Mahsen en Siohwa Kin Ieias
Ire Kesempwal akan Sang nan Pwuhken Seremaia
IAWEN ah inenen kapwuriamwei mwomwen ngohr me pid apwal akan me Seremaia kalohkihda ohng pein ah aramas akan! Imwen kaudok lingano me wia pesen kaun ohng arail kaudok ki erein pahr tohtohsang 300 pahn isihsla oh mwerediong nanpwel. Kahnimw en Serusalem oh sapwen Suda pahn sohla kanenge, towe kan pahn kolokoldi oh kalipiliplahsang sapwarailo. Intingdien mepwukat oh pil mahsen en kadeik teikan pwaradahr nan pwuhk en Paipel me keriau-en-laud, me ede pwuhken Seremaia. E pil koasoia dahme pein Seremaia lelong ni ah lelepek oh wiewia ah doadoahk en kalohk ni erein sounpar 67. Mahsen kan en nan pwuhko kin kileledi, kaidehn nin duwen irekidi en pahr akan ahpw ni irekidien mour en oaralap akan.
Dahme kahrehda kitail kin men esehki audepen pwuhken Seremaia en Paipel? Pweidahn kokohp akan kin wia kakehlepen atail pwoson Siohwa me Soun kapwaiada sapwellime inou kan. (Aiseia 55:10, 11) Ahn Seremaia doadoahk nin duwen ah wia soukohp emen oh madamadau en aramas akan ohng audepen dahme e lohlohkiseli kin duwehte ire kan nan atail rahn akan. (1 Korint 10:11) Patehng met, mahsen ntingdi pwukat me pid iaduwen sapwellimen Siohwa wiewia ohng sapwellime aramas akan kin oaralapihada duwen sapwellime irair akan oh pahn inenen dokedoke atail elen momour.—Ipru 4:12.
“SOAHNG SUWED RIAU ME SAPWELLIMEI ARAMAS AKAN WIADAHR”
(Seremaia 1:1–20:18)
Poangoak kohieng Seremaia en wia soukohp emen nan irair en pahr kaeisek siluh en kaundahn Sosaia, nanmwarki en Suda, sounpahr 40 mwohn ohlahn Serusalem me wiawi nan pahr 607 B.C.E. (Seremaia 1:1, 2) Pali laud en kalohkadah kan wiawihier erein sounpahr 18 kan me luhluhwe nan kaundahn Sosaia oh kin kasalehda ahn Suda suwed akan oh kasalehda duwen sapwellime Siohwa mahsen en kadeik ohng ih. Siohwa ketin poahngoki: “I pahn wiahkihla Serusalem koasoakoasoak en ihmw ohla kei, wasahn kousoan en kidi en wel kan; kahnimw kan en Suda pahn wiahla sapwtehn, wasa me sohte aramas kin kousoan ie.” (Seremaia 9:11) Pwekida? E mahsanih: “Pwe nei aramas akan wiadahr dihp riau.”—Seremaia 2:13.
Mahseno pil doke duwen kapwurpwurdohng luhwen irail me koluhlahr akan. (Seremaia 3:14-18; 12:14, 15; 16:14-21) Soun wa mahseno me sekeniken pahn aramas akan. “Soumas lapalap men nan Tehnpas Sarawio” keme Seremaia oh selikihdi selmete erein pwohng pwon.—Seremaia 20:1-3.
Pasapengpen Peidek kan me Pid Duwen Iren Paipel kan:
1:11, 12—Dahme kahrehda sapwellimen Siohwa mwasamwasahn duwen sapwellime mahsen kin pid duwen “rahntuhke almond pwoat”? Tuhkehn almond wia ehu tuhke me kin keieu mwadang masal nan spring. Siohwa ni karasaras ketin pwourda mwadang oh “kadarala [sapwellime] soukohp kan” pwehn panawih sapwellime aramas akan duwen sapwellime kadeik kan oh “mwasamwasahn” lao lel re pahn pweida.—Seremaia 7:25.
2:10, 11—Dahme kahrehiong ahn mehn Israel salelepek kan ar wiewia kan en tohrohr? Mendahki wehi kan me kaudokiong koht teikan en palikapi, sellahng Saiprus [‘Kittim,’ NW] oh palimese sellahng Kedar kin wahdo dikedik en koht likamw akan en wehi teikan pwehn kapatahiong pein arail koht akan, madamadau en weliankihdi douluhl arail koht akan ki koht en wehi teikan mehkot me aramas akan saikinte rong kin wiawi. Ahpw mehn Israel akan sohpeiweisangehr douluhl Siohwa, oh weliankihdi lingan en Koht ieias dikedik en eni kan me sohte arail mour.
3:11-22; 11:10-12, 17—Dahme kahrehda Seremaia kapatahkihiong keinek-eisek en palieiro nan lohk en kadeik me e wia, mendahte Sameria ohlahr nan pahr 740 B.C.E.? Met pwehki ohlahn Serusalem nan pahr 607 B.C.E. wia sapwellimen Siohwa wiepen kadeikpen wehin Israel pwon, kaidehn ohng Suda kelehpw. (Esekiel 9:9, 10) Patehng met, kamwahu oh inou koaros en keinek eiseko mwurin ahr pwupwudier wie manamante nan Serusalem, pwehki soun kair en sapwellimen Koht soukohp akan kin pil kohsang rehn keinek-eiseko.
4:3, 4—Ia wehwehn poangoak wet? Mehn Suhs salelepek kan anahne ren kaunopada, kamwuterekihada oh kamwakelehda mwaht nan mohngiongirail kan. Irail pahn sirkumsaisih mohngiongirail akan, me wehwehki kesehla madamadau oh pepehm suwed. (Seremaia 9:25, 26; Wiewia 7:51) Met kin anahne wekidala ahn emen elen mour—weksang ni mehkot suwed oh uhd wia dahme kin wahdo sapwellimen Koht kapai.
4:10; 15:18—Soangen ahl dah me Siohwa ketin liepedier sapwellime aramas kan me kesehla ih? Nan mwein Seremaia, mie soukohp akan me kin wiewia ‘kokohp likamw.’ (Seremaia 5:31; 20:6; 23:16, 17, 25-28, 32) Siohwa sohte ketin irehdi irail sang kalokalohkih rohng sapwung pwukat.
16:16—Ia wehwehn me Siohwa ketin “kadarewei soused tohto” oh “sounkesik tohto”? Met mwein wehwehki en kadarala imwintihti kan pwehn rapahki mehn Suhs salelepek kan pwe Siohwa pahn kadeikada irail. Ahpw, nin duwen Seremaia 16:15 koasoia, iretikitik pwukat pil kak wehwehki en rapahki mehn Israel kan me koluhla.
20:7—Ni ahl dah me Siohwa ketin doadoahngki sapwellime roson oh pelianiki Seremaia oh liepehdi ih? Pwehki Seremaia ah lelohng irair me aramas akan kailongki, mwamwahliki, oh kaloke ih ni ah kalokalohkiseli sapwellimen Siohwa mahsen en kadeik kan, Seremaia ahneki pepehm me solahr ah kehl en pousehlahte wia doadoahk wet. Ahpw, Siohwa ketin doadoahngki sapwellime roson oh pelianiki soangen pepehm pwukat oh kamanahiong Seremaia en doulahte mwomwe. Eri, Siohwa ketin liepehdi Seremaia ni ah ketin doadoahngki ih en wiahda dahme soukohp pein lemehiong me e sohte kak wiahda.
Mehn Kasukuhl kan ong Kitail:
1:8. Ekei pak Siohwa kakete kapitala sapwellime aramas akan sang nan kalokolok—mwein ele ni ah pahn ketikihda sounkopwung kan me ahneki madamadau toupahrek, ni ah kin ketin weliankihdi aramas lapalap lemei kan ki irail me arail madamadau kin ahneki madamadau toupahrek, de ni a kin ketikihong sapwellime tohn kaudok kan kehl en dadaur pahn kalokolok.—1 Korint 10:13.
2:13, 18. Mehn Israel salelepek kan wiahdahr sohng riau me suwed. Irail kesehla Siohwa me iei utupen elen kapai, kaweid,oh perepe mehlel. Oh irail wiahiong pein irail arail wasahn nahk pihl, ni karasaras, ni arail rapahki pwe irail en miniminiong pelien sounpei en wehin Isip oh Asiria. Nan atail ahnsou, en kesehla Koht mehlel pwe kitail en pwerikihla ahn aramas elen madamadau ki loalokong kan oh palien politik en sampah kan, e kin duwehte weliankihdi “utupen pilen komour” ki “wasahn nahk pihl ohla kan.”
6:16. Siohwa ketin kaweidki sapwellime aramas salelepek kan ren uhdi mahs kasawih pein irail, oh rapahki elen pwurodo ong “nan ahlo” en arail pahpa kahlap lelepek ko. Iaduwen, kitail konehng en kin pein kasawih kitail ni ehu ehu ahnsou pwe kitail en kilang ma kitail wie alialuhweite nan ahl me Siohwa kupwurki kitail en alu ie?
7:1-15. Ahn mehn Suhs akan ar kin wiahki me imwen kaudok me irail koapworopworki, mehn silasil ohng irail, sohte doareirailla. Kitail kin alialuhki pwoson, ah kaidehn kilang.—2 Korint 5:7.
15:16,17. Kitail pil duwehte Seremaia, me kak peiong atail madamadau en mworus. Kitail kak wia met ki atail pahn kin pereperenki atail pein wia atail onop en Paipel, oh ki atail kalohki mwaren Siohwa, oh ki atail en kadohwaneweisang kitail werek suwed.
17:1, 2. Dipen aramas en Suda kan wiahiong arail meirong kan Siohwa ketin kalahdeki. Wiewia samin kin kahrehiong atail meirong en kaping ah kin sohla katepe.
17:5-8. Aramas oh koasoandi en aramas kin konehngete kitail en liki ma arail wiewia kin pahrekiong kupwuren Koht oh sapwellime mour en kaweid sarawi kan. Ohng mehkan me pid komour oh meleilei oh popohl mehlel, e pahn mwahu ma kitail liki Siohwa kelehpw.—Melkahka 146:3.
20:8-11. Kitail dehr mweidohng salamalam,uhwong, de kamakam en katikala atail ngoangki doadoahk en lohki Wehio.—Seims 5:10, 11.
“KIHIONG TEPIN WARAMWAIL AKAN PAHN MEHN WISIK EN NANMWARKI EN PAPILON”
(Seremaia 21:1–51:64)
Seremaia wadohng mahsen en kadeik ong keimwiseklahn nanmwarki pahmenoko en wehin Suda oh pil iangahki soukohp likamw akan, silepen sihpw suwed akan, oh samworo mwersuwed akan. Ohng irail luwen aramas lelepek kan me rasehng tuhke pik akan, Siohwa mahsanih: “I pahn sinsile irail.” (Seremaia 24:5, 6) Kokohp siluh me mih nan irelaud 25 kin oaralapihada mahsen en kadeik kan me irelaud en mwurin met akan kin mahsanihada ni ekis oaritik sang.
Irail samworo kan oh soukohp akan wiahda koasoandi mwersuwed pwe re song en kemehla Seremaia. Ahn Seremaia rohng kin pid me irail pahn papah nanmwarki en Papilon. Seremaia mahsanihong Nanmwarki Sedekaia: “Komw uhpahiong nanmwarkien Papilonia, papah ih.” (Seremaia 27:12) Ahpw “[Ih] me kasarepeseng mehn Israel kan, oh [Ih] pil pahn kapokoneirailpene.” (Seremaia 31:10) Inou ehu wiawihiong mehn Rekap kan, pwehki mie kahrepe mwahu. Seremaia kohieng “en ritidiong nan kelen tehnpaso.” (Seremaia 37:21) Serusalem ohlahr oh pali laud en towe kan kalipilipalahr. Seremaia oh nah sekteri, Paruk, iang irail oko me luhwehdi wasao. Mendahki Seremaia ah kehkehlikihong irail ren dehr kohla Isip, irail oko me masepwehkada sohte kapwaiada oh kohkohla Isip. Irelaud 46-51 mahsanih duwen lohk me Seremaia wia me pid duwen wehi kan.
Pasapengpen Peidek kan me Pid Duwen Iren Paipel kan:
22:30—Poangoak wet kasohrehla sapwellimen Sises Krais pwung en kesepwildahn nan mwoalen Depit? (Madiu 1:1, 11) Soh, e sohte. Poangoak wet irehdihsang kadaudoken Sehoiakin soulipilipil men en “kaunda Suda nin duwen wiliepen Depit.” Sises pahn ketin kakaun sang nanleng, kaidehn sang nan mwoalen nanmwarki nan wehin Suda.
23:33—Dahkot “mehn katoutouwih kupwur en KAUN-O”? Nan mwein Seremaia, mahsen toutou me soukohp wia me pid ohlahn Serusalem wia katoutou ieu ohng ienge tohn wehi kan. Kahrehda, irail aramas akan me sohte mwekidiki sapwellime mahsen akan kin wia katoutou ieu ohng Siohwa oh kahrehda ah pahn ketin keseirailla. Ni soangen mwohmwohte, kair me poahsoankihda pwuhk Sarawi me pid ohlahn Kristendom me wie kohkohdo wia katoutou ieu ohng Kristendom, oh pil aramas akan me sohte kin karonge kairo kin wia mehn kupwur suwed ohng Koht.
31:33—Iaduwen sapwellimen Siohwa kosonned ah ntingihdi nan mohngiong kan? Ni ahnsou me aramas emen kin poakohng sapwellimen Koht kosonned inenen laud me kahrehiong en kin ahneki ineng kehlailla en wia kupwuren Siohwa, kitail kak nda me kosonned en Koht kin ntingihdi nan mohngiongi.
32:10-15—Ia kahrepen en wiahda doaropwehn inou riau ohng netinet ieu? Doaropwehn inou me luhluhwehu oh papahkpeseng, wia mehn aramas en pwurehng tehksapahl mwuhr. Doaropwehn inou me katengtengpene wia mehn kadehdehpen mehlel en kisin likou me luhwe oh kin papahkpesengo. Seremaia kihdier mehn kahlemeng ohng kitail duwen dahme kitail en wia mendahte ma e kin pid kitail ong kisehtail akan oh iangatail akan nan pwoson.
33:23, 24—Mehnia “peneinei riau” me wasaht koasoakoasoia? Ehu iei peneinei soupeidi me kohsang ni kadaudok en Nanmwarki Depit, ah meteio, iei peneinei en samworo en kadaudok en Aaron. Pwehki ohlahn Serusalem oh sapwellimen Siohwa tehnpas sarawio, e mwomwen me Siohwa ketin soikala peneinei riau wet oh sohla pahn sapwellimaniki wehi ieu nan sampah de pil kapwurehda sapwellime kaudok.
46:22—Dahme kahrehda ngilen wehin Isip duwehte ngilen sineik? Met kakete wehwehki ngilen masepwehkada oh pwurasang de ngilen karakarahkala en wehio pwehki apwal me lelohng ih. Mehn karasaraso pil kin kasalehda ia wen mwahl en Parao kan en Isip ar kin mware kilel en sineik kan nan temwarail akan pwe dene arail koht-lih en sineik, Uatchit pahn pere irail.
Mehn Kasukuhl kan ong Kitail:
21:8, 9;38:19. Pil lel keimwiseklahn awa, Siohwa pil kin ketin langalangte ahnsou mwahu en pilipil ohng tohn Serusalem akan me saikinte koluhla kan, me pahn warohngehr mehla. Ei, “ih me uhdahn kupwurkalahngan.”—2 Samuel 24:14; Melkahka 119:156.
31:34. Ia wen kansenamwahu en ese me Siohwa sohte kin ketin pwurehng katamanda dipen irail oko me ketin mahkikihong irail akan, oh sohte pahn pwurehng kalokehkin irail ehu ahnsou mwuhr.
38:7-13;39:15-18. Siohwa sohte ketin likidmeliehla atail tungoal papah lelepek, me pil iangahki ‘sawas me kumwail kasalehiong riamwail Kristian kan.’—Ipru 6:10.
45:4, 5. Duwehte irair en nan imwi rahn akan wehin Suda, momour nan “imwi rahn akan” en koasoandi wet wia ahnsou ieu me kitail dehr rapahki “kamwahu [‘soahng lapalap,’ NW]” kan, duwehte kepwehpwe, lapalap, de ahneki dipwisou tohto oh dene sohte kak apwalada.—2 Timoty 3:1; 1 Sohn 2:17.
“KELEN KAHNIMWO LANGADA”
(Seremaia 52:1-34)
Pahro iei 607 B.C.E. Sedekaia mihmi nan pahr kaeisek ehun sounpar ah wiewiahkiher nanmwarki. Nanmwarki Nepukadnesar en Papilon wia mahmahwenkihongehr Serusalem ki sounpwong 18. Ni keisuhwen rahn, ni kelimaun sounpwong, ni kaeisek duwaun sounpar en kaundahn Nepukadnesar, Nepusaradan, kaunen soun pisilei, ‘pedolong’ de leledohng Serusalem. (2 Nanmwarki 25:8) Ele mwein sang ni ah kahnimw en ihmw likou kan likin kelen kahnimw en Serusalem, Nepusaradan lipilipoahrokih kahnimwo oh wiewia pilahn akan ohng me e pahn wia. Mwurin rahn siluh, ni kaeisek en sounpwong, e ‘pedolong’ nan Serusalem. Oh “kelen kahnimwo langada.”—Seremaia 52:7, 12.
Seremaia koasoia ni oaritik duwen pwupwudi en Serusalem. Ah kawehwe kihda poahsoanpen kedepwidepw akan. Koasoi ntingda pwukat pwarada nan pwuhk en Paipel me mih mwurin met me adaneki Koulen Kedepwidepw kan.
[Kawehwehpen kilel kan nan ehu ehu pali 28]
Ahn Seremaia pakair kan kin pil pid sapwellimen Siohwa kadeik ohng Serusalem
[Kawehwehpen kilel kan nan ehu ehu pali 29]
Iaduwen Siohwa ‘doadoahngki sapwellime kehl ohng Seremaia’?
[Kawehwehpen kilel kan nan ehu ehu pali 30]
“I kupwukupwure me aramas ako me kalipilipalahr Papilonia, re duwehte wahntuhke pik mwahu pwukat.”—Seremaia 24:5