Pelianda Ngenen Sampah Wet Me Kin Wekiwekila
“Kitail ale, kaidehn ngenen sampah wet, ahpw ngehn sarawi me Koht ketin poaronehdo.”—1 KORINT 2:12, New World Translation.
1. Ni ahl dah kan me serpento pitihdi Ihp?
“SERPENTO—e pitihiehdi.” (Senesis 3:13) Ki lepin mahsen malaulau pwukat, tepin liho, Ihp, song en kawehwehda kahrepen ah uhwongada Siohwa Koht. Dahme e koasoia me mehlel, ahpw e sohte kihong ih kahrepe mwahu en sapeik. Mwuhr, ngehn sarawi kamwekid wahnpoaron Pohl en ntingihdi: “[Ihp] lohdiong pahn widing.” (1 Timoty 2:14) Serpento pitihdi ih en kamehlele me wiewiahn sapeik—en kang wahntuhke keinapwiho—pahn wia kamwahu ehu ong ih, wiaiong ih en duwehla Koht. E pil pitiekihdi Ihp duwen ihs uhdahn ih me kaweid sapwungih ih. E sohte ese me Sehdan me Tepil me doadoahngki serpento en lokaiahiong ih.—Senesis 3:1-6.
2. (a) Iaduwen Sehdan kin pitipitih aramas rahnwet? (b) Ia wehwehn “ngenin sampah wet,” oh peidek dah kan me kitail pahn koasoia met?
2 Tepisang ni mwehin Adam oh Ihp, Sehdan kin wie pitipitih aramas akan. Ni mehlel, e kin wie “pitipitih sampah pwon.” (Kaudiahl 12:9) Ele kan sohte kin wekidekla. Mendahki e solahr kin doadoahngki serpent, e kin wie ekiekihte mehlelpen ihs ih. Sehdan kin doadoahngki palien mehn kamweit kan, palien kihda rohng kan, oh soahng teikan pwehn pitipitih aramas akan en kamehlele me irail sohte anahne oh pil sohte kak alehdi kamwahu ehu sang kaweid limpoak me Koht kin ketikihda. Sehdan me Tepil kin nantihong en pitihdi aramas akan me kahrehda wasa koaros mie aramas akan me ahnekilahr ngenin uhwong kosonned oh kaweid me kin kohsang nan Paipel. Paipel kin kadaneki ngenin uhwong wet: “ngenen sampah wet.” (1 Korint 2:12) Ngehn wet kin kak kamwekid dahme irail me sohte ese Koht kin kamehlele, arail wiewia kan, oh arail madamadau kan. Ia mwomwen ngenin sampah wet ah kin sansalda, oh iaduwen kitail kak pelianda oh sohte lohdiong pahn widing en ngehn wet? Kitail pahn kilang met.
Aramas Solahr Kesempwaliki Tiahk Mwakelekel
3. Dahme kahrehda “ngenen sampah wet” sansal rahnwet laud sang mahs?
3 Nan rahn pwukat, “ngenen sampah wet” kin sansal rahnwet laud sang mahs. (2 Timoty 3:1-5) Ke pil kin kak kilang me aramas solahr kesempwaliki tiahk mwakelekel. Pwuhk Sarawi kin kasalehda duwen kahrepen met. Mwurin Wehin Koht tepida kakaun nanleng nan pahr 1914, mahwen pil tepida nanleng. Sehdan oh nah ngehn saut akan eri lohdi oh irail piskendiong sampah. Pwehki Sehdan inenen lingeringer kohwahlap, e kalaudehla ah nantihong pitipitih aramas wasa koaros nan sampah. (Kaudiahl 12:1-9, 12, 17) E kin wia uwen e kak koaros en pil “kalowehdi sapwellimen Koht me pilipil kan.” (Madiu 24:24) Ni mehlel, e kin nantihong kauwehla pali ngehn en sapwellimen Koht aramas koaros. E kin nantihong kauwehla atail pali ngehn pwehki ma e kak wia met, Siohwa solahr pahn kupwure kitailla oh kitail pahn katiasang mour soutuk.
4. Iaduwen sapwellimen Siohwa ladu kan kin kilangwong Pwuhk Sarawi, oh iaduwen sampah wet kin kilangwong Pwuhk Sarawi?
4 Sehdan pil kin nantihong kamwekid madamadau en aramas akan pwe re solahr pahn kamehlele Pwuhk Sarawi, me iei pwuhk kesempwal me kin padahkiong kitail duwen Sounkapikpatail me limpoak. Sapwellimen Siohwa ladu kan kin poakpoake oh kesempwaliki Paipel. Kitail wehwehki me Pwuhk Sarawi pwilisang rehn Koht, kahrehda Pwuhk Sarawi iei Mahsen en Koht, kaidehn mahsen en aramas akan. (1 Deselonika 2:13; 2 Timoty 3:16) Ahpw, ahn Sehdan sampah mwahuki kitail en kamehlele me Paipel kohsang rehn aramas. Karasepe ehu, nan pwuhk ehu me kin kauwe Paipel, e koasoia: “Sohte mehkot ‘sarawi’ mihmi nan Paipel, oh Paipel kaidehn ‘Mahsen en Koht.’ Kaidehn aramas sarawi me mwekidki ngehn sarawi me ntingihdi Paipel, ahpw samworo kan me men ahneki manaman me ntingihdi Paipel.” Irail me kin kamehlele soangen koasoi pwukat kakete lohdiong madamadau sapwung me irail kak kaudokiong Koht ni ahl me pein irail mwahuki—de irail sohte anahne kaudokiong Koht ma irail sohte mwahuki.—Lepin Padahk 14:12.
5. (a) Dahme emen ohl me kin ntingdi pwuhk kan koasoia duwen pelien lamalam kan me dene re kin kamehlele Paipel? (b) Iaduwen madamadau en aramas en sampah wet weksang dahme Paipel mahsanih? (Koasoia audepen koakon ni pali 9.)
5 Aramas solahr kin pwungki pelien lamalam, iangahki pelien lamalam kan me kin dene re kamehlele Paipel, pwehki aramas teikan kin kauwe Paipel oh pil aramas akan kin kilang aramas me dene re utungada pelien lamalam kin mwalaun. Nan rahn pwukat, aramas kin kauwe pelien lamalam kan nan nuhs oh pil nanpwungen me loalokong kan. Emen ohl me kin nting pwuhk kan koasoia: “Ahn aramas arail madamadau duwen pelien lamalam en mehn Suhs oh pil Kristian kan kin sohte mwahu. Ong ekei aramas, pelien lamalam en mehn Suhs oh Kristian kan kin wia mehkot me pid mehn mahs; oh ekei aramas kin medemedewe me pelien lamalam pwukat kin kauwehla loalokong en rahnwet oh pil kauwehla kekeirada en sains. Nan rahn pwukat, pepehm en kailongki pelien lamalam kan kin lalaudla oh imwikihla kailok laud oh kauwe me kin sansal.” Kailok wet kin tepida rehn irail me sohte kamehlele me mie Koht oh irail me “audaudkihla lamalam mwahl me sohte katepe.”—Rom 1:20-22.
6. Soangen lamalam dahieu aramas en sampah wet kin ahneki duwen wiewia kan me Koht kin kupwursuwedki?
6 Ihme kahrehda, e sohte kapwuriamwei me aramas akan solahr kin men kolokol tiahk mwakelekel me kin pwungiong koasoandi en Koht. Karasepe, Paipel kin kasalehda me tiahk en ohl mwahuki ohl oh lih mwahuki lih kin “samin” mwohn silangin Koht. (Rom 1:26, 27) Paipel pil kin kasalehda me irail me kin wia dipen nenek oh kamwahl sohte pahn iang sohsohki Wehin Koht. (1 Korint 6:9) Ahpw, nan sahpw tohto, aramas akan kin kaidehn ihte pwungki soangen wiewia pwukat, re pil kin inenen perenki oh mwahuki koasoia wiewia pwukat nan neirail pwuhk kan, makisihn kan, koul kan, kasdo kan oh prokram en TV kan. Ni ahnsou me aramas teikan kin kauwe aramas me kin wiewia soahng pwukat, re kin nda me aramas pwukat kin rotorot, mwahuki kadeik aramas oh sohte ahneki lamalam marain me pahrekiong irair en sampah rahnwet. Aramas me kin wiewia tiahk samin pwukat sohte kin wehwehki me koasoandi kan en Koht me sansal nan Paipel kin kasalehda limpoak en Koht, ahpw sampah kin kilangwong koasoandi en Koht pwukat nin duwen mehn kauwehla arail saledek oh nsenarail.—Lepin Padahk 17:15; Sud 4.
7. Soangen peidek dah kan kitail kak pein idek rehtail?
7 Pwehki aramas tohto nan sampah rahnwet kin ahneki madamadau me kin uhwong Koht, e pahn wia elen loalokong ong kitail koaros en kasawihada pein atail madamadau kan oh dahme kitail kin kesempwaliki. Ekei pak, e pahn mwahu ma kitail pahn kapakap oh peki rehn Siohwa en sewese kitail en kasawihada pein kitail oh tehk ma kitail sohte ekis ekis peiweisang sapwellimen Siohwa madamadau kan oh koasoandi kan. Karasepe ehu, kitail kak pein idek rehtail: ‘I kin perenki soangen mehn kamweit kan me I sohte perenki sounpahr kei samwalahro? Rahnwet, I kak ekis pwungki ekei wiewia kan me I ese me Koht kin kupwursuwedki? Iaduwen—ahi kesempwaliki mehkan me ngenin kin tikitik sang mahs? Ahi mour kin kasalehda me I kin rapahki mahs Wehin Koht?’ (Madiu 6:33) Ma kitail pahn kasawihada pein atail madamadau ni atail pahn doadoahngki peidek pwukat, met pahn sewese kitail en pelianda ngenin sampah wet.
“En Dehr Peiweisang” Padahk Mehlel
8. Iaduwen emen kak peiweisang Siohwa?
8 Wahnpoaron Pohl ntingwong rie Kristian kan oh mahsanih: “Ihme kahrehda e konehng mehlel kitail en ngoangki kapwaiada mwahu padahk kan me kitail rongehr, pwe kitail en dehr peiweisang padahk mehlel.” (Ipru 2:1) Ni ahnsou me sohp kin peila, e sohte kin lel wasakis me e pahn uhdahn kohla ie. Ma kepin sohte kin tehk mwekid en kisinieng oh ahd, were sohp kak peila oh seradahng pohn takai kan. Ni soangen ahlohte, me kitail sohte kin rong kanahieng padahk mehlel sang Mahsen en Koht oh mwekidki mehpwukat, kitail kak peiweisang Siohwa oh seradahng pohn takai kan me karasaraski mehla ni pali ngehn. Met sohte wehwehki me kitail pahn kesehla douluhl padahk mehlel pwehn mehla ni pali ngehn. Ni mehlel, aramas malaulau kin wiakinteieu nseneki soikala Siohwa. Pali laud en ahnsou, irail kin ekis ekis wia mehkot me kin kahrehiong irail en ekis ekis solahr rong kanahieng kaweid sang Mahsen en Koht. Likamwete irail sohte kin kehn me irail ekis ekis pwupwudiong nan dihp. Duwehte kepin me meirla, aramas sohte kin kehn me irail meirla ni pali ngehn lao lel e nohn pwand.
9. Ni ahl dah kan Siohwa kapaiada Solomon?
9 Nna, medemedewe duwen mour en Solomon. Siohwa likikihong ih pwukoa en nanmwarki en Wehin Israel. Koht mweidohng Solomon en kauwada Tehnpas Sarawi oh E pil kaweid ih en ntingihdi ekei wasa kan nan Pwuhk Sarawi. Siohwa mahsen ong ih pak riau oh ketikihong ih kepwehpwe, ndand oh kaunda ni meleilei oh popohl. Ahpw, keieu kesempwal, Siohwa kapaiada Solomon oh ketikihong ih erpit me laud mehlel. Paipel mahsanih: “Koht ketikihong Solomon erpit oh koahiek me sohte emen iang ahneki, oh loalokong me laud mehlel oh sohte kak sosohngdi. Solomon erpit sang ohl loalokong ko en palimese oh ohl loalokong ko en Isip.” (1 Nanmwarki 4:21, 29, 30; 11:9) Mehlel, ke pahn lemeleme ma emen pahn lelepek ong Koht, Solomon kakete wia met. Ahpw, Solomon peiweisang kaudok ong Siohwa oh pwupwudiong dipen lahlahwe padahk mehlel. Iaduwen met wiawi?
10. Soangen kaweid dahieu Solomon sohte peik ong, oh ia imwilahn met?
10 Solomon wehwehki Kosonned en Koht. E pil uhdahn pahn nsenohki kaweid me kohwong irail me pahn wia nanmwarki en Israel kan. Kisehn kaweid pwukat, mie kosonned ehu me kaweidih: “[Nanmwarkio] sohte pahn sapwellimaniki likend tohto, pwe met pahn kahrehiong eh pahn sohpeisang Kauno [“Siohwa,” NW].” (Deuderonomi 17:14, 17) Mendahki kaweid wet sansal, Solomon pwoudikihda serepein isipwiki oh pekehiki serepein silipwiki. Pali laud en serepein pwukat kin kaudokiong koht likamw akan. Kitail sohte wehwehki dahme kahrehda Solomon pwoudikihda oh pekehiki serepein tohto, oh kitail sohte pil wehwehki dahme e mahsanih ong emen me idek reh kahrepe e wia met. Ahpw, kitail wehwehki me e sapeikiong kaweid sang Koht me uhdahn sansal ong ih. Oh dahme Siohwa kasalehda me pahn wiawi ma emen pwoudiki mehn liki kan uhdahn pweida. Kitail wadek: “Serepein ko kahrehiong Solomon en ekis ekis kaudokiong koht likamw akan.” (1 Nanmwarki 11:3, 4) “Ekis ekis” en Solomon erpit sosohrala. E peiweisang Siohwa. Kedekedeo, en Solomon ineng en kaperenda ah pwoud en mehn liki kan wiliandi ah ineng en peikiong oh kaperenda Koht. E inenen kansensuwed pwe mwowe sang ahnsou me e sohpeisang Siohwa, e ntingihdi lepin mahsen pwukat: “Samwa, ken loalokongla oh kaperenda ie; e pahn mie ei pasapeng ong mehmen me pahn kauwei ie”!—Lepin Padahk 27:11.
Ngenen Sampah Wet Kin Inenen Kehlail
11. Iaduwen soahng kan me kitail kin medemedewe kak kamwekid kitail?
11 Dahme Solomon wia kin sewese kitail en wehwehki me e inenen keper en medemedewe me ma kitail wehwehki padahk mehlel eri ngenin sampah wet sohte kak kauwehla atail pali ngehn oh madamadau pwung kan. Dahme kitail kin kihong nan atail madamadau kan kin duwehte mwenge me kin kak kakehlailih de kauwehla kitail. E kin kak kamwekid atail madamadau oh lamalam kan. Pisnis laud kan rahnwet kin pohnese duwen ire wet, kahrehda re kin doadoahngki mwohni laud (billions) nan pahr koaros en kasalehda (advertise) neirail dipwisou kan me re men netikihla. Soangen “advertisement kan” me kin pweida mwahu kin doadoahngki lepin lokaia kan oh kilel kan me kin kainengihada aramas en pwainda dipwisou kan me re men netikihong aramas akan. Ahpw, pisnis kan kin wehwehki me aramas sohte pahn pwain ma irail kilang “advertisement kan” pak ehute de riaute. Ma aramas kilang “advertisement kan” pak tohto, irail pahn kakete pwainda dipwisowo. E sansal me koasoandi wet (advertise) kin doadoahk mwahu—ihme kahrehda pisnis tohto kin doadoahngki met. E kin kamwekid madamadau oh lamalam en aramas tohto.
12. (a) Iaduwen Sehdan kin kamwekid ahn aramas madamadau? (b) Dahme kin kasalehda me e pil kak kamwekid madamadau en Kristian kan?
12 Sehdan kin duwehte irail me kin kasalehda kamwahupen arail kepwe kan de dipwisou kan pwehn kainengihada aramas en pwainda (advertiser) pwehki e kin nantihong kamwekid madamadau en aramas ni ahnsou me e kin kihda ah madamadau kan nan soangen wasa kan me lingan oh doadoahngki kilel kan me kin kainengihada aramas en ahnekihda ah irair en madamadau. Sang ni e kin doadoahngki mehn kamweit kan oh pil ahl teikan, Sehdan kin pitih aramas pwe ren kamehlelehla me dahme mwahu me suwed oh dahme suwed me mwahu. (Aiseia 5:20) Kristian mehlel kan pil kak lohdi pahn Sehdan oh kamehlelehla dahme e mwahuki aramas en kamehlele. Paipel kaweidki: “Ngehno ketin mahsanih ni sansal me ekei aramas pahn kesehla arail pwoson ni imwin ahnsou kan; irail pahn peikiong ngehn likamw akan oh idawehn padahk en ngehn suwed kan. Padahk likamw pwukat kin kohsang ni widing en aramas kine likamw akan, me kadeikpen loalarail kan melahr, pwehki dihp me kakaun irail.”—1 Timoty 4:1, 2; Seremaia 6:15.
13. Ia wehwehn werek suwed, oh iaduwen ihs me kitail werekiong kak kamwekid kitail?
13 Ngenin sampah wet kin kapilpene kitail koaros. Madamadau oh lamalam en ahn Sehdan koasoandi wet kin inenen kehlail oh kin kamwekid aramas tohto. Ihme kahrehda, Paipel kin kihda kaweid erpit wet: “Kaleke kumwail pitida pahn meteikan! Pwe ‘werek suwed kin kauwehla tiahk mwahu.’ ” (1 Korint 15:33) Werek suwed kin pidada aramas—pil nan mwomwohdiso—me kin kasalehda ngenin sampah wet. Ma kitail kamehlele me werek suwed sohte kak kauwehla atail tiahk mwahu, eri met kin wehwehki me kitail kin kamehlele me werek mwahu sohte pil kak sewese kitail? Ma kitail kamehlele met: e sapwung! Paipel kin kasalehda ni sansal duwen ire wet: “Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.”—Lepin Padahk 13:20.
14. Ni soangen ahl dah kan kitail kak pelianda ngenin sampah wet?
14 Pwehn pelianda ngenin sampah wet, kitail anahne werekiong aramas loalokong—irail me kin papah Siohwa. Kitail anahne audehkihda atail madamadau mehkan me kin kakehlailih atail pwoson. Wahnpoaron Pohl ntingihdi: “Mehkan me mehlel, mehkan me katapan, mehkan me pwung, mehkan me mwakelekel, mehkan me mwahu, mehkan me adamwahu, mehkan me wahu oh mehkan me konehng ale kaping, kaukaule medemedewe mehpwukat.” (Pilipai 4:8, NW) Pwehki Siohwa kapikada aramas en kak pilada dahme kitail pahn wia, kitail en pilada mwahu dahme kitail en medemedewe. Kitail en pilada en medemedewe duwen mehkan me kak sewese kitail en karanih Siohwa.
Sapwellimen Koht Ngehn Sarawi Kin Kehlail Sang Ngenen Sampah Wet
15. Iaduwen Kristian kan nan kahnimw en Korint en kawao kin weksang tohnkahnimw wet teikan?
15 Kristian mehlel kan kin weksang irail me mihmi pahn manaman en ngenin sampah wet, pwehki Kristian mehlel kan kin mweidohng sapwellimen Koht ngehn sarawi en kamwekid irail. Pohl ntingwohng mwomwohdiso nan Korint: “Kitail sohte ale ngenen sampah wet, pwe Ngehn Sarawi me Koht ketin poaronehdo pwe en ketin kehsehkin kitail mehkoaros me Koht ketikihong kitail.” (1 Korint 2:12) Ngenin sampah kin kehlail nan kahnimw en Korint mahs. Pali laud en tohn kahnimwo inenen suwed, kahrehda ni ahnsou me irail kin doadoahngki lepin lokaia pwukat “en duwehte mehn Korint” e kin wehwehki “en wia dipen nenek.” Sehdan karotongehla madamadau en mehn Korint tohto. Ihme kahrehda, irail wehwehki ekiste de sohte duwen Koht mehlel. (2 Korint 4:4) Ahpw, Siohwa doadoahngki sapwellime ngehn sarawi en kamarainihala ekei mehn Korint, kahrehda irail kak dehdehki oh sukuhliki duwen padahk mehlel. Sapwellime ngehn sarawi kin kamwekid oh kahluwa irail en wia wekidekla laud kan nan arail mour pwe irail kak ale kupwurmwahu oh kapai sang Siohwa. (1 Korint 6:9-11) Mehlel, ngenin sampah kin kehlail, ahpw sapwellimen Siohwa ngehn sarawi me kehlail sang.
16. Iaduwen kitail kak alehdi oh mwekidkihda sawas en sapwellimen Koht ngehn sarawi?
16 Met pil mehlel rahnwet. Sapwellimen Siohwa ngehn sarawi iei manaman me keieu kehlail nan lahng oh sampah, oh E kin ketikihong aramas akan me kin peki reh ni pwoson. (Luk 11:13) Ahpw, ma ke men sapwellimen Koht ngehn sarawi en sewese iuk, ke anahne wia laud sang pelianda ngenin sampah wet. Kitail anahne pil kaukaule onop Mahsen en Koht oh doadoahngki kaweid sang loale nan atail mour pwe met pahn sewese atail madamadau en pahrekiong sapwellimen Koht madamadau. Ma kitail pahn wia met, Siohwa pahn kakehlailih kitail en pelianda sohte lipilipil dahme Sehdan pahn wia pwehn kauwehla atail pali ngehn.
17. Ni soangen ahl kan me dahme wiawiong Lohd kak sewese oh kamweitihala kitail?
17 Mendahki Kristian kan sohte kin kisehn sampah wet, kitail mihmi nan sampah wet. (Sohn 17:11, 16) Mehlel, kitail sohte kak liksang douluhl ngenen sampah wet, pwe kitail anahne doadoahk de mihmi rehn irail me sohte kin ahneki limpoak ong Koht de sapwellime koasoandi kan. Ahpw, ke kin ahneki pepehm kan duwehte Lohd, me kin “nsensuwed laud” pwehki e kilang tiahk suwed en mehn Sodom kan me kapilpene ih? (2 Piter 2:7, 8) Ma iei, kitail kak ale mehn kamweit wet: Siohwa kin pere oh kapitala Lohd oh E kak wia duwehte ong kitail. Samatail limpoak nanleng kin mahsanih soahng koaros me kin wiawi nan atail mour oh E kin mwahngih duwen atail irair kan, oh E kak kihong kitail sawas oh kehl me kitail anahne pwehn kak kolokol nanpwung mwahu reh oh kehlail ni pali ngehn. (Melkahka 33:18, 19) Ma kitail pahn likih Ih oh peki sawas reh, E pahn kak sewese kitail en pelianda ngenin sampah wet, mendahki kitail lelohng irair apwal kan.—Aiseia 41:10.
18. Dahme kahrehda kitail anahne kesempwaliki atail nanpwung mwahu rehn Siohwa?
18 Nan sampah wet me dohsang Koht oh mihmi pahn manaman en Sehdan, kitail inenen pai pwe kitail—sapwellimen Siohwa aramas akan—wehwehki duwen padahk mehlel. Kitail kin ahneki peren mehlel oh nsenamwahu me sampah sohte kin ahneki. (Aiseia 57:20, 21; Kalesia 5:22) Kitail kin kesempwaliki atail koapworopwor en mour soutuk nan Paradais, ni ahnsou me ngenin sampah wet solahr pahn mie. Kitail en kesempwaliki atail nanpwung mwahu rehn Koht oh nantihong en kapwungala pein kitail ma kitail kilang ngenin sampah wet tepida kamwekid kitail en peiweisang padahk mehlel. Kitail en karanih Siohwa, oh E pahn sewese kitail en pelianda ngenin sampah wet.—Seims 4:7, 8.
Ke Kak Kawehwe?
• Ni ahl dah kan Sehdan kin pitih aramas?
• Dahme kitail kak wia pwehn dehr peiweisang Siohwa?
• Dahme kin kasalehda me ngenin sampah kin kehlail?
• Iaduwen kitail kak ale oh paiekihda sawas en sapwellimen Koht ngehn sarawi?
[Kaokon nan Pali 9]
Loalokong En Sampah Wet Weksang Loalokong Me Kohsang Koht
Kitail sohte kak uhdahn wehwehki “Sapwellimen Koht mahsen iei
dahme mehlel—aramas kin kak pein me mehlel.”—Sohn 17:17.
lemehda duwen dahme mehlel.
Ma ke men kasawihada dahme “Mohngiong en aramas me kin keieu
pwung oh dahme sapwung, likih widing oh kin kak pitih irail.”
pein ahmw pepehm kan. —Seremaia 17:9.
Wia dahme ke men wia. “Sohte aramas emen me kak kaunda pein eh mour.”—?Seremaia 10:23.
Kepwehpwe kak wahdohng emen “Limpoak ong mwohni iei tepin
peren mehlel. soangen suwed koaros.”—1 Timoty 6:10.
[Kilel nan Pali 8]
Solomon peiweisang kaudok mehlel oh tepiada kaudokiong koht likamw akan
[Kilel nan Pali 10]
Duwehte aramas me kin kasalehda kamwahupen arail dipwisou kan pwehn kainengihada aramas en pwainda, Sehdan kin doadoahngki ngenin sampah pwehn kamwekid aramas. Ke kin pelianda ngenin sampah wet?