoson me keidi kan: “Eri, kumwail kesehla amwail likamw akan, oh emenemen kumwail en kin lokaia mehlel ong rie [Kristian], pwe kitail koaros wia kisehn paliwarteieu rehn Krais.” (Episos 4:25) Pwehki irail ‘wia kisehn paliwarteieu,’ irail mehn Israel en ngehn kin lokaia mehlel nanpwungarail oh pil doadoahkpene pwe irail wia “paliwar en Krais.” Ei, emenemen irail kin wia kisehn paliwarteieu. (Episos 4:11-​13) Kristian teikan me kin ahneki koapworopwoar en mihmi nan sampah kin perenki miniminiong pwihn wet.

4. Ni ahl dah kei sawas kak kohwong aramas kapw akan?

⁴ Ni ehuehu sounpar, aramas kid kei me kin ahneki koapworopwor en mihmi nan paradais nin sampah kin papidaisla. Tohnmwomwohdiso teikan kin perenki sewese irail en “nantihong kekeirada pwehn wiahla aramas mah ni pali ngehn.” (Ipru 6:1-3) Sawas wet ele pahn kak pid sapeng peidek kan duwen iren Pwuhk Sarawi kan de kihda sawas konehng ong kalohk. Kitail kak sewese aramas kapw kan ni atail pahn wia mehn kahlemeng mwahu en kaukaule iang pasapeng nan mihding en Kristian akan. Ni ahnsoun pwunod, kitail pil kak kihda kangoang de mehn kamweitpen loalerail. (1 Deselonika 5:14, 15) Kitail anahne rapahkihda ahl akan en sewese aramas teikan en “momourki mour mehlel.” (3 Sohn 4) Sohte lipilipil ma kitail wia aramas pwulopwul de mah, de kitail ahpwtehn memourki mour mehlel de mihmi nan padahk mehlel sounpar tohto, kitail kak kakehlahda pali ngehn en iengetail pwoson akan​—oh irail uhdahn anahne kitail.

Irail kin Kihda Sawas me Anahn

5. Iaduwen Akwila oh Prisila sewese Pohl?

⁵ Irail me pwopwoud akan me Kristian kin diarada nsenamwahu ni ahr kin sewese iengarail pwoson akan. Karasepe ieu, Akwila oh eh pwoud Persila kin sewese Pohl. Ira kin kasamwo Pohl en kousoan rehra, iang ih wiahda ihmw likou kan, oh sewese ih wiahda mwomwohdiso kapw ehu nan Korint. (Wiewia 18:1-4) Ni ahl me sohte sansal, ira sewese Pohl edetehn ara mour lelong keper. Ira momour nan Rom ni ahnsou me Pohl padahkiong Kristian akan wasao: “Ei rahnmwahu ong Persila oh Akwila, iengei kan ni doadoahk en Krais Sises, me lelohng nan keper laud pwehki ngehi. I kapinga ira mehlel​—⁠a kaidehn ngehite, ahpw pil tohn mwomwohdisohn mehn liki kan koaros.” (Rom 16:3, 4) Duwehte Akwila oh Persila, ekei Kristian akan nan atail ahnsou kin kakehlahda mwomwohdiso kan oh sewese iengerail tohnkaudok akan ni soangsoangen ahl akan, ekei pak pein irail kin lelong keper laud pwehki irail sohte kin kasalehong sounkamakam kan iawasa iengerail sounpapah en Koht teikan kin mihmi ie, pwe irail me uhwong kan sohte pahn keme irail de kemehla irail.

6. Sawas dahieu me Apolos alehdi?

⁶ Akwila oh Persila pil sewesehda Apolos, emen Kristian me kadek en padahk, oh ni ahnsowo, e padapadahkiong mehn Episos kan duwen Sises Krais. Ahpw, ni ahnsowo, Apolos kin ihte wehwehki duwen papidais me Sohn wiahda me kin kileledi me emen koluhkihla dipe kan ni e kin kauwehla Kosonnedo. Akwila oh Persila dehdehkihla me Apolos anahne sawas, eri ira “kawehwehiong ni oaritik duwen pwungen ahlen Koht.” Mwein ira kawehwehda me papidais en Kristian kin wehwehki me emen pahn anahne duhdi nan pihl oh pil ngehn sarawi anahne en mwerehdi powe. Apolos kin kapwaiada dahme e sukuhlikier. Mwuri, nan Akaia, “e ahpw wiahda sawas laud ehu ong irail ako me pwosonlahr pwehki kalahngan en Koht. Pwehki e akamai kehlail, e powehdi mehn Suhs akan nan akpwung sansal akan, kadekadehde sang nan Pwuhk Sarawi me Sises, iei Mesaia.” (Wiewia 18:24-​28) Pak tohto, koasoi kan en iengetail tohnkaudok akan kak sewese kitail en kalaudehla atail wehwehki Mahsen en Koht. Ni ahl wet, kitail kin sawaspene nanpwungatail.

Kihda Sawas Kan en Paliwar

7. Dahme mehn Pilipai kan wia ni ahnsou irail kin rong duwen iengarail Kristian akan anahne sawas?

⁷ Tohnmwomwohdiso Kristian kan en Pilipai kin poakpoake Pohl oh kadarala reh anahn akan en paliwar erein e mwemweitla rehn mehn Deselonika kan. (Pilipai 4:15, 16) Ni ahnsou me riarail kan nan Serusalem anahne sawas, mehn Pilipai kan kasalehda me irail kin perenki kihda arail sawas, oh irail kin kihda daulih dahme re anahne. Eri, Pohl kin kalahnganki ngenin tounmetei oh kadek sapan me rie brother oh sister kan nan Pilipai kin kasalehda oh e koasoiong ienge tohnkaudok teikan duwen mehn kahlemeng mwahu me irail kihda.​—2 Korint 8:1-6.

8. Soahngen madamadau dahieu me Epaprodaitus kasalehda?

⁸ Ni ahnsou me Pohl selidi nan imweteng, mehn Pilipai kan sohte ihte kadarala ih sawas kan ni paliwar, ahpw irail pil kadarala reh Epaprodaitus. Pohl mahsanih: “Pwehki eh tounmeteikihla eh mour [Epaprodaitus] oh kereniong mehla pwehki doadoahk en Krais, pwe en wiahiong ie sawaso me pein kumwail sohte kak wia.” (Pilipai 2:25-​30; 4:18) Kitail sohte ese ma Epaprodaitus emen elder de emen ministerial servant. Ahpw, ih emen me kin tounmeteiki laud oh e wia emen Kristian me kin perenki sawas, oh Pohl uhdahn anahne ih. Mie emen nan ahmw mwomwohdiso me kin duwehte Epaprodaitus?

Irail Kin Wia ‘Sawas Laud’

9. Mehn kahlemeng mwahu dahieu me Aristarkus kasalehda?

⁹ Sohte lipilipil mehnia mwomwohdiso me irail iang, tohnmwomwohdiso kan kin inenen kalahnganki brother oh sister limpoak kan me duwehte Akwila, Persila, oh Epaprodaitus. Mwein ekei iengetail tohnkaudok kan kin duwehte Aristarkus, emen Kristian nan keieun senturi. Ih oh meteikan kin “wia sawas laud,” mwein e kin kihda kangoang kan de kihda sawas konehng teikan. (Kolose 4:10, 11) Pwehki Aristarkus kin sewese Pohl, e kin kasalehda me e wia kompoakepah mehlel men ni ahnsou me aramas anahne sawas. Ih soangen aramas me Lepin Padahk 17:17 kin kasalehda: “Kompoakepah kan kin kasalehda ar limpoak ahnsou koaros. Ia katepen eh mie kompoakepahmw ma e sohte sewese iuk ni ahnsou apwal?” E soh konehng kitail koaros en nantihong kihda ‘sawas laud’ ong iengetail Kristian akan? Keieu, kitail anahne sewese irail akan me kin lelohng kahpwal de kalolokol kan.

10. Mehn kahlemeng dahieu me Piter wiaiong Kristian elder kan?

¹⁰ Keieu, Kristian elder akan anahne kihda sawas en kakehlepen iengerail brother oh sister kan ni pali ngehn. Krais mahsanih ong wahnpoaron Piter: “Kakehlahda pwoson en riomw kan.” (Luk 22:32) Piter kak wia met pwehki e kin kasansalehda irair kaselel kan, keieu mwurin Sises iasadahr. Kumwail elder kan, nantihong en wia met ni peren oh kadek, pwe iengemwail pwoson akan anahne kumwail.​—Wiewia 20:28-​30; 1 Piter 5:2, 3.

11. Iaduwen kitail kak paiekihda sang atail kin sukuhliki duwen ngehn me Timoty kin kasalehda?

¹¹ Timoty kin iang Pohl ahnsou me e kin seiloakseli, oh ih emen elder me kin inenen nsenohki Kristian teikan. Mendahki e kin soumwahu, Timoty kin, ni mohngiong unsek, kasalehda pwoson kehlail oh ‘kin iang Pohl doadoahk pwehki Rongamwahu.’ Pwehki met, wahnpoaron Pohl kak padahkiong mehn Pilipai kan: “Ihete me duwehte ngehi me kin nsenohkin kumwail.” (Pilipai 2:20, 22; 1 Timoty 5:23; 2 Timoty 1:5) Ma kitail pahn kasalehda soangen ngenin nsenoh me Timoty kin kasalehda, kitail kak wia kapai laud ong iengetail tohnkaudok kan en Siohwa. Mehlel, kitail kin dadaurete mendahki pein atail luwet akan oh kasongosong kan me kin lelohng kitail, ahpw kitail pil kak kasalehda pwoson kehlail oh ni limpoak nsenohki riatail brother oh sister kan ni pali ngehn. Kitail anahne tamataman ahnsou koaros me irail anahne kitail.

Lih kan Me Kin Nsenohki Aramas Teikan

12. Dahme kitail kak sukuhliki sang mehn kahlemeng mwahu en Dorkas?

¹² Dorkas iei emen lih me kin iang lih poadidi teikan me kin nsenohki aramas teikan. Ni ahnsou me e mehla, irail tohnpadahk ko likwerih Piter oh kahrehdahla nan pere poweo. Wasao, “liohdi kan koaros wie sengiseng oh kasalehiong Piter arail likou kan me re likilikawih me Dorkas wiahda ni ahnsou me e momour.” Dorkas pwurehng mourdahr oh pousehlahte ni ‘ahnsou koaros eh wiewia mwahu oh sewese me semwehmwe kan.’ Nan mwomwohdiso en Kristian rahnwet, mie lih kan me kin duwehte Dorkas me kin wiahda likou kan de kin wiewia soahng kan me kin kasalehda arail limpoak ong irail me anahne sawas. Ni mehlel, arail doadoahk mwahu kan kin keieu pid utungada Wehio oh iang doadoahk en katohnpadahk.​—Wiewia 9:36-​42; Madiu 6:33; 28:19, 20.

13. Iaduwen Lidia kasalehda me e kin nsenohki ienge Kristian akan?

¹³ Emen lih adaneki Lidia kin lemmwiki Koht oh kin pil poakpoake aramas teikan. Ih emen pwilidak en Daiadaira, ahpw e kin kousoan nan Pilipai ni ahnsou me Pohl kalohk wasao mpen pahr 50 C.E. Lidia ele mwein emen mehn liki me iangala pelien lamalam en mehn Suhs akan, ahpw mwein ihte mehn Suhs malaulau oh pil sohte wasahn kaudok nan kanihmw en Pilipai. Ih oh lih poadidi teikan kin pokonpene ong kaudok limwahn pillap ieu ni ahnsou me wahnpoaron Pohl kalohk ong irail duwen Rongamwahuo. Pwuhk Sarawi mahsanih: “Ih emen lih me kin kaudok ong Koht, oh Kauno ketin ritingada eh mohngiong pwe en rong kanahieng dahme Pohl koasoakoasoia. Liho, oh pil tohn imwe kan, ahpw papidaisla. E ahpw lukei kiht oh koasoia, ‘Kumwail kohdo oh kousoan nan imweiet, ma kumwail kamehlele me ei pwoson me uhdahn mehlel.’ Eri, e ahpw kangoangehkin kiht se en kohla.” (Wiewia 16:12-​15) Pwehki Lidia perenki wia doadoahk mwahu kan ong meteikan, e pweida ni eh kin kangoange Pohl oh ienge kan en mihmi reh. Rahnwet, kitail pil kin kalahnganki Kristian limpoak oh kadek kan me kin kasalehda soangen kadek oh kasamwo meteikan duwehte met!​—Rom 12:13; 1 Piter 4:9.

Kitail Anahne Kumwail me Pwulopwul kan

14. Iaduwen Sises Krais wiaiong aramas pwulopwul kan?

¹⁴ Mwomwohdiso en Kristian tepikihda sang rehn sapwellimen Koht Ohl, Sises Krais, me kadek oh limpoak. Pwehki e kin limpoak oh kadek, aramas akan sohte kin perki keiong mpe. Ehu ahnsou, ekei aramas kahrehlahng Sises neirail seri kan, oh sapwellime tohnpadahk ko kidahwekihda aramas ako iangahki neirail seri kan. Sises ahpw mahsanih: “Kumwail pweisang kisin seri kan pwe re en kohdo rehi. Kumwail dehr ireiraildi; pwe irail kan me rasehng kisin seri pwukat, iei arail wehi, Wehin Koht. I men kumwail en ese pwe mehmen me sohte pahn ale Wehin Koht rasehng kisin seri men, e sohte pahn pedolong loale.” (Mark 10:13-​15) Pwen alehdi pai kan en Wehio, kitail anahne aktikitik oh perenki ale kasukuhl duwehte seri kan kin wia. Sises ketin kasalehda sapwellime limpoak ong seri kan ni e pwoalehdi seri ko oh kupwuramwahuwihirailla. (Mark 10:16) A iaduwen kumwail me pwulopwul kan rahnwet? Kumwail kak kamehlele me tohnmwomwohdiso teikan kin poakohng oh irail anahne iuk nan mwomwohdiso.

15. Mehnia ire mehlel kan me kin pid mour en Sises kin ntingihdi nan pwuhken Luk 2:40-​52, oh mehn kahlemeng dahieu me e ketin wiaiong me pwulopwul kan?

¹⁵ Ni ahnsou me Sises wia emen pwulopwul, e kin ketin kasalehda sapwellime limpoak ong Koht oh pil Mahsen en Koht. Ni ahnsou me e mahki sounpar 12, ih oh ah pahpa oh nohno, Sosep oh Mery, sapahl sang uhdakarail, Nasaret, oh irail sapahllahng Serusalem pwen iang sarawien Pasohpa. Ni ahnsou me ira pahn pwurala sapwarail, ira diarada me Sises sohte iang ara pwihn en seiloak. Eri, ira rapahki ih lao lel ira diarada ih nan Tehnpas Sarawio, wia rongorong sounpadahk en mehn Suhs akan oh kekeinemwe rehrail. Sises pwuriamweikihla me Sosep oh Mery sehse iawasa ira kak diarada ih, oh e idek rehra: “Kumwa sohte ese me I uhdahn pahn kin mihmi nan tehnpas en Semei?” E iang ira pwuralahng Nasaret, oh e kin peikiong ira, oh e kekeirada oh kupwurokongla. (Luk 2:40-​52) Sises ketikihda mehn kahlemeng mwahu ong irail me pwulopwul kan! Ni mehlel, irail anahne peikiong arail pahpa oh nohno kan oh nsenohki sukuhliki duwen mehkan me pid duwen pali ngehn.​—Deuderonomi 5:16; Episos 6:1-3.

16. (a) Dahme ekei pwutak kan likweri ndinda ni ahnsou Sises wie e doadoahk en kalohk nan tehnpaso? (b) Mehnia pwais kaselel me irail Kristian pwulopwul kan kin ahneki rahnwet?

¹⁶ Nin duwen emen pwulopwul, mwein ke kin kalohk ong tohnsukuhl teikan duwen Siohwa oh ke kin iang ahmw pahpa oh nohno kalohk sang ihmw lel ihmw. (Aiseia 43:10-​12; Wiewia 20:20, 21) Ni ahnsou me Sises wia sapwellime doadoahk en kalohk oh kamwahuwihala aramas akan ni Tehnpas Sarawio mwohnte e matala, ekei pwutak kan likweri: “Kaping ong ih me kisehn kadaudok en Depit!” Irail samworo lapalap oko oh sounkawehwe kan en Kosonnedo eri lingeringerda oh nda: “Komw karonge dahme seri pwukat wie patopatohwan?” Sises sapeng irail, “Ei, I rong. Eri dah? Kumwail sohte mwahn kin wadek mahsen en Pwuhk Sarawi me mahsanih, ‘Komw ketin aleier kaping unsek sang ni ewen seri kan oh sang rehn me kin wie dihdi kan’?” (Madiu 21:15-​17) Duwehte irail seri pwuko, kumwail me pwulopwul kan nan mwomwohdiso kin ahneki pwais kaselel en kapinga Koht oh sapwellime Ohl. Se kin perenki oh anahne kumwail en iang kiht nan doadoahk wet nin duwen sounkalohk en Wehi kan.

Ni Ahnsou me Kitail Kin Lelohng Kahpwal kan

17, 18. (a) Dahme kahrehda Pohl koasonehdi kihpenehn sawas kan ong irail Kristian akan nan Sudia? (b) Pwehki Kristian mehn liki akan kin pein toukihda arail sawas ong iengarail mehn Sudia pwoson akan, soangen kamwahu dah kan kohwong Kristian mehn Suhs akan oh Kristian mehn liki kan?

¹⁷ Sohte lipilipil irair dah kei me kitail kin mihmi loale, limpoak pahn kamwekid kitail en sewese iengetail Kristian akan ni ahnsou me irail kin lelong kahpwal kan. (Sohn 13:34, 35; Seims 2:14-​17) Limpoak ong rie brother oh sister kan nan Sudia me kamwekid Pohl en koasoanehdi mwomwohdiso kan nan Akaia, Kalesia, Masedonia, oh nan wehin Eisia en kihpene arail sawas kan. Kalokolok kan, pingiping en kousoan akan, oh duhpek me irail tohnpadahk kan nan Serusalem kin lelohng mwein kin kahrehong Pohl en kasalehda duwen “kalokolok kan,” oh “[arail] kepwe kan koaros pehdsang oh kulsang.” (Ipru 10:32-​34; Wiewia 11:⁠27–​12:1) Ih eri koasoanehdi oh apwalihada koasoandi en sawas ong irail Kristian semwehmwe kan nan Sudia.​—1 Korint 16:1-3; 2 Korint 8:1-4, 13-​15; 9:1, 2, 7.

¹⁸ Pwehki sawas kan sang rehn aramas akan me kin perenki en pein kihong aramas sarawi kan nan Sudia arail sawas kan, met kin kadehdehda me tounkaudok kan en Siohwa en mehn Suhs oh mehn liki kin miniminpene. Pwehki Kristian en mehn liki kan kin wahla arail sawas en mwohni kan ong iengerail mehn Sudia tohnkaudok akan, met kin wiahla ahl en kasalehda arail kalahnganki paien pali ngehn me irail alehda sang rehrail. Eri, e sansal me mie sawas en paliwar oh sawas en pali ngehn me irail kin kihda nanpwungarail. (Rom 15:26, 27) Nan rahnwet, sawas me kin kohwong riatail nan pwoson me paisuwed kan kin pil wiawi sang pein nsen en emenemen kitail koaros oh pil kin poahsoanda pohn limpoak. (Mark 12:28-​31) Kitail pil anahne sawas en emenemen nan irair wet pwen kapahrekala wasa me soh itar akan ‘oh mehmen me ahneki ekis en dehr nohn tikitikla?’​—2 Korint 8:15, NW.

19, 20. Kihda karasepe ieu ong iaduwen sapwellimen Siohwa aramas akan kin kihda arail sawas ni ahnsou rerrer en sahpw oh lapake kin wiawi.

¹⁹ Pwehki kitail wehwehki me Kristian akan anahne sawas en emenemen, kitail kin mwadangete sewese riatail brother oh sister kan nan pwoson. Karasepe ieu, medemedewe dahme wiawi ni ahnsou me rerrer en sahpw oh angkilahn pwehl wiawi nan El Salvador ni pahr 2001. Ehu ripoht koasoia: “Riatail kan sang wasa koaros nan El Salvador wiahda koasoandi en sawas kan. Pwihn en riatail kan me kohsang Guatemala, United States, oh Canada pil kohdo pwen sewese kiht. . . . Tohto sang ihmw 500 oh Kingdom Hall kaselel silu me koukouda ni ahnsou mwotomwot. Kadehdepen pwoson laud wiawiehr pwehki doadoahk laud oh sawaspene me riatail soh-roporop kan wiahda.”

²⁰ Ripoht ieu me kohsang South Africa koasoia: “Lapake laud kan me kauwehla sahpw tohto nan Mozambique pil dokedoke mour en riatail Kristian tohto. Branch Ohpis nan Mozambique koasoanehdi en apwalihada pali laud en arail anahn akan. Ahpw, irail peki reht en kadarala likou kan me aramas doadoahngki ahpw mwamwahute ong riatail akan me mihlahr nan kahpwalo. Se kihpene likou kan me audekihla container me piht 40 reirei ong riatail kan nan Mozambique.” Ei, ni soangen ahnsou pwukat, kitail anahne sawas sang emenemen kitail.

21. Dahme kitail pahn koasoia nan artikel en mwurin met?

²¹ Nin duwen kitail koasoiada, kakon koaros nan paliwar en aramas me kesempwal. Met kin pil mehlel ong mwomwohdiso en Kristian. Tohnmwomwohdiso kan koaros anahne emenemen irail koaros. Irail pil anahne en miniminpene ni arail papah Koht. Artikel en mwurin met pahn koasoia iaduwen met pahn kak pweida.

Iaduwen Ke Pahn Sapeng?

• Dahme kin duwehpenehte nanpwungen paliwar en aramas oh mwomwohdiso en Kristian?

• Dahme tepin Kristian akan kin wia ni ahnsou me iengerail pwoson akan kin anahne sawas?

• Ia ekei karasapen iren Pwuhk Sarawi kan me kasalehda me Kristian akan anahne emenemen oh kin anahne sawaspene?

[Kilel nan Pali 10]

Akwila oh Persila kin nsenohki aramas teikan

[Kilels nan Pali 12]

Sapwellimen Siohwa aramas akan kin sawaspene oh pil sewese aramas teikan ni ahnsou me irail kin lelohng kahpwal akan