Emen Ohl me Sohte Masapwehk

KILANG aramas kan kin kapailoke ohl mwanakapw menet. Ke ese ihs ih? Ede Seremaia. Ih emen soukohp kesempwal en Koht.

Mwehrinte Nanmwahrki Sosaia tapiada kawehla dikadik kan sang nan sahpwo, Siohwa padahkiong Seremaia en wia Sapwellime soukohp. Seremaia lemeleme me e nohn pwulopwul en wia emen soukohp. Ahpw Siohwa padahkiong ih me E pahn sewese ih.

Seremaia padahkiong mehn Israel kan en uhdi sang arail wiewia suwed kan. ‘Koht me tohn wehi kan kaudokiong me likamw,’ e indaiong irail. Ahpw mehn Israel tohto mwahuki kaudokiong dikadik sang kaudokiong Koht mehlel Siohwa. Ni ansou me Seremaia padahkiong aramas kan me Koht pahn kaloke irail pwehki arail wiewia suwed, irail kouruhrki ih.

Pahr kei dower powe. Sosaia mehla, oh sounpwong siluh mwuhri nah ohl Sehoiakim kasapwilda nanmwahrki. Seremaia kaukaule padahkiong aramas akan: ‘Serusalem pahn ohla ma kumwail sohte pahn koluhla sang omwail wiewia suwed kan.’ Samworo ko eri parokedi Seremaia oh weriwer: ‘Ke konehng en kamakamala pwehki ke pakapakairki mehpwukat.’ Irail eri padahkiong soupeidi kan en Israel: ‘Seremaia en kamakamala, pwehki e kin koasoaia mehkan pelianki atail kahnihmw.’

Dahme Seremaia pahn wia met? E sohte masapwehk! E padahkiong aramas kan: ‘Siohwa me poroneiehdo pwen pakairki mehpwukat ong kumwail. Ma kumwail sohte pahn wekila sang omwail wiewia suwed kan, Siohwa pahn kawehla Serusalem. Ahpw kumwail en kamehlele met: Ma kumwail pahn kameiehla, kumwail pahn kamehla aramas men me sohte wiahda sapwung.’

Soupeidi ko mweidong Seremaia en mour, ahpw mehn Israel kan sohte wekila sang ahr wiewia suwed. Mwuhri Nepukadnesar, nanmwahrki en Papilon, kohdo oh peiong Serusalem. Ni kaimwisekela, Nepukadnesar salihdi mehn Israel kan oh wiahkihla irail nah ladu. E wahwei kid kei ong Papilon. Nna medewela ia pahn duwe ma aramas men me ke sehse wahiuhkala sang nan ahmw wasa ong sahpw ehu me ke sahn!