Padahkih Noumw Seri Kan

Seremaia Sohte Uhdi

MIE pak ke kin nsensuwedla oh men uhdi sang wia mehkot?. . .a Me tohto kin wia met. Seremaia wia met ni eh pwulopwul. Ahpw e sohte mweidohng dahme meteikan kin nda de wia en kauhdi ih. Eri kitail pahn koasoia ia duwen Seremaia wia emen me Koht kin ketin kesempwalki ahpw e ahnekihda pepehm en men uhdi.

Mwohn Seremaia ipwidi, Koht mehlel Siohwa ketin pilada ih en wia soukohp men pwehn padahkihong aramas akan me irail sohte kin kaperenda Koht. Ke ese dahme Seremaia ndaiong Siohwa sounpar kei mwuri?. . . “I sohte kin ese pato; I me nohn pwulopwul.”

Ke ese ia mwomwen Siohwa ketin sapeng Seremaia?. . . E mahsanih ni kadek ahpw inen: “Ke dehr nda me ke me nohn pwulopwul, ahpw kohweite rehn aramas akan me I kadarewohng uhk rehrail, oh kasalehiong irail mehkoaros me I pahn padahkihong uhk. Ke dehr masak irail.” Dahme kahrehda? Siohwa mahsanih: “I pahn kin ieiang uhk oh sinsileiuk.”​—Seremaia 1:4-8.

Ahpw nin duwen me sansalda mwowe, Seremaia nsensuwedla mwuhr. Met pwehki aramas kin kapailoke ih pwehki e kin papah Koht. E nda: “Aramas koaros kin kapailoke ie; re kin kokouruhr kin ie rahn ehu pwon.” Ih eri lemehda en uhdi. E nda: “I solahr pahn tamanda [Siohwa], oh I solahr pahn kokohp ni mware.” Ahpw ia duwe, e uhdahn uhdi?

Seremaia nda: “Sapwellimomwi mahsen kin rasehng kisiniei me lullul nan kapehdi, oh kin ngkengken nan tih kat en paliwereiet. I kin nantihong kolediong loalei ahpw I kin sohla kakohng kolokol loalei.” (Seremaia 20:7-9) Mendahki ekei pak Seremaia kin masepwehkada, eh limpoak ong Koht sohte kin mweidohng ih en uhdi. Kitail pahn kilang ia duwen Seremaia ale perepe pwehki e sohte uhdi.

Siohwa mahsanihong Seremaia en padahkihong aramas akan me Serusalem pahn ohla ma irail sohte wekidala arail mour suwed. Ni ahnsou me Seremaia ndaiong irail duwen met, aramas ako lingeringerda oh nda: “Aramas menet konehng en kamakamala.” Ahpw Seremaia peki rehrail en “peikiong mahsen en KAUN-O.” Ih eri nda: “Kumwail en ese met: ma kumwail pahn kemeiehla, kumwail oh aramas en kahnimw wet pahn pwukoahkihdi kamakamalahn aramas soh dipe men, pwe KAUN-O me ketin poaroneiehdo.” Ke ese dahme wiawi mwurin mwo?. . .

Paipel mahsanih: “Kaun ako oh aramas ako ahpw mahsanihong samworo ko oh soukohp ko, ‘Ohl menet sohte konehng en kamakamala, pwe e mahmahseniong kitail ni mwaren KAUN-O, atail Koht.’” Eri pwehki Seremaia sohte mweidohng eh masak en kauhdi ih, Siohwa ketin pere ih. Met kitail pahn kilang dahme wiawihong Uraia, pil emen sapwellimen Siohwa soukohp me eh mwekid inenen weksang en Seremaia.

Paipel mahsanih: ‘Uraia pil kohpada soahngohte me Seremaia kohpadahr me uhwong kahnimw wet.’ Ahpw ni ahnsou me Nanmwarki Sehoiakim lingeringerda pahn Uraia, ke ese dahme Uraia wia?. . . E masepwehkada oh uhdihsang wia kupwuren Koht oh tang kohkohla nan Isip. Nanmwarkio eri kadarala ohl ekei pwehn rapahki ih oh kapwurehdo. Ni ahnsou me re wia met, ke ese dahme nanmwarki suwed menet wia?. . . E doadoahngki kedlahs oh kemehla Uraia!​—Seremaia 26:8-24.

Ia omw madamadau, dahme kahrehda Siohwa ketin pere Seremaia ahpw e sohte ketin pere Uraia?. . . Mwein Seremaia pil masepwehkada duwehte Uraia, ahpw Seremaia sohte uhdihsang eh papah Siohwa oh tang. E sohte uhdi. Dahme ke lemeleme kitail kak sukuhlki sang Seremaia?. . . Ekei pak kitail kak apwalki wia dahme Koht mahsanih, ahpw kitail anahne ahnsou koaros likih oh peikiong ih.

[Nting tikitik me mi pah]

Peidek kan:

○ Doadoahk dahieu me Siohwa ketikihong Seremaia?

○ Dahme kahrehda Seremaia men uhdi?

○ Dahme kahrehda Siohwa ketin pere Seremaia ahpw e sohte ketin pere Uraia?

○ Dahme ke sukuhlki sang Seremaia?