Kitail En Eimah Duwehte Seremaia

“Likih Siohwa; en eimah oh dehr nan kapehd tikitikla. Ei, likih Siohwa.”​—MELKAHKA 27:14, NW.

1. Kapai laud dahieu me irail Sounkadehdehn Siohwa kan kin paiekihda?

SOUNKADEHDEHN Siohwa kan kin mih nan paradais en ngehn. (Aiseia 11:6-9) Edetehn irail kin mih nan sampah liseliping wet, irail kin paiekihda irairen pali ngehn tohrohr ehu rehn iengerail Kristian akan, pwe irail kin ahneki popohl rehn Siohwa Koht oh iengerail kan. (Melkahka 29:11; Aiseia 54:13) Oh pil, arail paradais en ngehn kin wia lalaudla. Koaros me kin ‘kapwaiada kupwuren Koht sang nan kapehderail unsek’ kin iang sewese en kalaudehla paradais en ngehn wet. (Episos 6:6) Iaduwen irail kin wia met? Sang ni ahr kin kapwaiada kaweid kan sang nan Pwuhk Sarawi oh ni ahr kin padahkiong aramas teikan en wia met, oh luhke irail en iang paiekihda kapai kan en paradais en ngehn wet.​—Madiu 28:19, 20; Sohn 15:8.

2, 3. Soahngen kahpwal dah kei me irail Kristian mehlel akan anahne en dadaurete?

² Ahpw, atail kin mih nan paradais en ngehn sohte kin wehwehki me kitail sohte pahn lelohng kasongosong kan. Pwehki kitail wia aramas soh-unsek kan, kitail kin lokolongki soumwahu, mahla oh mehla. Oh pil, kitail kin kilikilang pweidahn kokohp kan nan “imwin rahn akan.” (2 Timoty 3:1) Mahwin, mwersuwed, soumwahu, duhpek, oh kahpwal laud teikan kin lelohng aramas koaros, oh Sounkadehdehn Siohwa kan pil kin lelohng kahpwal pwukat.​—Mark 13:3-​10; Luk 21:10, 11.

³ Edetehn kitail kin meleilei mih nan irairen paradais ni ngehn, kitail wehwehki me kitail pahn lelohng uhwong laud sang rehn aramas akan me sohte kin iang mih nan paradais en ngehn wet. Sises padahkiong sapwellime tohnpadahk kan: “A I pilkumwailda sang nin sampah; eri, kaidehn kumwail kisehn sampah. Iei kahrepen en sampah eh kin kailongkin kumwail. Kumwail tamataman dahme I ndaiongkumwailehr: ‘Sohte ladu men kin laudsang eh soumas.’ Ma irail kalokeieier, re pil pahn kalokei kumwail.” (Sohn 15:18-​21) Rahnwet sohte weksang dahme wiawi mahs. Pali moron en aramas sohte kin wehwehki de kesempwaliki atail kaudok. Ekei aramas kin kauwe oh kapailoke kitail, de​—nin duwen Sises kehsehkin kitail​—aramas pil kin kailongki kitail. (Madiu 10:22) Pak tohto, nuhs en sampah wet kin kapwarehda nuhs likamw akan duwen kitail. (Melkahka 109:1-3) Ei, kitail koaros kin lelohng kahpwal akan, oh ekei rehtail mwein kin kak loaltikla. Eri, dahme pahn sewese kitail en dadaur mendahki kahpwal pwukat?

4. Kitail pahn sohpeiwong ihs pwen sewese kitail en dadaurete?

⁴ Siohwa pahn ketin sewese kitail. Koht padahkiong sounmelkahkao en ntingihdi met: “Apwal tohto kin lelohng aramas mwahu men, ahpw Kauno kin ketin doarehsang nan eh apwal akan koaros.” (Melkahka 34:19; 1 Korint 10:13) Meh tohto rehtail kak kadehdehda duwen ahnsou me kitail kin likih Siohwa ni unsek, E kin ketikihong kitail kehl pwen sewese kitail en dadaurete mendahki kahpwal akan. Atail limpoak ong Koht oh atail koapworopwor kin sewese kitail en dehr mworusala oh masak. (Ipru 12:2) Eri, mendahki kahpwal akan, kitail kin nantihong papah Siohwa oh kesinenda teng nan pwoson.

Mahsen en Koht kin Kakehlahda Seremaia

5, 6. (a) Kihda ekei mehn kahlemeng kan duwen tohnkaudok mehlel akan me kin dadaurete mendahki kahpwal akan? (b) Ia pepehm en Seremaia ni ahnsou me Koht padahkiong ih en wiahla soukohp men?

⁵ Erein poadoapoad en aramas akan, sapwellimen Siohwa ladu lelepek kan kin rapahki ahr peren mendahki irail kin lelong kahpwal akan. Ekei irail kin momour nan ahnsou me Siohwa kin ketin kadeikada aramas salelepek kan. Seremaia oh ekei ienge kan, iangahki Kristian akan nan keieun senturi, kin wia tohnkaudok lelepek kan. Mehn kahlemeng pwukat en mahs me kileledi nan Pwuhk Sarawi kin kangoange kitail, oh kitail pahn paiekihda, ma kitail pahn onopki mehn kahlemeng mwahu pwukat. (Rom 15:4) Karasepe ieu, kitail pahn koasoia duwen Seremaia.

⁶ Ni ahnsou me Seremaia pwulopwul, e alehdi luhk en papah Siohwa nin duwen soukohp emen nan Suda. Met kaidehn pwukoa mengei ieu. Aramas tohto kin kaudokiong koht likamw akan. Mendahki Sosaia kin wiahla nanmwarki lelepek men ni ahnsou me Seremaia kin tepida wia ah doadoahk, nanmwarki kan mwurin Sosaia me salelepek, oh irail me kin ahneki pwukoa en kaweid aramas teikan​—⁠duwehte irail soukohp akan oh samworo kan​—⁠sohte kin utungada padahk mehlel. (Seremaia 1:1, 2; 6:13; 23:11) Eri, ia pepehm en Seremaia ni ahnsou me Siohwa padahkiong ih en wiahla soukohp men? E masapwehkada! (Seremaia 1:8, 17) Seremaia tamanda ah tepin sapengki Siohwa: “I ahpw sapeng patohwan, ‘Maing Kaun, Wasa Lapalahpie, ia duwe, pwe I sohte kin ese pato; I me nohn pwulopwul.’ ”​—Seremaia 1:6.

7. Soangen aramas dah kei Seremaia tuhwong nan eh wasahn kalohk, oh dahme e men wia?

⁷ Pali laud en aramas akan me Seremaia kin kalohk ong sohte kin perenki rong, oh e kin kalapw lelong uhwong laud. Ehu ahnsou, Pasuhr, samworo men woki ih oh selikihdi selmete. Seremaia kasalehda duwen ah pepehm ni ahnsowo: “Ahpw ni ei kin patohwan, “I solahr pahn tamanda [Siohwa], oh I solahr pahn kokohp ni mware.’ ” Mwein ekei pak ke pil kin ahneki soangen pepehm wet​—me kitail solahr men wia doadoahk en kalohk. Ahpw, tehk dahme sewese Seremaia en dadaurete. E nda: “Eri, iei ahnsou me sapwellimomwi mahsen kin rasehng kisiniei me lullul nan kapehdi, oh kin ngkengken nan tih kat en paliwereiet. I kin nantihong kolediong loalei ahpw I kin sohla kakohng kolokol loalei.” (Seremaia 20:9) Mahsen en Koht kin pil kamwekid uhk duwehte e kin kamwekid Seremaia?

Iengen Seremaia kan

8, 9. (a) Luwet dahieu me soukohp Uraia kasalehda, oh met kin imwikihla dah? (b) Dahme kahrehda Paruk kin pahtoula, oh sawas dahieu kohwong ih?

⁸ Seremaia sohte kelepw ni ahnsou me e kin wia doadoahk en soukohp men. Mie ienge kan me kin kangoange ih. Ahpw, ekei ahnsou, ienge kan sohte kin wia arail pilipil ni elen loalokong. Karasepe ieu, ienge soukohp emen me adaneki Uraia kin soupisengkihla wia eh doadoahk en kokohp kehlail ong tohn Serusalem oh Suda, oh “e pil kin kohpada soangohte me Seremaia kohpadahr me uhwong kanihmw wet.” Ahpw, ni ahnsou me Nanmwarki Sehoiakim koasoanehdi pwehn kemehla Uraia, soukohp menet masapwehkada oh sopolahng Isip. Met sohte sewese ih pwehn mourla. Sounpei kan en nanmwarkio pwakih Uraia oh re parokedi ih oh kapwuredohng Serusalem, oh iei wasa me e kamakamala. Met kin wia mehkot inenen kapwuriamwei ong Seremaia!​—Seremaia 26:20-​23.

⁹ Pil emen iengen Seremaia, iei sapwellime sekretari, Paruk. Paruk kin wia sewesepen Seremaia kaselel men, ahpw ehu ahnsou e pil sohte doadoahngki eh madamadau en pali ngehn en kaweidih ih ni ah kin kilangwong irair akan me e kin pein lelohng. E tepida kaulimki: “Kauno pil ketikidohng ie pahtou pwehn kalaudehla ei kahpwal akan. Solahr angi pwehki ei weirek, oh I solahr kak kommoal.” Paruk ni ahnsou me e pahtoula tepida sohlahr kesempwaliki mehkan ni pali ngehn. Ahpw, Siohwa ni kadek ketikihong Paruk kaweid, oh met kin sewese ih en kawekila eh madamadau. Koht pil kamehlelehiong ih me e pahn pitsang kamakamalahn Serusalem. (Seremaia 45:1-5) Seremaia kin alehdi kangoang laud ni ahnsou me Paruk pwurehng ahnekier ah kin toupahrek ni pali ngehn!

Siohwa kin Sewese Sapwellime Soukohp, Seremaia

10. Inou dah kei me Siohwa inoukihong Seremaia?

¹⁰ Ahpw, me keieu kesempwal en tamanda, Siohwa sohte kesehla Seremaia. E kin wehwehki duwen pepehm akan en sapwellime soukohp oh e ketikihong ih kehl oh sawas. Karasepe ieu, ni ahnsou me Seremaia tepida eh doadoahk en soukohp, e kin peikasalki wia doadoahk wet pwe e lemeleme me e sohte kakong, ahpw Siohwa mahsanihong ih: “Ke dehr masak irail, pwe I pahn kin ieiang uhk oh sinsileiuk. Ngehi, Kauno, me mahmahsen!” Eri, mwurin Siohwa ketikihong sapwellime soukohp pwukoa ieu me e pahn wia, Siohwa mahsanih: “Koaros pahn uhwong uhk, ahpw re sohte pahn kaloweiukedi, pwe I pahn kin ieiang uhk oh sinsileiuk. Ngehi Kauno me mahmahsen. ” (Seremaia 1:8, 19) Ia uwen kansenamwahu mahsen pwukat! Siohwa kapwaiada sapwellime inou.

11. Iaduwen kitail kin ese me Siohwa kapwaiada sapwellime inou me e pahn ketin sewese Seremaia?

¹¹ Eri, mwurin Seremaia selikihdi selmete oh wehi pokon kapailoke ih, ni likilik e kak nda met: “Ahpw, Maing Kaun, komwi ketin ieiang ie, komwi me roson oh manaman, oh irail kan me kin pwakipwakih ie pahn dipekelekel oh pwupwudi. Re pahn sarohdi kohkohlahte pwehki ar sohte kak poweiehdi. Arail saroh sohte pahn manokonokla kohkohlahte.” (Seremaia 20:11) Nan sounpar en mwuhr kan, ni ahnsou me aramas song en kemehla Seremaia, Siohwa kin ieiang ih, oh duwehte Paruk, Seremaia pil pitsang kamakamalahn Serusalem nin duwen ohl saledek men, ahpw aramas akan me kaloke ih oh me kin pohnsehsehla ah kokohp kan kamakamala de selidier nan Papilon.

12. Mendahki kahrepe kan atail kin pahtoukihla kalokolok kan, dahme kitail anahne en medemedewe?

¹² Rahnwet, Sounkadehdehn Siohwa tohto kin dadaurete mendahki kalokolok kan me kin lelohng irail, duwehte Seremaia. Nin duwen dahme kitail koasoiaier mwowe, ekei kalokolok kan kin wiawi pwehki pein atail soh unsek kan, liseliping en sampah wet, oh pil sang rehn aramas akan me kin uhwong atail doadoahk. Kalokolok pwukat kak kahrehong kitail en pahtou. Duwehte Seremaia, mwein kitail pil kin tepida medemedewe ma kitail kak pousehla wia atail doadoahk en kalohk. Ni mehlel, kitail kak kasik me ekei ahnsou kitail pahn pahtoula. Ni ahnsou me kitail kin pahtoula, met kin wia kasongpen ia uwen loal atail limpoak ong Siohwa. Eri, kitail en dehr mweidong atail kin pahtoukihla kalokolok pwukat en kauhdi kitail sang wia sapwellimen Siohwa doadoahk, me wehwehki kitail en weksang Uraia. Ahpw, kitail en kahlemengih Seremaia oh likih me Siohwa pahn ketin sewese kitail.

Iaduwen Kitail Kak Powehdi Atail Kin Pahtouki Kalokolok kan

13. Iaduwen kitail kak kahlemengih mehn kahlemeng mwahu kan en Seremaia oh Depit?

¹³ Seremaia kin kalapw kapakap ong Siohwa Koht, oh e kin kasalehong ih duwen ah pepehm loal kan oh pekihda reh en kakehlahda ih. Met iei mehn kahlemeng mwahu ieu ong kitail en alasang. Depit pil kin sohpeiwong Utupen kehl ohte, oh e ntingihdi met: “Maing Kaun, komw ketin karonge ei pato kat oh pil ei tungoal sengloal. Maing ei Koht oh ei nanmwarki, komw ketin karonge ngilen ei pek sawas!” (Melkahka 5:1, 2) Nting kan duwen mouren Depit kin kasalehda me Siohwa kin ketin sapengki kapakap kan me Depit kin wia ni ah kin peki sawas rehn Koht. (Melkahka 18:1, 2; 21:1-5) Duwehte kitail, ni ahnsou me atail kahpwal akan kin wiahki mehkot me nohn laud ong kitail oh mwomwen kitail sohte kak powehdi atail kahpwal akan, inenen kansenamwahu ma kitail pahn sohpeiong Siohwa ki kapakap oh kasalehiong ih atail pepehm loal kan. (Pilipai 4:6, 7; 1 Deselonika 5:16-​18) Siohwa sohte kin pohnsehsehla atail kapakap kan. Ahpw, E kin ketin kamehlelehiong kitail me ‘eh kin ketin apwahpwalih kitail.’ (1 Piter 5:6, 7) Ahpw, iaduwen​—⁠e pahn pwung ma kitail pahn kapakap ong Siohwa oh mwurin mwo kitail sohte men rong oh kapwaiada sapwellime mahsen kan?

14. Ni ahl dahieu sapwellimen Siohwa mahsen kin kamwekid Seremaia?

¹⁴ Iaduwen Siohwa kin mahsan ong kitail? Eri, pwurehng medemedewe duwen Seremaia. Pwehki Seremaia soukohp emen, Siohwa kin mahsan ong ih. Seremaia kin kawehwehda duwen iaduwen sapwellimen Koht mahsen kan kin kamwekidada ah mohngiong: “Komwi ketin mahsendohng ie, I ahpw pahn kanahieng rong sapwellimomwi mahsen kan koaros. Komw ketin sapwellimankin ie, Maing Kaun, Koht Wasa Lapalahpie, iei me sapwellimomwi mahsen kan kadirehkilahr nan mohngiongi peren oh nsenamwahu.” (Seremaia 15:16) Ei, Seremaia kin perenki ah pwukoa en weuwa mwaren Koht, oh sapwellimen Koht mahsen kan kin wia mehkot kesempwal ong soukohpo. Eri, duwehte wahnpoaron Pohl, Seremaia kin ngoangki kapwaiada ah pwukoa en lohkiseli rongamwahuo.​—Rom 1:15, 16.

15. Iaduwen kitail kak kahrehong sapwellimen Siohwa mahsen kan en mih nan mohngiongatail kan, oh dahme kitail kak medemedewe duwen pwen sewese kitail en dehr nennenla?

¹⁵ Rahnwet, Siohwa sohte kin pein mahsan ong aramas akan. Ahpw, kitail kak wadek sapwellimen Koht mahsen kan nan Pwuhk Sarawi. Eri, ni atail kin mehlel ong atail onop Pwuhk Sarawi oh doudouloale, sapwellimen Koht mahsen kan pahn kahrehong mohngiongatail en direkihla “peren oh nsenamwahu.” Oh kitail kin perenkihda weuwa mwaren Siohwa ni ahnsou me kitail kin ehukihong aramas teikan duwen mahsen en Koht. Kitail en dehr manokehla me sohte aramas nin sampah wet me kin lohkiseli mwaren Siohwa. Ihte sapwellime Sounkadehde kan me kin lohkiseli rongamwahu en sapwellimen Koht Wehi me koukoudaher oh irail kin padahkiong aramas mpahi kan en wiahla tohnpadahk kan en Sises Krais. (Madiu 28:19, 20) Ia uwen kaperen ong kitail! Ni atail kin medemedewe duwen pwais kaselel wet me Siohwa ketikihong kitail, iaduwen kitail kak nennenla?

Kanahieng Ihs me Kitail Kin Werekiong

16, 17. Ia madamadau en Seremaia me kin pid werekiong aramas akan, oh iaduwen kitail kak kahlemengih ih?

¹⁶ Seremaia kin koasoia duwen mehkot me kin sewese ih en eimah. E mahsanih: “I sohte iang aramas teikan kauwehla mwahl ei ahnsou, pereperenki peren mwahl akan oh kokouruhr mwahl. Pwe I en kapwaiada doadoahk me komwi ketikihong ie, I kin kelekelehpw nan ei lingeringer.” (Seremaia 15:17) Seremaia kin kelekelehpw pwe e sohte men patehng aramas suwed akan, e sohte men kauwehla ah tiahk mwahu kan. Rahnwet, kitail kin pil ahneki soangen madamadauohte. Kitail sohte kak manokehla kaweid en wahnpoaron Pohl, “werekiong aramas suwed kan kin kauwehla tiahk mwahu,” mendahki kitail kin tiahk mwahu erein sounpar tohto.​—1 Korint 15:33.

¹⁷ Werek suwed kin kak kahrehong ngehn en sampah wet en kasaminehla atail madamadau kan. (1 Korint 2:12; Episos 2:2; Seims 4:4) Eri, kitail en kaiahnehda atail kehl en kasawihada ihs me wia werek suwed ong kitail oh dehr patehng irail. (Ipru 5:14) Ma Pohl momour nan sampah rahnwet, dahme ke lemeleme e pahn ndaiong Kristian emen me kin kilang kasdo en tiahk samin de kasdo en tiahk lemei de kasdo en mahwen de kilang mwadong keper kan? Ia mwomwen e pahn kaweid emen brother de sister me kin werekiong aramas akan me e sehse nan Internet? Dahme e pahn medemedewe duwen emen Kristian me kin kesehla aua tohto mwadongki mwadong kan en video games de kilikilang TV, ahpw e sohte kin kolokol ah koasoandi mwahu en onop Pwuhk Sarawi?​—2 Korint 6:14b; Episos 5:3-5, 15, 16.

Mihmihte nan Paradais en Ngehn

18. Dahme pahn sewese kitail en kolokolte atail kehl ni pali ngehn?

¹⁸ Kitail kin kesempwaliki atail paradais en ngehn. Rahnwet, sohte mehkot kin duwehte paradais wet. Aramas soh pwoson akan kin pil kasalehda me irail kin kasawih me Kristian mehlel akan kin kasalehda limpoak, nsenoh oh kadek nanpwungarail. (Episos 4:31, 32) Ahpw, ahnsouwet, kitail anahne powehdi atail pepehm en pahtou oh nsensuwed, oh anahn wet me inenen laud sang mahs. Werek mwahu, kapakap, oh wiahki ahnepatail en onop Pwuhk Sarawi ahnsou koaros pahn kak sewese kitail en kolokolte atail kehl ni pali ngehn. Mehpwukat koaros pahn kakehlada kitail en powehdi kasongosong kan koaros ni atail kin likih Siohwa ni unsek.​—2 Korint 4:7, 8.

19, 20. (a) Dahme pahn kak sewese kitail en dadaur? (b) Artikel en mwurin met kin wiawihda ong ihs, oh ihs me pil pahn perenki wadek artikel wet?

¹⁹ Kitail en dehr mweidong aramas akan me kin kailongki atail padahk kan sang nan Pwuhk Sarawi en kamasapwehki kitail de kaluwetala atail pwoson. Duwehte irail imwintihti kan me kin kaloke Seremaia, aramas akan me kin uhwong kitail wehwehki irail kin pelian Koht. Irail sohte pahn pweida. Siohwa kin kehlail sang atail imwintihti kan, oh E mahsanihong kitail met: “Likih Siohwa; oh dehr nan kapehd tikitikla. Ei, likih Siohwa.” (Melkahka 27:14, NW) Pwehki atail kin likih Siohwa kin tengedi nan atail mohngiong, kitail en koasoanehdi nan kapehditail me kitail sohte pahn kesehla wia dahme pwung. Kitail en likih, duwehte Seremaia oh Paruk, me kitail pil pahn dolung kapai tohto ma kitail sohte pahn pwangada.​—Kalesia 6:9.

²⁰ Powehdi arail pepehm en pahtou oh nsensuwed kin wia kahpwal ong Kristian tohto. Pwulopwul kan kin pil lelong kahpwal akan. Ahpw, irail pil arail ahnsou mwahu kan. Artikel en mwurin met wiawihda ong irail me pwulopwul kan nanpwungatail. Ahpw, irail akan me pahn pil perenki wadek artikel en mwurin met iei irail pahpa oh nohno kan oh irail me laud kan koaros nan mwomwohdiso me inoukihong Siohwa arail mour, oh me kak sang arail lokaia kan, wiewia kan, sewese irail me pwulopwul kan nan mwomwohdiso.

Iaduwen Ke Pahn Sapeng?

• Dahme kahrehda kitail kak kasik irair kansensuwed akan en wiawiong kitail, oh kitail anahne en rapahki sawas sang rehn ihs?

• Iaduwen Seremaia powehdi ah pahtou kan edetehn e aleier pwukoa apwal ieu?

• Dahme pahn kahrehong mohngiongatail en ‘peren oh nsenamwahu’ mendahki kitail kin lelohng kahpwal akan?

[Kilel nan Pali 18]

Seremaia lemeleme me e nohn pwulopwul oh soh koahiek en wiahla soukohp emen

[Kilel nan Pali 20]

Edetehn Seremaia kin lelohng kalokolok kan, e ese me Siohwa ‘kin ketin ieiang ih”