Kumwail Me Pwulopwul Akan, Kumwail Kin Kaunopada Ong Ahnsou Kohkohdo?
“Ngehite me mwahngih koasoandi kan ong kumwail, koasoandien kapaikumwailda, ahpw kaidehn en kahpwalihkumwailla, koasoandi kan en ahnsou kohkohdo kan me kumwail kasikasik.”—SEREMAIA 29:11.
1, 2. Ni soangen ahl dah kei aramas kin kilangwong mour en irail me pwulopwul kan?
ARAMAS mah tohto kin medewehkiong me ahnsou me re pwulopwul kin wia ahnsou me keieu kaperen nan erein arail mour. Pwehki re kin tamanda duwen kehlail oh ngoang laud me re kin ahneki ahnsowo. Re pil kin tamanda ahnsou mwahu me re kin ahneki ahnsou re pwulopwul, ahnsou ieu me malaulau pwukoa me kin kohwong irail oh tohto ahnsou mwahu kan mih mwohrail.
2 Ahpw, ong kumwail me pwulopwul, mwomwen amwail kin kilang amwail mour ni ahnsouwet weksang me mah kan. Kumwail mwein kin ahneki kahpwal kan ong wekidekla kan me pid duwen amwail pepehm oh paliwaramwail kan. Nan sukuhl, mwein kumwail kin lelohng kahpwal me kin pid werek suwed. Kumwail mwein anahne koasoanehdi teng amwail madamadau pwe kumwail en kak nda soh ong wini suwed, sakau, oh dipen nenek. Tohto kumwail kin sohpoupali wiewia kan me kin pid politik de uhki wehi. Ehi, ni mehlel ahnsou me ke pwulopwul kak wia ahnsou apwal ieu. Ahpw, e pil kak wia ahnsou mwahu en wia soahng tohto nan mour. Ahpw, iaduwen ahmw pahn doadoahngki ahnsou pwukat?
Pereperenki Ahmw Pwulopwul
3. Kaweid dahieu Solomon kihong me pwulopwul kan?
3 Aramas mah kan pahn ndahiong uhk me ahnsou me ke pwulopwul pahn ong ahnsoukiste oh irail me pwung. Mwurin sounpar kei ke solahr pahn wia aramas pwulopwul men. Kahrehda, perenki erein ahmw wie pwulopwulte pwe e sohte pahn werei! Met iei kaweid en Nanmwarki Solomon me ntingihdi: “Mwahnakapw akan, kumwail pereperenki amwail pwulopwul. Kumwail pereperen nindokon amwail pwulopwul. Kumwail wia dahme kumwail inengieng, oh idawehn ineng en nan kapehdamwail kan. Ahpw, kumwail tamataman me Koht pahn ketin kadeikada amwail wiewia kan.” Ahpw, Solomon pil kalekehki me pwulopwul kan: “Dehr mweidohng mehkot en kapwunodeiuk de kamedekeiukala. Ke sohte pahn wie pwulopwulte ahnsou reirei.” Oh e pil kapatahiong: “Ahnsoun pwulopwul pahn kakete wia ahnsou mwahl oh soh katepe ieu.”—Eklesiasdes 11:9, 10.
4, 5. Dahme kahrehda e wia elen loaloakong ong irail kan me pwulopwul en kaunopdahng ahnsou kohkohdo? Kihda karasepe.
4 Ke wehwehki dahme Solomon nantiong padahkiong kitail? Pwehn karasahda met, medewehla ma emen me pwulopwul alehdi kisakis laud ieu, mwein sohso en mwohni laud ehu. Dahme e pahn wiaiong? Mwein e pahn kak doadoahngki koaros ong pein ih—duwehte koasoiepen pwutak salongala nan karasaras en Sises. (Luk 15:11-23) Ahpw, dahme pahn wiawi ni ahnsou mwohnio pahn nek? Ni mehlel, ih ahnsou me e pahn koluhkihla dahme e wia oh e pahn kilangada duwen ah soakoahiek! Ahpw ni pali teio, medewehla ma e ale kisakiso oh doadoahngki pwen kaunopada ong ahnsou kohkohdo, mwein e kihpeseng nan pangk oh kihdiong pwehn kak laudla. Nan ahnsou kohkohdo ni ah pahn tepida paieki nah sent kan me e nekidalahr, ke leme e pahn koluhkihla ah sohte doadoahngkihla koaros ong ih ni ahnsou e pwulopwulo? Uhdahn soh!
5 Medewehiong ahnsou ke pwulopwul me iei kisakis ieu sang rehn Koht, pwe ni mehlel met iei kisakis ehu sang reh. Iaduwen ke pahn doadoahngki met? Ke kak doadoahngkihla mwahl ahmw kehl oh ngoang ong pein kowe, sang ni ahmw pahn kedirepwkihla peren mwahl akan oh sohte medewe duwen ahnsou kohkohdo. Ahpw, ma ke pahn doadoahngkihla mwahl ahnsou me ke pwulopwul ong met, eri ahmw “pwulopwul oh mour” wia mehkot me “sohte katepe.” Ia uwen kesempwal en doadoahngki ahmw pwulopwul en kaunopada ong ahnsou kohkohdo!
6. (a)Mehnia kaweid en Solomon kin wia mehn kahluwa me pwulopwul kan? (b) Dahme Siohwa men wiaiong irail pwulopwul kan oh iaduwen irail kak paiekihda met?
6 Solomon kihda kaweid ehu me kak sewese iuk en mourki ahmw pwulopwul ni ahl keieu mwahu. E nda: “Eri, tamanda Sounwiepomw nin dokon omw wie pwulopwulte.” (Eklesiasdes 12:1) Kaweid wet iei ahl me pahn kahluwalahng pweida mwahu—en rong Siohwa oh kapwaiada sapwellime kupwur kan. Siohwa padahkiong mehn Israel kan en mahs dahme e pahn wiaiong irail: “Ngehite me mwahngih koasoandi kan ong kumwail, koasoandien kapaikumwailda, ahpw kaidehn en kahpwalihkumwailla, koasoandi kan en ahnsou kohkohdo kan me kumwail kasikasik.” (Seremaia 29:11) Siohwa pil men kihong uhk ahmw “mour oh koapworopwor ni ahnsou kohkohdo.” Ma ke pahn kin taman ih nan ahmw wiewia, madamadau kan oh pilipil kan, ahmw mour ni ahnsou kohkohdo oh ahmw koapworopwor pahn mwahu.—Kaudiahl 7:16, 17; 21:3, 4.
“Karanihla Koht”
7, 8. Iaduwen me pwulopwul men kak keraniahla Koht?
7 Seims kangoange kitail en taman Siohwa ni ah kangoangehkin kitail: “Karanihla Koht, oh e pahn ketin karanih iuk.” (Seims 4:8) Siohwa iei Sounkapikada me keieu lapalap nan lahng oh sampah,oh me warohng kaudok oh kaping koaros. (Kaudiahl 4:11) Ahpw ma kitail pahn karanihla Ih, E pahn pil karanihala kitail. Met soh kin kansenamwahuiala mohngiongatail kan?—Madiu 22:37.
8 Kitail kak karanihala Siohwa ni ahl tohto. Karasepe, wahnpoaron Pohl mahsanih: “Kumwail ngidingidiong amwail kapakap, oh kumwail mwasamwasahn oh kapinga Koht ni amwail kin kapakap.” (Kolose 4:2) Met wehwehki kitail en nantiong kapakap ahnsou koaros. Ke dehr itarkihte nda “amen” mwurin ahmw pahpa oh nohno de emen riatail Kristian kin wiliankitaildi oh kapakap. Mie pak me ke kin kasalehong Siohwa ahmw madamadau oh pepehm loal akan me pid duwen dahme ke medewe, dahme ke masak oh kahpwal kan me ke kin lelohng? Mie pak ke padahkiong Siohwa soahng kan me ke sohte kak ehukiong emen aramas? Kapakap me kin kohsang nan mohngiong oh lokaia mehlel kin wahdo meleilei. (Pilipai 4:6, 7) Met e kin sewese kitail en karanihala Siohwa oh kak pehm me e kin pil karanih kitail.
9. Iaduwen irail me pwulopwul kan kin rong Siohwa?
9 Kitail pil kak sukuhliki ehu ahl en karanihala Siohwa sang kaweid wet: “Ma ke rong kaweid oh inengieng en wehwehkihla, ehu rahn ke pahn loalokong.” (Lepin Padahk 19:20) Ei ma ke pahn rong Siohwa oh peikiong ke kin kaunopadahng ahnsou kohkohdo. Iaduwen ahmw kak kasalehda me ke kin rong Siohwa? Ni soh peikasal ke kin iang towehda mihding kan koaros oh rong mwahu prokram kan me kin wiawi. Oh ke pil kin “kawauwih ahmw pahpa oh nohno” ni ahmw kin iang amwail onop en peneinei. (Episos 6:1, 2; Ipru 10:24, 25) Met wia mehkot mwahu. Ahpw en pil kapataiong met, ke kin ‘isaneki ahnsou mwahu koaros’ en kaunopadahng mihding kan oh wadek Pwuhk Sarawi kaukaule oh wia roporop kan? Ke kin nantiong kapwaiada dahme ke wadek, pwe ken kak keid nan ahl en me ‘loalokong kan’? (Episos 5:15-17; Melkahka 1:1-3) Ma ke kin wia met ke kin wie karanihla Siohwa.
10, 11. Soangen kamwahu dah kin kohieng me pwulopwul kan sang arail kin kangoange Siohwa?
10 Tepin lokaia kan nan pwuhken Lepin Padahk, ih me ngehn sarawi doadoahngki pwehn ntingihdahr kawehwe me kahrepen pwuhken Lepin Padahk ntingdi iei pwehki, “pwe kitail en kasawihada dahkot loalokong oh peneu mwahu, oh pil wehwehki lepin mahsen loal akan. Lepin Padahk pwukat kak padahkihong kumwail duwen amwail pahn momourki loalokong, oh duwen amwail pahn momourki inen, pwung, oh mwahu. Re kak kakoahiekihala me soakoahiek kan, oh padahkiong me pwulopwul kan duwen ar pahn kak kapwaiada pwukoa tohto.” (Lepin Padahk 1:1-4) Eri, ni ahmw pahn wadek oh kapwaiada kaweid en Lepin Padahk oh pil ire teikan en Pwuhk Sarawi ke pahn kakairada loalokong oh wiewia pwung oh Siohwa pahn perenki ahmw kin karanih ih. (Melkahka 15:1-5) Ni ahmw pahn kalaudehla ahmw kakairada loalokong pwung, elen madamadau pwung eri ahmw pilipil kan pahn mwahu.
11 E wia elen pweipwei en kasik me pwulopwul men en keid nan ahl en me loalokong? Soh, pwe Kristian pwulopwul kan kin wie met. Met kin imwikihla meteikan kin waunekin irail oh ‘sohte kin mwamwahleki irail pwehki re pwulopwul.’ (1 Timoty 4:12) Arail pahpa oh nohno kan kin perenki irail oh Siohwa mahsanih me irail Kristian pwulopwul kan kin wahdo peren ong mongiongih. (Lepin Padahk 27:11) Mendahki irail pwulopwul, irail kak pohnese me lokaia pwukat kin kohwong irail: “Tehk mwahu aramas mwahu, kilang aramas pwung; aramas meleilei kin mie kadaudoke.”—Melkahka 37:37.
Wia Pilipil Mwahu kan
12. Ia ehu pilipil kesempwal me irail pwulopwul kan kin wia oh dahme pilipil wet kin wiaiong irail ni ahnsou reirei?
12 Ahnsou ke pwulopwul iei ahnsou en wiahda pilipil kan oh ekei imwihkihlahn pilipil kan kin mihmi rehtail ahnsou werei. Ekei pilipil kan me ke wiahda met pahn kak doke ahmw mour ni sounpar kan me pahn kohdo. Pilipil mwahu kan kin imwikihla mour peren oh pweida mwahu. Pilipil sapwung kan kak kawehla atail mour. Medewehla uwen mehlel en met ni ahmw pahn wia pilipil riau wet. Keieu: Ihs me ke pilada en werekiong? Dahme met kesempwalki? Eri lepin padahk mahsanih: “Ma ke pahn padahngki mehkot sang rehn me loalokong kan, ke pahn pil loalokongla. A ma ke pahn kompoakepahnki me pweipwei kan, ke pahn ohkihla.” (Lepin Padahk 13:20) Met kin wehwehki me ehu ahnsou kitail pahn duwehla irail kan me kitail kin werekiong—kitail pahn kak loalokongla de pweipweila. Eri mehnia me ke pahn pilada?
13, 14. (a) Likin werekiong aramas teikan, dahme pil kin pidada werek? (b) Sapwungala dahieu irail pwulopwul kan en liksang?
13 Ni ahmw kin medewe werek ke kin medewe irail aramas kan me ke pahn iang. Met pwung ahpw werek pil kak sohte pid iang meteikan. Ni ahmw kin kilang prokram ehu nan TV, rong koul, wadek pwuhk ehu, kohla kilang kasdo ieu, de doadoahngki Internet, mepwukat pil wia werek. Ma werek pwukat kin keirda wiewia lemei, mour samin, doadoahngki wini suwed oh kamamsakau de soahng teikan me kin uhwong kaweid en Pwuhk Sarawi, eri ke kin werekiong irail me “pweipwei kan” me arail wiewia kan kin mwomwen me Siohwa sohte mie.—Melkahka 14:1.
14 Mwein ele ke pepehm me ni ahmw iangehr towehda mihding kan oh pwerisekiong soahng kan nan mwomwohdiso eri ke sohte kak lelohng apwal ni ahmw pahn kilang kasdohn wiewia lemei de rong koul ehu me ke lelki ngilen koul ahpw lokaia kan sohte konehng. Mwein ke pehm me sohte mehkot suwed kak imwikihla ma ke kilang ni mwein minit keite kilel en aramas sohte likou kan me kin pwarada nan Internet. Wahnpoaron Pohl padahkiong kitail me met elen madamadau sohte pwung! E nda: “Kaleke kumwail pitida pahn meteikan! Pwe werekiong aramas suwed kan e kin kauwehla tiahk mwahu.” (1 Korint 15:33) Ahpw, e kansensuwed pwe Kristian pwulopwul tohto kawehla arail wiewia mwahu kan sang arail werek suwed. Koasonehdi tengedi en dehr werek suwed. Ma ke wia met eri ke pahn kak kapwaiada ahn Pohl kaweid: “Kumwail dehr kahlemengih wiewia kan en sampah wet, ahpw mweidohng Koht en ketin kawiliakapwala loalamwail kan unsek. Eri, kumwail ahpw pahn esehda dahme kupwur en Koht—dahme mwahu, oh dahme e kin ketin kupwurperenki, oh dahme unsek.”—Rom 12:2.
15. Ia keriaun pilipil irail pwulopwul kan anahne wia oh soangen kasongosong dah kin pwarada ekei pak?
15 Keriaun pilipil ke pahn lelong iei ahnsou ieu pahn kohdo me ke pahn anahne pilada dahme ke mwahuki wia mwurin ahmw sukuhl. Ma ke mih wasa me apwal diar doadoahk, mwein ke pahn pehm me ke anahne ale doadoahk keieu mwahu ma ke kak. Ma ke mih nan wasa pweida mwahu ong pelien doadoahk, e pahn mie pilipil tohto me pid doadoahk me pahn kak wia mehn kasongosong. Pwehn mwahu ong ahmw nsenamwahu en war, ahmw sounpadahk kan de pahpa oh nohno pahn kangoange iuk en kilangada doadoahk pweimwahu me pahn wahdo itar mwohni oh kepwe. Mendahki e pahn wahdo itar mwohni ahpw e pahn kihsang ahnsou laud en papah Siohwa.
16, 17. Kawehwehda iaduwen iren Pwuhk Sarawi kan kak sewese me pwulopwul men en kilangwong pilada arail doadoahk ni toupahrek.
16 Tamataman en tehk nan Pwuhk Sarawi mwohn ahmw pahn wia pilipil kan. Pwuhk Sarawi kin kangoange kitail en doadoahk pwehn momour oh kasalehda me kitail kak apwalih pein kitail. (2 Deselonika 3:10-12) Ahpw, pil soahng tohto kin pidada atail pahn pilada doadoahk kan. Kangoang kohwong me pwulopwul kan en wadek iren Pwuhk Sarawi kan me mih pah oh medewe iaduwen arail pahn kak toupahrek ni arail pahn pilada arail doadoahk kan: Lepin Padahk 30:8, 9; Eklesiasdes 7:11, 12; Madiu 6:33; 1 Korint 7:31; 1 Timoty 6:9, 10. Mwurin ahmw wadekehr ire pwukat, ke kakehr kilang iaduwen Siohwa kin kilangwohng soangen doadoahk ke mwahuki?
17 Atail doadoahk en mwohni en dehpa wiahla mehkot me kesempwal sang atail doadoahk oh pwukoa ong Siohwa. Ma ke kak alehdi doadoahk mwurin high school met me mwahu. Ma ke anahne pil ekis kasukuhl mwurin high school, eri met wia mehkot me kowe oh ahmw pahpa oh nohno pahn anahne koasoia. Sohte lipilipil dahme pahn wiawi, ke dehr katiasang “mehkan en me kesempwal”—me iei mehkan en ni pali ngehn. (Pilipai 1:9, 10) Ke dehr wiahda soangen sapwungohte me Paruk nein Seremaia soun nting wiahda. E kesehla ah kesempwalki ah doadoahk en papah, oh e kohla ‘rapahki soang kan me e leme mwahu ong pein ih.’ (Seremaia 45:5) Ni ahnsoukis e manokehla me sohte mehkot me mwahu nan sampah wet me kak kahrehong ih en karanih Siohwa oh sewese ih pwehn pitsang ohlahng Serusalem. Met pil duwehte ong atail irair rahnwet.
Kesempwaliki Mehkan en Pali Ngehn
18, 19. (a) Dahme pali tohto en mehn mpomw kan kin lokolongki oh ia ahmw pepehm ni ahmw kin kilangwong irail? (b) Dahme kahrehda aramas tohto sohte kin pehm arail duhpek en pali ngehn?
18 Ke kin kilang kilel en irail seri kan nan wasa me duhpek laud kin wiawi? Ma ke kilangehr, eri mwein ke kin inenen poakeirailla. Eri ke kin pehm soangen pepehmohte ni ahmw kin kilang irail kan nan pein ahmw wasa? Dahme ke anahne en ahneki soangen pepehm en poakeirailla? Pwehki pali laud en irail pil kin duhpek. Irail kin lokolongki soangen duhpek me Eimwos kohpadahr: “ ‘Eri, ahnsou ehu pahn kohdo me I pahn kadaridiong pohn sahpw wet lehk lapalap. Aramas akan pahn duhpekla, ahpw kaidehk duhpek en men kang pilawa; re pahn men nimpilda, ahpw kaidehk duhpek en pihl. Pwe re pahn men tungoalehda oh nim ehu mahsen en sang rehn Kauno. Ngehi, Kauno, Wasa Lapalapie, me mahmahsen.’ ”—Eimwos 8:11.
19 Met mehlel, pwe pali moron aramas kin duhpek ni pali ngehn oh re “sohte kin pehm arail anahn en mehkan en pali ngehn.” (Madiu 5:3) Me tohto sohte kin pehm arail duhpek en ngehn. Ekei mwein ele pahn pehm me re medla ni pali ngehn. Ahpw ma re ahneki soahngen pepehm wet iei pwehki irail medla ong ni “loalokong mwahl en sampah wet,” me kin pidada noarok en kepwehn sampah, pelien sains, pein arail kaweid ong mour mwakelekel oh pil soahng teikan. Ekei pil kin pehm me loalokong en sampah kin kahrehong kaweid en Pwuhk Sarawi likamwete ong mehn mahs. Mendahki met, kitail ese me “sampah wet sang ah loalokong sohte kin ese Koht.” Loalokong en sampah sohte pahn kahrehong ken karanihala Koht. Arail loalokong wia “mehkot pweipwei rehn Koht.”—1 Korint 1:20, 21; 3:19.
20. Dahme e wiahki elen pweipwei en men alasang irail akan me sohte kin papah Siohwa?
20 Ma ke kin kilang kilel en seri duhpek kan, ke kin men duweirailla? Uhdahn soh! Ahpw, ekei pwulopwul en nan peneinei en Kristian kan kin kasalehda arail ineng en men duwehla irail kan me duhpek ni pali ngehn. Irail Kristian pwulopwul pwukat kin leme me irail me pwulopwul en sampah wet, sohte arail kahpwal oh re kin perenki arail mour. Ahpw irail kin manokehla me irail pwulopwul pwukat kin dohsang Siohwa. (Episos 4:17, 18) Oh re pil kin manokehla suwed kan me kin kohsang duhpek en ni pali ngehn. Ekei suwed pwukat iei liseian en kiripw oh pil ohlahn pepehm oh kahpwal en paliwar me kin kohsang mour samin, simwok, kamam sakau oh doadoahngki wini suwed kan. Duhpek en pali ngehn kin kahrehda ngehnen uhwong mehkan en pali ngehn oh sohte itar en kaweid pwehn kahluwa iuk nan mour.
21. Iaduwen atail pahn pere kitail pwe kitail en dehr alehda wiewia en irail kan me sohte kin kaudokiong Siohwa?
21 Kahrehda, ni ahmw pahn kohla nan sukuhl oh mihla nanpwungen irail kan me sohte kin kaudokiong Siohwa, ke dehr mweidong arail wiewia kan en kaloweiukedi. (2 Korint 4:18) Ekei mwein pahn kauwe de ndahki mehkan me suwed me pid soahng ngenin kan. Palien kamweit pahn kin ekis ekis kahrehong aramas en ahneki madamadau me en wia dipen nenek, sakaula, oh doadoahngki lokaia sohte konehng kin wia mehkot me kisehn atail mour oh e sohte sapwung. Ahpw, ke anahne pelian met. Doudoulahte werekiong irail kan me kin “kolokol soangen pwosonohte oh nsenmwakelekel.” Nantiong “wia duwen ahmw kak nan doadoahk en Kauno.” (1 Timoty 1:19; 1 Korint 15:58) Soupisengki doadoahk en kalohki Wehio oh pil ni Kingdom Hall. Ni erein ahmw wie suksukuhl nantiong iang doadoahk en Auxiliary Pioneer. Sang ahmw pahn kakehle ahmw pali ngehn ni ahl wet, ke pahn kin ahnsou koaros toupahrek.—2 Timoty 4:5.
22, 23. (a) Dahme kahrehda Kristian pwulopwul kan kin kalapw wiahda pilipil kan me meteikan sohte kin wehwehki? (b) Dahme irail pwulopwul kan kin ale kangoang en wia?
22 Sang ni ahmw pahn kin wia ahmw pilipil poasoanda sang mehkan en pali ngehn, meteikan sohte pahn kak wehwehki. Karasepe, emen pwutak Kristian pwulopwul kin mai en koul oh kin ale deng laud nan subject koaros nan sukuhl pwehki e loalokong. Ni ahnsou me e kesepwil, e iang ah pahpa wia doadoahk en kamwakel window pwe en kak wia ah doadoahk en pioneer kaukaule. Ah sounpadahk kan sohte wehwehki ia kahrepen ah wiahda soangen pilipil wet, ahpw ma ke wia emen me kin karanih Siohwa ke uhdahn pahn wehwehki.
23 Ni ahmw pahn medewe iaduwen ahmw pahn doadoahngki ahmw mour ni ahmw pwulopwul, ‘kaunopada ehu pai kesempwal ong pein [kowe], me pahn wia ehu poahsoan kehlail ong ni ahnsou kohkohdo. Eri, [ke] ahpw pahn kak lelohng ni mouro me uhdahn mour mehlel.’ (1 Timoty 6:19) Tengedi oh ‘tamataman ahmw Sounkapikada’ ni ahnsou me ke pwulopwul oh pil erein ahmw mour. Pwe ihete ahl me pahn kak kaluwaiuklahng mour pweida mwahu ni ahnsou kohkohdo me sohte pahn mie imwi.
Ia Ahmw Pasapeng?
• Kaweid en ngehn sarawi dahieu kak sewese me pwulopwul kan ong arail pahn koasonehdi arail mour ni ahnsou kohkohdo?
• Ia ekei ahl akan me pwulopwul kan kak “karaniahla Koht”?
• Ia ekei soangen pilipil me irail pwulopwul kan pahn wia me pahn pidada arail mour ni ahnsou kohkohdo?
[Kilel nan Pali 23]
Ke pahn doadoahngkihla ahmw kehl oh ngoang ong pein ahmw ineng kan?
[Kilel nan Pali 25]
Irail Kristian pwulopwul loalokong kan kin kanahieng pwe meserail ong ni pali ngehn en dehr ediedla