Seremaia Sohte Uhdihsang Koasoia Duwen Siohwa

Ekei pak aramas kin kapailoke de lingeringer pahtail ni atail kin koasoiaiong irail duwen Siohwa. Met kak kahrehiong kitail en men uhdihsang koasoia duwen Koht. Mie pak ke ahneki soangen pepehm wet?— Paipel mahsanih duwen pwutak men me poakohng Siohwa ahpw kereniong uhdihsang koasokoasoia duwen ih. Ede Seremaia. Nna, kitail pahn sukuhlki duwen ih.

Ni ahnsou me Seremaia wia pwutak men, Siohwa mahsanihong ih me e anahne padahkihong aramas kan ren uhdihsang wia dahme suwed. Met uhdahn apwal ong Seremaia oh e masak wia met. E ndaiong Siohwa: ‘I sehse dahme I pahn nda. I me nohn pwulopwul.’ Ahpw Siohwa mahsanih: ‘Ke dehr masak. I pahn sewese iuk.’

Eri Seremaia tepida padahkihong aramas kan me re pahn ale kadeik ma re sohte wekila. Ke leme aramas kan wia dahme Seremaia nda?— Soh. Irail kapailoke ih oh lingeringerda pah. Ekei pil men kemehla ih! Ke leme ia ahn Seremaia pepehm?— E masepwehkada oh nda: ‘I solahr pahn koasoia duwen Siohwa.’ Ahpw ia duwe, e uhdahn uhdi?— Soh. E uhdahn poakohng Siohwa kahrehda e sohte uhdihsang koasoia duwen ih. Oh pwehki Seremaia sohte uhdi, Siohwa ketin pere ih.

Karasepe, ehu pak ohl suwed kei koskihdihla Seremaia nan pwoar loal ehu me diren pwelmatak. Sohte kene mwenge oh nime pihl. Ohl pwukat men kihdihte Seremaia wasao en mehla. Ahpw Siohwa ketin sewese ih, oh e pitila!

Dahme ke kak sukuhlki sang mehn kahlemeng mwahu en Seremaia?— Mendahki e masepwehk ekei pak, e sohte uhdihsang koasoia duwen Siohwa. Ni ahnsou me ke kin koasoia duwen Siohwa, mwein aramas kan pahn kapailoke iuk de lingeringer pahmw. Mwein ke pahn namenekda de masepwehkada. Ahpw dehr uhdihsang koasoia duwen Siohwa. E pahn ketin sewese iuk ahnsou koaros, duwehte eh ketin sewese Seremaia.